Things I Like To Whisper About

Would You Hear Me Whispering

اخر اخباري 6


اول شي و زي ما بقززكم كل سنه و زي ما الفيس بوك بعلن عن الحدث الكبير....اختفلنا نحن ويسبر الاولى بعيد ميلادنا الكريم - العمر كلّه يا رب - ال 35, و مع اني شوي هااا شوي مش مستوعبه الرقم المهول بس بدي اكتبه علشان من هلأ احكيلكم ان السنه الجاي النيّه الاحتفال بعيد ميلادي ال 34 , اه بدي ابدا ارجع حرّه انا ...حد اله عندي :)


اخدت اجازه و بالصدفه اخواني مقررين يجتمعو و كان يوم جميل جدا, بدا بمسجات من احلى الناس و بعدين غدوه برّه و بعدين بكيكتين بشهّو, الاولى ضلت شبه سليمه من اصابع الغزاه الاربعه بالعيله,اما الثانيه فانقضى على شبابها زي ما انتو شايفين تحت, مش قادرين يقاومو ,و ما وقفّت عملية الهجوم الا بس حطينا الشمعه و ما صدقو انفخ ليبدا مسلسل دوري و دوري و هلأ انا و هلأ انا و بعد نص ساعه طفي شمع اكلناهم :) و انتهى اليوم بلعبه طفوله لعبناها انا و اخواني و استمرت لنص الليل





بالنسبه للشغل فالحمد لله التأقلم مستمر و الصداقات توطدت و ساعة البريك اللي كنت اقضيها لحالي صارت تطير بسرعه من كتر الحكي و الانسجام, في موظفه تونيسيه عسل انتقلت جديد للشفت و صرنا ما انفارق بعض بالمره

طول عمري نفسي اشتغل بمكان يكون في ناتج و تقييم للاجتهاد بما اني من الناس اللي ما بقدرة غير يقدمو اكتر ما عندهم, مش لشي بس لارضاء رب العالمين وليحلل الواحد راتبه حتى لو فلان ما اشتغل و فلان تكاسل, والحمد لله الشركه اللي بشتغل فيها عاملين حساب هيك ,اشياء و بغض النظر عن القيمه الماديه او العينيه اللي بقدموها القيمه المعنويه اهم و بتصير بالسما



وجود السياره غير الحياه 365 درجه و مع الوقت صرت احفظ مواقع جديده, بس طبعا الله لا يحرمنا من الاخت جي بي اس اللي و بالرغم من مخانقاتنا بسبب سكوتها في مخارج رئيسيه و مصيريه بس متفقين بشكل عام, كترت الروحات و و الجيات, وخصوصي مع اللي كتييييييير بحبهم.

و اخرهم طلعتنا انا و حبيبتي ليو القمر, اللي بس نجتمع بنضلنا نضحك من اول الطلعه لاخرها - اه ام عمر و بنفس يوم خيانتك انت و نوريه - طلعنا تغدينا و تسوقنا و اشترينا قمصان زي بعض :) و حضرنا فيلم...بس شوووووو دمااااااااااااااار طلع :) و فهمناه و حبيناه و عشنا كل لحظه و ما ملينا و لا اتاوبنا 100 مرّه ابدا ابدا

هاي اخر اخباري اللي تزكرتها حاليا, لسا فتره التقشف و شد الحزام الافكاري شغّال عندي مع شويه عدم فضاوه مع شويتين ملل و كسل عام

اشتقتلكم كتير و اشتقت لحالي كتير.... بس اكيده اني حرجع بيوم




53 التعليقات :

أنا مهتمه أعرف شو هو الفيلم بصراحه :]

 

ههههههه....ولو انت عندي باسم فيلم

The son of no one

http://www.imdb.com/title/tt1535612/

الفيلم بضل ممل لاخر نص ساعه و باخر نص ساعه بصير كل الاكشن
و فيه نسبة مسبّات مهووووووووووله :$

 

يا لهوي! كمان التصنيف ٥ الفيلم يا دوب نجح بالعافيه!

 

كل عام وانت بألف خير,
يعني إنت من مواليد شهر 4 زيي؟
ذكرتيني انه عيد ميلادي قرب :)
الله يفرح قلبك يا رب ويسعد كل أيامك وللأحسن في شغلك وكل مخططاتك :)

 

مبتقدروش متخونونيش لسنه وحده بس؟
أو خونوني وتتفاخروش

بكرهكن,كلكن
سنحكن

سمايل يتباكى ويهرب

 

كل سنة وانتي سالمة غانمة
ينعاد عليكي بهداة البال يا رب

"
بالرغم من مخانقاتنا بسبب سكوتها في مخارج رئيسيه و مصيريه بس متفقين بشكل عام
"

توفيت رسميا من الضحك هههههههههه

 

مياسي

لما حضرناه كان راسب :$
4.3‏ ‏

كيكي
انا بشهر 3 عيد ميلادي :) شايفه اللي ما عندو فيس بوك :P

حمل زي بعض اذا :)

كل سنه وانت سالمه مقدما يا قمر
اللهم امييين...اجمعين ان شاء الله

 

ام عمر

طبعا...و هاد سؤال ينسأل :)

بس نيجي عالاردن بدنا نلبس القمصان زي بعض اصلاطن :P

ابو زينه

وانت بألف خير يا رب

كله كوم وبس تحكي
Turn left
واروح شمال وفجأه
Re calculating
لااااااا وك انت اللي حكيتي و ببدا هوشه لارجع عالطريق او بألاحرى ترجعني عالطريق الصح و بنتصالح :)

 

أصلاتن؟
هاي كلمتي كإنها؟
مين سمير رسمي..

إلبسن زي بعض,والبكله الزهريه عليّ

وسنحه سباعية الأفق يارب
بكرهكن,وفش إلك أومنيات عيد ميلاد سعيد كماناه
قال أصلاتن قال
حماااااااااااااده بالزنجبيل ع الأصلي

 

مين حماده ؟؟؟؟

اصلاطن "اصلاطن" كلمتي من قبل ما تنولدي :))

فاااااا خلص تضلك تقلديني

بكل!!! ايه نسينا نجيب بكل
المره الجاي ان شاء الله

 

ضلك عايريني بال "خمس" سنوات اللي بيناتنا
أه, ضلك

أخرتني أعطيكي بدالهن مصاري وأكيشلك ياهن وأشيل هالرسميات هدول

لا مش كلمتك,بلا ما أرجعلك ل عمو جوجل هلأ
بكرهك,, بكل زهريه كمان

 

تفظلي

http://www.mahjoob.com/en/forums/showthread.php?t=247591

هي غيظ من فيظ, ومش جعبالي أدورلك أكتر

إنتبهي ع التواريخ أه
قال أصلاتن قال
بكرهكم

 

مين ابو محجوب هاد
انا برضه اكبر واقدم منه :)

اعطيني خمس دقايق و حندم على هالحكي :$

 

بس عشنك إعترفتي إنك رح تندمي

ف أنا حـ أرحمك ومكملش شغل ضدك مع عمو الجوجل
هههههههههههههههههههههههههههههههه

قال صارت أقدم من أبو محجوب
عين هالواحد تسمعك
لووووووووووووووووووووووووول

 

مين هاد اللي بسمع بعينه !!!!

اصلاطن الواحد بسمع بدانه .... نغشه نغشه... ما تحاولي

 

بغظ النظر إنه العاملين سبسكرايب ح ينعنو أفطاس مدونتي
بس حـ ضلني وراكي ت تزهقي عيشتك


إحنا ع الويب,بنقرأ بعيونا
ف طريقة السمع بتكون خلال عملية النظر
ف,, إنتي بتسمعيني هلأ عمالك بعيونك
فــ,, عين هالواحد تسمعك يا نغشة

برظو أصلاتن؟ شكله لازمك تلفون يخليكي تشطبي البوست كله
ههههههههههههههههههههههههههههههههههه

 

عأساس انا افحمت هلأ؟؟؟

لأ يا بنتي - دليل لفظي على قدم وجودي - احنا هون بنقرأ و بنكتب ما بنحكي و بنسمع اصلاطن

وفرصه تحللو رواتبكم .... اصلاطن برضه :P

 

بنتي ف نص عينك
أه بجنب الكعكات وإنه عمو صال صال صال ختيار

اه بجنبهن

بتقرأي وبتحللي وبتشوفي الكلام عن طريق عينك وبنفس الوقت بتكون عملية إيصال المعلومه كإنك بتسمعيها وبتقرأيها بصوتك أو صوت اللي حكالك

اليوم السبت والأحد معنديش شغل وقاعدلكم ع النت
وراتبي بحلله باقي أيام الإسبوع
حلللك تفهمي طبيعة شغلي
سنحك, سنحك

 

ياباااااااايييييه....وك هديك كانت دعابه دعااااااابه وبعدين اصلاطن هداك الموقف كان وجها لوجه يا فصيحه
مهو لأني ختياره بطلت احس بالايام

يابايه شو راح اندم على هالحكي بعدين
يلا لكل حادث حديث

 

كل سنه وانتى جميله وحلوه وطعمه
باقه ورد وفل وياسمين لعيونك كل سنه وانتى طيبه ودايما منوره البلوج كله
بوسه على خدك من اختك هبه

 

وانت سالمه يا قمر :)
الله يسعدك يا احلى ورده وفله بالدنيا

منور البلوج بوجودكم دائما
مساكي عسل زيك يا احلى اخت :)

 

و أوبسين كمان
ولا بهمني

 

ههههههههههههههههههههههههههههههههههههه
تخيلت الموقف , الله لا يوفق يهودك متت ضحك

قال مانتي اللي حكيتي
Turn Left
وبعدين كلمة
Recalculating
بتحسي معناها كأنها قالتلك

الحق مش عليكي , الحق عاللي مغلب حاله وبدلّ فيكي قاعد

 

ويسبر

العمر كله
ولا يهمك مش مهم السنين اللي بتنعد
المهم السنين اللي بنعيشها

وانتِ هيك اكيد اقل من 22
كل سنة وانتِ سالمة

والله يرضى عليكِ ويسعدك
ويوفقك ويكون دائما النجاح والرضى من نصيبك

 

ام عمر

اسكتي ساكته....ونامي هلأ بكره دوام :)

ابو زينه

مهي يا ريتها حافظه الطريق و بتدل صح :$

بس الحمد لله ان الكل بستخدم البلوتوث بالموبايلات ويلا كان منظري تحفه وانا بشبّر و بقاتل فيها لحالي بالسياره :$

 

صديقي يوسف

وانت بالف خير يا رب

الحمد لله 35 سنه حافلين بالذكريات الحلوه و الذكريات البشعه اكيد

جد العمر كرقم ما بهم اذا الاحساس بالحياه و التفاؤل موجود ...لهيك بحياتي ما خبيت او استحيت احكي عمري ولا راح اخبيه ابدا

ال 34 هاي تخفيف دم على اخر هالمسا :)

اللهم امييييييييييييين

ربنا يرزقنا النجاح و الرضا دائما

 

انا اسمي مكتوب O_o
كل سنة و انت سالمة و غانمة يا احلى همسة :) و ان شاء الله كل ايامك الجاي تكون فرح و سعادة و هنا من الله :)

صحيح انك اكلتي على الكيكة و ما جبتيلي حصتي منها بس برضو كتير انبسطت بالطلعة معك :) و خصوصا الفلم العجيب اللي حضرناه :D

خليني نعيد هيك خيانات كتير مش عشان نقهر بعض ناس لا ابدا :) بس عشان نجاكرهم :)

 

كل عام وانتِ بخير يارب
وتكوني بصحة و سعيدة بحياتك
:)

 

سمايل عامل حاله مطنش
بس هوه من جواه بده يفكع فكع

سأنتقم,, سأنتقم

 

ويسبر هانم، كل عام و إنتي و كل إللي بتحبيهم بألف خير يا رب.
:-)

طبعاً أنا متأخر كثير! بس مش ذنبي إنك نزلتي الإدراج الثاني بعد هاظ بيوم، و بما إني لم أعد أتسوق في المدونات بشكل يومي، ما شفته.
:-(

عيشي يومك و ما عليك بالعمر، هاي كلها أرقام، المهم كيف بتستفيدي من هالسنين.

عندي مشكلة مع الرياضيات، لازم أطبقها في كل مكان، فجملتك "وجود السياره غير الحياه 365 درجة" بتعني إنو حياتك ما اتغيرت إلا خمس درجات!... أنا شايفه تغيير مش محرز!....
;-)
طبعاً مزح و عارف شو بتقصدي... الله يهنيكي و يديم عليكي الصحة و العافية و تظلي متطابشة مع "جي بي أس" هانم مع إني بأسميه "ناڤيچيتر" باشا

 

ليو

الله يسعدك يا رب ...وانت بالف خير و سالمه و غانمة دائما

ان شاء الله بنعيدها و بنكون شايفين الريت للافلام قبل ما نطلع :$

و بالمسبة للكيكه فاااا بما ان الاحتفالات بالعيد ميلاد ما زالت مستمره فما راح عليكي شي
لكن يومها من الشبع حضرنا فيلم بدون بوب كورن حتى :$

white freedom

وانت بالف خير....اللهم امين و اجمعين ان شاء الله

طولتي الغيبه يا قمر :)

 

ام عمر

السمايلي تبعك شغّال صح...هي اليوم عندي دوام وما قدرنا نرتبها...بس على مين...قريبا جدا جدا ان شاء الله بتزبط
نا نانا نا نااااااا

صالح باشا

الحمد لله الحمد لله موضوع العمر مش مشكله عندي و لهيك بكتبه و بعلنه :)

العمر ارقام زي ما حكيت و المهم النفسيه حديييييييييييييييييد و شبااااب عالاخر :)

وانت بالف خير يا رب ....و ربنا يهليلنا احبابنا بحياتنا على طول

هي خمس درجات بس لافين لتحت, من منطلق انهم قلبو الحياه يعني :)

جي بي اس اولا منعا للاختلاط...احنا ما عنّا لعب و بعدين اذا اتمشكلت مع نافيجيتر باشا كلمه مني كلمه منو بيبطل يحكي ليومين وانا مش ناقصني, جي بي اس بنتقاتل و بعد دقيقه بنرجع اصحاب :)

مسائك سعيد صديقنا صالح

 

متأخره باعرف بس شو اعمل يعني الحق ع الدراسة والشغل والاولاد وكمان ما عرفت انه فيه كيك :)
كل عام وانت بخير والعمر كله يا رب

 

أبدكيش توقفي عرط عن السيارة!

أي هو عقدة المصعد / الأسنسيييييييييييييل من قليل

مترابط الموضوع

ههههه

---
أعلن من هذا المنبر
أن الإشارة إلى منتديات أبو محجوبية غير مسموح إتلاقن

... قد ما بتقرن إنتي و "إياها"
هههههههههه

---

صايرين تحظرن أفلام! يااااااااااااااااااااااااااا للهول

---

منو اللي قيم الإدراج إنو "ممل" - همممممممم

 

Sozan

الله يعطيكي العافيه يا قمر

كتييير كتيييييير كتييييييييييييييييير اشتقنالك

ان شاء الله تكون كل امورك بخير و كل شي بمشي زي ما بدك بالزبط :(

وانت بالف خير يا رب

ابو انس :)

كل شهر بدفع فيها الشيء الفلاني ...فاكيد راح احكي عنها ان ايفري اند ايتش بوست :)
ردا على فشخره التوفل :)

هالعالم الخفي ابو محجوب اللي مش عارفه اسوق عليه :$
بروح علشان ادور عالسمايلي لاواكب الجيل الجديد و مش ملحقه ياخوك :(

بالنسبه للممل فااااا في استنصاد افقي عامودي حاد الزاويه من حد انا شاكه فيه في كل بوست ما بترتاح نفسيته الا ليحط عليها

بس ولااااااااااااااااااا بهمني :)
في 2 ممتع :)

 

على كلّ على كلّ

خلي ال 2 ممتع ينفعوكي!

 

الله يرضى عليه اللي حطهم :)

 

بديش أقول منافق

خليني أقول

جبّير خواطر أصلي ...

:P

 

احلى شي ان هالتعليق لحاله و سبحان الله اجا بالرسائل الغير مرغوب بها :)

يا اخي بفهم هالجوجل

 

حتى عمو غوغل بيزعل "مرات" من صدى كلمة الحق الرنان

 

عمو جوجل من يوم يومه وهو زي حد السيف
الكلمه الغلط ما برضى يمرقها

صفّي نيتك ممكن يرضى عليك

 

كل سنة وإنتي سالمة بأثر رجعي
صدقي إنبسطت وأنا بقرأ الطرم اللي هون
شو هاد,, اللي يكون بعونكم عليّ وعلى رغيي

 

ما فيش فايدة
لازم طق الحنك ... أي اشي، المهم تسولفن

كل عرس دربكة

 

جاليت بقرأ تدوينات 2010 هههههه نفس الشي كنا
ناقر ونقير :))

ايام دبي وايام ما كنت 35 😍

 

حاليا مش جاليت....واللي بالاخر المفروض وجه سعيد :/
لولا متاكده صار عندك الرد كان لغيته :|

 

and u dare to say u r in the IT industry!

2aaaaaaaaaaaaaaaaaaaaaaaa5 bas

 

بعدي عن عالم التدوين مخفف نسبة الشر بالردود...وقربك منه مخليك خبير ماشاء الله :/
لازم ارجع وبقوة مش وضع هاد

 

وسبر,, ليش متى بطلتي 35؟؟

وفي بيوصلني إشعارات إنه في حدا دخل عا حوارنا اللطيف هاظ ,, بدون إستأزان

 

u mean 135?

and last time I checked this was -still- a free blogger

eh!!

 

Um ka'aeek

طبعا بطلت 35...هلأ صرت32 :))

هيثم

بس علشان تعرف اني منيحه انا بسمحلكم تتقاتلو ببلاش هون
فاااا تقاتلو سوا سوا ;)

 

إم كعك تصر إلحاحاً إنها سامعة صوت أبو بريص بين الكومنتات؟؟

وسبره,, إنتي صرتي 29 يا بطيخة,, العد ببلش عكسي
ركزي,, ركزي

وأه,, أه

خلي إحتفال عودتك للتدوين يوم ما نطلع الأسبوع هاظ
كنه بكره صح؟؟

كعك وكنافه وزواكي وصور ومقاهره إشي من الأخر يختشي

 

لولا ما بدي نشمت العدا فينا كان فهمتك غلطك
عمري 38 يعني هلأ صرت 32
29 يعني 41 ياااا "حبيبتي" :/

اما بالنسبه لخيانه بكرة فااااا...انتظرونا بالتفاصيل و بالصور :))