Things I Like To Whisper About

Would You Hear Me Whispering

كلمة السر




من و احنا صغار و احنا بنحضر افلام الكارتون و لكل عمل سحري و لكل فعل خارق في مدخل كلمة سر...كلمة خاصه لحتى يصير هالفعل الخطير....يعني مثلا...علي بابا و الاربعين حرامي - وما قصدي شي ولا حضرته للفيديو فلا تروحو بتفكيركم لبعيد - لمّا كانو بدهم تفتح المغاره كانو يحكو "افتح يا سمسم".... لمّا الساحره غيرت اليقطينه لعربايه لسندريلا حكت "ابراكدابرا" - حاضرة النسخه المصريه منها وما بعرفش عنجليزي - اكيد فهمتو قصدي...المفروض يكون في كلمة سر او حركة معينه لحتى ينتج عنها الاشي الخارق.

بس كبرنا تعلمنا انه هالكلام كلّه قصص كارتون و لعب ولاد صغار, ليصير شي خارق ولتحقق هدفك و لتوصل لنتيجه معينه بدك تشتغل, وبدك تتعب , و انعجئنا كلنا كل واحد بطريقه ليوصل للهدف.
مرات بكون عند الشخص اكتر من هدف واحد و هالشي مش غلط و لا عيب , بل بالعكس ممكن يكون اشي كتير منيح و لكن برضه تعلمنا انك لتحقق الاهداف الاكبر و الاكثر بدك تضاعف جهدك اضعاف و اضعاف, بدك تتعب اكتر و اكتر لتوصل للنتيجه.

و بس كبرنا اكتر - اه بحكي عن حالي هون ...35!!! لهلأ مش مصدقه....يلا ما علينا هلأ, المهم بس كبرنا فهمنا انّا مقسمين لفئتين, فئه بتمووووووت و هي بتجتهد و بتضل مكانها, وفئه بتعرف تحسبها صح, بمفهوم الصح الخاص فيهم و اللي بمفهوم الفئه اللي واقفه مكانها اشي غلط, و بتوصل و بتحقق هدفها, و هالفئه التانيه بتصير اهدافها اكبر و اكتر و لكن هالمره مفهوم كتره الاهداف بكون عباره عن طمع و....اممممم بدي احكي كلمة ما فيها اساءه مثل وقاحة و قلّة ادب علشان ما نسيء لحد رجاءا, خلينا على كلمة طمع افضل, و طبيعي هيك اهداف بدهاش تعب و لا جهد, بدها شوية "فهلوة" و "تبادل مصالح".

ممكن اللي فوق كلّه كلام مش مفهوم, بس في شي بلف و بدور حوله ومش عارفه امشي بطريق مباشر اله ولكن.....الكلام كلّة مقدمة للسؤال اللي يطرح نفسه ارضا.....كم ملف المفروض اجيب و كم مرّه لازم افتح و اسكر الملف و وين المفروض ارمي الملفات المغلقه لحتى يتغير لون جواز سفري؟؟؟؟

10 التعليقات :

هسا الخطوه الاهم مش الملفات
الموضوع بتطلب يكون "مرضي عنك" عشان تقدري "تزوري طريقك" لمكان ما بوزعو الجوازات المتلونه ..

الله بعين خيتي .. الله بعين

وهاي عالبيعه


http://islahnews.net/wp-content/uploads/2012/03/547366_372480526107713_190690067620094_1157174_1150779016_n.jpg

 

بصراحة ياقمر مافهمت شيء و فهمت كل شيء

بس ليا تعليق على اخر سطرين ..

ايش رايك نستبدل جوازات بعض.. جوازي اخضر و خلص و ماجددته كمان
:] :] :]

 

@Mr Kooz

اه نسيتها هاي.... الرضا لسا قضّه لحالها و بدها كلمات ليست كالكلمات :$

الحمد لله عالحكلي ...راضيه و مبسوطه فيه :)

@Wafa



لاااا انا بدي لون اكثر فرفحه....احمر مثلا :)
شوفي اللينك اللي حطه كوز بتفهميني اكتر :)

 

كلمة السر
"فاسد"

 

كل هاد عينك ع الجواز الأحمر
هههههههه,, هيك تخنتيها

شوفي ت أحكيلك
إعملي اللي إنتي شايفاه صح,بمعطياتك وترباتك ودينك وأخلاقك
وكبي كلام الناس وراكي

إنك تكوني طموحه أو طماعه,هاد شي بخصك إنتي لحالك
ومافي حدن بقدر يحجمك ضمن فئه من هدول
إنتي اللي بتدخلي حالك بإجريكي

لتكوني واضحه مع حالك كيف بدك تشتغلي وتجتهدي وتكبري بمركزك,خليكي مع ربنا وأعطي ثقه بال " أنا " اللي جواتك
ولتخليش حدن يحكيلك كبرتي أو بعدك صغيره

محدنش بالدنيا ربنا أعطاه كتاب وحكاله إحصرلي هالعالم ضمن فئه ؟
ربنا اللي بقرر مش الناس

شتيت أنا وإلا كيف؟

 

@W7l

لااااا واجرح شخصيته للجواز ...مهو اساسا كحلي بدك يتأزم و يصير اخضر :$

@ um omar


ايش في ....سلامتك 0_0

انا بس فهمت...انتي مش كبيره انتي صغيره :)

انا بسأل سؤال بريء خالي من اي مشاعر الحقد الطبقي عفكره

 

هههههههههههههه
لسه جايبه سيرتك عند كيكي بخصوص موضوع التعليقات بالذات...شو هاد ؟
توارد افكار؟
وللا خوووف ؟
:)

بس خلاص
بديش اعلق على بقية المواضيع لحسن اذا انفتحت مش رح اسكت ...خلينا مستورين الله يستر عليكِ ههههههههه
بعرف ما بتحبيها هاي الدعوه :)
ولا انا بس طلعت على السياق

 

أيواااااااااااااااا

سياسة!

يا لهوتيييييييييي

أبقدرش أعلق

كونفلكت أوف إنترست و هيكا

:النائب الدائم لمنطقة القوقاز في الشرق المسخم الأوسط:

 

نيسانه

لااا زبطته و بعدين رحت اتفلسف عند كيكي عأساس اني منيحه و ملتزمه :)

بلاااا ما نسم بدنا....ولا يهمك يا قمر
الواحد مش ناقصه


هيثم

في عالم جبنات بشااااااااااااااااااكل

نائب؟!؟!؟!
هو انت منيهم؟؟؟
وانا بقول يا اخي ...طبيعي ما نطيق بعض

 

ما يصح إلا الطبيعي