Things I Like To Whisper About

Would You Hear Me Whispering

كلمات...كلمات




قال لها انت مختلفه
احببت قبلك لا انكر
ولكنك شيء جديد
ابتسامتك الرائعه
خفّة روحك المنعشه
تواصلنا العقلي المستمر و المفاجأ
كيف تستطيعين ان تفهمي ما اقصد بدون شروحات
كيف تفهمين كلمات صمتي و تهدّئين من روعي بدون ان اشكي
كيف تستشعرين غضبي فتهاتفيني دون ان اخبرك
انت ملاك...نعم انت ملاك يسير بيننا و نحن لا نعلم
اين كنت؟؟
لقد بحثت عنك في وجوه و شخصيات كثيره
اني....اني احبك حد الجنون
انت اصبحت جزء مني لا استطيع الاستغناء عنه
لا تشرحي لي ولا تقولي شيء...
ظروفك ؟؟؟ ايّة ظروف
مهما كانت انا اعشقها مثلما اعشقك
ماذا؟؟؟
.
.
.
.
مطلقة!!!!
انا اسف ولكن.....
انت بترضي لاخوك يتزوج وحده مطلقه
.
.
.
.
ومضى



24 التعليقات :

مشكلتي مش بالجزء الاخير او النهاية

مشكلتي بالجزء الاول
هايّ حسيتها قطعة محفوظات درسوها الطلاب في الصف العاشر وما نسيوها ابدا
وبيحبوا يسمعوها لكل صبيّة بيقابلوها
خوفا من ان ينسوها ويرسبوا في الامتحان

انا بفكر اضع صيغة جديدة تتناسب مع الربيع العربي
فيها الكثير من الكلمات الجديدة

بعدين متى ممكن الصبايّا يقتنعوا ان الاسطوانة المشروخة تبعت المحفوظة الخالدة انتهت صلاحيّتها ولم تعد تصلح

هو لو احبها بصدق لما بادرها باسطوانته المشروخة ولا تفاجأ بانها مطلقة ...

مساء الفل والياسمين
وصحتين على سلطة الفواكه

 

Yosef

الموضوع محاولة لبدء الحوار بموقف العالم - الا من رحم ربي - و حساسيتهم من كلمة مطلقه

هي اسطوانه مشروخه فعلا...بس بدّي ابين انه قمّة الهيام و قمّة المشاعر كيف بتقلب بالاخر

يمكن الحب ما بده ديباجه ولا صف كلام....هيك بيجي طب لزق و بتضيع معه الكلمات اساسا

يا مساء الهنا و الرضا
على قلبك يا رب :)

 

مسآء الخيرآت والحريآت

ذآك هو حآل الفِ:ر العربى
مهمآ خرجنآ بالطرقآت
وغيرنآ أنظمه الفسآد

يظل الفسآد الأكبر بالعقول
ةتخلف العآدآت والتقآليد
والبعد كل البعد عن المنطقيه والمصدآقيه

لو حقآ أحبهآ سيكون الدآفع الاول له أن يغير نظره المجتمع لهآ
ولآ أن يزيد الطين بله

ولكن هذآ الفكر العربى
وتغيره يكآد يكون مستحيلآ

رآقت لى كلمآتك

 

تَرَآَنِيْل ♥ ~

اهلا وسهلا فيك و نورتي مدونتي المتواضعه


للاسف مهما ظهر بان المجتمعات العربيه تتطور تبقى بعض الافكار الغريبه مسيطره على العقول

لو انعكست الاية وكان هو الذي تعرض لتجربة الطلاق كانت تغيّرت الكلمات...
فكما تعرفين لا شيء لاااااااااااااااااااشيء يعيب الرجل عند بعض المجتمعات

دمتي بخير

 

وضع مؤسف و محزن على كل المستويات ...

لكن طريقتك في ايصال المعنى عجبتني :)

اكثر شي حبيته ال180 درجة في الكلام ... ها هاها ... شو في ناس منافقة :)

دمتي بكل الود

 

Qwaider

اهلا اهلا بقويدر باشا :)
زمااان ما نورتنا

ما انا حاولت ابالغ بالاول لحتى ابيّن التغيير الشامل اللي بصير من كلمة "مطلقه" و تأثيرها اللي بقلب الكلمات و المشاعر و الخطط وكل شي

 

فتحت مربع التعليق
وصفنت 10 دقايق مش عارف بدي أكتب



بالمختصر المفيد ..
هاي وحده من أول الشغلات اللي لازم تنعشل من روس الناس ..
اذا صارلنا فرصه وعملنا غسيل مخ لهالشعب المعفن ..

 

Mr.Kooz

لسا بدنا وقت كتيييييييييييير لتتغير هالعقول...

مشكله و ظلم كبير لفئه مش قليله

بس ان خليت بليت زي ما بحكو...بالمقابل لسا في ناس هالتفكير مش مسيطر عليهم

 

للأسف نظرة مجتمعنا للمطلقات دون
المطلقين الرجال لا تحتمل
سيناريو يحدث دوما في مجتمعنا

ولكن حتى نعدل في الحكم ليست فقط نظرة الرجال للمطلقات هي الغلط. كم من أم واخوات انقلبوا على ابنهم او اخيهم لأنه أحب واراد الزواج من مطلقه؟

 

Jaraad

للاسف الايام و السنين بتمشي و لسا في ناس بتحمل نفس التفكير

بحسهم ما بتتغير نظرتهم للموضوع الا بس يصير في عندهم بنت مطلقه...بفهمو و بحسو كيف كانو يفكرو

انا معك بموضوع رفض الام و الاخت...ولهيك ختمت الكلام...بانت بترضي "لاخوكي" يتزوج وحده مطلقه

 

المشكلة بالمجتمع اللي ما برحم
بكون الشب انصعق لما سمع هالكلمة , واول اشي خطر بباله انه شو الناس بدها تحكي عنه

 

الله لا يحرمنا من التخلف يا رب:)
ء
انا مع رأي كوووز ... نحن مش بحاجه لتغيير مفاهيم وتصحيح افكار
لاء نحن بحاجه لغسيل مخ وبيجوز الغسيل ما بينفع حتى لو استعملنا ايريال وتايد حتى الهاربكس تبع الحمامات ما بينفع ف اذا بياخدوه هالمخ ويركبولنا واحد ياباني جديد بيكون احسن

 

إلا التفاههه أعييت من يعالجها

في ناس" بدون تعميم كبير" خلص عندهم إنه الطلاق إشي وسخ
وأي مطلقه,, هيه " همه الوسخين" وسخه
ومفروض تروح تعتكف بسمجد أو بغرفتها عبيل ما تموت
لا تطلع ولا تدرس ولا تشتغل
خلصت صلاحيتها من الدنيا,, كإنها أخر الدنيا هالحكي


وسنحه عالميه فوق بنفسجيه تسنح هيك أشكال

 

LUNAR

و الشب جزء من المجتمع...وهو كمان مشارك بالفكرة بمجرد استسلامه للمجتمع هاد في حالة ما كان عندو نفس التفكير

الموضوع كبير و بتناقل من جيل لجيل...الا من رحم ربي

نيسانة التدوين

هههههههههه....لااا ان شاء الله بخلصنا منه :)

هاربكس!!! هاد هريان و بريحه منعشه :)

الله بعين يا نيسانه...بدنا نستحملهم

 

Um Ommar

المطلقه يعني....مشاكل و وجع راس
فبلاها احسنلك هيك بفكرو

ولو شب مطلق بتكون برضه هي اللي مش منيحه و بتعمله مشاكل و وجع راس فطلقها و ريح باله

طريقك مسدودون مسدودون يا ولدي :$

ايون....زي ما حكت ام عمر :$

 

انا براهن حتى لو انها مش مطلقة
مش رح يتزوجها اصلا
لانه لو كان بيحبها فعلا
لما اهتم لموضوع الطلاق

نجي للقصص الجانبية هههه
كان معنا بالجامعة شب وبنت مغرمين ببعض بجنون
بدون شرح طويل ما تزوجوا
وتزوجت البنت وفشلت ورجعت لبيت اهلها مع طفلة
وعندما عاد من الخليج وعرف بالقصة
تقدم مرة اخرى وطبعا اهلها طاروا فيه
حلفت البنت صاحبتنا هاي
انه عمل غرفة نوم لبنتها قبل غرفة نوم الهم
شو رايك؟؟؟

فالموضوع عزيزتي موضوع ذئاب تلعب بقلوب البنات

لكني طبعا لا انكر ان موضوع الطلاق في مجتمعنا لا زال نقطة تخلف
مع انه النظرة اليوم اختلفت كتير عن ابل 20 سنة او حتى 10 سنوات

دمت بخير

 

same reply as in previous topic
it is the sick mentality of our community, they just concentrate on silly things that do not interrupt the partnership life!

u dont need to worry abt it at all,

 

بس حبيت أسجل حضور أكثر منه تعليق لأني لا بأفهم بالجزء الأول المتعلق بقطعة المحفوظات (حسب تعبير أخي أبو عمر)، و لا بالجزء الثاني المتعلق بمشاكل المطلقات
:-)

 

جوابي لاي حدا بيحكي كلمة عن المطلقات هو ان أمهات المؤمنات كلهن ثيبات عدا السيدة عايشة رضوان الله عليها و اخص بالتذكير بأم بنات و اولاد الرسول الكريم السيدة خديجة رضى الله عنها و المبشرة بالجنة و اللي كانت احب زوجات الرسول الى قلبه و لم يتزوج عليها قط قبل وفاتها

فهذا اللي بحكي ترضيها و ما ترضيها اذا الرسول الكريم رضاها انت مين لتيجي و تشوف حالك على المطلقة اللي ممكن تكون احسن منك ألالف المرات بالتقوى و الايمان

الله يبعد عنك و عنا المرضين نفسياُ

 

I love the unique way you made your point.
This subject is very common in the Arab world. I wish people were more open-minded when it comes to this issue, but unfortunately, they have tunnel vision when it comes to the female.
Regardless of any positive aspect of her being, she is simply a divorced woman who does not deserve another chance, merely because she is a woman.
I haven't read your posts in a while, but plan on coming back. :)

 

اصدقائي و صديقاتي

مسائكم ورد و فل....اسفة عالتأخير بالرد

لي عوده قريبه ان شاء الله بس هلأ اجا موعد الشغل :$
نراكم

دمتم بخير

 

أمل

مسا الورد

كلامك في منو كتير...هو اسطوانه مشروخه و للاسف بتمشي على البعض بس الخوف و القلق من وجع الراس من مسمى مطلقه عند بعض العائلات موجودج كمان

اهلا فيكي دائما يا قمر

Mphammad

و المشكله ان في ناس بتنادي بتطور الشعوب و تغيير طريقه تفكيرها و همه نفسهم بس ينحطو بمواقف مشابهه بكون الهم نفس ردّة الفعل...كله تنظير بتنظير

 

Saleh

ههههههههههه....مش عارفه ليش ضحكت من كل قلبي على عباره " مشاكل المطلقات" الله يبعد المشاكل و وجع الراس عن الجميع يا رب

مسائك فل صديقي و عالمنا الافتراضي صحيح منور بوجود الجميع و لكن زاد نوره برجعتك وهاد رأي الجميع :)

ليو

اولا و بعدين معنا اه؟؟؟
ليش مش راضيه تزبط لقائاتنا ؟؟؟ في ناس بتقرّ في الموضوع و قرها بجيب نتيجه شكله :)

يا حبيبتي يا ليو.... في عالم قلّة الرد و النقاش اريح و ارحم من اي كلمه بتنحكى معهم...

اللهم امين يا رب

 

Yemwnia68

اهلا اهلا يا قمر...زماااااااااان ما نورتيني :)

الله يسعدك وجودكم معي هو اللي بميز مدونتي

هدول الناس كلمه " امرأه" او نسوان على رأيهم هو مسبّه بحد ذاتها بدون ذكر الحاله الاجتماعيه فلك ان تتخيلي اجتماع الكلمتين "مره" و "مطلقه" بنفس الوقت شو ممكن يعنيلهم

مش انها بتستحقش فرصه تانيه...لا ممكن ما بتستحق الحياه حتى ...

اهلا و سهلا فيكي دائما و لا تطولي الغيبه علينا :)