Things I Like To Whisper About

Would You Hear Me Whispering

حيداشر...حيداشر...الفين و حيداشر :)


اليوم بالتاريخ ما اله اي معنى...بس احنا بنحب نلهي حالنا و نلتهي باي شي, و لكن اليوم بالتارخ بعنيلي اشي, اليوم بدي اعترف لنفسي و قدامكم كلكم اني اكتشفت اني بحب حياتي :) الاجازه هاي فتّحت عيوني على اشياء حوالي و نعم كتيره موجوده بحياتي مش عارفه شو اللي كان مغمم على قلبي و عيوني من مدّه ومخليني ما اطلع من حاله ال.... مش عارفه شو الاقيلها اسم او وصف, بس اعتقد انكم كلكم اللي بتعرفوني منيح فاهمين عن شو بحكي


بالاجازه هاي عرفت ان كل الناس ماشيه وانا اللي وقفت, بحبهم و بحبوني ...بشتقلهم و بشتاقولي ...ما بقدر اعيش بدونهم وما بقدرو يعيشو بدوني بس استمرو و انا اللي وقفت...

حتى وانا بحكي القصص اللي صارت معي والمواقف اكتشفت اني صار عندي صديقات و اصدقاء كتير بالشغل وانا مش حاسه ولا منتبهه, كنت افكر اني لسا ما كوّنت صداقات حقيقيه و لكن القصص اثبتت عكس هاد, اللي ما برضى واللي ما بترضى ياكلو الا بس ياخدوني معهم علشان ما اكل لحالي, واللي ما بترضى تروّح الا بس اروّح معها..واللي ما بطلب اكل لحاله الا بس يسألني شو بدي...واللي وقفّت باص الشغل و نزلت من الباص وما رضيت تركب الا بس وصلت...واللي ساعدوني بموضوع النقل بالسكن...واللي و اللي واللي.. كلّه ما كنت شايفته ولا حاسه فيه...كيف مش عارفه!!!

فاااااا ابتداءا من هلأ...لا نكد بعد اليوم... الحياه تفاؤل تفاؤل تفاؤل و تعلّم و استفاده من اي تجربة جديده بدون ما اقبل اي خسائر
من اليوم لا ذكريات و لا حاضر ولا مستقبل لازم يغيرني الا للافضل
حق نفسي عليّ اني ما اوقف ولا اغمض و اتغاضى حق نفسي علي اني امشي وما اوقف.

الحمد لله رب العالمين على جميع نعمه اللي انعمها علي ...اللي بعرفها و اللي ما بعرفها ....والحمد لله على نعمة وجودكم انتو بحياتي اللي زهقّتكم من الملل اللي كنت فيه و استحملتوني :) بس خلص ان شاء الله مرحله و مشيت

مسائكم سعيد :)




26 التعليقات :

على ما يبدو إنو التأقلم والإستقرار خليني أقول بدا يبين :) يمكن إنتي ما كنتي متشائمة لأ ...إنتي كنتي لسى ما تعودتي عالجو ما استقريتي...وهلأ بعد كل شي ما أخد مكانه بلشتي تفتحي عيونك مزبوط وراحت الغمامه عن عيونك ...ما بعرف بس حاسه إنو ممكن كانو كل هدول الناس حواليكي من زمان بس النفسية اللي كنتي فيها غطّت على عيونك وما عدتي شفتي شي .....الحمد لله إنو التفائل نزل عالساحه أخيرا والحياة بلشت تحلو أكتر إن شا الله على طول يا رب :)))
وإنزل عالساحه يا تفاؤلــنا وانزل عالساحــه :)))
الحياه حلوه بس نفهمها ^_^

 

هو بالزبط هاد اللي كان صاير معي :$


الحلو اني من ساعة ما اجيت هالاجازه وانا حاسة بشعور


يا عنيه يا قلبي جرا ايه...الدنيا احلوت كده ليه
يا صحابي يا اهلي يا جراني...انا عايزه اخدكو باحضاني :)

هههه..جد والله
كل ما حد يسألني اجاوبة نفس الجواب

ان شاء الله ربنا بديم التفاؤل عالجميع و تضل ايامنا حلوه على طول

مسائك فل وياسمين و قومي نامي بكره عليكي دوام :)

 

هذه هي الروح العالية :) الله يهنيك ويسعدك وان انشاء الله بتظلي هيك دايما

 

يا خبر ابيض !!!
....كل ده حصل في حيداعشر حيداعشر!!!

طيب يا ستي الحمدلله على هالتطورات والحمدلله على عودة ويسبر اللي بنعرفها واللي افتقدناها اوي اوي اوي

عموما وعلى هامش الاكتشافات....غريبه امر هذه النفس البشريه ...حصلت معي شغله صغيره في العيد ورجعتني لموقف كان مزعلني من عشرين سنه ولهلا مش قادره انساه ولا اسامح فيه....فجأه بموقف صغير خلال العيد لقيت حالي سامحت ورضيت....وبدون اي تدخل اي حدا...لحالي وبين وبين نفسي....

اه والنبي...
بيني وبين نفسي يا أوختي
:)

 

وانا هيك كمان بحكي
انه انتي ما كنتي متعودة ع الجو لسة .. وهلق بديتي تستقري :)

ونعم للحياة والتفاؤل :)

 

الله يديم عليك السعادة و التفائل

 

كثير حلو , الله يديمها عليكي يا رب
الحمد لله , اخبار كثير حلوة والله , طمنتيني عليكي هيك

بس ابعدي عن الطبيخ وتصوير كل اشي بتطبخيه زي ليونيس

بنخسر بعض

:(

 

Aseel

تسلمي يا قمر..ان شاء الله حتستمر :)
ربنا يسعد اوقاتك كلها اسولة

نيسان

هههههه...ضحكتيني على بيني ة بين نفسي يا اوختي

لاااا المزاج عال العال ان شاء الله على طول

شعور كتير جميل انك تقدري تسامحي و حتى لو متأخر...والاجمل انها تكون نابعه من النفس مش احراج او علشان وساطات اي حد

قلبك ابيض صافي بنعرفه دائما يا احلى نيسانه مدونين

 

Ahmad

اهلا وسهلا باحمد :)

اعذرني ما رحبت برجعتك لعالمنا من قبل بسبب الاجازه و العجئه...اشتقنالك معنا هون لا تبعد مرّه تانيه ودائما طمنا على مشروع التخرج :)

ان شاء الله الاستقرار بزيد مع الوقت....دائما و ابدا نعم للتفاؤل

محمد

تسلم يا رب...علينا اجمعين ان شاء الله :)

 

ابعدي عن الطبيخ قال!

يا أبو زينة أي هي ظل فيها طبيخ

!

خخخخخخخ


I surprise myself! :P

 

LUNAR

امين يا رب...ربنا يديم راحة البال عالجميع ان شاء الله

ايه...كيف عرفت :)
محوشة صور و ناوية اعمل جزء مخصص للتجارب الطبيخيه :)
انتظروووونااا
بس ببداها بملوخيه و معكرونه علشان ما تتعب نفسيتك :)

 

Sheeshany

دائما مليء بالمفاجات ...بس حاسستك تعبان -لا سمح الله - مبطل مبدع بالشر زي زمان :)

صاير شرير ضعيف

له له له يا هيثم

 

give me some time ,, I just got the internet service back! just couple of minutes ago :)

سأريكم/نّ

 

:)

لاا لااا ...جو الاردن والبرد مش ماشي معك شكله

وين ايام اللئم!!! وين ايام الشر

تسك تسك تسك

 

شيشاني
شكلها ويسبر جد مش ناوية على خير ههههههه


ويسبر
اذا هيك , الله يجعل ايامك كلها ملوخية ومعكرونة عشان نفسيتي

:(

 

لا انكر انه حيكون هناك الكثير من المعكرونه :)

مش فاهمه كيف ما بتحبها !!!

 

انتي الثانية , انا مش عارف كيف انتو بتعتبروها اكل

انا بحسها تهبّل عالشخص الجائع
ماله المنسف؟

 

منسف !!!
المشكله بتقارن المعكرونه باشي ما بحبه :$

 

لأأأااااااااااااااااااااااا لا تقوليلي عليكي دوام نامي بكير ....هاي الجملة بكرههااااااااااااا

 

يعني في حدا بحبش المنسف , بس مش لازم يكون في حدا بحبش المعكرونة

شو هالقمع هاظ

 

الله يديم التفاؤل ويخليلك أيامك كلها ربيع وألوان يا رب :)

 

Orangee


ههههه...مهو من كتر ما بسمعها نفسي احكيها لحد :)

LUNAR

مش قمع...هو نوع من انواع الافترا :)

كيكي

امييييييين يا رب العالمين

ايامنا كلنا ان شاء الله مليانه بالفرح على طول

 

يا رب ايامك كلها تبقى حب وسعاده وتفائل
تحياتى لويسبر القمرايه

 

جميل ان اراك تدونين بايجابية الله يخلي ليك اصحابك واحبابك الي حواليك
كوني بخير

 

لا نكد بعد اليوم... الحياه تفاؤل تفاؤل تفاؤل و تعلّم و استفاده من اي تجربة جديده

:-)

الله يخليلك كل إللي بيحبوكي و بتحبيهم و يقرب بينكم

خلص مادامك استقريتي و صرتي من أهل الإمارات عن جد، صار الواحد إله عين يطلب منك حاجات لإم عمر

;-)

 

هبة

تسلمي يا قمر

امييييييين يا رب

ايامنا اجمعين ان شاء الله

Saba7al5air

صباح ومسا الورد يا قمر :)
امين يا رب
و يخليلك كل اللي بتحبيهم بحياتك على طول يا رب

Saleh

لااااا...معقول!!!

صالح في بيتنا...يا مرحبا يا مرحبا :)

ان شاء الله لا نكد بعد اليوم

اليوم رجعت لدبي ..في شويه غصّه بس بضلي امسحها
قبل ما اسافر حجزت لاهلي اخر الشهر يجو هون :)
فهلأ بديت بالعد التنازلي لجيتهم ان شاء الله :)

امين
تسلم صديقي ...و يخاياك كل احبابك يا رب

ولو...انتو تأمرو ... انا جاهزه بتوصيل كل اللي طلبته من ليو :)

بتسلم الكعكات...بنسلمها الطلبات :)