Things I Like To Whisper About

Would You Hear Me Whispering

اغتيال شخصيتو O_o...ده انجليزي ده يا مرسي




"كل من أشاع أو عزا أو نسب دون وجه حق إلى أحد الأشخاص أو ساهم في ذلك بأي وسيلة علنية كانت أياً من أفعال الفساد المنصوص عليها في المادة 5 من هذا القانون أدى إلى الإساءة لسمعته أو المس بكرامته أو اغتيال شخصيته عوقب بغرامة لا تقل عن ثلاثين ألف دينار ولا تزيد على ستين ألف دينار".


دون وجه حق و فهمناها
يعني اذا انت مسكين وعلى قدّك و ما في اسم وراك يدعم موقفك القانوني و يثبت صحّة كلامك و اذا انت موظف غلبان و شفت الكبار بسرقو قدّام عيونك و سمعت و عرفت و شهدت واقعه الفساد
بتضلك ساكت و ما تتخنفس

اساءة لسمعته و المس بكرامته
برضه بمشيها بالرغم من اقتناعي ان اي شخص فاسد بتكون
"كرامه "و "سمعه"
عباره عن كلمات ذات معنى مبهم و احيانا مضحك بالنسبه الهم
يعني جيب اي "فاسد" -بدون ذكر اسماء لسا ما حوشنا اشي لندفع غرامات - و احكيله كرامه بوقع عالارض من الضحك!!!

نيجي هلأ للكلام الكبير

يغتال شخصيته .....أن أن أأأأأأأأأأأأأأأأأأن


ما بدي احكي عن الخبر ولا كيف بدهم يخلو الانسان اللي بفش قلبه و بفش قلب اللي حواليه بشوية كم كلمه يعبّر فيهم قبل ما ينجلط ويموت و تموت الكلمه بحلقه و على اطراف قلمه....ما بدي احكي على رأي اخوي مش عارفه قبل كم سنه يوم مباره كرة السله بين سوريا و الاردن و الحكم المصري
" مبيوعه...مبيوعه"

ولا بدي احكي كيف الكل اكل هوا بس لانه ذكر اسم اللي ما يتسمى هداك اللي سافر يتعالج برّه و طلع معالي فلان و علّان و الراس الكبيره علتان موافقين و راضيين و متراضيين مسبقا

اه ..اه ولا راح احط اسم

المهم ...لا ما بدي احكي عن كل هاد

اللي بدي احكيه

ان مهما فكرنا انّا صرنا ملمين بلغتنا العربيه سبحان الله نوّابنا , قصدي معالي و عطوفات و معاطيف و اعطاف و سياده و ....اي مصطلح هز ذنب , بتحفونا بكل ما هو جديد و بنمّو قدراتنا اللغويه و بزيدو من مورود اللغّه و بخدرو ادمغتنا باجمل العبارات

الله يسامحكم.... دائما ظالمينهم
هيهم بدل ما تنحبس منك اله خلوك تدفع اللي فوقك و تحتك و تموت بين افراد عائلتك .

اه اللي فوقك و تحتك لانه اي شخص يحتكم يدفع مبلغ 30000- 60000 غرامه هو فاسد اساسا :)

مع اعتذاري المسبق لاي شخص "اغتلت شخصيتو "

و سلامتكم



13 التعليقات :

طبعا غني عن القول انو عندك اغتيال شخصية كتير من واقع خبرتك في الشغل القديم:)

كيفك وسبوره؟ ان شالله تمام؟ :) :)
اشتقنالك

 

ميسو القمر

انا والحمد لله بخير...هههه يا اجرام وضعي كان :)

قبل كم يوم رن الموبايل ريمايندر من السنه الماضيه لطلعتنا :$

تخيلي مر سنه

يالله الايام كيف بتطير ...اذا اجيتي هون زيارة احكيلي يا قمر و ان شاء الله بس اجي عالاردن بدنا نرتب جمعه حلوه زي المره الماضيه

 

شايفه بالله؟ ايام يا عزيزتي !

اجي لعندكم صعب اظن تيجي انتي اسهل .. ع كل ان شالله الله بييسر وبنجتمع كمان مره :)

 

جاي عبالي يكون معي 60 الف عشان اغتال شخصية كم واحد......مش خسارة

 

طالما انت على قدك وما وراك اسم يدعم موقفك.. وما معك تدفع غرامات

خليك في حالك
امشي جنب الحيط
خليها وشوشات
......
سعيدة بمروري عبر وشوشاتكم

 

مياسي

ايام بتطير طيران :$

ان شاء الله قريبا...هيك النيّه :)

وحل

60 الف عالراس :)
يعني بدك تختار بعناية فائقه...صعبه كتير وخصوصا ان ما في فساد اطلاقا مطلقا حوالينا :)
بزبط وضعي شوي

زينه

هي هاي...وشوشات و كمان مع شوية كتم الصوت عند الوصول للاسماء تصريحا

وجودك بسعدني دائما يا قمر...شكرا لتنويرك المدونه

 

مساء الخير

واضخ انك فهمتِ القرار غلط
يا اما دفع الغرامة يا الحبس؟

يعني الغرامة ....اختياري
والحبس للرجال
واكيد الحكومة بتعرف انه احنا رجال

وهيك بيعطونا فرصة نلتقي في عالم الواقع بعد ان التقينا في العالم الافتراضي

لازم نشكر الحكومة والنواب والاعيّان اللي مش فاسدين ابدا على حرصهم على ان نقيم علاقات اقوى ما بيننا

دمتِ بخير
والله يرضى عليك ويسعدك

ومنورة

 

يا مسا الفل

اهاااا ... يعني مهما لفينا و درنا يبقو نوائبنا بدهم مصلحتنا اولا و اخرا

احنا اللي مش مناح و تفكيرنا دائما بالسيء :)

بس يا ترى ورا الشمس برضه ممنوع الاختلاط ؟؟؟

منورة بوجودك دائما صديقنا الغالي

امييييييييين يا رب

 

...اوعي تفكريني بغتال شخصيتك لما اجيب سيرتك بمدونتي:) على هالحاله بدي 30000 لكل واحد ووحده ذكرتهم اليوم يعني ....مبلغ بسيط مش بيننا ...بس اذا فيها حبس معاكم....مش مشكله اشتكي عليي واللي يصير يصير
"
مش منوره وبس....لااااااااا....
شمعه وفله ومنوره

يسعد مساكِ

 

نيسانه و ورده التدوين كله

مسا الفل و الياسمين يا قمر

الله يسامحك يا نيسان هلأ صرنا فاسدين...يلا بتموني وبعد ال 30000 كلنا ما عنا مانع نصير فاسدين :)


منورة بوجودكم معي دائما يا قمر :)

 

الخلاصة لا تحكي اسماء, بس احكي رموز من مثل حط الخايس على الماخوذ و الحقني على الشوسمو

 

الخلاصة لا تحكي اسماء, بس احكي رموز من مثل حط الخايس على الماخوذ و الحقني على الشوسمو

 

O_o هاااا

ويلا هاد المقصود بالمثل...التوهان :)

الخلاصه هي بالزبط المقصوده :)

اهلا وسهلا