Things I Like To Whisper About

Would You Hear Me Whispering

متى ما عشّر دشّر



مسائكم فل و ياسمين...و صباحكم بما انه الدنيا الصبح هلأ :)

اشتقتلكم كتير و فعلا على رأي صديقنا يوسف, رمضان معكم احلى , بس الي فتره بعيده عن النت بشكل عام, بفتح شوي عالموبايل بوقت البريك بقرأ شو بتكتبو و بتابع اخباركم بصمت.

بدي احكي لنيسان عظّم الله اجركم حبيبتي و ربنا يصبركم على فقدان الوالد, و ان شاء الله ربنا يتقبله و يدخله فسيح جنانه.

بدي احكي للبؤتنا القمر و لصديقنا ابو زينه....تقبل الله طاعاتكم و دعواتكم و عمره مباركه, ان شاء الله ربنا يستجيب لدعواتكم اللي الكم واللي النا, وابو زينه, حتى لو دعيت باسم ويسبر ان شاء الله بتوصل الدعوات :)

بدي احكي لام عمر الف سلامة يا قمر....وموضوع الدوخه هاد تاني مره بتحكي عنه و ما بنسكت عليه, يا بتروحي عالدكتور يا بتضطريني اجي عالاردن و اخدك بنفسي.....ديري بالك صاير راسي ايبس من قبل و بعملها :)



صرنا 11 رمضان كانت مميتي الله يسهل عليها تحكيلنا متى ما عشّر دشّر و فعلا حاسة رمضان بركض ركض السنه :(

ما في شي جديد , من البيت للشغل و من الشغل للبيت و ايام الاجازه بقضيهم مع اخواني و اطافيلهم, مبسوطه كتير بس من غير شر غياب بابا و ماما اله تأثير قوي, اكتشفت اني من اول ما اجيت عالامارات و انا بحوّش رصيد مجاني بالموبايل و بخلص ب 15 الشهر فخصصت تلفون يومي لا يقل عن نص ساعه دردشة وحكي مع بابا و ماما بالبريك تبعي بالشغل, بنحكي بكل شي وعن كل شي شو طابخين و شو صار ومين اجا و مين راح , الحمد لله الموضوع خفف عني كتير.

بالنسبة للصيام و الشغل في الصباحي بوصل البيت مع اذان المغرب, وبالمسائي بوصل الشغل قبل اذان المغرب و بنفطر بالشغل , كل شفت shift اله طريقه بالفطور بالنسبة النا المسؤول بجيب فطور كل يوم للجميع, و اللي بدو يجيب اشي من البيت يجيب و الجميع بتشارك, بخصصو غرفتين وحده للستات و وحده للرجال و الحمد لله هالشي طلع بس بالشفت بتعنا و الباقيين مع بعض باكلو :$ كلنا مبسوطين انا لحالنا, احنا البوانيت 5 المسلمين بالشفت , 2 اوزباكستانيات و وحده باكستانيه و مواطنه وانا, و كل وحده بتجيب شي و بندوق بعض اكلاتنا , و اكتشفت اشي اسمه الهريس الاماراتي و حبيته كتير :) لكن ما قدرت اكل اكتر من معلقه لانه دسم كتير, بس نخلّص اكل بيجي مراسل بمسك كل الاكل بخبي جزء منه للسحور لباقي المراسلين و الجزء التاني بلف على كل الاقسام يوزع على المراسلين الغير مسلمين علشان ياكلو منه, و عالسحور برضه بعطونا بريك.....ايون بطون وقت السحور بالشغل :) فالحمد لله ما في اكل بنكب و الكل باكل و بشبع, انا عملت معكرونه بالباشميل و عملت صينيه خضار باللحمه و مش انعجئت ولا اني حكيت مع ماما 5000 مره - هي مرّه بس علشان التهويل :) - غير ان كل الاردن وكل دبي عرفو اني طبخت, فرصه نطلع صيت حلو يعني


عم بستغل فترة تواجدي بالباص و بقرأ قرأن ايام الدوام و بفتره الاجازه كمان و الحمد لله ماشيه منيح, كنت خايفة ما يصحلّي فرصه و اقصّر, وصلت للجزء ال 18 :) ان شاء الله اقدر اختمه اكثر من مره
بالنسبة لصلاة التراويح بالمسجد, اول ما اجيت عند اخوي قررت اروح و شفت العجايب, مستحيييييييييييييييييييل الوضع, مش ان كل ام جاي و جايبه معها الكبير والصغير و المئمّط بالسرير - ستي الحجه ويسبر اليوم مع الامثال :) - من اول الصلاه لاخرها غير اللي بلعب و بنط و بتطاوش و بلحق في 5 ببكو بنغمات مختلفة و بدرجات مختلفه, اشي بنرفز من الاخر, غير اني حسيت حالي مش بس ما خشعت ولا ركزت لا حسيت حالي كسبت اثام قد ما حكيت عن الامهات بيني وبين حالي, اذا في ولد ملبسته الست الوالده صندل من اللي بزمرو و سارح الاخ بين الصفوف و توت توت توت توت, وقف مكان السجود قدامي صرت ادعي ربنا يزيج, بدي اسجد يا جماعه و الحمد لله ربنا هداه و تحرك, و شوي وقع و بدا بكا و خلصنا الركعتين و ما حد اجاله و بدينا بالركعتين التانيين و لسا الولد ببكي و بنصهم قامت وحده من اااااااااااااااااااااخر المسجد حملته, حكيت عليها بيني و بين حالي لقلت بس .....و انا بنص الصلاه :( يعني الله اعلم كم السيئات اللي اخذتها, فااااا قررت ما اروح لاني عرفت من مرة اخوي ان كل المساجد هيك وضعها, و قررت اضل على صلاة التراويح بالبيت احسن و افضل و بخشع براحتي.

هاي اهم واخر اخباري, ان شاء الله تكونو كلكم بالف خير و ما اكون وجعتلكم راسكم بكتر الحكي....الليله اجا عبالي اكتب شو اعمللكم ....سامحونا :) ولا تنسوني من الدعاء


24 التعليقات :

كل سنة و انتى طيبة

ربنا يتقبل منك

تحياتى

 

ويسبره العزيزه,, حندلله ع السلامه
إلك وحشه يا زعره
بكرهك,, ع الهامش

الله إيسلم عمرك,, وشكلي مارح أرضى اروح ع الدكتور عشان اشوفك جاي ع الاردن

لا مش عشان المايكرويف والتلاجه اللي من عند ليو,, لا أوشاعات


تاركه موضوع الدكتور ل بعد رمضان,, سدقيني مافي وقت من مرررره
:(


ع فكره,, حلوه حياتك هاي الجديده
إمنظمه ومرتبه وفيها وقت إزا إستغليته كويس,, بطلع معك اشياءات حلوه

معكرونه بالبشاميل وصينيه خضار ؟؟
بكررررررررررررررررررررررررررررررهك
تحكيش معييييييييييييييي
بكررررررررررررررررررررررهك

 

تسجيل حضور,, إشطبيه
بعرفك إبتكرهيني

 

ويسبر.. صباح الخير و رمضان كريم

بعرفش ليش كنت مستني منك تدوينة بهذا العنوان تحديدا :)
إن شاء الله تكوني بخير..وربنا يكون معك و يسدد خطاكي و يحفظك من كل مكروه..


أيوه هيك اكتبي خلي الواحد تيجيلو نفس
يدون:)

 

هلا أم الويسبر

جرعة إماراتية صافية وافية :)

الله يعينّا على استكمال استقبال الشهر الكريم

----

لطيف أنا اليوم، صح!

:)

 

هههههههههههه , فكرتك ما شفتيها عالفيسبوك :D
يا ستي مثل ما حكيتلك عالنيّة بتوصل ان شاء الله

الله يقويكي ويكون بعونك يا رب, حاس الاجواء اللي انتي فيها حلوة

تقريبا وصفتي نفس حال المساجد اللي بالاردن, بتحسي المسجد زي الحسيبة بدون تشبيه , ولاد صغار بركضوا وبلعبوا , ولاد صغار بعيطوا فوق عند النسوان , نسوان بحكن ولا كأنه في صلاة

بس حلوة تبعة الصندل اللي بزمّر ههههه , لو مرت قدامي يمكن اشوتها ضربة حرة مباشرة عالمحراب , شو هالعالم اللي بتجيب الصغار وبفيعوهم بالمسجد انا مش عارف

بس في شغلة ما فهمتها
"
الصباحي بوصل البيت مع اذان المغرب, وبالمسائي بوصل الشغل قبل اذان المغرب"

 

مرحبا مرحبا
امبارح فكرت في نفسي لما كل هذا الغياب من الغالية ويسبر؟
قلت لابد أنها منهمكة بالتراويح والصلاة والقيام والعبادات.
ثم قلت لابد انها ياعيني هناك بعيدة مشغولة بعملها..
هل تركتنا كل هذا الوقت ؟

واجد تدوينتك هذا الصباح فاشرق وجهي بابتسامة خفية من ظهورك.
الحمدلله


اقدم تعازي لنيسان، الله يصبرهم والبقاء لله.

الحمدلله نطمن على اوضاعك..
الغربة صعبة فعلاً
الله معك ويسبر..
الطبخ المتبادل والله فكرة عالمية في غاية الروعة.
والجنسيات المتعددة من المسلمين اروع
و

أما التراويح في المساجد فحدث ولاحرج يعني استغفر الله لكنه الحق..
فالواحد فضل خلاص يصليها براحة في بيته.
وكنت معتقدة انه هاد الشئ بيحصل في بعض مناطق بلادنا فقط
ياالله طلع كلنا وحدة عربية ماشاء الله.


بارك الله فيك اختي ويسبر
وبقية رمضان مباركة ان شاء الله
مغفرة ورحمة وعتق من النار ان شاء الله
لنا ولكم يارب..

وشكراً لك

 

يا هلا ومرحبا

ليش اسمي بدون رابط..؟؟؟؟

ههههههههه

لسه بكير ...صحيح هو بيمشي بسرعة
بس لسه في كمان 19 يوم

الله يرضى عليكِ ويسعدك
ويعيده عليكِ وعلى امة محمد (ص)باليمن والبركات

 

الله يسعدك يا بطه ويحفظلك احبتك كلهم بخير
....الله يعينك ويقويكِ
وييسر لك كل صعب ويهون عليك الغربه يا رب

 

الله يتقبل منك صيامك واعمالك في رمضان :)
ويحفظ أهلك ويجمعكم بخير يارب

بالنسبة للهريس انا ما احب اللي فيها من دهن ,وهي انواع منها الهريس اللي باللحم واللي بالدجاج وأيضا تختلف من بيت لبيت عن نفسي ما بحب غير اللي بتعمله الماما بين السائلة وبين المتماسكه لان مافي احد في البيت يحبها ثقيلة او شوي جامدة !؟
وبعد في كثير ناس بيعملو منها شوربة XD
ياخذو كمية ويضيفوا لها ماء مغلي وشوية عصير ليمون اللي بينعصر ونحطوا في الشمس واذا احتجنا ليمون نطلع الزجاجة وبنصب منها والشوربة تكون لذيذة
>>>> انقلب الرد طبخه ههههههههههههههههه
بس عن نفسي ما احب الهريس كثير, يعني عادي بالنسبة لي

 

حبيبتي هدول

مهو كلامي قدام كلامكم ما اله مكان لهيك بخايه لحالي مرات :)

عجبتني اخر تدوينه عن الزائر اللطيف " هو" و سرحت بالكلام و اختفى التعبير وما عرفت ارد :)

بس الله يعينكم علي لانه شكلي حضلي احكي :)

ابراهيم رزق

وانت طيب ...ربنا يتقبل منا الصيام و القيام يا رب

نورتني :)

 

ام عمر

الله يسلم عمرك يا حلوه....و الحمد لله على سلامتك انت كمان
وك ديري بالك على حالك مش عاجبني و ضعك

شكل الميكرويف و الثلاجه راح يتحولو لحسابي الخاص هاليومي....راح احتاجهم :)

فااااا انا رأيي تروحي عالدكتور احسنلك :)

لا تضلك تأجلي جد بحكي, شو بتستني يعني ؟؟؟ الحمد لله ربنا سترها مرتين يعني احنا على وجه عيد و في طلبيات كعك ياما عليكي تسدديهم كلهم

بالنسبة لوضع الحياه فالحمد لله احسن كتير مما كنت متوقعه, شوي شوي عم امسك زمام الامور- حلوه زمام الامور :) عجبتني

و لسا ناويه على كم طبخه صورتهم من كتاب الطبخ من مرة اخوي :)

وانا بكرهك اكتر يا قمر :)

جعفر حجير

يا صباح و مسا الورد
علينا و على الجميع يا رب

اعتقد اني كتبت السنه الماضي موضوع بنفس العنوا
لحظه اروح اشوف

ايون....طلعت كاتبه تدوينه و من الموبايل كمان
يا الله لمّا قرأت التدوينه الماضيه لرجعت لهداك اليوم :)

الله يخليلنا المدونات اللي بتحتفظ بذكرياتنا و خصوصا للي زيي و بكتبو بالتفاصيل
كان يومها عنّا افطار مع الايتام و كان يوم بجنن :)

شكرا اللي ذكرتني بهداك اليوم صديقي

االهم امييييييييين شكرا عالدعوه ...اجمعين ان شاء الله
ربنا يسعدك دائما صديقي

 

Sheeshany

مش عاجبني و ضعك.... شكلها الزرقا مهدّيتك و يلا تأثير رمضان هاد؟؟


لمّة العيله و الفطور مع الحجّة بعملو العمايل شكله :)


الله يديم اللطف و هداة البال على طول ان شاء الله

LUNAR.

بتعرف بس تكون ماسك اللاب توب و تقرر زينه القمر انها بدها تلعب و تطبل عليه؟؟؟ عندي 2 حبايبي بين مطبّله "نور" و بين " فرح" اللي بس تشوفني لمست اللاب توب بتبدا, بارني ... و ديمه الاولى.... و طيور الجنه و فلّه وهالقصص

شفتها بس ما اعطوني مجال ارد عالتعليق :)

الحمد لله مش زي بين الاهل الله يخليلنا اياهم و لكن افضل باضعاف مما كنت متوقعه :)

بتذكر مرات بس ينفعلو الستات بين الاربع ركعات ....خلية نحل الله وكيلك و بتقلب قصص طبخ غير فقرات الخطّابات كمان :$

الصباحي بروّح عال 6المسا بوصل البيت بكون مأذن المغرب
و المسائي ببدا عال 6 المسا يعني ساعه و بأذن المغرب

 

لاتي

صديقتي و اختي الغاليه لطيفه
كل رمضان و انت والعائلة بالف خير يا رب

اول شي بدي اشكرك و بشدّه على تدويناتك الماضيه, الله يجزيكي الخير لانك مجمعه خواطر و مع التابعين , كنت افتح مدونتك و احضرهم فورا :)
و شكرا لانك عرفتيني ان في برنامج للدكتور عمر عبد الكافي, لا تتصوري كم اعشق كلام هالدكتور و بحب برامجه جدا :)

واسفه اني ما بعلّق و بس باجي بحضر بصمت :$

الله يسعدك يا قمر و ما تفتقدي غالي يا رب, انا ما بنساكم اكيد ولكن ظروف الحياة بتفرض حالها علينا
ما الي غنى عنكم اكيد

ربنا يديم الابتسامه و الاشراقه على وجهك دائما يا قمر....فكرة التعرف على جنسيات جديده جدا ممتع و مفيد و خلّاني اتاكد ان اي تعميم على تصرفات و افكار جنسية معينه جدا خاطئ


بالنسبة لصلاة التراويح فانا مع الصلاة في البيت اذا قدرتي تخشعي و تتدبري ما تقرأينه و تصلينه بالمسجد
الله يغفرلي كم حكيت في سري على هالامهات اللي كانو هناك ...و للاسف وانا في وسط الصلاه :(

امين يا رب...ربنا يتقبل منا اجمعين و يعينا على عدم التقصير و يتقبلنا و يعتق رقابنا من النار

شكرا لك اختي الغاليه

Yosef

هلا و مرحبا فيك دائما صديقي

يا صديقي يا يوسف, انت حكيت اللي بدو ينقل " يسرق" من اقوالك ينقل و انا حسيت ان الاقربون اولى بالمعروف فاااا نقلت بدون ذكر المصدر :)

لا هي كانت غلطه مطبعيه بحته و تم تصويبها فورا :)


امييييييييييييين يا رب

للاسف ايامنا بطل فيها بركه بهالفتره وخصوصا الايام الحلوه, ربنا يتقبل منا و يبارك النا في رمضان

 

نيسان

امييييييييين يا رب...ويخليلك الوالده وكل احبابك ويصبركم على فقدان عمو و يرحمه يا رب

اللهم امييييييييييييييين

White freedom

اللهم امين..اجمعين ان شاء الله

انا اول مرّه بدوقو و كان معمول بلحمه, ما كان جامد ولا مرق و ما عرفت شو مكوناته بالزبط ولكن فعلا كان دسم و ما قدرت اكل اكثر من معلقه منه :)

الله يخليلكم الوالده و تطبخلكم ازكى الطبخات :)

هو في ازكى من حكي الطبيخ بهالايام :)

مساكي وصباحك فل و ياسمين يا قمر

 

لا نانا
أبدناش تدوم

بدنا مشاكل!
و طوش

بعد رمضان إن شاء الله
:]

---
لويش صاحية لهسّع!

أنا و عم بغسل

إنت؟
لوول

 

هههههه...خلص ولا يهمك
بنحوشهم لبعد العيد على طول :)

الله يعطيك العافيه.... انا بستغل الفرصه قبل الدوام و فروحه ونور من غير شر نايمين ...هاي فرصتي الوحيده للنت بهالفتره, الفتره الجاي تسجيل غياب طويل برضه :$

 

زمان عنك ويسبر :)
هلا انا معك رمضان مر بسرعة ع الرغم انه ساعات الصيام طويلة وع الرغم انه الأولاد معطلين ومجنيني بس الحمدلله انه الله أعطانا هالفرصة والله يغفر للجميع
حلو انه يكون في ناس حواليكي تشاركك رمضان هون الواحد ما بيحس انه رمضان الا بالمسجد والبيت والمسجد اولاد صغار وصراخ فشي خشوع فتضطري انك تضلي بالبيت :(

 

اذا هيك بسيطة ههههه , الله يخيلكم اياهم يا رب ويبعد عنهم كل شر ان شاء الله

الله يتقبل منا جميعا يا رب بغض النظر عن الشيف رمزي بعد الاربع ركعات
:D

وضحت الصورة , يسلمووووووووا

 

Sozan

شفتي يا قمر....مش عم تزبط معي الامور...بس ان شاء الله الفتره الجاي راح اغيب شوي و بعدين بتستقر الحياة معي :$

الله يعطيكي العافيه يا رب....عطلة المدارس لحالها عجئه فكيف برمضان :)
الله يعينكم و يمضي الايام الجاي على خير
ربنا يتقبل منا ومنكم يا رب

بالنسبة للمسجد, فانا نويت بس يصير معي سيارة ادور لحتى الاقي مسجد ارتاح فيه, مستحيل اضيّع على حالي فرصه الصلاة جماعه على طول :(

LUNAR.

تسلم يا رب... ويخليلك زينه القمر و والدتها و كل الاحبه يا رب

هههههههه.... عجبتني الشيف رمزي :)

الله يسلمك يا رب :)
عالم بتشقى ويلا شو بتفكر :)

 

كأنه كل ما يسير حدث بالعالم باجي ركاد عصفحتك اشوف شو كاتبة..معلش بلا كسل وشدي حيلك وارجعي متل اول .. اكتبيلنا شي حلو يلا...وطمنينا عنك...وجد لا تغيبي كتير..صفحتك مشتاقتللك

 

الك وحشة يا بطة ( هاد علا اساس أني دائماً هون ) المهم انك بخير والغربة جابت فائدة معك وطبختي ؛ ;p
وآخر شي ادعيلنا وانت بتصلي التراويح :)

 

WD

حاضر يا قمر...اعطيني كم يوم لتوصل النت عالبيت الجديد و راح تزهقو مني من جديد :)

انا اشتقتلها و اشتقتلكم كتير

كل عام وانت بالف خير يا رب

Hana

الله يسعدك يا قمر
هلأ بتبدا الطبخات الحقيقيه مع الغاز الجديد :)
ز ان شاء الله بخليكم اب تو دايت بالنسبة للطبيخ :)

بتصدقي اني تقريبا كل يوم بس اجي افطر بصير اتزكر فيكم واحد واحد و ادعيله :)

ربنا يتقبل منا اجمعين