Things I Like To Whisper About

Would You Hear Me Whispering

عالم غريبه



اشي كتير شفته و مر علي هون بدبي و كتير استغربته, التصريح بانك كفتاه مسلمه بتشربي و بتروحي على Night club و بتعملي علاقات كامله غير مشروعه مع الشباب و انك ما بتصلي و"اعوذ بالله " ما بتصومي - حرفيا انحكت قدامي- شي بتتفاخري بانك تذكرية بكل جلسه و شي ما بدفعك لانك تستحي على دمك, بنمشيها و بنحكي ان العالم حرّه بحالها و قحه مش وقحه مش مشكلتنا .

لكن انك تيجي وتحكيلي " الله يعينك ما بتسهري " و بتعتذري مني انك بتسهري وبتيجي تحكي عن مغامراتك وان انا قاعده بالبيت , فمن الطبيعي اني افهمك وجهة نظري فيكي و افهمك ان القعده بالبيت و عدم السهر مش الحجاب اللي بفرضه علي لا انا اللي بختاره, انا بختار اكون غاليه بنظر نفسي و نظر الناس و ان كل بنت بامكانها تبيع حالها و بامكانها تكون رخيصه بس هي اللي بتختار مكانها بالزبط و انا مكاني فوق ...فوق كتير وما حد بسترجي يتطلع علي مش اني اكون لعبته.

و بس تحكيلي اطلع معك مع باقي الشلّه, فبرضه بحكيلك اني ما بشرفني انشاف معك و لا بشرفني لقب صديقة فلانه

حوار طويل عريض مختصره ان الاخت مفكرتني "كبيره" و "يأسانه" و انو "اكيد لسا الا ما تلاقي حد يعجب فيكي بس انت تلحلحي شوي" و بعدين وصلت ل " لا تكوني معقده و متزمته و هالشي ما راح ينفعك" فاضريت احط النقط عالحروف ...المشكله انها لساتها مصرّه تضلها تحكي معي O_o

25 التعليقات :

هاي الأشكال بيعز عليها تكون تحت وناس فوقها وأحسن منها، بدها تضل وراكي تتصيري زيها، أعوذ بالله من هيك أشكال، بعدي عنها جد، هاي مو (غريبة) هاي مصيبة!

 

لا تخافي علي يا قمر.... فاهمتها و حافظتها
بعدين بعد 100 سنه بدها تيجي اللي تخليني انحرف !!!
مخلص ايام الانحراف ما انحرفنا :)

 

بدك تديري بالك , زي ما حكت كيالة , هاي راح توكل راسك , سيبيكي منها وجيبي اكس بوكس احسنلك من قعدتك معها

 

لا تخاف صاحيتلها :)
انا صرت انزّل افلام و احط الهيد سيت و احضر و ما اسمعها و اطنش تلفوناتها

بركي زهقت...بس اذا زادتها بعطيها جرعة تجليس تانيه

 

طول عمرك كبيره :-)
بتعرفي ويسبر طول عمري بحكي إنو ما في اسهل منها إنو تمشي بالشارع على آخر طرز ومكياج وبلحقوكي ميت واحد وكل وحده لو عملت هيك بتجر وراها كتير شباب ، بس الصعــب والمجاهده إنو تتحجبي وتتقي الله وين ما كنتي لإنو البنت جوهره مكانها محفوظ جوا ومخبيه مش معروضه بالبترينه !!!
الله يا ربي ياخد بإيدك لدلّيها على الخير ويا مقلب القلوب ثبّت قلوبنــا جميعا ودائما على دينك ...الواحد بحياته لسى حيشوف ...بس بتعرفي أنا ما بنقهر على شي وبرتفع ضغطي إلا إذا كان شي بتعلق بالدين....إنو ما تصوم وتصلي؟!!!! جد بمغصني بطني وبتقـــبع معي وببين عالقدامي إنو محروقه من جوا ....يا لطيف الدنيا آخر وقــت !!!!

 

هههههههه أفلام يا سلام :))) تعالي هون يابا شو آخر أفلام حضرتيها لنشوف ؟؟!

 

Orangee

من يوم يومي و انا كبيره :)

انا انقهرت بس حكيت كل انسان حر بحاله انك لا تهدي من احببت و لكن المجاهرة بتخنق كتير و بعدين مش انها مش مستحيه لأ و بدها العالم يصيرو زيها

الحمد لله ان البلد اسلاميه و يلا كانو عجبو, لو تشوفي كم كتاب و كم قرار بموضوع الاكل برمضان و مخالفاته, شكلهم مقروصين من قبل

بالنسبة للافلام
كلّه نزلته 2010 و 2011 و اخر فيلم بديته و لسا ما خلصته هو

Mr Popper's Penguins

بشوف شو الفيلم اللي نزل جديد و بضلي استنى ينزل عالنت و اول ما يحطوه بنزله :)

بس الفيلم القديم و اللي كان نفسي احضره و جديد نزلته فيلم "هي فوضى" يا الله شو بقهر هالفيلم
كئابه من الاخر و سمّة بدن
عن تجبر الشرطه بمصر


http://teaser-trailer.com/movies-2011.html

الافلام المش رعب ولا فانتازيا و كائنات و هالقصص نزّلتهم و حضرت معظمهم...اللي حسيته بنحضر طبعا :$

 

عزيزتي ويسبر :)
الافضل الك انك تبعدي عنها لانها ما بتخاف الله واللي ما بيخاف الله خاف منه !
من الاسف والخطأ اللي بتوقع فيه البنات انه تفكر انه الشب العربي الشرقي ممكن يرتبط مع وحده مش مخليه
هاي مش حرية هاي فجور والله يبعدنا عنه الله يعينك ع هيك امتحان وثبتك ع إيمانك

 

مرحبا ويسبر،
الله يحميك يا رب من هالأشكال،أعوذبالله بغلطو ونفسهم كل الناس يكونو متلهم عشان ما يحسو إنو في حد بلومهم ولو بالعيون ،
و بنفس الوقت مساكين عشان ما بعرفو إنو احنا راضيين بالنضافة و الطهارة و ما بنحب القرف
يلا بعينك الله ، بدك تضلي منتبهة لكل طرقها الخفية

 

طبعا بما اني بالغربه من قبل ما انولد -اسلوب أردني بامتياز يدل على التهويل والمبالغه-
فعندي خبره مع المغتربين.ـ
بصراحه بعرف شباب كثير مش ماشي دوغري بس عمره ما حدا منهم اقترح انه اروح معاه على مكان مش مناسب. لأنهم بيعرفوني وهم انفسهم بيعرفوا انه اللي بيعملوه غلط. انا ما قطعت علاقتي مع اي واحد منهم لأنه كل واحد منا عارف حدوده وما بتدخل بشؤون الآخر وزي ما حكيت عمره ما حدا منهم سألني ليش لأنه اذا عمل هيك طبعا راح اقطع علاقتي معاه. انا عارف انه في مجتمعنا وضع البنات مختلف تماما. انا اذا بعرف شاب خلينا نقول هامل الناس مش راح تقول عني هامل كمان ولكن البنت يكفي واحده من المجموعه تكون مش على ما يرام بتخرب على الكل.ـ
طبعا بسبب عاداتنا وتقاليدنا البعيده عن الدين الناس بتنظر للشاب اللي بيعمل غلط غير عن البنت اللي بتعمل غلط مع العلم انه بالدين الجزاء واحد.ـ
ولذلك زميلتك لأنه عارفه انه على راسها بطحه بدها حد ثاني معاها على راسه بطحه حتى تخفف من شعورها بالذنب.ـ الله يهديها

 

ويسبر شو صار معك بموضوع الاستديو!!؟
حاولي بالموضوع قبل رمضان عشان الله يخلصك منهم و من قرفهم

هدول ناس مريضين و الله و المشكله هم اللي صاروا اغلبيه في البلد و زي الاستعمار بحاولوا يتغلغلوا بأكبر شريحة من الناس ليخربها لانهم ما بحبوا يشوفوا حدا احسن منهم.

الله يحميكي منهم و يبعدك عنهم قريبا يارب ... الله على كل شيء قدير

 

بدها تدعيس ع راسها عشان تعرف تحكي عن حالها متحرره
وعشان تعرف توصف إش التحرر

 

بتمر علي حالات مثل هيك كثيييييييير... للأسف

بس بدهم يقلدوا الغرب بكل اشي صح مش صح زي البهايم الله يكرمكم ويجروا وراهم بنات العالم والناس. اللي بستغرب منه انهم مو مستوعبين انو اللي بقلدوهم عن جد حثالة المجتمع الغربي. لأنه الغربيين مش كلهم عايشين في بارات وكلوبات وبسكروا ليل نهار بالعكس الأغلبية عندها أخلاق.. بس هدول مملين فما بطلعوا عالتلفزيون فعلا. زين ما عملتي يا بنت.. تحية كبيرة لك من القلب

 

روى الإمام البخاريّ رحمه الله تعالى عن أبي هريرة رضي الله عنه قال: سمعت رسول الله يقول: ((كلّ أمّتي معافًى إلاّ المجاهرين، وإنّ من المجاهرة أن يعملَ الرجل بالليل عملاً ثم يصبح وقد ستره الله فيقول: يا فلان، عملتُ البارحةَ كذا وكذا، وقد بات يستره ربّه، ويصبِح يكشِف سترَ الله عليه)).

 

Hi Whisper.. metzakreh had el bost http://ahmadmerie.blogspot.com/2010/06/blog-post_29.html
???!!!

 

الله يصبرك عليها و على غيرها، بدك تطولي بالك عليها، و عجبتني كلمتك إنه صحبتها ما بتشرف

بس مسكين هالطفل إللي بالصورة، حابب أعرف شو مزعله
;-)

 

صديقتي العزيزة ويسبر
مساء الخير
والله يرضى عليكِ ويسعدك

هناك الغربة والاغتراب والفرق بينهما كبير
وانت تعيشينهما معا

غربة عن من هم حولكِ
واغتراب عن الاهل والاصدقاء

الله يكون معك

تعلمت في الغربة ان ابتعد عن كل ما يضايقني وتعلمت ان لا اسمح لاحد ان يؤثر في نمط حياتي حتى لو بقيت وحيدا

ادرك انكِ قوية ولن تسمحي لاحد ان يشعرك بالضعف وعليكِ ان تكملي مسيرتك دون الالتفات للغرباء عنك

دمتِ بخير
والله يوفقك

 

بصير تمرقيلها رقمي!
أو أقلك بلاش من أولها!

خليها عالإيميلات أحسن

شو إنك منيحة يا ويسبر و بتحبي تنشري الخير بين الناس ،،، فاهمك أنا :PPPP

 

الله يعينك ويقويكِ

في فرق بين الحريه المسؤوله وبين الفجور

والافظع المجاهره بالاثم والتباهي فيه....معلش اصمدي وتحملي وان شاء الله ربنا بيسرلك مخرج يريحك ويرضيكِ

 

اسحبي السيفون ع هيك شكيلات
واحكيلها بوجهها أنتِ مُنحطة
بس انتبهي منها ما تعملك او تورطك بشي لاسمح الله
لأن هيك شكيلات تافهه بتعمل أي شي
*
الله يحميكِ من فوقك ومن تحتك وعن يمينك وعن شمالك ومن بين يديكِ ومن خلفك
حبيبة قلبي أنتِ ...

 

بقولوا اذا لا تستحي فافعل ما شئت
Really no comment!

 

looooooooool
الله يعينك عليها شو لزقة !!
هاي هي اللي يأسانه وانت اللي لازم تحكيلها انو هاد الطريق ما رح ينفعك !!و إذا مصرة انها تضل تحكي معك فيمكن انت بتقدري تأثري فيها يعني اذا هي حاببتك كل هلأد بس طبعا اذا مصرة تحكي معك لأنو بدها شريكة باللي بتعملوا فأكيد رح تلاقي طريقة تقطعي علاقتك فيها
الله يعينك :)

 

اذا لم تستحي فأفعل ما شئت

اذا بليتم فستتروا

الي إختشوا ماتوا

بلا من فين اجيب امثله توضح وتختصر الموقف,

والغريب ان كل هاد بيصير في دولة مسلمه اتوقع يمكن لان دبي فيها اجانب ومقيمين وحابين ينشطوا السياحه بهاامور

بس فعلا عيب وشي بيخجل ان مسلمة تتفاخر بهالشي

وهذا يدل علي جهل مابيعرفوا الفرق بين العصريه والابتذال والانحلال
فاكرين اان بهالطريقه يواكبوا الموضة والعصريه

وغيرهم معقدين

نصيحه اقطعي علاقتك فيها وغيري رقمك احسن ماتجيبلك وجع راس ,,

والله كلنا كنا في غربه وشفنا ناس هالنوعيات بس مو بهالطريقه علني
بيعترفوا بوقاحه,
,
وياما سمعت كلمة انتي معقده بس كتت برد عليهم ان تعقيدي شرف ليه

الله يستر عليكي وعلينا وعلي جميع بنات المسلمين

 

اصدقائي الغاليين
اسفه جدا عالتأخير بنشر التعليقات و الرد على التعليقات...صديقتكم مشغوله زي اللي عن جد :)

نراكم قريبا...قرّب الويد اند :)

 

الحجاب متخلف و الصيام مش فايع و التدين كتير بيخرّب البريستسج