Things I Like To Whisper About

Would You Hear Me Whispering

لنكتب عن....انعدام الحوار و رفض الرأي الاخر/ شهر تموز



اختلاف الرأي يفسد كل قضيّة


من واحنا صغار علمونا اهلنا ان عيب الواحد يتدخل باللي ما بعنيه, واللي بعنيه برضه بما انه عيب تضلك تسأل و عيب تناقش اللي اكبر منك, كبرنا و ضلّينا نعاني من نفس الشي لانه دائما في "الاكبر" منا....دخلنا المدرسة تعلمنا انّا ما اناقش المعلمه و لا المديره, اللي بحكوه هو الصح لانهم اعلم منّا بكل شي, , كبرنا اكتر وبكل سنه كبرنا فيها لقينا الشخص اللي بعرف بكل شي و ممنوع تناقشيه لحد ما صار عند بعضنا عقدّه خلته يصير بس يحكي يسمع صوت حاله بما انه ما حد بحب يسمع صوته, حتى مع نقاشاته مع التانيين برضه بس بسمع صوته, جزء تاني المشكله و العقده عنده تأثيرها اكبر ,صار عنده مشكلة تفسير رد اي حد بخالفه الرأي انه اهانه شخصية اله, وصار خلاف الرأي يفسد كل قضيه و بقلب الدنيا رأس على عقب.

تعلمنا نسكت و ما تعلمنا نسمع , نسكت بالغصب و مرات ما نضل مركزين سبب اسكاتنا لانّا بنسرح في عالم المناقشة مع الذات بسبب التجبر و الظلم اللي واقع علينا من كل الاتجاهات, فراحت علينا, لا تعلمنا نعرف الاسباب و لا تعودنا نسمع, و المشكله الاكبر ان اللي حوالينا برضه تعودو على صمتنا لهيد اذا لا سمح الله حاولت تحكي و لا قدّر الله انسجمت شوي و خالفتهم الرأي فراحت عليك, الكل مقتنع انه اعلم واحد و اعرف واحد, كل واحد فينا في محلل سياسي و معلق رياضي و قارئ و كاتب و راقص باليه في شخصه, فهو رأية الصواب و اي رأي تاني فهو غلط.

نوع جديد تعرّفت عليه هوّن علي كل الاصناف السابقه, هالنوع اللي بحب بس تسمعله, حتى لو كنت مؤيد للي بحكيه ما بعجبه, بدك تكون محاور صامت, بس تبدي ايماءات و اصوات ايحائية باعجابك باللي بحكيه و حتى بهاي ما تبالغ لانه برضه ما بعجبه و بعتبره نوع من انواع المقاطعه.

مش عارفه وين اساس المشكله....ان اهلنا عودونا نسكت مش نسمع؟؟؟ ويلا لانّ في كل مرحلة كان في كبير لازم ما اناقشه؟؟؟ ويلا لانّا انقمعنا صرنا نمارس نفس وسيلة القمع اللي عشنا فيها؟؟؟ويلا العيب فينا اللي سكتنا دهور لحتى صرنا بس نحكي ما حد يسمع صوتنا لانهم تعودو علينا ما نتخنفس؟؟؟

14 التعليقات :

مساء الخير ويسبر

الاساس انعدام الثقة بالنفس
وكلما ازداد هذا الامعدام كلما اصبحنا مغالين جدا في تعندنا برأيّنا وعدم قدرتنا او رغبتنا في سماع الاخرين

اما ليش عنا عدم ثقة في انفسنا؟؟؟
طريقة تربيتنا وتعليمنا
كلها تعتمد ان هناك من تعتمد عليه وهو دائما ينظر اليك على انك مخلوق ناقص وهو من يكملك

كلما ازددنا معرفة وخبرة كلما ازدادت ثقتنا في انفسنا واصبح لدينا مساحة اكبر من الانفتاح

دمتِ بخير

 

لا اساس المشكله مش بتعلمنا الاحترام اساس المشكله انه احنا نتعلم نخاف من الكبار وهاد الشي مختلف ولما الكبير بطل يحس بهيبته وشعر بمكانه بلش يتزعزع صار العنف يستخدم وهنا الكبير مش بس العمر المكانه او المركز او عدي من عندك
تحياتي ويسبر :)
دخلت ع الموضوع من دون مقدمات !

 

Yosef

مساء النور صديقي

معك حق...ممكن صمتنا المفروض علينا عمل عنّا عدم ثقه باراءنا و بفهمنا للمواضيع

و الغاية بارضاء الاطراف التانيه بحياتنا خلّتنا يبطل عنّا رأي محدد خاص فينا نابع عن فهم حقيقي

تكملة لاخر جمله...وكلما وجد من يحاول خنق الكلمات في حناجرنا

الواقع الاليم اللي بنعيشه

دمت بالف خير

ملاحظه ع الهامش

ليش هالمره ما نلت الرضا و الدعاء بالسعاده؟؟؟ بحب هالجمله فما تحرمني منها مره تانيه

Sozan

تعودنا عالخوف مش عالاحترام, ذكرتيني مرّه كنت بتحاور مع بابا و حكيتله هالجمله, انو انا بحترمك اكيد بس بخاف منك اكتر, طبعا بابا اتعقد من هالجمله لانو بعمره ما صرخ علي حتى و كان تارك موضوع تربيتي على ماما و هو بس للدلال, و كل مره بنحكي و بنتصارح انا وبابا برجع بعيدلي الكلمه و قديش اثرت فيه :$

الكبير تعود انّا ساكتين فاي تغيير بيعتبره قلّة احترام و تعدّي عليه و بخاف الكل بكره يصير يعبّر فالقمع هي احسن وسيله

مسائك فل و ياسمين...شعبري ولا يهمك ولو محلاني وانا معارضه :)

 

هيها وصلتك من على مدونتي
قبل ما اقرأ ردك هنا
الله يرضى عليكِ ويسعدك

 

امييييييييييين يا رب

شكرا صديقي... بحبها لهالجمله كتير :)

 

كلامك صحيح 100%. للأسف الطفل وحتى مرحله متأخره من عمره لا يؤخذ برأيه. بشوف الأهالي في امريكا لما يدخلوا مطعم بسألوا اولادهم وين بدهم يقعدوا واذا الأهل ضد المكان بيعطوا سبب للطفل ليش المكان اللي اختاروه مش مناسب. كذلك بسألوهم شو بحبوا ياكلوا. الخلاصه انه الطفل يعطى فرصه للاختيار ولكن هذا لا يعني ان الاباء ينفذوا الطلب.ـ
طبعا عدم اعطاء فرصه لابداء الرأي تؤثر سلبيا علينا لما نكبر. والدليل ان الكثير من الأردنيين لا يعرفوا كيف يعترضوا على شيء معين. بتلاقيهم لما ما يعجبهم شيء قرأوه على الانترنت طوالي ببدأ الردح والمسبات الوقحه جدا جدا جدا. عدا عن الانترنت بدل من المناظره اذا ما عجبنا امر معين اوشخص بنستخدم اسلوب الطوش او الهوشه او قتال الشوارع وهذا اكبر دليل على عدم معرفتنا باسلوب الحوار وتقبل الرأي الآخر. فكرة الموضوع جميله جدا وهذا رأي بالموضوع واللي مش عاجبه يقابلني بره المدرسه.ـ

 

Jaraad

المشكله ان بس يوصلو الاولاد لعمر معين المفروض يقررو همه بنلامو انهم ما بعرفو ياخدو اي قرار بسيط بحياتهم

موضوع الحوار بين الاطفال و الاباء باي شي مرفوض و يعتبر الولد مش مربى و قصه بين العالم, مع ان هالموضوع اساسي في تربية الطفل زي ما حكيت

اي اختلاف بالرأي عنّا صار يعتبر اهانة شخصيه و بتقلبطوشة بالنهايه, مع ان المعظم بتشاطر من ورا الشاشه

ههههههههههه ضحكتني على يقابلني بره المدرسه... احنا البنات ما عنّا بعد المدرسة كله بنفس اللحظه منخلصه كنّا :)

 

موضوع رائع و كل كلمه قلتيها كانت في مكانها الصحيح, ما اعرف احلل ليش صرنا كدا ؟ لاني بصراحة اتعودت اخلي اللي يبغى يتكلم يتكلم ويقولوا اللي عنده. زي ماقلنتيه في ناس تحب تسمع صوتها فانا ماراح ازعلها و اسمعها صوتي. باالنهاية انا ابدأ بالتغيير و اسمع و خلي اللي يبغى يناقشني , يتكلم و اسمعه. التغيير لازم يبدأ من عندنا . و اهو اتعلمت شيء حلو اني صرت اسمع افضل و مايعدي الشيء علي و بس
:)
موضوع جميل كمان مرة

 

صباح الخير يا بطه

انا صوتت لموضوع الطلاق بين الشباب...عشان هيك مش رح اكتب عن موضوعكم ولا حتى سأقرأكم ولا اشارككم النقاش....ما حدن يناقشني ولا حدن يحاورني....خلص ما في مجال....مش رح اسمعكم شو ما قلتوا....بلا حوار بلا بطيخ

:)

 

Wafa'

المشكله ان هاتي العالم اللي تعودت تحكي تفهم معنى صمتك و استماعك و تقدره

يمكن هاي من الاشياء اللي ابدأ بنفسك و علّي صوتك لحتى تنسمع ....انقلبت الفكره عند التعامل مع بعض الاشخاص اللي ما بستوعبو

Naysan

وهذا اعزائي المشاهدين سكتش لمثال لتوضيح فكرة البوست 100%
نشكر فنانتنا الرائعه نيسان على هذا التوضيح :)

موضوع الطلاق بين الشباب و موضوع الزواج من مطلقه بدنا نكتب عنه بدون تصويت لانه مهم جدا و الناس ما بصوتولو

 

ويسبر

يسرني المرور هنا

وأشكر زيارتك
موضوع قيم جدا

كيف لنا أن نغير شيء تربينا عليه وشربناه مع مشربنا

انا لي رأي وهو له رأي
أقول رأي هو مغلق أذنيه وهو يقول رأيه وأنا مغلقة أذني

هكذا تعودنا
وهذا أفضل من أن نتحارب
لأنه نتيجة اختلاف الآراء نحن لا نتحاور ولا نتجادل
بل نتحارب
الأقوى هو الأبقى

 

اهلا و سهلا بزينه الصبايا ...نورتي المدونه يا قمر :)

طبيعتنا الانسانيه بتدفعنا انّا نحكي...احنا مخلوق كتير الحكي, مشكلتنا بالتوقيت و التركيز, كلنا بنحكي مع بعض و بنسكت مع بعض :) لهيك ما حد بسمع حد و بطل في حد يستنى اللي قدامه يفهمه

 

مرحبا ويسبر
أنا كمان نفسي أعرف السبب في التزمت و رفض حتى مجرد سماع الرأي الآخر مش الاستماع، عنجد مسكين الي بعلي صوته و بسكر أدنيه و ما بسمع الآخرين،،اكتشفتلك انو احسن شي ما أتناقش و أتعب حالي وأحرق أعصابي مع هاي النوعية من الناس،خليهم (كل واحد في براسه عقل و بدبر حاله)ولا شو رأيك؟

 

مرحبا عجبني اسلوبك في الطرح ببساطة وشفافيه

وجهة نظري ان هاد في الاول و الاخير ناتج عن التربيه

اذا كان في ثقافة حوار في الاسرى ,,وان كل واحد يحترم ويسمع الطرف الاخر,,اتوقع راح يكبر الابناء وهم عندهم صفة اساسيه وهي الاستماع و النقاش وتقبل الرأي الواحد

ولكن الي ما بيسمع لطرف الاخر اعتق هو انسان يرفض يسمع صوت غير صوت علقه اصابه الغرورو لرجة معتق ان هو صح و الاخرين غلط

الصراحه جعجبني الموضوع كتييييييير ومافهمت هل هي مسابقه مثلا كل ما بدخل منوه الاقي الاستطلاع عن موضوع اخر الشهر

فيني اشارك انا كمان
^_^