Things I Like To Whisper About

Would You Hear Me Whispering

اليكم ....


الى كل من تسول له نفسه او سوّلت له نفسه بترك العالم التدوين
من موقعي هذا - و هو عفكره غير عن الموقع اللي كل ما سكرت معي كنت اقرر اني اسكر البلوج و طبعا قرار لحظي بحت يكون وارتاجع عنه زي الشاطرين - اليكم انت

يمنع منعا باتا ....

التقاعد....التقاعد المبكر.... اللي بقررو يتقاعدو وبسوو انهم برتاحو... ...الاجازات....الغياب الغير مبرر و المبرر و حتى لو بانذار سابق - الا صديقنا يوسف لانه يحق له ما لا يحق لغيره على ان لا تزيد الاجازه عن اممممممم 3 ايام يلاااا احنا مناح و صديقنا يوسف بستاهل :)

اما بالنسبة للي سكرو مدوناتهم, ما في ...اه ما في و ممنوع, واللي سكروها بس مش بالاشي الحديد - ما بعرف شو اسمه - بس خلو الفترينه مبينه انو مر و شوف و تصفية نهاية الموسم و شوي شوي بنسكر بدون ما حد يحس فاااااا برضه ممنوع و الحكي الك يا نادر و اسمع يا ابو زينه....اه اه بحكي معكم بالذات.


بننشغل...بنطول...بنغيب...بتخلص المواضيع....بتتراكم المواضيع و ما بنعرف نعبّر...بنكتئب....بتسكر معنا...بننعجئ مع الدنيا...بننعجئ مع الاهل والاصدقاء
كلّه ماشي بس نبعد و نسكر و نختفي ....لأ .... نو .... نيه - بلغاري هاد - و هئه ......ممنووووووووووووووع

في اصدقاء كتير بغيبو عنا فترات طويله و بنشتقلهم بس بنعرف انهم راح يرجعو اكيد, زي ما ام عمر بتعمل و جفرا - لبنى- و جفراء - ليلى- واشرف - اللي اختصر لمدونه وحده بالاسبوع و بطل يطلطل علينا - و كعكي - اين انت يا كعكي- و فرح و هنا - اللي الها فتره مختفيه -مياسي اللي بتكتب كل شهرين مرّه - هاد تشجيع لتكتبيلنا عن اخر رحلة :) - وفاء و وايت فريدوم اللي بغيبو كتير برضه, عروستنا و لبؤتنا الغاليه اللي مش عارفين نزبط موعد نتلاقى فيه :$ و نورا - شكلي لازم اعملك تاغ لترجعيلنا - و رولى - قرابتي الغاليه اللي اشتقتلها - منمن جرّه العسل المصفى,هموسة يلا عطلت المدارس و بدنا همه تدوينيه عاليه, اورانجي اللي بتغيب و بتيجي بتنزل عشرطعش بوست و بترجع تغيب, كيكي اللي بتغيب و بتيجي بتكتب اشياء بتخلينا اسبوع نفكر, نيسانه اللي عاقبت حاله مرّه وحده و ابدعت - شكله لازم نضل نعاقبها - جعفر ولو انك حاطط بوست اليوم بس برضه بتطول كتير, صديقنا مالك مسامح لانه بالعطله ما بقصّر, و مواطنون اللي كنت ناويه انزل فيه اقصى عقوبه بس الحمد لله رجع بالاخبار الحلوه فبرضه مسامح , دكتور وحل, شايفتك بتقرأ الاسبوع الجاي اخر فرصه الك عفكره .... و الكم كمان احمد المحروق و احمد مرعي و احمد حمدان و دريمي و PP....هيني بخبركم, دراسه...شغل...ما بعرف طولتو كتير.


الكل بغيب فتره و برجع, بس البعد بعمل جفا يا جماعه فلا تطولو, لانه شوي شوي بتخف المتابعه - مثل صالح و صديقنا ثائر على سبيل المثال لا الحصر -و فجأه بتبطلو تمرو علينا بالمره و هالعالم اللي مجمعنا حلو بكل واحد فينا

شوفو هيثم مثلا - مضطره احطك مع اللي في الهم نجم- شوفو سوزان اللي صرت اعرف اخبار الاردن منها, و نورانياتي اللي جديد تعرفت عليها و جدا بستمتع باللي بتكتبه, و سمسم - عروستنا الثانيه - اللي هلأ بالاردن بين الاهل - ربنا يتمم عليكم الفرحه و الف مبروك عرس اخوكي - و رند - عروستنا الثالثه- بتضلها اتطلطل علينا , شوفو رين اللهم لا حسد, مدونتين ونازله ادراجات....بتذكرني بطفولتي التدوينيه :)

فاااااااااااااا برجع و بحكي....الكل بدو يرجع ان شاء الله, خدو وقتكم, ما راح احدد مدّه يلااا عيشو, بس الكل ..سامعين الكل بدو يرجع اوكيز؟؟؟؟؟
ايوه هيك بدي اياكم

الله يرضى عليكم و يسعدكم يا رب - اسمي الام الروحيه للمدونين و نانا ويسبر على رأي هيثم اللي عصباحو نجمه - و جمعه مباركه مقدما ولا تنسو تقرأو سورة الكهف :)


ملاحظه ع الهامش

لفيت عالمدونات مرتين فاي اسم سقط فتأكدو انه سقط سهوا و اعذروني لان تركيزي صاير صفر و سووووووووووووووووورررررررريييييييييييي مقدما :)

28 التعليقات :

كنت خايف اقرا اسمي , بس اخص طلع اسمي بالقائمة السوداء ! عاد انا متابع! للمدونات بس نادرا ما يعلق

شكلو المووضوع قلب جد , وشكلنا لازم نكتب شغله

 

في مدّم مسموح فيها للمتابعه من بعيد وانت تجاوزتها


هيني بحكيلك...لحّق حالك

 

اسمي مكتوب؟؟؟
طيب
:)
اطمئني يا بطه...انا عن نفسي مستعده اتفشش بأي شي في هالعالم الا بمدونتي
بتفشش بزوجي:) بحط سخطتي على اولادي...بتزانخ على صاحباتي....بقاتل دبان وشي.....
الا مدونتي العزيزه وانتوا احبائي....مش حتنازل عنكم ابدا مهما يكوووون

عجبني اسلوب التهديد والوعيد....شكلو في ناس ما بتمشي الا بالعين الحمرا:) برضو انا عن نفسي بختصر عليكي المشقه وبعاقب حالي لبالي كمان هههههههه

يسعد مساكي العسل.....يؤبشني المعصب انا

 

والله يا هيثم نيالك!
المسألة فيها نجم!! وعلى صباحك :)

بس صحيح بتفكري باللي بكتبه لأسبوع؟ شكلي عميقة وأنا ما بعرف..هههههه.. ما دخلني بدي نجمة أكبر من تاعت هيثم:)

بتعرفي هسه بس لانتبهت انه مدونة لونار محذوفة!! ابصر ليش؟

بس أنا لو غبت برجع بطلطل.. ولا لأ؟

 

me also batabe3,, bs a7ynan ma bala2i she monaseb a3alqo fa ba5teser..
btw.. i'll back to writing ASAP..
Thanks you & Accept My Passing By..

 

ما اخف دمك زي العسل والله وانا معاكي ما في إغلاق من الممكن راحة مدة معينة تجمعوا افكاركم!! وترجعوا
الله يخليلنا أياكي ويسبر :)

 

اسمي مكتوي ؟
اه مكتوب
:))))

احيانا بتضرنا الظروف انو نبعد و كتير كمان
بس لازم نرجع و انا بضم صوتي لصوتك ممنوع الاستقالات ابددددددددددداااا و الاجازات محدودة و مسببة كمان :)
عندك ويسبر كل الطلبات عندك و بس
سلام يا قمر

 

فعلا المدونات الأردنيه بتخليني سعيد لما اقرأهم وخصوصا لما اقرأ مدونتك الي بحسها عفويه جدا وبعيده عن اي تصنع. شكرا الك على تذكيرنا بأهمية المدونات وان شاء الله يزيدوا ما ينقصوا. الواحد ممكن يغيب لما يكون مشغول بس ما يطول غيابه.ـ
انا بالنسبه الي بحب الكتابه ولو عندي وقت يمكن كل يوم اكتب بوست ولكن تجري الرياح بما لا تشتهي السفن.ـ

 

ويسبر يا ويسبر.. شوفي كيف بدي أقلب السحر على الساحر

هلقيت يا ويسبر لو انك بتتابعي أخباري على فيسبوك زي الناس.. كان عرفتي إني كنت في السعودية لأداء العمرة :)

بس بعترف إني مذنب و أوعدك بطحشة تدوينات لكثير شغلات في بالي

تسلمي .. ويسبر.. كثير حلو إنو الواحد يلاقي حدا يسأل عنو.. فأنا مش زعلان :)

 

Naysan

يس ...طبعا مكتوب
بدنا اكشن زي قبل كم من اسبوع
خطط و طبخات جديده في عالم حواء :)

هههههههههههههه ضحكتيني يا قمر...حرام عليكي العيال و ابو العيال.... بس برضه بتموني عالكل ..ولو :)

هو نوع من ممارسة دور الام الروحيه :)
ممتااااز جدا...في انتظار المعاقبه اذا :)

صباحك ومساكي مسك وعنبر ان شاء الله

كيكي

اه جد بحكي.... اللي بتكتبيه اذا مش كل الادراج في جزء بضرب براس كل واحد فينا وبلامس شي بحياته ...عالقليله خليني احكي عن حالي هون

انا ما كنت قارئه اخر ادراجين لما كتبت هالتدوينه...بس هلأ في مجال اشيل نجمه هيثم و اضيف 5 او 6 نجوم لصباحك يا قمر :)

الله يسعده هيثم هو اللي نبهني ويلا انا لسا ما كنت لافه عالمدونات ازورها و اتطمن عليها...بس راجع ان شاء الله عن قريب...صح ابو زينه؟؟؟

المهم لا تغيبي عنا كتير يا قمر

جمعه مباركه يا حلوه و ربنا يسعد صباحك و مساكي وكل ايامك

 

السلام عليكم
الصراحة عالم التدوين برجع للمزاج
يعني مرات الواحد بحب يكتب بكل المواضيع
و بتيجي أوقات الواحد بغيب كثير بس بظل يطلطل و يشوف شو صاير هون من بعيد

 

مسا الخير عليكي ويسبر وعالجميع ان شاء الله

عمري ما فكرت مجرد تفكير اني الغي المدونة , سكرتها مرتين 3 , يمكن وقفت اكتب فيها فترة , بس اني الغيها من الوجود , كان مش ببالي اصلا

بس مؤخرا , ومن اللي بصير حوالينا بالاردن وبرة الاردن , بلّش الواحد يحس بالعجز وبالقيود على كلامه , فا انا بطلت قادر اظل ساكت واتظاهر انه الحياة وردية واكتب ادراجات ما الها علاقة بإشي

فا من باب : فليقل خيرا او فليصمت , اخترت الصمت حاليا

ومن جهة اخرى حاس نفسيتي كلها تغيّرت من شغلة صارت معي مؤخرا وخلتني اعرف قيمتي عند ناس كثير حوالينا , فا قلت انسحب بشوية كرامة احسن :)

هيني متابع الكم , وراح اشارك بادراجاتكم ان شاء الله , وحتى لو ما شاركت بكثافة , تأكدوا اني بقرأ كل كتاباتكم اكيد

يسعدك ربي :)

محمّد جرّار - أبو زينة

 

Ahmad Merie

4 months w 2enta bet6al6el ya sadeqi...kteeeeeeeeeeeer O_o
we want u back soon and we r waiting for u

Sozan

حبيبتي سوسو...كلك ذوق يا قمر :)
بالزبط....راحه مش اكتر ومش طويله لانّا بنشتاق للجميع
تسلميلي يا قمره انت :)

 

لبنى

ايون...مكتوب هالمره :)
ضمن الشطورين بس بدون نجم :)

بعرف هالشعور و مريت فيه اكثر من مره...اذا بنسمح لهالشعور يزيد بنبعد وهاد اللي خايفه منه...لاني اول ما بديت التدوين تعرفت على مجموعه رائعه جدا و للاسف نصهم اختفو فجأه :$

ايون...كلّه عندي و انا اللي بعطي موافقات...و مبدئيا ممنوع الا اذا اقتنعت بغيبه يومين تلاته :)

Jaraad

لا تتصور كم اسعدني تعليقك و شرفتني كلماتك...شكرا صديقي :)

امين يا رب.... التدوين وعالم المدونات عالم جميل لانه ما في داعي للتصنع , ما في عيب و شو بدو يحكي علان وشو بدو يحكي فلان, اللي بقلبك و بعقلك بتكتبه زي ما هو لا كذب ولا تجميل

الغيبه مسموحه ولكن البعد و الاختفاء هو المرفوض, مرفوض من باب العشم اكيد :)
ربنا يوفقك بتحقيق جميع اهدافك و احلامك و المهم انك بتتذكرنا بكم من ادراج باوقات الفراغ :)

 

جعفر

الله يسامحك ....ما انا شفت الصور و كتبتلك تعليق و دعاء بتقبل الطاعات... متابعه يا صديقي متابعه
غير اني هنيتك بانك انهيت الترجمه في ادراج كمان وانت ولا عبرتني :(


بانتظار تدويناتك دائما صديقي.... ادراجاتك بتخلينا ولو على شوية تواصل مع اللي بصير في وطننا فلسطين

Alirbidi

وعليكم السلام ورحمة الله وبركاته

صح... بالنسبة الي فكرة انك تشارك الناس افكارك و مشاكلك و اوقاتك فرحك و اوقات اكتئابك كانت مستحيله و التدوين خفف كتير عني

وبرضه مرات بكون بدو يتابع و لكن بصمت....الموضوع ان مده هالصمت ما تطول كتير

 

ابو زينه

مساء الورد صديقي

حكيتلك انها محلوله....مدونه جديده و لفّه عالشباب الطيبه بالعنوان الجديد و خلصت خلصنا :)

بنعطيك فرصه و متأكده انك ما راح تخلينا نستنى كتير

عارفه و حاسة باللي بتحكيه و على فكره هو سبب من الاسباب الرئيسيه لاختفاء و غياب الكثير منا هالايام.... كنّا نعاني انا مش عارفين نعبر و الكلمات بتخونا... حاليا عنا كلام و كلام كبير و كتير و لكن مخنوق جواتنا و ممنوع يطلع :$

يعني اللي صار اليوم مثلا.... مافي مليون كلمه و كلمه ممكن تنحكى

فكر بايجابية اللي بصير معك و بنعمة اكتشاف الناس ولو متأخر و لو بوجّع

وجودك بسعدنا دائما كمعلق و متابع و لكن بضل مش مكانك الاصلي..مكانك بينا مش مع المتفرجين



يعني شوف كيف تعليقك طلع تحت عنوان مجهول :(
Anonymous ya abu Zaina!!!!!
مش حلو بالمره بصراحه :(

و بعرف انا السلسله بتجر...المدونه بعدين الفيس بوك و بعدين التويتر...و هات شوف و تابع صور زينه القمر بعدها :(

 

والله احرجتيني بكلامك وغمرتيني بلطفك الزايد خيتي

وان شاء الله انها بتفرج وبرجع , يعني ممكن اقدر ابعد عن التدوين كله , بس عنكم ما بقدر ولا راح ابعد اصلا

يسعدك ربّي
وبالنسبة للي صار اليوم وامبارح وقبل سنة وبعد سنة ومليييييووووووووووون سنة كمان بحكيلك : خليها بالقلب تسطح وتقتله كمان ولا تطلع برة :)

 

نوّرت ...نوّرت
و الله اني انبسطت...الله يبسطك و يسعدك على طول

امييييييييييييييين يا رب.... ربنا يفرجها عالجميع

و ان شاء الله ما بضل بالقلب شي يزعجه... وكلها لرب العالمين و هو من عنده بنزل السكينه على قلبك ان شاء الله

ربنا يرضى عليك و يسعدك :)

 

ويسبر
شكراً على سؤالك عني :)
ان شاء الله ارجع مثل الأول , فرحت كثير لسؤالك عني
الله يجعل ايامك سعادة يارب

ولايهمك بحاول اكون موجودة في عالم التدوين أكثر وأكثر
لأني من بعد التخرج اصبت بحالة احبااااااااااااط شديد من الواقع , بس الآن احسن شوي من قبل , اللهم لك الحمد

 

الحمد لله انك هلأ احسن

كل فتره بحياتنا الها سلبياتها و الها ايجابياتها....حاولي ركزي عالايجابيات و ان شاء الله بتتوفقي بشغل منيح لان تجربة الشغل بالرغم من كل تعبها حلوه و حرام ما تخوضيها

و بانتظار عودتك النا من جديد يا قمر :)

 

شكرا ً على النجم :)
و مسموح لكيكي بنجمأكثر بس تكتبلنا أكثر :)

و الله إنك رهيبة يا أم الويسبر

جهد تشكرين عليه و كلماتك رائعة

:)

--
يا عالم
يا هووووووووووو

قد أعذر من أنذر

ديروا بالكو :)

 

wallah ana dayman 3ndi e7sas bel khatar wel bahdaleh wel katleh...fa dayman abl ma akolhom bkon 3addalet wad3i looool....ana halla2 srt mn el mowaleen wo rje3et...wallah 3ndi qa7t bel afkar bs r7 a7awel aktob ay ishe khalas...wla yhemmik...
shu sar m3ik bel asma2?ma la2aitilna esem 7lo sa7ee7?

 

ياي اسمي طلع :) أصلا انا غايبة عمدا علشان تحطي اسمي ;)
والله حقك علينا يا ويسبر..بس الظروف ومع اني خليت أخوي يشتريلي لابتوب خصوصي علشان ألحق أتابعكم بالشغل لأنه بالبيت ما بقدر..الا انه اللاب توب صفا مع اخوي لأني ما بلحق آخذه معي عالدوام :/
بس ان شاء الله الاوضاع بتتحسن

 

Sheeshany

ولو...انا كريمه و انت بتستاهل :)

المهم ان ابو زينه رجع نوّرنا :)

الرجاء قراءة التنبيه في تعليق هيثم " عالية" :)

مواطنون بلا حدود

laaaa wala ya sadeqy...ho men bab el3asham y3ny el tahdeed welwa3eed :)

elmohem 2ennak rge3et lal tadween men jdeed...kulna besebna 7alet el jafaaaf hay, bs base6a bokra btejy el kalemat la 7alha

ummmm ana b7eb 2esem Jood w Jana kteer bs bsara7a saro mostahlakeen shway

elyoum sme3et 2esem Ro2a w 7seto 7elo

Dreamy Villager


خلص الك علي كل يوم اكتب اسمك بس انت تيجي و ترجعيلنا مرّه تانيه

كتير طولتي الغيبه يا قمر مش هيك؟؟؟

ييييي بعرفهم هالاخوان, عندي منه بالبيت :)
الله يخليكم لبعض يا رب
بس برجع و بوصيكي....لا تطولي اكتر علينا لانا اشتقنالك كتير

 

يعطيكي العافيه يارب
كلك ذوق والله
:give::hug:

 

حبيبة قلبي يا نانا
(: حاضر

 

مررت من هنـــا ^_^
التدوين على ما أظن بالنسبه إلي قالب على مزاجية بالكتابه :-) بس على ما يبدو إنو المود رجعلي هاليومين الحمدلله ^_^

 

UmmOmar

الله يعافي قلبك يا قمر :)

Bullet

شطورة...قرأت اللي كتبتيه و مع انه بقهر بس برضه دائما تعالي و فشيلنا قلبك وما تبعدي يا قمر

Orangee

قرأت تدوينه الراحه....بس ما لقيت مكان اعلّق فيه لاحكيلك راجعي تدوينه اليكم لان اسمك مكتوب :)