Things I Like To Whisper About

Would You Hear Me Whispering

اخر اخباري :)

الصوره بس علشان بعض ناس ما عندهم فيسبوك :)


مسائكم سعيد

اول شي بدنا نبارك لصديقكم هيثم الشيشاني على قبول البعثه و بدنا نبارك لصديقنا جعفر اللي خلّص ترجمه الكتاب و بنحكيله الله يعطيك العافيه

ثاني شي اخباري

الحمد لله يوم عن يوم عم بتأقلم شوي شوي...هو اي نعم امبارح حكيت مع ماما و ضلينا طول المكالمه نبكي بس اللي هون الموضوع ان ماما ان شاء الله قريب بدها تيجي و بالسكن بصير ماما تنام عندي :) فصرنا من هلأ نتقاتل انا واخوي وين بدها تنام عندي ويلا عنده :)

بالنسبة للسكن فانا كنت طالبه من قبل ما اجي غرفة مستقله و كان كل شي تمام و بس اجيت حكولي بدك تستنى ليتوفر و المفروض هاليومين يردولي خبر, كتبتلهم 10000000 ايميل و قززتهم لاني تقريبا ما بنام :( انا البنت الوحيده و طول عمري لحالي بالغرفه ومش متعوده حد ينام معي و غير ان نومي خفيف جدا فكل ما تحركت المسكينه بصحى :( و غير ان وقت دوامها غير عني فبرضه بضل اصحى و هي ماشاء الله بس تكون نايمه لو اشغّل الدنيا كلها ما بتتحرك, المهم رحت قبل كم يوم لواحد من المسؤولين الكبار و حكيتله عن الوضع فاخد رقمي الوظيفي و وعدني خير ان شاء الله :)

امبارح اجت بنت ثالثه عالبيت , جزائرية عايشه بفرنسا وما بتعرف تحكي غير فرنسي و انجليزي مكسر - هيثم اقعد قاعد - بسرعة انسجمنا و اليوم قضينا الثلاثه مع بعض يوم كتير حلو الحمد لله

بالنسبة للشغل فحاليا كله تدريب و امتحانات, علامة النجاح بكل امتحان 80% وما بصير تنتقلي للتدريب اللي بعده الا بس تنجحي و محسوبتكم ماخده الموضوع جد ونازله نحت :)
الشغل ممتع و اشي جديد, اه صحيح انا ما حكيتلكم اني بشتغل اشي مش تخصصي :), مش انو مش تخصصي لا اشي ولااااااااااااا اله دخل بس خبره جميله جدا , موضوع كنت انا جاهله فيه تماما و حاليا عم بتعلم تفاصيله :) قدمت للشركه على شغل مبرمجه و بعتولي حكولي انه ما في وظيفه حاليا و نصحوني اقدم لوظيفتي الحاليه و حكولي ان سياسة الشركه ان بعد سنه بكون الي الاولويه اقدم على اي وظيفة تانيه ولو عندي الحد الادنى من الخبره و الحد الادنى من الدورات فألي الاولويه بشرط ان تقييمي يكون ممتاز وهاد اللي انا شغاله عليه, اشتغلي منيح بكون تقييمك ممتاز لا واسطه ولا استنصاد ولا اشي زي عنا بالزبط :$ وتغيير الشغل هو اللي راح اعمله ان شاء الله بس اخلّص السنه, المسؤولين بس عرفو اني برمجه حكولي انهم راح يستغلو فتره وجودي :) .... الوضع اجمالا حلو , جنسيات مختلفه و انجليزي طول الوقت, لانه اساسا منوع تحكي خلال فتره الشغل غير انجليزي , لهيك قررت اعمل صفحه و اصير اكتب فيها بالانجليزي و انتو تصيرو تصلحولي الاخطاء و تعطوني كلمات جديده بديله للكلمات اللي مش كتير رسميه عندي :)

اهدافي لهالسنه ان شاء الله هي كالتالي
اني اخد غرفه لحالي, اني اغير الوظيفه بعد سنه, اني اخد الرخصه , واني اشتري سياره لان العيشه بدبي بدون سياره خنقه من الاخر, في عنّا مواصلات خصوصي للشغل وفي مواصلات بساعات معينه تودينا عالمولات و لكن برضه مش دايما وقتهم مناسب النا.

ايش كمان....اه محسوبتكم صارت حرّيفة طبيخ و حلويات :) في عنّا بريك للغدا بس كل المتوفر فاست فود و الوضع هاد ما بمشي معي, بفطر الصبح قبل ما اطلع , عال 6 الباص بطلع فبصحى عال 4:30 بصلي الفجر و بجهز حالي, و بشرب نسكافيه بالشغل و برجع بتغدى بالبيت, الا اذا الجوع كان عامل عمايله فيي فبشتري و لكن اني اكل برجر كنج و هالقصص يومي فهاد دمار شامل للدايت اولا و للجسم بشكل عام

الجو هون حريقة والكل بحكيلنا لسا ما شفتو الشوب استنو لشهر 8, الرطوبه خنقه و الحراره بتوصل ل 49 زي مرحبا , و بننتقل من كونديشن لشوب لنركب الباص و لكندشن مره تانيه الله يستر من مرضه لان كل اللي معي مرضو :(

وبس :)

ملاحظه ع الهامش

صديقي كعكي ان شاء الله يكون هالبوست كفّا و وفّى و استناني في بوست عن الصدمه الحضاريه اللي صابتني هون بدبي :)

41 التعليقات :

Good luck with all your dreams,

Although UAE is a really hot place, but you'll really enjoy your time once you get a car. I lived there with my parents for 14 years and I really miss it.
it's a good idea to start an English Blog, I'll be one of the fans

 

ويسبر

مساء الخير

بكرة بتتعودي على كل اشي

اولها الواحد بتصعب عليه الامور

بعدين يتصير من الماضي

من انطباعي اللي كونته عنك هنا

ما بينخاف عليكِ بالمرة

امنياتي لك بالتوفيق

ودمتِ بخير

 

Tha2ir

Thanks my friend...inshallah to achieve them all soon :)

Dubai is a place where u can enjoy ur time ,u have many ways to spend ur time and money here .... hopefully not :)

Thanks...I'll need a lot of support there and I'll try to write more in order to improve my English quickly :)

Yosef


مساء النور
ان شاء الله...هو البعد عن الاهل و خصوصي ماما اللي زاعجني و لكن ان شاء الله اذا ضلت تيجي هون كل فتره بتحسن الوضع كتير

رأيك كتير بهمني و بحترمه جدا صديقي.... شكر جزيلا

هالمره بمشي التعليق بدون الله يرضى عليكي و يسعدك ...بس مش كل مرّه :)

 

بصراحة يا ويسبر ، انا لما ترميني رجلي نواحيك باستمتع بصراحة كثير ، ليش علشان باحسك قريبة من القلب وطشاتك ورحلاتك بتخلي العالم صغير ، يعني انت نقلتيني ع دبي نقلة وشعرت بالشوب والرطوبة ، ربنا يعينك وتتحملي شهر ثمانية ،
بالنسبة لاهدافك يارب تحقيقيهم كلهم وخاصة السيارة لانه انا نفسي فيها ، اخذت الرخصة بقالي اكثر من سبع سنين ولسه السيارة في الطريق ؟؟
بالنسبة لهيثم الف مبارك قبوله للبعثة انا هنيته هناك في مدونته ، اما بالنسبة لجعفر فان شاء الله نروح نهنيه هناك ..
"""""
ان شاء الله بتنقلي من الغرفة وبصير لك غرفة لوحدك .. دمت بخير .

 

صديقتي امتياز

ما بتتصوري مدى سعادتي بتعليقاتك, تواجدك كتير بسعدني :)

هاد بس من ذوقك يا قمر, انتِ اللي بطلتك بتاخدينا لاحلى الاماكن...ربنا يجمعنا عن قريب

انا كنت اسوق بالاردن و الحمد لله عندي سياره, بس بحكو ان هون مرات بتكون صعبه انك تنجحي من اول مره ومرات من خامس مرّه...ان شاء الله ربنا يوفقني و اخد الرخصه بسرعه

السياره من اساسيات الحياة وابدا لا تعتبر كماليه بهالوقت و ضروريه جدا

امييييييييييييين يا رب...ببقى اخبركم شو بصير معي :)

نورتيني يا قمر

 

U Got a job in Dubai ?? hada zaman sheklee ma ejeet hoon ?!! yaa 3eeb 3alay :S

Mabrook !! and nyaalleekkk !!! I love Dubai and always want to work and live in Dubai ! Good luck w u have to go to Gumaira beach on mondays !! the beach is just for girls w mesh shoob eljaw bejannen 3al ba7ar !! t2akadee enno lessa yoom el ethneen balash ykonoo '3ayaroo :D

Good luck sweetie w allah yeb3atlek elle feeh 5eer :)

 

و يسبر هانم، بيتهيألي إنه واحدة من أساسيات النجاح في الحياة هي التأقلم مع كل الظروف، و هاي شغلة مش سهلة بس إن شاء الله إنتي قدها و ما بنخاف عليكي.

و ربنا يهونها عليكي بالرخصة و السيارة.

بس بتعرفي إني بأكرهك جداً جداً جداً جداً
:-(

 

سلام ويسبر،،
مبسوطة عشانك ، عشان قادرة تتأقلمي والله يوفقك و تحققي كل أحلامك و أمنياتك ولو إني شميت ريحة إنك غيرت رأيك و ناوية تقعدي أكتر من سنة.... طبيعي أصلا ما في غربة شغل أقل من سنتين وطالع،
يا رب تقدري تشتري سيارة منيحة بسرعة لأنها ضرورية عد جد

أحلى شي هون بالخليج الخليط الثقافي و الاجتماعي(بكرة بتتعلمي تحكي عربي بالهندي المكسر،هاي أحلى لهجة أنا بحب أمزح فيها كتير ههههه)
الله يوفقك يا رب
ضلي دايما طمنينا عن أخبارك و انطباعاتك

 

السلام عليكم
بانتظار كل مرة بشوق ..
وماشاء الله عليك تقرير كامل موفي وفايتها كمان.
كان الله في عونك وايضاً الله يوفقك في كل ماتتمنينه..وجميل جداً انه عندك مخطط للايام القادمة.
شئ عظيم

حاسة ان كلامي لن يوفي ولن يعبر
فالاحسن اسكت لي
واستمتع باعادة القراءة..

موفقة صديقتي والله معك

 

كثير حلو هالبوست.ـ شكرا لمشاركتنا بأخبار المدونيين. يعني لو ما ذكرت الشيشاني ما كان عرفت انه حصل على بعثه. لغاية الآن مش عارف عنوان مدونته. يا انه بغيرها دايما او بحاول يخبيها علينا :)ـ
وشكرا كمان لمشاركتنا باخبارك. بانتظار مدونتك الانجليزيه. وبالتوفيق في عملك.ـ

 

ما شاء الله عندك :) الله يسعدك و يحميكِ :) بسرعة عرفتي تتأقلمي مع الشغل و البلد الجديدة :)

الله يوفقك و يحققلك كل امانيكِ و كل اللي ببالك :)

شو هالكيكة الزاكيه :) هاي شغلك :)

صحتين و عافيه يارب :)

 

صباح الخير
أولشي الله يوفقك و ان شاء الله كل شي بيصير من أحسن لأحسن..ومبروك للشباب كمان
اااااااااااخخخخخ قلبتي علي المواجع...بتذكر كيف كانت النفسية أول ما رحت على دبي و الصعوبات و النفسية...بس الحمدلله الشباب ما قصروا ودعاوي الوالدة جابت نتيجة...أنا رح أقولك انه كل هالصعوبات بالبداية بس و بعدين رح تتأقلمي مع الوضع هناك لأنه دبي بتحببك فيها غصب عنك...أنا مريت بهالصعوبات كلها و الحمدلله مرت و دبي حجزت مكان دائم في قلبي..فان شاء الله انتي كمان رح تتجاوزي الصعوبات و رح تحبي دبي كتير
بالنسبة للحر و الرطوبة الله يعينك عاللي جاي...عن جد لسه ما شفتي اشي...بس المفارقة اني أنا حاليا بحب أقضي الصيف بالسعودية لأنها أبرد من عمان...يعني البيت و السيارة و المول و المكتب و حتى السوبر ماركت مكيف ... بعمان ما إلك إلا المروحة ورحمة ربنا
بتمنالك حياة سعيدة في المدينة اللي بحبها كتير...اذا احتجتي أي نصيحة أو استفسار عن شي بدبي احنا حاضرين
موفقة

 

الله يسعدك يا بطه وتحققي كل خططك خلال السنه
عجبني كتير الاهداف اللي حطيتيها وترتيبها واولويتها....ما شاء الله عليكِ منظمه وان شاء الله هاد من اهم عوامل النجاح انك توصلي للي بدك اياه

بالنسبه للشيشاني كنت ناويه افسد له واقوله جايبين سيرتك بالفيسبوك وانت ولا انت هون بس نسيت ...ههههههههههههه
خليه ييجي ركض عالفيسبوك....

 

إنحت ياللي بتنحت
:nerdo:
وين إم عمر بس عن هالبوست!

---
الله يوفقك
:)
و تجيبي ميّات

و تتعودي على الرطوبة
و كمات تيجيكم وحدة مش مخطوبة و تعجب فيّ -- قصدي بنادر!

خخخ

---
على الهامش:

مين كعكي!
+
الصورة بأول البوست مو واضخة عندي
مغبشة!

لوول

 

يالله ويسبر!
زركتيني بأيام نسيتها!
ع فكره الجنسيات المتعدده بتعلم شغلات كتير وبتفتح مخ الواحد
ع عكس العيشه عنا بالاردن
ما في غير احنا بخلق بعض :))

وشو هالعدايل هاي اه؟
:)

 

ما قصرتي وسبورة
كفيتي و وفيتي

الله يعطيك العافية والله لا يضيعلك تعب

بالنسبة للحرارة انا السنة الماضية كنت هناك في اخر شهر 7
وزي ما اتفضلتي
شوبببببببببببب ششششوووب
قضيت اخر 3 ايام مبلبط في المية في ووتر بارك في ام القوين

بس سؤالب عالماشي
ازا عم تصحي عالفجر
متى تكون ساعة النوم؟

 

Mabrouk 7abibti on the new job :)
You latest news seem exciting! I wish you all the best.

 

Hi whisper sweet heart
Am so sorry am so late and kter m2asra m3ak hoon bel comment but your always in my mind ,

Wanted to tell you congratulation , inshallah bel twafe2 ya rab inshallah 5er 3alik ,

Take care of yourself and have fun and don’t work too hard lol.

Have nice day sweetie.

 

الله يهون عليكي الغربه :)
الله يجيب والدتك بالسلامة لعندكم وتتهنوا بشوفتها يا رب
هلا ما كنت اعرف في صدمه. ثقافه في دبي ع الرغم من انتشار الأجانب هناك !
وزي ما حكى هيثم nerdi! باحكيها لزوجي هالكلمه كتير !

 

SimSim

YES :D

lool 7bebteeee, ho sa7ee7 b7eb tejy dayman w tzorenee bs b3raf 2ennek mash3'oleh fa yalla msama7a :P

Allah ybarek be3omrek ya amar ,I love Dubai too but law mammety hoon kan elwade3 perfect bekon :)

Yeah I heard about jumeirah beach w can't wait to go there :) yaaaay I love swimming inshallah when my sister in law return back we will go all together :)

Thanks ya amar ...Ameeeeeeen yarab,w bs tejy hon bet5abrene mashee...we have to meet each other

Saleh

الحمد لله يوم عن يوم بنسجم مع الوضع, مشكلتي الوحيده الاشتياق للاهل و خصوصي ماما ...بس الحمد لله ان موضوع جيتها مسهّل ان شاء الله و انا بقدر اروح كمان بس لازم بعد 6 شهور مش هلأ

بتكرهني؟!؟!؟؟!
له له له ...طيب ليش ؟؟؟

ملاحظه ع الهامش

حاسه انك ما شفت الكيكه منيح فهاي صوره لمقطع عرضي ثلالثي الابعاد :)

http://imageshack.us/photo/my-images/846/030620113919.jpg/

 

Lily

اهلا يا قمر

تسلمي يا قمر, هي مع الوقت بتمشي الامور الحمد لله
ههههه شفتي هي الخطه كانت هيك بس لمّا اجيت بدى شعور الشوق والقلق يكبر فتراجعت و مع الوقت رجعت للخطه الاولى :)

امبارح خبروني بان الجواز والفيزا جهزو فهلأ بقدر اقدم عالرخصه و ان شاء الله خير, اشي بحكي سهله و اشي بحكو مش الكل بنجح, ربنا يجيب اللي فيه الخير

ههههه اه بعرفها هاللغه بسمع خواني وهمه بحكوها , هلأ صاحبتي اللي معي بالشغل اللي بنقضي كل الوقت مع بعضنا رومانيه و المسؤوله عن تدريبنا كينيه و في تونسيين و مغاربه و فلبينيين و سوريين و لبنانيين و هنود و باكستان و بريطانيين و مواطنين و روسيين و اوزباكستانيين فجد خليط ...كله كوم و فهم لغه الهنود بس يحكو انجليزي كوم :( مش قادره افهم و المشكله لازم احكي معهم تلفونات دائما و بحاول اركز بس لابد من
Go again please :$
بحكولي مع الوقت بتتعودي او بتلقطي كم كلمه ولحالك بتفهمي الجمله :)

كترت بالحكي صح!!!! ههههه بس انسجم بنسجم انا :)

Lati

وعليكم السلام ورحمة الله وبركاته
ههههه...مكسور علي حكي كان فطلع كله مره وحده...الله يعينكم علي :)

امين يا رب العالمين...تسلمي يا قمر و ربنا يقدرني احقق الاهداف كلها

شكرا لتواجدك يا احلى اخت بالدنيا

 

مبروك و عقبال الغرفة// مشاءالله جنسيات، بس ليش ما في حده بحكي عربي في الشغل

 

Jaraad

الله يحلي ايامك
كلنا فرحنا لاصدقائنا هيثم و جعفر بتحقيق اللي ببالهم
الحمد لله اللي وفقهم و ربنا يوفق الجميع

انا مع الخيار الثاني بالنسبة لمدونة الشيشاني.....بعملها :)

شكرا جزيلا

LioneSS

تسلمي يا قمر....اميييييييييييين يا رب

هيني شوي شوي بدرب حالي و اتفقت مع اخوي ان الاسبوع الجاي اقضي الويك اند بالسكن و لاول مره علشان اشوف كيف الوضع راح يكون :$

اللهم امين.....على قلبك يا رب, الكيكه بتشهي كانت ان شاء الله الا ما يجي يوم و ادوقك اياها قريب ان شاء الله :)

 

مواطنون بلا حدود

اهلا وسهلا فيك من جديد...بتمنى ترجع للكتابه مره تانيه :)

تسلم يا رب...عنهم بحكيلك الله يبارك فيك و ان شاء الله انت كمان بتحقق اللي ببالك و اللي بدك اياه
وجود خواني الحمد لله بسهل الموضوع, مثل اليوم كلنا الثلاثه اجتمعنا و طبخت كبسه و اكلنا مع بعض و حكينا مع بابا و ماما كان و الحمد لله كتير حلو اليوم

ان شاء الله اتعود و اتأقلم بسرعه :(
الكل بحكي هيك ان اللي جاي اصعب و اشوب و اكثر خنقه ...الله بعين وربنا يخليلنا الكونديشنات

شكرا جزيلا صديقي وما بتقصّر اكيد و اذا احتجت لاي معلومه اكيد بخبرك

نيسان

اول شي بدي اعتذر عن تأخري بقراءة مدونتك :(
الدنيا عجئه عندي شوي هاليومين و سبحان الله انت قررتي تكتبي يومي و انا انعجئت...( بس على مين كله هلأ بدو ينقرأ ان شاء الله :)

تسلميلي يا قمر...ان شاء الله اقدر :)

هههههه...شكرا الك انك ما حكيتيله اذا O_o
اللي مش عالفيس بوك بتروح عليه اخر و اهم الاحداث :)

 

Sheeshany

مجبر اخاك لا بطل....لاقدر اقدم لوظيفه تاانيه لازم يكون تقييمي "منتاز" :)

ام عمر ....شكلها نسيتنا و باعتنا خلص :(

اجيب "ميايا" على رأي مميتي و هي زغنونه :)

حكينا اقعد قاعد...ليش ما بترد عالكلام؟؟؟
هو اي نعم نادر اخونا ولازم ندورله احنا على عروس و ننقد و نعطيها بندق تكسره و نشد شعرها لنتأكد منه ...بس برضه لازم نعطيه فرصه هو يختارها بالاول :)

بالنسبة للصورة...فراجع الملاحظه ع الهامش في ردي على صالح باشا فوق :)

مياسي

معك حق...بالبدايه لا بد من الصدمه الحضارية والثقافيه وبعدين بتتأقلمي و بتفتح مخك, بس بضل الاساسيات المرفوضه مرفوضه, كبرت انا و بطل مخي ملحلح كتير ليتفتح عالاخر :)

و عسيره كبرت....كل سنه وانت سالمه يا قمر ;)

العمر كله يا رب

لسا ما شفتي شي....اختك معدله و المواهب بتطلع معها هالايام...اليوم الكبسه كانت دماااااااار :)

 

كعكي

شكرا على التذكير ...الي فتره بدي اكتب و بنشغل و بنسى :)

البنات اللي راحو عالبحر حكو ان المي سخنه وما استحملوها بالمره ...الله بعين هالكم شهر و بعدها ببدا الجو الحلو, عالقليه ما في برد هون, انا اكره البرد :)

هلأ بس اتأخر واني يعني سهرت و بالغت بنام عال 10:30 :)
بالبدايه كان صعب لاني بحب السهر و بعدين من التعب صرت انام فورا

Susu

Thanks ya amar, Allah ybarek feke :D
Now I'm concentrating on changing the room...inshallah 5ear :)

 

NrJoradn

2ahlan 2ahlan ya amar....zamaaaaaaan hal2amar ma ban :)
Being in ur mind is enough for me but I love to see u here also and ur comments always makes me happy :)

Thanks 7bebti, I'm doing my best to get used to every thing here w inshallah 5ear

Happy to have u here w ma t6awly 3alena ya amar :)

Sozan

اميييييييييييييييين يا رب
اليوم اتفقنا ان ان شاء الله باخر 6 اول 7 مميتي تيجي ...ياااااااااااااااااااااااااااااااااااااااااي :)

هههههههه لا تفهموني غلط...الظروف و القعده لحالك بتخليكي تتسلي باي شي :)
فاااا الحاله و الموضوع مؤقت

 

Khber

الله يبارك فيكي ...اميييين يا رب
التركيز هلأ على هاد الموضوع و ان شاء الله ينحل بسرعه

بسبب اختلاف الجنسيات و اللغات بالشغل فلازم كلنا نحكي لغه مشتركه و اللي هي الانجليزي....و ما بصير نحكي كل واحد بلغته لانه ما في تواصل هيك و هالموضوع عاجبني كتير لان مشكلتي بالمحادثه بتخف يوم عن يوم و بتأقلم اكتر عالوضع, يعني حتى لو بحكي مع موظف عربي لازم احكي بالانجليزي

 

الله يوفقك يا رب
hugs and kisses <3 <3

 

حبيبتى ويسبر وحشتينى يا عسولة اتمنى لك التوفيق بأذن الله
ومرسى يا قمر على سؤالك

 

أنا و صالح - و كعكي كمان- بنكره المقاطع الثلاثية!

بس ما تخافي
مش أكثر ما بنكرهك!
----

+ راحت عليك يا نادر!
لا كيكة و لا عروس هالمرّة!

بس بتوقع القر"ظ" لسا شغال معك، آه؟

 

هبووووووووووش


اهلا اهلا...اشتقنالك كتير ممنوع تغيبي مرّه تانيه ماشي يا قمر

شكرا يا قمر...و انت دائما في البال حبيتي فالسؤال طبيعي جدا :)

Sheeshany

كل واحد منيهم يتكلم عن نفسه .... اللي بعرفه ان الكل بحب المقاطع الثلاثيه :)

ايون...ايون...خرّب العلاقات مع الكل, بس على مين يابا, الكل بعرفني و بعرف الشرير هيثم فااااا ولاااا بهمني اصلاطن :)

ملاحظه ع الهامش

اخر سطر الخط كان بقطّع فاااا ولا فهمت شي منه

 

آخر سطر = م"ظ"طر أشوف رأي عمنا نادر بالأول

 

اوك... بس مبدئيا وكنوع من الاستحياط ...انا مش عارفة شو مكتوب فيه على كل الاحوال

 

دمعو عيوني ,, كل مابقرألك بتعلم منك أشياء كثير
وبحبك أكثر
موفقه يااااارب
*hugs*

 

نسيت احكيلك أنو كتير عجبتني فكرة البلوغ بالانجليزي , وبشجعك تعمليه
^_^

 

حبيبتي...ليش :(
الحمد لله اموري منيحه مع انه اليوم بين ان ممكن يكون في مشكله ان ماما تيجي :( ان شاء الله ما يكون اللي حكولي اياها صاحباتي بالسكن صح :(

الله يسعدك يا قمر و انا المحظوظه بمعرفتي فيكم و بوجودكم بحياتي :)

التدوينات الانجليزي لهلأ ما بديت فيهم بس قريبا ان شاء الله بعملها للصفحه الجديده :)

 

الله يفتحها بوجهك ويوفقك يا رب ^_^

 

انا كل ما اغيب بلاقيكي ببلد
مبروك يا جارتنا بكراا بتتعودي على الحر و الخمسين مؤوية و الغبرة و الرطوبة
تخيليها جلسة تنضيف بشرة
مبروك على الشغل و الاستقلالية
اولها في صعوبة اكيد بس بعد هيك الوضع كتير بتغير
يعني افهم من هيك انو صرلي حدا انزل عنده بدبي و انبسط :))) حلووووو

الله يوفقك حبيبتي بتستاهلي انتي كل خير

 

شفتي...هي بديت استقل عال 34 ...للستين بكون متعوده و متأقلمه ان شاء الله :)

ياااااااااااااااااااااااريت...جد يا ريت, اساسا انا بقدر استقبل صديقه بالسكن ...انتي تعالي و اتركي كل شي علي :)

تسلميلي يا قمر :)