Things I Like To Whisper About

Would You Hear Me Whispering

لنكتب عن "اسباب تأخر سن الزواج....مع ام ضد " في شهر ايار


هلا ما في خلاف ابدا على ان الزواج نصيب و شي مكتوب من الله سبحانه وتعالى و ما في شي ممكن يغير هالواقع, يعني لا تلحلحي ولا تزبطّي ولا تجملي واللي بالعربي بتعني اكذبي و نفس الشي للرجال برضه, هو نصيب

انا عمري 34 سنة ومش متزوجه و هالشي يعتبر طبعا تأخر في سن الزواج ...ماشي تأخر كتيير في سن الزواج من وجهة نظر بعض الناس ....و قد يصل الى مصيبه من وجهة نظر بعض الناس التانيين مثل عمّاتي مثلا :)

هلأ من تجربة شخصيه, انا ما عندي مشكله والحمد لله, انا انسانه ما بعمري عملت علاقات و طول عمري ماشية صح و اعتقد ان من ابسط حقوقي اني اتزوج شخص انا مقتنعه فيه 100% و مع اني اقتنعت باشخاص و بعدين اكتشفت انهم سيئين وهالشي كان ضمن حدود الارتباط و علم الاهل, لكني لسا مصممه على انتظار الشخص المناسب اذا في نصيب.

بعرف ان ظروف الحياة صعبه وهاد سبب رئيسي من اسباب تأخر الزواج و الحياة بهالايام قليلا ما تقدر عيله تعتمد على راتب شخص بالعاده في جزء كبير من الشباب بفضلو الزوجه اللي بتشتغل و بشغل ثابت و افضل المرشحات بكونو المدرسات و من بعدهم موظفات الحكومه, موظفة الحكومه دوام قصير و اجازات سنويه و اجازات امومه و اجازات مرضيه و المدرسات بزيد عن هالشي الاجازه الفصليه و الاهم الدروس الخصوصيه اللي ممكن تكون دخل جديد للاسرة, طبعا هاي طريقة تفكير ناس معينين وما بنقدر نعمم ولكنها موجوده و بكثره, و لكن هلأ التأخر عم وشمل الكل, حتى المدرسات و موظفات الحكومه , ما بعرف هو الوعي زاد بمعنى تكوين اسرة و التفكير بكل التفاصيل؟؟؟ و يلا المهور غليت؟؟ و يلا الكل بدور و ببحبش على نصه التاني بمنطقيه اكثر من قبل؟؟؟ ويلا الشباب و البنات صارو يحسو الالتزام صعب و مقيّد للحريه؟؟؟؟ ويلا تأثير اللي بنادو بحريّة المرأه و رفضها للوقوع تحت تأثير "سلطه " الرجل؟؟؟؟ شباب عاملين عمايلهم و مش قادرين يقتنعو ان في بنات مناح؟؟؟ اسباب كتيره كل وحده بدها ادراج لحاله.

اللي بعرفه من تجربتي اني مش مع التأخر بالزواج لعدة اسباب, منها ان التأخر بالزواج بعني ان المعايير تغيّرت صحيح و لكنها برضه بتصير مهمه و الها اولويه والتنازل عنها شبه مستحيل, و بتصير فرصه انه "بكره بتغيّر" معروفة انها مستحيله مع قناعتي التامه بانه ما بصير اي وحده او واحد يتزوجو على امل تغيّر الاشي او العاده الغير محببه في الطرف التاني, المفروض الموافقه على الارتباط بشخص انها تكون كامله و بظروفة و عاداته و شكله الحالي و بدون اي وعود شخصيه للنفس بتغيير اللي قدامي ليصير يعجبني.

اشي تاني و هو الاولاد...التأخر بالنسبة للبنت و للشب الكتير بعني انك راح تخسر وقت مع اولادك, الاعمار بيد الله اكيد و القصد مش انتهاء العمر لا سمح الله, القصد هو انك تلعب مع ابنك و انت بال 30 غير عن ال 40 و غير عن ال 50 و انك تحاول تقرب من ابنك بكل فتره من عمره لازم الفجوه العمرية اللي بينكم ما تكون قريبه لحتى يتأكد انك ما عم بتجاريه وانك صح حاسس فيه, مع ضرورة لفت النظر هون لان مش كل الناس هيك, في ناس مهما كبر عمرها روحها بتضلها صغيره و بتقدر تتأقلم مع اللي حواليها بغض النظر عن عمرهم, زي ما في ناس بالعشرينات و الثلاثينات و بتكون نفسيتهم زي اللي بالثمانينات و التسعينات

و اكيد في امور تانيه يا ريت تشاركونا فيها انتو كمان و تحكولي رأيكم بوجهة نظري :)

ملا حيظ على الهامش

هذا الموضوع مشاركه في لنكتب عن "اسباب تأخر سن الزواج....مع ام ضد " في شهر ايار يلا كل واحد و وحده يكتبو عن الموضوع , ما بدنا نوقف هالفكره ...لسا بكير لنتكاسل عنها ويلا شو رأيكم ؟؟ :)

الموضوع جهزّته من فتره و هلأ لان في نت قدرت انشره....الحمد لله

انا اسفة على التأخر بالردود و على التأخر بقراءة ادراجاتكم, ان شاء الله خلال العطله هاي راح امر عليهم كلهم و بدي احكيلكم عن اخر اخباري :)


شكرا لكل اللي لسا بزورو مدونتي بالرغم من غيابي , العداد و بالرغم ان ما في شي جديد من فتره ما نزل عن ال 70 زائر يوميا :) شكرا الكم

23 التعليقات :

انا اصلا بفوت عشان ازيد العداد مش عشان الادراجات !

 

يا ويسبر على آخر الشهر جاية تحكيلنا!

:كسل:

أنا حأكتب في الموضوعيْن ، و لا يهمك :)

استني علي بس

 

W7l

له له له ...يعني الادراجات مش ولا بد صارت :(

اهلا و سهلا فيك, دائما منورني بوجودك ....و برضه بحب اذكرك اني المكتشف و المعلن الاول عن مدونتك :)

يس يس...بحمّل جمايل انا

Sheeshany

مهو موضوع اخر اسبوع من الشهر, راح يومين و نص تقريبا و ضل 5 ايام فاااااااااا لسا في وقت لتكتب :)

هيوتنا مستنيين :)

 

مساء الخير

العداد....مهذا دين عليكِ
ولازم تسدديه
خاصة انك رجعت تشتغلي وبالامارات
نق ...على راي هيثم
ههههههه

احنا ما بنستغني عنك
الله يرضى عليكِ ويسعدك

 

صديقي يوسف
ربنا يسعد مساك و كل اوقاتك

العداد مش مهم, المهم انكم موجودين و هالشي بسعدني كتير كتير

الادراجات اللي راحت علي ان شاء الله بدي اقرأها كلها
امبارح بديت بقرأه ادراجاتك عن جنوب لبنان و نكشة الاربعاء لصديقنا نادر و لكني وقفت, لاني بدي اقرأهم برواق و بدون ما حد يقطّعني و ان شاء الله بالعطله هاي راح امر على الكل و اعوّض اللي راح

بالنسبة للنق....فنق قد ما بدك الكل بطلعله ينق الا هيثم :)

امييييين يا رب....دائما ادعيلي :)

 

بس حبيت أشكرك على المدونة الرائعة عنجد بتفش الغل وأكتر شي عجبني بهاد البوست "يعني لا تلحلحي ولا تزبطّي ولا تجملي واللي بالعربي بتعني اكذبي و نفس الشي للرجال برضه, هو نصيب"


يومك سعيد :)

 

Anonymous

شكرا جزيلا على المرور و الكلمات اللي جدا اسعدتني :)

اهلا و سهلا دائما :)

Sheeshany

هلأ انتبهت للصوره :)

الله يرضى عليه يا رب.... بس يا ريت تكون يتجلي بذمة و ضمير

 

Very interesting subject. I am of course with early marriage. It becomes much difficult after a certain age. All my Syrian cousins married very young, some of them became grandfather/mother in their early 40s (I am not kidding).
I have a lot to say about this topic so I will save it to my post :)

 

سلام ويسبر ، أنا من زمان بتابع مدونتك و عشقتها كتييير لدرجة إني قرأت معظم إدراجاتك من السنين السابقة .كتيييير بحب طريقتك في التعبير ، مرات بحس كأنك بتحكي عني ، يعني مشاعرك و أفكارك قريبة كتير مني،
موضوعك هالمرة مهم كتير و أنا رأيي متلك إنو"من أبسط حقوقي أتزوج شخص مقتنعة فيه 100% "و ماأرضخ للزن من العيلة
زعلت كتير لما عرفت إنك إجيت علخليج رغم إني عاية هون كل عمري، يمكن لأني ما بحب الغربة، بس الله يوفقك و يكرمك و يحققلك أمنياتك و ديري بالك عحالك كتير منيح

 

مدونتك يا ويسبر مميزة وحتى لو أنشغلنا وماعلقنا دائماً فأكيد بنزورها بإستمرار

بالنسبة للموضوع فهو كبير جدا ولا تكفي تدوينة واحدة للإحاطة بكل مافيه

ولكن هنالك أسباب تأخر أقتصادية بشكل عام واجتماعية وخصوصاً في هذا الزمن

في النهاية كل شخص حالة خاصة بحد ذاتها، والتأخير في الزواج على البنت أصعب بكثير من الشاب بسبب طبيعة المجتمع الذكورية والتي تعامل البنت كطرف أضعف في المجتمع

رأيك واقعي وصريح، وأكيد تأخير الزواج غير مستحب للأمور التي ذكرتيها
وأيضاً الرسول صلى الله عليه وسلم حث على الزواج المبكر وصيانة النفس والمجتمع

أعتقد أنه أهم عامل في الوقت الحالي لتأخر الزواج هو العامل الإقتصادي من غلاء معيشة والمغالاة في متطلبات الزواج وغيرها من الأمور المادية

الله يوفقك للخير وإن شاء الله تلتقي بالإنسان المناسب وتكون الظروف مناسبة أيضا ويتم بينكم على خير، أنت بتستاهلي كل خير

وجزاك الله كل خير على طرحك لهاي المواضيع الرائعة والمهمة النا كلنا

 

السلام عليكم
كيف حالك ويسبر؟
ان شاء الله دايماً بخير وراحة بال..
حاولت اترك لك تعليق اخر تدوينة لكن عند معي..وتركت لك تعليقاً بالريدير..

موضوع اليوم جد جد حساس لبعض الناس
لكنه بالنسبة لي طريف وممتع
لغاية الجد على الباب يعصبني وينرفزني
معاك ع الخط
ان شاء الله منتظرة كتابات مختلفة عن وجهة نظري وحالتي العجيبة..

 

Jaraad

You r right

Many of my cousins are now grandmothers- Mashallah - and they are in their early 40s , one of them is 38 years old , her daughter call me "Aunt" lol :)

Waiting for ur post :)

Lily

اهلا و سهلا فيكي يا قمر
وانا بقول المدونه منوره بنور جديد و مش عارفه من وين, اتاريكي بتنوريني و انا مش عارفه :)

الله يسعدك كلك ذوق والله و كلامك اسعدني جدا جدا و بتمنى دايما اكتب اللي بفش قلبكم و بلامس حياتكم لحتى تشاركوني و اشارككم بامور هالحياة الكتيره

هي شكلها و الله اعلم غربه لفتره قصيره جدا حتكون :)
الشوق راح يرجعني شكله

امين يا رب, ربنا يسر الخير للجميع ان شاء الله
دائما ضلك طلطلي و يا ريت دائما تشاركيني برأيك و بتعليقاتك

 

سراج الماضي

شكرا جزيلا لكلامك
امين يا رب

لاتي

وعليكم السلام و رحمة الله و بركاته

مشتاقه يا احلى اخت بالدنيا :)
مواضيعك الاخيره كتير عجبتني و بدي اعترفلك اني احتفظت بنسخه منهم عندي لانهم عجبوني كتير , واحد منهم اللي لغيتيه :)

وانا متأكده ان الموضوع عجبك لانه يحاكي اللي انت كتبتيه :)

الي ساعتين بدور بالريدير مش عارفه اوصل لشي, ما شفت لا تعليق ولا ايميل :(

وجودك مصدر سعاده دائم الي, شكرا لوجودك يا قمر

 

حنفي لا يحبذ
بس بوعدك أحاول أكتب عن هالوضوع
بس طالعه قصة براسي بحاول ألملمكمياها

عمرك قرأتي قصصي؟
ترى جلطت الكل فيها
muahahaha

 

هاااالووو أيتها المغتربة، وإنشاء الله أمورك تمام وبالتوفيق يا رب :)

راح أحاول أشارك وأكتب عن الموضوع.. خاصة وإني انضمتين السنة رسميا لفئة المتأخرين.. ههههه
أنا كنت حابة يفوز موضوع الزواج من المطلقين والمطلقات.. كنت حابة أعرف عن جد شو رأي الناس بهيك موضوع :)

دمت بود

 

ان شاء الله رح نشارك
على فكره انا انتبهت ع صورة هيثم وهو بيجلي ما شاء الله عليك يا هيثم ايوة هيك ساعد ام هيومه الله يخليها الك بس سؤال انت عن جد جليت جليت ولا بس يلا يلا الوجه الوجه:))))))))))))))

 

أولا ألف مبروك الدوام الجديد ما صحلي أعلق بكير ....^_^ إن شا الله ربنا بوفقك :)
تاني شي الموضوع كتيير حلو وفيه أفكار كتيره بصراحه ....أنا بنضم إلكم للكتابه إن شا الله عن قريب :)بلكن اليوم نشرته :)

 

نورنياتي


ههههههه...شكرا لحنفي و لالك على اعطاء الموضوع فرصه كتابيه :)

لأ ما قرأت قصص :$...مع اني بحبشت كتير بمدونتك و قرأت اشياء كتيره, شكلي ما وصلّت للقصص لسا

بنستنى القصه يا قمر فلا تطولي كتير

كيكي

ابااااااااااااااااااااه :(

الحمد لله لهلأ كل شي تماما ان شاء الله
هينا بنتأقلم نتوفه نتوفه

يا ريت ....لاني متأكده ان في عندك حكي كتير عن الموضوع, لااااا لسا قدامك كم سنه فااااااا لحقي حالك :) هههههه

موضوع الزواج من المطلقات راح اكتب عنه قريبا و خصوصي انه مهم و انه حصل على اقل عدد تصويت فما راح يكون بالتصويت مره تانيه

قريبا جدا راح اكتب عن الموضوع

 

Sozan

قرأت مشاركتك يا قمر و علّقت

قصه حقيقيه بتحصل بحياتنا او بحياه كتير اشخاص حوالينا

انا حاسسته بس واقف للصوره مش اكتر و اول ما تصور قام هالمريول و رجع قعد قدام اللاب توب :)

Orangee

الله يبارك بعمرك يا قمر....اميييييييييييين يا رب :)

يلا اذا في انتظار الادراج :)

 

بدي أنق
و يوسف مساندني الله يسعده

و أنا بالجلي شبّيييييييييييييييييييح

آه

--

فرصة تحطي رابط مشان نروح هنااااااااااااك

:P

خاصة للجداد :)
من القراء و ما بعرفو عن الطبخة

"أي طبخة! هو فيه طبخة!"

---
س"ع"ال
كم وجبة صرت طالبة بالإمارات!

فرصة تطبخي بشلن

و ما حكيتيلنا عن اللبنانية - خخخخخخخ

 

رابط؟؟؟
مش فاهمه وين هناك بدك تروح؟؟؟
O_O

اممممم
هو انا بالنسبة للاكل بنسى حالي, بفطر الكورن فليكس و النسكافيه و بس اجي انام بتذكر اني ما اكلت شي طول اليوم و بس اروح عند اخوي اخر الاسبوع بنقضيها اكل ليوم الاكل :)
و كلّه من برّه علشان ترتاح نفسيتك و عحساب اخوي ال لاني لسا ما استلمت راتب علشان نفسيتك ترد تتعب :)

 

شو شيشاني ؟ وين اللبنانية؟ جبتني هون عالفاضي و بعدين مع اشاعاتك المغرضة

يمكن قصدو للمدونة اللي بتحطي فيها الادراجات

 

الله يسامحك يا دكتورنا...انت لسا بترد على شيشاني!!!!!!

اهااا...هيو حط لينك وقريبا بنزل كل ادراجات هالشهر ان شاء الله :)