Things I Like To Whisper About

Would You Hear Me Whispering

خلص بكفي....خنقتوني




موضوع الزواج كتير كبير و كل ما كبر العمر الموضوع بكبر اكثر, و اللي بكبر معه الضغوطات المرافقه اله الضغوطات الشخصيه و التفكيريه الخاصه في نفس الشخص و الاسؤ الضغوطات اللي بتصير من الناس

الناس بتفكر بما انك كبيره بالعمر -من وجهة نظرهم لاني مش حاسه حالي كبيره ابدا او عالقليله بالكبر اللي بحاولو يحسسوني فيه - فانتي بس يجيلك عريس فمش طبيعي تحكي انك بدك تفكري او لا سمح الله تحكي انك مش موافقه, العالم ما بتفهم ان سبحان الله الموضوع ارواح و بتتلاقى او بتتنافر, يعني بس الشب يكون ممتاز وما عليه عيب وانا هيك شايفته بس ما في "قبول" يا جماعه ارواحنا ما تلاقت مش قادره اوافق و الكل يقوم يثور عليكي بطريقته

الاب والام و بكل هدوء مصطنع...."زي ما بدك بابا بس انتي خدي وقتك بالتفكير" يعني ضلّك فكري مدّه اطول وقرارك مش مقبول...., "يا ماما يا حبيبتي مش انتي نفسك يصير عندك ولاد و الك فتره مزهقتينا بقراراتك الغريبة عن تتبني و ما تتبني ؟؟؟ تزوجي لحتى يجيكي ولاد" يعني برضه قرارك مش مقبول و فكري اكتر

المحبطات من العائله..."انتي بتفكري حالك بتصغري و اذا اليوم اجالك واحد بكره ما حد بتطلع بوجهك" عأساس الاخت بتمسك حجر الواقع و بتطبشني فيه و بكل اخلاق رفيعه و عأساس هيك بدها مصلحتي

قريبة تانيه " يا ويسبر يا حبيبتي العمر بمشي و بكره بيجي يوم بتكبري ولحقي حالك جبيلك ولدين قبل ما تروح عليكي" عأساس الاخت بتعرف بالغيب و بتعرف شو راح يصير معي و هي اللي بتحدد كم ولد وكم بنت ربنا بدو يرزقني

و وحدة ثالثة بتحكيلك " انا اكبر منك ب 5 سنين و هلأ انا ما بحلم يتقدملي واحد مش متزوج مره و مرتين و عنده ولاد او حتى ببداية الخمسين.....و انتي بتفكري يضل شكلك نفس هلأ بعد سنتين تلاته " الله يكئب اليهود على هالقعده يومها كئبتني عشر اضعاف الكآبة اللي كنت حاسه فيها

الموضوع مش ناقصه ضغوطات, انا بعرف اللي بتحكوه وحاسة فيه, الساعه البيولوجية اللي اكلتو راسي فيها بتك بداني انا فشكرا لمشاعركم الطيبه, عندي ايمان تام بانه الموضوع بايد رب العالمين و اذا الي نصيب بشي راح يكون بوقته و بدون اي تغيير او تأثير مني, الشب منيح والله منيح بس في شي ما بنحكى بالكلام شي بنشعره , و بعرف ان طبيعي العريس يكون مش محبوب باول كم لقاء و لكن في مشاعر ما بنقدر نتجاوزها, القبول و الارتياح كتير ضروري, وبعد ما فكرت و استخرت 50 الف مرّه و بعد ما قعدت مع العريس و اللي جد جد جد ممتاز بكل المقاييس و بعد ما نمت موافقه صحيت الصبح و اول شي حكيته لماما بس فتحت عيوني " ماماااااااااااااااااا ما بدي :(" الموضوع مش دلع ولا زناخة مخ الموضوع اني انا فاهمه و حاسه و عايشة اللي بتحكوه و برغم كل هاد ما قدرت اوافق فتخيلو !!!!

فمن شااااااااااااااان الله خلص تضلو تضغطو علي لاني زهقت و كرهت الموضوع
والله انخنقت ....جد انخنقت :(


ملاحظه ع الهامش

العالم هاي كلها عرفت بالموضوع لان اخت العريس و العريس ولانهم ذوق اجو عبيوت الاجر ...العالم ذوق جد ذوق بس يا جماعه مش قادره :(




28 التعليقات :

ما راح أنزل فيك مواعظ وأحكيلك ما تهتمي وشو دخل الناس ووو.. لإنه كلام الناس للأسف بيزعل وبيجرح وشو ما حاولنا نحكي لحالنا ما بدنا نتأثر راح نتأثر غصبن عنا.. بس بين كل هاللي بيرمولك حكي ولا واحد واقف محلك.. ما في أشطر منا برمي المواعظ والتنظير وما بنعرف نحط حالنا مكان الناس.. لذلك خذيها قاعدة واعملي اللي بيريحك بس، وإنت حرة وقرارك صح، وبكرة لا سمح الله لو ما توفقتي معه هاللي كانوا ينصحوك أول ناس راح تتنكرلك وتحكيلك كله من إيدك وهاد كان خيارك ولا واحد منهم بيعترف إنه فكر يضغط عليكي أو كان إله در في اللي وصلتيله.
الله يوفقك يا رب
ومسائك سعيد

 

يا بنتي يا حبيبتي يا ويسبر الفاضي بيعمل حاله قاضي فلا تفكري كتير ولما وحده تحكيلك عن الزواج قوليلها وهاد على لساني هه انه الزواج نهايته للمره سواء كان سعيد او متعوس اللي خلفه رح تطلع المره منه يا اما ع المقبره او بتسعه وتسعين عله !!
فلا تحطي في بالك والساعه البيولوجيه حبيبتي اللي عمرها 60 صارت تجيب اولاد والهدف من الزواج مش بس الخلفه الهدف منه حياة مشتركه ومن اجزائها الانجاب!
وكلام الميمه بيجي من حب واحيانا من الحب ما قتل بس الله يهديهم وعليكي وتتحملي
الله يهدي سرك يا ويسبر ويعطيكي الشي اللي بيكون لصالحك
على فكره زوجي شاف الصور اللي انت حاطيتها وحكالي احكيلك Live your life ,People don't have anything to do with it,if you marry and you are not happy they will not come and cheer you up !

 

والله ولا ممكن
الا لما ربك يريد

ولما يريد يصبح الزواج قدرا
ولا مفر منه

نفسي اكتب عن زواجي كيف تم منذ فترة
ووعدت هناء اكتب عنه من شهور

بس الاوضاع مش بتساعد ولما كتبت عن النهر والبحر الميت كانت البداية

بعدين قلت خليها لوقتها

طنشي شويّتين
الله يرضى عليك ويسعدك

 

السلام عليكم
الصراحة ما بلومك إنك معصبة
بس الأهل بتعاملوا مع موضوع الزواج من منظور المصلحة البحته بدون النظر للمشاعر
ولا تظني ذلك للبنت بس صدقيني كمان للشب
أصلاً منظومة الزواج عنا لازم تنشال من مرة و نجيب وحده جديدة

الله يخترلك الأفضل و ييسرك من يكون لكِ قرة عين

 

يعني مش عارفه شو أحكيلك
شر البلية ما يضحك
بس أحلى جزء تاع "ما بدي عالصبح"
ما تزعلي مني ويسبر بس جد حششت :))

 

عظم الله أجركم..هلأ بس والله قرأت الموضوع.

بدي أحكيلك لا تسمعي لحدا ..ما بينفع لأنهم أهلك والهم حق عليك..فلازم يحكوا ورح تضطري تسمعي..مع انه الحكي نفسه نفسه وكلها أشياء بتعرفيها.. بس ما بقدروا يظلوا ساكتين..ويمكن الأمهات بركزوا على الموضوع أكثر هيك بحس.

أما قريباتك فأنا مش عارفة كيف بتوقعوا انهم يقنعوك بالحكي "الفظ" تبعهم..يعني انهم هيك نصحوك وبصراحة :/
تكتأبيش ولا على بالك..وما شاء الله عليك هي أنت واثقة برب العالمين وعارفة انه كله نصيب..والموضوع ولا اله قانون..مش انه وافقي واكيد رح يكون كل اشي تمام بس وافقي.

بس فيه شغلة هسه خطرت ببالي..يعني فيه ناس وقت الجد بخافوا وبتراجعوا..فما بعرف شو رأيك فيهم لأنك بتقولي كنت موافقة وبعدين بطلت ؛)

 

والله صعب كتير اللي بتطلبيه!!!نحنا شو ورانا غير اننا نزن ونضغط ونسأل شو صار؟ وليش لا ؟؟؟

روحي طيري:))

 

im not sure what should i say, but still i think life is opportunities, i know we all believe in god, and we all believe that god has some kind of plan for us, but i think you have to think about this with some logic too, maybe you dont feel anything for him, but who knows maybe after a couple of time sadrek rah yenshereh elo!

 

shofi ya 3azeezty ya wisper
ana bel jam3a sakanet ma3 bent ma ba7ebbha ,, zoog o a5lag o lo6of , bas sob7an allah , eshy jowway ma be7ebbha , o men ha et3allamt eno el 3eshre eshy mnee7 o dafi , ba la yo3tamad 3aleeh , l2nno 3eshret 20 sane ma bt36i el fara7 ely bta36eeh la7zet 7obb wa7de ,,, o tzakkary da2eman ma8oolet el 5etyara: Etjawwazna la nensater sagallah ayyam el fdee7a

Hugs and kisses

 

مرحبا :) اول شي الله يعينك على هاي الضغوطات ويصبرك
الشي التاني انوا اكيد كل هدول الناس خايفين عليكي من جهة بس انا بعرف انو احنا بنحس انهم شفقانين علينا وشعور الشفقه تبعهم بيخنق وكمان الأحساس اللي بيجينا كبنات انوا الكل بحاول يقنعك انوا الحياة من غير رجل ما بتنطاق فخدي اي رجل بتلاقي وهاد غلط
بس انا بدي احكيلك شي واحد وما تدايقي مني .. طيب؟؟؟
اذا العريس منيح من كل الجهات زي ما بتقولي شوفي كتييير ببيت اهلك بس قعدوا لحالكم و احكوا بكل شي وبعد 5 قعدات بتلاقي حالك لقيتي الجواب الأكيد اذا اكيد اه او اكيد لا وكل مرة قبل ما تشوفي صلي استخارة والله بيجيب اللي في الخير :) انا ما بحكي هاد الحكي مشان اي شي بس لأنو هاد ممكن يكون الحل لزن الأهل بمعنى لو رفضتي بعد هيك بكونوا اقتنعوا انك ما قدرتي تتقبلي :) واذا حبيتي بعد هل كم قعدة خير وبركة :)
مع تمنياتي الك بالتوفيق من كل قلبي والله :)

 

بصراحة فكرت و كنت متوقع و أنا بقرأ إنك موقفة التعليقات على البوست بس برضه إنت ويسبر

:))

:هيثم الطيوب هنا:

----

دور :هيثم الشرير: الآن

:

لأ بمزح

بس جد بتوقع كلنا فاهمين عليكي

و إنت آخر البوست "سكتّينا" :)))) ف .. ما حنّق عليكي

بكل تأكيد كل اللي بيحكولك هالحكي بحبوكي بس بمواضيع مثل هيك النية الحسنة لحالها ما بتكفي

و متأكد إنك فاهمة علي/نا

---

تتبني هيام مؤقتاً؟
إبلييييييييييييييييييييز

:]

 

كيكي

هلأ انا و زي ما اكيد بتعرفي -لانك اكيد عانيتي ولو شوي من هيك ناس بحكم شغلك عالقليه - بالعاده بطنش و بمشي وما بهمني
ولكن هالمرّه كم النصائح و اللوم استمر و ضلّو مستمر و الموضوع انتهى, طيب يا جماعه شو بدكم مخلص خلص الموضوع :(

بنسو ان الموضوع كبير و بدو تأني و حياة هاي مش اسم الوحده تزوجت و خلصنا من همها, مبعيد الشر ممكن يكون في هم اكبر وراها

تسلمي يا قمر...مسائك فل و ياسمين دائما

Rain

2Abaaaaaaaaaaaaaaaah :"(

Thanks ya 3asal :*

 

سوزان

هلأ همه بفكروني رافضة الزواج نفسه

يعني مين ما بتحب تتزوج و تكون اسره؟؟؟ ومين ما نفسها يصير عندها ولاد وعيله؟؟؟ بس الموضوع مش هيك بدك تعيشي مع انسان ما بتعرفيه عالقليله اولها يكون في قبول ولو بسيط لحتى يكبر هاي حياة بدك تعيشيها مع شخص يفهمك و تفهميه وهمه مش فاهمين هالنقطه

اميين يا رب...تسلميلي يا قمر

الصورة كانت حالتي امبارح بس كتبت الموضوع, جد نتفه وبدي افقع و طول الوقت مخنوقة وبتأفف
شكرا كتير لزوجك و نصيحتهو معه حق 100%
الناس ساعتها بتصير ما بدها تتدخل و في جزء يمكن راح يلومك على اختيارك :$

Yousef

بالزبط....وهاد اللي بريّح بالموضوع
لكن الناس ابدا لا بترتاح ولا بدها تريّح :(

يااا ريت تشاركنا بالقصه, قصصك دائما عالوجع و بتريحنا كتير

ما في غير هالحل, طنشي عشرطعشر شويّات

امين يا رب..شكرا على الدعوه

ربنا يسعدك و يرضى عنّك و يعطيك ليرضيك يا رب

 

Alirbidi

وعليكم السلام ورحمة الله وبركاته

هي كانت تعصيبه و فشّة قلب لحظيه و الحمد لله أتت مفعولها

الاشي اللي تفاجأت فيه ان في بعض شباب بعانو برضه من تأزم العالم اللي حواليهم بخصوص موضوعزواجهم برضه :$

الله يعين الجميع و يكتب الخير للجميع

شكرا جزيلا محمد...اللهم امييييييييييييييين

مياسي

عارفة شعوري اكيد :$

مهو هاد اجا بعد سهر و ارق طول الليل وانا بحاول اقنع حالي بوجهة نظرهم و مش مرتاحه فالصبح قررت ان انا اللي لازم ارتاح مش همه :)

حششي على راحتك يا قمر

 

Dreamy Villager

شكر الله سعيكم....الله يرحمهم و يصبر اهاليهم يا رب

اكيد الهم حق و بالعكس نصائحهم و توجيهاتهم جدا بتفيدني بكل خطوة بحياتي و خصوصي موضوع الزواج لان خبراتهم ومعرفتهم بالناس اكيد مفيده, لكن المشكله بس تيجي تقنعيهم بوجهة نظرك و خصوصا انك بتحكي اشي زي طلاسم بالنسبة الهم, شو مشاعر ما بتنوصف وشو قبول و اعطي حالك فرصه و ما تتسرعي وانت بتكوني خلص ما صدقتي توصلي لقرار يريحك

قريباتي برضه عأساس محبتهم الي -واللي ما بشك فيها ابدا- هيك بتخليهم يكونو, هاي طريقتهم الغريبه بالنصيحه :$

موضوع الزواج بالنسبة الي عالقليله قراره جدا بخوفني, بنسمع عن رجال قلبو بعد الزواج الكذاب و البخيل و النكد و اللي قلب حياة مرته لجحيم, و كلهم بحكو انه هالرجال كانو ملائكه يوم ما تقدمولهم, وانا بخااااااااااااااااف من هالشي
بعرف ما بجوز نعمم
وبعرف انه في هيك وفي هيك
ولكن وبما انه عندي نقطه جوهرية للرفض ولو عالقليله من وجهة نظري فهاد اللي خلاني اغيّر رأيي لان موافقتي كانت معتمده على رأي اللي حوالي و بس فكرت لقيت ان سبب رفضي لساته موجود

انا ما حكيت ان الشب تقدملي قبل سنتين و نفس الشعور اجاني بوقتها و رفضت و اصرّو يجو مرّه تانيه السنة وانا توقعت ان يمكن في نصيب لهيك قعدت معه مره تانيه و برضه نفس الشعور اجاني

الواحد بصلّي استخاره و بتوكل على الله و بمشي بالموضوع و لو وقّف باي نقطه بكون مكتوب و مقدّر من الله و لو حتى وقف و في نصيب ربنا بيسر انه يمشي لو مهما عملنا

لهيك انا مرتاحه بقراري و اللي فيه الخير ربنا بكتبه :)

توّهتك صح :)

وينك يا قمر...طولتي علينا الغيبه...اشتقنالك

 

Naysan

هههههههههههههههه ضحكتيني يا قمر

فعلا صعب الناس ما تبدي رأيها و احيانا تقرر كمان عنّك :)

حاضر....طايره و قريبا كمان ولا يهمك :)

W7l

اللي بنصحوني برضه تطلعو على ظروف الشب
و اللي هي ممتازه جدا, من عيلة معروفه و دارس و شغله ممتاز و حالة الماديه فوق الممتاز, و معتبرينه "فرصه" ولا تعوض , والزواج مش فرصه بس الزواج بكج كامل الظروف و صاحبها مع بعض, الظروف الممتازه ما بتعني ان الشخص يكون منيح و ان الشخص ما يكون منيح بتسوّد اي ظروف بنظر اللي بدها تعيش معه

انا قعدت معه 4 مرات و كل مرّه اول ما اشوفه يجيني نفس الشعور و اندم اني وافقت اقعد معه ومع هيك اعطي نفسي و عطيه فرصه لنتعرف اكتر على بعض

في ناس بتقبلهم كأصدقاء و معارف و وجودهم بحياتك بكون حلو و لكن مش اكتر من اصدقاء :$
انّا نؤمن و تماما ان الموضوع بأيد رب العالمين كتير برّيح فليش نخسر هالراحه ؟؟؟

 

EvaLuna

LOOOOL@ maqolet el 5atayreh :D
m3hom 7a2....el3eshreh la7alha ma betkaffe belzawaj, fe 2asas lazem ykon mawjood la ykbar 2aktar w 2aktar bel3eshreh laken bedoon 2asas ma bezbot, w 3eshret friend kteeeeeeeeeer 3'eeeeeeeeer 3an zawaj :S

2ahlan wa sahlan feky nawarteny ya amar....Rain's friends are my friends 2akeed :P

Hana

اهلا وسهلا يا قمر

الله يعين الجميع و يكتبلهم الخير يااااااااااااااا رب

اكيد ما بتدايق من كلامك يا قمر

موضوع ان العريس يجي اكتر من مرّه وانا مكونه قرار رفض مبدئي بحسّه انا حرام :( انو ليش يجي و يروح وانا عندي اكتر من 50% رفض للموضوع
و هالشي طبعا ما اقنع اهلي فقعدت مع الشب اكتر من مرّه و كل مرّه بس توقع عيني عليه تيجي نفس المشاعر ...ما في قبول و احكي و نتحدث و يسألني و اسأله و هالشعور مش رايح

و برضه الاهل مش عاجبهم قراري و هلأ والموضوع انتهى لسا بحكو
و بيني و بينك :$ بديت احس حالي سطحية بقراري وهاد اللي قهرني, نقلوني من قمّة التأكد لهالتردد هاد و ايش الموضوع انتهى
وهالشي اللي بخنق, انه خلص انتهى الموضوع فخلص

تسلمي يا قمر....ربنا يسعدك و يسعد قلبك دائما

 

Sheeshany

هالقد الموضوع خطير ما كان لازم يفتح للمداوله؟!؟!؟!؟ :$

هو مشاركة وجدانيه و فشّة قلب

انا متأكده ان كلامهم نابع من محبة و انهم بدهم الخير الي...الخير باني اتزوج ولكن مش مهم اللي بعده و انا اللي بفكر فيه و خايفة من اللي بعده

الزواج موضوع مخيف جدا و ربنا اللي بيسر اموره سبحان الله
كيف بتمشي الامور ما بتعرف

الله يخليلكم هيام و يخليكم الها و لكن ما عندي اي مانع :)

بتفكر الموضوع تخويت؟؟؟
جد الموضوع كان عندي و ماما كان نفسها ابصر شو تعمل فيي بس حكيتلها اياه :) و بعدين انا سألت طلع مبدئيا لازم يكونو اللي بدهم يتبنو متزوجين ومن كذا سنة وما في امل ربنا يرزقهم باولاد و اوراق و حاله :(

 

رد على التعليق اللي مش للنشر


الحال من بعضة يا قمر ....وهاد اللي مخليني اتمسك بالقرار

مش ناقصه الواحد واللي فيه بكفيه :(

 

مسا الخير عليكي ان شاء الله يا رب

بتخيّل انه كيّالة كفّت ووفّت , ممكن اللي حواليكي بدهم اياكي تتجوزي بغض النظر انبسطتي بعدها او لأ

الله يجيبلك اللي فيه الخير يا رب

 

الفرح فرح القلب وبس

 

LUNAR.

مساءك معطر بذكر الله دائما

في منهم بدافع محبة بعملو هيك, لكن مهما حاولو ما يبينو بضل عند الجميع احساس "بهم" البنت بموضوع الزواج و بفكرو انها اذا تزوجت خلص مع انه مرات كتير بكبر همها بعد الزواج

امييييييييين يا رب....اجمعين ان شاء الله

كريمة سندي

ربنا يفرّح قلوب الجميع بالخير دائما

اهلا و سهلا فيكِ

 

اذا شفتي اكتر من مرة خلص ما تخلي حكيهم يشعرك بالتردد لأنوا الأهل بحكوا لأنهم خايفين ترفضي العريس اللي رح يجي ورا يعني خايفين انك رافضة الزواج بشكل عام وككل الاهل بدهم يطمنوا انو بنتهم تزوجت فما تحطي ببالك هاد اسمو نق القلق :P

 

Hanan

ههههههههههههههههههههه.... عجبتني التسميه
نق القلق

ذكرتيني بوحده بتسألني "ليش ما بدك تتزوجي....معقده يعني؟؟؟"

و بتطلع علي و بتستنى الجواب الاخت :)
قررت انو ما بدي و قررت انو معقده

كثرانين اللي بقلقو علي هالايام...و بالتالي كثرانين اللي بنقو :)

 

مرحبا ويسبر :
حاسة و فاهمة باللي بتحكي فيه لاني مريت فيه و عشتو لحظة بلحظة و كلمتك "بكفي ضغوطات" في مكانها .. كل شخص هو اكتر واحد بفهم حالو و بعرفها و بعرف كيف تفكيره و وضعه و ما بستنى حدا يقولو شي ...
بصراحة انا معك بردة فعلك و انو في شي اسمو احساس و راحة و قبول اولي للبني ادم و هاد الشي اللي كنت دايما استناه و ادور عليه بكل العرسان بس اوقات كانت تمر علي فيها يأس و كنت بتمنى لو اهلي غصبوني ع حدا من اللي اجو و كان منيح و اتعاملو معي بالاجبار .. معلش يمكن تنصدمي بس الا الواحد تيجي عليه لحظات يأس و صدمة بالواقع .. بس مش عشان يهرب من هالحالة يتغاضى عن مشاعر القبول بدها القصة تفكير اكتر .. خدي فرصة تانية و اتاكدي كل شي نصيب و بيد رب العالمين

 

أنا لن أعلق أكثر من ما قالوه الإخوان هون ....بس شغلة ضرورية جدا أحكيها :
أنا بحترم فيكي شجاعتك وصراحتك الكبيره ومشاعرك لإنو اللي كتبتيه كتيييييييير من البنات بعانوه ويمكن أكتر بس ما حدا بسترجي يكتب فيه أو يعبر علنا هيك خوفا من نظرة المجتمع المريضة ....شجاعتك وجرأتك عجبتني :)
you have impressed me ;)

 

Sire

اهلا يا قمر

المشكله ان اللي حواليكي ما بعرفو بكم الضغط اللي بزيدوه عليكي

انا كمان مريت بلحظات يأس ....و لكن بالاخر بتصحي و رفضك بكون اقوى, وبس تفكري منيح بالحياة اللي بتستناكي و ما تشوفيها مريحه ولا اللي بتتمنيها ما بتقدري تستمري بمحاولة ارضاء اللي حواليكي

من رحمة ربنا فينا انّه سبحانه وتعالى بايده تحديد ايمتا و وين و مين ولكن احنا بدنا نتعب حالنا :$

Orangee

حبيبتييييييييييي :)
الله يسعدك, كلامك بشرفني و هاد بعض مما عندكم
مع ان تعليقك و تعليق هيثم حسسني اني الموضوع اخطر مما كنت افكر

:)