Things I Like To Whisper About

Would You Hear Me Whispering

مبروك عليكم






خبر وللاسف بتكرر بشكل يومي, بننزعج و بنسم بدنا بندعي للي توفاهم الله بالرحمه و للي تسبب بالحادث بالهدايه و بتمشي الحياة و لكن ما بنتذكر ان الحياة ممكن توقف عند صحاب و ابطال هالخبر

خلينا بندا القصه من اولها, اب متوفي من زمان و ام توفت وتركت بنت كبيره تراعي باقي الابناء و البنات, لعنة مرض الكلى صابت هالعيله اخ مرض و اخ تبرّع لاخوه بكلية و بعد ما تزوجو التنين رجع تطور المرض و توفى الاول و بعدها بكم سنة توفى الثاني و زادو الايتام بهالعيله, و زادت مسؤوليه البنت الكبيره, و لعنة هالمرض مستمره اخ مرض و اخت تبرعتله بكليه, الحمد لله الاخت بخير و المريض حاليا بالمستشفى.

بدا الفرح يدخل هالبيت بنجاح الاخين التؤام الصغار بالجامعه و رجوعهم من العراق سالمين من الحرب, و مع زواج الاول و الاحفاد الجداد و زواج التاني و جيّة الحفيده بدت ترتاح هالاخت ولكن للاسف كثرة المصايب ضعّفت قلبها و ما عاد يستحمل اكتر من هيك و خذلها وهي ماشيه و وقف بعد عملية القلب المفتوح اللي العيلة فكرتها نجحت و رجع الحزن يدخل على هالبيت و لولا ضحكات هالاحفاد فيه ويلا ما بقي فيه حياة.

و رجع الحزن على هالبيت يوم الاربعاء الماضي بسبب مباراة كرة قدم....بسبب فوز برشلونة!!!
طبعا و زي ما كلكم بتعرفو و اكيد في جزء كبير منكم بستغرب كيف ان فوز برشلونه او ايطاليا او حتى ساحل العاج اله تأثير مباشر على بعض الناس و بستوجب عليهم التعبير عن فرحتهم "بانتصارهم" باسؤ الطرق اللي ممكن تخطر على بال اكبر مغفلين العالم.

واحد من التؤام وصّل زوجته و بنته لعند اهلها و راح ليحضر مباراة كرة قدم عند اخوه و بعد نهاية المباراه رجع اخدهم و بعد 5 دقايق من خروجة من بيت اهل زوجته مغفل من هالمغفلين قرر يحتفل بطريقته الخاصه و بأنه يسابق السيارات بالشارع و يشحّط و يخمّس بوسط الشارع, و فجأه فقد السيطره على السياره و ضربت بالرصيف و طارت للشارع المقابل و ضربت بسيارة هالعيلة الصغيره و اللي المفروض يحتفلو بعدها باسبوع بمرور سنتين على زواجهم و بثلاث سيارات تانيين, فورا الزوجه (24 سنه) توفت و البنت اللي كمان كم يوم بصير عمرها سنه و 3 شهور وصلت المستشفى متوفيه و الاب بحالة خطره و رضوض بكل مناطق جسمه, تخيلو عائلة طلعت من بيتها و بعد ساعات قليله انتهت هالعيله!!

هالشب قريبي, و حاليا هو لسا بالمستشفى و لليوم صوته و صوت بكاه معبي المستشفى و هو مش قادر يستوعب شو اللي صار, مش قادر يستوعب كيف فقد زوجته و كيف شاف بنته بتموت قدامه, كيف اضطرو يقصو السياره لحتى يطلعو جثة زوجته من السيارة قدام عينيه, كيف دم بنته و زوجته كان معبي السيارة

بدقيقة فرح غبية بدون داعي و مبالغ فيها انقضى على 3 عائلات, عائلة الشب و عائلة اهل الزوجه و عائلة اهل الزوج, البيت اللي ما صدقو يدخله الفرح بضحكات الاحفاد رجع فيه صوت البكا على فقدانهم, الاهل اللي ودّعو اكبر بناتهم و اول احفادهم قبل دقايق صار مليان حزن و الم و قلوب اب و ام و اخوان و اخوات مكسورة و الشب اللي ما صدق و هو يستقر و يتزوج من فتاة احلامه و ربنا كمّل فرحته بانه خلاه اب فقد كل شي بلحظات


مش عارفة لايمتا راح يضل الجهل متفشي في عقول العالم؟؟؟؟ ايمتا بدهم يبطلو يحولو اي شي لانتصار شخصي الهم ؟؟؟؟و ايمتا بدنا نخلص من هالطرق الغبيه في المبالغه بالتعبير عن الفرح؟؟؟؟ و ايمتا بدنا نخلص من هالاستهتار بارواح البشر؟؟؟

لهالعالم بحكي...مبروك عليكم جهلكم واللي بتمثل بعيونكم على انه "انتصار" و ربنا يبعدكم و يبعد اثر جهلكم عنّا


23 التعليقات :

أول شي عظم الله أجركم، مو عارف شو أحكيلك غير أنو شي جدا بحزن، ومبارك علينا جهلنا و فرحتنا بانتصارات غيرنا

 

بالك شو السبب في اللي صار !!
مش لانه فشي قانون يحاسب وبقوة وكله بكره بينحل بفنجان قهوة
لا تأخذيني يا ويسبر بس الاستهتار في حياة الناس مرده انه ما في قانون قوي يحاسبهم لانه اللي ما بيستحي بيخاف
عظم الله اجركم فيما فقدتم والهمه الله الصبر والسلوان على ما فقد والله يرحم المفقودين

 

لا حول ولا قوة الا بالله
الله يصبره ويصبر هالعيله

 

لا حول ولا قوة الا بالله .. ما في شي ينقال :(

 

في البداية فكرت القصة خيالية بس لما كملت الأحداث اكتشفت إنو عن جد !!!!!
مش عارفة شو أحكي جد

 

صباح الخير
والحمد الله على السلامة
وكان باقي يومين على ال 11 يوم وكنت رح اذكرك بالقوانين؟؟؟

الحمد لله على كل شيء
ساختصر عليكِ كل شيء
واقول لكِ

للتخلف عنوان
ان تعيش في مثل هذا المكان
حيث لا احد يقدر الحياة ولا الانسان
كل ما بيمشي الزمن سنة لقدام
ينرجع بمفهوم التقدم عشرات السنين الى الوراء

المهم انني متاكد ان كل من سيقرأ إدراجك سيقول عادي هي شو شايفة ؟ ورح يبلش يستذكر ما شاف هو ؟؟؟

الله بس يرحمنا برحمته

 

فظيع ويسبر
فظيع كل ماحصل، وفضيع ان الناس لاتتغير ولا تتبرأ من استهتارها..بل متوارث هو!!

إنما هو اختبار من الله لكل هؤلاء الناس الطيبة
اختبار قاس صحيح لكن عليهم ان يحتسبوا...
الأجر عند الله.

بات من الضروري توقيف المجتمعات العربية
واعادة تربيتها من الأول ..

في المغرب لدينا حرب باردة
تأخذ ارواحاً كثيرة بشكل يومي..
وحالات عائلية تأذت من هذه المسألة لذا اعرف جيداً معنى المأساة..بفقد احد أو افراد كاملة من العيلة بسبب التهور وحادث سير الطرف الآخر فيه طائش
..

رحمة الله على الناس الطيبة اللي راحوا فيها، والله يصبر الراجل والعيلة ..

 

لا حول ولا قوة إلا بالله
عظم الله أجركم وغفر لميتكم و أدخلهم الجنة أجمعين
السؤال الذي يطرح نفسه، هل تم عقاب المستبب بالحادثة؟؟

كم أعجبتني قبل ايام التعليقات التي تقول اننا لم نكن نعرف ان الشعب الأردني من أصول إسبانية، وذلك تهكماً على مايحدث من مسخرة بعد المباريات و التعصب الأعمى لأي فريق

الموضوع ليس فقط موضوع كرة قدم وتعصب أعمى، بل هو أكبر من هذا بكثير، هو موضوع شعب تافه ومغيب، يجمعه طبل وتفرقه عصا، شعب لا إنتماء عنده ولا أخلاق، شعب لا يفهم غير الهمجية كمنهاج للحياة

أكرر تعازي الخالصة لقريبك و كان الله في عونه وفي عون عائلة الزوجة أيضاً

هل سيكونوا هم آخر ضحايا الهمجية أم أنهم فقط حلقة من مسلسل طويل من الخسائر التي لا داعي لها؟؟!!! حسبي الله ونعم الوكيل

 

بدنا نضل نطخ و نقتل جود و اللي زي جود
و نضل نشحّط و نقتل هالمسكينة و بنتها و اللي زيهم
بدنا نضل أنانيين و تافهين و اغبياء و ماعنا دم

 

صدقيني صار هالأيام يلي بعرف ليه مات أهون من يلي بيموت وهوه مش عارفه ليه إنقتل

إنا لله وإنا إليه راجعون
وهيك حال الدنيا

والله يجيرنا من القادم

 

لا حول ولا قوة إلا باللة وانا لله وانا الية راجعون
الله يعينهم ويصبرهم يارب

قصة السواقة والسرعة والأحتفال بأنتصارات مزعومة هي سخافة من جهة و ثقة زايدة من جهة تانية بمعنى انو الشخص اللي بسرع وبفحط وبشحط بكون مفكر حالوا رهيب بالسواقة وانوا ما حدا متلوا وانوا بقدر يتفادى اي موقف يجي فجأة قداموا !!
المهم انشالله يكون المنتصر انهدى بعد هاد الحادث وما يعمل هيك شي مرة تانية واصحابوا يتعلموا منو

 

شو بدنا نحكي؟
لا حول ولا قوة إلا بالله

 

لا حول ولا قوة الا بالله
الله يكون بعونه , اشي بقشعر البدن
:(

احنا اسبانيّين اكثر من الاسبان انفسهم , بحب الكرة بس ما بحب التعصّب بأي اشي , يعني همّه برشلونة والا شحار البين عارفين عنكم والا عن العرب كلهم اصلا؟

قلّة حيا

 

لازم أهل الدين يحكوا بالموضوع بصوت أعلى. أنا سمعت مرة إنه الشخص اللي بتسبب بحادث بسبب إهمال منه ممكن يوصل للقتل العمد. بدنا توعية وقوانين صارمة !!
الله يرحمهم ويصبر أهلهم!

 

لا حول ولا قوة إلا بالله وانا لله وانا اليه راجعون

لسة عنا طبعا اساليب غبية للتعبير عن الفرحة
ومش عارفة لمتى رح نضل هيك ولمتى بدها تضل تموت ناس لاتفه الاسباب

الله كبير

 

شكر الله سعيكم جميعا
ربنا يحميكم كلكم و يحمي احبابكم و اهلكم
و ربنا يصبرهم على ما ابتلاهم و يجزيهم الخير على صبرهم

حسب ما سمعت اليوم ان القانون بحكم على مثل هالاشخاص بالحبس لمدة 3 سنوات بس و انو اجا اكثر من ناس ليعملو عطوه مع قريبي اللي لساتو بالمستشفى و تبين انه معه كسر بالحوض و واحد منهم بحكيلو بكره بتقوم و بتتزوج و بتخلف و بتنسى كل اللي صار قريبي طردهم ولولا انه مش قادر يقوم كان ابصر شو عمل فيهم, حسبي الله ونعم الوكيل بهيك ناس


شكرا الكم جميعا و شكرا لكل مين بعتلي ايميل او مسج او حكا معي خلال الفتره الماضيه, كلكم اخوان و اخوات رائعين انا كتير محظوظه بمعرفتكم و ان شاء الله بس اروق شوي برجع بخبركم الجزء الحلو من اسباب غيبتي الفتره الماضيه

 

الله يرحم المتوفين ويشفي الشاب ويصبره على مصيبته وعظم الله الاجر لكم ولهم

ما في كلام ينقال سوى حسبي الله ونعم الوكيل
انا مع سوزان ...لو القانون بيتطبق بصوره حازمه وبدون عطوات وجاهات كان المستهترين بارواح الناس بيحسبوا الف حساب قبل ما يتحركوا اي خطوه.

 

امين يا رب العالمين ويرحم زوج خالتي اللي توفى بنفس الفتره ويصبر اهله

اللي فهمته ان القانون اساسا اعوج كان حبس_ 7 سنوات وصار 3
هو مش ناوي يتنازل عن حقهم ابدا

اسفه كتير نيسانه لاني وقت ما اتصلتي ما كنت مركزه لانو يا دوب رديت من هون بلشت طوشه بين شبين قدامي :( فأرتعبت وبطلت مركزه
شكرا يا ذوق

 

الله يرحم زوج خالتك يا ويسبر ويصبركم
آسفه ما بعرف كان لازكم حكيتك والله

المهم شو صار بالهوشه بالآخر؟ :)
نزل دم؟

 

امين يا رب
الحمد لله بس تيجي هالامور بتيجي جماعا

ربنا يصبرهم

ما بتقصري يا قمر....انا اللي غبت و ما خبرت

انا من العجئه بدي اهرب صرت امشي باتجاههم و لولا ماما مسكتني و سحبتني لبعيد باخر لحظه

ما عرفت شو صار ان شاء الله تكون انتهت على خير...انا من الصوت و متت رعبه :$

 

بسيطه يا بطه
هو الواحد بدون طوشه ما بيكون سامع الصوت منيح وهو بالشارع

...لسه ما نزلت انا ...بس شوقتيني وناويه الاسبوع هاد ان شاء الله

 

و الله ما أنا عارف أدعي بالهداية و اللا أدعي عليه مشان يذوق نفس المصير!
شباب أهوج


الله يصبره

للشب

و عظم الله أجركم

---

بعرف راح أنس موضوعي بعد فترة -للأسف- بس دعواتي/نا معه و مع كل شخص بمثل حالته الصعبة

 

Naysan

اه و خصوصا بوسط البلد

من زمااااااااااان نفسي انزل و سبحان الله بس نزلنا يا دوب ساعه اتصلت بنت عمي بوالدتها اللي كانت معنا و حكتلها انها تعبانه فروحنا بسرعه :(
خيرها بغيرها

بدي اكحوش براحتي بالبلد....الي من التوجيهي ما نزلت تخيلي من 95 يعني


Sheeshany

الله يهديهم شو بدنا نحكي و عقابه عند رب العالمين الله اعلم شو هو :$
ربنا لا يبلينا يا رب

امين يا رب...والله المسكين لساته نفس الشي بس ببكي و مش مصدق و لسا بالمستشفى

شكر الله سعيكم.... هاد اللي قهرني بزياده, انّي بقرأ هيك خبر و للاسف بحزن كتير و بنسى الموضوع بس الف وجهي و بنسى ان في بشر تأثرو بهالقصه