Things I Like To Whisper About

Would You Hear Me Whispering

Golden Age Home


الي فتره حاسه حالي مقصره وما بعمل شي منيح بحياتي, بسبب السفر قبل فتره بعدت عن العمل التطوعي بكل انواعه حتى دروس الدين وقفت لفتره فحسيت حياتي فيها فراغ لازم يتعبى بشي منيح و فعلا نويت من كل قلبي و سبحان الله كأنه بس الواحد يصدق النيه ربنا بيسرله, الحمد لله رجعت للدروس و الاهم اني قضيت يوم عيد ميلادي مع حبايب قلبي طلابي القدام و اللي ان شاء الله راح اصير ازورهم كل ثلاثاء لادرسهم عربي و رياضيات :) و قبل كم يوم اجتمعت قدرا انا و بنت و بتحكيلي عن رحله مرتبينها لدار المسنين واذا بحب اروح معهم, سبحان الله نفسي اروح و لكن كنت خايفة من اني اخوض هالتجربة لحالي و الحمد لله تيسرت, رحت انا وبنت خالتي مع 9 ستات و صبايا اول مره بعرفهم .

الاسم عجبني كتير بعطي ايحاء بالتفاؤل بالرغم من كئابة المكان, و الدار كتير نظيفه و المشرفه استقبلتنا بوجه بشوش و دخلنا سلمنا على المجموعه اللي قاعده بقاعه الزوار و حطينا عالطاوله الاشياء الزاكيه اللي جبناهم معنا و بعدين اخدتنا لنزور اللي ما بقدرو يغادرو الغرف, اللي فهمناه من المشرفه ان المعظم موجود لانه ما في حد يعتني فيهم و بدهم يجو عالدار و مجموعه صغيره اللي اهاليهم حطوهم فيها و بدينا نلف عالغرف و نسمع القصص الحقيقيه

خديجه....حجه بال 80 من عمرها استقبلتنا باجمل ضحكه و احلى الكلام, ما بتشوف منيح و اول شي بلفت النظر عيونها ماشاء الله واضح انها كانت جميله جدا في شبابها, سلمت علينا بكل حب و اهلّت فينا و شكرتنا عرفنا انها مصابه بالزهايمر و بتكون طبيعيه ولكن فجأه بتصير تتخيل اشياء و تتهم اللي معها بالغرفه بانه بدو يضربها و بتصير تصرخ, تزوجت وما عندها ولاد و لمّا توفى الزوج جابوها عالدار, رجعنا لغرفتها اكثر من مرّه لانها قررت تزغرت لكل وحده فينا و تسألنا عن مناسباتنا, بشوشه لابعد الحدود

الغرفة الثانيه لحجه قاعده بالتخت لان اجرها مكسورة, واقعه عن التخت و عندها سكري و مودينها عالمستشفى ليفكو الجبص و روحوها بدون ما يعملولها شي لان الدكتور مش موجود!!!! ما فهمت كيف مش موجود.... و بالطريق من كتر القهر ارتفع معها السكري و حاطينلها دريب بايدها و وجها اصفر, بعد ما طلعنا من الغرفه حكتلنا نزيله تانيه قصتها, انها ما تزوجت و قامت بامها و ابوها و توفو فسكنت عند اخوها اللي كان متزوج جديد, ربت ولاده و اعتنت فيهم تماما و لمّا تزوج اخر واحد مرة اخوها بطلت بدها اياها بالبيت و اخوها حطها بالدار.

عمو محمد الياس.... حج باوائل ال 80 كان مسيحي و اسلم و اهله تبرو منه وما لقى مكان يروح عليه غير هالدار, حافظ للقرآن وصوته بالاذان بجنن و غنالنا كم من موال.

وحده بنتها متزوجه و مسافره و اضطرت تحطها لان زوجها ما بدو حماته تعيش معه والها 6 سنوات ما شافتها و بتتصل فيها كل فتره, واحد ابنه طبيب معروف و حط ابوه لان مرة ابنه ما بدها اياه ولا بدها تعتني فيه جايبله تلفزيون و كمبيوتر و مرتبله الغرفه نايم بالتخت و ما برضى يطلع منها ولا يستخدم شي, و تتكرر القصص بين الغرف, و بين الضحكات و الابتسامات تنزل دموع من قلب محروق و بعدين يمسحوها بسرعه و يحكو بدناش نحزن, كلهم استخدمو نفس المصطلح , و عمو ما رضي ياكل اشي منّا و حكالنا بعد تنهيده " ربنا اللي جابني هون" بين ستات و رجال ما ببينو اللي بقلوبهم بغنو وبزقفو و بضحكو معنا و بين اللي ما بدهم منا اشي بتطلعو من بعيد و بس, كل شي بحرق القلب و اكتر شي الرجال اللي بتحس ان نفسهم مكسورة و بحاولو ما يتعاملو معنا في اشي بنظرتهم وحتى ولو حاولو يخفوها بحرق القلب.

قصص سمعنا عنها ولكن بس تسمعوها من صاحبها و يحكيها قدامكم غير, ما بين الصفنات و التنهيدات وجع الكلام بكون اقوى, الكل دائم على قول "الحمد لله" و الكل مبتسم برغم ان هالابتسامه مش طالعه من قلب الكل , كيف بقدر ابن/ بنت يعمل هيك بامه او ابوه؟؟ كيف بقدر اخ يعمل هيك باخته؟؟؟ كيف بتقدر تاكل لقمه وانت مش عارف اذا امك اكلت ويلا جوعانه؟؟ كيف بتقدر تعيش حياتك و انت متأكد ان قلب امك او ابوك ممكن يكون فيه غضب عليك.

انا من اللي عندي قناعه تامه عن المشاكل اللي بتصير عند السكن مع اهل الزوج بنفس البيت و لكن لو الدنيا لفّت و اضطريتي تعيشي معهم فبنظري اذا الزوج رضي او عرض انه يحطهم في دار مسنين اذا هاد الرجل ما اله امان, واحد ما اله خير باهله كيف بدو يكون اله خير ببنات العالم!!! لو كل واحد فيهم فكر انه "كما تدين تدان" و انك ممكن بيوم تنحط بنفس الموقف كان صحيو على حالهم و عرفو فظاعة تصرفاتهم, ما بنكر ان في منهم موجودين بارادتهم و اريحلهم هالدار من نظرة اشمئزاز او قرف او تأفف من اي شخص و ولكن والاغلب منهم موجودين بقلب و نفس مكسورة و بتمنو يعيشو اخر ايامهم بين اولادهم و احفادهم وقرايبهم.

ربنا يحسن ختامنا اجمعين و لا يحوجنا لحد بكبرتنا



26 التعليقات :

how sad
you know that 2nhom kano byom "27na"

am speechless

 

Allah y3eenhom ya Whisper jad ma ba3raf keef el alb be2sa 3l om aw el ab..
byoum men el ayam tafa my phone la fatret 4 sa3at felnhar.. o ma kan fe 7awalay sha7en o kont b3eed 3n betna o bs rj3t 3l maktab l2eet kol ahli bestanone felmaktab o emme wejeha lono asfar.. had o ana shab tool b3ard!!
tb o eza ana shab 3omro 30 saneh hek 3m be5afo 3alay.. keef law kont 15 saneh sho kan 3mlo?
jad e7na sho ma 3mlna ma benrod jamayel ahlna 3alena wala 0.0000000000001% menha..
ana law a3raf enno fe youm r7 atzawaj o marti ma bedha emme aw aboy y3esho m3ha sad2eene ella heye elle trawe7 3nd bet aboha..
"وقضى ربك ألا تعبدوا إلا إياه وبالوالدين إحسانا إما يبلغن عندك الكبر أحدهما أو كلاهما فلا تقل لهما أف ولا تنهرهما وقل لهما قولا كريما"
el ayeh elkaremeh betfaser 7alha.. 3ebadeh ma3tof 3aleha el e7san lel waleden!!!
jad ya 3aib 3ala kol wa7ad besee2 la ahlo...
jameel jeddan ya Whisper eno elek a3mal tatawo3eyeh ... allah yejzeeke el 5air ya rab
O.... Estamerri :P

 

شكرا يا ويسبر على هالموضوع الرائع. عرفتيني على عالم كنت اجهله تماما. ما اتخيلت انه في عنا دار مسنين بالأردن. زي ما بتعرفي البيوت هاي متواجده بكثره في الغرب بس ما كنت اتوقع انها تكون موجوده عنا. ولكن تساؤلاتك كلها منطقيه. انا لما اشوف ختيار او ختياره اميركان بضحك بوجوهم وبتمنى اني اقعد احكي معهم. احيانا لما اكون بقهوه في منهم لأنهم صارلهم زمان ما حكوا مع حدا بحاولوا يحكوا مع ناس واحيانا بكون انا واحد من هذول الناس. حتى لو كنت مشغول بحكي معهم. وهذول ناس غريبين عني كيف لما يكونوا اب ولا ام او اخت؟ـ
وانا باقرأ الموضوع دمعت كيف وانتوا بتسمعوا كلامهم. شيء مؤسف فعلا انه انسان ما يلاقي حد يحن عليه لما يكبر. في حديث عن الرسول صلى الله عليه وسلم "أنت ومالك لأبيك". ياريت الناس بس تتعظ.
انا أغبطك على حبك لفعل الخير. وأقول لك جزاك الله خير وأسأل الله ان يجرنا من خزي الدنيا وعذاب الآخرة.ـ

 

This is very touching

Do they need volunteers there? I guess this is private place?
Can you tell me the address for this place please?
I'd really appreciate it.
Thanks

 

نورنياتي

Exactly....law bs fakaro shway wladhom w 2arayebhom kan weslo lhal 7aqeqa :$
May God be with them and makes their lives easier there

Welcome here ya amar...nawarteny :)

Ahmad Merie

Ameen ya rab....hadol bekono bala 2alb 2asasan

Ta5ayyal keef 2alb el2ahel bekoon w wlad 2lobhom 7ajar 3ala 2ahalehom, ma b3raf ho 2elo da5al bel tarbyeh wella 5alas el2loob el2aseh mosta7eel t7es!!! allah 2a3lam

Sob7an allah 2elly raba6 been 3ebadtoh sob7anaho wa ta3ala w been el2e7san belwaledeeen

fe settat 3'arebeen...y3ne 2absat shee 7o66y wa7ad men 2ahlek makanhom, 2aw 7atta t7o6 7alha makanhom byoum, Allah yehdy eljamee3

kteeeeeeeer m2asreen 2e7na ya sadeqi, bs tshoof elnas sho bt3mel bt7es belt2seer :$
Allah yeserlna el5ear w yetqabbal menna
7ader :D

 

Jaraad

انا بعرفهم من التلفزيون الاردني زمااان, بكل عيد ام كانو يجيبو مناظر من دار المسنين و يحكو معهم و بعضهم بحكي قصته وبصير يبكي :(

سبحان الله بس يكبر الانسان بالعمر برجع زي الطفل الصغير ابتسامه او كلمة بسيطه بترضيه و بتسعده, تخيل بس هالابتسامه تكون من غريب مش من ابن او حتى قريب

كنّت اقاوم دموعي لحتى لا اجرحهم ولا ازيدها عليهم لانهم همه بحاولو يبينو متماسكين

اللهم امين
الله يتقبل منّا اجمعين,بصراحه ترددت بكتابه الموضوع مع اني جددت النيه بكل دقيقه انها صافيه لوجه الله تعالى و ربنا يتقبل, ولكن انا حبيت اكتب لحتى الناس تتفكر بالموضوع ان كان ناس عندهم قبول لفكرة انهم يحطو اهاليهم بدار مسنين, ولمعرفة قيمة هالزيارة في قلوب هالكبار

في واحد حكالنا ان الدار بتضلها عتمه لحتى تيجو بتنوروها :(

Doomish

انا تعرفت على البنت اللي حكتلي عن الموضوع جديد, ما بعرف تفاصيل شغلهم بس اللي فهمته انهم جمعيه نسيت شو اسمها, بكره ان شاء الله بتصل فيها و بسألها, هالجمعيه الهم اعمال تطوعيه كتير منها انهم زارو دار المسنين برمضان و بالعيد و هاي ثالث زياره و الكبار هناك بعرفوهم, و كل مره بيجي متطوعين جداد

دار المسنين موقعها بالجويده اسمها زي ما هو واضح بالصورة "دار الضيافة للمسنين", حسب ما فهمت في بعض المسنين موجودين على نفقة الحكومه وهمه اللي ملهمش اقارب و الباقي اللي بحط قريبه بالدار بدفع هو ثمن اقامته

اذا في تفاصيل تانيه يا ريت تتواصلي معي على الايميل وفيه ببعتلك اسم الجمعيه و رقمها بعد ما اسألهم واستأذنهم

my_loud_whispers@yahoo.com

 

الحمدلله انك كتبتي الموضوع لأنه فعلا مؤثر جدا. وكلمه زي هاي "في واحد حكالنا ان الدار بتضلها عتمه لحتى تيجو بتنوروها" ما اتوقع راح تنسوها. ولكم الأجر ان شاءالله

 

الحمد لله...كل الزياره ما حنقدر ننسى تفاصيلها

ربنا ايسرلنا الخير دائما و لا يحرمنا من اجره ان شاء الله

 

الله يعين كل واحد على همه
والله يعطيكي لحد ما يرضيكي يا رب اللي ادخلت الفرحه للكبار في السن والله يقدرك على عمل الخير
ذكرتيني بقصه يمكن مع الايام رح احكيها صار جد نفسي اتعرف عليكي اكثر :)

 

البيوت مغلقه و الهموم مفرقه زي ما بحكو....امين يا رب العالمين

تسلميلي يا قمر ...القلوب عند بعضها والله

بنستنى القصه تحكيها براحتك :)

 

I am at work and hardly holding my tears :(

Allah yekoon fee 3onhom ya rabb w ya7annen 2hlhom w el nass 3aleehom :(

Allah yerda 3alleki ya rab w yerdeeki w ya2drek dayaman 3ala fe3el el khair

 

رهيبة يا ويسبر
:)

محمد الياس - حبيته من غير ما أشوفه :)

و الله يعينهم جميعا ً على أرذلة العمر

بيوم كانوا شباب و ما خطر إلهم إنو حيصير هيك

حزنت شوي زي كل اللي قرؤوا و صرت أفكر بالبعيد و بالمستقبل

:(

-----
بدك تدرسي؟ لاااااااااااااااااع

و ختامها مسك مهو لازم - لازم مهو

 

الله يخليلنا أهالينا فوق راسنا
الله يجزيك الخير هيك فرحت ناس بأمس حاجة لبسمة من اللي حواليهم

الحمد لله عناالأمر محدود بس عند الأجانب بكون بالمستشفى محل ما بدرس مثلا كثير ناس زي هيك صفو لحالهم على كبر لهيك الدكاترة بخلوهم بالمستشفى حتى لا يرجعوا للبيت لحالهم

الله يعافينا و يجعلنا باريين بأهلنا

 

كئبتيني على الصبح ويسبر :(
الله يصبرهم ويعينهم
والله يبعد عنا هاي الاخرة و ما يحوجنا لأحد عند كبرنا

 

ويسبر ها أنا هنا
أتيتك وكلي شغف
للتعرف على قلبك وكلماتك
وأحلامك
ووجدت قلباً رقيقا
وحباً عميقاً
وعطفا وروحا
وابداع
تحيتي لك

على فكرة اعتقد ان هذه ليست زيارتي الاولى
أعتقد ان عيناي عانقت كلماتك مرة قبل هذه المرة ربما من فترة طويلة شهور

وها انا أعود وأجد جمع الاصدقاء هنا
تحياتي للجميع

مررت وسأعود

 

قشعر بدني ... الله يعينهم و يصبرهم و جزاكم الله كل خير

 

الله يجزيكم الخير ويبارك فيكم
والله يعين العالم على المصايب اللي فيه....منيح اللي لسه في شوية رحمه ما زالت في قلوب الناس.

موضوع التطوع ضعيف كتير في الاردن وبحاجه ان نكتب فيه ونشجع عليه ...بصفتك متطوعه نشيطه يا ريت تكتري لنا من بوستات زياراتك
وتفاصيلها,حيكون فيها تشجيع كتير
وتوضيح ودعم لكتير ناس
ويا ريت تذكري تفاصيل عن العنوان او رقم تلفون...او تسألي المشرفين اللي في الجمعيه اللي بتدرسي فيها عن احتياجاتهم او مشاكلهم وتكتبيها هون....ما بتعرفي ,التفاصيل الصغيره ممكن تعمل تغيير كبير.

الله يعطيكم العافيه ويبارك فيكم....كمان وكمان

 

عن جد يعور القلب لما نشوف اي احد مظلوم وخاصة اذا كان الموضوع فيه بر للوالدين
الله يهدي الناس كيف يتخلو عن اختهم او امهم او ابوهم بهالسهولة

 

الله لا يحكم حدا فينا
يجزيكي الخير يا ويسبر ويكتب لك حسنات بكل خطوه
احترامي الك بيزيد كل يوم يا بنت :)

 

LioneSS

I'm so sorry 7bebti :$

Ameen ya rab :(
Teslame ya amar rabna y2aderna 3ala fe3el kul she y2arebna menno w yet2abal menna ya rab

Sheeshany

ولو شفته بتحبه اكتر واكتر :)

المفروض كل واحد يفكر بحاله و يحط نفسه مكان هالناس ليفهم شو بالزبط اللي بحسو فيه

ربنا يجزيهم كل الخير على صبرهم

لااااااع شو مدرسه :$
انا بديت شغلي كمدرسه في كليه لاربع شهور و حرّمت بعدها
بس هلأ بدرس طفلين ويمكن يصيرو 3 ...زي اللي كنت ادرّسهم قبل ما اسافر اذا ما عرفت مين اذا انت مش مذاكر و راح تاخد ورقه جديده باكس كبير >:{

 

Alirbidi

امييين يا رب العالمين
وربنا يقدرنا على طاعتهم و برهم و رد ولو جزء بسيط من جمايلهم علينا

الحمد لله...ربنّا قدّرلي هالروحه بفضل منه

فعلا الترابط الاسري شبه معدوم عندهم و من ال 18 بس يطلع الابناء من البيت مع الوقت بقل التزامهم وبصير بس بالمناسبات هاد اذا فضيولهم

اللهم امين

Hana


معلش سامحيني يا قمر بس كان لازم اشرككم معي بمالمشاعر اللي صابتني :$

امين يا رب

 

زينة زيدان

اهلا وسهلا فيك في بيتي وبيتك المتواضع
شكرا لذوقك الذي بنقط من كلماتك اللطيفه...والتي تعجز كلماتي عن ايفاءها و ايفائك حقكما

دائما بتنوريني و بتسعديني بتواجدك يا زينة الصبايا :)
اهلا وسهلا فيك دائما

Sir

اهلا وسهلا ...زمان هالقمر ما بان لا بنشوفك بالمدونات ولا بالتويتر, لعل المانع خير ان شاء الله :)

امين يا رب العالمين
و يحسن ختامنا وختامهم يا رب

 

Naysan

امين...اجمعين ان شاء الله

والله اشي بقطع القلب, حتى بضحكتهم بتكوني بدك تبكي
الله يصبرهم ويجزيهم كل الخير

معك حق, انا ضليت فتره افكر في الموضوع ولكن تأخرت بالتطبيق العملي, تقريبا الي 4 سنين بخطو خطوات بسيطه و ربنا يقدرني لاعمل شي احسن


ان شاء الله بحكيلكم عن تجربتي بالتدريس و عن طريقة تفكير هالاطفال و كلامهم اللي اكبر من عمرهم

بالنسبة للعنوان و ارقام التلفون فانا الجهه الوحيده الرسميه اللي بتعامل معها هي صنّاع الحياة/ الاردن و في الهم موقع عالنت وفيه التفاصيل, انا مشتركه بمشروع اسمه كن اخي مع الايتام , اما باقي الزيارات و المحاضرات واللي منهم كانت زيارة هالدار فهي بتكون بدعوه من افراد و ما بقدر اعلن اي شي بخصهم هون
اليوم شفت البنت و نسيت اسألها عن اسم الجمعيه اللي بتشتغل فيها :$

انا معك بوجهة نظرك وهالشي اللي خلاني اكتب بالرغم من ترددي في البدايه

الله يعافي قلبك يا قمر :)

White Freedom

ضحكتهم اللي بخبو فيها دموعهم و حزنهم بتوجع القلب فعلا

الله يهدي العالم فعلا.... الاهل اللي مرات بتكون تربيتهم لاولادهم مش صحيحه ولا علموهم الاساسيات بالدين و الرحمه و الابناء اللي بعقّو اباءهم و بعملو معهم هيك شي

 

مياسي

اميييييين يا رب وعلى رأي ماما...الله لا يرمينا باخر عمرنا

امين يا رب... حبيبتيييييييييييي هاد بس لانك ذوق يا قمر :)

الله يقدرنا على فعل الخير وكلّه تيسير من رب العالمين :)

 

متذكر و الله
الله يعين الكلية -قصدي يعينك على أيام الكلية

بس لزوم الشر بالتعليق حكيت هيك

* 3 أطفال سيضيعوووووووون في متاهات الحياة
يا حرااااااااااااام

 

الله يجزيكي الخير يا ويسبر على الزيارة وايصال حال الناس لنا
ولكن بصراحة شيء يدمي القلب لابعد الحدود، فاذا انتهت الرحمة من قلوب البشر ماذا تتوقع منهم
مهما كانت ظروف اي شخص لا اجد اي عذر له بوضع اهله في دار للعجزة

الله يخليلك اهلك و يحفظك الهم ويجعلك دائمة البر بهم
والله لا يحوج انسان في هذه الدنيا لغير وجهه الكريم
واهم شيء الله لا ينزع الرحمة من قلوبنا مهما كان ومهما صار ويجعلنا باريين بأهلنا و أرحامنا