Things I Like To Whisper About

Would You Hear Me Whispering

شو رأيكم؟؟؟


هل بتقبلي بعريس رفضته قريبتك او صديقتك؟؟

هل بترفض عروس رفضها قريبك او صديقك؟؟

بالنسبه الي
هالشي حصل معي من زماااان, تقدملي شخص رفضته قريبتي , غير انه قريب و احنا عنا قاعده لا بنعطي ولا بناخد قرايب ولكن سبب رفضي الاساسي ان قريبتي رفضته

هلأ بس افكر فيها بحسبها غير

انه الاذواق و الاهتمامات و المعايير بتختلف من شخص لاخر, يعني المواصفات اللي بتهمني بشريك حياتي ممكن انها تختلف عن المواصفات اللي قريبتي /صديقتي بدها اياها, حتى لو من ناحية الشكل, اذواق العالم بتختلف برضه, اللي بعجبني بختلف عنهم , الامور اللي بعتبرها اساسيه انها تتواجد في شريك الحياة بتختلف عنهم.

ما بعرف اذا بنعاد الموقف هل ممكن يكون حكمي بمنطق و عقلانيه ويلا راح يكون قراري مبني على - وهو الارجح اعتقد - الّلامنطقيه !!!!!

انتو شو رأيكم...شو ممكن يكون ردكم لو انحطيتو بهيك موقف؟؟؟


23 التعليقات :

السؤال الثاني (هل بترفض عروس رفضها قريبك او صديقك؟) مش شايفه منطقي في مجتمعاتنا، لأنه عادةً الشب بيتقدم للبنت، و البنت إللي بتقبل أو بترفض، مش العكس.
لو غيرنا السؤال ليوافق المنطق السائد عندنا: "هل بتتقدم لبنت رفضت قريبك أو صديقك؟" راح يكون الموقف تماماً مختلف، فالجواب سهل: "مراعاة لشعور قريبي أو صديقي ما بأتقدملها أصلاً إلا إن كنت بأعرف إنه قريبي أو صديقي عنده مشكلة معينة (مثال: إن كان لاعب قمار) و الرفض كان ع هذا الأساس، فلا أظنني سأراعي شعوره."

طبعاً السؤال ممكن يكون أيضاً: "هل بترفض عروس كان خاطبها قريبك او صديقك وبعدين اختلفوا وانفصلوا؟"، طبعا الموقف يختلف تماماً، و عادة هاي الإنفصالات بتخلق مشاكل بين العائلات بحيث يكون التقدم بحد ذاته مشكلة عائلية أكثر منه رأي شخصي.

كإني رغيت كثير و ع الفاضي لأني ما جاوبت السؤال الأصلي.

ملاحظة أخيرة: لا تندمي و لا تعيدي حسابات، صدقيني لو فيه نصيب ما راح رفضك راح يقدم أو يأخر، و إن ما كان فيه نصيب ما راح موافقتك لا تقدم و لا تأخر

 

Well actually it depend if it is a tradtional or well-known. For tradtion marriage I think (as a guy) I should ask why the hell she got refused because in the tradtional way you don't know the one who ask asking.

The more I know, the less problems I get in the future.

 

صالح
مبدئيا ارغي زي ما بدك...انا بحب التعليقات الطويله المفصله لانها بتفتح باب للحوارات الجانبيه حول الموضوع و اللي بحبها اكثر من التعليقات الطويله :)

هلأ في ناس بحكولك ان فلان راح شاف بنت ابو فلان و ما عجبته
هاد قصدي بانه رفضها بانها ماعجبته لسبب ما ممكن يكون سطحي وممكن يكون جوهري
فهل بتبعد من قاصرها ويلا بتسأل و بتشوف شو السبب

الاسئله اللي انت اقترحتها كتير حلوه لانها لمواقف ممكن تصير

صار عندي فكره جديده لبوست جديد من اسألتك :) شكرا

بالنسبة لملاحظتك...انا والحمد لله مش ندمانه ابدا على اي قرار اتخذته بخصوص هالموضوع لاني على يقين باللي حكيته....كله نصيب و ربنا كاتبه وانا ما بقتنع باشي اسمه قطع نصيب و لا ب "تلحلحيلك شوي لتزبطي امورك" لانه كله نصيب من رب العالمين و هالشي كتيييييييييير مريح بالنسبه الي

اهلا فيك صالح باشا :)

 

Mohammed Badi


Welcome my friend....it's been a long time :)

Very nice,I like ur point of view because some guys will refuse to think about getting involve with such a girl without knowing any thing

على مبدأ ابعد عن الشر و غنيله :)

 

اتوقع حسب ظروف سبب الرفض. اذا كان على سبيل المثال انه قريبي ما عجبته البنت وانا عجبتني ما بشوف في مانع اني اتزوجها. بس بحب اتطرق لموضوع اكبر من هيك بمجتمعنا وهو عزوف الرجل عن الزواج بمطلقه حتى لو اعجبته شكلا وخلقا؟
كن النساء المطلقات في عهد الرسول صلى الله عليه وسلم يتزوجن بسهوله.ـ

 

بحكيها كشغله عامه في الحياة
الصراحة صرت أفكر مليون مره بالناس المرفوضين أو يلي صار عليهم حكي

من ناحية تانية أؤمن بالبدايات الجديدة بس برضو مع الحذر

إنو أوك هوه ليه إنرفض من ناس معينين
سواء صداقه أو شغل أو حب أو زواج زي ما تفضلتي

ماببدي تخوفي أو ما بحاول أبدي لهاد الشخص إنو مرفوض .. لأنو كل شخص بيستاهل فرصه تانية زي ما أنا بحب إنو أنعطى فرصه تانية

مره كنت بقرأ سي في لسكرتيرات وفي وحده كانت مشتغله تقريبا عشر شغلات خلال سنه وحده والسي في تاعها 3 صفحات والكل مدح إنو هاي أكيد عندها خبرات كتير لأنها إشتغلت كتير
أنا كان عندي موقف مختلف .. حسبتلهم المدد يلي إشتغلتها في كل وظيفة وطلعت ما كانت تصمد أكتر من 5 أشهر في الوظيفة
طيب وبعدين؟؟
ليه نقبلها وإحنا عارفين بعد أقل من 5 أشهر بدها تترك وبدها خدماتها وبدنا نرجع نعمل إعلان وآخره

يلي إنتي بتفكر فيه من جهه أنا بفكر فيه وغير من جهات تانيه

الرجل مثلا يلي مطلق أو مخلوع أكتر من مره وشكلو حزين وبيحكوا عنه ما بيئذي نمله .. رح أحزن عليه أكيد ويمكن أفكر فيه كوني أعطيه فرصه تانيه إنو حرام يمكن ظلموه ويمكن كانوا شريرات معو .. وإلخ إلخ
طيب وبعدين؟؟
هدول الناس يلي على المحك بنظلموا بس ممكن يظلموا معهم ناس تانيين لأنو مابينعرف عن قصصهم الحقيقية

وبجاوبك على السؤال إني يمكن أوافق بس بعد تمحيص وتفكير ويقنعني هوه في حاله مش زي يلي إجت إمو تخطبني وبتقولي هوه مرته طلبت الطلاق قال شو عشان عمره ماحكالها أي لوف يو وبعتبرها زي أخته

حاله زي الدراما العاطفية تاعت أي لوف يو كيف بنظرك ممكن أوافق عليها؟

 

صديقتي العزيزة ويسبر
مساء الخير

رفض قريبتك لمن تقدم لكِ لاحقا
سببا اضافيّاً لان توافقي عليّه

فالرفض عندنا اغلبه لا يكون لاسباب منطقيّة وجوهرية بقدر ما يكون لاسباب مظهرها الاختلاف بينهما وباطنها اختلافات موروثة من عقلية مجتمعنا ونظرته للامور والتي عادة ما تكون بعيدة كل البعد عن فهم منطق وجوهر الطرف الآخر
ولا تنسي ان نظرتنا للامور تختلف وان الجيد بنظري سيء بنظر غيري
حتى لو كان غيري هو اخي
من بطن امي وابي

 

السؤال حلو :)
بالنسبة إلي شخصيا أنا رفضت اكتر من مرة اني استقبل عرسان مو لأنوا قريبتي أو صديقتي رفضتوا بــس لأنهم دلوا علي من مبدأ انوا لو كان منيح ما كان رمى الطير .. يعني مثلا مرة ام صاحبتي كانت بقعدة وسألوها إذا بتعرف عرايس وقامت دلت علي فأنا رفضت اشوفوا لأنوا بنتها قدي تقريبا وما بتحب و كانت بتقدر تحكي عن بنتها خصوصا انها من هاد النوع فأعتبرت انوا لو منيح كان حكت عن بنتها!! بعرف يمكن يكون التفكير مو منطقي بــس انا هيك فكرت مشان هيك عادي انك ترفضي لأنوا حدا بتعرفي رفضوا لـــــــكـــــــن مقايس الناس بتختلف يعني في ناس برفضوا لأنو بدهم واحد غني ..او .. أو ..الخ وبالتالي يمكن الوحدة احسن تستقبلوا وتشوفوا وتسأل قريبتها أو صحبتها ليه رفضتوا ممكن تكون ما عندها شي ضدوا وبس ما ارتاحتلو لأنو مو نصيبها!! بس انا بتفهم انوا احنا البنات حتى لو بنفكر هيك واحنا وبرا الموضوع لما نسير بنصوا بنسير نفكر انا بشو اقل منها حتى اخد اللي هي رفضتوا؟ او ليه اخد بواقيها؟ او متل ما انا كنت احكي لو في خير ما رمى الطير الخ
بالنسبة للشباب بتصور انوا إذا البنت عنجد عجبتهم ما بتفرق معهم إذا حدا بعرفوا كان بدو اياها وهي رفضتوا بس ممكن يهتوا اذا قريبهم اللي رفضها لأنهم بعتبروا انو يمكن شاف عليها شي!!
بالأخير ما في داعي تعيدي حسابات لأنوا اللي راح راح وانتهى وبالأخير الله بكتب اللي في الخير بس انا كمان بتصور انوا غذا انت وقربتك مختلفين وهاد قريبك تقدم الكم التنتين اذن هو نفسوا ما كان بيعرف شو بدو بس يمكن كان بدوا يتجوز من مبدأ اللي بعرفها احسن من اللي ما بعرفها وعلى هاد الأساس الله خلصك من واحد ما بعرف شو بدو :)
حكيت كتير !! بس كنت حابة اوضح وجهة نظري بس باقي شي واحد بدي اعلق عليه الرد اللي رديتي على صالح انك ما بتصدقي قصة تلحلحي وبمشي حالك صراحة انا بصدقها لأني شفت اكتر من حالة قدام عيني بس القصة انو التلحلح مو شي سهل التعلم او التطبيق وبالتالي اللي اصلا مو ملحله صعب عليها وهو طبعا بالأخير كل شي نصيب بس يعني لما تسمعي عن بنت كل ما تحكي مع شب بعد اسبوعين بيجي يتقدملها بتسألي كيييييييييييييف؟؟؟؟؟ والباقي هو اللي بكون على النصيب
خلص بكفي شرح :P
bye

 

Jaraad

حلو كتير...يعني انت من اللي بسألو عن السبب قبل ما تقرر تستمر او لأ


الموضوع الثاني ان شاء الله راح يكون من ضمن المواضيع اللي حيتم التصويت للكتابه عنها الشهر الجاي :)

رأيي بالموضوع ومن تجربه عشتها و عايشتها ان المعظم- بديش احكي الكل بلاش حد ينظلم - بس بحكي شعارات و كلمات رنّانه بخصوص هالموضوع و عند الجد بتبدا الحجج, امي مش راضيه, ابوي مش موافق, بقدرش امي تغضب علي و من هالحجج اللي بتهرب منها من موضوع الارتباط

مثلا في شب من ضمن حوار عن الزواج بحكيلي " انتِ بترضي لاخوكي يتزوج وحده مطلقه؟؟؟"
حكيتله والله اذا اخوي بستنى ان انا ارضى عن وحده بدو يتزوجها و بناءا على رأيي بستمر او لأ فانا بنصحه ما يتزوج لانه مش خرج يفتح بيت و يتحمل مسؤوليه ....وجوابي طبعا ما عجب الشب

انا حابة اكتب عن الموضوع من زمان بس بستنى الفرصه المناسبة و شكلها قربت :)

 

نورنياتي


الموضوع بدو تفكير و تمحيص اكيد, اي شخص بدو يدخل حياتنا كزوج او صديق او زميل او جار كله بدو يكون اله اثر و كبير بحياتنا فلازم نكون متأكدين قبل الموافقه لدخولهم

انا بأمن بالفرصه التانيه ولكن بعد الاقتناع, بدك تاخدي بالاسباب و تتوكلي و لكن التواكل مش حلو, بدك تسألي و تستفسري عن كل الجوانب لتتطمني للي قدامك

بالنسبة للموظفه انا اللي بعرفو ان الشركات ما بحبو يوظفو اللي بتنقل كتير بشغله لانهم مش مريحين من ناحية الاستقرار بالوظيفه الجديده, وخصوصا بس يكون في تعليم و تدريب بأول فتره لانهم بدهم يعلمو واحد يستفيدو منه , فأنا معك انها تنرفض , الله اعلم شو كانت ظروفها ولكن الموضوع ما بده عواطف بالشغل

بالنسبة للمفصوم و امه فالله يسهل عليهم ما بقدر احكي اكتر من هيك و بنصحك اذا في من اشكاله كتير بنصحك تفشي قلبك بالمدونه و ليعرفو الناس ان البنات ما برفضو العراس و بتطلبو لأ لان العرسان مرات بكونو اشي بجنن :)

ملاحظه ع الهامش

بعد ما رجعت للصور في جوجل لانه ما حصلي الشرف من قبل ,لقيت انه معاكي حق :)
سبحان الله يخلق من الشبه اربعين

 

Yosef

مساء الفل و الياسمين

هالشي عرفته و فهمته بس كبرت و عقلت :) و لكن بتضل نقطه مفهوم الكرامه الغريب هو اللي بلغي تفكيرنا المنطقي مرات

هو تفكير خاطئ ما بنكر و لكن للاسف مش متأكده اني خلصت منه او لأ...عند التجربه اذا لا سمح الله صارت ببين هل رجح عندي التفكير المنطقي او التفكير اللا منطقي


بنظري ان موضوع اختلاف الاذواق هو نعمه من رب العالمين, نوع من انواع العدل سبحان الله

 

Hana

الله يحلّي ايامك
انا كتيييييييييير حبيت التعليقات لانها فيها وجهات نظر كتير مقنعه و جميله و تطرقت لمواضيع جديده و جدا مهمه

في منو حكيك ولكن مش ممكن مرات الام تخجل انها تدل على بنتها؟؟؟

مرّه بحوار مع اخوي و مرته اخوي حكا انه مستحيل انه يلاقي شب منيح من صحابه و بدور على عروس يحكيله انه اله اخت, انه كيف "يعرض" اخته هيك للعالم وانا معه بصراحه :)
صعبه

فممكن الام ما بتحب تعرض بنتها
و مرات بتكون " المواصفات" اللي طلبها عريس الغفله مش متواجده بالبنت, مثلا بدو اياها طويله بدو اياها سمره - ال يعني - او بيضا او هالامور الشكليه اللي بعتمدو عليها, هو اي نعم ما بدك هيك شخص بس قصدي انه ممكن يكون خير و لكن الطير ما عجبه :)

لكن انا معك بتفكير البنات , هو غلط و لكن زي ما حكيتي وقت ما يصير الموضوع جد الله اعلم كيف نفكر :$

انا ما بعيد حسابات ولا ندمانه, هو فكره و خطرتلي مش اكتر و اساسا احنا القرايب خط احمر عنا فالموضوع منتهي

صح في كتير هيك قصص صارت و لكن حسب اللي شفته قصص كتير ما استمرت, نصيبهم ما يستمرو و لكن اللحلحه ما الها دخل بالمكتوب

كان عنّا موظفه شكلها عادي جدا و لكن كل ما اجا شب يعطينا دورة او مهندس يزبطلنا الاجهزه يعجب فيها و احنا نستغرب انو كييييييييييييييف زي ما حكيتي و اشمعنى هي, لحد ما يوم اجا زوج صاحبتي عالشغل و تاني يوم بتحكيلي صاحبتي - مرته- انه حكالها هالبنت - الموظفه يعني - بديش اياكي تتعاملي معها ولا تحكي معها طلعت بتتلحلح و احنا مش منتبهين او مش فاهمين :$
هي بتلفت نظرهم مش عارفه كيف و بصيرو معجبين فيها والحمد لله ان زوج صاحبتي طلع بفهم وما انغر فيها

نورتيني :)

 

العقل و المنظق بيقول انه نسمع اسباب الرفض و نشوف انظلم فيها ولا لأ و بعدين بيجي متل ما قلتي الاختلافات الفردية و هل هو اللي رح يرتاح بالي معه و اريحله باله ولا لا ..

هاد كان كلام العقل .. زيحيه ع جنب و بيني و بينك و فش عليك مخبى .. مش حيخطر ببالك هالحكي وقتها و حتقولي لأ عشان ما تنقح عليك كرامتك مع انه الكرامة ما الها علاقة .. بس خلص هيك احنا :)

 

هديل

ايون.....العقل و المنطق , المشكله هاتي جيبيهم هدول وقت الجد :)

رحم الله امرئ عرف قدر نفسه وانا معترفه اني ما بضمن هالعقل و المنطق يضلهم شغالين وقت الجد :)

مساءك فل و ياسمين يا قمر

 

انا بعرف انوا صعب الحدا يدل على بنته او اختة بس بحكيليك هي من هاد النوع يعني بالعادة هي بتدل على بنتها دايما!!! فلما ما تدل على بنتها بسير فيها وما فيها

وما تفهميني غلط انا مو مع التلحلح.. ما بحب اتلحلح :P بس انا قصدي انوا ما تقولي انوا مو موجود هاد الشي لأنوا موجود!!!

 

اهاااا
لا اذا هيك فانا معك و تقريبا كرهتها لهالخالتو :$

هي موجوده ولو كل هال"نغاشه" اللي بنشوفها حوالينا وبدي انكر انها موجوده :)
بس المقصد انها لا بتقدم ولا بتأخر بموضوع الزواج و التأثير عالنصيب

 

كيفك يا قمر : اشتقنالك
موضوع حلو كالعادة
صارت معي بس المعايير غير
بس انا برايي انو كل انسان اله معاييره الخاصة
لهيك الحكم بختلف من شخص للتاني
و ما بهم مين اللي رفض الشخص على قد ما بهمنا مين هو الشخص
.
.
.

تحية

 

اهلا اهلا بالقمر
هلأ شفت انك رادّه على تعليقات عيد ميلادك و بدي اروح احكيلك وين هالغيبه و اشتقنالك كتير كتير

كتير طولتي علينا ما بنفع هيك, اتركي المدرسة مش عاجبني وضعها ماخدتك منا :)

الله يسعدها اللي بتفكر بمنطقيه, كلامك منطقي جدا , اكيد الحكم بختلف لانه المعايير بتختلف و المهم هو الشخص نفسه

ولكن احنا البقيه اللامنطقيين على رأي همسة مرات بتنئح علينا امور غريبه بوقت الجد :)

لا تطولي ....مش مسموووووووووووح ماشي

نورتي :)

 

In a "normal" situation I would not care about that at all,just because two people turned out to be incompatible to each other does not mean the guy and I will too so I'd give it a shot
BUT in this situation "our lovely society" I would never ever do such thing,and you probably know why :)

 

إذا كان الشب منيح وعجبني.. بقبل فيه وكمان ببعت لمن تركته هدية لأنها الحمدلله تركتلي إياه :)
رفض شخص لشخص آخر لا ينقص من قيمة الآخر!

 

فعلا الاهتمامات بتختلف و المفروض انه يعامل كأي عريس عادي و أشوف إذا كان مناسب أو لا ، و لكن هذا لا يمنع أن أعرف سبب رفضها له قد يكون بناء على معرفتها لمعلومة مهمة عنه ، شكرا على التدوينة :)

 

Rain

LOOOL

Soooooo we're all abnormal ladies living in a LOVELY society :)

Ana 2elly b3raf why 2asla6an :P

Rana


ههههههههههه عجبتني فكرة الهديه :)

اكيد لا ينقص من قيمته, لان مرات اسباب الرفض ما بتكون جوهريه و بتكون جدا سطحيه وما بتمس الشخص دينيا او اخلاقيا او تعيب شخصيته

 

ريهام المرشدي

في ناس بترفض بدون ما تسأل عن الاسباب وبدون ما يعطو الشب او البنت فرصه ليعرفوهم اكتر

و بالمقابل في ناس بوافقو برضه بدون ما يسألو عن الاسباب وهاد خطأ اكبر

شكرا الك عالزياره و اهلا وسهلا فيكي دائما و بتمنى ما تكون اخر زياره

كتير عجبتني فكرة مدونتكم او اكاديميتكم, ان شاء الله الي زيارات كثيرة الها