Things I Like To Whisper About

Would You Hear Me Whispering

اشي بقهر


بنسمع و بننصدم من اخبار بنقرأها او احداث بتناقلوها الناس , بنحط حالنا بمكان اللي بالهبر و بنصير نفكر شو ممكن يكون ردود افعالنا

قبل سنة تقريبا قرأت عن موضوع بنت ماشيه الصبح على شغلها و تعرضولها ناس راكبين بتكسي, بدو بانهم بسألوها عن فراطه و بعدين اصرو تركب معهم بالتكسي و بس رفضت صارو بدهم يجبروها, انصدمت و خفت و خفّ عقلي بكل ما تحمله الكلمه من معنى, شو ممكن تصرفت ؟؟؟ صرخت؟؟؟ ركضت؟؟؟ مش عارفه, اللي انقذ البنت بوقتها انها ركضت و بالصدفه مرّت سياره من نفس الشارع فخاف السائق و التنتين اللي كانو معه و هربو.


و سمعت من فتره عن بنتين ماشيين بشارع الجاردنز و هجم عليهم شب خليجي ولولا تواجد عامل مصري بالشارع كان ابصر شو صار, برضه انهز بدني و خفت و فكرت, شو ممكن اعمل؟؟؟ يعني بالقصتين كان الشارع فاضي و الدنيا بدري و ما في حد و بالصدفه و ربنا يسر يجي ناس و بفضل الله يتم انقاذهم من اللي ممكن يصير.

اليوم قرأت خبر صدمني و خلاني افكر كتيييييييييييييييير و 100 الف تساؤل براسي صار, الخبر عن بنت اسمها آثار العلاونه موجود بموقع اليوم برس الملخص ان البنت كانت ماشية بالشارع هي و صاحبتها في الصويفيه قريب شارع الوكالات - يعني مكان ملياااااااااااااان بشر - و فجأه سيارة شرطه مشيت جنبهم و ابصر شو رمو حكي عالبنات حسب ما انكتب في الخبر


مرت سيارة نجدة "جيب" وبدات تبطيء المسير ليبدأ احدهما النظرات والغمزات والضحكات معهن، فردت آثار بالقول:" مش عيب عليك؟؟ ".

ترجل الضابط من السيارة ليقول لها: ماذا تقولين؟ أجابته " أتحدث مع الرجل الذي بجانبك، ولم أتحدث معك..!، دعه ينزل لاقول له ، أن حاميها حراميها"
اتصل الملازم بدورية أخرى ، وطلب منهن ان يركبن السيارة ليأخذهن إلى المركز الامني، رفضت الفتاتان وبدأ الملازم بشد آثار من شعرها امام المارة وهجم ثلاثة آخرون عليها بالضرب على كل انحاء جسدها, وبطريقة استفزازية تم تكفيتها في السيارة بفردة حذاء واحدة وفي حالة يرثى لها.


البنات تعرضو للضرب المبرح و حسب تعليق المدونه رند عالفيس بوك واللي تصادف تواجدها بالموقع ان تقريبا 7 رجال امن ضربو البنات وركبوهم بالسياره بطريقه مرعبه و حتى فرده الحذاء رماها الشرطي على أثار بعد ما رماها هي بالكرسي الخلفي للسياره, وحسب تعليق حد بعرف اقارب البنت سمع منهم انها تهددت بانها اذا نشرت الخبر راح يتهمو بانهما قدحتا مقامات عليا و راح ينحبسو 3 سنوات لو تم اتهامهم بهالتهمه ولكن أثار رفضت الخوف و قررت تنشر الخبر.

يعني.."رجال" أمن "تحرشو" بالبنات و لمّا البنت اعترضت و حكت الواقع اللي صار "حاميها حراميها" تعرضت للضرب من 7 "رجال" وبعدين الحجه انها ما رضيت تركب السياره, هدول "الرجال" اللي متدربين على القبض على اعتى "المجرمين" لمّا بنت ما رضيت تركب سيارة الشرطه ضربوها لدرجه انها حاليا بالمستشفى ومش قادره تتحرك من الضرب اللي صاب كل منطقه بجسمها, مش انه لو بس مسك ايديها ولا بتقدر تتحرك من مكانها, و بعدين ما بين "الرجال" و الستات و كل اللي كانو بالمنطقه ولا واحد تحرك و بس نزلو فرضيات بان هالبنات الله اعلم شو عاملين لحتى ينضربو بهالطريقه الغير انسانيه, ولا واحد فكر يتدخل!!! و بدناش ننسى واقعه ان هدول "رجال" امن و الخوف منع بعض اللي كانو حاضرين من "رجال" برضه- مع الشك بكلمة بعضهم - من التدخل, الخوف خارسنا تماما يا جماعه, بنات ينضربو وينهانو على مرأى و مش بعيد يكون حد مصور هالحادثه من بعيد لبعيد .

هلأ تخيلو لو انتو مكان هالبنات او تخيل اخت او قريبه اي واحد فيكم هيك صار فيها, ليش بنحب نضل سلبيين و ماخدين مبدأ الحيطه و الحذر و مين خاف سلم؟؟؟ مش لولا انهم متأكدين ان ولا حد راح يتدخل عملو هالعمله و بين العالم؟؟؟ مش لانهم متأكدين و متعودين
عالخوف و السكوت عن الحق و تضييع حقوق الناس ما خافو وهابو انهم يعتدو بهالشكل على اي شخص؟؟؟

انا مقهوره كتير و مصدومه اكثر من اللي قامو بالاعتداء و على شركائهم اللي حضرو و سكتو على هالاعتداء

تحديث

مقاله في موقع عمون الاخباري تحت عنوان ممارسات غير مهنيه لافراد في الامن فيه ذكر للحادثه يعني للاسف الموضوع جد


تحديث
7-4-2011

في تعليق اجا على نفس الموضوع في مدونه اختنا رنا الشعباني باسم آثار وبغض النظر ان كانت هي او لأ ولكن الكلام كان مؤثر

39 التعليقات :

الله يكسر ايديهم و يوريهم الويل فهالدنيا

 

ليش أنا مش مستغربه؟ اتزكرت قصه صارت مره قدام صاحبتي عند كشك الجامعه في اربد
برضو مسكو وحده وضربوها ولما صاحبتي صورت حذفوا الفيديو
بعدين الشرطيه حكتلها هادول الناس ما بتعرفي كيف بيتصرفو-قصدها عن الممسوكين-
فبناء عليه طبيعي ما حد يتدخل!!

 

سأرد بحكمه ان لم تستحي فافعل ما شئت !

 

مين اصلا بيدخل جهاز الشرطه عنا الا كا هامل وساقط من حثالة البشر

الله يكسر ايديهم واحد واحد

 

الزمن تغير صرنا نخاف حتى من شعبنا المسلم الوديع , يعني شي يخوف

 

هو حكي البنات صح حاميها حراميها أصلا أكتر ناس بعاكسوا الشرطة
مش موضوعنا
.. الموضوع اللي بجلط انو ما في رجال بالبلد ولا شو؟!! يعني كيف مفكرين حالهم رجال ويمدوا ايدهم على وحدة؟! والرجال اللي بالشارع ما عندهم نخوة؟!
وهاد هو الأمن اللي بيتغنوا في الناس لما وقفوا ضد المعتصمين اللي بطالبوا بالتغير والأصلاح!! ونعم الأمن بصراحة !!

 

Ahmad Hamdan


مش عارفه شو اللي بخلي مثل هيك عالم يستقوو عالبشر !!!

وصف اللي صار افظع من اي جريمه ممكن تكون البنت عاملتها....هاد في حال ان القصه بدها تختلف بس ينتشر الموضوع

مياسي

مهو مأسااااااااااه انو ما نستغرب, وهد اللي خلاهم ما يفكرو بالناس اللي واقفه و بهضم حقوق العالم

ونص العالم لحالهم فكرو باسؤ التهم و بناءا على تفكيرهم حكمو عالبنتين

 

القصص الأولى أحداث مؤلمة تتكرر كثيراً و بأشكال مختلفة، و أتمنى أن تجد لها الحكومة حلاً.

أما قصة رجال الأمن إن كانت صحيحة فهي مأساة بكل ما تحمل الكلمة من معنى، و سوف تكون المأساة أكبر لو كانت القصة صحيحة و أفلت الجناة من العقاب.

أنا لا أريد أن أصدق ذلك حتى يثبت العكس، لأنني أُكِنّ الكثير من الإحترام لرجال الأمن - و إن كانت لي بعض المواقف المؤلمة بعض الشيء مع بعضهم

 

Sozan

عليكي نور....خير الكلام ما قل و دل

ملاحظه ع الهامش

حكيتيلي بدك تكتبي عن الموضوع و لمّا سألتيني اذا راح اكتب رديت باني عندي مشكله في ترتيب الكلام و فجأه الكلام صار يتزاخم براسي فكتبته

بنستنى نقرأ عن الموضوع بكلماتك :)

Anonymous

الموضوع مزعج جدا و لكن ما بدنا نوقع بالظلم مثل ما همه وقعو فيه

التعميم باي شي في الدنيا فيه ظلم , اللي عملو هالعمله بمثلو شخصهم بطريقه تفكيرهم و مخهم اللي واضح انه مغلبهم, حرام نظلم فئه كامله بغلطه مجموعه

في كثير من رجال الشرطه اللي براعو ربنا بشغلهم و بقومو بواجبهم عأكمل وجه و مثال للشرف و الامانه في تأديه الواجب

ان شاء الله الموضوع يكبر و ياخدو عقابهم ليكونو عبرة لمن لا يعتبر

 

la3nat allah 3alehom jad enhom aw3'ad o sharaf ma 3ndhom..
o jad enno elwd3 had ma lazem yensakat 3aleh neha2eyan,,, o atmanna enno asm3 5abar enno halshorta en7abaso 3l aqal 10 sneen !! wallah e3dam qaleel fe 7aqhom!! klaab!!

 

Whit Freedom

بتصدقي اني بطلت اطلع امشي من ورا هالقصص اللي بسمعها و اللي بالغالب بتكون واقعيه و حصلت

الله يحمي الجميع من اي مكروه

Hana

ما بنكر ان في مجموعه من الشرطه و للاسف بتعمل هالشي, هلأ الوضع مرفوض من الجميع و لكن بتحسيها كبيره بس شرطي يعلق عليكي او يتطلع بطريقه مش ولا بد, ولكن برضه ما راح نعمم

انا اكثر شي قهرني بعد الحادثه نفسها هو ان ما حد تدخل, من شو خايفين؟؟؟ يا اخي خدها عالمخفر بس مش هيك

 

انا ما بدي اعمم لأنوا إذا كل الشرطة هيك اذن احنا بخطر !!
بس اللي بجلط اكتر من الشرطة الناس اللي بالشارع وما تصرفوا :(((((

 

Saleh

القصص الاولى و تكرارها بدون اي خبر يطمن انه في حد للمشكله مرعب كتير

انا ما كنت ناويه اكتب عن الموضوع لاستنى اخبار جديده و لكن تأكيد رند انها كانت موجوده و شافت بعيونها هو اللي شجعني اكتب

هلأ بغض النظر عن السبب الرئيسي للي صار, ما اعتقد انه بحق للشرطي يضرب اي متهم ومهما كانت جريمته, موضوع ضرب الامن للي بقبضو عليهم كترت و في حالات وفاة صارت قبل هيك و برضه ما في اي تحرك و هاد اللي بقهر ان في بعض نفوس مريضه صارت تستغل هالصمت اكثر و اكثر

ان شاء الله نسمع باي خبر ان في محاسبة حقيقيه صارت ومش اجراءات شكليه لتسكّت الناس

Ahmad Merie

Ana 3endy msebeh fe mawdo3 dar6 el settat, b7es bs 2ashbah el rejal 2elly be3tado 3ala set w besta2wo 3aleha....w msebeh 2akbar bemawdo3 elzolom

inshallah yet3aqaboo 3eqab kbeer w jaddy

 

Hana

معك حق...الحمد لله ان لسا في ناس بتراعي ربنا بشغلها و تصرفاتها

مش لاقيه تبرير لتصرف اللي كانو بالشارع غير انهم كانو خايفين
من ايش؟؟؟؟
من الشرطه؟؟؟
من قول كلمة حق؟؟؟
من منع ظلم؟؟؟
كله مصيبه اكبر من اللي قبلها

 

طيب...هلا مين بدو يحمينا من الشرطة يعني؟؟؟

هاد غير تلفيق التهم اللي متعودين عليه واسألوني انا

 

ولو! لسه ما إلحقنا ننسى!
موضوع ضرب الشرطة للناس أمر عادي جداً، يحدث في كل مكان بما فيها البلاد المتقدمة، طبعاً الفرق أن في البلاد المتقدمة يكون هناك سين و جيم و تحقيق، و مقاضاة للشرطي المذنب و تعويض للمُعتدى عليه حتى لو كان مجرماً و لكنه ضُرب بغير وجه حق.

أنا الموضوع إللي بيقلقني و ما بدي أصدقه إنه رجال الأمن يصيروا "غير مؤتمنين" على أعراض الناس، الضرب (على الرغم من وحشيته) إلا إنه تأثيره في العادة محدود، لكن الإعتداء على بناتنا و أخواتنا من الخطوط الحمراء.

بالنسبة لمشكلة التعرض للبنات في الشوارع، المفروض الناس تزيد الضغط ع الحكومة و مجلس الأمة لحل هذه المشكلة، يمكن مساكين ما بيعرفوا شو بيصير في الشوارع

 

ابو سلمى

مش عارفه بصراحه .... الموضوع جدا مخيف
بشبه قانون الطوارئ اللي الكل بحارب ليلغيه

ليكون عنّا هالقانون وانا مش عارفه :$

اهلا وسهلا فيك بالمدونه

Saleh

مهو لانّا ما نسينا و لأنه كان واضح و معلن ومصور صوت و صوره كمان و ما صار اي اجراء همه كمان ما نسيو و اخدو راحتهم بزياده

موضوع التعليقات بالكلمات و النظرات فهاد في منو كتير للاسف, خصوصي اللي بكونو بمشو بالشارع او واقفين يحرسو بيت او موقع رسمي

حاميها حراميها انا شخصيا صرت حاكيتها اكثر من 50 مره غير عن المرات اللي طنشت وسويت حالي لا سامعه ولا شايفه, وقبل هالمره كتبت عن شرطي السير اللي علّق و تفرج بطريقه مخزيه على بنات بمريول مدرسه ماشيين جنبه....اشي بخزي

هاااااد هو....مساكين مش فاضيين الله يعينهم بين سفرات و اجتماعات وزيارات عمل مش ملحقين الجماعه نص وقتهم برّه البلد الله يكون بعون معاليهم و عطوفتهم وسيادتهم, بدك اياهم كمان يعرفو شو بصير بالشارع؟؟؟؟ شو بدهم بوجع الراس

 

مقال في موقع عمون الاخباري فيه ذكر لمخالفات كثيره لقوات الامن و من ضمنها حادث الاعتداء على البنتين

http://www.ammonnews.net/article.aspx?articleNO=84362

 

لا حول و لا قوة إلا بالله
للأسف البلد بطل فيها أمان، عن نفسي انا كتير بخاف اطلع و اتحرك لحالي في البلد لانه فعلا صار حاميها حراميها و للأسف بطل في نخوه و شهامة في الناس لحتى يساعدوا اي حدا بستنجد فيهم

الكل بدوا يمشي الحيط الحيط و يحكي يارب السلامة

الله ينصر المظلومين في كل مكان

 

وبتضلو تستغربو ليش بحمل " صاعق " معي وين ما أروح؟؟

مره وحده إتعرضت للزناخه هاي,,وكان برضو الشارع فاضي

حاول شب يختطف شنطتي,, وكنت مقربطه فيها,, وما وصل ل عندي إلا هوه بستنجد " أكل قتله" مرتبه يومها
وهرب!!!

مابعرف,, ل هلأ ما إستخدمته للدفاع عن حالي " الصاعق" بس بتصور إنه إزا إستخدمته ينزلو إسمي بالجريده تاني يوم

 

قرات الخبر في المدونات لكن لم اعلق لاني مش متاكده من القصه وصحتها
لكن بما ان رند شاهده....لا اجد ما اقوله سوى
الله يديم علينا نعمة الامن والامان اللي ما في متلهم ....هذا هو الامن اللي طول نهارهم بيطنطنوا فيه؟!!!!حسبي الله ونعم الوكيل
مستغربه كيف بنت بتنضرب هيك في الشارع وما في حدا من المارين بيحاول ان يتدخل او يوقف يسأل!!!!معقول الخوف لهالدرجه؟!!!حتى لو شو ما قالت او عملت ما بيصير انها تنضرب او تتبهدل بهالشكل....الله اكبر

 

شو علاقة قدح مقامات عليا بالضرب ، يعني ليش الضرب؟؟؟؟؟؟؟؟ شغلة مش مفهومة

يعني إذا مسكت حرامي ليش تضربه؟؟؟؟

اثنين تهمة القدح هاي شكلها صارت جاهزة فلازم يتم تطبيقها بطريقة مختلفة (يعني تسجيل على الاقل )مش كل واحد بورط الثاني و بهرب

و اخيراً ستي انتي مش عارفه انه ماحدا بحاسب الامن

 

يا الله !!!! طيب في اخبار انهم رح يتعاقبو ولا اتهموا البنات وطلعوهم كذابات ??

 

I can't believe that this is happening in Jordan!!

 

بعد ما خلصنا امتحانات التوجيهي ب١٩٩٦. رحنا حدائق الملك عبد الله و صار ٢ من أفراد الامن يعاكسوا لما قلنالهم حاميها حراميها رد علينا واحد فيهم و انتي الصادgة حاميها أولى فيها هالحكي من قبل ١٥ سنة

 

LioneSS

فعلا لا حول ولا قوه الا بالله

انا بحب المشي كتير وكنت اطلع لحالي كل يوم امشي ساعه قب المغرب لكن من كتر ما اسمعت من هالقصص بطلت, خفت بصراحه

اميييين يا رب...وان شاء الله هالعالم تتخلص من هالسلبيه اللي عندهم

UmmOmar

اه والله....بدها هيك عدّه هالايام
اه بتذكر حكيتيلي عن هالقصه و انصدمت ...مش موقف
الله لا يرده

للاسف صار لازم كل بنت تحمل هيك شي بالشنطه, بطل في امان للاسف

 

Naysan

انا نفس الشي , مثل ما حكيت قبل انا ما كنت ناويه اكتب لاسمع اكثر عن الموضوع و لكن تعليق رند عالفيس بوك وخصوصا انها شافت مش سمعت هو اللي اكدّ صحة القصه

شفتي بالله عليكي....اشي بصدم
هاد اللي قاهرني..معقول ما حد تدخل؟؟

بتزكر مرّه كنا بالسياره وبابا شاف واحد بضرب وحده بالساحه الهاشميه والعالم كلهم ماشيين وما حد تدخل بابا صف و نزل و مسك الزلمه و ال بحكي هاي مرتي و انا حر فيها و بابا حكاله مرتك بالبيت مش هون بعد ما اكدت الست انه زوجها و خلّاها بابا تروح قبليه كان معها بيبي المسكينه , حكيت هالقصه انا من قبل بس هالموقف ذكرني فيها

الله اكبر عالجميع و ان شاء الله حقها ما بروح

Anonymous

هاد اللي بحكيه ...بغض النظر عن "الجريمه" اللي بتهموهم فيها ما في حجه للضرب و بهالطريقه

للاسف كتير قصص سمعنا فيها ان بس حد بدو ينتقم من حد بتهمه بهيك تهمه و التاني بتبهدل بهدله عمره ليثبت انه ما حكا شي, و اخر قصه لاخو صاحبتي اللي اخدوه و اختفى اسبوع وبعد 100 الف واسطه طلع و المسكين متعقد نفسيا هلأ :$

لااااااااااازم يتحاسبو, قلّة محاسبتهم هي اللي مقويه عيونهم عالعالم
ان شاء الله بكبر الموضوع و بتعاقبو عقاب كبير ليتعلمو ويعلمو غيرهم

 

SimSim

اليوم فتشت وما لقيت خبر بالجرايد الرسميه و لسا ما دورت بالمواقع الالكترونيه

اشي بجلط

Dr.N

It's shocking and unfortunately true

Anonymous

يا لطيف .... مش وقاحه بصراحه :$

حاميها اولى فيها!!....يا عيب الشوم على هيك تفكير وهيك شخصيه

 

شكرا ويسبر على مشاركة الموضوع:)

 

Rana

شكرا الك انتي اللي خليتي الموضوع يتركز براسي اكثر

شفت عندك تعليقات باسم آثار....هي فعلا المعلقه ويلا حد غيرها ؟؟؟؟

حقها عند رب العالمين اللي ما بتضيع عنده الحقوق باذنه

 

تحديث

في تعليق اجا على نفس الموضوع في مدونه اختنا رنا الشعباني باسم آثار وبغض النظر ان كانت هي او لأ ولكن الكلام كان مؤثر

http://dema84rana.blogspot.com/2011/04/blog-post_07.html?showComment=1302179633764#c2088583406123567574

 

So sad! This is why reform is needed in Jordan!

 

We need an urgent reforming to all our lives aspects these days :$

 

:S
الله يستر على الجميع
وهون الله لا يفرجيكي !!
ياستي هون أحيانا مش بس الأمن اللي بتحركش .. في هول اللي بيسموهم ومسلطينهم علينا- هيئة الأمر بالمعروف والنهي عن المنكر- !!
هول اللي بيسمو حالهم مطاوعة!
الله لا يفرجيكي
::
أنا متلك بس اسمع هيك قصص بيهبط قلبي
وأختي دائما حاطه سكينة بالشنطة تبعا :S:S
زمن بيخوّف والله

 

عادي
مش إشي جديد
وياما ناس أكلوها
وفي الآخر هيه بتنحكم لاعتداء على رجال الأمن ومقاومتهم وبلبسوها مليون تهمة
والأشي يلي بضحك إنو لا سقف للتعسف باستخدام الحق
يعني بوقف قدام القاضي وبيحكي أنا ضربت هاي البنت لأنها خالفت أوامري كرجل أمن وعشان هيك حاولت اتفاهم معها وأضطريت أستخدم القوة بالمقابل
بس هاي "القوة" ما إلها حدود عند القضاة يلي ذمتهم واسعة وفي مليون طريقة وطريقة يفلتوا منها المحترمين والشي الأغرب إنو حتى القبض على الفتاة لا يجوز أن يتم إلا من خلال أنثى من جهاز الأمن يعني مابصير شرطي يكلبش بنت أو يلمسها أو يدفعها أو يضربها أو حتى لما يقبض عليها حتى لو متلبسه بطالب بمسادة نسائية للقبض عليها
يعني بأبسط أبسط المسائل هاد الزلمة غلطان

بس شو رح تعمل وقعت وما سمت عليها
هاد إزا ما إغتصبوها في المراكز التانيه زي ما بنسمع هالقصص المقرفة
:k:

 

Bullet

امييييييييييييين يا رب

بتحركشووووووووو!!! انا بعرف انهم بزودوها بالتدخل و تستري و من هالحكي بس انهم بتحركشو فهاي جديده

بدهم طخ بصراحه :$

سكينه !!! :(
مأسااااه اذا وصلنا لهاي الدرجه....
الله يحمي الجميع ان شاء الله

نورنياتي

اه انت اكيد بحكم شغلك بتسمعي قصص
بس هاي اول مره بعرف انه ما بصير شرطي يكلبش بنت و اعتقد ان كتير ما بعرفو هالقانون

غير انه اكيد راح يطلعو حالهم ب 100 مخرج...بدها تهرب... هجمت عليهم ...معها سلاح
اللي بعمل عملتهم ما بغلب بالكذب و الافترى

:(
ياااا الله شو بكره هالقصص
الله لا يبلينا يا رب :(

 

كيفكم.. مابعرف ازا رح تقرأووو.. بس انا آثار العلاونه وانا لسى ما نسيت الموضوع ولا رح أنساه.. وحقي ضاااع والحمدلله.. ولا حدا عمل شي... إلي ضربوني 4 من النجدة.. وانا علقت قبل هيك للتأكيد.. وما حدا اتدخل ولا حتى وصلت محكمه.. سكروها بالتهديد.. أنا ماخفت بس عشان ماما خافت علي.. أحيانا بس افكر بالموضوع بندم إني ما اتبليت عليهم متل ماعملو.. بس لأني وضعت ايدي على كتاب الله ولأني مستحيل اكزب لو على قطع راسي.. وهنه بكل سهوله ماعندهم اي مشكله بالحلفان..

 

لا حول ولا قوة الا بالله
انا بعتذر لاني للاسف مم الناس اللي نسيو الموضوع و هلأ بس رجعت ق أت الموضوع والتعليقات رجعت لنفس شعور القهر بوقتها

الحمد لله ان ربنا كبير وعادل و ما بتضيع عنده الحقوق
ربنا راح ياخدلك حقك لانك انظلمتي و الاهل طبيعي يخافو على ابنائهم و على البنت بزياده لانهم عارفين مجتمعنا كيف بفكر ...للاسف طبعا

 

انا رح اترك البلد كلها لاني كرهت الحياة فيها لحتى ما اكرهها.. كل ما أسافر بحن وبرجع.. بس هالمره بلا رجعه انشالله