Things I Like To Whisper About

Would You Hear Me Whispering

ماذا يعني "اصلاح"




في بلدنا بلد الحريات و الديمقراطيه اللي بنباهي فيها كل الشعوب اللي حوالينا و اللي جديد اكتشفت ان الدراسات اثبتت العكس ولكنني مصرّه انا بلد الامن و الامان و بلد الحريات , بلد "الخلاف لا يفسد للود قضيه" ....مع ان المناظر و المناظرات اللي بنسمعها هالايام بتدل على العكس ولكن بدي اضلي متفائله و اقول انهم "قلّة قليله" اللي بنادو بهالشي

انا امبارح الاربعاء 24-3 صادف تواجدي في منطقه قريبه من دوار الداخليه من الساعه 11 الصبح للساعه 2 بعد الظهر و شفت و مريت من جنب المعتصمين على دوار الداخليه واللي كانو معتصمين بكل احترام و بدون تسكير شوارع, البطئ بحركة السير ان السائقين همه اللي ببطئو لحتى يتفرجو و يصورو الشباب ا"الاردني" الحر , و في اكتر من لقاء بينو هالشباب انهم "لا ينتمون الى اي فئه حزبيه" و ان المحرك الوحيد الهم هو "حب الوطن و القائد" شباب بينو اول شي دعمهم و ثقتهم اللامحدوده بمليك الوطن و محاوله لفت نظره الى شكاوي الشارع الاردني.

شباب اختصرو مطالبهم بجملة "الشعب يريد اصلاح النظام" اي مواطن بحب بلده بحب انه يقضى على الفساد والفاسدين, بحب و بطالب بمعاقبة الفاسدين لحتى يصيرو عبره لمن لا يعتبر, عبره لكل شخص تسول له نفسه بسرقه الوطن و المواطنين, المطالبه بمعيشه طيبه كريمه يعيشها هالمواطن,ما في اله حقوق مسروقه يشتغل بالمطالبه فيها وهالشي يخليه يتفرغ للقيام بواجبه لتنميه وطنه, وهاد كله بمفهومي كمواطنه اردنيه بتحب وطنها الاردن و قائده يطبق معنى الاصلاح.

من جهة تانيه قطع الكهرباء عن المتظاهرين و الاعتداء عليهم ان كان بالنظر او بالكلام او للاسف بالاعتداء الجسدي عليهم و تحت نظر الامن وتحت مسمى "لبو نداء الوطن" فهاد هو الفساد, اقناع هالناس و اقتناعهم بانهم بلبو نداء الوطن بانهم يعتدو على مجموعه بتطالب بحقوقها بكل احترام و بدون اي شوشره و تحت نداء "سلميه" فهو هاد الظلم اللي الشباب موجوده على دوار الداخليه بتطالب بتغييره.


مين فينا ما زهق من السناريوهات القديمه الحديثه عن فساد "البعض" في مجلس النواب ,عن الاختيار الخاطئ المبنى على طرق غير منطقيه من انتخاب هالفئه , اخطاءهم البين واضحه و ظاهره للعيان ان كان بالتصريح او السرقه العلنيه او اللي بصير من تحت الطاولات!!! مين ما زهق من انّه يشوف ولاد بلده و اولاده جوعانين !!!! مين فينا ما زهق من الطبقيه الواضحه اللي صرنا نعيش فيها!!!! مين فينا ما زهق من عدم تكافئ الفرص بينه وبين اهل بلده!!! مين فينا ما زهق انه ما فيه حتى يحكي كلمة عتب او لوم لشخصيه مهمه من هالبلد بتفكر حالها افضل واحسن من باقي الناس لمجرد انه في رقم من 6 خانات واكبر في البنوك بدعم كلمته او لمجرد انه بشتغل مع ناس بتودينا على بيوت خالاتنا او وراء الشمس حسب التعابير المستخدمه لتدّعم و تعزز الخوف في نفوسنا وتخلي الكلام ينحشر بحناجرنا!!!!

مواطنتنا و حبنا اللا متناهي للوطن و مليكه بتحتم علينا بنطل نخاف و نحكي لحتى صوتنا يوصل, نطلب بمطالب لحتى يصير اردنا الغالي الوطن اللي بنحب نعيش فيه و بنعشقة.


28 التعليقات :

ويسبر هانم، معك حق مية بالمية ما عدا شغلة الست خانات، هالأيام لازم تحكي عن سبع خانات و ما فوق

 

معك حق :$

الغناء الفاحش اللي بصير حوالينا و الفقر المدقع اللي بقابله محزن جدا

 

مرحبا ويسبر
انا مش فاهمه شو عم بيصير هناك شو المشكله لما مجمموعه من الناس بدها تعبر عن رأيها شو المشكله مادامهم ما بخربوا وما بكسروا شو المشكله ومش ماسكين عصي كل سلاحهم صوتهم وين المشكله
اللي لازمنا انه هذول اللي جايين بالعصي لازم ينقبض عليهم ويتم محاكمتهم بالقذف والشتم والاعتداء لانهم وبكل اختصار بيعانوا من شي اسمه قلة حضاره

 

ترى كل البلاد اللي حوالينا بلاد امان

 

زهقوا سماي و همه يحملونا جميلة بنعمة الامن و الامان و و كأنهم مفضلين علينا فيهم و كأنها مش حق بديهي لأي شعب
و كأنه اذا طالبنا بالاصلاح بدنا نهدد الامان
و كل الببغاءات العميا هاي نازلة تعيد نفس الكلام انه هاي الثورة حتجيب الفوضى و تخرب الدنيا
مين قال انها ثورة؟
حتى الاصلاح ممنوع نطالب فيه؟ولا الامن و الامان كفاية و زيادة علينا؟؟

 

m3k 7a2 bkol shiiiiiiii.. bsra7 al a3ta2 aly 3m bser mo5zi ll2sf :S

 

شباب اعتصام الداخلية كانوا صورة عن الحضارة و الثقافة و الوعي بالبلد
والبلطجية و الامن الكذاب و الدرك ( اللي مش ملاقيه كلمة اوصفهم فيها ) هم اللي كانوا صورة للهمجية

الله يرحم الشهيد اللي خسرناه ( كلنا خسرنا ان كنا مع الاعتصام او ضده )
الله يرحمه ويصبر اهله

 

هلأ عرفت انو عيد ميلادك من مدونة الصديق يوسف :)
حبيت اعيدك هون مو بس هناك
Happy birthdayyyyyyyyyyyyy :) o 3o2bal 100 saneh
وكل سنة وانت سالمة وبألف خير ويجعل هاي السنة حلة عليكي و يسير كل اللي بدك اياة :))))))))

 

من ردود الفعل عالفيسبوك وتويتر من الخميس

حاس انه المعتصمين همه فلسطينيّة وبدهم يخربوا البلد وملوخياتهم وعالجسر

على اساس انه احنا ما بنحب البلد ولا عايشين فيها من زمان ولا ولا ولا , الخ

انا ضد التخريب , بس مش كل واحد نادى بمحاربة الفساد صار بده يخرّب

 

صباح الخير
أول شي كل سنة و انتي سالمة و عقبال ال 100 يا رب
أنا مع الإصلاح و محاربة الفساد...اللي ناقص الأردن بس محاربة الفساد و باقي الأشياء احنا بألف نعمة و خير...
بس بحب أقول للشعب الأردني كله..إن الله لا يغير ما بقوم حتى يغيروا ما بأنفسهم...لا تطالبوا بالإصلاح قبل أن تصلحوا ما هو فاسد فيكم تجاه وطنكم...ما بينفع تطالب بإصلاح و انتا بتسرق مي...أو بتهرب من دوامك...أو بترمي وسخ بالشارع...ما بينفع تطالب بمحاربة الفساد و انتى ما بتقول لأإذا صحتلك واسطة...ما بينفع تطالب ببرلمان حقيقي يمثل الشعب و انتا انتخبت أبو صاحبك مشان صاحبك...ما بينفع تطالب بحرية التعبير و انتا ابنك اذا قللك لأ بتحاوره بلغة الكفوف و الشلاليط...والأمثلةكثير...عيشوا الأمانة و الديمقراطية في بيوتكم قبل أن تطالبوا فيها في الدولة

 

كلامك تمام يا ويسبر

و ما عليه "زود" زي ما أهل الخميس بيحكوا

:)

* hapPpPpPppPpy b-day

** مش عم توصلني "بعض" التعليقات الجديدة! + تعليقاتي على كم إدراج مش موجودة أصلا ً :(

أنا بتهم إم عمر "رسميا ً"

 

kol saneh wo enti saaaaalmeh ya rab :D ana batnaba2 eno sentek lejdeede ra7 yseer feha el asla7 el 7a2ee2y b2ezen wa7ad a7ad :D
ma bel nesbeh lali sar mbare7 .. fa hada motawaqa3 wo el rad 3aleh motawaqa3 .. bas eli faja2ny men kan el nas eli 3ala el twitter wo yali 7awalo el mashkele la falasteni ordoni !! wo el wa7ad kan mfakerhom 3a2leen wo fahmaneen .. bas lel asaf .. lesa el ta5alof mawjood
Note: btw for some reason i had ur birthday date on my phone wo tele3li el rminder today :D wo u are the only one who i have her birthday on my phone !

 

السلام عليكم
كلامك يسير على جادة الحق
وطرحك راقي للغايه
تحيااتي

 

,وانا جيت اعيد عليكي هون كمان

كل عام وانتِ بخير


اما الكلام عن الاصلاح...ف انسي....الظاهر انه عشان تكون مواطن اردني مثالي لازم تكون لا ترى لاتسمع لا تتكلم....او اذا حبيت تتكلم تقول نعم وبس
نعم للفساد...نعم للتخلف...

 

مجموعتين ، المجموعة الاولى بتنادي بالاصلاح و محاربة الفساد و تحسين الحريات و تحسين الوضع الاقتصادي

المجموعة الثانية ، خرجت للتصدي لهذه المجموعة الاولى!

بالتالي ما بدها مخ يحسبها او يتسائل اي المجموعتين هي الفاسدة ، او اي المجموعتين اللي ما بدها الفساد يتحارب او ما بدها تحسين الوضع

للاسف لحد الان محركنا مش العقل و لا التفكير محركنا الغباء و التعصب و الجهل

اشي بسم البدن

 

كل عام و انت بخير و عقبال 100 سنة
حمل متلي لهيك بتذكر :))
كيفك يا صبية
؟ طبعا انا كتير استغربت من ردة فعل كتير ناس على المظاهرات اللي طبعا نحنا هون بالغربة اتفاجانا فيها لانو التركيز الاعلامي مغطي الثورات التانية اكتر
لكن نحنا كشعب متحضر بالنسبة لشعوب تانية النا الحق باحترام اكثر من اللي ظهر
الاصلاح مطلب وطني
و من حق المواطن انو يطالب فيه و مش تعدي على القائد او الاردن ابدا
بس ردة الفعل كانت غريبة و بصراحة كانت مخزية طبعا غير التعليقات و الحكي اللي على النت و قديش ببين انو في ناس عم تحكي عن اشياء هي اصلا مش فاهمتها
و لا فاهمة ليش الشباب اتظاهروا بس اعترضوا عليهم لمجرد الاعتراض و اتهموهم بس لمجرد الاتهام
لما بنحكي لا مش معناتوا ابدا انو نحنا ضد الوطن
اغلب اللي بيحكوا لا بحبوا هالوطن اكتر من غيرهم
بس بدكك مين يقدر

 

ما كنت عارفة انو عيد ميلادك !!
كل سنة وانتي سالمة و عقبال الـ 100 تعيشهم بصحة وخير و وسط احبابك يا احلى ويسبر بالاردن و الدول المجاورة :D

 

سوسو ..كل سنة وإنت سالمة يا رب وينعد عليكي بالصحة والعافية والسعاده يا رب ....:) :*******

 

مين صلاح و إصلاح؟
جاية أحكيلك كل عام وإنت بخير :)
هاي أحسن كلمة راح تسمعيها مني اليوم :)

 

بعتذر عن التأخر بالرد
جهاز الكمبيوتر خربان واخوي مستلم اللاب توب من امبارح :$
يا دوب اخدته منه لاكتب البوست الجديد

شكرا الكم كلكم و انتو بالف خير و الي عوده للرد ان شاء الله :)

 

Sozan

المتظاهرين و بكل الفيديوهات بتبين انهم ما نزلو عالشارع الا لمّا صار ينرمى عليهم حجار
وحتى وهمه واقفين كانو يضلو يحكو سلميه سلميه
اللي برمو حجار منفوق الجسر بتفلتو من ايدين الشرطه كأنهم بلعبو معهم مش بمسكوهم
اما لما نزلو عالمتظاهرين بلّش الضرب من كل جهه

والله هاليوم الاسود بين ان في ناس غريبه عجيبه اغرب مما كنا نتصور عايشين بينا

Anonymous

ربنا يديم الامان عالجميع....بس بعتذر ما فهمت شو المقصود؟؟؟

 

Rain

الحمد لله على هالنعمه اللي فعلا هي من حق المواطن و بنشكر القائمين على الحفاظ عليها ولكن للاسف اكتشفنا انهم مش دائما بقومو بواجبهم بالشكل الصحيح
او ممكن مفهومهم للامان بختلف عن مفهوم باقي العالم!!!
المشكله انه في فيديوهات بتبين شو كانو يهتفو وشو مطالبهم و لكن لا حياة لمن تنادي
فورا صارو اعداء الوطن
هالعالم فاهمه الموضوع غلط و تعودت انه ممنوع تتنفسي...بتاخدي اللي بعطوكي اياه وانت ساكته

Hana

Youm m2sawee w mo5zy jeddan....allah yesle7 el7al

 

همسة

المشكله احنا متأكدين من هالشي و الفيديوهات بتأكد هالشي
بس شكله احنا بس اللي بنشوف هالفيديوهات اما المسؤولين مساكين بستقصو المعلومات من التلفزيون المحلي فقط
امين يا رب العالمين...انا قرأت امبارح عالتويتر عن شهيد تاني و لكن ما لقيت عنه اي خبر اليوم
ربنا يرحم الشهداء و يشفي المصابين

Hana 2

شكرا الك اللي خليتيني اروح اقرأ اللي كاتبه يوسف و اللي شوي هونها علي بعد الاكتئاب اللي صابنا
وانت بالف خير يا قمر....وانت سالمه وغانمه يا رب, امييييييييييييين يا رب
علينا اجمعين ان شاء الله :)

 

LUNAR.

هو هاد اللي مفترضينه ال "موالين" حسب ما بنادوهم
بلجيكيه...فلسطينيه هالمسميات اللي انتشرت و انحكت
المتظاهرين اردنيين .... بما انهم عايشين بهالبلد و بحبوه لانه وطنهم و بدهم وطنهم احسن وطن فهمه اردنيين
بالزبط
انا بدي وطني يكون ما فيه فساد و بشد على ايد اللي بنادي بالاصلاح و لكن ضد انه دم اي شخص من ابناء وطني ينزف و ضد انه يصير اي تخريب ...شي بسيط ويمكن تحقيقه بدون ما حد يتدخل و يلعب بعقول اللي مش فاهمين و هدفة الاوحد اثارة الفتنه

مواطنون بلا حدود

وانت سالم و غانم يا رب...شكرا :)

انا معك....و معك باخر بوست كتبته
الافكار بتتداخل براسي و بما اني مش خبيره ولا سياسية محنكه في تساؤلات كتيره بعقلي بدها اجابات ومنها اللي كتبته انت باخر بوست
ولكن الي عقل بميز الصح من الغلط المفروض انه كل شخص بقدر يقيس تصرفاته و بميز انها صحيحه او لأ, اي تغيير دائما ببدأ بالافراد و بعدين بنتشر ....كل اللي حكيته هو الفساد اللي الشباب بطالبو بالقضاء عليه و باصلاحه

 

Sheeshany

شكرا ...وشكرا :)
كل التعليقات اللي وصلت انتشرت, انا اخر كم بوست عندك برضه عدت التعليق اكتر من مره ليزبط
شكله الجوجل زعلان برضه هاليومين :$
ام عمر!!!
الله يسامحك هي معقول تعمل هيك شي!!!!!

Zuhair

Zamaaaaaaaaaaaaaaaaaan ya man :) sho hal3'eebeh!!!
W 2enta salem ya rab :)
Ameeeeeeeeeeeeeen ya rab w 3ala kafet el2as3edeh inshallah:)
mahoo 2elrad kan bena2an 3ala haltawzee3 el3onsory....el fetneh 2elha fatra motharah been elsha3b w fe nas 3am bet-hyejha bzyadeh...w zay ma 7akeet lessa el ta5alof mawjood :(

LOOOOL REALLY !!
Maybe la2enny elsaneh elmadyeh zha2tkom w ana 2azaker fekom :')
heak ana kul saneh shoo 2a3mel :$

 

شهر زاد

وعليكم السلام ورحمة الله وبركاته

اللهم اجعلنا ممن يقولون الحق و يحسن اتباعه
شكرا صديقتي
دمتي بكل الود

Naysan

ربنا يسعدكم كلكم زي ما بتسعدوني بوجودكم و برقتكم
وانت بالف خير يا احلى نيسانة تدوين :)

بالزبط....هاد اللي بدهم اياه
ويمكن ولا تحكي....تحط راسك بالارض و الافضل تدفنه و تضلك ماشي

 

W7l

و برأي المجموعه الثانيه اعمال المجموعه الاولى بتعني انهم ضد النظام و ضد جلالة الملك فطلعو يثبتو "موالاتهم"
على اي اساس بنو هالرأي الله اعلم و كيف فهمو كلمة "اصلاح" انها " اسقاط" برضه الله اعلم

فتنه و عنصريه عمت على عقولهم و قلوبهم ....مع جهل و تعوّد على اخذ الاوامر و تنفيذها بدون تفكير
اشي بجلط ....

Jafra

يعني لو من اليوم لبكره احكيلك اشتقنالك ما بكفي
الله يعطيكي العافيه بس برضه ما بصير تغيبي عنا كل هالمده يا قمر

وانت بالف خير يا رب....اه احنا الحمل بنجنن :)

من حق المواطن يحكي و يشكي و يطالب بالحياة الكريمه و محاسبة الفاسدين و محاربة الفساد
لكن مش عنّا....مش بمكان العنصريه هي اللي مسيطره
مش بمكان ازمة الهويه هي الطاغيه عليه

اللي صار انهم اعتبروهم ضد الملك مع ان ولائهم للوطن و الملك من اول دقيقه قررو انهم يتظاهرو

بيني و بينك بعمر كله ما سمعت...قصدي قرأت مسبات بذيئه مثل بهاليومين :$
اشي فعلا مخزي و يندى له الجبين

اشي غريب من وين جابو قلة هالحيا مش عارفه
حب الوطن هو اللي بخلي اي انسان يطالب باصلاحه

 

همسة 2

وانتي سالمه يا قمر :)
امييييييييين يا رب و ربنا يخليلك احبابك و يخليكي الهم يا الله
هههههههههههههه انترناشونال ما انا :)
الله يسعدك يا قمر

Orangee

وانت سالمه يا رب ...علينا و عالجميع يا رب بالصحه و العافيه و الاستقرار ان شاء الله
شكراااااا يا حلوه :)

كيكي

ولاااااااااااااااا بعرفهم :$
وانت بالف خير يا قمر
ههههههههههههههههه كل شي منك منيح و مقبول :)