Things I Like To Whisper About

Would You Hear Me Whispering

يفرحون ...فيقتلون الفرح




اطلاق العيارات الناريه في المناسبات مشكله قديمه حديثه في مجتمعنا - ربنا يخلصنا منها عن قريب - ظاهره غريبه للتعبير عن الفرح مع انها ما بتتناسب مع اي من معاني الفرح, كيف ممكن للبارود و المسدسات اللي نوجدو للقتل تصير طريقه للفرح!!
الفرح يعني السعاده و هداة البال و القلب اللي بوسع كل الناس , فرحة بمولود جديد او فرحه بنجاح او فرحه بزواج و بدايه حياه للاسف مرات كتير بتقلب لنهاية حياه و لمأساة و لحرقة قلب, بسبب قلّة عقل و تفكير سطحي من شخص او اشخاص بفكرو ان بالطلق يكون التعبير عن الفرحه و طريقه للمجامله, و طريقه لاثبات انهم رجال ولاد رجال!!! و بنقلب الفرح الى ترح...

سمعنا قصص كتير عن كم واحد مات وكم واحد تيتم و كم واحده ترملت وكم اهل فقدو فلذات اكبادهم بس لان هالشخص عبّر عن فرحته باسؤ طريقه ممكن يعبر فيها عن الفرح, اشخاص قدرهم انهم يتواجدو بالمكان الخطأ, خطائهم انهم اجو يشاركو هالناس بفرحتهم او ممكن قدرهم يكونو بالشارع او عالسطوح او قاعدين بين اهلهم و فجأه وبدون اي سبب وبدون سابق انذار وقعو و ماتو, ناس فرحو فقتلو الفرحه بقلوب ناس كتار, كم عريس انسجن بليلة عرسه !!!! و كم عريس توفى ليلة عرسه بطلقه من هالطلقات!!!! كم اب انسجن و انكسرت فرحته وفرحة غيره بنجاح ابنه!!! اخر ضحيه سمعنا عنها و انحرقت قلوبنا كلنا و اولنا قلب والدها و والدتها هي الطفلة "جود" ,قبل اسبوع توفت جود بعد اسبوع من تواجدها بالمستشفى في غيبوبه نتيجه اصابتها بطلقه مجهولة المصدر, بلحظه غباء من شخص الله اعلم عرف نتيجتها ويلا لأ انطفت الفرحه بعيون ملاك مبسوطه بعيد ميلادها و انطفت الفرحه بقلوب اهل كل اللي ببالهم يشترو اواعي جديده لملاكهم, و بقيت جود ملاك ولكن في عالم تاني

ما بننكر ان الوعي زاد بين الناس بخطورة هالظاهره اللي فجأه صارت من ضمن عاداتنا و تقاليدنا !!!! وبعد البحث عن الموضوع عرفت ان في قوانين سنّت وفي فتاوى واضحه تم افتاؤها بحرمه هالشي , ويكفينا حديث رسولنا الكريم صلى الله عليه وسلم "لا يحل لمسلم أن يروّع مسلما" ليبين رأي الدين بهالظاهره,وفي جمعيات تخصص جهودها للتخلص من هالظاهره منها "جمعية مكافحة إطلاق الأعيرة النارية في مدينة السلط" واللي بحاولو بزيدو وعي الناس بخصوص الموضوع, هذا بالاضافه الى المجهودات الفرديه كتصوير فيديوهات و عمل صفحات على الفيس بوك ابرزها صفحة "صرعتونا" و اللي بتداوم على لفت نظر المجتمع اللي لسا مش منتبه لخطورة هالظاهره.

لكن وللاسف لسا في ناس بينا مش مقدرة خطورة الموضوع, من باب انعدام حس المسؤوليه او انعدام التفكير المنطقي او كلاهما , وهالشي بدفع كل شخص بينا انه يقوم بواجب التوعيه بخصوص هالموضوع بين الفئه اللي عايش بينها, لازم يتم تطبيق حقيقي للعقاب و اتخاذ اقسى العقوبات على مرتكبي هالجرائم حتى يكونو عبره لمن لا يعتبر, و لابد من تكثيف الجهود من جميع الجهات لمحاولة التخلص من هذه الظاهره حتى نحمي نفسنا و نحمي غيرنا .









20 التعليقات :

مرحبا ويسبر
العاده هاي عاده تخلفيه ويجب ان يتم محاربتها وتبدأ من الانسان بنفسه لما يشوف ناس اطخ انه يتصل بالشرطه لانه هدول عباره عن مسدسات متحركه والقانون موجود لكن للاسف غير مفعل

 

الله يرحمها و يخفف عن أهلها

 

الله يرحمها,, ويرحمنا من بعدها
ويقدرنا إنوقف هيك مهازل وإستهتارات بتصير

 

بذكر مرة عنا بعوجان , كان في ولد عمره 15 سنة تقريبا , كان متأثر شكله بمنظر صدام حسين وهو بطخ بايد وحدة
فا حب يعمل نفس الاشي بس بكلاشنكوف
فلت الكلاشن منه وطخ عاللي حواليه

حسب ما اذكر , مات ولد عمره 10 سنين او انهم 2 اخوان اللي ماتوا مش ذاكر

والفيديو جابته العربيّة يومها , دورت عليه ما لقيته

 

السلام عليكم
لاسف هناك تقاليد وعادات في مجتمعنا تأذي أكثر مما تصلح
اصلح الله الحال
تحياتي

 

السلام عليكم
للاسف مجتمعاتنا العربية مليئة ببعض التقاليد والعادات الخاطئة التي تهدم اكثر مما تبني
اصلح الله الحال
تحياتي

 

و مش بس بالتدوين لازم نحكي للناس و نحاول نقنعهم حتى لو ما ردّوا علينا بس الانترنت مش كفاية
أنا شخصيا الي اقرباء ما بيسدقوا تيجي مناسبة مشان يطخوا و حبدا منهم ان شاء الله

 

I can't believe people still do that. Even when they have heard of many stories such as Jood. It is beyond me why people insist in doing the wrong.

 

Sozan

معك حق....انا بابا هيك بعمل وانا صغيره كنت اخالفه الراي ولكن بس كبرت و شفت اللي بصير و العالم اللي بموتو صرت اييد هالموضوع

لو يتفعّل القانون ويتم معاقبه هالناس الكل بتعلم...لان في ناس بس الخوف هو اللي بحركهم و بنسو عقولهم

Saleh

اللهم امين

 

UmmOmar

امين يا رب
ان شاء الله نكون من اللي يغيرو من هالواقع و ينهو هالعاده السيئه هاي

LUNAR.

يا لطيف :(
ربنا يرحمهم و يصبر اهلهم
كأني سمعت عن هيك شي

للاسف بكون هالطفل شاف ابوه او اخوه الكبير او اي شخص كبير بعتبره قدوه بعمل هالشي و بتفاخر بهالعمله و بصير بدو يقلدو

 

شهر زاد

وعليكم السلام ورحمة الله وبركاته

مش عارفه كيف صارت هالظاهره السيئه جزء من عاداتنا و تقاليدنا
كيف الانسان بلغي عقله و تفكيره المنطقي و بلحق هيك تصرفات

ر بنا يخلصنا منها عن قريب

Rain

معك حق.... احنا بالعيله بعمره ما صار هالشي
ولكن في جيران النا للاسف باي مناسبه بطلع الاب الفخور بنفسه وببدا يطخطخ, حكا معه بابا بالموضوع ولكن ردّه كان ان ليش بابا بدوش اياه يفرح :$

الله يهدي العالم

ان شاء الله بطلع بايدنا انّا نطور من الفكره و تصير تطبيق عملي و يكون النا ولو يد بسيطه في التخلص من هالظاهره

 

Jaraad

Unfortunately yes ...people suppose to be educated and with a consciously minds heard and still hearing about the consequences of such an act and they keep on doing it ...

Why people think its a way to show that they r happy???
I don't and can't understand...

 

الله يرحمها ويصبر اهلها
ويبعد عنا شر رصاص الافراح

 

مساء الخير

والله يرحمها ويرحمنا برحمته

والله يعطيكِ العافية

وان شاء الله تكون شمعة في هذا الظلام الذي يلف الكثير من ممارستنا الخاطئة

دمتِ بخيّر

 

orangee.wordpress.com
:)

 

نعم .. هم يفرحون ويقتلون الفرح بطيش واستهتار وفنجان قهوة وعباءة تذهب بأحزان الناس واوجاعهم أدراج الرياح

لذوي جود الدعاء بالصبر
*
كل الشكر ويسبر

 

الله يرحمها يارب
ومتل ما كتبت عند نور أنو لما (فرح) البعض يتوقف عند حياتي فليلوك نفسه وفرحة .. يعني مش منطق بنفس اليوم هوي يفرح وأنا في اليوم التاني بمجلس عزاء
هذه ليست عدالة!
::
يعطيكِ العافية
::
عزيزتي متابعة لما تكتبين رغم عدم تعليقي على كل تدويناتك (:
كل الود

 

همسة

امين يا رب العالمين

الله يحمى الجميع

Yosef

مساء النور
امين يا رب العالمين و يرحم جميع امواتنا

الله يعافيك...ربنا يعطي العافيه لجميع اللي فكرو وشاركو و دعمو هالفكره وان شاء الله نستمر فيها و نطورها لنوصل صوتنا

دمت بالف خير

 

Orangee

:)
يسلمو ايديها و عينيها القمر

نور

للاسف اصبح "القتل" شي بسيط يتم الهروب و الحل بابسط و ارخص الاثمان

ربنا يصبرهم و يرحمها و يرحمهم

اهلا و سهلا فيك بمدونتي المتواضعه...نورتيني

 

Bullet

امين يا رب

اي فرح هاد اذا بنبني على حزن ناس تانيين؟؟؟ كيف بدهم يستمتعو بفرحهم و شخص تاني تآذى ؟؟

الله يعافيكي يا قمر
اهلا و سهلا فيكي دائما بتنوريني....معذورة لاني بمر بنفس الظروف :$
الي فتره ما في وقت للتعليق و لكن اكيد بقرأ كل اللي بنكتب :)