Things I Like To Whisper About

Would You Hear Me Whispering

لو سمحتي....اسفه...اخر مره...شكرا



النا فتره بنعلم فروحه كيف تطلب بأدب و كيف تعتذر اذا عملت شي غلط و تشكرنا اذا عملنالها اشي, ولكن هالشي بخلينا نمشّيلها اشياء كتير, يعني كلمة لو سمحتي او "امتّي" زي ما هي بتحكيلها تعتبر كرت اخضر لكل شي ضمن المعقول طبعا, يعني بالليل بعد ساعة معينه ممنوع السوائل منعا لخروجها وقت النوم فكلمة "امتّي قطّه" يعني لو سمحتي نقطه مي- مني اخدت هالكلمه :) - فأحنا مضطرين نعطيها بما انها حكت لو سمحتي, و لو كبت صحن الاكل عالارض و حكت "اتّه ...ملّه" يعني اسفه اخر مرّه برضه لازم نسامحها, لنشجعها على استخدام هالكلمات دائما.

يعني بدنا نقدم تنازلات لحتى نحصل على طريقة تعامل معينه منها, بدنا شي لازم نقدم شي مقابله, لازم نغض بصر, لازم نبالغ بفرحتنا باستخدامها الكلمات ولازم نزقف و لازم نحكي "آآآآآآفوووو" .... برافووووو.

وضعنا زي دولة مصغره, فرووحه الشعب و احنا الحكومه, بتغلط بتتعاقب, بتتعامل منيح بتتكافئ, لكن لمّا فكرت بواقعنا احنا كشعب و حكومتنا لقيت ان كل هالحكي ما في منو, مافي غير احنا بنعطي و همه باخدو بدون اي تقديمات بالمقابل , احنا بنموت وهمه بعيشو, احنا بنحترم وهمه بدعسو على كرامتنا, احنا بننحت وهمه بحملونا جميله بالكم دينار اللي بعطونا اياهم, احنا بنزرع و بنحصد و باخدو كل شي و بعطونا باقي اكل السنه الماضيه

هل اللي بنعلّمه للصغار غلط و المفروض نعلمهم يكونو كذابين و نصابين و بس ياكلو حقوق العالم نزقفلهم؟؟؟ ويلا لازم نعاقبه بس يكون مؤدب ؟؟ويلا نعلمه لا يحترمنا ولا يحترم حاله؟؟ ويلا احنا اللي عايشين بعالم اعوج؟؟؟


اللي بعتذر و اللي بستسمح و الماشي صح يستغل و ينحرث عليه و مرات بندعس عراسو و معظم الاحيان يطلق عليه لقب "هبيله" !!!
و اللي بسرق و بشتغل من تحت لتحت و بكذب و بتأمر و بطلع بخطط لئيمه بنحكي عنه ذكي و فتح و بلعبها صح وما بيجي غير واقف..

اللي بعمل شي منيح و اذا لا سمح الله قدر يبين اللي عمله بعد محاولات الطمس اللي بعملوها بحبطوه و بخلوه يندم انه فكر, واللي بعمل غلط بكرموه و بيعطوه جوائز و ممكن يصير سفير النوايا الحسنه للذمة والضمير, بنحكي للحكومه لو سمحتي بضربونا عراسنا, بنحكيلهم شكرا بضربونا كف, بنحكيلهم اسفين بضربونا الكف التاني.... احنا ما بدنا اياهم لا يزقفولنا ولا بدنا يحكولنا برافو ولا بدنا ضحكه رضا...بدنا حقوقنا ناخدها بدون ما ندوق المر, بدنا نعيش وناكل لقمتنا اللي بنستاهلها بعد تعبنا و كدنا, بمنتهى البساطه....بدنا نعيش.

16 التعليقات :

خليهم يقولوا الي يبغوا يقولوا عنا, مو لازم يعتبرونا حتى اوادم, بس لازم احنا نستمر على ادبنا و اخلاقنا و نكون اوادم و ناخد حقنا. و صدقيني ياقمر انه نقدر ناخده بدون تزلف و لامذله.
و الله يخليلكم فروحة يارب و يسعدها و على فكرة انا برضه بنت اختي اسمها فرح بس ماشاءلله صبية الان
:)

 

أيوهههههههههههههههه
هساعيّات عرفت لويش كتبت عندي تعليق بنكهة تشكيكية
:=]

ذكرتيني ببوست أم عمر و إنها بدها تحاكم أهلهل و هيك

ما أنا عارف شو العمل بصراحة

التوازن صعب و حرج بهالعمر!

و أصلا ً إحنا نفسنا مو عارفين وين نقطة/نقاط أو "قطّه" التوازن و الاعتدال!

 

صباحووو بما اني صحيت قبل شوي لانو لولو ما نيمتني بالليل... حبيبتي كانت تحلم كوابيس طول الليل :(

ذكرتيني بالمصطلحات تبعتها.. هلأ صارت تحكي (شُكاً) لكل اشي، حتى لو حكيتلها خدي كبّي هالشغلة بالزبالة.. بتحكيلي شكاً :D
و طبعاً الاعتذار .. هي بتحكي (آسف) صح .. بس المشكلة بتفكر انو الواحد بحكي آسف لما يغلط و بعدين بكمل الغلط عادي!!! يعني بس تعمل اشي غلط، بعصب عليها فبتحكيلي آسف، و بتيجي تبوسني بعدين بتروح تكمّل اللي كانت تعملو، و هي تتطلع علي انو يعني شو بدك!!! حكينالك آسف!
عنا كمان (لابو) عن برافو، و (عافية) عن عفواً :D و (سعّانة) عن زعلانة...و كتيييير أفلام :p
أنا كتير بنبسط لما أشوفها بتتعلم هاي الشغلات و أكيد انتي حاسة نفس الشي مع بنت أخوكي، و بغض النظر عن المجتمع اللي رح تعيش فيه بالمستقبل، و عن انو ما برحم الضعيف و لا المؤدب و لا اللي بحترم الناس ولا ولا ولا... بس احنا لازم نعمل اللي علينا، لانو هاد اللي أمر فيه ديننا، و هاد اللي ربونا عليه أهالينا...
و بس :)
على فكرة أنا مسافرة يوم السبت على أبوظبي، انتي وين صارت أراضيكي؟؟؟

 

اموره والله يخليها ان شاء الله لاهلها وامتها :)
من وجهة نظري يا ويسبر انك انت بتعلميها حاليا اسلوب الحوار الحضاري واهمية الاعتراف بالخطأ وهاي اول مبني ببناية مجتمع صحيح لكن تعالي عنا في الاردن عندهم قاعده شرشوحيه تحكي خذوهم بالصوت بالمعنى لا احترام ولا تقدير للشخص الا اذا كان صوته عالي ومسموع حتى لو كان كلامه مو منظقي ومن هون تيجي المشكله لانه ما بنعرف نتحاور ما بنعرف نقاش بناء لهيك ما بنعرف نبني مسأله او نظريه بطريقه مفهومه ومن هون البلطجه بتصير الشعار وفهمك زياده

 

الله يخليلكم اياها قبل كل شيء..
بس أتوقع إنها تتعلم الصح بعدين تنصدم بالواقع الخطأ أحسن ما تتعلم الخطأ من الأساس..لازم بذرة الخير تنزرع فيها لعل و عسى لما تكبر تقدر تعمل شيء صح

 

mesh 3aref shu a7ki.. this is the contradiction we r really living in..

 

The problem is most people think this is the best we can get..anything else will make an unnecessary "mess"

 

تركتلك تعليق من قبل على هالبوست و ما في شي و مو مبين تعليقات من حدا غيري كمان...
شو المشكلة؟

 

رح تستنتجي بالاخر انو هي الحكومة و انتو الشعب المقهور ويسبر بس مقهور بكيفو و بمحبة

الله يخليها

 

Wafa'

معك حق...مش لازم نخليهم نغير من تصرفاتنا علشان نتماشى معهم

مش لازمة نصير بلا اخلاق لنقدر نتعامل معهم

ربنا يسلمك يا قمر...اميييين يا رب
كل الفروحات بجننو و ربنا يخليلهم خالاتهم و عماتهم يا رب


Sheeshany

:)
انا بديش احاكم حد...الله يخليك ما تقولني شي ما حكيته...بعرفكم انتو - اللي من اياهم - بتكزبو الكزبه علسان العالم و بتصدقوها و بتنقلوها لهدولاك :$

بنحاول نعلمهم الاخلاق و الادب و نعودهم على التعاملات المنيحه بركي تغيرت النفوس اللي حوالينا بس يكبرو

 

MrsH

صباح ومسا الورد
اسفة كتير عالتأخر بالرد...بس عرأي المثل
اللي عند اهله ...على مهله :)

ايون...انا بعمان هلأ :)
للاسف ما صار نصيب نتلاقى بس لسا الفرصه مطروحه...ربنا يجيب الخير يا رب :)

سلامة قلبها لولو من الكوابيس...ابصر شو الاكشن اللي صار بالنهار بيّن معها بالليل :)

هههههههههههه...حبيبتييييي واعيه ما شاء الله ومزبطه امورها :)

فروحه بتعتبر انها تعتذر خلص انتهى الموضوع وما بصير تتعاقب عليه خصوصا بس تضرب نور :$


فرووحه بتحكي ...واوا بس تكون زعلانه او حد يصرخ عليها...بابا واوا يعني بابا زعلها او صرخ عليها....طبعا بالاضافه للواوا الوجع

اكيدبننبسط بس تستخدم هالكلمات بحكيها وتعاملاتها...معك حق الاصل انّا نعودهم عالصح و همه ربنا بعينهم على التعاملات المستقبليه مع الاخاص السيئين...الحياة بتعلمهم بوقتها لكن
الخير بكون مزروع

بالتوفيق يا قمر و ربنا ايسرلك كل الخير يا رب
حسب ما بتذكر ان الاهل موجودين بالامارات ...صح؟؟؟

تتهنو يا رب

Anonymous

ربنا يقويكم و يكون معكم و ينصركم يا رب

 

Sozan

تسلمي يا قمر...ربنا يحمالك حبايبك

انا معك 100%
المفروض نزرع الخير فيهم و بعديها بنتركهم يعيشو بالحياه و يجربو واكيد اللي بنزرعه هلأ بضله موجود و بتمسكو فيه زي ما زرعو اهلنا فينا هالمبادئ ... صحيح انصدمنا بس كبرنا ولكن هينا عشنا :)

هالمبدأ ماشي مع الكل....وكان يقهرني بالشغل لانهم بخافو من هالعالم و بمشولهم اللي بدهم اياه ليريحو راسهم و لو عحساب غيرهم

ما في نقاش...في محاضرات و فرض رأي بس

جعفر

تسلم يا رب.... عقبال ما نشوفلك :)

معك حق...هو كان سؤال مجازي
اكيد لازم نزرع الخير و الادب والاخلاق فيهم ومن الصغر لحتى تبقى

شكرا جعفر :)

 

Tareq

I think as our friends said we should plant the good manners inside them from now and leave them to face the future after that :)

Rain

Yes...but it is not :)
What we r getting now is the "mess"

 

Jafra

سعيده جدا بعودة اسمك ينور الصفحات يا قمر :)

لا تغيبي مره تانيه ابدا

حبيبتي اي شي منها زي العسل بصراحه و بسمه منها بتسوى كل شي

حاليا هي الحكومه بجداره كمان :)

تسلمي يا رب

يلاا هي بدا مبارك بالكلمه خلينا نسمع شو ممكن يحكي و شو ممكن يبرر :$

 

أنا بتنفس حرية لا تقطع عني الهوا !

كلامك زكرني فيها .. :)

 

هديل

مابتقدر ابدا تلغيني .....بدك تسمعني وتحكيني

..واذا فكرك عم تداويني
مش هيدا هو الدواااااا...

كل اغاني جوليا بطرس الوطنيه بتجنن

شكرا لتواجدك يا قمر :)