Things I Like To Whisper About

Would You Hear Me Whispering

اشي تاني عجبني

اقامتي بالامارات بتكون ما بين خواني التنين, واحد بدبي و التاني بالعين -حاسه حالي ويسبر عويس :)- المهم خلال فترة تواجدي بدبي كان اخوي يضطر يروح يومي على ابوظبي يطلع من الصبح يرجع عال 12 بالليل فكنّا انا ومرة اخوي نطلع لحالنا خلال النهار بالتكاسي, التكسي مرتب و نظيف و لا يخلو الامر مرات من بعض الروائح اللي بترجع لطبيعه اكل السواق و اللي بالغالب بكونو هنود :$ لكن اجمالا الوضع منيح.....نسبيا :$

لا يخلو الامر من انهم يبينو انهم مش عاجبهم ان في عرباية بيبي, و القانون الاماراتي بلزم السائق ينزل و يحمل الشنط او العربايات وهو اللي يحطهم بالسياره, بس اكتر شي لفت نظري هو شي بنعاني منه كتييييييييييييييير بالاردن و اللي مكتوب على الورقة اللي ملزّقة بكل تكسي على الكرسي من هيئة الطرق و المواصلات



بالاردن كتير من سواقين التكاسي بنسو / بتناسو يشغلو العداد و بهيك بتضر انك تنحرج و تدفعله اللي هو بتقديره و اللي هو متعود انه ياخده على روايته من اللي بوصلهم بالعاده لهالمكان, و يا بصير طوشه يا بتدفعله وانت ساكت :)

طلع بالامارات اذا سائق نسي يشغل العداد فاااااا " تعتبر الرحلة مجانيه" :) كتير عجبتني هالفكره

مشكلتنا اذا ما في قانون يشكمنا ما بننشكم من نفسنا, يعني طول ما هو ما في قانون يلزم السائق بطريقة تعامل و بشروط و قوانين معينه يتّبعها ما بلتزم باي شي و بالعكس بصير يبع من عنده كمان.

ملاحظه ع الهامش

ما بعرف اذا انتبهتو لعداد Blog For Jordan Day العداد بدا بالعد التنازلي ليوم الكتابه عن و للاردن....ضايل 59 يوم فجهزو حالكم لان الوقت صاير يطير طيييييييييييييييييير :)

اشي تاني

مش عارفه ليش اول مرّه سمعت فيها خبر السماح للاردنيات بالعمل في النوادي الليليه و اللي انا اساسا ما كنت اعرف انه كان ممنوع يشتغلو و هلأ انسمحلهم و مش عارفه شو مناسبة هالقرار بهالوقت , و انه انا عقلي المتواضع فكر انه بدل ما يسكرو هالنوادي من اساسه لا بدهم يخلو العالم تطالب بوجودها لانها مصدر رزق "للاردنيات" و الاردنيين .... بس ما بعرف ليش اول ما قرأت الخبر اجا ببالي هاد المشهد من مسرحية العيال كبرت

اختي حترقص....اختي حترقص :$



20 التعليقات :

ياختي عليها
شكلو عاجبتك الامارات كتير
ليكون مش ناويه ترجعي وسبوره؟
:))

 

عن جد الامارات من اجمل الدول العربية واكثرها تحضرا وتقدما ، عندهم اشياء كثير حلوة ، لا توقفي كتابة عما تريه ، لتشاركينا به ،، حلوة قصة السيارة والعداد والأحلى منها قصة ( اختي ح ترقص .. )
دمتي اختي ..

 

السلام عليكم
يسلمو على المواضيع الحلوة ، أنا شايف إنه بالأردن مقدم الخدمة العامة عزيز و ما بذل حاله سواء سائق تكسي موظف بنك صاحب دكانة ؛ وأي شيء بعترض عليه الزبون بعتبروا شخصي و لو معاك الحق .
في ظل غياب الرقابة من السلطات و ضعف التنافس التجاري في الأردن .
الله يسعد الأردن و إربد ....

 

رحلة مجانية بالاردن
بتمزحي
بتاكلي ضرب للصبح

اما الملاهي الليلية فهي دعم للصناعات و الانتاج الوطني

هم كانو يشتغلوا قبل
بس الان بمصاحبة الفرقة الحكومية
و مش رح احكي اكتر

على الله الزباين يعجبهم اللحم البلدي بعد ما تعودوا على الروماني و المستورد

 

مياسي

والله عاجبتني كتير ....بس بيني و بينك شكلي مش وش غربه :$ بدي ماما بصراحه :(

انبارح بالليل ما زنّت دانك!!
لانو كنا بسيرتك انا و انّووس :)

وجع البنفسج

ما شاء الله بصراحه تعبانين منيح و كل يوم بكتشف اشياء واماكن جديده كتير حلوه

ان شاء الله حشارككم بكل شي بشوفه هون

الله يحلّي ايامك و شكرا لتواجدك
نورتيني :)

 

Mhamed

وعليكم السلام ورحمة الله وبركاته

مشكلتنا بس الواحد ينحط بمكان سلطه او بمكان يكون الناس بحاجه اله فورا بنفش ريشه و بصير تعامله سيء جدا

بالزبط....لو في رقابه و في عقاب حقيقي للتصرفات السيئه كان ولا واحد بسترجي يعملها

اميييييييييييين يا رب :)

Mala2e6

اذا بعطيه الاجره و بطلب الباقي باكل جحره شو بدو يصير لو مجاني تكون...باكلني :$

اهاااا قلتيلي ...فعلا ان حسّي الوطني متراجع هالايام

تغييير و التغيير مطلوب...بعدين في عامل الخطورة المرافق من طلقه رايحه جاي او ضربه موس فهاد بزيد من الاعجاب

 

والله شكلك معجبه بدبي يا ويسبر :)
تعرفي هو لازم انه يصير القانون هيك مشان يتربوا تبعين التاكسي قال ينسى اما شغله بس ما بينسى يطلب الاجره بس نسي يحط العداد !!

 

ويسبر.. عن جد الميزات اللي عم تحكيها رائعة جدا.. بانتظار المزيد من المعلومات عن تجربتك الإماراتية :)

 

لوووووووووول!!

لأ ما زنت:)
شكلو لازم كانت تزن كتير!!
شو حكيتو آه؟!

 

من النهاية أبدأ:

بناتنا ما بيصير يشتغلوا بالنوادي الليلية لأنو ما بدي أشوف أختي هناك و تطون هيه اللي تقدملي المشروب - مثلا ً !
duuuuuuuuh

عادي ، تعودنا على الهبل الذكوري

بالنسبة للعدّاد، باختصار في الأردن الكلمة هاي = طوووووووووشة و/أو سمة بدن طوال اليوم! :(


إيش يا نانا عويس ! :P

 

Sozan

هههههههه ....على قد ما بقدر :)

طبعا ما بنسى الاجرة و اكيد ما بنسى القرشين بس يكون 72 و اكيد ما برجّع الثلاث قروش بس تعطيع 75 :)

جعفر

اهلا و سهلا
زمان ما نورتني جعفر

بصراحه اشي حلو ويا ريت يتعمم بكل مكان
ان شاء الله...لانه كل يوم في تجربة جديده و احداث جديده

 

مياسي

مهو بالخير جبنا سيرتك لهيك ما زنت :)
حكينا كتير بصراحه :)
المهم طمنتني عليها وعالبيبي


Sheeshany

لااااا ما شاء الله حمش.....اللهم قوي ايمانك :)

فعلا كتير طوش صارت ممكن ينكتب عنها مواضيع ....بس دائما بنحاول ندور على فتفوتة ايجابيه ....فدور من هلأ لان بدها بحبشه الشغله :$

شاعره من يوم يومي انا :)

 

مواضيعك حلوة وخاصة العداد عندنا نفس المشكلة بمصر العداد ليس لة فائدة
اما العمل بالملاهى الليلية للفتايات فهذا قرار غريب ومرفوض فى اى دولة عربية
تحياتى لمواضيعك المميزة

 

هبة

وجودك و وجود الجميع بخلي المدونه احلى دائما

مشكله العداد شكلها منتشره :$
لازم يكون في قانون و صارم و تطبيقه بشكل فعلي لحتى الكل يلتزم

قرار الملاهي الليليه كان غريب و ما اله داعي غير انهم يلهو العالم فيه لحتى يمشّو غيره بدون ما الناس تحس

شكرا لمرورك و متابعتك :)

 

على رأيك، أنا ما كنت عارفة انو ممنوع.. بس يعني هيك بتصير الشغلة قانونية 100% :p
الله يلطف فينا و يرحمنا برحمته يا رب...
عجبتني أختي حترقص :D :D كتير بحب هالمسرحية

 

اه ما حد بسألهم وين رايحين ولا من وين جايين

اللهم امين...الله يستر من اللي جاي

وانا كمان كتير بحبها....بس لمّا كبرت عرفت اني ما كنت فاهمه اشي :$

 

رحلة مجانية بالاردن.....سابع المستحيلات

 

W7l

سابع المستحيلات ان السوّاق ما يحملك جميله بان المشوار من هون لهناك ب دينارين بس يلا دينار ونص مش مشكله لاني نسيت اشغلّ العداد

او انه مثلا لا سمح الله يعتذر :)

بس رحلة مجانيّه..... اعتقد انه محض خيال :)

 

يا عيني !!!! نوادي ليلية بصنع محلي ...لا حول ولا قوة إلا بالله الله يجيرنا من الجاي
يا ريت تتنظم الأمور عنا زي دبي :(((

 

Orangee

نعم....بنكهة محلّيه بدون اي اضافات :)

امين يا رب
الله يجيرنا من اللي جاي :$

المشكله ان هالاشياء مش صعبه ولا مستجحيله التطبيق ولا بدها امكانيات و قصص ...بس شوية تنظيم بس