Things I Like To Whisper About

Would You Hear Me Whispering

كلام بكلام




حكي كتير بمعنى او بدون معنى بس قررت اكتب اي شي بخطر ببالي, في قفزات وفي ترابط ويمكن ما في فاذا راسكم بوجعكم بلاش تقرأو لاني بضمنلك انو حيزيد


افكار و قصص و حكي و مشاعر لخابيط لخابيط
قلب بيدق لضحكه صغيره و قلب بيبكي لصورة بعيده, نور جديد بالحياة بنوّر و وجه بختفي من الصوره الكبيره, دمعة فرح و دمعه حزن, لقاء و فراق بوداع و بدون وداع, صورة كبيره بتزيد الوجوه و فيها و بتختفي وجوه , بداية حياة و نهاية حياه وكل اللي بنضاف واللي بختفي بضل مجهول لوقت ما يصير.

****************************************
تقريبا الكل بعرف اني ما عندي مشكله بعمري, يعني هاي الازمة عند بعض البنات انو ياااااااااااااااويلي تعديت ال 30 و هاليأس و الهم والغم وهالقصص طبعا اللي بكونو جد مغمومين مش اللي بتخوتو عالموضوع, انا و الحمد لله ما عندي مشكله , هلأ همه بحكو ان الشباب شباب القلب, في منو هالحكي يمكن بقصدو القلب اللي مش معبى مأسي وهموم, لانه بنشوف ناس ببداية العشرين و كأنهم بال 70 من هموم ومشاكل الدنيا الله يفرجها عالجميع, بس برضه اعتقد ان العمر هو احساس, يعني احساسي اني عجّزت بغض النظر كم عمري بختلف عن احساسي اني بكل سنة بزيد خبرات و نضوج لعقلي و اكيد ما بحكي عن انو احساسي اني 17 و ابدا بمراهقة متأخره, الاحساس يس بالعقل يعني , و برضه تصرفات, يعني بس انا يصير حكمي عالاشياء بناءا عالعمر بكون عجّزت , بقصد الامور اللي بتقبلها الدين , مثلا لمّا نروح على حديقه وفيها مراجيح شو المانع اني اتمرجح؟؟ وين المشكله و خصوصا اني ما بعمل اشي غلط ولا بتمصوع !! وين المشكله اذا كنت انا و اهلي و في مراجيح و اتمرجح, في ناس بحكولي بهالعمر و بدك اياني اتمرجح...شو يعني و شو دخل!!! او اني بمدينة الملاهي اركب اللعب و اسوق السيارات و الحق اخوي و اضل اضرب سيارته :) وين المشكله وشو المانع اني اكون 33 و العب!!! وفي امثله كتير تقاس على نفس المبدأ

شو سبب الحكي عن الموضوع!!!
قبل كم يوم بحكي قصه مع مرة اخوي جبت سيرة عمري....و نسيت عمري....
هو حيصير 33 ويلا 34 !!!

جد نسيت O_o
و صرت اعدّعلى ايدي.....77....87...97...2007 هي 30 ول 2010 هي 33 اذا حصير 34 و فجأة انصدمت

كيف نسيت !!!!!!

****************************************

الزيارة الماضيه للامارات كتبت موضوع عن علاقة خواني بمرتاتهم وانه العلاقه كتير فيها ملل و فتور صار, السنة لاحظت التغير للعكس :)
الحمد لله العلاقة بينهم كتير ممتازه وخواني و مرتاتهم حكولي بمواقف مختلفة انهم حاسين حالهم كتير مستقرين و كتير مبسوطين و الحمد لله, بوقتها في تعليق اني كشفت اسرار خواني و المعلّق او المعلّقه دعولي بزوج "يكتم سرّي" و لهلأ بس اتذكر هالتعليق برجع لنفس المشاعر السيئه اللي صابتني بس قرأت التعليق

اللي اكتشفته ان كل زواج اله وضعه الخاص و بتختلف الفترة اللي بتستقر فيها العلاقه لتوصل الى احلى مراحلها و ان هالشي بعتمد على الطرفين و الارداة و العمل للوصول لنقطه واحده يجتمعو فيها و يتفقو عليها, هي اكتر من حقوق و واجبات, هي التصرف بنابع محبّة مش واجب, و التفكير بالشخص التاني قبل التفكير بالنفس

****************************************

بس خلاص :)

37 التعليقات :

الله يهدي البال يا رب , اللي بظل يتبّع لحكي الناس بخلصش وما بعيش حياته زي ما بده
لأنه بلبس هيك عشان فلان ما يشلّه
وبوكل هيك عشان ما ينصح وعلّان يشلّه
وبتصرفش هيك لأنه علتان بتضايق لما يشوفه هيك

سيبيكي من العالم :)

بالنسبة للجزئية الثانية
انه ؟ شو دخل هاي بهاي؟

مثل ما انتي حكيتي , كل علاقة زوجية بتختلف عن اي علاقة زوجية ثانية , مش شرط تكون الحياة وردية تماما ومش شرط تكون كلها نكد بنكد , كله حسب الاطراف المرتبطة

 

بس خلاص --- لوول

من كل بستان زهرة

:)

إنتي 74 - لويش إبتكذبي على قرائك :]

معلش مسطّل و مش قادر أكتب أكثر "أحسن!" ... نعسااااااااااااااان و زعلاااان - حابب أكون بالحرم لسا :(

 

صباح الخير اختي الرائعة
عام جديد دخل، وتدوينتك عميقة للغاية.
تطرقتي فيها لكذا مسألة فعلاً..
مسألة العمر بالنسبة لي مثلك تماماً
وتلك مشكلة مع العالم المحيط بي
عمر عقلي لا يوافق عمري الذي يقيسون به كل شئ للحكم عليك فوراً.
عقلي هنا مع الاطفال، عقل صغار
بينما عمري الثلاثين
يعني انت مترفة انت معقدة انت من هكذا قبيل، رداً منهم على عدم ارتباطي
وقبول كل العرسان اللي اتقدموا على مر السنوات منذ 18 سنة من عمري.
اجد انها قناعات ، وامور فطرية لا دخل لاحدنا فيها.
مثلم اظل اقول الشباب شباب العقل والروح، لكن المجتمع لا يعرف هذا ابداً.

يااالله
ان شاء الله يصير خير معانا جميعاً
لو علي لبقيت اثرثر هنا لبقية النهار
لكني بالعمل..
مع انه يوم عطلة للجميع غيري

 

مسا الخير
:)
أحلى شي عجبني جملة
(يعني بس انا يصير حكمي عالاشياء بناءا عالعمر بكون عجّزت)

لو كنت بدي أحكي اي شي ما رح اطلع عن معناها ...
وبالنسبة لشغلة اللعب والعمر تذكرت مقولة لبرنارد شو عالأغلب: نحن لا نتوقف عن اللعب لأننا كبرنا إنما نكبر لأننا توقفنا عن اللعب :)

الفكرة مو بس بتقدم الإنسان بالعمر بالنسبة لمجتمعنا إنما الفكرة بالمنحنى العام للحياة يعني مشكلة تعليب الحياة بعلب :)
عمرك تحت العشرة ... انت طفل ما عليك اي مسؤولية والك حق باللعب وبكل شي
عمرك 18 انت بالجامعة بتدرس وغير هيك لا
عمرك صار بآخر العشرينات انت لازم تستقر وتبلش تعيد بكل شي شفتو من الأكبر منك
وهكذا دواليك لحد ما صرنا ما نقبل اي تغيير ولو حتى طفيف ....للأسف :(
الطفل فينا ما بيكبر ولا بيموت أبدًا بس نحنا بنختار متى نغيب عنو ومتى نتمثل فيه.
نهارك كلو فرح وسعادة :)

 

ويسبر
مساء الخير
وكل عام وانتِ بخير

علشان اثبتلك انك لسه صغيرة في العمر بس
لما ولدتِ انا كنت متخرج من الجامعة وبعمل في الامارات
والاهم انني لا زلت احمل في داخلي طفلا صغيرا وصبيّا مراهقا وشاباً مندفعا واعتقد ان وجودهم معي سر نجاحيّ
هذا اذا كنت ناجح من اصله

اما الثانيّة حول الزواج
اتفق معك فالزواج كالبحر بين مدٍ وجزر...في المد يستفاد منه وفي الجزر يستفاد منه

دمتِ بخيّر

 

اولا : كل عام و انت بخير و صحة و عقل و عمر جميل و طويل يارب

ثانيا: شكرا على التعليق الجميل الاسبوع الماضي, رفع معنوياتي كتير
:)

ثالثا: انا معاكي مية بالمية من ناحية العمر, انا الان 37 و الحمدلله حاسه اني لسه في عز شبابي, صحيح في نزلات و طلعات بس عقلي مازال بحالو و بازداد خبرة و سعادة كل مااكبر

و بعدين بالعقل كدا, احد يزعل على شيء مالوا حكم فيه!! يعني لما اصغر نفسي او اكبر نفسي راح يتغير شيء
؟؟

و بس
:)

 

زي ما بحكوا تبعين الفيزياء
time is illusion

 

اعجبنى البوست جدا واكثر ما اعجبنى اعتزازك بنفسك وقوة شخصيتك ونضوج فكرة وعدم اكتراثك بكلام الغير
وكل سنة وانتى طيبة تحياتى لكى

 

لقد تم نشر المدونه في تجمعنا مدونات من أجل التغير
دمتي بكل خير

 

Abu Zaina

امين يا رب

ارضاء الناس غاية لا تدرك...معك حق و الافضل و الاولى بما انا مش متعديين على حقوق غيرنا فنرضي نفسنا اهم

هههه...ما الو دخل و لهيك حكيت قفزات :)

هاد اللي اكتشفته.../ا في قاعده ثابته تمشي عليها ليكون الزواج سعيد و اي زواج ما بخلى من شوية ملح....تغيير يعني :)

Sheeshany

افكار كتيره و فرّغت شوي منها, تخيل كل هاد و كمان كم من شغله بلعبو جوا عقلي :$
طبيعي اللخبطيطه تكون

مهو يا عمتو يا هيثم انا عند ال 50 صرت اصغر كل سنة ما اكبر :)

تقبّل الله الطاعات و ان شاء الله ربنا بكتبلكم الحج ياااااااااا رب
و يرزقنا الحج و العمره

 

اختي الغاليه لطيفه

صباحك و مساكي معطر بالفل و الياسمين

افكار تتضارب و تتعارك في راسي و الي فترة مش عارفة اكتب او اعبر

انا مثلك تماما....عقلي نضج و نما و طريقة تفكيري صارت اوعى اكيد ولكن مش ضروري هالشي يقيد تصرفاتي بما انها مش خارج نطاق الاداب



موضوع الزواج و الحديث عنه بطل يأثر فيي :)
زهقت منه بصراحه

اميييييييييييين يا رب
دائما تسعدني تعليقاتك و اعشق التعليقات الطويله

زيارتك دائما تسعدني و تشرفني

الله يعطيكي العافيه يا رب

 

Khadija.april

مساء و صباح الورد

اول شي كل عام وانت بالف خير و عقبال ال 100 سنه يا رب

جميلة جدا المقولة و بتختصر اللي ببالي :)

بالزبط...كأنه في كاتالوج لكل مرحله عمرية لازم كلنا نمشي عليه واي مخالفه تعتبر جريمه

انا اللي مخليني استمر هو بقايا هالطفله اللي بداخلي و بحس معظم اللي حولي بدهم يقضو عليها :$
و انا مصرّه انها تبقى :)
نهارك و ايامك كلها مسك و عنبر
نورتيني :)

Gemini girl

Welcome back ya 7elweh...happy that u liked it :)

 

Yosef

صباح و مساء الورد و انت و عائلتك بالف خير يا رب

العمر كله يا رب...
اكيد ناجح.....اجتماع المشاعر كلها هو اللي بدفعنا لنتقدم, لان احساس الكبر بعني بمجتمعنا العجز و هالشي بخلينا نتباطئ او ممكن نتراجع

معك حق...هالشي بشوفة بعلاقة بابا وماما بشكل اوضح, بعد 38 سنة زواج
و كل علاقة زوجيه الها نكهتها و طرقها في المد و الجزر اللي بتختلف عن التانيه

سعدت بمرورك

Wafa'

وانت بالف خير وصحه وسلامه
صديقتي....تعليقي ما اكن فيه اي نوع من انواع المجامله, هو اي نعم هالايام مقلّه بالمرور على المدونات و هالشي كتير مدايقني و لكن صدقا بدون مدونتك راح يكون اشي كبير ناقص في عالم التدوين

المهم انك هلأ صرتي احسن و رجعتي تنورينا بتدويناتك و زياراتك

العمر كله يا رب...المشكله الناس بنسو نضوج العقل و بركزو على الامور اللي بتسعدنا

 

Anonymous

بالرغم من كرهي الشديد للفيزياء مع اني علمي....بس هلأ بديت احبهم للفيزيائيين :)
معهم حق

هبه

كتير سعيده انه عجبك :)

وشكرا لكلامك اللطيف
و انت وعائلتك و احبابك بالف خير يا رب

 

مدونات من اجل التغير

يسعدني و يشرفني تواجدي معكم :)

 

ما بعرف شو بدي اعلق بس بدي احكي اللي ببالي مشان ما اكون دائما قارئة صامتة :P
بالنسبة للعمر انا ما بعرف لسا من اي نوع انا كوني لسا ما وصلت لنص العشرينات بس ما بتوقع انو بتفرق معي بالمرة
وحكيك صح الواحد لازم يحافظ على روح الشباب اللي عندوا
وعلى هاد الموضوع عندي قصة صغيرة
قبل سنتين لما كنت ادرس كان في تنين بدرسوني واحد كبير يعني بالاربعينات بس كتير روحوا شباب وبعرف يكون ممتع وكان دايما يقلنا انو بحس حالوا بالعشرينات وبالمقابل كان في واحد يدرسنا بالعشرينات تحديدا كان 25 بس كان كتير كئيب الله يسهل عليه
وكان دايما يحكيلنا انو بحس روحوا كبيرة( هو مفكر انوا هيك بسير حكيم lol
المهم ما تردي على اللي بحكوا بهالعمر... الخ

اكيد بتفكري كل هالحكي وهي مو عارفة شو بدها تحكي :s !!!!
وبس

 

Hana

شكرا الك اللي قررتي انك ما تضلك قارئة صامته مع انو بسعدني وجودك بكل الاحوال :)

العمر كله يا رب....

بعرف اكتر من شب بعد الزواج و مع انهم لسا بالعشرين بصيرو يتعاملو زي بابا كأنه هالحدث كبرّهم 100 سنه و مرات همه بختارو يعيشو هالدور

شفتي بس تبدي تعلقي لحاله الكلام بطلع

نورتيني :)

 

اول اشي العمر اطويل ...
تاني اشي مثل ما يقال ما العمر الا ارقام ..
وبالعكس قد يعني النضوج للبعض و يعني للاخرين اليأس ...
بحيي روحك الحلوه ... و نظراتك المتفائلة ... صحيح انو العمر مش حاجز يمكن لبعض شغلات لكن احيانا احنا بنصنع الحواجز ...
ممكن الواحد يبطل عن عادة احتراما لسنه لكن ,,, شو المانع طالما ما بتتعارض مع الدين والاخلاق ,,,

و بالنسبة للزوج ... مؤسسة بدها تأسيس و اتفاق للوصول لنتيجة ترضي الطرفين .. بعتقد في ناس لازم تفهم على الطاير و ما تورط حالها بمشاكل ... وكل ما الواحد تقدم فيه العمر زادت خبرته ,,,

و يعطيكي العافية ...

 

تسلمييييييييييي :)
منور بصحابو البلوج :)

 

يعني بصراحة انا بستغرب ليش الناس بتتحسس من موضوع العمر و خصوصا النساء ، يعني بشكل او باخر و برأيي انو احسن عمر هو عمر 30 لانو بهاد العمر الشخص بكون وصل للنضج العقلي ، و في دراسة بتحكي انو عمر 30 هو عمر الانتاج و الابداع !

 

I liked the post.. As they say, age is nothing but a number.. Do what u see is right.. Do not care.. We r living only once..

 

I liked the post.. As they say, age is nothing but a number.. Do what u see is right.. Do not care.. We r living only once..

 

كتير عجبتني الفقرة الاخيرة
لأنه عن جد أنا كمان حكمت هيك عأخوي و زوجتة،انه جد كنت مفكرتها مخها فاضي صراحة،بس جديد تبين الي انه جد افكارها حلوة و صحبتها ممتعة و انا حكمت انه زواجها عبارة عن اختيار سطحي لتنين حلوين و بس
بس هلأ بعرف انه مش كلسي زي ما هو مبين من برة

حلو كتير منك انك تراجعي حالك بالاخطاء اللي ارتكبتيها قد ما تكون صغيرة....معظم الناس بتكابر و لو عرفت من جوا انها غلطانة
So..my respects :) ;D

 

ah w nseet a2ool ino I think 30's are the best period in anyone's life,because you have some of the two sides:energy+experience :)

 

هاي قصة العمر مش موجودة إلا بمجتمعنا للأسف :( يعني معظم المجتمعات التانية بتلاقيهم ببلشو حياتهم و إنجازاتهم و أحلى فترات بعمرهم بعد التلاتين، أما إحنا، عنا لازم الوحدة ( و الواحد كمان أحياناً) يحس أنو صار ختيار و يبلش ينهم و ينغم و يضل منكد، سواء كان متزوج أو لأ!!!!
على كل الحالات، في كتير أشياء بعقول الناس لازم تتغير بس ما حدا بقدر يغيرها... يمكن مع مرور الزمن تصغر شوي شوي لحد ما تختفي .. ما بعرف!!! انتي اسمعي و طنشي...
على فكرة... انتي ذكرتيني بشغلة... أنا تخرجت لما كان عمري بآخر ال 22، و بعدها تزوجت و صار عمري 23... لهلاُ بس حد يسألني عن عمري بحكي 23، مع انو مر 3 سنين و شوي!!! و ولله ما بكون القصد اني بدي أصغر حالي، بس ما بعرف ليش ال 23 بتطلع أول، بعدين برجع أحسب كم صار عمري!!! :p:p

 

Finalway

اول شي اهلا وسهلا فيك :)

تسلم يا رب....فعلا للبعض بيعني اليأس و هالشي بياثر على كل شي بحياتهم

شكرا الك
الحمد لله ربنا رازقني بحياة حلوه و ناس بحبهم و معهم الحياة بتصير احلى

الله يبعد اليأس و التشاؤم عنا كلنا ومثل ما حكيت مدام تصرفاتنا ضمن حدود الدين والاخلاق فما شي بيمنعنا نعملها :)

بموضوع الزواج...اسأل محرب ولا تسأل طبيب يعني :)

الله يعافيك يا رب

Hana

الله يسعدك ... انتو صحاب المدونه اساسا, فيكم بتحلى اكتر و اكتر

 

W7l

اهلا و سهلا دكتور...زمان ما زرتنا :)

مش الكل بس ما بنكر ان في نسبة كبيرة بتتحسس و حتى مرات في رجال بتأزمو من موضوع العمر

بهالايام في ناس بوصلو ال 40 و ال 50 و لسا مش ناضجين :$

لكن فعليا.....بعمر ال 30 بتكون خلصت دراسة وبتشتغل الك فترة فكونت خبرة مش قليلة وتعاملت مع ناس مختلفين
و بالاغلب بتكون محدد شو بدك بالحياة و بتشتغل لتوصله

Tareq

Thanks...happy that u liked it :)
Sa7 :)
So we should live it as we want

 

Rain

هلأ اخواني و مرتاتهم كانو كتيييييييييييييييير كويسين و لكن مرتات خواني و اللي انا بحبهم كتير كانو يشكولي من اخواني .... انا بصف مرتات خواني من اول يوم :)
كان في حالة ملل حسيت و انصدمت انها بكير بدت

و لكن الحمد لله هلأ حسيتهم استقرو بحياتهم اكتر, هي العشره همه الاولاد ما بعرف
بس الحمد لله الحياة استقرت و الاتفاق صار واضح :)

شكرا يا قمر.... مرات بنتسرع بالاحكام وما بنعطي فرصه للي قدامنا و بنضل مصرين على الصورة اللي احنا رسمناها بخيالنا
الله يديم الاتفاق بين الجميع يا رب

هي الدكتور وحل فادنا بانه الموضوع صحيح و بناءا على دراسات :)
و بنفس تحليلك كمان ....شطورة

MrsH

الناس همه اللي بخلو الواحد يكتئب من تدخلاتهم اللي بدون معنى

بتتغير بس كل واحد يقرر يغير عقله و ينسى كلام العالم...هو يقرر و بس

ههههههههههه ضحكتيني يا قمر
انا عكسك تماما....حسيت اني ما مريت بال 23 بالمره, ما بعرف ليش كل ما كانو يسألوني عن عمري وانا بال 23 احكي 24 و استمر الموضوع لكل السنه ...فانتقلت من 22 لل 24 و ضليت بال 24 سنتين :)

 

ضحكتيني عنجد على موضوع عمرك اللي نسيتيه .. لانه انا في حاجة غريبة برضه مش بنسى عمري بس ما بعرف ليش دايما بزود سنة تقولي مستعجلة و بدي افتك .. حتى اختي بتقلي ليش بتعملي هيك بقلها ايش عملت تقلي عمرك هلقد مو هلقد و انا اطلع فيها و اقول اه صح هههههه

مسائك و صباحك فل الفل :)

 

كتبت تعليق ما بعرف ازا وصلك او لا :) فمشان ضميري يرتاح حبيت ارجع ابعتلك ياه :))

انا صاحبة الدعاء الشريرة ازا بتتزكري ...فانا مدينة الك باعتذار لانه مو قصدي ابدا اني ادايقك او اذيك...لكن بجد حسيت موضوعك هداك بخصني مشان هيك دعيت وكان الدعاء صادق :) بس مش بالصورة السيئة اللي وصلتك ...

فسامحيني وويلكم باك نورتي صفحتك ههه

 

Lovely post! I agree about the age; I feel younger than all my age mates :)
Allah yahddi serrek and your brothers' families. TC

 

WD

حبيبتييييييييييييي
اول شي كيف يكون عندك مدونة وانا ما بعرف عنها؟؟؟
اول مرّه بتحطي لينك المدونه :)

و تاني شي ما وصلني تعليقك من قبل
و تالت شي التعليق بوقتها كان من غير معرّف و جد حسسني بالذنب وانا ابدا ما كان بنيتي اني اكشف اسرار حد او اعكس صورة ان حياة خواني مش سعيده لانها مش هيك ابدا

شكرا لدعواتك و لا تحسي بتأنيب الضمير ...الصورة وضحت هلأ :)
و انا بعتذر اذا موضوعي دايقك هلأ او بوقتها :)

منورة بوجودكم يا قمر

Susu


Me too :)
And they feel it, they always say it is because I'm not married yet :$
Thanks for proving that they are wrong :)

Thanks ya amar....Same to u and ur lovely family

 

WD

هلأ كنت بمدونتك و....
O_o


كأنه...كأنه....كأنه بنعرف بعض :)

 

هديل

اسفه كتير...قرأت التعليق و لكن مش عارفة كيف نسيت ارد :$

اول شي اهلا و سهلا فيكي يا قمر و نورتيني
وان شاء الله تكون خالتو احسن هلأ و ربنا يشافيها و يعافيها يا رب

بس بال 23 هيك عملت :)
كبّرت حالي سنة بدون ما انتبه و لكن بعديها زي ما انتي ملاحظه صايره ارجع كم سنه :)

اللاوعي هيك بدفعني شكله :)))

مساكي و صباحك هنا و رضا يا رب

 

مش عارفة بتزكر اني اغلب المرات بحط اللينك :)



لا لا ...اشاعة

ولا بعرفك :)



:)

 

WD

لاني قويّة الملاحظه من يوم يومي ولا مرّه انتبهت الا امبارح :$

هيك انا برضه حسيت....انه لاااااا مستحيل تكون هي....ولأ لأ هالصور بس بشبهو الامامير الصغار بس مش همه اطلاقا مطلقا :)

اهليييييييييييييييييييين ام فهمي :)