Things I Like To Whisper About

Would You Hear Me Whispering

7 Random facts about me - Tag



تاج جديد.. هو بصراحه واجبين بواجب واحد من الاموره سارة و المعروفة في عالمنا التدويني ب Rain و الثاني من الاموره Bullet واللي من زمان مررتلي اياه وانا لاني كسلانه صايره اجلته :$
و قبل شوي قرأت دعوة من الغاليه وفاء برضه :)



هلأ ما بنكر ان في اشياء كتيره ما بتعرفوها عني, ولكن الصعوبه بأني الاقي 7اشياء تنحكي :)

1 - وانا صغيره كان عندي مشكله قضم الاظافر - عجبتني قضم :) و لأ هيثم مش مسموح تعلق على هالكلمه - ...مش حاله نفسيه ولا عقده ولا كلاكيعو - لسا ممنوع التعليق هيثم - بس انسجام مش اكتر :) و كانت ماما تحكيلي اني حكبر و اظافري يصير شكلهم بشع و كبرت وكل شي تمام والحمد لله فيا صغار لا تصدقو ما بصير اشي بالمره :)

2- بكره حد يحكيلي اعمل شي انا كنت ناويه اعمله , بعرف ان الكل هيك بس انا مبالغ فيه الزعل لدرجة اني ببطل اعمله و بلغي الموضوع تماما...بفكر فيها بعديها بلاقيني بالغت بردّه فعلي لكن كل مرّه هيك بصير.

3- كتير بيجيني حاله مود الاسترخاء, بكون جاي ابالي احضر فيلم حاضرته 100 مرّه و بحبه وحافظه قصته بكل لقطه بس هيك اتفرج و انبسط , زي فيلم موتنج هيل, اوتم ان نيويورك, اونلي اف, تو ويكس نوتس

4- بحب العب بشعري بس اجي انام, بضل العب بشعري لاخر لحظه قبل ما اغفى, فروحه هيك بتحب حد يلعبلها بشعرها و مميتي شافتها بتحكي هاي طالعه لعمتها - اللي هي انا :) - انصدمت, بحكيلها كيف عرفتي!! طلعت عندي هالحركه من ايام الطفوله, و كتير مرات بتكون ماما قاعده بحط راسي بحضنها و بتضلها تلعبلي بشعري, انا فكرت الكل هيك, لحتى مرّه بلعب بشعر بنت خالتي الصغيره و حسيتها متدايقه , وطلعت بتكره حد يمسك شعرها :)

5- انا اجمالا طويلة بال مع الجميع ومع الصغار بالذات....بس فروحه تناديني "ناني" او عبود يناديني " مانا" بعرفش شو بصير فيي و اي شي بطلبوه مني بصير اوامر وبالعاده نلعب باغراض الشاي و الطبخ انا و فروحه او نلعب بال " كوا" اللي يعني سياره و "تومو" اللي هو القطار توماس مع عبود, مستعده اترك اي شي بعمله و العب معهم

6- بس اكل اي شي بحدد الجزء الاكثر زكاوه فيه و بحاول اكل من الاقل زكاوه للاكتر زكاوه, ممكن اكل القاع قبل الوش حسب الترتيب و نفس الشي بالمكسرات, فستق حلبي بعدين لوز بعدين كاجو :)

7 - ما بعرف اقشر اي نوع من الفواكه او الخضار...تفاح ...برتقال...خيار...اي شي بقشره بقشارة البطاطا :) ولكن - علشان ازبّط "الايمج" شوي - انا حرّيفة محشي كوسا :) حفر و حشي بدقائق معدوده .....يعني المحاشي لعبتي :)


التاج لازم ينتقل ل 7 وهالشي هو اللي بحتار فيه :$

انا حختار و اللي بحب يعمله يعمله واللي ما بحب يعمله هو حر ....لكن راح يضل مسجل علامه فاضيه مكان اسمه :)
وهي فرصه لنتعرف على بعض اكتر :)


العسل صاحبه مدونه جرات عسل






سوزان اللي بضلي ازعجها بهالقصص لانها بتضلها تغيب عنّا


مياسي :) علشان تضلك تتزكريني


Jaraad - لحتى نتعرف عليك اكتر اذا بتحب :$


و اخيرا وليس اخرا... قط البكتريا لانّا برضه من زمان ما سمعنا صوتك


و سلامتكم :)

21 التعليقات :

رقم اربعة زيك بالزبط
و استغرب لما احد يتضايق من احد يلعب بشعره, افكر اوظف احد بس لهادا الغرض ههههه

شفتي في ناس كانوا دعينك قبلي بس شكرا برضه على قبول الدعوة

:)

 

اهلين ويسبر
انا بمر على التدوينه كل يوم بس ما بترك اي ملاحظه لانه والله مشغوله عندي امتحان ونفسيته شوي تعبانه ادعي لي الله نجحني في الامتحان وان شاء الله رح اعمل الواجب

 

LOOOOOL t7sheesh whisper,I love ur sense of humor
I loved no. 3 <3
and I thought I was the only freak who did no. 6 hahahahahah

sho ra2iek tdaw2eena m7ashy min t7t edaiky tayeb *smiley Um Omar*

 

رقم (2) أنا زيك بالزبط، ما بحب التوجيهات والاوامر وببطل أعمله وبحرد.
كمان رقم (3) بحب اعمله :)
وأنا كمان بموووت ب تو ويكس نوتس :)
رقم (5) ما عدي منه وبضوج بسرعة من الصغار!
أما شغلة الزكاوة فهاي بصراحة interesting!!!
رقم (7) محشي؟ لو انك عند امي بتكيف عليك، أنا بالاكل ولا الي علاقة!

 

Wafa'

بعتقد ان اللي بتدايق هو الحاله الشاذه....اذا عبود و فروحه بنبسطو و بس اوقف بصيرو يحكو ...كمان :)

شكرا الك يا قمر عالدعوه :)

Sozan


ربنا لا يضيعلك تعب يا رب
و ان شاء الله بتنجحي و ربنا بيسرلك كل الامور

سلامة قلبك و نفسيتك....فترة و بتمشي و ان شاء الله ما بصير الا اللي بدك اياه
طبيعي من فتره لفتره تأزم و ممكن تطول و لكن ما بعد الشدّه الا الفرج باذن الله

 

Rain

Thanks ya amar...had bs men zo2ek ya rab

WE LOVE MOVIES :D

LOOL laa had 2esmo ta56eeeee6 :P

walaw wala yhemmek...2elek 3endy 6ab5et m7shee bs 2arja3 3al 2ordon inshallah :)

meen Um Omar!!!!

KiKi

انا ممكن توصل للحرد...جد بحس مبالغه بس خلص ما بقدر اسيطر

يمكن حضرت هالفيلم 30 مرّه :)
البطلين افلامهم بالعاده بجننو

جربيها...بتنبسطي اكتر بالاكل :)

مهو انا تعلمت لان مميتي حبيبتي عندها ديسك برقبتها وما بتقدر تحفر و تحشي ...فصارت وظيفتي انا :)

عفكرة ...انت عندك واجب من البوست اللي قبله :)

 

من الأفلام اللي ذكرتيها بحب بس فيلم نوتنج هيل وهو من الأفلام اللي بحبها كثير لأنه مصور ببريطانيا.ـ
بالنسبه لتأخير الأكل الطيب هاي الحاله بسموها
delayed gratification
وهاي خاصيه كويسه لأنها بتبين انه الأنسان بقدر يتحكم بحاله
حريفة محشي كوسا يمكن تتصدق بس "بدقائق معدوده" هاي شوي كبيره :)ـ
وشكرا على التاغ. سوف ندرس الموضوع :)ـ

 

كل مرّه بكون جد جاي ابالي احضر نوتنج هيل
سبحان الله بعرضوه بنفس الليله :)

واضح عشقك لبريطانيا و للّكنه البريطانيه :)
انا مش كتير بفضلها بصراحه :$


الها اسم علمي!!!
جميل هلأ بقرأ عنها شكرا للتوضيح


مهو ال 60 دقيقه يعتبرو دقائق معدوده :)

العفو و شكرا لاعطاء الموضوع فرصه ولو بس للدراسه :)

 

حكتيلي مين إم عمر

:سمايل أبو قنوة:

ليش بتحبي أفلاماتي,, اه ليش
ضيفي عليهم ,, بروبوزال.. ليك هاوس,, ذه نت.. وكم فللم عربي تحشيش


بحب حدن يلعبلي بشعري,, زيك كمان

بالنسبه ل قظم الأظافر,, عموره وصل مفاصل ايديه من كتر ما عنده هالعاده,, متعقده انا منه
بس شكرن لإنك اعطيتيني أمل إنه يبطلها


مين إم عمر اه,, بقبوقه,, لازمن نغزو عليها بس تيجي ع الاردن

:k:

 

طبعا ً لازم أعلق بطريقة شبه شريرة...

ف ...

1- حأرضخ للأوامر و ما أعلق (على فكرة "قضم" كلمة فصحى و ما تردّي على نكتة قضم يقضم و مشان هيك سموها قضامة) :)))

بس "انسجام" <== قال انسجام ،،، فكينا من قصصك! هيهيهيهييييييييي

2- women!

3- مش لاقي إشي شرير! له له له

4- women! again

5- مشان هيك كل ولاد و بنات الحارة مشوهين ! × _ ×-

6- بنعرف إنك فجعانة أولريدي!

 

UmmOmar

مهو...اممم...شوفي شوفي الديناصور اللي بطير هناك :)

صح ليك هاوس..كيف نسيته هاد

Sandra Bullock
انا بحبها كتير و بحب كل افلامها ...
وفي كمان
Love Potion No. 9

لا تطمني لحالها بتروح بس برضه واجبك تزهقيه عيشته و تضلك تلفتي نظره :)

اهلن و سهلن فيكن :)

 

Sheeshany

1 - يعني ما قدرت تقاوم و علّقت

2- O_o

3- اي يالله عااااد
ويلا شكلها مشتركه هالصفه!!!!
لاااااا ما تقول :$

4- :)برضه...اي يالله عااااد

5- اه من كتر الهدايا اللي برميهم عليهم من الشباك :)

6- فجعانه!!!
الملافظ سعد يا هيثم

 

كشفتني
كل افلام ساندرا بوليك

الفلم اللي بتحكي عنه اللي بجي فيه الممثل
ادريانو بوول
ينعن عن عن
أيام ما نزل هالفلم,, كان لساته مسلسله " المخلد" بعرض ع التلفيزون

:dream:

 

ايوااا بالزبط :)

عأساس اني بعرفو مش اني دورت عالجوجل لا ابدا :)

مين "المخلد" هاد !!!

انا بعرف ليالي الحلميه...الشهد و الدموع
Max Headroom
Thirty something
Quantum Leap

يااابااااييييييه زكرتيني بايام زمان :)

 

مسا الخير ويسبر , يعطيكي العافية عالبوست
شويّة تعليقات بسيطة بس

1 - انا عندي مشكلة مع الاظافر , بس مش قضم , لما امسك قصاصة الاظافر , بسفّح فيهم مزبوط
:S

2 - اعطينا مثال بعد اذنك

6 - انا بالزبط بعمل هيك
:/

7 - بس ما تحكيلي انك ما بتحفري الكوساية للآخر
:sad:



يعطيكي العافية يا رب ويسلمو ايديكي

 

مسا الورد

1- وجعتلي قلبي :$
بكره بس يصير هيك ما بتعرف تمسك شي بعدها

2- كتبت مثال و بعدين شطبته...مهو هلأ ببين مش محرز الزعل :)

6- شكرا لصديقنا جراد اللي حكالنا انه اشي منيح اللي بنعمله :)

7- مهو احنا بنحبها هيك :)
بس اذا مميتي بدها احفرها للاخر بحفرها ولا بهمني انا و اذا كل القاع اشيله برضه ما عندي اي مشكله
شكله في ناس بعانو من هالشي :)

الله يعافيك

 

ويصبر
يا ويصبر
اذا بدي اكتب زي ما بدك انتي
بفضح حالي خخخخخخخخخخخ

بديش اكتب انا وبطلي كركطة اضافرك

 

thanx 4 the tag whisper ....:-)

 

قط البكتريا

اخيرا زرتنا...طولت الغيبه

اكتب وما يهمك...ما حد بعرف غير الكم مليون اللي عالنت

Orangee

U most welcome :)

 

رقم 2 - متلي بالزبط !! بكرة هالشي كتييير

رقم 5 - حلو كتير الله يعطينا طوله البال اللي عندك (: أنا مش كتييير مع الأطفال بمّل منهم بسرعة

رقم 6- عجبتني الفكرة بدي شوف جربها (: مع أنا والأكل مش صحبة

رقم 7- أنا عكسك هون ههههه مابعرف احشي ولا من يحزنون واذا حشيت تعي شوفي كم كوساية بتنتزع من ورايي (:

قريت كل التدوينات اللي فاتتني (: والله يعطيك العافية يا غالية

دمتِ بألف خير ووّد

 

Bullet

شكلة كلنا بنشترك بهالنقطه :) بنحب الافكار تطلع من راسنا احنا

امين يا رب....هي مرات بتقصر لكن الاغلب طويلة بال
يعني بعد ما اعيد الاغنيه لفرح 50 مرّه طبيعي تقصر :$

جربيها باي شي بتاكليه ...بتزيط

الحمد لله على سلامتك وان شاء الله تكوني توفقتي بالامتحانات

وجودك دائما بسعدني يا قمر