Things I Like To Whisper About

Would You Hear Me Whispering

العيد مع الاقارب





اول يوم بالعيد بالامارات بكون بالعاده تجمع لكل افراد العيله المتواجدين بالبلد و بالعاده بتكون عزومه ببيت شخص منهم وكل واحد من المدعوين عليه بجيب معو شي بحدده صاحب العزومه , اخواني مثلا واحد كان عليه يجيب الحلو, جاب اشي اسمه حلو ملوكي بالقشطه, طعمه اشي خيااااال بصراحه, و اخوي التاني كان عليه الحمص والفلافل و هالاشياء و الخزعبلات كلها اللي بعملها عمو صاحب المطعم :) فول , مسبحه, باباغنوج, متبل, حمص بالفول - مش متزكره شو اسمه - بس اشياءات كتير زاكيه ,لان الجو حلو كتير هالايام فالعزومه كانت بالهواء الطلق, وصلنا متأخرين طبعا بسبب الصغار, عبود قرر يعمل اشي و احنا بالسياره فرجعنا لنغيره البامبرز :)

بس وصلنا انصدمت من عدد الاشخاص الموجودين و عدد الاطفال ما شاء الله, همه قرايبنا من بعيد و من جهة ماما, نص الموجودين ما بعرفهم, الجو اجمالا كان غريب, جايبين مايكريفون وسماعات و اشي بغنو واشي بحكو نكت و اشي حاطين اغاني, بالبدايه كان دمهم خفيف بعدين ضوجونا بصراحه, صغار بنطو وبلعبو وبتقاتلو وببكو وبضحكو و الشباب بغنو و بتخوتو, المشكله وين كانت يا حزركم!!! لا مش بأي شي من اللي حكيتو, المشكله بصبايا العيله و بزوجات القرايب, ايش فييييي!!! جد ايش مالهم؟؟؟
عايشين الدور بطريقه غريبه, واي دور مش عارفه, مالك يختي منك الها, ايش الألاطه و شوفة الحال هاي وشو بالنسبة للخنف و للحكي اللي بطلع بالعافيه, جد جد الله يرحم جدك منك الها.

اكيد لازم تحكي مع ابنها بالانجليزي لانه العربي يك مش كول بالمره و شوي على فلجر بيجي, المشكله ان في وحده منهم كانت معي بالجامعه وكنّا صحبه كتير وبعرفها وبعرف كيف بتحكي, و كل سنه بس اجي عالامارات واشوفها لازم تسوي حالها مش عارفتني :$ طيب ليش يعني؟؟؟ اصلاطن قلّة ذوق و بعيد كل البعد عن الادب انك تبين بكل طلاقه انك مش عارف اللي قدامك وخصوصا بس يكون هو طيب و على نياته و يقبل عليك زي ما انا عملت :( يعني مستحيل كل مرّه تعملي حالك مش عارفتيني و بس شفتي مرة اخوي اللي هي بنت خالتك تحكيلها طيب قولي انك متزوجه اخو "ويسبر" !!!! طب ما انتي عأساس ما بتعرفيني هلأ صرتي تعرفيني؟؟؟؟


اوك بلعناها و بدينا نتحدث , بنحاول انا ومرتات خواني نحكي مع الموجودات - مرة اخوي بتكون بنت خالة بعض الشباب و الصبايا الموجودين وبرضه مش عارفه تنسجم - كل ما نحكي ما بناخد اكتر من هزّة راس وفي وحده عروس جديد حامل بالشهر السادس , من باب فتح المواضبع مرتات خواني بحكولها عن تجربة الحمل لاول مره و بنصحوها و الرد كان جمله طويله عريضه تبين مدى خبرتها للاخت وانها ما بدها حد يدلها مع انها هي اللي بتشكي, قاعده الاخت و محملتنا جميله بحملها مع ان مرتات خواني وحده والدت قبل شهر و التانيه حامل بالشهر التاسع و هي بس قالبه خلقتها بوجهنا , اللي انسجمت معهم همه ضيوفهم, الضيفة التونسيه اللي بتكون حماة واحد من قرايبنا و الضيفة اللبنانيه اللي بتكون اخت واحد من ازواج القريبات :) الباقي بس نظرات من بعيد لبعيد

ما بعرف ليش المغتربين بالخليج خصوصي بفكرو حالهم اشي كتير صارو!!! ليش يختي الخنف وليش تغيري صوتك وطريقة كلامك!! يعني لو بتشتغلي ماشي لانه بتضطري تحكي انجليزي كتير وبنحكي متعوده و زلة لسان, بس انه بطلتي تعرفي المصطلحات العربيه و بتستخدمي انجليزي مع ابنك و بس يعملها على حالو ابوه يحكيلي " شخيت" - بعتذر عالكلمه بس بدي افرجيكم مدى التناقض - هيك كلمات بلا منها , وبس احكيلك وين الفحم تطلعي علي من فوق لتحت و تحكي لابنك " مامي كوكي جيب الشاركول لآنتي " فأنا اكيد مضطره احكيلك.....يرحم جدك :)

المهم ان العيد كان حلو لان ختامه كان مسك , روحنا و قعدنا بالحديقه شربنا قهوتنا و تحدثنا وحكينا و تذكرنا ايام زمان و كتييييييييييير ضحكنا و ضلينا نلعب مع فروحه و عبود بال Bubble Maker"" عرفتوها!!
هديك ال stick اللي بتعمللها "هفت" بسير يتلع منها bubles :)
بتعرفو اسمي الي اكتر من اسبوعين بالامارات فااااااا انعديت :)


28 التعليقات :

ردا على آخر جملة.. يرحم جدك :)

 

هههههههههههههههه
الله يرحمهم جميعا :)

زمان ما نورتني جعفر وما كتبت بمدونتك اشياء جديده
ان شاء الله المانع خير :)

 

الله يرحم جد جدك
هلا ما بدي احكي عن المغتربين عموما بلاش يزعلوا ....لان مش كلهم هيك
بس اجمالا بكره الامهات اللي بيحكوا انجليزي مع اولادهم ...خصوصا الانجليزي المكسر...اللي لا في نطق صحيح ولا في قواعد ولا محادثه....هم كم كلمه حافظتهم الله يرحم جدها وجايه تستعرض على العالم فيهم....باقي السولافه يا قمر ما الها غير,,,,ما بتلاقي المنافس الا على الخنافس!!!!:))) فهمتي
المثل؟؟؟ واللا اترجملك اياه بالانجلش :)

 

هههههههه مش طبيعي
زكرتيني بما مضى:))

ياختي اللي هون يا دوب ينحكى معهم كيف اللي بره:)


عن جد تحفه:))
هلأ طبيعي بره تنسجمي مع ناس مش اردنيين

كوايت نورمال ماي دير

تدوينة بطعم الامارات جد:))))

 

looooooooooooooooooooooooooooooooooool 3la 2ad ma el post tg3...bs lessa ma enshafa `3alili mn el niswan bl khaleej...enno 3la aish kol wa7deh btshoof 7alha wo ma betsadde2....betkon tal3a mn aktar 3aileh 7afartal bl ordon wo bs teje 3al s3odeyyeh aw 3al emarat betseer wla ka2enha el monaliza b zat-ha...lessa lessa yama 7atshoofi mn hal ashkal...fi wa7deh bn3rafha mn ayyam el jam3a...3omorha ma `3ayyarat hal blozeh wel bantalon..halla2 jozha mashallah wad3o merta7...ma bteshtri ella mn a`3la el markat...wo bet2ollak t3awwadna 3alaihom...abooha esmo mej7em ... fa lamma nezlat 3la 3amman ejazeh eshtarat la mej7em sa3a b 900 dinar hadeyye !!!!!
lessa yakhti yama tshofi...wo 3la fekra kol ma el taraf el tani kan (mo7dath ne3meh) kol ma kan tasarrofo a`3ba mn haik lessa :D welcome to the gulf :D

 

ولك حبيتك حبينك يا بنت
بالنسبه لطلعه العيد عنا كانت عباره عن هش ونش
وانسييييييييييي
الي حكيتي شكلو بتكرر بكل ئعده
هههههههههههههههههههههههه
شفتلك كم شوفه كانت بتتلخص انو عدد منيح من الموجودين ما كنت بعرفهم وهاتو يا بنات احكو انسجمو مع بعض
انسي لا حياة لمن تنادي
ليش هيك بسيرو يا خيتي مش عارفه بس يلا الله يعين كل واحد على عئلاتو
:))))

 

ههههههههههههه ويسبر بتجنني والله مااحلاكي
استمتعت كتير وانا اقراء البهدله اللي ببهدلوها العرب لانفسهم بتناسيهم عروبتهم واحساسهم وانتمائهم للغتهم شي كتير مريع والله بس الحلو في الموضوع انتييييييييييييييي
بحب اسلوبك وتعليقك اللاذع بس بجد قريب للقلب

بعدين هي الحاله ياعمري بكل مكان في انسلاخ من دينا وعروبتنا ولغتنا وللاسف هي حاله متفشيه والله الشافي


دمتي ياقمر بكل الحب
تحياتي الك

 

برضهّ همّه الثانيين ما يشدو على حالهم هيك

:D

عالعموم كراهيتي للمصطلح بتيجي من استخدام معين اله
زي هاذ الكاريكاتير

http://photos-f.ak.fbcdn.net/hphotos-ak-snc3/hs194.snc3/20172_107561839256902_100000092589041_205178_2173418_n.jpg

يعني في ناس عالطالعة والنازلة كل ما سمعت كلمة برّة السياق , بحكو هالكلمة

اسف طلعت برة الموضوع شوي
:D

", وبس احكيلك وين الفحم تطلعي علي من فوق لتحت و تحكي لابنك " مامي كوكي جيب الشاركول لآنتي "
"

هون حسيتك راح تضربيها بقفا ايدك تهيّلي سنانها

شاركول قلتيلي اااااااه
:D:D

 

" مامي كوكي جيب الشاركول لآنتي "
حلوه
لو أنه الكلمه الأنجليزيه اسهل بالنطق من العربي بنجمطها شوي بس كيف الشاركول صارت اسهل من كلمة فحم
ولو الكانت الكلمه العربي مش دارجه كثير بنمشيها بس طول عمرنا بنحكي عمتي و عمتو صارت آنتي احسن هسا؟
بس لاحظت كيف انه الأب حكى "شخيت" بعفويه. اللي بلاحظه انه الرجال اقل تصنع من النساء. انا لاحظتها هون بين العائلات العربيه الرجال بين بعض علاقتنا كثير سهله ما فيها تعقيدات ابدا بس بين زوجاتهم في معارك طاحنه. وكل ما نطلع عائلات بحس الجو مكهرب لما نطلع شباب مع بعض ما في حدا بحاول يتصنع ابدا. أرجو انه كلامي هاذ ما يؤخذ علي. انا ما قصدت انه الرجال افضل من النساء. اللي بفرق بينا العمل الصالح. بس هاي كانت ملاحظه عابره وقد اكون مخطئ فيها.ـ

 

Naysan

امين يا رب

اكيد مش كل المغتربين هيك, ولا كل قرايبي هيك علشان ما تختلط الامور :)

لا هدول بحكو بالاكسنت كمان بس شو يعني!!!!

ما فهمت :$ جديد هالمثل و مميتي من غير شر مش هون لاسألها :(

بالانجلش لو سمحتي....بتعرفي كل واحد وعلامه ;)

مياسي

هو اي نعم في خنف و من هالاشياء بالاردن بس هون جد بفكرو حالهم اشي كبير و وااااو O_O

انت اللي بتعرفي بهالنكهات ماي دير :)

مع ناس مش قرايب يمكن الانسجام اكبر بكون

 

انا على راسي البابيل ابصر شو ، يعني انا اللي بقهرني هدول اللي بعملو حالهم كثير كوول و بنسوا اصلهم ، و لكم الله يرحم جدكم اللي كان يفكر عبدون بنت، و لا اللي بقهر اكثر هدول جماعة العربي انجليزي ، يعني يا بتحكي معي حفرتلي عربي أو بتحكي معي انجليزي فلونت أو بتحط حبة ملبس بتمك و بتسكت

و سلامتكم
قدسية اسمها الحمص بالفول ، اي ثينك ايم نت شوور

 

مواطنون

Shaklo elmawdoo3 2aja 3alwaja3 :)
bs jad kteeeeeeeeer shyfeen 7alhom w 3aysheen edoor 3al2a5er

mazaher kazzabeh w men jwa ma fe shee b7 ... w bel3adeh halshee la2enhom most7dethee ne3meh w mesh me3awdeen 3ala hal3esheh

LOOL @ mej7em mesh 3al2esem bs la2enny kont msamyeh el Bluetooth 3almobile Mej7em 2abel Whisper :D

ميسم

حبتك العافيه يا رب :)
اه صح ما انتي عانيتي مثلي هالعيد وبين نفس العالم تقريبا :)

جد بقلبو اشي غريب هالبنات بالغربه :$
كتير مقهوره انه ما زبطت نشوف بعض :( امبارح كنا بأبوظبي و تزكرتك

 

Toota

اهلا و سهلا فيكي وكل عام وانتي بالف خير يا رب :)

تسلمي يا قمر...شكله الكل معاني من هالموضوع والكل كاتم بقلبه :)

اي انتماء يا اختي....هلأ الموديل نحكي كل شي مكسر لا عربي ولا انجليزي هيك لحتى نفقد هويتنا و نضيع بالنص

و مفهوم ال
open mind
صار انو تقبلي كل شي ضد الدين والمبادئ والعادات لحتى تضلك كوول على طوول :)


حبتك العافيه يا رب...و مرورك دائما بسعدني و مبسوطه انك استمتعي بالقراءه

Abu Zaina

الكاريكاتير تحشيش...كلها بمكانها كاريكاتيراته لاسامه حجاج

في ناس مملين هيك بعرفهم هالعالم و فعلا بنكرهو

بعد تعليقات البوستات اللي بكتبهم بمدونتك فخود راحتك عالاخر هون :)

هو في منو لكن بتعرف لسا كنت مش ماخده عالجو كتير :)
ما بتعرف اختك بس تاخد عالوضع....شريره درجه اولى :)

شفت...انا تقلي شاركول!!!
هلأ هاي بدها يرحم كل جدودها للجد السابع عشر ويلا ما بدها!!!

 

Jaraad

هالايام كلمة خالتو وعمتو صارو يختفو من قاموس الصغار, اذا الاطفال ما بحكو آنتي فهاي مصيبه عند بعض الناس

وهو كمان عفويته كانت بزياده :$

انا معك بوجهة نظرك, المعروف للمعظم ان في حرب بارده دائما قائمه بين الستات باي تجمع, و الرجال - الرجال الحقيقيين- بكونو ابسط بتعاملاتهم
الستات بحبو يحللو و يدققو بكل كلمه
لهيك بتعبو و بتعبو اللي حواليهم

طبعا بدون تعميم :)

Tareq

Thanks :)
Hope ur Eid was better :)

w7l

بالعاده بكونو بدهم ينسّو العالم اصلهم و بكونو همه الوحيدين الخجلانين منه

بضيعو بالنص لا بلاقو حالهم بالجديد اللي برسمو حالهم فيه و لا بقدرو يرجعو

هو احسن شي يسكتو شكله :)

ايون....قدسيه :)
اي ثنك يو ار رايت

 

أي هي وقفت على أهل الخليج؟ ما اللي عندنا هون بطلوا يعرفوا العربي. ذكرتيني مرة دخلت السيفوي وكنت بدي سلة عشان أحمل الأغراض فبسأل الموظف: وين بلاقي سلة؟ فرد: الباسكيت هناك!
آل يعني باسكيت أهضم وأرقى من سلة!
كل عام وانت بخير :)

 

t7sheesh el 3adeh...
isma3y hadool el niswan enty bs emsekeehom ana baballesh shalalee6 :)

 

على رأيك الكل صاير يتفنن بأستخدام الكلمات الانجليزيه و بأي جمله

الشب بدو يبينلك انو مثقف ...بهالباسكت هو بفكر انو وصلك رساله مفادها....انا بفهم و كوول بنفس الوقت :)

وانتي بالف خير يا رب :)

 

Rain

Hahahahaha allah yes3ed 2yyamek ya rab
da7ktenee men kull 2alby 3ala shalalee6 :D
bedhom bsara7a

w ana ma b7eb kelmet 'niswan' bs labe2telhom :)

 

خلينا نشوفك لما يصيرلك أربعين يوم و تصيري منهم كيف بدك تصيري تحكي؟

المهم ما قلتيلنا: جاب كوكي الشاركول لآنتي و إلا كان نوتي و ما سمع الكلام؟
:-)

 

ههههههههههههههه وكمان هههههههههههه
يبعتلك الهنا يا ويسبر
ظاهرة منتشرة وبقوووة , أنو ليش؟ الله أعلم .. بس بتوقع عقدة النقص عندهم+ شوفة الحال كمان بتعمل عمايلها + اذا عندهم كمان شوية مصاري = بتكمل !!
يأختي في ناس بس أقعد معهم بحس حالي أني (ع حسب تفكيرهم يعني) أني من زمن الجاهلية و أو بينظرولك بشكلل مقزز و أنو أنت مكانك تحت التراب !!!!
بس بجد الله يعينهم ع حالهم !

يعطيك العافية , يعني ضحكتيني ع الآخر (:

 

Saleh

اول شي الحمد لله عالسلامه و ان شاء الله تكون حققت مرادك بفترة الاجازه :)

لااا لا تخاف علي....عندي حصانه ما بتغير ابدا :)

كوكي....اللي هو راكان كان نوتي وطنش امه و ما رد و ابو كوكي زي الشاطرين راح جاب الشاركول :)

Bullet

امييييييييين :)
ربنا يسعدك و تبقى هالضحكه على طول ان شاء الله

فعلا كل هالعوامل اللي ذكرتيها من الاسباب اللي بتخليهم يتنكرو لاصولهم و يتصنعو بتصرفاتهم

الله يعافي قلبك يا قمر...و دائما بتسعديني بتعليقاتك :)

 

3ala fekra ya whisper msh kol niswan el 5aleej hek so la te7komy ... coz ana hoon b dubai w b american school la2eno lazm akoon b american school la2eno elly ma by3raf y7ke english b hai el balad yroo7 ynte7er a7sanlo .....

bs hada el shi ma by3ne enu\y a8ke m3 ahle bl english kol makan elo w kol wa2t elo taree2to bl kalam y3ne ana ma ba2dar a7ke 3araby bl madraseh bs 3shan ana mn palestine wella jordan fe zoroof bt7kom

bt7komek keef t7ke
w ymkn hai el mara elly bt7ki 3nha tl3at m3ha el kelmeh bl '3alat law 7ata ma btsht'3el momken te'3lat w tetla3 m3ha kelmeh bl english ma beseer shi y3ne ...
so la t7komi b shikl 3am w ya ret el neswan ybatlo y3al8o 3la ba3ad coz 3eeb hada el kalam ro7i e7keelha b wejha eza kteer mo 2adreh t5aby b albek :))

 

واضح إنو منسوب الغيرة زايد عندك... شكلو من أم عمر؟؟؟؟ :P

لا تغار منهم يا ويسبر، هم اآن في مرحلة تقوقعية "ما" و إنت لأ,,, هاظ هو السبب :]]]]

بالنسبة ل "خنف" هو صحيح أنا زرقاوي بس و الله ما فهمتها :حيراااان:

 

Anonymous

2awalan 2ahlan w sahlan feke hon w kteer sa3edeh bt3leqek :)

Ana men 2elly bkraho elt3meem b2ay she bel7ayah w 2akeed ana hon ma b3ammem , w fe banat kteer b3rafhom fe dubai ma bten6abek 3alehom hal2essa mart 2a5oy mathalan w fe sadeqat w mo3alekat metel WD w HB 2elly kteeeeeeer 2esht2t la t3leqat-hom belmonasabeh :)

elmawdo3 2enny b7ke 3an nas b3rafho w t3amalet m3hom....3'eer 2enno el2eshe eltelqa2e bekon mbayen wel tamtheel bardo bekon mbayen.

2a5er faqara tohet been sho3oreen
niswan... w 7aseetny besaf tane ba w 2enty m3almte :)
3akolen la t5afe 3aly ana men elnoo3 elly degne dagatak el3afyeh....bel3arabee 7aketelha 2elly b2albe 2akeeeeeeed :)

shokran marra tanyeh 3alta3leeq wel zyarah :)

 

Sheeshany

ايون ...هي الغيره ..وشو غير الغيره اللي بتعمل فينا هيك احنا البنات


ان شاء الله تكون انبسطت عالرد لاني خلص مش قادرة استمر برفع معنوياتك :)

تقوقعيه!!! والله يا خوي يا هيثم انا حاسستها مرحله انفتاح مفاجأه و من الصدمه الشباب تاهو بالنص :)

ما بتعرف الخنف!!

هو بس البنت -وهالايام صار الشباب - يحكو من اول مناخيرهم, مش من طرف المنخار لا من اوله, بتحس حاله زكام و ان منخارهم غير مستخدم



اييييييييوه زي ما جربت انت هلأ بالزبط...هاد الصوت اللي بحكي عنه
:)

 

ويسبر: إنت بتعرفي قديش منسوب الشر عندك الآن؟ يعني خلينا نقول فوق المعدل ب .... مليون

"ييييييييوه زي ما جربت انت هلأ بالزبط...هاد الصوت اللي بحكي عنه"
أم هيام بلشت تشك لأني ظليت أضحك و أضحك و خصوصا ً على آخر جملة (بعاليه) يعني above يا ... مش نخف لوول

معلش يا ويسبر، اللي زينا ما إلهم إلا الله و خبز الجيش

 

ههههههههههههه.....هلأ بس عرفت :)
بالعاده بحكو عني ملاك يمشي على الارض
هو مش بحكو عني...هو انا بحكي عن حالي :)

و شو بدنا غير رب العالمين يكون معنا :)