Things I Like To Whisper About

Would You Hear Me Whispering

ظاهرة "واعظات" بيوت العزاء



كتير ستات صايرين يحضرولهم كم من محاضره عند داعيه او حتى مش ضروري يتعبو حالهم ويطلعو, بفتحو التلفزيون على محطه دينيه و بسمعولهم كم من حلقه لبرنامج لشيخ من الشيوخ الثقه و بعد فترة بتعتبر نفسها مؤهلة لانها تصير تعطي دروس دين و مرات ممكن تفتي و تقرر شو الحلال و شو الحرام بناءا على ثقافتها اللي وصلتلها والللي بنظرها قمّه و خاتمه للعلم.

هلأ انّا نحضر محاضره بالعاده بتحرّى الشخص انها تكون ثقه و متأكد من خلفيتها الدينيه للداعيه ليعرف مدى استفادته من هالمحاضره - مع اني قبل فترة حضرت محاضرة لربى قعوار الله يهديها و كتير تأثرت بكلامها وقتها :( - ولكن مرات بنفرض علينا انّا نسمع لمثل الصنف الاول في بيوت الاجر, بتيجي وحده من هالجارات او القريبات او حتى ادلاء الخير على هال"واعظات" - او شيخه هيك بنادولهم - بتبرعو بأنهم يدلو عليهم او مرات يترجوهم ليجو يعطو درس دين للمعزيات , حتى يكون الكلام كله بالدين و يبعدو الستات عن الحديث - واللي صاير مشكلة العصر هالايام عدم احترام بيوت الاجر و خصوصا بالنسبة لصغار السن

المشكله ان في ستات من اللي حيسمعو كلام هال"واعظه" حيقتنعو فيه ومش هون المشكله...المشكله انهم راح يتناقلوه بينهم و عأساس انه حقيقة ثابته ما بصير يتشكك بصحتها.

بتذكر لمّا توفت قريبه النا اجت وحده من الجارات و صارت تحكي درس , اسلوبها جدا بسيط ولكن مناسب لبساطه الموجودين ومخاطبه مباشره لعقولهم, حلو وعادي و لكن حكت اشي غريب , ان ملك الموت عزرائيل , ان جسمه عباره عن عيون بعدد البشر و كل ما حد توفى بتتغمض عيونه على جسد عزرائيل O_o الستات كلهم انفعلو و بدو يسبحو و يكبرو ويهللو, انا انصدمت بس ضليت ساكته, مرة ابن عمتي ما شاء الله عليها انسانه رائعه خلقا و خُلقا , جميله من الداخل ومن الخارج, ابتسمت و سألتها طيب هلأ انا عيوني كبار و خضر, و عيون فلانه سود, العيون اللي عليه بكونو بألوان عيونا و احجامها ويلا كلنا نفس الشي, مع ابتسامه بتبين انها بتسأل السؤال كنوع من عدم الاقتناع بالكلام, انحرجت الست و الستات بين عليهم انهم بدو يفكرو بمصداقيه الكلام.

قبل كم يوم كان في بيت اجر لناس بعاد و انا حبيت اروح مع ماما , المهم في ست اجت و قعدوها بنص القعده و بدت تحكي زي درس صغير, البدايه حلوه و دعاء و عن الاتعاظ من الموت, وانتقل من موضوع لموضوع و صلت لموضوع الهجوم على سيدتنا عائشة ووالدها الكريم ابو بكر الصديق رضي الله عنهما, وصلت لقصه غريبه عجيبه عن سيدنا ابو بكر الصديق, عن ان سيدنا ابو بكر الصديق تصدق بكل امواله حتى انه تصدق بملابسه و انه بقي في الملابس الداخليه, و انه بطل عارف يطلع من البيت, بعدين راح لسيدتنا عائشة - رضي الله عنها - يطلب منها ملابس فما كان عندها غيرعبائه ممزوعه, فحاولت تخيطها على قدر ما بتقدر و بعدين لبسها سيدنا ابو بكر وهي مرقعه , طبعا الستات كلهم مشدودين و منتبهين و منسجمين مع القصه, وكان صوت الاخت يعلى و يوطى بأحداث القصه, و علّت صوتها بان جاء الرسول صلى الله عليه و سلم يحكي لستنا عائشة بأن جبريل نزل عليه بعبايه ممزقه و لمّا سأله الرسول عن السبب قال انه نوع من انواع التكريم لسيدنا ابو بكر الصديق, طبعا الستات بدو " لا اله الا الله" واللي بكت واللي اقشعر بدنها, انا بصراحه انصدمت, انو انا بعرف قصه ان سيدنا عمر تبرع بنصف ماله و سيدنا ابو بكر تبرع بكل ماله ولكن هالتفاصيل حسيتها مبالغ فيها و اول مرّه بسمع فيها, الاسئله صارت تتدافع بعقلي و وصلت لحلقي و طلع السؤال لا اراديا, شكرتها و حكيتلها الله يجزيكي الخير عاللي عملته و تذكيرنا بالموت ومن هالحكي وسألتها عن مصدر القصه, لاني اول مره بسمعها, بعد ما كانت مبتسمه و ملامح وجهها كلها سماحه قلبت, ما عجبها و حكتلي انها مذكورة بكتب كثيره و انها مرويه من ناس ثقه و انها لو انها مش متأكده منها كان ما حكتها , مع ذكر يا بنتي و حبيبتي كنوع من تلطيف الجو و تحجيمي :)
وفجأه كل الستات صارو يتفرجو علي و يتوشوشو, كنت بدي ارد اسألها اسأله اكتر او عالقليه عن اسم كتاب اللي ما حكتلي اسمه بس ما حبيت اعمل شوشره و ترجيت ماما ما تعلق هي كمان لانها كانت بدها تبدى هجوم عالاخت,بضل بيت اجر و ناس ما بعرفهم كتير , بس عالقليله عملت اللي علي و اذا في حد من الستات كان عنده تساؤل بخصوص مصداقيه القصه صارو يفكرو اكتر, و بعد كم من دقيقه استأذنا انا وماما و روحنا :)
عمره حد سمع بتفاصيل هيك قصه؟؟


للاسف كترو هالنوعيه من الستات بحياتنا و اللي بعتبرو حالهم وصلو لقمّه المعرفه بالدين و بالتدين, و للاسف في ستات بصدقو اي شي بنحكالهم بما انه تحت مسمى الدين او اذا صاحبه يعتبر او يطلق عليه اسم " متدين" من دون اي تأكد من الكلام اللي بنحكى او عالقليله ترجيعه للمنطق و التفكير فيه بالعقل مش بالعواطف.

21 التعليقات :

جديده شغلت الواعظات في بيوي العزاء. الفكره حلوه كثير بس اذا كانت بمواضيع زي هيك فبدونها افضل.ـ للأسف اكتشفت من خلال قراتي لكتب دينيه انه كثير من الأمور الشائعه بين العامه لاأصل لها. والغريب انه بعض الناس مثل هؤلاء الواعظات بيضعوا انفسهم بمسؤوليه اكبر منهم. يجب التحقق من اي قصه الها علاقه بالسيره او العقيده. افضل شيء ممكن تعمليه انك تحكي مع الواعظه على انفراد وقوليلها انك ما سمعت بهاي القصه من قبل وحابه تقرأي عنها اكثر واطلبي منها المرجع. الجهل بالدين هو اللي وصلنا للي احنا فيه.ـ

 

المشكلة عندنا هنا كبيرة بشكل فظيع مو بس مع ستات من هادا النوع لكن مع اي شخص سمع او حفظ كلمتين و قرر او قررت تصير شيخة او شيخ و ياويلك تشككي او تسالي عن المصدر او حتى ليش؟
طبعا غير المظهر اللي بيخلي صاحبع يسوي بدع و كانه نبي مبجل

انا بس قررت اني مااسكت و اسال ليش وليش الى مايتعب صاحب الموضوع و يتكلم الحقيقة او يقنعني

 

بما إنو طالعة علي سمعة إني نسونجي "شوي" فمعلش خليني أستبق الأمور و أقول: "بدي آجي على واحد من هالعزيات و أسمع بذاني! جد هيك بيصير في بيوت الأجر؟ أنا كنت أفكر إنها حالات قليلة و استثنائية... بس من كم شهر و أنا بسمع أخبار مشابهة جدا ً لإللي ذكرتيه يا أم الويسبر... هيه النيات السليمة لحالها ما بتكفي بصراحة و حتى لو الموقف مو مناسب للسؤال و الاستفسار أقل ما فيها سؤال ال"شيخة" بشكل انفرادي و الهدف ليس إظهار أنها مخطئة بل التأكد من المعلومة"

 

بصراحة ما بحب قصة واعظات العزاء هاي
ما عمري صادفتهم بس بسمع من جدتي قصص ولا الها خص!!

كمان لما تكون الواحده جايه تحكي مع ستات كبار ومش متعلمين لازم تراعي وضعهم مش هيك يعني!!

ومعك حق بيقرأولهم كتابين تلاته بيصيرو بيفهمو وعين الله عليهم!!

 

كلامك سليم ولا يخلو من الدقه ابدا
كتير ستات بيتجي تعطي دروس بالعزاء ومنهم مين بتتبرع من نفسها ومنهم مين بتطلب مصاري
وكمان شغله تانيه غير الوعظ والارشاد بتدخل عليهم وحده وبتلفت انتباهم بصوت جهوري يا اخوات ممكن كلمه
الله يرحمه ابو فلان الشغله الي ما بتعرفوها عنه انو كان يصرف علينا وبدون ما حد يدري كان فاتح بيت النا ويصرف على اولادي الايتام الله يرحمه ويخحسن اليه وكمان الي مو حافظه سورة قصيره او بتفرأها بكل اغلاطها وبدون احكام تجويد
بالمقابل فيقصة رجل على زمن التابعين دخل مسجد واستكع لدرس ديني
وحفظ من الشيخ حديث لرسول الله صلى الله عليه وسلم
كلمتان خفيفتان على اللسان ثقيلتان في الميزان حبيبتان الى الرحمن سبحان الله وبحمده سبحان الله العظيم
حفظهم ودعى بهم في كل مجلس يجلس به
يقال انه نال اجر كبير من الله وكانت سببا في دخوله الجنه كما نقله الراوي
لا تنسي ان هذا اخر الزمان وفيه يتكلم الرويبضه
وهاي شوفي انتي شو معناها هادا واجب الك انتي تحليه
ويسلم تمك وتسلمي يا رب

 

صباح الخير ويسبر


في مثل هيك حاله....تصرفك صحيح
ليس عيبا أن نسأل عن المصدر
بطريقه ما فيها احراج متعمد للسيده من باب أن
نحن في زمن كثرت فيه الفتن والمدسوسات
وضروري نتاكد من المعلومات الجديده اللي فيها شك

حتى البرامج في التلفزيون مش كل ما
نسمعه فيها بالضروره يكون صحيح

بالنسبه للفتاوى
احسن شي ان الانسان اللي عنده مشكله بحاجه لفتوى
يتصل مباشره مع دائرة الافتاء التابعه لقاضي القضاه...عندهم تلفون خصوصا للافتاء او الاسئله المعقده اللي بحاجه لمتخصصين في الشريعه

 

اكره ما علي هيك اشكال انا كنت اترك المكان لما تخلص ستنا الشيخه كلامها اللي نصه تأليف من عندها والنص التاني الله اعلم من وين مصدره
لما توفى سيدي باتذكر اجت وحده وقعدت تحكي عن الموت وحكت اساطير عمري ما سمعت فيها وكان سؤالي الوحيد لو سمحت احكي المصدر اللي جبت منه المعلومه !وباتوقع انه واجبنا كمسلمين انه نسأل الاسئله لنطرد هالجهله اللي همه سبب التخلف الديني اللي احنا فيه

 

عنجد حطيتي اصبعك عالجرح ويسبر!

بكرههم ماشي؟ما بطيقهم!كل اشي لازم يتحول لدرس ديني عندهم و لازم بكل مرة يحكوا قصة البنت اللي ماتت و هي بتحكي تلفون مع شب

بالله عليكم؟

في وحدة جارتنا هديك رسميا خربان وضعها،قال شو بمباركة أخوي و عروسته قعدت بدها تعطي درس دين
0_O

صراحة أنا بفكح أول ما أسمع انه في "درس دين"خلص كل واحد يسطفل هو و ربّه مش ضروري تحكيلنا كيف لازم نكون خصوصا انك ما بتعرفي ولا اشي عن أي اشي!

 

Jaraad

هلأ صارت موجوده دائما...في منهم كتير مفيدين و لكن للاسف في مجموعه بس هيك بتحكي اي كلام بدون اي مرجع او مصدر

معك حق, و شكرا الك انك شاركتنا بكم من شغله بمدونتك بهالموضوع
للاسف مش دائما بنرجع للكتب و بنتأكد من المصادر او بنحاول نبحث لنتأكد من المعلومات اللي عنّا, بس ان شاء الله هالفتره بحس ان في صحوه بهالاتجاه

مع انه ممكن كان الموقف محرج و طريقتي مش كتير صح...بس انا حبيت ان اللي سمعو القصه يصير عندهم تفكير بصحتها و يتأكدو منها وان مش كل شي بسمعوه لازم يسلمو فيه

"الجهل بالدين هو اللي وصلنا للي احنا فيه"

صح 100%

Wafa'

يعني مش بس بالاردن هيك عم يصير :$

اه بالزبط....بتكون طريقة لبسها و المصطلحات اللي بتستخدمهم قمّه الروعه و بس تسألي فورا بقلب كل هالشي 180 درجه

اعتقد اقل شي ممكن نعمله انّا نحكي حتى ما نضل على اضعف الايمان - الاصلاح بالقلب - و ما نتحرك خلي عالقليله غيرنا ينتبه

 

Sheeshany

بدك تيجي على العزا!!!
وااااااضح انو ما في ثقه O_O

بما انه لم ترد عبارة " ما الكم علي يمين" في وسط الكلام...بهالحاله تأكد انه واقع :)

نيات سليمه بأمور حياتيه ممكن امّا بأمور واضحه بالدين ما اعتقد ان في مجال لاي نوايا

انا حكيتلكم عن العادة السيئه اللي فيي...اللي بقلبي على لساني و لحاله الكلام طلع بس بعد تفكير حسيت انها بهالموقف مش سيئه و كان لازم احكي ليتسائل اللي حوالي و من ردة فعلها حسيت انه ما في مصدر :$

مياسي

اه حكيتيلي ;)
بس كنت انا رايحه واللي صار صار

في ستات كتير طيبات و متعلقين بأي شي يخص الدين و فورا بتفاعلو معه وما بخطرلهم انه ممكن مش صح اللي بنحكى و للاسف همه بنقلوه لغيرهم و هيك لتصير القصه اللي ما الها دخل بالصحه واصله كل بيت

 

Kholood

اولا اهلا وسهلا فيكي ...مش اول زياره بس بكل زياره بتنوريني :)

اه صح...لسا هاي قصص تانيه, اسلوب مش حلو و انا متأكده انها لو بحاجه واجت لاهل المتوفي بعد ما الناس تروّح و اللي اكيد حيكون ولو عند واحد منهم عالاقل فكرة عن الموضوع ...الا ما يقومو بالواجب, لكن للاسف بيوت الاجر عم تفقد من معانيها ومن رهبتها هالايام, الناس بطلت تحس برهبة الموت للاسف

عن أبي هريرة رضي الله عنه قال: قال رسول الله صلى الله عليه وسلم:
((سيأتي على الناس سنوات خدّعات، يُصَدق فيها الكاذب ويُكذَّب فيها الصادق، ويُؤتمن فيها الخائن ويُخوَّن فيها الأمين، وينطق فيها الرويبضة))،

قيل وما الرويبضة يا رسول الله ؟ .. قال: «الرجل التافه يتكلم في أمر قال السفيه يتكلم في أمر العامة

معقول وصلنا لهالزمن!!!

الله يسلمك يا رب

 

Naysan

صباح ومسا السعاده يا رب :)

انا ما كان قصدي احرجها مع انه ردّة فعلها خلتني ما احس بالندم, القصد ان الموجودين ينتبهو للموضوع

معك حق...واجبنا نتأكد هلأ

ياما سمعنا عن فتاوى لا برضاها لا عقل ولا منطق و اكيد ما الها دخل بالدين

كلمات حق يراد بها باطل بكون معظمها

ماما هيك بتعمل...بتتصل بدرا الافتاء و بتسألهم بس يكون في عندها سؤال :)

Sozan

اساطير...هيك حسيت اللي حكت اول قصه, من وين جابتهم مش عارفه

لازم ننتبه للي بنحكى و للي بتناقلوه الناس, فعلا واجبنا انّا نسأل ونتأكد

 

Rain

شفتي شو عملو هدول الناس!!!
المفروض انّا نحب دروس الدين و نتسابق لحضورهم ولكن اشكال هالعالم كرّهو الناس بالموضوع و خلوهم يشكو ان كل العالم واحد

لا الوقت المناسب ولا المكان المناسب, المفروض بأسلوب جميل توصل رسالتها و بدون ما تأثر عالناس او تزعجهم

حلو تنصحي و حلو تدعي الناس بس الداعيه او الاعظه الحقيقيه بكون عندها اسلوب جميل بوصل للقلب بدون اي ازعاج

والقصص القديمه تاعت صف تاني ب فعلا لازم يبطلوها O_o
ذكرتيني بوحده مرّه حكتلنا قصّه بترعب عن الحكي جوا بيت الخلاء " الحمّام" ....لهلأ بترعبني :(

 

عاااااااادي جدا

في شباب كثير بقرأو الأربعين النووية وثاني يوم بصير يفتي ويكفّر فلان وعلّان

الله يعيننا على تالي الحياة
=D

 

همسة كثروا هالنوعية لأنو كثرة نوعية شيوخ التفزيون من أمثال عمرو خالد و غيرو، اللي الواحد فيهم بقرأ الأكاذيب وبحاول يخليها غضب إنها بالدين، لسة القصص اللي حكتيها هاي أهون من قصة عمرو خالد إنو أرض بيت المقدس لواحد يهودي(سمعنها بتسجيل بصوتو).

 

hahaha ,,, maybe they will start growing beards ,,, religion is becoming the stigma of ignorance everysingle new shaikh now adays and almost all the old ones is either a tawjehi failure with an IQ of a tree or a "repented " child molester or rapist...etc i wonder if the same apply to their female counterparts !

great read
peace

 

Abu Zaina

يا الله شو بقهروني هالعالم
و خصوصا بس يصيرو همه يقيمو الناس ....كيف فجأه بحسو حالهم بفهمو وختمو العلم؟؟

اللهم امين :)

Ahmad Hamdan

للاسف كترو بكل ماكن

ايش!!!
ما سمعت هالشي من قبل :$

مشكلتنا انّا مقصرين بالقرأة و البحث والتأكد لنقدر نميز القصص الحقيقيه من القصص المؤلفه بخصوص الدين


و مشكله مهاجمه الشيوخ لبعضهم خلتنا نتوه بزياده بصراحه...
انا اللي بعرفه ان عمرو خالد منيح ولكن في هجوم عليه كبير

لكن اللي حكيته ما سمعته من قبل ...واذا فعلا حكاه فهاي مصيبه لانه في كتير ناس بثقو بكلامه

 

Rain

Mabalaaaaaash ...LOOOL :)

Ma7moodjo


We can't generalize in that, these qualities you mentioned characterize 'some' people who are hiding behind religion to improve their appearance in front of people and maybe some of them are participating in the phenomenon I'm talking about ,but we can't deny that there are Shaikhs (males and females) talking out of knowledge and understanding of the religion


Welcome here :)

 

على فكره إنتي حكيتي بموضوع كتير مهم جداً وسبحان الله كنا نتناقش فيه كمن يوم بالشغل ....كنت أحكي إنو نحنا نفتقد في كثير من الأحيان لواعظات متمكنات من الدين إي أنها تقول عن دراسة وعلم مو قصدي إنها كون ماخده شهادة ماجستير لأ بس إنها تكون دارسة وقارئة كتب وكل كلمة عندها بدليل وحجة من كتب السنة مش زي ما قلتي سامعتلها كمن كلمة وجاي تحكيهم ....حقيقة أنا نفس الشي كتيير سمعت دروس ببيوت عزا بس للأسف كانت أغلب الواعظات مش متمكنين أبدا ً ....

المثال اللي ذكرتيه عن هاي الواعظه اللي على ما يبدو إنها شيعية كونها ذمت بأمنا عائشة عليها السلام وذمت بالصحابه أكيد إنو مو صحيح كل حكيها لإنو لا يوجد عندها دليل قاطع من أي مرجع ويكفيكي أختي إنها شيعية لتحكي بأحاديث مغلوطه وكاذبه وضعيفة جدا ولتسب الصحابه رضوان الله عليهم وتطعن فيهم ...

بتعرفي شو المشكله ويسبر ؟؟
المشكله إنو إحنا مش متفقهين بالدين منيح بحيث إنو تكون عنا المقدره بإنو نقول هادا الكلام غير صحيح وهادا صحيح !! المشكله إنو الدين عند غالب الناس سطحي والناس بسيطه كل شي بتسمعه بتصدقه , يعني بالله عليكي هاي الواعظه اللي قالت عن وصف عزرائيل وعن أمنا عائشة مش الأولى إنو وحده من الستات قامتلها وقالتلها شو اللي بتحكيه إنتي ؟؟ شو اللي بتخبصيه ؟!! إحنا هون سنه مو شيعه !!! تفضلي من غير مطرود !!!
بتعرفي أنا لو كنت بالعزا كنت حكيت هادا الشي تماما ، الله ستر ما كنت جد !!! كل شي بتحمله بالدنيا إلا ناس يقعد يخبص قدامي بالدين ما بسكت بعصب بسرعه وممكن إذا اطورت الأمور أمد إيدي آآآه والله جد !!!
الناس كتيير بسيطه بحيث إنها ما بتميز بين الشيعي والصوفي على أبسط مثال!!!
يعني لما بتيجي وحده بتقعد تتغنى بالرسول وترفع صوتها بالغناء بنص العزا مين ما بعرف إنها الأخت صوفية ؟!! الناس البسيطه بتقلك ما شاء الله صوتها حلو وكلام طيب ما في مشكله !! بس هادا غلط وستين غلط ويجب عدم المشاركه او إبداء الإعجاب بتاتا ً .

 

اول شي سامحني تأخرت بنشر التعليق والرد...بس معجوئه عالاخر هالايام

انا معك انهم كتير قليلات الداعيات اللي بكونو متمكنين من المعلومات اللي بنقلوها للناس

هلأ انا ما بعرف اذا كانت الاخت شيعيه او لأ وهي ما ذمت لا بستنا عائشة ولا بالصحابه رضوان الله عليهم, هي حكت قصه ما الها مصدر ومش كتير تقبلتها, ممكن تكون حكتها من باب كلمة حق يراد بها باطل, و ممكن حكتها عن جهل تام بتبعات التقول على الدين و سرد قصص ما الها دخل بالحقيقه

للاسف معك حق انّا مش متمكنين من دينا صح و هذه حقيقه محزنه جدا, و كتير ايام بوقف النقاش لاني لا املك حجه قويه لاني وللاسف من اللي مش متمكنين من كل شي و ما عندي حصيلة معلومات مبينه على مصادر ثقه ومتأكده منهم
قراءاتنا الدينيه قليله و كتير مقصرين :(

انا معك ان الموضوع خطير و بضرب عالعصب لكن برضه بدها تكون ردود افعالنا محسوبة لحتى ما انفر اللي قدامنا لانه ممكن يكون مش فاهم شو اللي بحكيه مش اكتر وبس المهم اللقب "داعيه" والمظهر العام و تبعيات اللقب من ترحيب و تأهيل...

ان شاء الله نوصل بيوم لانّا نكون متفقهين بدينا لنعطي الحجج الصحيحه لمحاربة هيك ناس وتوقيفهم عند حدهم