Things I Like To Whisper About

Would You Hear Me Whispering

شو بالنسبه...7


ملاحظين ان في ناس بطلت تميز بين الجرأة - كنت بدي احكي الصراحه بس الموضوع صار اكبر من بس صراحه - و بين الوقاحه؟؟؟
ما بعرف ايمتا بالزبط تعدينا حاجز الخجل المحبب والمطلوب و الادب و الاخلاق لوصلنا لمنطقة الوقاحه بالخوض بتفاصيل الامور

بدت بالافلام و بعديها بالدعايات و بعدها المسلسلات و للاسف هلأ صارت موجوده على ارض الواقع, من ايمتا حياء البنت صار اشي غلط و ما بتصير كول و صريحه الا بس تخوض بمواضيع يدنى لها الجبين, و تحكي عن تفاصيل خاصه بحياتها كبنت؟؟

من ايمتا خوض الشب واعلانه عن مغامراته و افكاره و خيالاته اللي بتكون بكثير من الاحيان مرضيّه بحته هو جرأة و حريّه تعبير؟؟؟

اشي كتير مستغربته و مع الوقت بتطور و بتتطور المعلومات و التفاصيل اللي بتنشر عالملأ هيك بدون اي رقابة ذاتيه للي بنحكيه و اللي بنكتبه....

شكله من ضمن المقاطعات اللي لازم نعملها بحياتنا, كالتلفزيون و المولات....صار لازم نعمل مقاطعه للناس.





ملاحظه ع الهامش....

لتكونو فكرتو من الصورة اني بحكي عن الانتخابات...لاا لاااااا الله يخليكم مش تورطوني, انا ما الي دخل و خصوصا انه كما ذكر المصدر الاوقاف افتت ان التحريض على مقاطعة الانتخابات في المساجد تعتبر من الكبائر....فما بالكم فيي انا المواطنه الغلبانه !!! O_o

جد شوووووووووو بالنسبه

23 التعليقات :

Kalam ktir 7elo.. Sa7 ppl became unbelieveable in all aspects of life..

 

Khawa bte7ki 3an el etekhabat bas bel 3agel :P
Anyway, I think I know what you're referring to here, ana 7assait hada el shu3our abel fatra lamma qara2t ashya2 b wa7ad men el blogs, I wanted to write something but then I thought I'd start a war there. I'm glad you decided to speak up!

 

LOL @ the elections thing!

bs howa enty shofty 7aga lisa?

جاي على بالي أعملّك تور بالحامعة الأردنية مشان تشوفي لأي درجة وصلنا
الدكاترة اللي بيمدوا ايدهم عالصبايا في المحاضرة
المكاتب اللي بتتسكر ابوابها ورا البنت لما تدخل
الباركات
المسبات الفاحشة في المحاضرة..غالبا من الدكتور
رمضان طبعا حاجة تانية خالص

بس شو بدنا نقول صرنا بآخر زمن،ولا تستغربي ولا على بالك
:)

 

طيب انا الفكرة فهمتها و كلامك مزبوط 100% ، بس شو القضية ؟ يعني كأنو صار معك موقف او اشي متل هيك جاب هالحكي الكبير! و

مهو المشكلة بطل عنا اشي اسمو حياء ، صار تحريف لهاي الكلمة و صارت اشي بنعاب فيه الواحد ، هاد الشب بستحي و هاي البنت بتستحي كتير !!! يعني شو بالنسبة ، ‏قال رسول الله ‏ ‏صلى الله عليه وسلم ‏{ ‏الحياء من الإيمان والإيمان في الجنة والبذاء من الجفاء والجفاء في النار} حديث حسن رواه الترمذي

يعني متى صار الحياء بمعنى الخضوع والاذلال ؟ متى صار الحياء بمعنى البنت الهبله اللي على نياتها او الشب المسكين ؟!

 

Tareq

They don't know when to stop and there is no limit for them ..

Rand

LOOOL men jab seret el 2ente5abat :) I'm talking about el fatwa ;)


Ahaaa ana b7ke 3an zahera in general,allah yerda 3aleke ma twar6ena m3 el3alam :P

 

Rain

والله الوضع خطير صاير :$

المفروض ينحط حد لهيك عالم وما ينسكتلهم لحتى ما يتمادو اكتر من هيك

بتذكر انا كان في دكاتره انك تروحي على مكتبهم شبه الك :(

وموضوع المسبات هاي جد لا حيا بالمره, يعني بطل انه عيب في بنت قاعده, لأ البنت بتسب و الشباب بخجلو من الوضع من الصدمه

الله يستر من اللي جاي ..

Dr.Mohammed

هو الموضوع ببالي من فتره و لكن امبارح عالتويتر كان في بنت كاتبه الستيتس تاعتها اشي بخزي و شب معلق انه معجب بصراحتها

هي كانت وقاحه مش صراحه

الحياءصار يعني الهبل و التعقيد
بمفهوم بعض الناس

صلى الله على محمد...صلى الله عليه وسلم
اول مرّه بسمع هالحديث ...جميل جدا

الحياء مطلوب...وحتى لمّا حكو لا حياء بالدين الاجابه كانت ان الدين كلّه حياء و هالعباره خطأ

 

على الرغم اني عامله متل الاطرش بالزفه لكن رح احاول اكتب عن الشي اللي فهمته
هلا انا مع حرية الرأي والتعبير بس المشكله اللي بيوقع فيها الكثيرين ولانا مجتمع ما دعودنا انه نحكي عن اشياء خاصه لانه الكل بيعتبرها خط احمر لهيك صار الحكي عنها وعلى الرغم انها موجوده في كل مكان امر مزعج
يعني اللي علقت حكت تعالي آخذك تور ع الجامعه الاردنيه عذرا منك ومنها ما هي هاي الاشياء كانت موجوده من زمان وعلنا كما هي تحكي عنها بس هلا تسمعي اكثر يا اما لانه الشباب صار الهم اكثر اتصال ع الانترنت وصار الكل يسمع والكل رفع العلم الاحمر بس لو فكرت شوي لوجدتي انه كان موجود بس ما كان مسموع عنه
وبصر على اني مثل الاطرش بالزفه!!

 

كنت ابغى اعلق على الكلام الاول بس ماقدرت بعد ماقرات ان "مقاطعة الانتخابات من الكبائر" !!! ماشاءالله هي وصلت لكدا

يلا احنا احسن منكم , ماعندنا انتخابات من اساسه علشان نقاطع شيء

:]

 

Sozan

لا بعيد عنك....هو تقريبا الاشي القديم بس صار على وسع

الحكي صار كتير مشاع بين العالم
هو صحيح في اشياء معينه - ما بقدر اكتبها لانها بتخزي- هي اللي خلتني اكتب عن الموضوع

بس اجمالا ان الموضوع كان مخفي وصار هلأ واضح و بالعكس بكل عين قويه هو اللي مزعج

قصص الدكاترة والجامعات موجود كان لكن هلأ تطورت الامور و صار ما في شي لحدود العيب - بما ان الحرام مش مطروح ببالهم اساسا- الموضوع كتير زاد عن حدّه

حريّه شخصيه انك تكوني قاعده و بنت تحكي بين بنات و شباب عن امور كتير خاصه بابنت و كأنه موضوع للمناقشه ...مش حرّيه شخصيه ابدا ابدا

Wafa'

اللي بقهر انهم بقتو زي ما بدهم

احكو للناس عن حقوقهم بأنهم يختارو الاصلح, احكولهم عن حقوقهم اللي ما بصير يبيعوها لاي سبب
بس انكم تنبهو المساجد يشجعو الناس هيك بدون اقناع و انهم اذا حكولهم قاطعو - بما ان الاسلاميين مقاطعين للانتخابات عنّا - فأنتو تقررو ان هالشي يعتبر من الكبائر....الكبائر!!! كتير بصراحه

هههههههه نيالكم اذا :)

ملاحظه ع الهامش

اشتقنالك كتير كتير...مبروك البيت الجديد :)
ان شاء الله بتشوفو على وجهه الخير

 

والله بيعتمد
ما بقدر أعمم الوضع
هلأ بالشارع أنا مش مع الخروج عاللآداب العامه قطعا

أما بالنسبه للبلوجات
فالنسبه الي عادي
بيعتمد عـ شغلات كتيره
ما عندي مشكله بالعربي:)

بعرف رأيي ما رح يعجب ناس كتير
بس هيك رأيي الشخصي وانا حره فيه:

ومتل ما حكت سوزان
هالاشيا كانت دايمن موجوده

 

مياسي

بالنسبة للبلوج فانا معك...كل واحد يكتب اللي بدو اياه و اللي بدو يقرأ او ما يقرأ هو حر

انا معك مع ان المواضيع مرات بتكون غريبه بس حرّين

لكن موقع مثل التويتر مفتوح للكل و اللي بتكتبه بنتشر على صفحات الكل ...مشكله اذا بتكتبي اشي مخلّ و العالم ترد عليكي وتتناقشو بموضوع غريب

وانسي هدول...انك تكوني بجلسه و فجأه يقتح موضوع نقاش مخزي و البنات والشباب يخوضو فيه بكل وقاحه - صراحة من وجهة نظرهم -

يا اما انا ضد الحريّه الشخصيه يا اما انا مش عارفة اوصل الموضوع صح
:)

 

الناس عم تتغير يا ويسبر

بمعنى آخر عم بضيعوا وذا شلنا النقطة من على الضاد بصيروا عم بصيعوا
أصلا نحنا شلنا الضاد كلها
وأصبح لسان الدبليو يجمعنا

بالنسبه للانتخابات انا معك في المقاطعه
سيري على بركة الله

 

مش عارفه مين سبق مين انهم بصيعو ويلا بضيعو !!

الدبليو!!! ما كنت اعرف اسم لغتهم من قبل
ثانكس فور ذا اينفو :)


ايش!!! مين!!! بدي اقاطع!!

لاااااا الله يخليك مين حكا هيك...انت بدك توديني ورا الشمس و اهلي ما بهونلهم اروح مناطق بعيده :$

 

ممم شوفي
هديك المرة كنت بتناقش مع محمد بادي على تويتر بخصوص مسلسل ما ملكت أيمانكم

وحكيتلو أنا اعتراضي مش عالموضوع اعتراضي على طريقة المعالجة

يعني في ناس بتعرف تحكي بمواضيع حساسة بطريقة مناسبه وما تجرح شعور حدا
وفي ناس بتوصل الموضوع حد الفجاجة

ما بعرف اذا الفكره هيك وصلت أوضح:)

 

مياسي

يا ريتني كنت موجوده وقت ما فتحتو هالنقاش, عندي اشياء كتيره احكيها عن هالمسلسل :(

بالفعل, الاسلوب بعرض الموضوع اله تأثيره برضه و هو اللي بخلينا نتقبل الحكي فيه او لأ

انا اللي بحكي عنه هو الطريقه الفجّه بالحديت و اللي صادر من اشخاص بتستغربي كيف يخوضو فيه بهالطريقه

اعتقد انه الفكره وصلت :)

 

بسيطة اكتبي تدوينة عن المسلسل
محمد طلب مني اكتب وحده بس انا شخصيا ما حضرتو كاملا
اللي حضرتهم كانوا 10 حلقات مقطعين موصلين وما قدرت اكملهم بصراحه

الحمدلله اللي وصلت الفكره
وبالمناسبه هو اجمالا العرب عندهم مشكله بالحديث عن المواضيع الحساسه

ما بيعرفوا يحكو يها صح ياختي مش متعودين:)

بتتزكري البوست اللي حكينا عنو يوم جمعة الصبايا؟

اتخيلي انو مديري اجنبي واستحى يوديلي ياه؟!!

 

انا حضرته كله :)
اليوم كانت اخر حلقه و اللي ما صدقت وهو يخلص
والله فكره :)
راح اكتب عن المسلسل , انا مش ناقده فنيّه بس بدي احكي عن وجهة نظري كمشاهده

مش متعودين لهيك بس يحكو بخبصو الدنيا :$

اه طبعا متزكرته :)
بفهم مديرك... شو بدك بوجع الراس و خصوصا انه واضح وصريح وين بدك تتلاعبي بالكلمات :$

 

منيح كتير بستنى التدوينه عشان اعلق عليها

اسمي صايره بالتعليق اشطر مني بالتدوين مؤخرا
:)

خلص المسلسل؟ اوبس طلعت ما بحضر شي نهائي عالتي في:)

كتر خير الشغل والدوريات:)

 

خلص قريبا جدا حكتب
يمكن مش عن كل شي بس عالقليله عاللي قهرني من المسلسل اكتر شي :$

اه اليوم خلص....لا هاد جد مش فاضيه
الله يعطيكي العافيه يا رب :)

 

لأ ما أنا ملاحظ! :P
لوول

دنيا آخر زمن على قولة الختايرة "بما إني صرت ختيار أنا كمان" ، بدها حملة مقاطعة شاملة كاملة شعواء شكلو و الله يا ويسبر

* الفتوى و الله ما قرأتها "كاملة" إلا الآن!

 

ختياااااااااااااااار
31 و ختيار...الله يسامحك اذا انا صرت 100 و لساتني صبيه :)

كل عام وانت بخير و عقبال ال 100

يعني اسلوب الطرح بقهر...انو كبائر !!!
يعني انا مع التوعيه بس هاد اسمه استخفاف بعقول العالم

 

لا حول ولا قوة إلا بالله ....الله يثبتنا على الدين إن شاء الله ....ليش خطر ببالي غنك بتحكي عن التدوين والمدونات ؟!! هل تصل الوقاحه للتدوين أيضا ً ؟ شو رأيك ؟

 

اللهم امين

انا بحكي عن الناس اللي حوالينا...وما بنكر من انه بعض المدونات كان فيها خروج كبير عن الصراحه, و الي تحفظ على بعض المواضيع, لكن انا مع ان المدونه مساحه شخصيه واللي بنكتب فيها برجع لحرية صاحبها و القارئ بختار يقرأ او لأ

وجواب لسؤالك....اه بتوصل :$