Things I Like To Whisper About

Would You Hear Me Whispering

بابا كول ويلا كشكول....شو بالنسبه... 6




شو بالنسبه للبس البنات هالايام, بنروح عالمول بتلاقي البنات تقريبا من غير هدوم, عادي جدا البلاطين الرش و عادي جدا ان نص جسمها للبنت بالشارع, وعادي جدا ان نص البنات الاندروير مبين - اسفه بس اشي بنرفز - هلأ بتحكولي حرّيه شخصيه, بحكيلكم ان حريّه اي شخص بتوقف بس تبدا حرّيه الناس التانيين, وفعلا هالمناظر بتأذي يا جماعه, والله حرام بنات بعمر الزهور يرخصو حالهم لهالدرجه.

زوجه اخوي البلغاريه و بنت عمي المقيمه بالمانيا حكولنا انه هالمناظر هاي ما بشوفوها مكان مهمه عايشين, في بنات بلبسو شورتات و قصير بس مش بهالابتذال هاد, قبل كم يوم بنت وزنها فوق ال 150 كيلو لابسه جرابات نايلون مخرمه و تنوره يا دوب شبر و فوق لابسه اشي كاين بالزمنات بلوزه لكن الزمن عامل عمايله فيها و حاطه نص كيلو ميك اب على وجهها و شعرها مربوط من نص راسها , البنت ماشيه عادي مع عيلتها و ابوها وامها, والام محجبه , طيب منظر هالبنت بس نشوفو بنتوقع ان البنت قليله ادب رسمي, و برضه بتحكولي حرّه بحكيلكم لأ مش حرّه, لما شباب بسن المراهقه ما بفهمو وبس عباره عن مشاعر مختلطه ماشيه عالارض و يشوفو هالمناظر مرميه هون وهون و يصيرو بدهم يفرغو مشاعرهم و بهالسن حتكون بأشياء غلط اكيد لا دين ولا وعي صحي ولا اشي, فأكيد مش حرّه.

الاسبوع الماضي اخوي وصحابه حجزو بفندق بالبحر الميت و نزلو يومين, هلأ هناك مناظر و بنات و سباحه بحكيلكم هدول حرين, هدول بمكان خصوصي لهالشي و اللي مش عاجبه ما يروح, لكن الغريب القصه اللي حكالي اياها اخوي, بحكيلي كنا قاعدين انا وصحابي و انا ملاحظ ان في بنت بتتطلع علي من بعيد, بس البنت قاعده مع اهلها, طنشت شوي اجت قريب مني و بدت تحكي معي, وليش ما بتسبح ومن هالحكي, بحكيلها طيب انتي ليش ما بتسبحي؟؟؟ " هو بابا كول ويلا كشكول" - انا اول مره بسمع بهالمصطلح بصراحه - بتحكيله لأ عادي بس انا مش حابه, المهم بحكيلي افترقنا و اعطيتها رقم تلفوني, بالليل بتتصل انه في سهره بتحب تيجي, نزل عاللوبي لقاها واقفه هي وابوها, بحكيلي سلمت على ابوها و عرّفته بنفسي و هو عرّف على حاله
الاب...." وين بابا رايحين"
البنت... " عند صحابنا اللبنانيه اللي تعرفنا عليهم اليوم"
باي...باي
اخوي بحكيلي البنت طلعت 18 سنه, خف عقلي انا و خلص صرت بدي انركها و اروح, بس الشباب و "الصبايا" اللبنانيه جوهم حلو فضليت, بحكيلي ضلينا لل 2 الصبح و فجأه اجا ابوها للبنت, انه بابا يلا بدنا انّام, مالت عأخوي و بتحكيله " شو هالتحكم هاد, اذا صحيو لازم نصحي, و اذا نامو لازم انام" بحكيلها اخوي " الله يعينكم على هالاب الكشكول!!! "

غير عن المحجبات اللي بلبسو لبس غريب عجيب, بتكون الوحده ماشيه مع زوجها و ولابسه فستان بعرس اعز صاحباتي ما بلبسه و لابسه تحته Body و الفستان مبين كل تفاصيل جسمها و محجبه !!! كيف زبطت معهم؟؟ و شو هالحجاب هاد ؟؟

مفهوم اللبس تغير عند الناس وانا كمحجبه بعاني لحتى الاقي قطعه منيحه ومناسبه البسها ولازم اجيب الاشي واسع و اديقه عند الخياط ليكون قابل للبس , مش عارفه هو السوق اللي فارض هالنوعيه من اللبس و الا الطلب على هيك لبس ويلا شو بالزبط؟؟ مش عارفه, لكن المتأكده منه ان في كل واحد عنده عقل بعرف يقيس عليه الصح من الغلط والمفروض في اهالي موقعهم للتوجيه و للتصحيح وما عم بقومو بدورهم.

32 التعليقات :

لا حول ولا قوة إلا بالله ....الله يهدي الجميع
البسي يا بنت جلباب أو عباي أحسنلك شو بدك باللبس اللي بالسوق ....فضفاض ومو شفاف وبميزك عن إياهم بالشارع لا بتسمعيلك كلمة هيك ولا هيك ولا حركشه ...:-)

 

نهاية كل مجتمع منافق وكزاب
مظاهر وبس

بس حلوه قصة الكشكول هاي :)

 

حلوة هاي كشكول عجبتني على زماننا كان اسمه رجل كرسي مش كول !!
المصيبه انه التطور اللي صار احنا ناخذ الملامح الخارجيه منه يعني ما نتعلم شي غير كول وحكي فاضي
بصراحه ومن دون تزييف الشي الموجود هناك هو صورة للمجتمع اللي مش عارف يحدد موقعه على الاطلاق مش عارف يحكي انه شرقي او غربي على فكره التشليح موجود في كل مكان ودوله لكن يعني هون في امريكا مثلا في عالم في الصيف بتكون لابسه من غير هدوم بس ما حدا بينتبه لانه عادي شيء مقبول يعني التشليح في المانيا موجود لكن العين اللي تتاذى منه مش موجوده وفهمك كفايه ويسبر
كان الي صاحبه كانت تحكي اللي مش عاجبه يغض البصر حبيبتي افففف حر :)

 

أصبحت الملابس سعرها غالي جدا .. والبنات في حالة تقشف .. تحياتي لك وتقبلي مروري

 

صباح الخير ويسبر

يسعد لي هالبابا الكشكوووول....مسكينه شو مظلومه بنته وبتعاني من جبروته!!!!1

أما موضوع اللبس...فزاد كتير عن حده ...صارت مسخره وقلة حيا
بلا كووول بلا بطيخ

 

صباح الخير

فعلا لبس البنات صاير مو طبيعي
خاصه بالمولات مش فاهمه انا اشمعنا هالمكان اللي هو باعتبار سوق هو عنا متنفس للبنات باللبس و الحركات و للاولاد للبصبصه و التقليس

بدون منازع اللوم عالاهل اولا لانه بنت المدرسة عادي كتير تروح مع صاحباتها عالمول طب مهو بؤرة فساد و البنت بتشوف و بدها تجرب يعني بالعقل اهل بدهم تشريح

و معاكي انا بأواعي السوق بحس اني ببلد ما بنتمي اله لدرجه انه كتيير صعب علي الاقي لبس يناسب الحجاب و يكون عصري و مريح
و اذا نويتي تشتري شي مستر لازم تدفعي اضعاف الاسعار

جد القابض على دينه كالقابض على جمرة بهالزمن
و ثكلن كتير عالموضوع على الاقل انتي نهيتي عن منكر بلسانك و ان شاء الله ليوم بتصير عندك سلطه تغيريه بإيدك

قولي امين
:)

 

المفاهيم كلها اتلخبطت ولم تعد كما كنا نعرفها ونفهمهما واضحة ومريحة .. تحياتي لك عزيزتي

 

ليه إنتي مش كوووول
خلي الشعب يعيش
والبنات تتزوج ع كيفها

صار مع إبن خالتي اللي قرفته بالملوخيه موقف زي هيك
بس هديك,, بنت تعرف عليها ع الفيس بووك,, وحكتله تعا ع الاردن احنا جايين ع الصيف
وفعلن,, لمى اجا,, كانت مع اهلها وعرفته عليهم,, نفر نفر

كووووول

 

هههههههههههه
هي الساعه تنتين وزعلانه!!!!
جد ما الو حق ياحرام مقموعه
انا معك ويسبر في أسلوب بالبس مقرف لدرجه رهيبه
صرت اكره انزل عاسوق من وراهم
ومتل ما حكيتي حريتنا بتوقف لما تبدا حرية الاأخرين

 

أعتقد أن اللباس هو حرية شخصية حتى و إن لم يعجبني، فما أقبله قد لا يقبله غيري و العكس صحيح،في الماضي كان أهلنا يرفضون لباساًما بحجة أنه تشبه بالغرب، و أنا دائماً ضد هذه الفكرة، فالقاعدة عندنا كمسلمين أن نعرض هذا اللباس على الأحكام الشرعية، و ما وافق الشرع فلباس صحيح حتى و إن لم يعجبنا، و العكس صحيح.

لن أعلق على لبس الفتيات بشكل عام بعيداً عن اللباس الشرعي لأننا ربما ندخل في إشكالية أين نضع الخطوط الحمراء، لكن بمناسبة الحديث عن الحجاب الغريب، قبل عدة سنوات كنت في زيارة لجامعة بريطانية و كان فيه محاضرة عن فلسطين منظمة من قبل بعض الجمعيات الحقوقية فذهبت لحضورها، و لفت انتباهي من بين الحضور فتاة محجبة يبدو أنها خليجية، بعض من شعرها مكشوف، و تلبس بنطالا و قميصاً ضيقا قصير الأكمام، فالحقيقة كانت أول مرة لى أعرض لباس فتاة محجبة على القواعد الشرعية للباس، لأنني كنت دائماً أسلم بأن الحجاب لباس شرعي حتى و لو كان هناك بعض التجاوزات البسيطة معظمها من قبيل عدم الإهتمام بالتفاصيل، لكن هذا اللباس الذي أراه كان صدمة للمُسَلّمات عندي!

كنت أنوي التحدث معها في الموضوع على سبيل النصيحة، و لكنني عندما رأيتها تذهب لتعانق شاباً يضع في صدره نجمة داوود، تراجعت عن هذا.

المهم أن مثل هذا الباس صرت أراه منتشراً في الأردن مثلما تفضلتِ، فأظن على الأغلب أنه تقليد أعمى بدون علم، يساعد عليه من يصنع ذلك اللباس أو يستورده، و لربما بعض التوعية في المدارس و الجامعات و الصحافة قد تحد من ذلك الإنتشار.

نقطة أخيرة: في الغرب تجدين أدهى مما ترينه في شوارع عمان، لكن في مجتمعات و مناطق معينة.

عجبني المصطلح: كوول و إلا كشكول
:-)

 

لا احنا لازم نعملها حملة على الفيس بوك و نطالب بحرية البنت اللي حكى عنها اخوكي عن جد شو كشكول هالعمو

انت بتعرفي رايي مسبقا بهالامور لكن بحب اضيف انو العالم العادية اللي بتقول بحرية اللبس على فكرة لبسهم كتير استر من عالم عم يلبسوا بس ليعرضوا مش اجسامهم
حريتهم
على اسا انو هاي حرية
انا شخصيا بلبس لبس استر من كتير محجبات عنا بالمدرسة و في اشياء ما بلبسها و مستحيل اقبل فيها لانها كانت بيوم من الايام للمومسات
و طلعوها موضة هلا
تخيلي

 

Orangee

امين يا رب العالمين
والله انتي حطيتي ايدك عالوجع...الموضوع هاد ما بروح من بالي ,انا و الحمد لله لبسي مستور بس اكيد مش زي العباي او الجلباب :$

خطوه كبيره و لازمه ان شاء الله ربنا بساعدني عليها

مياسي

حاسستك بتحكي يغلّ :)
همه بقهرو بصراحه, بس مظاهر اهم شي بحياتهم ما بعرفو انهم من بره صارو اسخم من جوا

هههه عجبتني انا كمان, هلأ كل ما اشوف اخوي بحكيله كيفك؟؟؟ كول و يلا كشكول :)

 

مرحبا
أنا أول مرة أعلق ، وأرجو أن تتحملي تعليقي...
بالنسبة للشق الأول من التدوينة ، معاك حق ، هناك رخص وابتذال في اللباس إلى حد كبير ، بل أكثر من ذلك هناك بشاعة وقبح في اللباس ، ولا ننسى أيضا بعض الشباب وأقصد الذكور ، أيضا يبالغون في بشاعة ملبسهم وابتذالها ، أما في الشق الثاني فأرجو ان تستحمليني، هل سألت اخوك لمَ وافق على دعوة البنت؟ إذا كان يظن أن ما عملته خطأ وغير أخلاقي ، لمَ هو وافقها على ذلك؟ وهل لو دعته مثلا إلى إقامة علاقة جنسية هل كان سيوافق؟ وخاصة أنهما بقيا مع بعضهما للساعة الثانية صباحا.
قد يكون سؤالا مستفزا، ولكن أليس هو من بيئة متدينة او ترعى ما يسمى بالأخلاقيات للفتيات فيها، لمَ هو لا يرعى هذه الأخلاقيات؟ ألا يستطيع الشاب
ان يقول لأ لفتاة لا تعجبه اخلاقياتها؟؟
عذرا لأسئلتي، ولكن دائما أسأل نفسي تلك الأسئلة ، لمَ يوافق الشاب الفتاة على تصرف ما وهو يحتقرها في جواته؟ ماذا عن نفسه؟ هل يقبل ذلك لأخواته؟
تحياتي
ماجدة

 

Sozan

ههههههههههههه هو لهلأ رجل كرسي و اكتر بس بتعرفي بدنا نواكب العصر بالفاظنا :)

ولا حتى ملامحه, ولا ماخدين شي من التطور, بس المظاهر المستهجنه عندهم هي اللي اخدوها

برضه فيها وجهة نظر, بس لو تشوفي كيف صايرين, بمنتهى البساطه هلأ بنات الليل بالدول الاجنبيه لبسهم مميز بكون و بميز "مهنتهم" المشكله ان في عنّا بنات بلبسو زيهم و بتكون البنت مش وقحه بس مش فاهمه شو اللي لابسته, تقليد اعمى مش اكتر

انا مع ان غض البصر لازم, لكن انا بنت و بتآذى من منظرهم يختي :$ اشي مقزز
مش عادي ابدا البنت ماشيه تحسي البنطلون بدو يسحل و نص الاندروير مبين من الطراف...اشي بخزي

شهرزاد الحكايات


الملابس سعرها اعلى من سعر اللي لابسته بعد ما رخصت حالها

اهلا وسهلا فيك...نورتيني

 

Naysan

صباح ومسا الورد

الله يعينها بصراحه...ال قومي نامي ال...هاد الناقص
بس الله يرضى عليها قامت نامت :)

جد قلّة حيا... اذا اخوي الشب قبل كم يوم راح ليشتري بنطلون ومن زمان مش رايح عالمول بحكيلي مالهم البنات كأنه زياده لبسهم صاير :$

Euphoria

صباح و مسا الفل

صح...كتير زياده و بالمولات خصوصا
و بتلاقيهم بنات صغار كمان لا في توجيه ولا اي شي....هيك تاركينهم يسرحو

الاهل الهم دور بحياة الاولاد بس للاسف هالايام كل واحد مشغول بحياته وناسيين هلاولاد
بفكرو ان الفلوس والاكل هو اهم شي

فعلا محلات الاشياء الحلوه والمرتبه للمحجبات صايره كتير غاليه

الله يهدينا و يهديهم, و يقوي ايمانا و يثبتنا

العفو ....شكرا على تعليقاتكم كمان الله يجزينا و يجزيكم كل الخير يا رب :)

اميييييييييييييييييييييييييييييييييييييييييييييييييييييييييييييين :)

 

المجهول

للاسف التخبط صاير بكل شي في حياتنا و مشكله بس رجالات ونساءات المستقبل ما يكونو محددين اي شي بالحياه

UmmOmar

انا لسا ما عرفتيني؟؟؟
انا عقد و كلاكيعو ...هاد اسمي الحركي اصلاطن

مهو لو البنات هيك بتتزوج ماشي ...بس ما حد بتزوجهم بعد هالمناظر :$

اه متذكرته :)
بس فليع الشب برضه... بستاهل خرجه :)

كووووول عالاخر الجماعه
و دخلك....تزوجها!!!

 

أنا أشجب واستنكر أندد ومش عارف شو بهالمقال يا ويسبر

انه ليش حاطة نقرك من نقر الاواعي؟؟

هاد اسمه رد فعل عكسي
لآنه من كتر الصدمات ما عرفت شو احكي


اكتر اشي زعلت ع بنت البحر الميت .. انه اهلها كتير متسلطين وقامعينها قمع .. بس ابوها .. ونعم الاب والله

بكرا بتيجي بتقله .. تعرف بابا .. هدول ولادي

 

زمن أول حول, هلأ زمن الحريات الشخصية والسولافة الطرمة هاي، مش بس بالأردن عندكم هالحكي يا همسة، والله أنا بنزل عالمول بشوف شوفات إشي من الأخر, وطبعا مش بس البنات هالحكي, الحكي أيضا للشباب , لأنو الستر باللبس لازم يكون على الإثنين، بس يئبرني هالأبو اللي هيك بنتو للساعة 2 برة، والحق يقال همسة وبدون زعل أخوكي برضو بنلام على قعدتو معها لهيك وقت

والله زمان عن مقالات شو بالنسبة

 

زمن أول حول, هلأ زمن الحريات الشخصية والسولافة الطرمة هاي، مش بس بالأردن عندكم هالحكي يا همسة، والله أنا بنزل عالمول بشوف شوفات إشي من الأخر, وطبعا مش بس البنات هالحكي, الحكي أيضا للشباب , لأنو الستر باللبس لازم يكون على الإثنين، بس يئبرني هالأبو اللي هيك بنتو للساعة 2 برة، والحق يقال همسة وبدون زعل أخوكي برضو بنلام على قعدتو معها لهيك وقت

والله زمان عن مقالات شو بالنسبة

 

First, I liked the cartoon :)

I agree about how disgusting is that to see Muslim girls wearing such stuff!

Allah yehdi eljamee3.

 

بابا سمحلي ,,, صار الي فترة بختلط بناس من هاي الطبقة
بحكو شغلات بتشيب الراس وانو الامور كول وانا المتخلف الغول

عادي يعني ثقافة البوي فرند عادي المساكنة وعادي انو محجبة ومصاحبه

وعادي تسهر بالبارات للساعه 3

يلاه بس بضل اماكن للمتخلفين الرجعيين الي زينا

 

ميسم

اب متسلط بصراحه..الله يعينها :$

ممكن اللي بره البلد مش متوقعين لاي درجه وصل الابتذال باللبس, اشي بشيب بصراحه, والمشكله البنت مش انها وقحه لأ بس هيك الموديل و هيك العالم صايره
زمان ما نورتيني :)

Saleh

انا معك ان اللبس حرّيه شخصيه, و انا من مؤيدي اختلاف الاذواق و شايفه ان فيها سبحان الله حكمه كبيره ليتآلفو البشر مع بعضهم
لكن في خط رفيع جدا بين الحرية الشخصيه و الاذى للي حوالينا, بعض عادات اللبس و التصرفات الدخيله على مجتمعنا بتأذي الناس

مثل جيران انت ساكن ببيت محترم و البنات فيه محجبات و الجيران بنات من غير هدوم و طول نهارهم ارجيله وسهرات و الشارع قدامهم طابور سيارات وشباب رايحين جايين لدرجه ان اهل بيتك ما يقدرو لا يقعدو على بلكون و كل ما تحركو من البيت لازم يواجهو هالعالم, بتقدر تحكي عن الجيران حرّين و هاي حرّيتهم الشخصيه؟؟؟ و انت شايف ان تصرفاتهم عامله مشاكل وملأثره على حياة غيرهم

انا هاد اللي بحكي عنه :)

موضوع حجاب هالايام هاد مأساة تانيه, فيه عكس جميع مواصفات اللباس الشرعي, وما بتقدر تحكي ان البنت مش محجبه, و صار الدين تطبيقات سطحيه وكأنه ما اله دخل بحياتنا ولا المفروض ينعكس على تصرفاتنا, و ضعاف الايمان و اعداء الاسلام بنسبو مثل تصرفات هالاقليّه المش فاهمه دينها صح على الجماعه كلهم , انا مع ان كل شخص بتصرفاته بمثل نفسه و لكن برضه مع ان كل شخص فينا بحمل امانه لدينه ولاخلاقه ولتربيته المفروض يأديها صح

انا متأكده ان في الغرب اكيد في مناظر افظع من هالمناظر اللي بنشوفها

انا عجبني كمان :) جديد بصراحه

شكله في مشكله بالتعليق لان المعظم تعليقاته تكررت اكتر من مرّه :)

 

Jafra

بحبشي بتلاقيهم عاملين :)
ما خلو شي ما عملو عليه جروب بالفيس بوك ..

مفهوم الحريه مش واصل صح لهالجماعه .....حريتك المفروض تاخدها وتطالب فيها انا مع هالشي
بس حريتك ما بتعني انك تتمسك بالقشور وتنسى حقوقك الحقيقيه, حريتك بالدفاع عن شيء منطقي مش بس من منطلق خالف تعرف

قبل ما اتحجب ياما صار بيني و بين مدرسي الثقافه الاسلاميه بالجامعه حوارات عن هالموضوع :)
جد فساتين سهره ومرات بكونو strapless و تحتهم Body
كيف زبطت معهم مش فاهمه :$

متخيله تماما اللي بتحكي عنه وهاد اللي انا معترضه عليه

ماجده

اول شي اهلا وسهلا فيكي :)

بالعكس وجهة نظرك انا معها وفاهمتها 100%

انا ما كتبت باقي الحوار و الطوشه اللي صارت بيني و بين اخوي
بعض الشباب و من ضمنهم اخوي ما عم يستوعبو فكرة انو ممكن يصير هيك مع اختك او بنتك لا سمح الله, بحسو انهم واثقين من نفسهم و من خواتهم كتير و ما بعرفو ان في طرف تالت حيدخل عالموضوع - شخص مثله - ممكن يأثر

انا مع ان الخطأ خطأ ان عمله شب او بنت, و ياما صارت مشاكل بينا على هالموضوع و على موضوع الشات, بحكيله انه بضحك عبنات العالم وهاد حرام وعيب, بجاوبني ان البنت بتتسلى مثلي ...

من وجهة نظره هي تسليه فقط, وموضوع الدين فبنظر الجيل الجديد - بعضهم طبعا- و سمعتها من اكتر من بنت و من شب, الحرام هو مرحلة الزنا وغيره بالنسبه الهم مش غلط, المفهوم جدا غلط واصلهم.

انا ضد مثل هاي الافعال و لكن انا نقلت القصه لانها ما عجبتني واكيد مش نوع من انواع التفاخر بأعمال اخوي :$

اهلا وسهلا فيكي مرّه تانيه

 

Ahmad Al-Mahrouq

بحكيلك عقد...او يمكن غيره انو عأساس مش صاححلي البس متلهم فغيرانه....او ان السن اله احكامه وشكلي كبرت وبطل يعجبني العجب :)


هو قمع...هاد هو اللي جايب اخرتنا اساسا
ولادها O_O
معقول نوصل لهيك يوم!!!
الله لا يبلينا يا رب

Ahmad Hamdan

السواليف و القصص الطرمه هاي تخصصي و لعبتي :)

معك حق...لسا الشباب صايرين غريبين عجيبين بتسريحات الشعلا و باللبس
يعني جد بكون نفسي احكيله الكابتن ماجد استحى يعمل اللي عامله بشعرك :)

مهمه في اوجازه ولازم البنت ترفه عن نفسها برضه...بدك تخنقها للبنت

المشكله بهيك اهل ان بنتهم بتبطل عندها مقياس للشي الغلط, ما بتعرف شو التصرف الغلط وفجأه الاهل بصحو عحالهم و بقتلوها و بحكولك شرف العيله....طيب وينكم و ليش ما فهمتوها صح لتيجو هلأ تلوموها؟؟

طبعا بنلام اخوي و زي ما حكيت صار في طوش على هيك مواضيع, بس اخوي انا واياه لحالنا و انا لحتى اضل اعرف اخباره بحاول اني كل ما شديت عليه ارجع العلاقات علشان يضل يحكيلي وكله اول بأول لبابا وماما بنتقل و بابا بعرف كيف يتصرف معه....شريره بعرف

 

Susu

LOOOL the thing that this is exactly what is happening these days at the malls :$

Ameen ya rab

قط البكتريا

زمن بابا سامحلي خلص....هلأ كل العيله سامحتلي صارت :$

ما عجبني وضعك يا مان...بتختلط بهيك ناس ...وبتختم الجمله تسهر بالبارات
اييييييش في!!!

بعدين قرأت اخر جمله...المتخلفين الرجعيين اللي زينا...فااااااااااا اتطمنت :)

هاد اللي قدرو ياخدوه من الغرب...وشوي شوي بتلاقي البنت اللي فوق ال 18 ساكنه لحالها :)
يعني انا الي 50 سنه من وقت ما صرت 18 ساكنه عند اهلي
جد كتّر الله خيرهم اللي ساكتين علي :)

 

يماااااااا أما شو عالوجع
بالنسبة لأزياء الصبايا فعنجد اشي مقزز .. ازا احنا بنات و متدايقين شو يقولوا الشباب .. عنجد يرحموا حالهم .. و عأولتك ما بلبس هيك الا وحدة اد الدبة !! اشي بقرف ..
و بالنسبة للبلاطين الرش في نظرية اسمها الخزانة و الفازلين .. يعني الأمورة منهم بتطلع فوق الخزانة و بتنط جوا البنطلون بعد ما تدهن حالها فازليــــــــــــــــــن هاهاهاهاهاها
اما بالنسبة للعمو ابو الصبية ما بقدر اقول الا "الله ياخده .. ديوث " شو ممكن يطلع منو !!

 

Marwa Joe

جد اشي بدايق, يعني بنت و بتكوني قرفانه حياتك و برضه مش لابقلها بس تقليد لاشي تافه ولابسته

هههههههههههههههههه عجبتني هالنظريه :)
جديده علي بصراحه

الله يريحك....ايام وانا بفكر كيف بلبسوه بالزبط و مش خاطرلي

العمو...الله يهيده ليعرف يربي صح و يقوم بواجبه الحقيقي :(

 

Thank you for this post.. It's really true but the problem is that they never think that they are doing something wrong!!

 

Tareq
Indeed ...and here lies the problem
Thanks for passing by

 

معلش احنا بنشجع ع"الشفافية" في التعامل
و "تضييق" الفجوة بين الاجيال

v_v

 

برأيك إحنا مش مقصرين بالأمر بالمعروف والنهي عن المنكر؟! يا ريت تصير عنا الجرأة الأدبية إنا ننصح بعض بالحسنى.

 

Rain

هههههههههههههه عجبتني " الشفافيه" هي اول مرّه بفهم معناها و بشوف تطبيقها عأرض الواقع :)

اما بالنسبه لتضيق الفجوه...فالعالم انخنقت و خنقتنا :$

بس تحشيش ليش الحكي :))))

Rana

طبعا مقصرين لانّا ماشيين بأضعف الايمان بمعظم الاصلاح...كله بالقلب للاسف

ان شاء الله يجي هاليوم