Things I Like To Whisper About

Would You Hear Me Whispering

International


قبل كم يوم كنّا معزومين عالفطور عند قرايبنا و كالعاده واحنا مروحين بالليل انا و اخوي بنعمل Round - على رأيه - بنعملها انا واياه من فترة لفترة هيك لتغيير الجو والنفسيه, هو بسوق و بستلم ال DJ :) ,و انا بفتح الشباك و بخلي الهوا ينعشني, بنشتري اشي نشربه و بالعاده بنشتري Orio blazered او Orio pleasure - مش متزكره اعتقد هيك اسمو المهم انو شراب سخن زاكي فيه اوريو بدخل المحل و بحكيلهم بدي من هداك :) - من عند Crema Cream و بنلفلف بكل مكان, من الصويفيه لعبدون للرابيه, ساعه لفلفه و بنحكي فيها بأي شي, عني او عن شغلي قصصي , او عنه و عن شغله وقصصه, هالمره الحكي كان عن موضوع العنصريه, وانا صغيره و عقلي ما شاء الله عليه مش صغير الا شوي ,كنت كل يوم و التاني اتقاتل انا وبنت على اردني و فلسطيني :) اه بحكيلكم كان عقلي ما شاء الله علي اشي احسد عليه, و بعد ما كبرت حاولت الاقي سبب لكل هالطوش ما لقيت

قبل فتره اجتمعت مع صاحباتي حكولي نفس الشي عن بناتهم, صاحبة سلطيه و صاحبة خليليه, بعد التدقيق و التمحيص اكتشفنا ان المدرسة هي اللي بتزرع مثل هيك افكار بعقول الصغار و خصوصا انه لا كان ببيتنا و لا حاليا ببيوت صاحباتي اي نوع من هالعنصرية او الحكي عنها, من الحكي انه كان في يوم تخريج الروضه بالمدرسة و صارو المعلمات يتقاتلو على ان عدد الفقرات اللي فيها اغاني وطنيه فلسطينيه اكبر من عدد الفقرات اللي فيها اغاني وطنيه اردنيه و هالحكي قدام الطالبات اللي تلقائي تشكل عندهم افكار غريبه, يعني لو هالمعلمتين تناقشولهم بغرفة المعلمين - بغض النظر عن موضوع النقاش اللي ما بدي احكي فيه - كان ما كونو نواة لافكار قادمه في عقول هالبنات

و هالموضوع نقلنا انا و اخوي لنوع العنصرية الموجوده عنّا - مهو لازم يكون في عنّا عنصريه ولو - فأكتشفنا انّا ما شاء الله موحدين الامّه بعيلتنا :)
انا بابا من يافا و ماميتي من نابلس, يعني خبُز و جُبنه - بضم الحروف- و اخوي الوحيد اللي بحكي يافاوي بالبيت, و كل ما ماما تعلّق على كلامه بحكيلها " ماما بعد الهُسُهسه ما في كلام يتعلق عليه :) " المهم
اخوي الكبير متزوج بلغاريه, يعني عبود مميتو بلغاريه, اخوي التاني متزوج أربداويه , يعني فروحه ماميتها أربداويه :)

عمتي متزوجه رمثاوي , عمي متزوج اندونيسية و بنته - بنت عمي - متزوجه الماني,خالي متزوج مصريه وخالي التاني متزوج مغربيه, بنت خالي متزوجه ليبي , و اختها متزوجه اريتيري و اختهم متزوجه امريكي, اخوهم متزوج أربداويه, و اخوهم التاني فلبينيه و اخوهم الثالث متزوج امريكيه :)

يا سلاااااااااام....جد موحدين الامم بعيلتنا طلعنا :)
فأنا مضطرة ان عنصريتي تكون انترناشونال لظروف عائلتنا الكريمه :)


39 التعليقات :

ههههههههههههههههه, أما عيلة International فعلا, طيب يا ستي أنا عمي متزوج أمريكية , وخالي متزوج رومانية , وعمتي متزوجة مصري فاحنا ثلث إنترناشونال

 

Ahmad Hamdan

شفت بالله عليك
و شكرا الك زكرتني بعمي المتزوج اندونيسيه و خالي المتزوج مصريه :)

كنت ناسيتهم

اه صح وفي ابن خالتي متزوج روسيه, بس ما بحبها ما بعرف ليش ما بتطيقني :( فما حكتبها, مش سمعه و طلعتها عحالي :)

 

والله حلوة عيلتكم هاي الانترناشونال:)
والله موضوع العنصرية متفشي بين الناس ومش بس سببه المدرسة والله بعض الاهل الهم دور كمان، ناس عقولها صغيرة ومش عارفة هالايام حاسة العنصرية منتشرة وعم بتزيد!

ضحكتيني عالهُسهُس
مرته لابن خالي نابلسية وبتحكيها ولما بنحكي هِسهِس بتصير تضحك علينا!

 

هاد بالضبط متل عيلتي الكريمه :)
العنصريه موجوده في كل مجتمع لكن في مجتمعاتنا العربيه واضحه خاصه لانها تهتم بالاصول وعلى الرغم انه نبينا صلي الله عليه وسلم حرمها وحاربها لكن بالصلاة ع النبي عم تكبر
انا وبشكل عام ما عانيت من العنصريه لكن اختي عانت منها وبشكل كبير كونا غيرنا مكان بيتنا وكانت العله انه هاي العنصريه مسنوده من المعلمات لهيك اذا حضرت جناب الوزير بده يخلق جيل منتمي اول شي يعلمه للمعلمين الافاضل

 

Kollo kom wel Eritrean kom tani, bas bsara7a 7elw hek ba7ess tanwee3 :] anna ommi men Irbed w aboui men Irbed fa ma fi tasleyeh 3enna, w ta7eyyeh khassa la Farou7a la2enha garaba (bidoun 3onsoreyyeh).

 

adesh nafsi aroo7 3ala crema cream...lesa 2ada2o mnee7 ?
iza kan fe eishi mbayen be gaza fa hiya el 3onsoreya..3al aleel into sar 3endko wa3e bel!mawdoo3..be gaza lesa mota asekeen feha 3ala inha eishi mneee7...5soan inta fat7awe..ikrah a5ook el 7amsawe...ma 3aleena...2oltele keef creama cream ?

 

فعلا عائله انترناشيونال :)ـ
اختلاط الشعوب هو اللي بمحي العنصريه اللي بداخلنا. لأنه دائما في ناس جيدين واخريين سيئين من اي مله او دين فغلط الواحد يعمم. بس ما شاءالله لو عيلتك كلهم يتجمعوا بمكان واحد وكل واحد يطبخ اكله من بلده ويلبس الزي التقليدي بتعملوا
world fair :)

 

loool
you are so funny :) your family is like the United Nations !

My family is all made from Beiroutees, no international touch to it. Come to think of it, it is boring.
Miss you, hope you and your family are doing well :)

 

و الله الموضوع اللي بتحكي عنو كثير مهم ، لانو في كتير ناس موضوع العنصرية مات عندهم من زمان ، طبعا الحمد لله لهالشي هاد لانو لا هو من الدين و لا حتى من الاخلاق ، بس للاسف لازال كثير ناس تانية بتلعب على هاد الوتر ، و كل ما يحسو انو الموضوع صار موضوع بارد و بطلو الناس يسألو فيه بردو يسخنو الموضوع مرة تانية و يعززو الفرقة و العنصرية ، بس الادهى و الامر الناس الجاهلة زي اللي حكيتي عنهم ، مثل هيك ناس مش بس بعززو الفرقة و الكراهية بين بعض ، لأ بعلموها للصغار كمان

الرسول عليه الصلاة و السلام عندما سمع اثنين من المهاجرين و الانصار اختلفا ، فقال احدهما "ياللانصار" و قال الاخر ""يا للمهاجرين" فقال عليه الصلاة والسلام دعوها فانها منتنه ، اشارة للعصبية القبلية

ان شاء الله بيجي يوم ما بنختلف على الاصل أكان اردني او فلسطيني ، لأ مش بس هيك ما راح نذكر اشي اسمو اردني او سوري او مغربي او مصري

 

مسا الورد ويسبر
انا من المتابعين لمدونتك...صحيح ما بعلق على المواضيع بس احيانا ما بكون في بالي تعليق مناسب او ما بقدر الاقي كلمات مناسبة اعبر فيها ...الخ

هلأ انا ما لفت نظري بهادا البوست موضوع العنصرية..مش لأنو مش مهم "هو مهم كتير وبنواجهوا بحياتنا كتير" بس لانو في شي تاني لفت نظري وهو اللفة بالسيارة :) بصراحة حسدتك عليه شوي..عندي اخوة شباب اكبر مني ومتزوجين بس كتير احيانا ما بنلاقي موضوع مشترك نحكي فيه :( فا بتمنى يصير بيني وبينهم هيك علاقة

كل الود ويسبر ومدونتك اكتر من رائعة :))

 

International families are fun and have a positive effect on the kids; they grow up open minded!

 

هالقصة ذبحونا فيها في الجامعة ، في دكاترة خصوصاً بكليات الطب لأنه الامتحان عملي بركز على اسم العيلة و من وين الاصل ، و دكتور ثاني في يوم و اثناء مناقشة حالة مريض ترك الموضوع و مسك كل واحد يسأله عن اصله من وين و الشب اللي حكاله من عمان صار يحكيله لأ أصلك من وين شو عمان؟؟
بس و صل عندي جحرته و مسألش راح على اللي بعدي

 

بس اريتري وين لقتوه ؟؟

 

و لهلا ما نقلوا مقر الامم المتحدة لعندكم
على فكرة بردو نحنا عنا هيك بالعيلة خلط و اضيفي عليها افكار خلط كمان

بالنسبة للعنصرية
اول مرة سمعت فيها كان بالجامعة
و كانت لحظات حقيرة بصراحة
خاصة اني كنت بميل للقومية العربية ( معلش كنت صغيرة )
:)

 

ويسبر يا ويسبر
واضح أنك لم تنتبهي لعلم الكيان الصهيوني ضمن صورة التدوينة

 

I like the diversity in your family, you have people you can visit in many countries!

Anonymous, do you happen to study at JUST? :)

 

الكيل بمكيالين

الله يحلّي ايامك يا رب :)
في اهل بزرعو الفكرة بعقول اولادهم من همه صغار, بس القهرة بس تيجي هالافكار من برّه و من مكان المفروض يزرع العلم و الثقافة و التطور بعقول هالصغار

هههههه...مش دايما بتطلع من ماما هالكلمة , لكن بس تنسجم بالحكي و خصوصا مع خالاتي :)

Sozan

هههههه اه صح ... وانت كمان جزء من هالانترناشونال :)

صلى الله عليه و سلم, للاسف كل مالها بتزيد كمان
انا بواجه كم من سؤال خلال شغلي عن الاصول و من وين و هالقصص, خصوصا بس صرت رئيسه قسم, بحكيلي واحد من المدرا, شكلهم فكرو فيكي عرق سلطي ...سلطي لان نص المدرا سلطيه :)

المشكلة المعلمين الهم تأثير قوي على الطلاب ...المفروض ينتبهو لهيك قصّه

 

احلى عيلة, الله يخليهم
:)

و فعلا كلامك صحيح احنا- الكبار- اللي بتزرع في الصغار العنصرية التافهة واللي مالها معنى

موضوع حلو كتير, شكرا ياويسبر
:)

 

Rand

LooL ... 3afekra, kteeeeeeeeeeeeer mo7taram el shab :) w be7ke 3araby kaman :D
heheh 7abet-ha jay ma fi tasleyeh 3enna :)
yosal ya amar...Farro7a hay 2awal 7afedeh fa 2elha m3azzeh 5asah, w ma5deh 5effet dam 2ahel yafa w 2ahel Irbid fa ta5yally 2adeesh ne3'sheh 7abebti .....w 3abood 7bebe bardo 7a wasello salam , 7ayatna hadool :)

Abuelsharif

kont met2akdeh 2eno Crema Cream 7atelfet nazarak :) bejannen mesh bs mnee7 ...laken b7es 2enno bs 2e7na 2elly benro7 3aleh :S dayman fade :(
el3onsoryyeh 3endkom betwaje3 el2alb :( 2e5wan nazleen fe ba3edhom allah yhaddy elbal w inshallah bes7o 3an 2areeb

sa7ee7 shoo 2esmo had 2el2eshee elly feh orio ???

 

Jaraad

اه من كل قارّة عنا قرايب :)

سبحان الله حتى دينا بحثنا على تعارف الشعوب و القبائل
في نفس العيلة بتلاقي الاخوان والاخوات كل واحد بشخصيه و بأفكار منها الصح ومنها الخطأ

عجبتني الفكرة :) يا ريت تزبط
للاسف ما بجتمعو كلهم مع بعض, حتى اخواني ما بجتمعو , بعرس اخوي اجتمعنا وكانت فترة بتجنن ...ماما نفسها نجتمع كلنا مرّه تانيه
ان شاء الله عن قريب.... وربنا يجمع كل المغتربين بأهاليهم عن قريب :)

Noura

ya 100 welcome be 2a7la Noura
I miss u more, 6awalty 3alena
Ramadan Kareem....

LOOL yeah u can say that :)

No it's also interesting to understand each other and don't have to describe each tradition u have and why u have to do :)

Al7amdolellah we all r fine...hope u r fine too
don't be late ya amar ...jad we miss u kteer

 

Dr.Mohammed

الحمد لله فعلا بتختفي عند ناس و لكن بالمقابل اللي لسا عندهم العنصرية زادت كتير
مشكلة اذا بتنزرع هالافكار من هلأ بعقول الصغار, كيف بدك تقنعهم بالحقيقه بعديها

صلى الله عليه و سلم.... هاد دليل انها صفة بترتبط بالجاهليه و من زمان مكروهه و مرفوضه الله يهدي هالعالم
ان شاء الله يجي هاليوم

Bana

يا مسا الفل
انتي نورتيني بتعليقين من قبل :)
و وجودك بسعدني بتعليق و بدون تعليق...مع ان التعليق بسعدني نقطه اكتر :)
اكتبي اي شي بخطر ببالك اي شي بتكتبيه حيكون بجنن

اخوي اصغر مني ب 9 سنوات :) و برضه بنلاقي مواضيع مشتركه نحكي فيها, وحتى و هو بالمدرسه
هي شغله تعود من الصغر يمكن, و ممكن لاني وحيده كنت قريبة من خواني

انتي حاولي اشركيهم بمواضيع بتهمك بحياتك وحتى لو ما كانت بتهمهم و شوي شوي بتعودو يسمعو اخبارك :)
ان شاء الله ربنا بهدّي بالكم انتي و اخوانك والله يخليكم لبعض

تسلمي يا قمر ..كلك ذوق و وجودكم هو اللي بحلي المدونه

 

Haitham

‎you are right, mixing different cultures and traditions produces interesting generation

Anonymous

مأساة بس يكون التقييم بالجامعه او بالشغل على اسم العيلة و للاسف هاد كتير بصير عنّا
منيح اللي مشيو بالجحر بالعاده ما في شي بسكتهم لتحكي بالزبط والتفصيل

بتزكر ولاد عمتي اللي والدهم من الرمثا, سألوهم انتو من وين حكولهم من الرمثا, السؤال اللي بعدو كان...خوالك من وين :)

Anonymous 2

هههههههههه...بأمريكا :)
راحت تشتغل بأمريكا عند اخواتها اللي متزوجه ليبي و اللي متزوجه امريكي و هناك تعرفو على بعض
سبحان الله النصيب :)

 

Jafra

اقترحنا عليهم بس ما رضيو :)
حلو بصراحه.... وخصوصا بس يكونو ناس مناح جد حلو
ثقافات وعادات و افكار و اسلوب حياة جديده

جبتيها...هاي الكلمة المناسبه لهيك صفة
هههههههههه...المهم انك هلا الحمد لله طبتي :)

جعفر

شايف العلم الاردني ...هاد انا جبته من صورة تانيه و حطيتو فوق علم الكيان الصهيوني و فتشت الصورة بس للاسف ما شفته هاد اللي فوق

شكرا للتنبيه ... وتم التعديل :)

 

Ehab

First of all welcome here :)

It is nice to have all this cultures , and I've been invited to visit many of them, I'll start next summer inshallah with Bulgaria :)

I think we have this kind of thinking in most of our universities .... unfortunately

Wafa'

تسلمي يا رب ...و يخليلك اهلك واحبابك ان شاء الله

الكبار بالعموم و المدرسين بالخصوص بتحسي ان كلامهم كتير ثقه عند الطلاب و باخدوه انه صح 100% و فورا بطبقوه

فاذا كانت الافكار غلط بتنتقل للطلاب بتضلها مزروعه بعقلهم لفترة طويلة وصعب تتغير

شكرا لوجودك و تعليقك
و كتير سعيده ان الموضوع اعجبك :)

 

و النعم ولله من أهل يافا و نابلس :)
عنجد عيلة انترناشيونال :) حلو التنويع اللي صاير عندكم بالجنسيات، و أكيد انو بعطي روح جديدة و طعم مختلف لكل اشي، و بساعدك تتعرفي على ناس و أطباع و عادات مختلفة :)
حلو انو كل واحد فينا يفهم التاني على أساس شخصيته و سلوكه و طريقة تعامله مع الناس و يحكم عليه على هالأساس، بدون ما يكون أساس حكمه الجنسية! بس للأسف هاي التفرقة مترسخة كتير بمجتمعاتنا و بالمجتمعات الغربية كمان، بس احنا لازم ما تكون موجودة عنا لانو ديننا نهى عنها بكل أشكالها..
أتوقع الأجيال الجاي تكون هاي المشكلة أخف عندها لانو هلأ المجتمعات مفتوحة على بعض كتير...
أنا ما في بعائلتي تنويع لهالدرجة، بس أعز صديقات إلي و اللي بعتبرهم أعز من الإخوات، جنسياتهم: فلسطينية و لبنانية و عراقية و جزائرية، و من أحلى الشغلات بعلاقتنا انو كل وحدة من بلد....

 

ويسبر.. عدنا :)
غريب جدا تنوع عائلتكم و سبحان الله حين قال "و جعلناكم شعوبا و قبائل لتعارفوا"

بالمناسبة.. عن جد غمك نابلسية؟؟ طبعا أجنا عايشين في نابلس بس ما بنستخدم لهجتهم (بنجاول نحافظ على اللداوية او اللهجة الفلسطينية عموما :)

بس مثلا انتي بتحكي انو اخوكي بس اللي بحكي يافاوي.. يعني انتي بتحكي نابلسي.. يعني بتحكي أني أسمي ويسبر (اني بدل انا و همزة أسمى مضمومة ههههههه)

 

MrsH

تسلمي يا رب... والنعم منك :) هيك بحكو صح :$

صح... احكامنا بنحاول ما تكون على معرفتنا المسبقة او معلوماتنا عن الاصل, بنحاول نتعامل مع نفس الشخص و نكون فكرة عنه بعد التعامل معه

الله يخليلك صديقاتك و يخليكي الهم يا رب..

جعفر


ويلكم باك :)
سبحان الله.. والكل اجتمع في نفس العائلة كمان :)

اه ... بس ماما بعض كلماتها نابلسية و خصوصا بس تجتمع مع خالاتي, احنا بنحكي عادي :) بس اخوي بستخدم كلمات غير مألوفة بالبيت و بتطلع يافاويه اصليه :)

ههههههههه...لا ال " أني" بنسمعها ببيوت خالاتي لان ازواجهم نابلسيين برضه و بس يجي حد يزورنا من نابلس :)

سلملي على حارة الياسمين ...كتير سمعت عنها :)

 

العنصرية شيء مقيت، و المشكلة إنه كل واحد بينادي بالعنصرية بيحاول يغلفها بغلاف سامي أو جذاب مثل: الدين، الوطنية، الذكاء، القوامة (عنصرية الرجال ضد النساء)، القوة، النفوذ، و غيرهم.

و على الرغم إنه جميعنا يؤمن إنه "لا فرق بين عربي و لا عجمي إلا بالتقوى" إلا إنه في داخل كل واحد شعور عنصري و لو ع سبيل المزح مثل ما اتفضلتي
الله يخلصنا من هيك شعور

 

ويسبر
اسمها الياسمينة.. و هي فعلا من أروع الحارات
أنا تربيت في الحارة المجاورة لها و هي حارة القريون

ولا يهمك بإذن الله قريبا نازل لعى الياسمينة و بوصل سلامك

 

ما شاء الله ...عن جد انترناشيونال
بس ضايل عليكم واحد او وحده من اميركا الجنوبيه ...وهيك بتكمل ...على فكره اليوم تذكرتك بصلاة التراويح ...اليوم اول مره من اول رمضان بصلي التراويح في الجامع ...عادة بصليها في البيت وباخد راحتي لانوه كانت تجاربي السابقه بتراويح الجامع مش مشجعه ...لكن اليوم كانت رائعه جدا ...و تذكرتك على قد ما كتبتيلنا التراويح وفعلا روحت بنفسيه مراحه كتير

وعلى فكره كمان....مساء الفل

 

Saleh

فعلا...هي شيء مقيت
و دائما في الها مبرر عند العالم

و حتى مزح مش مقبوله .... و اللي قصدته بعنصريتي انها مش موجوده مدامها لجميع الدول :)

ان شاء الله ما يكون في داخلنا اي ذرة من العنصرية و اذا في ان شاء الله بنتخلص منها

جعفر

ايوه..الياسمينه :)

ماما هناك كانت عايشه لفترة و هي صغيره :)

بكرة ان شاء الله بسأل ماما عن القريون, اكيد في حد من قرايبها ساكنين هناك :)

تسلم يا رب :)

 

Nissan

يا مسا الفل و الياسمين

تقبّل الله :)

الحمد لله انها كانت تجربة حلوه

اهااا...خلص بركي جبنالنا وحده من البرازيل لاخوي الصغير :)
هو حيكون بدو ارجنتينيه بس ممنوع...برازيليه و بس :)

 

LOOL..3amleen tabadol thaqafe ma sha2 alllah fe 3eletkom el kareemeh,. .
bema ennek 3ala ettela3 be hal jenseyat el mo5talefeh sho btensa7i?:P
bel nesbeh lal 3onsoreyeh fa heye mawjoodeh wain ma trou7i .. 3nd el 3arab wl mesh 3arab.. azon shee fetre fel bane adam enno ykoun 3onsory... wallaho a3lam

 

Ahmad Merie

yes...y3nee ma5deen menhom w m36enhom :) 3adeleeeeeeeeen 2e7na

bansa7 bel m7ally O_o w la 2oshaje3 3ala 3'erooo fahem :(

lool just kidding...kul elnas 5ear w barakeh :)

fetra w lazem net5allas menha 2areeb jeddan

 

http://ayaalmusa8.blogspot.com/2010/09/blog-post.html

 

اهلا و سهلا بأية

قبل كم يوم تعرّفت على مدونتك اللطيفة و عجبني كتير مواضيع خصوصا اللي تحت اسم "علموني هني علموني"
جميل جدا :)
و فعلا ...تقريبا بحكي بنفس الموضوع

نورتيني :)

 

من كل يستان زهره,,
وكل ورده أحلى من التانيه :)

 

ايووون ...هيك شي :)))
الله يحلّي ايامك يا رب

 

ايووون ...هيك شي :)))
الله يحلّي ايامك يا رب