Things I Like To Whisper About

Would You Hear Me Whispering

الحمد لله :)




كيفكم و شو اخباركم
اول شي بحب اشكركم كتير كتير على دعواتكم اللي الحمد لله و بفضل من الله جابت نتيجه :)

الموضوع وما فيه اني وصلت لمرحله فوق الاشباع من القرف من الشغل وجو الشغل, فقررت اقدم على اجازه بدون راتب لمده سنه , و خصوصا بعد ما صحللي اكتر من فرصه شغل بالامارات عند خواني, وصار لازم اروح هناك ليصير الموضوع رسمي, بأختصار بسيط اني قدمت اجازه ب 24\8 وللصدفة الغريبه صاحبتي قدمت برضه بنفس اليوم بدها تسافر على السعوديه فجأه وبدون ما تخبرني طلعت موقعه عقد وانا الشاطره كنت احكيلها كل خطوه بتصير معي...خلينا نمشيها شاطره علشان احفظ ماء وجهي , صاحبتي معها فيتامين واو اجازتها اللي انرفضت فجأه توافق عليها اما ان فراح ناس بعرفو موظفين مسؤولين بالوزاره يشوفو شو صار عليها فحكولهم انهم نسبو عليها موافقه و ضل كم توقيع بما انه في موظفه بدها تيجي بدالي.

الموظفه اجت و دربتها و فرجيتها كل الشغل عأساس خلص بديلتي, يوم ما توافق على اجازه صاحبتي ب 19\9 ضليت يومين مش عارفه انام بالليل و قررت ب 21\9 اروح عالوزاره اشوف شو صار بمعاملتي و اذ بملفي كلّه مختفي :) ولا بأي مكتب و اللي حكو انهم وقعوه من قبل حكو انه ما مرق عليهم و عالاجهزه مبين انه بس واصل ب 31\8 و ما حد ماخد عليه اجراء, و سكرتيرة الامين اللي حكت لصاحبتي انه موقع من الشؤون الاداريه و موجود على مكتب الامين و حاطط عليه ورقه مكتوب عليها للدراسه انكرت كل هالحكي و حكت ما مر عليها و مدير الشؤون الاداريه اللي كان موقع عليه حكالي ما مرق علي :( فجأه الدنيا صارت سوده مش عارفه شو اعمل - عفكرة هاد نفس يوم الجمعه مع الصبايا واللي رحت متأخره عليه لاني نمت نص ساعه قبل لاطلع لاني طول الليل مش نايمه ...وخده بالك حضرتك :) - المهم ما عرفت شو اعمل حاولت اشوف الوزير طلع مش موجود روحت و تاني يوم حكيت لمديري اني طالعه عالوزير واذا ما اخدت حقي بدي اروح عديوان المظالم, انا بدي حقي مش اكتر , وبالشغل صارو يكثفو الطلبات حتى انجز اكبر جزء قبل ما اروح لاني هددت بأني حستقيل بأخر 9 اذا ما صار اشي

المهم اتصلت فيي صاحبتي اللي بتشتغل بالوزاره و كل يوم بتعمل حملة تفتيشيه على ملفي بتحكيلي لقيته سبحان الله بالغرفه اللي فتشتها 50 مرّه عأساس فجأه بيّن و منسب عليه بالرفض من 6\9 :( انا كان فيي عقل و طار, حكيتلها بدي اروح اقابل الوزير حكتلي ان يومها المسا الوزير مسافر و بدو يغيب اسبوع, شو تعملي يا بنت..شو تعملي يا بنت هب شو خطرلي ....اروح عبيت الوزير :) وهاد اللي حصل, اتصلت باخوي وسألته تروح معي حكالي لتوصلي بكون لابس, سألت عن العنوان شخص المفروض بعزني كتير و حكولي انه بزور الوزير ببيته , اعطاني العنوان غلط طبعا , من هون لهون دبرت العنوان و رحت و دقيت الجرس :) حسيت حالي بفيلم " على باب الوزير" الله يسعدها بنته طلعت و اخدت الاستدعا و حكتلي بس يرجع بابا بعطيه اياها, روحت و بس وصلنا البيت حكت لاخوي اني مش مرتاحه وخايفه يطنشوها, رجعنا مره تانيه - الله يرضى عليه يا رب وين ما راح اللي فش قلبي و استحملني :) - وصلنا هناك لقينا ناس جايين بسيارة الوزاره حكولنا بدو 3 ساعات ليجي لانه بأجتماع, روحنا تغدينا و شربنا الشاي و طلعنا مره تانيه, لقينا 50 الف سيارة واقفه رنينا بسأل البنت معالي الوزير موجود حكتلي ما بعرف, سكتت بعدين سألتني انتي اللي جبتي الورقه قبل شوي, حكيتلها اه, 5 دقايق اجت بالاستدعا مكتوب عليه " الله معك...موافق" وموقع من الوزير :))))))


فاااااااااااااااااااااااا يا جماعه ابتداءا من 1\10\2010 انا مجازه :))) و قريبا جدا سأكون بالامارات ان شاء الله

شكرا الكم كلكم و الله يرضى على كل واحد و وحده ساعدوني بالموضوع, ساعدوتني لاخد ابسط شي بالحياه....حقي مش اكتر

عندي اجازات سنويه اخدتها و كل يوم مديري اللي تغير صوته 1500 درجه بترجاني اداوم بس يوم لاعلم الموظفات اللي الهم سنين بشتغلو معي ومش راضي يشغلهم و يعلمهم الشغل, قررت اروح بكره وبعده مش علشانه بس علشان رب العالمين حتى ما اكون ظالمه حد او مقصره بشغلي......بس سبحان مغير الاحوال

الحمد لله رب العالمين اللي ما النا غيرو واللي ما برضى بظلم عبده.....فهلأ بتقدرو تحكو" تقريبا" - لان فرووحه لسا هون - ان ويسبر از باك :)

** اكتشفت ان الكل صار كاتب اكتر من موضوع حتى اللي بغيبو 100 سنه بين كل بوست و بوست كاتبين اكتر من موضوع :$ بس على مين...كله ان شاء الله حينقرأ قريبا جدا

اترككم بخير يا رب :)

59 التعليقات :

مبروك :)
للاسف هالايام الواحد صار يهاوش الدنيا بس عشان يوخذ حقه لا اكثر ولا اقل
بالتوفيق ان شاء الله :)

 

أول اشي عن جد فرحتلك ، الف الف مبروك ، و ما بتعرفي وين الخير ، ان شاء الله ربنا بقدملك اللي فيه الخير ، و انا متاكد انك يمكن صليتي استخارة ابو ألف مرة :)) و يمكن مرت عليك ايام و ليالي و انت صاحيه و متوتره ،عن جد مشكلة لما الواحد يحس انو الطرق سكرت بوجهو ، بس سبحان الله ربنا بيسرها من طريق انت اخر ما كنت تتوقعو ، عن جد الاية (ومن يتق الله يجعل له مخرجاً ويرزقه من حيث لا يحتسب) عن جد معناها اكثر من رائع

بس جد غريب هالموقف!! هلأ ممكن الواحد يروح على بيت الوزير عشان يوقع معاملة؟! هاي جديده علي و ما عمري سمعت فيها ؟

و شغله تانية شو قصة يوم الجمعه مع الصبايا صرتي حاكيه عنو مرتين ، و بما اني بقرأ المدونات مرة بالاسبوع و كل 300 بوست مرة واحده ، بس ما لقيت اي اشي عنو ببوستاتك القديمة ، فشو القصه؟

 

ألف مبروك الشغل و الحمد لله ع السلامة (إنك خلصتي من هيك عالم)، و ربنا يوفقك و يسهل أمورك

 

Mabrouuuuuuuuuuk, testahali kul khair :)

I liked how you went to the wazeer's house. Seriously, I though I'm watching an Egyptian movie :)

El7amdeall it worked out the way you wanted. Allah ma3ek in UAE. Keep us updated.

Love

 

احلاااا وزير ومعالي وزير :)

الحمدلله انها انحلت ومرحبا بك في ربوع الامارات :)

ديري بالك عفروحة ..وربنا ييسرلكم ويكتبلكم كل خير

 

سلام ياقمر
والف مبروك يارب والله يعينك على كل هاي الظروف الصعبه اللي مرت عليك
المهم بالاخر حصلتي نتيجة والحمدالله رب العالمين لانك انت وحده منيحة وطيبه الله يسيرلللك امورك ومنيح انك روحي على بيته لانه لو ما روحتي كان ماراح يوافقو وكل الدينا بتمشي هيك بالواسطه
بس انا هلا حاسه فيك انه الدينا ما واسعتك من الفرحه انشاالله على طول يارب
والله يوفقك يارب ويرزقك على قد نيتك يارب وراح اشتقللللك موت يا ياعسل وبتمنى الللك الخير وين ما روحتي يارب

 

شو هاد قصة ابن بطوطه؟!!

جد مش حكاية لشو كل هالفلفه حد مقدم ع اجازه عطو ياها شو هاد
؟

عن جد الله يعينك، طيب ليه ما حكيتي يوم الجمعه انو هيك هيك القصه؟!!

ع فكره انا زعلانه
حتصيري ويسبر من الامارات مش من الاردن:(

يللا مبارك ان شالله
وكل التوفيق في التجربة الويسبريه الاماراتيه:)

 

هاي قبعت معك ... رحتي لبيت الوزير ... بس الحمدالله اتسهلت الامور
ان شاء الله بتنبسطي بالامارات الحياة هناك اسهل واسلس من هون بتغيري جو ووجوه جديدة

موافقة يابنتي :d

 

مش عارف مين وين بدي ابدأ بس أول شيئ الحمدلله على السلامه بعد غياب عن عالم المدونات ومبروك الموافقه على الاجازه. ان شاء الله بتلاقي شغل افضل واريح مع ناس بترتاحي بالشغل معهم.ـ
قصتك بالشغل بخصوص الملف بتقهر فعلا انه كيف في ناس زي هيك بدون اخلاق. بس طلعتي اشطر منهم بفضل الله تعالى واخذتي حقك غصب عن الجميع. بس والله الوزير طلع فيه الخير وعجبني كلامه "الله معك...موافق"ـ
بالتوفيق

 

والله و الف الف الف مبروك لاحلى ويسبر

شفتي كيف قدرةالله مشيت عليهم كلهم, سبحان الله الانسان يحسب انه يقدر يسوي شيء و مايعرف انه كله بقدره

يارب يسهلك اقامتك بالامارات وتكون احلى الاوقات هناك يارب, بعدين انتي فين راح تكوني مو برضه بيتك التاني

دائما افتكري كلام الرسول عليه السلام" استعينوا على أموركم بالكتمان . فان كل ذي نعمة محسود"
و هادا درس واتعلمتيه

و الله يوفقك يارب ويسعدك و يسهلك امورك يارب

:)

 

يا ولددددددددددددد !!
يا بنتي شو هالأكشن هاد كله!! ما احلى الواحد ياخد حقه و ما ابشع الظلم وما ابشع فيتامين واو
الله يرضا عنك و ييسر امرك و يفتحها عليكي و تنبسطي بهالسفرة كتير :)
حبيــــــــــــــــــــت

 

دعوة المظلوم ليس بينها وبين الله حجاب, بس عجبتيني بشغلة الروحة على بيت الوزير لأنو يبدو الأمور عنا بدون هيك تصرفات بتمشيش, يالله ألف مبروك على الروحة عللا الإمارات وانشالله بتنبسطي هناك, بدك تصيري زينا من جماعة الخليج :D

 

مبروووووك طبعاً من كل قلبي فرحانة مشانك ..
والله هو فيلم رعب ، ميش فيلم وبس!!
القضية فيها وزير ، وبيت الوزير

عفاريم عليك ، صاحب الحق ان سكت عنه راح منه قدم عينيه ياعيني..
والدنيا هيك صارت ـ ماشية بالعين الحمرا..اكتشف صدق هذه الحقيقة كل يوم.

الله يتمم ليك صديقتي الاردنية ويفرش لك طريقك دايماً بالسعادة وراحة البال.

كلامي ميش حايخلص، لكني خلاص أعوضها ثانية ان شاء الله..

والله حكايتك اليوم حكاية لن تفارق ذاكرتي، وهي حكاية يومية تواجه تقريباً معظمنا مع الادارات ، والمعاملات ـ والحياة.

مع أصدق تمنياتي لأختي
في رحلتها الجديدة..

 

Allouh

الله يبارك فيك يا رب :)

شفت بالله عليك.. جد حرب الموضوع قلب

ان شاء الله....شكرا محمد :)

Dr.Mohammed

الله يبارك فيك...ان شاء الله عطول تسمع اخبار حلوه و نسمعلك احلى الاخبار :)

استخاره و صلاه حاجه ما تعدش :)

وكل ما كانت تسكر احكي لاخوي مش قادره اتخيل ان الخير الي اني اضلي بشغلي :$
و الحمد لله ربنا كتبلي الخير كله

وانا واقفه قدام بيت الوزير حسيت حالي قديش صغيره وما في الي حد وما في كبير غير رب العالمين و صرت ادعيه بأي شي بخطر ببالي, جد حسيت ما الي غير رب العالمين و ربنا يسرلي المخرج :)

انا نفسي لو سألتني هالسؤال قبل او سمعت ان حد عملها ممكن استغرب الحركه, ما بعرف كيف خطرلي اروح, بالعاده بستنوه عباب الوزاره بس عباب البيت ....سبحان الله هيك فجأه خطرتلي الفكره

بالنسبة لجمعه الصبايا فمعك حق
كان لازم كتبنا اشي بعدها

رتبنا قعده للمدونات لنتعرف على بعض اكتر و كتير حلوه كانت ...انا و مياسي و نيسان و علا عليوات و رولا عرفات و ضحى والحمد لله كتير انبسطنا

 

Saleh

الله يبارك فيك والله يسلمك ...فعلا بدها الحمد لله عالسلامه :)
امين يا رب...اجمعين ان شاء الله

Susu

Allah ybarek feke ya rab...teslame ya amar :)
I still can't belive that I went there loool :D

For sure I'll keep u updated ...
take extra care of urself these days ya amar

 

WD

جد الله يسعده...بحكي لاخوي لولا العيب والحيا بدي ابوس بنته كنت :)))

الحمد لله....اهااا صحيح اذا اكيد ان شاء الله بنتلاقى هناك :)

فروووحه بعيوني ..امين
ربنا ايسر للجميع ان شاء الله :)

Fostog

اهلا بأحلى فستق بالدنيا :)

الله يبارك فيكي...شفتي يا قمر صاحبتك مش قليله طلعت
لو تسمعي " لدّي علي جاي " كيف جلّس عالتلفون و بعد ما كان يلف و يدور بالحكي صار بس يترجى اني اداوم
حسبي الله و نعم الوكيل على هيك ناس
بفضل ربنا مشيت الامور...انتي اللي بتعرفي الاعداء اللي عنّا بالوزاره, ما بعرف ليش ما بطيقو حد و بالذات بس يكون موظف من نفس الوزاره

الله يسعدهم البنات في مركز المعلومات ساعدوني كتير كتير....جد الواحد ما يقصر مع حد لانه سبحان الله بيجي يوم و بوقفو جنبه

هلأ بنصير نرتب اجازاتنا سوا :)
الخميس راح نفتقدك...بدنا نطلع كلنا الطلعه الاخيره قبل التوقيت الشتوي...بتتزكري هالطلعه :)

بوسيلي الاطافيل حبيبات قلبي و ديري بالك على حالك

 

مياسي

المشكله ان معاملتي قانونيه 100% وما فيها تحميل جمايل....مستوفيه الشروط و كله تمام لشو عالعجقه مش عارفه

شو احكيلكم....اول مرّه بنشوف هالوجوه الطيبه بدنا نقضيها حكي عن الشغل....بلا نكد...بدنا ناكل اشياءات زاكيه من نيسانه و نشرب اللاتيه و نتحدوث :)

لا تزعلي ولا عبالك...بكره بنصير نتلاقى عالنت اكتر من هلأ و بعدين بصير اوصيكي على اشياءات تبعتيلي اياها مع خالتو :)))
بعدين انتي و رولا اللي شجعتوني على الترك...بس ما غامرت كتير, اجازه مش استقاله :)

الله يبارك بعمرك...تسلمي يا قمر

قط البكتريا

ما عرفت حالي بهالحركه بصراحه :)
هيك فجأه وعيت لقيت حالي هناك

ان شاء الله...عقبال ما تلاقي الشغل اللي ترتاح فيه انت كمان

تسلم يا جدو.... مع اني خلص تعودت ان الكل اصغر مني هون :)

 

Jaraad

الله يسلمك يا رب....عفكره انت من اللي بغيبو سنين و كاتبين اكتر من بوست
شكلي حكتّر غيباتي لتضلك تكتب :)

الله يبارك فيك...ان شاء الله و فكرة تغيير الجو الوجوه هاي كفايه, لاني بديت احس حالي عم بتغير مع الشغل

جد بدون اخلاق و خصوصا اللي غيرو كلامهم...هدول صدموني ما توقعت اني اتعامل مع هيك ناس, بس ربنا كبير و الحمد لله وفقني

انا كانت فكره الاستقاله مركزه على تفكيري لكن لمّا ركزت شوي لقيت اني بطالب بحقي و ما بصير اتنازل عنه بسهوله و توكلي على رب العالمين هو اللي يسرلي كل شي
مشكلتنا ان في ناس فيها خير كتير بس اللي حواليهم سيئين والمشكله انهم بسمحولهم يتصرفو زي ما بدهم, انا حكولي انه ممكن يكتب اشي ما يساعدك, لاجراء اللازم او لاستكمال المعامله, هيك يعني مش مبين الموافقه 100% فبس شفت الجمله طرت من الفرح :)

تسلم يا رب ...عقبال ما تلاقي شغل زي ما بدك و احسن كمان و تتيسر امورك لترجع تنور بلدك و اهلك

Wafa'

الله يبارك بعمرك يا قمر :)
سبحان الله...ربنا ما بنسى عبيده و قادر على كل شي
لو اجيتي لشخصيتي الطبيعيه مستحيل اني اتصرف هيك حضل ورا حقي بس هالفكرة ما حتخطرلي...بس ربنا الهمني

وجود خواني هناك اكيد بسهّل الامور...والله يرضى عليهم بحكولي لا تشتغلي و ضلي عنا بس انتي بتعرفي اللي بتعود عالشغل ما بقدر يقعد فجأه خصوصا اذا مش مأمن حاله ماديا 100%
الله يجيب اللي فيه الخير ان شاء الله و انا متفائله

اكتشفت ان مشكلتي هي اني بحكي كل شي...صلى الله على محمد صلى الله عليه و سلم لازم نعمل بقوله الكريم

تسلمي يا رب..اجمعين ان شاء الله

 

Marwa joi

شفتي شفتي...مش قلال احنا بالبلد هههه :)

مغامرات تحكى لولد الولد, فعلا ابشع شعور, ما بتشوفي اشي حلو بالدنيا
امين يا رب.... ان شاء الله
تسلمي يا احلى مارووو بالدنيا

Ahmad Hamdan

دعيت كتير و الحمد لله ربنا استجاب
ومن ثم شكرا الكم انتو كمان لانكم ما قصرتو :)

للاسف بس هيك بتمشي الامور عنّا :(
اه حنضم لمجموعه ابناءنا في الخارج :)

Lati

اختي المغربيه الغاليه
الله يبارك بعمرك يا رب...وان شاء الله على طول يضل الفرح بحياتك
ههههههههه....طلعت بس انضغط بيطلع مني كتير...فورا عبيت الوزير :)

تعلمت ان الانسان لازم يتوكل على الله وما يقعد, لازم يشتغل هو عالموضوع و ما يعتمد على اشخاص تانيين و بهيك بس بمشي الموضوع

امين يا رب...الله يرزقك اضعاف اضعاف ما دعيتي لي به لان دعواتك زيك بتجنن :)

شكرا يا صديقتي الغاليه

 

وأخيرا :)

الحمد لله امورك صارت احسن وان شاء الله الشغل في الامارات في فترة اجازتك يفيدك

الله يوفقك يارب وكل الناس :)

 

Mabrouk... Things only go this way, unfortunately...

 

مبروووووك... مبرووووووووك
زي ما حكيتلك ( ويمكرون ويمكر الله والله خير الماكرين )

بس على سيرة صاحبتك أنا تعودت إني ما أحكي عن الناس اللي بتشتغل معي " صاحبات " بحكي زميلات بس لانه ما حدا بيستاهل الصحبة!

الله يوفقك ويكون حظك أحسن إنشاء الله بالإمارات :)
تحياتي

 

حبيبتي ألف مبروك الاجازة وان شاء الله تستاهلي كل خير ويا ربي تنبسطي بالامارات
تجربة الشغل بالامارات كتير حلوة بما اني جربتها
بس رح تحني كتير ل عمان وايام عمان
مع حبي

 

المشكلة انه الواحد لما يقاتل عشان حقه بحكو انه عنده
Attitude

حششت عالصورة جد
=D

الحمد لله انه ربنا يسرها من عنده وبالتوفيق في الامارات ان شاء الله يا رب
:)

 

نسيت احكي بالنسبة لمديرك
لو منك , ما برد عليه

لأنه في عالم كثثثثثثثثثثثثثثثثيييييييييييييييررررررررر هيك , وقت بده اياكي , بجيبك من تحت الارض وبترجاكي , بس وقت ما انتي تطلبيه بشغلة ولا بعبّرك

مني وعلي , تعلمّت وبلشت اطرق عنا بالشركة عن جنب وطرف
:D

 

الف ألف مبروك يا رب والله فرحتلك ...حسيت كإني أنا اللي كنت ما بعرف لبش...:-)
بس والله عتبانه عليكي بشغله إنو ليش ما كتبتي إسم الوزير خلي الناس تشكره وتعرف عمله النبيل هاد ...أنا لو منك كان كتبت بوست كامل يحمل إسمه ليش لأ ...
والله إنو زوووء هالوزير وكاتب كمان الله معك :)))

 

مرحبا ويسبر
كيفك؟
يبدو انه رح نشتقلك بما انك ح تسافري :(

المهم , الحمدلله انه زبطت امورك .. وبالتوفيق :)
عن جد فرحتلك من قلبي انه زبطت امورك وان شالله بترتاحي بالامارات

بس عن جد برافو عليكي .. هيك امي فالت لما قرأتلها قصة بيت الوزير

:)

باي

*بالمناسبة,في متل انجليزي بقول انه الطفل لايحصل على الحليب من دون ان يصرخ .. يعني حتى عندهم الواحد ما بياخد ابسط حقوقه من دون عياط وصراخ

:)

تحياتي

 

مبارك يا قمر...ان شاء بتتوفقي بأحسن شغل بالعالم ...حلو التغيير وان شاء الله يكون للاحسن...ع فكره كان باين عليكي انك ملخبطه ...مع اني ما بعرفك وانتِ مش ملخبطه:) بس كان في حكي بعيونك
اكيد ح نشتقلك هون لكن طالما في اجازات واللذي منو ...مش مشكله ...يالله انضمي لجروب المغتربين

 

الحمدلله،يا حبيبي يا ربنا ما بيضيّع حق حدا:)

بس شو يعني"ديوان المظالم"؟
0_O

 

أنا ورولا شجعناكي؟ احسن ما عرفت حالي وانا بشجع!!

الله يسير لك ويسبر وزي ما حكوا الشباب
حياة الامارات اسهل بمراحل

الله يوجهلك الخير وين ما رحتي يا ربي:)

 

ما شاء الله ما شاء الله ع الاكشن يا بنتي :)الله يهنيكي بالروحه ويجعلها بداية الافراح يا ويسبر

 

خياااااانة,, خياااانة
عطله وسفر وإجازات وقصص مابرعف عنها إشي


هاي هيه الخيانه,, لا تعليق
لا مباركه
وحتى مافي الحمدلله ع السلامه حتى توصلي ل عندي وتقدمي " اخو الإستدعا بتاع الوزير" وإلا ,,,,,



:sad:تروحي وترجعي بالسلامه عسوله,, موفقه يارب,, الله يختارلك الأفضل

 

awwalan el 7amdolellah enno enfarjat 3aleiki o rabna ywaf2ek o ysahhel 2umoorek la oddam

thaneyan ay shi yelzamek bel emarat e7na 7adreen :)

 

الف مبروك وانا من زمان بحكي ليش ما تيجي على الامارات مادامك شاطرة بشغلك واهلك هون

بعدين كسبتي اجر انه رايحين يعينوا مكانك انسان كان عاطل عن العمل

رح تنور الامارات
اهلا بكم

 

كل هادا صاير
ياه الله يعينك

يعني بدك تصيري من جماعتنا
مغتربين :)
يا اهلا و سهلا

 

كل هادا صاير
ياه الله يعينك

يعني بدك تصيري من جماعتنا
مغتربين :)
يا اهلا و سهلا

 

متأكده اني أمبارح تركت هون تعليق !!! وينو؟؟؟؟

ويسبر ,,, اطلعي بالتعليق بالتي هي احسن!!!

 

متأكده اني أمبارح تركت هون تعليق !!! وينو؟؟؟؟

ويسبر ,,, اطلعي بالتعليق بالتي هي احسن!!!

 

نيسان,,

هيه من يوم ما طلعللها الإجازه وصارت تعاملنا بحقد طبقي دفين :k:

 

Ya3ni mesh bas ennkom tle3tw w ana mesh hon, kaman biddek tsafri saneh :S
3ala kol 7al, el 7amdellah elli ejat 3ala khair w 3anjad bel 7okoumeh eza el wa7ad ma dal wara shaghleto wala 3omro 7ada tani bemasheelo eyyaha, taqreeban nafs el shi sar ma3i 3ashan el safar, bas bel tagzeez beejw.

Allah ywaf2ek w inshAllah bterta7i hnak 3a ad ma kunti metday2a hon :)

 

ويسبر راح تتفاجئي لمن تعرفي اني شغلت امكانياتي و عرفت المشكلة
ووظفت اتصلاتي واعطيت توجيهاتي بحل المشكلة
طبعا وجهت خطاب شديد اللهجة

شو بدنا نعمل
اذا ما حليت مشاكل هالشعب مين بدو يحلها

كله لوجه الله

 

مبروك كثير
بس لا تتفائلي كثير بالشغل بالامارات الوضع واحد تقريباً بس ان شاء الله يكون خير و التغير مطلوب من فترة لفترة

 

White Freedom

و اخيرا :)
من زمان وانا مزهقتكم بموضوع شغلي بس الحمد لله فرجت

ان شاء الله بمشي الوضع هناك و بتتيسر, تسلمي يا قمر :)
امين

Tareq

Yeah :(
I tried to keep on my principle of no for "Wasta" but unfortunately it didn't work
Thanks Tareq

 

الكيل بمكيالين


الله يبارك بعمرك يا قمر....عقبالك يا رب

و النعم بالله...جد لولا تيسير رب العالمين كان ما مشيت

في صاحبات و في زميلات وفي عدوات الله وكيلك :(
بس للاسف بدنا ننصدم صدمتين تلاته لنصنفهم

تسلمي يا رب, وربنا يكتبلك الخير باللي بتتمنيه

حياة تستحق الانقاذ

الله يبارك بعمرك يا احلى ام المييس بالدنيا
ان شاء الله يا رب
اكيد حشتاق للكل و لكل شي هون بس عالقليله يغير الواحد و ما يندم على تجربه ما خاضها

تسلمي يا قمره :)

 

Abu Zaina

Attitude & Agressive
يا الله شو بكره هالكلمتين.....كتيير سمعتهم بشغلي

الصوره معبره تماما عن شعوري بس توقعت الاجازه :)))
الحمد لله اللي بتوكلنا عليه بغنينا عن الكل

بالنسبه لمديري....رحت و داومت بس مش علشانه
علشان رب العالمين, ما بدي اكون مقصره ولا بيوم من دوامي ليوفقني ربنا باللي جاي ان شاء الله

طبعا ما خلص كل الشغل وطلب ارجع الاحد ...ما حكيت اشي ابتسامتي ردت عليه :))))

Orangee

الله يبارك بعمرك يا قمر...ان شاء الله دايما تضلم مبسوطه والفرح معبي حياتك :)

والله نفسي اكتب اسم الوزير بس ما بدي اكشف حالي....مش الكم لأ
بديش حد من الشغل يوصل للمدونه و يصير يراقب شو بكتب, موظفين الحكومه - مش كلهم طبعا- مملييييييييييييييييييييييييييييييين :$
هو من ناحيه زوء فهو زوء و بنته بتجنن بتعاملها

 

Ahmad Al-Mahrouq

اهلين لحمد....ان والحمد لله كتيييييييييييييييييييييييير مبسوطه :)
انت كيفك وكيف التسجيل, شفت انك كاتب شي جديد هلأ بروح اقرأه

راح اضل ازهقكم باخباري لا تخاف :)

تسلم يا رب...كلكم ذوق والله
جد نعم الاخوان والاخوات

سلملي على خالتو كتير و خليها تدعيلي بموضوع الشغل بالامارات :)

جديد هالمثل بس واقعي كتير....لازم نحارب لناخد حقوقنا بين هالعالم

Nissan

تأخرت بنشر التعليق و تأخرت بالرد :$
بتعرفي بس فروحه تكون هون و خصوصا هالمره متعلقه فيي كتير...ما بدها مامتها ولا والدها...كل شي تاتووووو " خالتو " زي ما بتناديني, و بتناديني بأسمي كمان :)
لازم انا اعمللها اياه و انا طايره فيها بصراحه :)

الله يبارك بعمرك يا رب....ان شاء الله

مش نايمه و مطبق ورديتين وجي على رأي اللي حكو :)
بس شوفتكم جد فرحتني و نستني ....لاااااااااااازم نعيدها ان شاء الله

اكييد في اجازات...ما بقدر ابعد كتير انا :)

 

Rain

الحمد لله...دائما بنتوكل على ربنا لانه هو اللي بنصرنا

ما بتعرفي ديوان المظالم !!

هاد اشي جديد استحدثوه بتروحي و بتسجلي شكوتك بخصوص اي ظلم وقع عليكي و همه دورهم يحققو و بناءا عالنتائج ممكن تتغير القرارات

هلأ هو اجا واحد من عندهم و شرحلنا شغلهم و بتحسي انهم مرات ما بعملو شي, في قوانين ممكن تلاقي مخارج منها و كأنها مجهزه لهالغرض, و لهلأ ولا موضوع رجع للموظف حقه بس اجمالا في تحقيق و شوشره و فوضى يعني

مياسي

اه من يوم التويتر...مرّه حكينا عن الاستقاله و انا يومها طلعت الفكره ببالي :)

امين يا رب...تسلمي يا قمر و ان شاء الله ربنا بيسرلك الخير كله بكل شي في بالك :)
اميييييييييين يا رب...اجمعين ان شاء الله

 

سوزان

اهلا يا قمر...زمان ما سمعنا اخبارك, في بوست جديد و هلأ بدي اروح اقرأه :)
اشتقنالك

شفتي..حكايات تروى صارت
امين يا رب... تسلمي يا قمر
الله يديم الفرح بحياة الجميع

Um Omar

ما بتعرفي عنها؟؟
كأنك انتي الوحيده اللي خبرتها O_o
متزكره اني خبرتك عالمسنجر...بس انا معي زهايمر فممكن لأ :)

الله يرضى عليه اللي كتبلي الاستدعا....انا تبعت استدعيات انا!!! انا التطبيق فورا شو حكي وكلام وكتابه
و انا بعتبر هاي دعوه لاجي اكل كيك مثل اللي كان بالصوره و ضيفتيه ...و بحب احكيلك اني حافظه الضيافه بالزبط
كلّه بدي اكل و اشرب منه

الله يسلمك يا رب...بعرفك حنونه و قلبك طيب
و بالنسبه للحقد الطبقي فاااااا انا حاليا عاطله عن العمل و فقيره الى الله
لو تعملولي جمعيه مش غلط بالمره و بس اجي عندك بتعطيني اياها :)

 

Hb

Al7amdolellah :)
Ameen ya rab...teslamee ya 7elweh
ana met2akdeh 2ennek ma bet2asree ... teslamee ya zoooooooooooooooooo2 :)

Shaheen

الله يبارك فيك يا رب
هيها بوقتها زبطت والحمد لله :)

يا ريت يعينو...همه بدهم ينقلو ناس ما يعينو

منوره بوجودكم...وهي اذا لا سمح الله ما زبط الشغل في الي ناس بالامارات يدبروني :)

 

Jafra

شهر غريب عجيب كان...بس المهم بالنهايه فرجت والحمد لله :)
اه...ابناؤنا في الخارج و وين بالخليج يعني برجع معبيه فلوس :)))) هاي السمعه اللي طالعه انا ما الي دخل :)

اهلا فيكي يا قمر :)

Rand
2alf el7amdellah 3alsalameh ya 7elweh...el pictures bejannenoo :)

had men soooo2 7azna ya amar
bs 2akeed inshallah btet3awwad 2areeb :)

shaklo be kul makan laken 3enna elwade3 2as3ab :(
elmohem 2enna bel2a5er bne3mel 2elly bedna 2yah btayseer rab el3alameen :D

teslamee ya 7elweh..Ameeeeeeeeen ya rab

 

ثائر الاول

شكرا شكرا....انا حسيت ان في ايدي خفيّه بتشتغل

انا متأكده تماما ان الخطابات شديده اللهجه هي بس اللي بتحل الامور....كل اللي حةالينا بتعاملو فيها فأكيد ناجحه ومضمونه 100%
بس شكلهم بكرهوك و لهيك خبو الملف :$

الله يديمكم لخدمه هالشعب الغلبان....وشكرا لأهتمامكم فينا
وعلى رأي المثل اعمل خير وسده واستريح :)

Anonymous

الله يبارك فيك
خواني حكولي هالشي, بس كله رزقه من رب العالمين و الواحد بسعى و بتوكل على الله
واذا لا سمح الله ما زبطت زي ما حكيت بكون اخدتلي اجازه غيرت فيها جو و بس يخلصو الفلوس برجع لشغلي....يا رب لأ :(

 

قدها و الله يا ويسبر ... أخت الرجال :]
بالتوفيييييييق

سيبك من الإمارات و تعالي عخميس مشيط .. شغل خفيف + راتب ممتاز + طقس خرافي ;)
و الهرج للجميع :P

 

تسلم يا رب :)

لا ما بنخاف علي, عند الشدّه بطلع مني و انا نفسي ما بعرف حالي :))

اه وخصوصا بعد صور الرحله ممكن كتير اعملها :)

و برضه بعد اخر بوست ....مجهز حالك انا اجيت انت بتتحجج انك بدك تطلع من البلد

 

ما أجمل أن نقدر أنفسنا بعد عناء طويل .. مبارك الإجازة الجميلة .. أتمنى لك عزيزتي الهناء والعافية .. دمتي بخير

 

الله يبارك فيك اخي
وشكرا لامنياتك...امين

شكرا على المرور و المتابعه :)

 

أن تأتي متأخرا خير من أن لا تأتي أبداً
صحيح تأخرت لكن كانت لعيوني لهفة أن ترى ما هو الجديد في مدونتك .. فإذا بها ( الحمد الله ) وما أجملها من كلمة
(:
فرحتلك كتير والله يوفقك يارب

بس عطلني النت وإجت الجامعة و تنبلنا عالآخر

الحمد الله ...

 

اهلا وسهلا فيكي دائما :)

الحمد لله اليوم اول يوم رسمي بأجازتي, هو صحيح رحت الشغل و خلصت امور الاوراق بس رحت عال 12 و على راحتي و ودعت الكل

كان حلو يعني

ان شاء الله دايما يضل الفرح بحياتك
و بالتوفيق بالجامعه :)

 

الله يوفقك ويسبر وين ما كنت بس أكيد عمان رح تشتاقلك كتير بس إن شاء الله بتنبسطي بالإمارات وبتشوفي خير كمان وكمان:):)

 

Rana

تسلمي يا قمر :)
انا اللي حشتاق لكل شي ولكل الناس...بس فتره و بتمشي ان شاء الله :)

الله يجيب الخير للجميع ان شاء الله