Things I Like To Whisper About

Would You Hear Me Whispering

Shallow


                 
اكثر من مرّه قرأت بمدونات بحكو فيها عن مستوى التدوين الاردني و دائما ما يذكرو ان كم مدونه معدوده على اصابع الايدين اللي منيحه و بوصفو الباقي بانهم سطحيين.


هلأ انا لا خبيرة سياسية و لا ناقدة ادبيه ولا محلله اقتصاديه ولا كاتبة صحفيه, انا انسانه بسيطه بديت التدوين لاكتب اللي بخطر ببالي و مشاهداتي اليوميه اللي بصادفها واللي اكيد بتشارك ولو بجزء بسيط بنفس المشاهدات ونفس التجارب مع ناس بهالعالم التدويني.


انا ما بدي احكي عن مدونتي, انا بدي احكي عن المدونات اللي بستمتع بقراءة كل شي بنكتب فيها, و هالمدونات عددها كبير كتير, الي ما ببدا نهاري الّا بس ازورهم  كلهم و اقرأ اخبار اصحابهم ومغامراتهم و اعرف المواقف اللي صارت معهم, اعرف عن اخوان واخوات صارو بفترة قليله كتير قراب لقلبي, بهمني اعرف اخبارهم و اتطمن عليهم .

مدونات مميزين جدا, بافكار اصحابهم و بشخصياتهم اللي بتنعكس على كتاباتهم, بصراحتهم و بتلقائيتهم, بنقاء وصفاء قلوبهم, بحكاياهم و  بأيامهم و بذكرياتهم و بحاضرهم و بافكارهم واهدافهم و مستقبلهم.


اللي بحكمو على المدونات انها سطحيه مش ضروري يكونو كلهم من اللي قاعدين على برج عالي عاجي و بحكمو عالباقي من وجهة نظرهم الخاصه كنوع من انواع التنظير, في جزء بدهم يكون في مدونين مميزين ,و هالتميز من وجهة نظرهم انّا نكون متابعين للاحداث السياسية والاقتصاديه بلغة الكتّاب و الادباء العالميين, او مرات وللاسف في ناس بحسو المتميزين همه اللي بكتبو عن مواضيع جريئه و مرات بتكون ميّالة للوقاحه البحته, فجأه هدول المدونين بصيرو مميزين و افكارهم حرّه .


انا بمفهومي البسيط ان المدونه هي مساحه خاصه حرّه لصاحبها , يكتب فيها اللي بدو اياه, و حتى مع اني مش مع كتابة المغامرات و الذكريات الجريئة والغريبة, ولكن بتبقى هاي المساحه مخصصه للشخص و انا كقارئة الي حرّية المرور على هالمدونه او لأ, المدونه هي زي الدفتر اللي بنكتب فيه اي شي بخطر ببالنا, دفتر الكتروني و مفتوح للجميع, و كل شخص بقرأ حسب اهتماماته ولكن برأيي البسيط برضه انه ما بحق لحد انه يقرر او يحكم ا هالمدونه سطحيه او لأ, ما بحق لشخص انه يقلل من افكار و ذكريات اي شخص...ما بحق لأاي شخص انه يحكم على حياة الشخص التاني ابدا بأنها سطحية او ما الها قيمة او غير مميزه.




_____________

جديد عرفت اني بقدر اكتب بوست جديد عن طريق الايميل و فورا انشرة عالمدونه, فهالبوست اول تجربة و ان شاء الله يزبط Open-mouth smile

#

25 التعليقات :

صباحوو يا وسبوره
هلا أنا بتفق معك بكل الي ئولتي
يعني بالنهايه الحكم عالقاريء والمتابع للمدونه
لكن ممكن التصنيف بتم اتباعه حتى يتم تقييم وضع التدوين بالبلد وأثره على المجتمع ولقياس مقدار الحريه الموجوده للرأي العام لحتى يحكي الي عندو
بس متل ماحكيتي لا يحق لأي من كان فرض تصوراته عالأخر
تحياتي

 

صح لسانك.ـ
أنا قرأت كثير عن هذا الموضوع ونعم كانوا يستخدموا عبارة "مدونات سطحيه" بدلا من مثلا استخدام عبارات مثل مدونات هواه او غير محترفين او حتى مثلا مدونات مبتدئين بس "سطحيه" تدل على الضعف اللغوي وعدم احتراف المهنه لهؤلاء.ـ
ودليل على ذلك التعميم فمفهوم المدونه يختلف عن الصحيفه. المدونه قد تكون سياسيه، اقتصاديه، تكنولوجيه، وطبعا خاصه وهي الفئه الغالبه على المدونات.ـ
أنا قرأت مدونات من سوريا، مصر، لبنان و الكويت. كل بلد فيها مدونين سياسيين محترفين رغم صغر أعمارهم. ولكن اذا لم تكن المدونه سياسيه او اقتصاديه بحته لا يعني هذا انها سطحيه.ـ
المشاهدات اليوميه والانتقادات البناءه والاقتراحات التي تطرحها المدونات الاردنيه هي حقيقة مصدر مهم جدا لمن يود ان يعرف ما يحدث في الاردن.ـ

 

السلام عليكم ورحمة الله وبركاته

بالعكس رأيي ان المدونات الاردنية من اروع مايمكن
ودايما اقرأ المدونات الاردنية ... والافضل مثل ماوضحتي
هو التدوين اللي يكون مساحة حره لاي شي نابعه عن الشخص نفسه

يكون لها طابع مميزة وانا افضلها دائما

شكرا لك ...

 

هاد المفهوم البسيط اللي كتبتيه هو معنى المدونه انا بانقهر من الناس اللي بس بتحب تعمل حالها مشهورة بمواضيع احبانا تصل لحد السخافه
تجربه موقفه :)

 

ميسم

يا صباح الفل

بالزبط...القارئ هو اللي بختار يستمر بقراءة هالمدونه او لأ

هلأ في ناس بحكو من باب الغيرة ولكن زي ما حكيتي ما بحقّ الهم تصنيف اراء الناس

اهلا وسهلا بالحلو :)

Jaraad

تسلم يا رب

انا الكلمة هي اللي دايقتني بصراحه, ممكن استخدام تعابير تانيه زي ما حكيت بتقلل من قوّة معنى الكلمة

صحيح ... معظم المدونات المنتشرة هلأ هي مدونات عامه اقرب منها ما تكون شخصية, و لكن ممكن كتير ناس يستفيدو من الخبرات الشخصية للاخرين

و في مواقف بسيطه بتحصل بحياة الفرد, بتعكس عن مشاكل جوهرية غير معلنه و مخفية

 

I am visible

وعليكم السلام و رحمة الله وبركاته

اول شي اهلا وسهلا فيكي و كل عام وانت بألف خير ...رمضان كريم


شكرا كتير لرأيك, و وبسعدنا تواجدك في محيط المدونات الاردنية, هالكلام عني و عن اخواني واخواتي المدونين :)



Sozan

اهلا وسهلا بعروستنا الحلوه :)

معك حق ...في مرات بتكون المواضيع لتزيد الحركه على المدونه بدون اي معنى او هدف غير هيك, موضوع صف كلام اقرب منه للوقاحه :$

لكن بنرجع بنحكي انها حرّية شخصية و احنا كمان النا الحرية بأنا ما نرجع نقرأ هالمدونه :)

 

Whisper,

4 words: "You are the best" ;)

 

Lol
Thanks Haitham :)))

BTW ... I liked ur comment there ;)

 

First:
I am with Haitham " You are the best"

Second:

I guess i know from where your read that Jordanian blogs are shallow :D, i don't like that for me i see the jordanian blogspehere as one of the best in Arab world, you don't have to be an expert in writing or someone who write to discuss deep thoughs it just a place to write whatever goes in your mind if people don't like it then don't read it and continue with your life

 

المشكلة ما حدا بطلع على المضمون او المحتوى للمدونه لتحديد مدى انتشارها او شهرتها ، بل العكس النظر بتم على اسم المدون بالدرجة الاولى ، يعني في كثيير مدونات اعتبرت من افضل 10 مدونات بالاردن و لكن للاسف مضمونها ركيك و محتواها مخزي، و النكته احيانا الحكومة بتدعم مثل هيك مدونات

المهم ، انا مش مع اعتبار المدونات شيء احترافي او شيء لازم يصل الى حد الاحتراف ، المدونات هي مش اكثر من فسحه او مكان للتنفيس و مشاركة الاراء مش اكثر ، احنا ما بنطلب انو تكون مدوناتنتا عميقة او احترافيه ، احنا ما بدنا غير مكان نكتب في اللي بدنا اياه مش اكثر

 

Our problem is that we like to criticize everything and everyone, I got this Anonymous dude telling me I'm the worst blogger ever on someone else's blog, now I don't know who forced them to check my every post and read it till the end if they don't like it.

We like to torture ourselves and follow people we don't like and read blogs that we think are lame, just so we feel better about ourselves maybe, or maybe there's something seriously wrong with us!

It's the easiest thing to just skip a blog you don't like, it's even easier than avoiding people in real life, so maybe those people do actually like the "shallow" blogs, because if they didn't, they wouldn't know every little detail about the posts.

I think even those little everyday stories and observations that we write hide some meaningful points behind them, it's the "shallow" people that can't see the true meaning behind a post or a story. w frankly it's their loss!

 

Ahmad Hamdan

Thanks Ahmad kulkum zoo2 wallah :)

I read about this many time's before, and I wanted to write about it but as usual I forgot :$ and that blog remind me :)

Me too ,I really like what I read in many Jordanian blogs ,and its up to people to read or not

Thanks again Ahmad :D

Dr.Mohammed

الناس اذواق بكل شي بالحياة, اشياء بتعجبني ممكن و حتى اكيد انها ما بتعجب كل الناس

انا معك بأن فعلا في مدونات اعتبرت من افضل مدونات الاردن و انا شخصيا ما بحب اقرأهم لانه بمنتهى البساطه محتواهم ما بهمني بأي شي

المدونه مساحه خاصه بصاحبها و بكتب فيها اللي بدو اياه بدون اي تحديد لحرّيته و بدون اي تقييم, لانه بهيك بتفقد المدونه قيمتها و سبب بناءها

 

Rand

The thing that even this anonymous who want to say his opinion don't bother him /her self to mention his name or to show us his/her blog or opinions in life,i like the blog's owner reply, don't read the blog...its as simple as that :)
What I like the most about that comment that he/she is a follower to all what u wrote in ur blog and ur twitter :)

I'm with u in that even the everyday stories hide a huge issues behind them, and open others eyes on a serious things in life

 

/مساء الفل يا قمر

واخيراً ويسبر ...الحمدلله على سلامتنا...انا بقيت مقطوعه لغايه اليوم العصر وبعديها فرجت والحمدلله

بالنسبه للمدونات ...برأيي لا يحق لاحد ان يحكم بالسطحيه او غيرها على ما يكتب ...مهما كانت الفكره او اللغه بسيطه فهي افكار خاصه ومشاعر شخصيه ولسنا هنا صالونات ادبيه ولا جرائد سياسيه ولا حلقات دراسيه
هي مساحه خاصه كما تفضلتي تندرج تحت بند الحريه الشخصيه ولا يحق لاحد تقييمها او تقييدها ...ومن لا يعجبه ما يكتب فهو حر ان لا يقرأ ... لكن بدون اطلاق احكام

مسائك فل يا قمر ...وما أحلى الرجوع اليكم

 

Nissan


يا مسا الورد والياسمين على احلى نيسانه مدونين بالدنيا كلها

اشتقنالك يا قمر

الله يسلمك..جد الحمد لله على سلامتنا :)
اخيرا رجعت الامور للوضع الصحيح


الحكم على حياة الناس وافكارهم و تحجيمها بهالكلمة كتير صعب و غلط

هاي هي..مساحه خاصه, بكتب فيها صاحبها بدون اي قيود

مسا النرجس...
ليش الحكي...حلوووو كتير بصراحه :)

 

ممممم
كل واحد بينام عالجنب اللي بيريحوه أظن
بالنسبه للمدونات السياسيه مثلا انا مش شايفه ضروره انو التدوين يكون مؤثر ع طول الخط
بالاخر هو مساحه شخصيه مش اكتر ويا ريت عارفين نستفيد من كل هالمساحه!!

 

جيت أعلّق لقيتك حاكية كل اشي بدي احكيه سلف

الحمد لله على سلامة المدونات
:D

قبل فترة اندليت على قصة الايميل وجربتها , حلوة جد

 

مياسي

معك حق...وما حد بجبر حد انه يكتب بموضوع معين ولا حد بجبر حد يقرأ هالموضوع

اللي عارفين يستفيدو منها, انحكا عنها انها سطحيه لانها ما اخدت الطابع اللي بدو اياه القارئ

 

LUNAR

الله يسلمك يا رب...والحمد لله على سلامة مدونتك انت كمان :)

انا لمّا اختفت المدونه وانا بدور على طريقة تانيه لافتحها طلع مقال انك تكتب بوست جديد عن طريق الايميل بوجهي :)

بتفشّ القلب و خصوصا مع موضوع التنسيق و اذا بدك تكتب كتير , ما بتلحّق عالموبايل

 

I remember reading somewhere that workshops are being held in Amman to talk about blogging and how to blog? this is ridiculous, i think blogging is not and shouldn't be a profession.. ana dari

 

Hb


Exactly...how to teach people the way to express their experience and feelings in ur way and ur language???
it wont be from the heart

For me if I rewrite a post, I feel that it was not written by me and most of the time I don't publish it

 

يمكن انا ما بيطلعلي احكي بهالموضوع .. لآنه اذا انتي مش خبيرة بالتدوين ... انا ولا اشي على هيك


المهم .. انا بعتبر التدوين هو التأريخ .. وانه اكتب شو صار معي .. اكتر من انه اكتب عن قضية
مع انه الاهم والانجح انه نصير نكتب عن القضايا الساخنة واللي بيكتب اسرع بيعمل متل سبق صحفي ... الخ

انا مدونتي كتير بسيطة وسطحية .. بس بحبها .. وبزعل عن جد لما ما الاقي شي ينكتب عندي
انه يومي ضاع هيك .. مافي هالحدث المهم يللي فيني احكي عنه

تحياتي

 

Ahmad

لا ليش هيك بتحكي..ما احنا حكينا كل واحد بكتب اللي بخطر بباله واللي بدو اياه و كل شي بكتبته بما انه اله معنى و قيمه و ذكرى عنده فهو مهم و بعيد كل البعد عن السطحيه

انا بحس انه الكتابة بالمدونه ما بصير تكون زي واجب, المفروض تكتب اللي انت بتحبه وبالوقت اللي بتحبه

الالتزام حلو و خصوصا اذا في ناس بتابعو و بتحسهم بنبسطو بأنهم يعرفو اخبارك ولكن مش واجب و عبئ
هيك الكلمة بتوصل اسرع واوضح... هاد رأيي المتواضع :)

 

أطمنك التجربة زبطت والخط كمان كتير حلو ;P

بالنسبة إلي عالم التدوين عالم كبير وحلو وفيه كتير كتير أشياء تستحق الإهتمام.. لليوم أنا بشكر صديقي Naser_k صاحب مدونة Smokes Blow
لأنو هوة شجعني اني أبدأ مدونتي.. وخاصةً ادرجوا إلي كتب فيه كل المدونات إلي هوة بتابعها عشان الكل يتعرف على بعض ويعطي فرصة للمدونين الجدد انهم يتعرفو على بعض المدونات كبداية

http://naserz.blogspot.com/2009/10/following-publicly.html

''المدونه هي زي الدفتر اللي بنكتب فيه اي شي بخطر ببالنا, دفتر الكتروني و مفتوح للجميع, و كل شخص بقرأ حسب اهتماماته''
هاي الجملة بتكفي وبتوفي :)

 

اه هاي منيحه بوقت القطعه, لمّا البلوج ما برضى يشتغل , الله لا يعيدها هديك الايام

الفكرة كتير حلوه, للاسف اول مرّه بشوف البوست اللي كحاتبه ناصر, مع اني بحب اقرأ كل اللي بكتبه , يمكن ما كنت اقرأ وقتها :$

و شكرا لناصر اللي خلاكي تبدي التدوين لنستمتع بكل اللي بتكتبيه