Things I Like To Whisper About

Would You Hear Me Whispering

أحبك يا رمضان



طبعا زهقتكم قد ما حكيت اني بحب ال Tag فما حخوض بالموضوع, بس صديقنا المدون LUNAR عزمني على Tag رمضاني :))))
اني اكتب عن رمضان وشو بعنيلي و شو بحب و شو بكرة فيه - شكرا لونار :)


بحب برمضان اني بصير اروح عالمسجد اللي بحبه كتير كتير كل يوم ومرات اكتر من مرّه باليوم, مسجد ابو غزال, عمري ما توقعت اتعلق بمكان لهدرجه, بحكي لبنت خالي قد ما بحبه هالمسجد بكون نفسي اضمّه, ما بعرف كيف بدها تزبط بس جد بحبه هالمسجد, ما شاء الله عن الشيخ اللي فيه مبدع بصوت جميل في القرأن و بخطبة مميزة بالجمعه وما بين كل 4 ركعات بالتراويح

بحب برمضان قيام الليل بالمسجد بالعشرة الاواخر, ربنا يسرلي اياها لاول مره السنة الماضيه و ان شاء الله تتيسر السنه, ما في احلى من قيام الليل و الخشوع والبكا وبعدين صلاة الفجر بجماعه , بحس حالي بنظف من جوا و بتنظف نفسيتي و تفكيري و روحي, كل شي بصير نقي لابعد الحدود....الله يثبتنا بعد رمضان

بحب برمضان جمعة العيله عالسفرة , من وقت ما اخوي اشتغل واحنا بطلنا نجتمع عالاكل, و خصوصا ان العيلة كانت تتغدى على موعد ترويحتي قبل ما يشتغل اخوي, وبس اشتغل طلعت ترويحته بعدي بساعه ونص, وانا بديت رجيم فصار كل واحد ياكل لحاله, وهلأ كلنا بنقعد مع بعض, و بناكل وبنحكي, ولهيك ماما بتكره حد يفطر برّه , بتحكي كلنا 4 من غير شر و بس واحد يغيب بتفضى السفره.

بحب برمضان ان كل القنوات و لو مش بأرادتها تحط برامج لشيوخ بحبهم, مين كان يتصور ان ال LBC تجيب العريفي :)
بحب برمضان عمرو خالد, العريفي, النابلسي, خواطر, طارق سويدان, عمر عبد الكافي وبحب كيف بصير سهل نحضر 4 برامج على نفس القناة او ننتقل من قناه لقناه بين هالشيوخ بكل استمتاع.



بحب برمضان ذكريات الطفولة اللي بترجعلي كل يوم برمضان عند الغروب, بتذكر لما كنّا ساكنين احنا و دار عمي مع بعض بنفس العمارة, قبل المغرب بنص ساعه نطلع عالسطوح ونلعب, كانت احلى الايام, اليوم بس حكينا مع خواني عال Skype تذكرنا هديك الايام, واول ما جبت سيرتها كل واحد فينا سرح في عالمة لثواني و ارتسمت على وجوهنا نفس الابتسامه :)

بحب برمضان العزايم والزيارات العائليه, لانه بالعزومه بشوف ناس الي سنه مش شايفتهم - من رمضان الماضي :$ - و بكره بالعزايم ان اذا ما راحت صلاة التراويح كامله علينا بالمسج , بنضطر نصلي 8 ركعات ويروح علينا الدعاء.


بكرة برمضان بس اروح متأخرة عالمسجد, لاني بضطر اصف بالصفوف الخلفيه اللي كلها صغار و اطفال و عدم خشوع بالمرّه :$

بكرة برمضان الستات اللي بفهمو مبدأ " سدّو الفرج" غلط, يعني بعرف ان المفروض نلزق ببعض وما عندي مانع, لكن انها تتركى تماما علي و اصير مش عارفه اتحرك, واني اصير من دون اي سيطرة مني اتحرك حسب حركتها و الشيخ بقرأ لانها بمنتهى البساطه متركيه علي, بصير اموج معها و كل ما ابعد شوي عنها و طبعا نضل طابين ببعض ترد تقرّب اكتر, و بهيك بروح مني الخشوع غير ممكن مرات اخد اثم اني اصير احكي عليها بعقلي و اكرها :( ما بعرف اذا واصله الفكرة بس اشي بفرفط الروح


بكره برمضان الازمة اللي ما الها داعي, مع اني والحمد لله كل سنة بالشغل بنروّح قبل باقي الدوائر, هالشي الوحيد المنيح بشغلي :) لكن برضه العالم مش طايقه بعضها بزياده ويا ويل اذا واحد وقف دقيقه


رمضان بالنسبة الي من احلى شهور السنه, لاني بكتشف الحمد لله ان نفسي مش أمّارة بالسوء بشكل كبير زي ما كنت اظن,و ان اخطائي بالغالب هم من وسوسة الشيطان ....الله يغفرلي و يغفر للجميع و يقوينا و يثبتنا يا رب

المفروض انقل الواجب لثلاث اشخاص , لكن انا حترك الموضوع دعوة مفتوحه للي بحب يشاركنا بمعنى رمضان بالنسبة اله مع انو في كم شخص ببالي :) فأذا ما عملتو الواجب الاختياري حنخليه واجب اجباري :)

20 التعليقات :

مبرووووووووووك اول تاغ محجوبي :yai:
ومربوك إنك حكيتي إسم لونار صح :yai:


تتهنى برمضان,, هالسنه وكل سنه يارب :hug:

 

Um Omar

الله يبارك بعمرك يا رب :)

و اسم لونار التاني كتبته بالعربي خصوصا الك - بس بحب احطك بالصوره انا :)

و منكم نستفيد يا قمر :)

امين يا رب...اجمعين ان شاء الله

 

تقبل الله طاعتك واعانك على القيام
ما كنت عرف انه الشيخ العريفي اله برنامج على
LBC

 

لوووووووووول , حششت على مفهوم سدّو الفرج عن الستات
:D:D

الحمد لله اللي بلغنا رمضان , لأنه جد كل سنة هو تجربة بحد ذاتها وما بتشبه اللي قبلها

كل عام وانتي بخير وينعاد عليكي بالصحة والعافية وهداة البال

 

مرحبا ويسبر
رمضان كريم عن جديد
:D

مممممممممم ... انا ما بحب العزايم بشكل عام ... وعزايم رمضان بشكل خاص
خصوصي العجقات اللي بيعملوها الصغار

تحياتي

 

لو برعف اني اول حدن بعلق,, كان عملتلك زفه وعراضه شاميه

وتلولحي يا داليه,,
وانا اوااااااااااااااااااااال

يوبيييييييييييييييييييي
:yai:

سانك يو بنك مصر إنك خصخصتيني في تعريب الإسم
:shy:

 

mar7ba whisper

am here just to wish u a happy ramdan wa inshallah yan3ad 3ailk wa 3ala ahlak bel sa7a wel salma ya rab .kol sana wite salama ya rab .

 

معك حق يا قرابتي.. هادا المسجد ما شاء الله عليه.. صوت الأذان فيه موقعو كلشي فيه أكتر من رائع..

جمعة العيله عالسفره بتخلي للأكل طعم غير حتى لو كان مجدره :)

..الله يثبتنا ويتقبل منا

 

كيفك يا حلوة
شي حلو الصلاة بالمسجد كتير ناس بحكولي هيك
يمكن انا الي طقو بالصلاة لهيك بفضلها لحالي و بالبيت و مسكرة علي الباب و قصتي قصة
حتى الاضاءة الها مود معين بالصلاة
و الي سجادة خاصة و توب صلاة خاص فيني ما بحب حدا يصلي فيهم ما بعرف ليش
مرات بتخوتوا علي اخواني بقولولي هاي صلاة مش يوجا ما بدها كل هالقد بس انا بحب هيكط

رمضان بالنسبة الي رايق لاني اجازة :)
يعني رمضان بيتوتي ب رايق و حلو
بتمنى تنقبل منك عباداتك و يستجيب ربنا دعائك

 

Jaraad

امين..منّا و منكم ان شاء الله

الشيخ العريفي اله برنامج اسمه "مسافرون" و السنة الجزء الخامس :)
بيجي عال 6:30 كتير حلو

الاشي الوحيد اللي بحضره على هالقناه من رمضان لرمضان :)

LUNAR

بتصدق...مرات بصير ظهري يوجعني و انا جنبها, كأني حاملتها :(

الحمد لله... في جدول وزعّوه بالمسجد عن الاعمال اليوميه اللي المفروض نعملها برمضان, منها صلاة ركعتين شكر لربنا لانّه خلّانا نصوم هاليوم....كتييييييييير عجبتني الفكرة, للاسف ما طبقتها لسا :$
خلص ...من بكرة ان شاء الله :)

وانت بالف خير ..علينا و عالجميع يا رب

_________
ملاحظه عالهامش
بسم الله ما شاء الله..بنوتك زي القمر ما شاء الله عليها :)
شكرا :)

 

Ahmad Al-Mahrouq

اهلا احمد
علينا على الجميع ان شاء الله :)

اه قرأت تعليقك عند ام عمر...اذا هيك الوضع, فعلا مش حلوة العزايم, او انت صير اسكب من اولها, وخصوصا برمضان ما في كبير و صغير, الكل صايم وبدو يفطر :)

Um Omar


احنا فيها...ولا يهمك
زفّه و عراضه...و استقبال بالزغاريد كمان :)


سانك يو بنك مصر...هاي جملتي :)
و كل العيله ما بستنغشوني بس احكيها, انو ال غبره و خلص خلصت موضتها, بس انا بحبها و مصرّه على استخدامها
:)

ويلكموووز ...سكر علوز
من زمااااااان ما سمعتها هالجملة :)

 

NrJordan

ahlan ahlan ya amar :)
keefek?? we miss u kteer, zaman hal 2amar ma ban, inshallah kul 5ear ya rab

Happy Ramadan to u too 2enty w kul el 3eleh ya rab

w 2enty salmeh :)

Rula

اه ...انتي بتعرفيه للمسجد, بجنن صح :)

للاسف زماااااان ما اجتمعنا كل العيله على سفرة وحده, الله يجمعنا فيهم عن قريب يا رب

امين يا رب..اجمعين ان شاء الله

 

Jafra

اهلا يا قمر..مشتاقه جدا جدا :)

هو الاعتماد عالمسجد و الشيخ بصراحه, و الحمد لله التنين ممتازين عنّا :)

زكرتيني ببنت خالتي, هيك كمان بتحب جو وما حد يدخل الغرفه وهي بتصلي
و انا جربتها اكتر من مره برمضان بقيام الليل بس ما اروح عالمسجد, جد جو خشوع بكون :)

الله يتقبّل يا رب

اه صح....مجازة , الله يهنيكم يا رب :)

 

مرحبا ويسبر:
بتعرفي نيالك على هالمسجد، تصدقي جنب بيتي 3 مساجد وما بروح على اي واحد منهم، وبصلي تراويح بالبيت، اول شي مليانين صغار وعاملين المسجد ملعب كرة وساحة حرب بالصواربخ والفتاش، والمساجد ازمة وخنقة، غير انه الشيخ بستعجل بالصلاة وما فيه خشوع علشان الناس تروح عالبيت تمام عالعشرة وتلحق باب الحارة - الله يقرف هالمسلسل - مخرب كل شي بحياتنا.
وانا كمان بحب هالبرامج كلها الذي ذكرتيها، واكثر شي بحبها قناة الرسالة وبضلني فاتحة عليها قبل الافطار 3 ساعات من برنامج لبرنامج.
الله يسعدك ويسعدنا بهالرمضان وينعاد علينا كل سنة بفرح وسعادة...آمين

 

رمضان مبارك ويسبر
ماشاء الله عليكي والله يحليلك الميمه يارب وتضل دايما مجتمعين

 

حاولي تصلي جنب الحيط معناته
:S

هاذ طلع عندكم مشاكل داخلية غير المشاكل اللي مرات بعملوها المصليات

لأنه مرت فترة بصلاة التراويح , ما كنا نسمع الامام من حكيهم وكمان عياط الاطفال اللي معهم

مع اني لحد هسه مش فاهم فكرة الولد اللي عمره اكمن شهر وبيجي عالمسجد مع امه وبقضيها يعيط واحنا بنصلي وامه بتصلي كمان وعادي عااااااااادي

:D

فكرة حلوة بالنسبة للركعتين , ان شاء الله راح ابلش فيها انا كمان

____
الله يسعدك يا رب , كلّك زوق والله
وان شاء الله عقبال ما نشوفلك
:)

 

الكيل بمكيالين

اهلا وسهلا يا قمر :)

الحمد لله, فعلا انّا محظوظين فيه لانه قبل ما ينبنا كنت اعاني من اللي بتحكيه , غير للاسف واحد من المساجد مدخل الستات قريب من حفرة امتصاصيه, وشوفي الخشوع مع هيك روائح :(

و احنا كمان قناة الرساله قبل الفطور بنضل عليها معظم الوقت :)

اميييييييين يا رب العالمين
و يتقبّل منّا يا رب

سوزان

علينا و عليكم و عالجميع يا رب
وين هالغيبه!!! عسى المانع خير يا رب
اشتقنالك :)

تسلمي يا رب و يخليلك كل احبابك ان شاء الله :)

 

LUNAR

شكله هيك افضل
هلأ بس يتركو علي ببعد و بقرّب عاللي جنبي, لو جنب الحيط يمكن بصير الموضوع زياده, كيف بدي ادّز الحيط :$

والله هالمسجد اجمالا احسن من غيره, الصغار بضلّو بالصفوف الخلفيه و مصلى النساء كبير ما شاء الله فما بتحس , و ما بجيبو اطفال بعمر اشهر لانه كان يجي و المصليات حكولهم ضلو ببيوتكم انتو بتخشعو و احنا بنخشع :)

غير ان مصلى النساء مفصول تماما عن مصلى الرجال و كل واحد بطابق :)

و انا ان شاء الله ابتداء من اليوم حبدا اصلي الركعتين شكر :)

______

شكرا ...و بما انه رمضان و بديش تروح الدعوه فححكي ان شاء الله
الله يرزق الجميع :)

 

وضعك صعب
اعملي حالك تعبانة وصلي وانتي قاعدة على كرسي , شكله هاذ الحل الاخير
:D

عنا لا فارقة معهم يخشعو ولا احنا نخشع
طيب هالولد اللي انفرى قلب قلبه وهو بعيّط , ولسه الامام بقرأ بالفاتحة
شو بده يسكته هاذ؟

___
ان شاء الله , الله كريم
:)

 

ههههههههه
لا لا خلص بستحمل....و ربنا بجزيني الخير ان شاء الله :)

معك حق, و بحب احطك بالصورة من جهة الستات, الكل بكون مزعوج الا الام ما شاء الله عليها قمّه الخشوع و لا فارقة معها, متعوده الاخت عالصوت :$