Things I Like To Whisper About

Would You Hear Me Whispering

مغامرات على الطريق :)


اول شي الله يسعد صباحكم ومساكم وكل اوقاتكم :)
الي فترة ما بشبك عالنت واذا شبكت يا دوب , بالشغل ضغط رهيييييييييييييييب , ما حد بصدق انو حكومة وبتشتغلو, ما بعرفو انّا ما بنرفع راسنا, وبالبيت للاسبوع حافل ما شاء الله :)
فللاسف مش كل البوستات الجديده قرأت و للاسف ما علقت على شي, وهلأ لاقرأهم واعلّق بكون راحت الافكار اللي اجت ببالي اول ما قرأتهم بصير مش عارفه اعبّر وخصوصا بس كل المعلقين يكون كاتبين اللي ببالي :)
ولكن ...اكيد حينقرأة و كلهم ان شاء الله


اول مغامرة لمّا كنت ماخده مغادرة و مستعجله بدي اروح عالبيت عندي مشوار, و لقيت سياره صافيه تقريبا جنب سيارتي و بالصدفة السيارة اللي وراي تارك السائق او السائقه مسافه محرزه, انا حكيت بدل ما ارجع هلأ عالشغل وهات لاقي المراجع صاحب السياره, حكيت يلا يا بنت اكيد بتطلع, صرت امشي شوي لقدام و شوي ارجع, وبعد عدّه روحات ورجعات, اجا شب, قرفص جنب شباك السيارة, وركى راسه على ايديه اللي حطهم على طرف الشباك الكرسي اللي جنب السائق, وبحكيلي "عفكرة طالعه السيارة, ولو تردي علي بساعدك و بتطلعيها" حكيتله شكرا وهيني بحاول اطلعها, اصرّ يدلني حكيت ماشي فيه الخير, وصار ليثبتلي وانا برجع ان سيارتي بعيده عن السيارة اللي وراي يوقف بين السيارتين, وانا خايفه اطب فيه اتورط, المهم ضليت هيك لطلعنا السيارة, حكيتله شكرا و بدي امشي, بحكيلي " بس ما في ثقه حكيتلك بتطلع وما صدقتيني" و مشي للسيارة اللي واقفه جنبي و خلتني اعمل كل هالشي و ركب فيها ومشي :$ طلع صاحب السيارة اللي عملت العجئه وانا والله ولا زمرت ولا حكيت , رضيت و ضليت احاول, وكان على وجهه نظرة انتصار غريبه, ضحكتني :)


تاني مغامره قبل اسبوع رحت عند صاحبتي اللي ولدت جديد, وانا رايحه مريت على صاحبه تانيه اخدتها هي وبناتها معي, وانا مروحه من عندها لاحظت ان النمرة معلقه من جهه وحده والبرغي التاني مفكوك, حاولت ازبطها ما مشي, شكله في سيارة ضاربه فيها وهي صافه, حاولت اشيلها كلها برضه ما زبط, حكيت خلص مدامها ثابته ما حتوقع, ومشيت :)
نص تكاسي البلد زمرتلي, و اشي يوقف جنبي على الاشارة يحكيلي " يختي النمرة بدها توقع" وانا اشكرهم واصف على جنب واحاول اشيلها مش راضيه, المهم ضليت هيك من الحسين لبيتنا قريب الثامن :) بس جد الناس فيها خير الكل ينبهني, لدرجه ان بنات صاحبتي ارتعبو و وحده منهم سألت امها " ماما شو بصير لو النمرة وقعت, بتقلب السيارة" و بدها تبكي, حكيتلها لأ و وقفت و نزلتهم وفرجيتهم شو اللي فالت ليهدو شوي , واحد من الشباب اللي بسوقو بكب - في مقولة تانيه بكم - بحكيلي النره فالته, ابتسمت وحكيتله اه شكرا انتبهتلها و ان شاء الله ثابته, مشيت شوي صار يسوق جنبي و يصرّخ علي " بتعرفي كم مخالفتها هاي....50 ليره" و الشب معصب لدرجه اني حسيته هو اللي حيدفعهم :$ بحكي لاخوي بحكيلي شكله الشب دافعها لهالمخالفة قريب و محروق راسه :)

ثالث موقف...امبارح وانا مروحه من درس الدين انا وبنات خالي و بنات خالتي , كنّا 5 و بالصدفه طولنا و روحنا عال 9, وبدت التلفونات ترنرن ماما و خالتي و خالي, وينكم و ليش تأخرتو, ماما حكيت معها قبل ما اطلع لاني متأكده انها بتكون قلقانه و خايفة ترن لاكون بسوق, المهم و احنا مروحين من صويلح باتجاه الدوار الثامن, فجأه تحت جسر خلدا طلع صوت غريب بالعجل, انا حكيت خلص بنشر العجل, صفيت على جنب و نزلنا, ما في شي, لفينا على كل العجال ما في شي, وانا حسيت الصوت من العجل الامامي من جهة الراكب جنب السائق برضه ما في شي, مشينا شوي بدا يطلع الصوت وكل ما اسرعت شوي يطلع اقوى, الصوت واضح ان في شي معلق بالعجل و بضرب بالحديده من جوا, وطبعا الدنيا عتمه صفيت تحت ضو و انو نلاقي شي ابدا, ضليت ماشيه عأقصى اليمين و الفلشر ضارب و بهدوء ممل جدا جدا, لوصلنا لبيت خالي, نزلنا نطلع لانه في ضو اكتر, مرو شباب من جنبا, ةالسلام عليكم بنقدر نساعدكم, حكينالهم , طلب شب اركب السيارة و امشي شوي شوي, وفعلا, واذ بقطعه مطاط فالته من العجل من مكان الفرزات :$ مش عارفه هي زياده ويلا اساسيه, قطعناها و مشيت اختفى الصوت :) بنت خالي بدها ترميها حكيتلها لأ هاتيها بدي احتفظ فيها اللب عمللتلنا فلم الرعب هاد , وهيها معي بالسيارة :)

المغامره الاخير....اليوم الصبح, بتطلع عالعجل اللي رعبنا امبارح ليكون ماله اشي, ولكن ما شاء الله عليه ولا فيه اشي, كملت تفقد العجال , طلع العجل الخلفي مبنشر , لكن مش منفس عالاخر, بحكي لاخوي اللي بوصله عالشغل كل يوم, بح0كيلي خلص روحي عالكازيه و بزبطولك اياها, الكازيه يعني بعد شغله و يعني اروح لحالي و يعني استنى ليفتحو لانهم بعد ال 8:30 ببلشو بنشر, انئمصت و قلبت خلقتي :) انو كيف اروح لحالي !!! المهم بحكيلي خلص وصليني عالشغل و بختم و بطلع بزبطلك اياها و هاد اللي صار :)
الله يرضى عليه هو وصاحبه التنين ببدلاتهم شلحو الجاكيتات و بدو يغيرو البنشر :) و مشي اليوم على خير :)

يعني مغامرات لكن كلها انتهت منيح والحمد لله :)

9 التعليقات :

مغااااااااااااااامرات حلوة فعلا ً
متخيلة بعد كم تلاتطعش سنة تحكيها للناس و تورجيهم واحد من الأدلة (قطعة المطاط المشاكسة) ... :] ، موقف تحشيش حيكون.

بحب (بتوقع كلنا بنحب) أحتفظ بأشياء و شيئات سخيفة للتذكير بالأحداث، عندي صناديق من هذه الشاكلو و الله . الوالدة كل فترة بتهددني إذا ما رجعت بترميهم لأنها مجرّد زبالة :P

شكرا ً للمشاركة ، و تفقدي السيارة كل شهرين، ماشي :)

 

ههههههههههههههههههه
حلوة كتيييير مغامراتك هاي، اكتر شي عجبتني المغامرة الاولى يعني توجيهات وما في ثقة وبعدين طلع صاحب السيارة ول عليه شو لئيم!
ولا مغامرة النمرة أسطورية!
حزنت وضحكت عالبنات اللي فكروا النمرة لما تقع بتتدهور السيارة.
الله يعيني لما اشتري السيارة اكيد راح تصير معي مواقف ومغامرات كتييير.

 

يعطيكي العافية .. والمغامرات شيقة

للغاية ... انا بميكانيك السيارة مش كل هالقد .. ولما اروح ازبط شغلة .. بروحوا بخورفوني اصحاب الكراجات .. بسأل كل الناس قبل ما اروج عن الشغلة اللي بدي اعملها .. والكل ما بكون فاضيلي بس ارجع .. الكل بيفضى وبصير يتخوت على اني تخورفت .. طيب ما تقولولي بالاول .. قال معي معي بتعلم

لول

 

زي ما بحكوا الاميركان
you made my day
هل كنت قاصده انو تكتبي كل المغامرات حول السياره؟
السياره كانت عنصر اساسي في مغامراتك. الله يحميها ويحفظها :) اللي بتعود على السياره ما بيعرف شو يسوي بدونها. انا سيارتي تعبانه الأيام هاي وحاطها عند دكتور السيارات.ـ
رمضان كريم

 

Haitham هيثم Al-Sheeshany الشيشاني

ممكن تمشي 13 سنة ..انا متلك بحتفظ بالاشياء لمده طويله وماما بتعاني من هالشي :)

كل شهرين!!!!
ليش حكولي كل 6 شهور :)

كل رمضان وانت بخير ...الله يتقبل منا ان شاء الله

الكيل بمكيالين

الله يحلي ايامك يا رب

شفتي بالله عليكي...بس جريء بصراحه :)

مساكين كل ما حد يزمر ينشفو :$ مشيت الحمد لله
امين يا رب و يعينا على مرضات السيارات ...دايما فجأه

كل عام وانت بالف خير و رمضان كريم :)

 

Ahmad Al-Mahrouq

الله يعافيك يا رب :)

انا ولا الي دخل...بحاول اتشاطر ولكن اكتر من تغيير المسّاحات ما بطلع معي و بابا و اخوي متغلبين معي بالسيارة

يلااا شوي شوي بنتعلم :)

كل عام وانت بالف خير و الله يتقبل طاعاتنا :)

Jaraad

يلاا الحمد لله اللي قرأت شي ابسطك :)

الاسم كان مغامرات في الشارع....بعدين غيرته :)
بس معك حق..السيارة البطل الاساسي بكل المغامرات :)

امين يا رب...الله لا يحرمنا من سياراتنا الا لسيارات اجدد :)
و سلامتها سيارتك...ان شاء الله بتتصلح قريب

رمضان كريم علينا و عليك يا رب
هيهم اثبتوه عنّا...ما بعرف كيف عندكم بحسبوه وايمتا ببدا :)

 

هههههههههههههههههه
احلى موقف تاع نمره السياره

وزمر يا عم
وانا بحكي ليه في أزمه زوامير بالبلد
اتاري ويسير مستهتره بتصليح سيارتها وصيانتها

:sc:

 
أزال أحد مشرفي المدونة هذا التعليق.
 

Um Omar

و احلى شي اللي بزمر و هو صافف وراي عالاشارة و بنحكي مع بعض بالاشاره :)

شفتي....عملت ازمة بالبلد, طبعا هو انا قليله يعني, لازم الكل يعرف اني بسوق بهداك اليوم