Things I Like To Whisper About

Would You Hear Me Whispering

سبعين مليون!!!!...اي يلا عاد



بحسب المقال بجريدة الغد, بعد دراسة - مش عارفه مين اللي عملها و كيف طلعو هالارقام - طلع ان قعدة موظف الحكومه ساعه عالنت يوميا بتصفح مواقع ما الها دخل بشغله بتكلف الدولة 70 مليون سنوي


أنّ هذه الخسارة تتوزع بين 68 مليون دينار في كلفة ضياع وقت الساعة من عمل الموظف بمعدل راتب شهري يصل الى 350 دينارا، ومليوني دينار هي كلفة الهدر في فاتورة الإنترنت والأجهزة سنوياً.

انهم يعني حاسبينها بالقرش, و الحلو انهم حسبو راتب الموظف الحكومي 350 دينار و هاد المتوسط الحسابي للراتب يعني :) من وين جابو هالرقم المهول مش عارفه - قصدي الراتب هون - 350 راتب موظف حكومي !!!!



كما وأوضح الوزير أن هذه السياسة ستطبق فقط على موظفي القطاع العام من مستخدمي الشبكة العنكبوتية ويقدر عددهم بـ 100 ألف موظف، وليس على جميع الأفراد المستخدمين للإنترنت في المملكة.


هاد الناقص والله, يحددولنا ببيوتنا و بالانترنت اللي بندفعو احنا شو المواقع اللي ندخلها وشو نقرأ وشو ما نقرأ



اوك..نيجي على مؤسسه حكوميه كالمؤسسة اللي بشتغل فيها, عدد موظفينها 250 موظف, الانترنت موصول على 25 جهاز, 20 منهم على اجهزة المدراء و رؤساء الاقسام و 5 على موظفين بحتاجو النت بشغلهم, ال 20 جهاز للمدراء و رؤساء الاقسام بس 5 منهم بستخدمو النت بالشغل و الباقي ولا الهم دخل

ما بنكر ان في جزء من هالرؤساء الاقسام والموظفين طول نهارهم على الفيس بوك و اليوتيوب و بحضرو المسلسلات التركيه, و المدير العام بشغله من الصبح لاخر الدوام عالتلفزيون الاردني بركي حد جاب سيرته بأشي ليرد عليهم, وعجزنا نقنعه ان ال Download بخلص عالفاضي و لو جبت تلفزيون احسن ما في مجال يقتنع :$, وما بنكر ان في موظفين ما براعو ربنا بشغلهم و بتعاملهم مع المراجعين وما بحللو راتبهم وضميرهم ميت و بيجو بشربو قهوه و بفطرو وبروحو, ما بنكر بوجود هالفئه و اللي موجوده بالقطاع الخاص بس يمكن بنسبة اقل.

قبل ما ابدا بالموضوع ...في اشي مش فاهمته انا يا ريت حد يوضحلي اياه...هلأ احنا اشتراكنا بفاتوره محدد السعر الشهري لمزدو الخدمه و للاتصالات, يعني بغض النظر عن كم عدد اللي استخدمو عالسعر مدفوع شهري, و حتى لو خلص ال Download ما بأثر على السعر, كيف عدد المستخدمين حيأثر, بعدين مين حكا ان كل موظف حكومي في عنده جهاز كمبيوتر؟؟؟ اي اذا انا المبرمجه اول ما اشتغلت و انتدبوني عضوه في فريق مكون من 5 مبرمجين لبرمجه النظام اللي كان تقدير قيمة شراءه من شركه خاصه ب 50 الف دينار و قعدنا نشتغل لفتره على 3 اجهزه, ايوه 5 مبرمجين ب 3 اجهزه ليبرمجو نظام ضخم و برمجوه وما سمعنا كلمة شكرا اكيد, فهل بتتوقعو ان الموظفين اللي ما الهم دخل بالكمبيوتر عندهم اجهزه؟؟؟

و بعدين بحكو عن الهدر بالرواتب اللي بتندفع للموظفين اللي بضيعو ساعه عالانترنت, وبنسو الهدر بالموظفين اللي بعينوهم و ما بكون الهم مكتب اساسا ليكون الهم جهاز كمبيوتر, عنّا بمديرية الحاسوب تم تعيين 3 موظفين ضلهم 6 شهور قاعدين على الكنب بالمكاتب لحتى وفرولهم مكاتب خاصه و 6 شهور تقريبا ما عملو شي غير شربو شاي و قهوه, بالمحاسبة تم تعيين 10 موظفين جداد من 5 شهور و لهلأ برضه منتشرين على الكراسي و الكنب بالمكاتب و انجاز الشغل اليومي الهم لا يتعدى الساعه لانه باقي الموظفين اللي بخلوهم يقعدو على مكاتبهم عندهم شغل و بدهم ينجزوه, في فترة هالساعه الموظف الاصلي القديم بقعد عالكنبايه ليخلص الموظف الجديد ساعه شغل

بحكو عن رفع الانتاجية و تحسين واقع الخدمات الحكوميه, اذا بعد تفكير عميق طلعو ان ساعه الانترنت هي السبب في قلّة انتاجية الموظف فهاي مأساة حقيقيه, الموظف الحكومي اله سنين بشكي و ببكي من الراتب اللي زي الزفت, من قلّة العدل و المحسوبية اللي امشية الشغل , ان كفائة هالموظف تقاس بأنتمائه لشخص المدير الفلاني او رئيس القسم العلتاني و اكيد شغلة وانجازه ما الهم اي تأثير, او مثل عنّا بالشغل بيعطى الموظف كتاب شكر و يرشح ليكون الموظف المثالي, لانه بختم عالساعه و بوقع عالدفتر بالمواعيد و بلبس الباجه الوظيفيه بس....مش مزح بس هاد المقياس, وممكن لو موظف تأخر بالشغل لينجز اشي كتير ضروري و روّح عبيته عال 9 بالليل و تاني يوم اجا عال 8:30 يتوجهلة تنبيه لتأخره وصارت.....يا ريت تسمعو صوت الموظف و تعرفو الطريقه الحقيقيه لرفع الانتاجيه و تحسين واقع الخدمات, وما تطلعو بأرقام عشوائيه ما الها معنى و بعدين لتكسبو الشعب و لتبررو ضياع فلوس الضرايب اللي مفروضه على كل شي بحياتنا و تحكو انها هاي كلها ضرائب الشعب بتروح على الساعه اللي بضيعها الموظف الحكومي بقرأه المواقع الاخبارية المعارضه لافكاركم ....كبيرة بصراحه

19 التعليقات :

هي عنجد يلا عاااد!!!! مسخره والله ماهمي لائين شغله يشتغلوها
الناس ميته من الجوع وهمي راكضين ورى هالموظف الكحيان

 

صباح الخيييييييييييير,, ميحبا,, إزايك

كل هاد محسوب من راتبك.. كيف تصبحي ع إم عمر
مفكراها ببلاش

زكرتيني بشركه كانت تداوم فيها وحده من المحاجيب
كان المدير بس يحس في غلط او تقصير يحسبلها ساعات دوامها و مغادرتها اواكلها وصلاتها و تلفوناتها ويطلعها مداومه صدقه

يارب اكون اول :)

 

جيتي ببالي اول ما سمعت عن القرار
:D

والله ماني عارف شو احكيلك , بس انه جد جد واسعة شوي

 

على فكرة انتي ووفيتي و كفييتي يعني ما ضل اشي ينحكى

يعني ما بعرف ليش تذكرت مثل " صام صام و افطر على بصلة " لانو بتصوري لما اجتمع المستشاريين و كم وزير و صارو يحكو خلونا نشوف وين بتروح مصاري الدولة و ليش ما في عنا انتاجية بالشغل ، فصارو يعملو دراساتهم و يفكر و يحسبو و اخر اشي طلعو بالهبل هاد

يعني الشركات اللي بره بتفختر بنسب رضا الموظف عن العمل في مكان عمله ، يعني مثلا شركة الفيسبوك و الغوغل كانو من افضل بيئات العمل للموظفين ، و شوفي كيف انهم من اكبر الشركات على مستوى العالم

بتصوري لو احنا صرنا نهتم ببيئة العمل و وفرنا كل اشي للموظف و عدلنالو الراتب اعتقد ساعيتها راح نشوف كيف راح تتقدم البلد 100 سنه لقدام ، و ما اعتقد بدها ابو العريف عشان يطلع بهاي النتيجة

فكرك كم صرفو على هاي الدراسة؟

 

ميسم

شفتي بالله عليكي...وانهم تعبو وفكرو وعملو دراسات و اشتغلو عأساس :$

مش عارفه كيف بفكرو بصراحه

Um Omar

يا صباح ومسا الفل
و ميحبتين و 100 اهلا وسهلا

اهاااااا ازا هيك حاسبينها فمعهم حق... :)

الله يعطيه العافيه هالمدير...هاد الناقص والله

مبروك الرجعه للشغل :)

 

LUNAR.

بتعرفني من المعذبين بالشغل الحكومي :( الله يفرجها علينا

اللي بجلط انهم عأساس مفسرينها وحاسبينها...طيب ما حد من اللي كان قاعد بالاجتماع انتبه ان الرقم خيالي ؟؟
ويلا كانو مشغولين بالبيتي فور و النسكافيه :)

Dr.Mohammed

من حرقة دمي طلع الكلام :)

جد بقهرو...يعني هاد اللي طلع معكم!!!

الموظف مش ضروري يكون راضي....بدو يشتغل و ينحت و المدير يروج ببياضة الوجه للي اعلى منه وهيك ليوصل للوزير و هو بدورو ببيض وجهه :)


جميلة الفكرة.....كم دفعو للدراسه ؟؟؟
:(((

 

الغاية تبرر الوسيلة:
مجرد كلام ملفق علشان يلاقو حجة يقطعوا النت عن الموظف، لانه النت بالنسبة الهم وللأسف فضيحة بجلاجل، فكيف بدهم يستروا حالهم ويلغوا هالوسيلة بطريقة أدبية؟ طبعا بهيك تقرير.

 

الكيل بمكيالين

طيب عندهم هدف و بدهم يوصلوله يشتغلو شوي و يعطو حجّه و اسباب مقنعه...يتعبولهم شوي ولّ...

 

الحكومة بالحساب ... بتسعمل الفيزياء من الرياضيات
عشان هيك بتطلع ارقام صعب اغبياء مثلنا يفهموها او يحسبوها

الهدر بالقطاع العام انو حاطيين موظفين فاشلين بنسبة 75 %
ومش حاطين حافز للموظف , الي اشتغل اخو الي مشتغلش ومرات العكس الي بشتغل بحسوه بدو يخرب عليهم فا بقرفو عيشتو

انتي ليش تحكي عن مديريتك ؟؟ احكي عن البلديات الي بداوم فيها 5000 زي بلدية الزرقا وعدد موظفينها 15 الف
21 موظف محطوطين لمقسم الكتروني بلزموش الا موظف واحد يمر عليه بس يصير فيه مشكله

الحكومة صح بس لازم تمنع الانترنت عن الموظفين الي ما بستفيدو منو والي بخربو على الناس والموظفي الي بتحتاج النت
بس مافي داعي للكذب

 

سبعين شو ؟ طيب منيح يعني مع القرارات الجديدة رح يصير في حياة و رخاء و تخفيض ضرايب على هيك
:)
بس ويسبر لاكون حقانية
انا شخصيا اشتغلت باكتر من مكان كان ممنوع فيه استخدام النت بتاتا الا بكم مكتب للي محتاجينه
و بصراحة انا بتقبل الموضوع لانو
تعرضت لاكتر من موقف في معاملات ( بعمان خاصة ) الاخ اللي بدو يوقع او يخلص الورق بشيك على الجرايد او الايميل و بقولي استني شوي و المشكلة اني شايفة هو شو بعمل لكن لا حياة ...
طبعا مش الكل
بس الامر هادا منفذ بكتير دول و سفارات يعني امر طبيعي
بس اللي مو طبيعي 70 مليون شو ؟
يعني مش لهالدرجة

هامش ( ذكرتيني ب يلااا عاد من زمان ما سمعتها :))
)

 

قط البكتريا

اهااااا...وكمان طلعنا اغبياء :( شكرا جزيلا الهم


صح...كتير من اللي بشتغلو بقسم المحاسبة و بطلعو اخطاء و نقص بالفلوس مكروهين عند المدير :)

و موضوع 5 موظفين بشتغلو شغل موظف واحد هاي مليانه عنّا

Jafra


اهااا عجبتني الفكرة, بهيك الخزينه بتصير مليانه اذا :) شوفي كم سبعين مليون بسبعين مليون حيتوفر هلأ :)

الموضوع منطقي و فعلا في كتير موظفين بلتهو بالنت و اذا ما في نت بالجرايد, اي انا بعيني شفت بنات بسلقو حمص و بحفرو كوسا بالشغل :$

لكن المبالغه بالرقم هي اللي بتقهر, و ربطها بالضريبة اللي بدفعها الشعب, مش لهدرجه يعني

ههههههههههه لاااا لساتها منتشره عنّا....او عندي لحالي يمكن :)

 

صباح الخير ويسبر

بصراحه أغرب مافي الموضوع إنو عم بيتحدثوا عن أساليب لضبط النفقات ودراسات وأرقام ولكن كل اللي متمنيه عن جد إني اسمع في يوم من الايام عن جهة أو قطاع حكومي بتنتهي السنة المالية فيه بدون حصول عجز

ياترى ممكن نسمع بكلمة فائض بدل عجز ؟

لو حصل هاد الكلام أنا أول المؤيدين لأي دراسه من هادا النوع

نهارك سعيد

 

في كاريكاتير شفته لموقع على راسي ... عن هالموضوع .. بيحكوا فيه .. يعني اذا بطل الموظف يقعد ع النت بالدوام ... بنصير زي سويسرا؟؟؟

 

طيب ليش ما يعملو دراسة يقيسو فيها كفاءة الموطف و انتاجيته لما يكون موفر الو جو عمل هادئ و مريح و مناسب؟؟؟ ولّا هاي ما سمعو فيها؟
أنا بتذكر لما كنت بالشغل ما كنت أعرف أشتغل إلا إذا مخمخت على كاسة النسكافيه و فتحت النت لمدة 1/4 ساعة على الأقل أشوف فيها شو بصير حوالي بهالدنيـا و بعدها بضل أحرث من ال 9 لل 6 بدون توقف و اللي كنت أنجزو بهالـ 8 ساعات بنجزو غيري بيومين أو أكتر...
يعني الشغلة ما إلها علاقة بالنت أو غيرو، إنما براحة الموظف و محبته للشغل و إخلاصه إلو... يروحو يشوفو شركة Google كيف الموظفين عندها بشتغلو، و أكيد الكل سمع عن الرفاهية المش طبيعية اللي بتمتعوا فيها موظفينهم، و مع ذلك ما أثرت هاي الشغلة على كفائتهم أو على ميزانية الشركة، بالعكس، صارت من أكبر و أحسن الشركات عالمياً...
عن جد يلا عاد!!!!!

 

ياريت تصوري العجل و قطعة المطاط

 

اشرف

صباح ومسا الورد اشرف :)

للاسف ما بتلاقي...لانهم ما بدهم هيك دراسات تكشف السرقة اللي بتصير و من وين بصير العجز بالزبط

وبرضه للاسف...ما اعتقد انك تسمعها ابدا كلمة فائض هاي

كل رمضان وانت بخير اشرف والله يتقبل الطاعات

Ahmad

ههههههههههههههه....سويسرا!!! ممكن برضه :)

ما شفته هالكاريكاتير...لكن كل كاريكاتيراتهم عالوجع بتكون
:)

 

Mrs H

ما بصير ترتاحي بالشغل...كأنه بتعملي ذنب كتير اذا ارتحتي

انا نفس الشي ما بحب ابدا نهاري بالشغل فورا بحب فنجان قهوه و شوي نتطمن على بعض انا وصاحباتي و بعديها بنضل نشتغل لاخر الدوام ومع ان كل الشغل بنشتغله وما في اي تأخير برضه ما بحبو هالشي :)

كل عام وانت بالف خير والله يتقبل الطاعات ان شاء الله :)

Anonymous

شكله هالتعليق جاي هون بالغلط :)
قصدك عن مغامرات السيارة
ان شاء الله قريب بصورهم و بحط الصوره

كل عام و انت بالف خير

 

جاي غلط
معك حق
الواحد سطل على الاخير

 

Anonymous

ههههه..يلا بسيطه
شكله تأثير الصيام بدا قبل ما نصوم حتى :)