Things I Like To Whisper About

Would You Hear Me Whispering

اللي بدها تتستر... تتستر





الصيف هاد مناسباته قليله نوعا ما, و الي فترة حابه احضر حفله مع اني بالعاده بندم لكن اشتقت للحفلات, و صدفت الخميس يكون عندي 3 حفلات 2 خطبه و زواج - عقبال عند العايزين - رحت عالخطبتين و للاسف ما قدرت اروح عحفلة الزواج لانه الخطبه للقرايب و الزواج لاخت صاحبتي, مع اني كنت كتير حابه اروح :(

هلأ احنا باعراس خواني اجو ناس قرايب - سكان عمان - ونامو عنّا بالبيت, و للحق كنّا فرحانين بوجودهم, يعني عجئه البيت ما بتتأثر بوجود ناس اضافيين, و بما انه بابا - مع انو مش اكبر واحد بخوانه - من اول ما تزوج حكا لمميتي انه العيلة بعتبروه كبير القوم " وكبير القوم خادمهم" فالكل بالعاده بيجي و بنام وبلجأ لبابا وخصوصا ان تيتا - الله يرحمها- كانت ساكنه عنّا, المهم هلأ خطبة بنت عمي, وبرضو الناس اختارت تيجي تنام عنا :) حجتين كبار بالعمر, بس حكياتهم وقصصهم بتجنن فماشي الحال


الخطبه الاولى لوحده من قرايب مميتي و الخطبة التانيه لبنت عمي, فبابا طبعا صرعنا رسمي, هلأ هو ما بدو يتأخر على خطبة بنت عمي واللي بتبدا بعد الخطبة الاولى بساعه, فخلانا نطلع عالخطبة الاولى بكير و كنّا اول الواصلين :$ بس الحمد لله بنت خالي اجت بكير و قعدنا ندردش و حكيتلها عن موضوع شاغلني حاليا واعطتني نصيحه كتير فادتني الحمد لله, كأنه مقدّر اروح بكير و الاقيها :) المهم الخطبة الاولى مشيت وكلو تمام و بابا اتصل بالوقت المناسب اللي كنّت بديت املّ من الحفله.


روّحنا عالبيت و غيرنا و طلعنا عخطبة بنت عمي, كل شي تمام و عيلة العريس الكل تقريبا لابس عبايات, و قاعدين وماشاء الله عليهم, وبس بدت الموسيقى قبل ما يدخلو العرسان و نزلو قرايب العريس عالبيست, تقريبا 90% منهم لابسين لبس اقل ما يمكن اني احكي عنه انه "بخزي" يعني في خط بين اللبس الحلو اللي بتفشي قلبك فيه اسمه الحفله مش مختلطه وبين اللبس اللي بتشوفيه و بتحكي مين اللي بترضى عحالها تلبس هيك لبس, اشي مقزز بصراحه, مرة اخوي بتحكيلي " بدي اسألك...هدول قرايبكم؟؟؟" حكيتلها " اطلعي على وجوه قرايبنا اللي سلمتي عليهم بتعرفي :) " الكل منصدم, حتى فروحة حبيبتي منصدمه, هلأ بتحكيلي حرية شخصيه, بحكيلك ماشي بس ما تتعدى على حريتي انا, وحتى دينيا في حد للبس بين البنات و الاخوات متجاوزين الحد بنص متر :$ اشياء غريبة عجيبه, احلى شي بس وقفت الموسيقى كلهم قعدو على طرف البيست, يعني مش هيك عرض العرايس بصراحه, مرة اخوي بتحكي " ايتها الام..انتبهي شقفه على الجدار " :)

هلأ كل هاد بنحاول نبلعه مع انو ما بنبلع, اجو العرسان والبنات لبسو وقعدو , المؤسف انه بس رجع العريس للمرة التانيه للحفلة, المسؤول عن ال DJ اعلن ان العريس بدو يدخل الصاله و حكا " الستات اللي بدها تتصتر تتصتر" تتصتر= تتستر , ضحكنا عالكلمة وعلى انو كيف يعني اللي بدها, وطلع معو حق لانه في بنات ما بدها, لبسو البنات العبايات وماشاء الله عليهم , لكن مجموعه منهم بس لبست العبايه بدون ما تسكرها , و رمت الحجاب على شعرها و صارت ترقص حول العرسان, وكل شي بالشارع و العريس المسكين يغض بصر و يلف وجهه, والحجاب يسحول وترجع ترفعه ونص شعرها مبين, جد اشي مقزز


ما بعرف هالامهات اولا و هالبنات كيف بفكرو , وكيف بعتبرو حفلات الاعراس فرصه لعرض هالبنات بهالطريقة المبتذله, يعني ماشي اعرضي حالك بس بالعقل, ترتبي و بيني حالك انك نغشة و اطرشي وجهك لتبيني بيضا وشقري الشعرات و البسي عدسات, ماشي بغصب حالي و ببلعها..... بس هيك...جد كتير

ملاحظه عالهامش..... ما بعرف ايمتا عماتي بدهم يبطلو يسمو بدني بطريقة تعبيرهم عن محبتهم الي بانهم يصيرو يدعولي بابن الحلال و شوي وبدهم يبكو علي اني مش متزوجه وبناتهم و بنات عمي الاصغر مني بتزوجو :( جد بحسهم بشحدو علي... صحيح ببتسم و بشكرهم عاهتمامهم ومرات بحكيلهم انه نصيب واذا في نصيب حيجي بوقت ما ربنا كاتب ,بس جد بسمو بدني , ومهما ماما حاولت تقنعني انه هيك طريقتهم بالتعبير عن محبتهم ما بهون الموضوع, وما بصدقو اني بكون فرحانه من كل قلبي بحفلاتهم و اني بس اشاركهم فرحتهم ابدا ابدا ما بتكون مجامله... بنظرهم المفروض اقعد عجنب و احط ايدي عخدي و اندب حظي :)


37 التعليقات :

يا الله يا ويسبر شو إنك traditionalist + not cool
أبدا ً، الفرحة بدها تعمّ الكل و بدنا "نهيّص" ... مش بكفي الدنيا نكدة و الضرائب هالكيتنا... خلينا نفضفض شوي!

حسبي الله و نعم الوكيل بس.
و بالنسبة لعماتك، معلش... هيك العمات دايما ً ما هو :] ... داااااااااايما ً !

 

بديش اعلّق بلاش يرتفع ضغطي
:(

 

ههه لزيز الموضوع
حبيته لأنه انا من الناس اللي كتير باعترض على هيك قصص بالاعراس , وعلى الغالب بطلع انا الغلط
هه,هلأ بيني وبينك منيح منهم اللي لبسو العبايات وخلوهم مفتوحين في بعض العامل عندهم العريس محرم,وقال عروسته جنبه ما رح يتفرج على غيرها

كذلك موضوع الزواج ..هاد موضوع يبدا ولا ينتهي على قد ما البشر عندهم جهل وللاسف هاد النق من العئلة على انه عقبالك .. وفلانه ما في مشروع خطبة قريب؟؟ وكل هالحكي مرات بياخد البنت لقرار صعب انه توافق على شخص مش مناسب بس لحتى تتزوج و تخلص من تعب هالاعصاب

بتصور انه كل هاد بنحط تحت عنوان عرض اسمه جهل
ومرات هالجهل بكون من ناس متعلمين

شكرا على مواضيعك كلها بحبها وبكون عم بقرا وانا مبتسمه
:)

 

لوووووووووووول,, تتصتر اه

اول شي,, سيبيكي من العالم اللي حوليكي,, همه هيك بعملو حالهم مهتمين,, بس بدهم الأصح إلنا,, وكإنه إحنا اللي بندير حياتنا بإدينا
الله يهديهم

تاني شي,, منيح اللي لبسن العبايات ع حالهن,, اخف بلا صدقيني

 

whisper
awwalan la t7utty 2eedek wala tendeby wala 3 balek ..ehhhhhh
y3ni hummeh kteer su3ada? hehe wk at least nty mray7a rasek ,.... :p
well ..
el tashlee7 o elli byenso el lebes bel 7flat ma2asiiiiiiiiiiiiiiiiiiiiii
o aflam 3ajab ,...
la best7o mn 3arees wala mn 3'ero
el muhem enno ye3maloo 3ard lu7oom b hal 7aflat zay elli awwal marra beyse7elhom yeshla7o el lebes el shar3i .. she msh m32ool ...
ma3k 7a2 she mu2ref ..
el banat la wasleen 7ad el nus wala el rube3 ,.
el banat nasyeen ell lebes bel marrrrrrrrrrrra ....
:s

 

Haitham هيثم Al-Sheeshany الشيشاني

هو ماشاء الله علي ..ماشاء الله علي
من يوم يومي وانا دقّه قديمه :)

لااااااااا شو العمات دايما هيك....بما اني ما راح اكون غير عمّه فلأ ...العمات بجننو :(

LUNAR.

هو بصراحه اشي بجلط مش بس برفع الضغط :(

 

ربى حجازي

دائما بنطلع احنا الغلطانين...من باب حرّيه شخصيه...لباب انو مش صاححلي ولو صاححلي ما بحكي لأ...بحب بس الناس تسقط فرضياتهم انا :$

مبدأ ان العريس فجأه يعامل كأنه محرم, او انه هاليوم شو مالك انتي خلي العالم تنبسط ..للاسف منتشر كتير

هو طريقة تعبير عن المحبه كتيييييييير غلط...من الحب ما قتل يعني :)

شكرا الك لمتابعتك و لتعليقاتك :)
انتي الذوق كله وان شاء الله الابتسامه ما تفارق وجهك

Um Omar

تتصتر :)))

هاي هي...بس مش مقتنعين بانه نصيب
بضلهم يحكولي...تشتطري و شوفي فلانه شو شاطره جابت العريس لباب البيت :$
شو اللي اتشطر!!!!

اكتر من تعليق حكو هيك :$
شكله منيح اللي لبسو عبايات :)

 

Farah Batarneh

loool 2akeed....wella keef beddy 2aza2ef :D

benazarhom elsa3adeh mesh mohemmeh..elmohem 2enno 2esmek metzawjeh, mabso6a mesh mabso6a mesh mohem :$

2eshe be5ze kanoo...y3ne la 7aya wala deen wala 2eshe mane3hom

allah yehdee eljamee3 ya rab

 

ليش ماتدوري ع عريس, اه ليش
اما إنك رجعيه و عقلك فلاحي صاير
خليكي مودرن,, وروحي أعملي متل مابدهم

و ع الهامش

همه هيك القرايب" او العقارب ع قوله ستي " بدهم ايانا نعمل الي بدهم ياه
ييي,, متى رح تنجح بنتك بالتوجيهي
ييي,, متى رح تدخل الجامعه
ييي,, متى رح تتخرح
ييي,, متى رح تتزوج
يييييييييييييي ماخلفت

يييي,, مابدك تخاوي اخته
وبس توقع بالخلفه والعددالكبير بتركوها بحالها وبدورو ع حدن تاني يعلقو عليه

اسأليني أنا :@

 

موضة التشليح بالاعراس بتفلق ...يعني زمان لا كنا محجبات و قليلين دين على رأي ستي الله يرحمها ومع هيك ما حدا كان يلبس بهالشكل الفاضح حتى في الاعراس ولا حتى في الحفلات الستاتيه البحته. حضرت عرس قبل فتره وحده من القرايب كانت لابسه فستان مكشوف الاكتاف...المفروض ان العرس مش مختلط لكن مصور الفيديو كان رجل والدي جيه كمان...والجراسين شباب ومع هيك كانوا الاكتاف بالشارع على رايك ولما دخلوا شباب العيله باخر الحفله....راحت لبست جاكيت !!!!يعني نفسي افهم!!!لهلا نفسي افهم انه شباب العيله رجال والمصور والجراسين مش رجال مثلا وللا شو؟؟؟ اشي بيفلق!!!1

 


مهو هاي الحفلة مرة بالعمر خلينا نفرح شوي


يالله شو بكره هالحكي الفاضي ، يعني صايره حفلاتنا و اعراسنا ما هي الا عرض عرسان ، يعني صار الشغل الشاغل بدماغ كل بنت او امها للبنت انو كيف لازم تطلع حلوه و كيف انها لازم تعرفها على كل الموجودين أكانو من العيلة او مش من العيلة و طبعا بالاخص مش من العيلة ، يعني صارت الام تروح تجيب بنتها و تحكيلها تعالي سلمي على مش عارف مين ، و بتصير تحكي "هاي بنتي تخرجت من مش عارف وين و هيها بتشتغل ابصر وين و بتستنى ابن الحلال، صحيح حكتيلي ابنك بدور على عروس ، شو طمني لاقى عروس و لا لسه؟" يعني مشان الله ، صارت البنت اذا ما عندها اشي مليح تلبسو على العرس بتلغي كل هالمشوار لانو بتخاف انو بنات عمها يطلعو احلى منها

و الادهى و الأمر انو احيانا بعد ما تخلص الحفلة الام بتوخذ شريط الحفلة و بتقعد تفرجيي لابنها بلكي لافى العروس المحتملة

ستي مجتمعنى شبع من كل هالبهارج لدرجة انو صرنا ننسى ليش رايحيين على العرس و بصير شغلنا الشاغل انو هديك كانت حلوة و هديك ابصر شو لابسه و اسمعت عن هديك انها اطلقت و من هالحكي و مننسى انو احنا رايحين نفرح للعريس و العروس

 

شكلك همسة ناسية أنو الأعراس فرصة لعرض الناس لبضاعاتهم قصدي بناتهم, الناس ما بتستحي بالشوارع بدها تستحي بالأعراس, الحرية الشخصية هي الحجة الدائمة لكل شي فاسد و منحط و للأسف ناس كثيرة بتدافع عن هالمفهوم للحرية يعني ما راح أستغرب إذا بتصير عنا نوادي تعري في المستقيل مشان هاي الحرية.


نفسي أفهم ليه العالم بهما كثير غيرها تزوجوا ولا ما تزوجو؟؟؟؟

 

مسا الخير:
أولا أنا ضحكت وضحكت لحد ما معدتي طلعت من حلقي على تتصتر. ولسه وانا بكتبها بضحك ههههههههههههههههههههههههههههههههههههههههههههههه!

تاني شي لما يجي وقت عرض العرايس بالفاترينه -اللي هي حفلات الخطبة والاعراس - فكل شي مباح! وفي هيك يوم بالذات بتنهار الاخلاق وبيعجز الدين! والحق مش على البنات وبس الحق كمان على الامهات التافهة اللي بتسمم أفكار بناتها وبتقنعها بانها تنعرض بهالطريقة المقززة وانا بقدر اتصور المشهد بسهولة لاني شفت منه كثير.

اما الملاحظة اللي عالهامش فلا ينسم بدنك انا زيك وكلنا بالهوا سوا والناس شو ما فهمتيها انه نصيب وبيجي بوقته ما بتقتنع ولا بتصدق والا ما تتهمك انه فيك اشي غلط. وهاي مش وسيلة للتعبير عن المحبة هاي بس فرصة لينكدوا عليك لانهم شايفينك مبسوطة ومش هامك.

وهاي النقطة بالذات انا بستغرب منها يعني اذا لسه ما اجا نصيبي مش معناه اني مهمومة او شي ناقصني بالعكس! أنا ايام من كثر المشاغل ما بفضى احك راسي وبعدين حياتي حلوة بروح وين ما بدي وبكتب وبقرأ وبسهر وانت اكيد زيي حتى بتشاركي بالعمل التطوعي وهاد اكتر من رائع! فحياتنا مفيدة وذات هدف اكثر من المتزوجات.

انا ما بندم على حياتي ابدا وبحكي لحالي العريس اتأخر علشان اعمل كل اللي نفسي فيه وما اندم على شي، ولو اجا بكير كان انطمست بالبيت والاولاد و زعلت على اشياء كتير فاتتني وكان نفسي اعملها.

مساك سعيد وانبسطي بحياتك على قد ما تقدري.
سلام

 

هههههههههه

هههههههه
احلى شي اخر فقره

لاني بعاني منها كتير لدرجة انو صرت احس الدعوه مسبه:)

ومرة اخوكي دمها خفيف بالمناسبه

 

Um Omar


بحكيلك...انا مش شاطره :)
لو شاطره كان من زمان صعت...قصدي تزوجت :)

الناس اجمالا لانهم مش مبسوطين بحاولو يلتهو بحياة الناس التانيه, و دائما يحسسوكي انو في شي ناقص علشان يكمل المسلسل تبعهم :) خلي العالم تتسلى انتي ليش زعلانه

الله يعينك...كل مرحله الها "الليشات " المرتبطه فيها

Nissan

O_o
جديده هاي...مش مختلط و الجراسين و المصور زلمة :$ طب والاخت العروس؟؟ واللي برقصو؟؟ يا لهوييييييييييي هاي كاينه ميمعه الدنيا

بكون نفسي اروح احكيلها...كتّر الله خيرك اللي لبستي :$
المشكله انه الناس مرات بكونو - المفروض - متدينيين و البنت من رابع ابتدائي محجبه وعالعرس بعملو عمايلهم والكل مبسوط وبزقف
جد اشي بفلق :(

 

Anonymous

Thank you ...

Dr.Mohammed

المشكلة ان الموضوع صار مكشوف زيادة عن اللزوم....يعني مش هيك يا عالم :$

ههههههههههه ما شاء الله حافظ الحوار...عفكرة هالحوار بتكرر بكل عرس و عكل طاولة تقريبا :)

من موضوع شريط الحفلة اللي بلفلف عالبيوت بطلت اقوم من مكاني بالحفلات الا اذا وقّفو تصوير و بس بافراح العيلة :)


للاسف المعظم بروح ليحكي عن العالم,وهمه بزقفو و بغنو و بضحكو

Ahmad Hamdan

هي بضاعه, و المفروض لتلفت النظر تكون مزينه و ملونه و مبهرجه و نخليها تلف لفتين قدام الزبون لتعجبه :$

معك حق...معظم الاعمال المنافيه للدين وللعادات وللطبيعه حتى, بحطوها تحت بند "حرّية شخصيه" ليضحكو على حالهم و يفكرو انهم بضحكو علينا

مش عارفه... يمكن بدهم الكل يشرب من نفس الكاس ويعاني زي ما همه بعانو :)))

 

الكيل بمكيالين

ههههههههههههه ...واحنا لهلأ بنحكي الكلمه بالبيت :)))

اه طبعا...همه بعملو عمل انساني و بوفقو راسين بالحلال...فلازم يضحو بكل شي بالمبادئ و بالاخلاق ..ما بدي احكي بالدين لانه مرات اشي ما بفكرو فيه

الام هي اللي بتكون موصيه بنتها شو تعمل وشو تلبس و كيف توقف ....الله يسامحهم

شكله كتير اللي بالهوا معنا :)

جد بكونو مقتنعين انو انتي مش مبسوطه وانك بتتحسري كل ما حد تزوج, وبتوقعو ان حياتك فاضيه و هاديه و بس بتستنى بالمحروس

الحمد لله ان حياتنا مليانه وحلوه, و الحمد لله ان حوالينا اهل بتقلو بالذهب و حياتنا معهم ولا احلى

حياتنا بدها تمشي و انتي بتحددي تنبسطي وتحققي اشي ويلا تضلك قاعده..و هالعريس بوقته بيجي لا هو ولا انا بنحدد و بنقرر :)

الله يسعد مساكي و كل اوقاتك يا رب
ان شاء الله..ما توصي حريص :))

مياسي

انضمي للصف معي ومع الانسه كياله :)

بالزبط :) يعني حلوه الدعوه بس الطريقه بتخليها مزعجه :$

ليش الحكي....كل بنات اربد دمهم خفيف
:)

 

هذا ان دل على اي شيء فإنه للأسف يدل على ان كثير من النساء في الأردن يلبسون الحجاب كنوع من الانقياد للعادات والتقاليد وليس نوعا من التدين.ـ
انا ما بحب احضر أعراس نهائيا. مش فاهم من وين اجت فكرة انه العروس والعريس لازم ينصمدوا بالواجهه والناس تتطلع عليهم. انا بقول بدل مصاريف العرس ليش ما يسافروا بره البلد على مكان راح يتذكروه طول حياتهم. مره حكيت لوالدتي اني بس اتزوج ما راح اعمل عرس (طبعا اذا وافقت العروس المصون) قالتلي شلون هيك لازم نفرح فيك. شكلوا لازم عرس.ـ

 

لهيك انا ما بفضل البنت تتحجب غير لما تتأكد وتعرف بأنه بحجابها لازم تلتزم بشغلات تانية وتكون قدها

ما تاخد الحجاب كتقليد وبس

للاسف انا عم بشوف انه بعض المو محجبات أصتر (استر لول) من البعض المحجب حجاب الموضة اللي بسيئ للبنت وللدين بذات الوقت

تحياتي

 

ياربي عندنا مثل اللي عندكم ع الاسف لبس حتى انا بنت استحي اشوفه استغفر الله

وعلى سالفة الزواج هذا الشي يقهرني اذا احد يقول لوحده ماتزوجت ياعمري ليه ماتزوجتي ...ياعمري مافي احد خطبك ..ياربي متى تعرسين ونفرح فيك
اكيد عين ماصلت على النبي ؟؟؟؟؟؟؟؟؟؟؟


الناس مايخلصون من كلامهم اللي يعور القلب وانتي الحمد لله مقتنعة ان هذا اللي كتبه لك واذا كان اك ف السماء رزق بتاخذينه اليوم او بكره بس مدري متى الناس تسكر فمها ؟

 

والله يا ويسبر انا بدي اموت واحضر حفله واغني وارقص بس بيني وبينك وماحدا يعرف يعني :)بكره الحفلات من قرايب النكد
اعذري البنات ما كل وحده تسمع مشوح متل اللي انت تسمعيه والكل بحاول يلفت النظر من شان يتزوجوا ويخلصوا من كلمة الله يستر عليكي كأنه السترة بس الوحده تتزوج وترتبط
تعرفي انا كنت وحده من الناس اكره كلمه الله يستر عليكي مش لاشي بس لانها دلاله على انه الوحده مفضوحه او رح تنفضح اذا ما تزوجت بيني وبينك ما بدك وجع راس اسمه عتريس!!

 

Jaraad

للاسف في كتير بنات الحجاب فرض من الاهل بكون و مش عن دين...عن عادات وتقاليد او قانون كل بنات العيلة بس توصل لسن معين لازم تتحجب

عمري ما فكرت بالعرس بهاي الطريقه :) بس فعليا هاد اللي بصير

انا متأكده ان خالتو هيك حكت....مدام الاقتباس باللهجه السوريه اذا صح 100% ان شاء الله بنفرح فيك عن قريب و بتعمل عرس صغير علشان الاهل و المصاريف بتروح عالسفره :)

Ahmad Al-Mahrouq

انا مع ان البنت بس تتحجب تكون مقتنعه 100% لانه بهالحاله بس بكون الحجاب اشي اساسي بحياتها وما بتتنازل عنه بأي ظرف

معك حق للاسف الحجاب الموضه الجديده هاد اشي بخزي و في مش محجبات "اصتر" منهم
لبس بخزي ما اله دخل بالحجاب و بس مغطين شعرهم بكونو :$

الله يهدينا ويهديهم يا رب

 

White Freedom

اول شي اهلا وسهلا فيكي..اشتقنالك كتير
نوّر البلوج :)

اعتقد ان عندكم الوضع اكتر...هيك بسمع ان اللبس بكون كتير مبالغ فيه :$

الناس بتحب تدخل بحياة العالم مش عارفه ليش !!! تزوجو او ما تزوجو وانتو مالكم

و بركي لا سمح الله ربنا مش كاتب لحد يتزوج...تضلها طول عمرها بس عايشه على هالحلم وواقفه مكانها بتستنى؟؟؟

Sozan

ان شاء الله عن قريب بنشوفك بينا و بعزمك على عرس باحلى فندق...هيك احسن لا بنعرف حد ولا حد بعرفنا و بناخد راحتنا عالاخر :)))


اه..السترة هي الزواج بنظرهم, و كأنه اذا مش متزوجه بتكوني بالشارع :$

هلأ ما حد بنكر ان الزواج سنّه الحياة, لكن مش هدف و مش بأيدنا نحدد, فنتوكل على الله وربنا بكتبلنا الخير وبنمشي بحياتنا, واذا ما تزوجنا برضه بنكون مستورين :)

هههههههه عجبني "عتريس " ...عالدور يا صبايا كل وحده الها عتريسها :)

 

كيفك ويسبر
هم العمات ما الهم غير هالدعوتين
و كم كلمة بكل مناسبة
بس و الله طيبين
كل العمات طيبين
و لا تهتمي و عقبالك بس لازم تعزميني
المهم
بالاعراس لاحظت شي كتير غريب
نسبة التزليط عم تعلى بشكل تراجيدي يعني صاروا يهتموا بقصة الكريمات و اللميع و يكلف اكتر من الفستان نفسوا لان الفستان اصلا مو مبين
مع اني بقول كل واحد حر يلبس ما يلبس هو و ضميروا
بس الضمير بالمرة ما عاد موجود
:)

و احلى شي لما يقولوا العريس دخل كل القاعة بتقلب اسود باسود بهالعبايات
انا شخصيا مريحة حالي و مرتاحة هادا اصلا اذا اضطريت و حضرت

 

Jafra

انا حكون عمّه مودرن وكول و احكي لفروحه زي ما بدك, انتي قرري تتزوجي او لأ...بس بخاف ما اتزوج و يحكو عني بعقد البنت وبدي اياها تطلع لعمتها :))))

الله يخليلينا اياهم..بعرف انهم من محبّه بس الطريقه غريبه :$

انا بدي اول شي اتطمن على كل البلوجرجيه و البلوجرجيات و بعدين بشوف حالي....عقبالك انتي كمان :)

ما في ضمير اطلاقا مطلقا... في بنات ما بتعرفي شو لابسه بالزبط

يا ريتهم بس يدخل العريس او الرجال باخر العرس بتشحو بالسواد....لازم اشياء ملونه و مزركشه و بتبرق تبين من هون ومن هون ...والشعرات حرام تخرب التسريحه, فبرمو الشال عراسهم و خلص ...يقتلو حالهم الصبايا يعني!!

 

ويسبر ...العرس مش مختلط لسبب واحد ان قبل بيوم كان في غدا للرجال متكلف شي وشويات...وحفلة العرس بفندق من تبعون النجوم الكتار ... فاختصارا للتكاليف عملوه مش مختلط اصلا العروس مش محجبه لكن ام الفستان محجبه...يا وردييييي ...حاسه حالي كأني بجلسة نميمه :))))ء
خلص بيكفي قرّ على الناس...الله يهنيهم وأنا مالي؟؟؟

 

Whisper,
مش عارفة شو أقولك
إدايقت كتير بس وصلت لأخر اللي كتبتيه و إتذكرت اللي بعملوه عماتي فيي!!

مش قادرة أعلق لأنه الموضوع خانقني

 

Nissan

يا صباح الفل

ههههههههههههههههههههه ....خدي راحتك...ما انا ما بعرفها ام كتاف هاي :)

الله يسامحهم كيف بخربو حجاب سنين بلحظه ...حتى العرايس المحجبات اللي ما بهمهم يوم عرسهم, يعني بداية حياة سيئه :$

Palestinian Princess

لا تدايقي ولا عبالك...هيك طريقتهم بالتعبير عن اهتمامهم و محبتهم...شو بدنا نعمل, بدنا نستحمل :)

صباحك فل وياسمين يا رب :)

 

هههههههههه ملعوبه

كنت عارفه انو رح تحكي هيك :)

يسلملي الزوق :)

 

مياسي


هاد واقع ما بختلف عليه 2 :))))

 

اذا لبسو عبايات بسيطة...
أنا صرت حاضرة حفلتين وحدة كانت خطبة السنة الماضية، و التانية زواج من أسبوعين، بتكون فيهم أخت العروس منقبة (مش بس محجبة) و بتكون نازلة رقص و خلع قدام العريس عأساس انو محرم، و بس تيجي تطلع من الصالة آل بتلبس جلباب و بتتنقب!!!!
هاي الموضة اللي ما دخلت مخي و لا فهمت مبدأها أبداً!!!!!
ولله الواحد بروح عالحفلات ما بستفيد إلا كتر النم و السيئات من العوج اللي بشوفو!!
الله يعين بس...

 

Mrs H

اهلا وسهلا ياقمر...اشتقنالك :)

للاسف هالشي كتير بصير ...بنسو الحجاب و بنسو الدين و بعيشو هاليوم, يعني بداية حياة سيئه جدا

الله يسامحها و يهدينا ويهديها

فعلا الحفلة مرات بتكون كلها تجميع سيئات :(

 

I liked the title and the picture :) I totally agree about how silly and funny it is in weddings in Jordan!

 

Susu

Unfortunately weddings in Jordan still with the same silly actions :$

Welcome to my blog
Happy to have u here :)

 

يا الله شو بحب قصص الكبار بالعمر.. كتير بنبسط وبستمتع لما أسمعهم..

الواحد قدما شاف هيك قصص صار يتوقع الأسواء.. بتكوني قاعده وبتقولي هلأ في حد حيجي وهوه معجب عحالو عالآخر.. ونفسي مره أنفقس وما ييجي هالحد..

الواحد أهم شي ينبصت بالمناسبه ويفرح مع أصحاب الفرح وغير هيك ما يهتم لإشي.. إحنا جايين نشارك بالفرحه :)

 

و هدول حكياتهم بجننو كمان ...والسهرة كانت حلوة كتير :)

لاااا ما شاء الله دايما موجودين...ما بعطوكي مجال تنفقسي :$

معك حق, مع انه والله هالمناظر مرات بتأذي نظرنا غير انه ممكن يكون داخل بالحرام كمان :(