Things I Like To Whisper About

Would You Hear Me Whispering

حتى موبايل ما عندها




وهو اخوي هون - الله يسهّل عليه :( - اجتمعنا مرة مع اخت زوجة اخوي و زوجها واللي بكون ابن خالي - انا ما حكيت مع ابن خالي ومرته لانه احنا بالعيله مش متعودين انّا نكون صحبه مع شباب العيله وانو يكون في بينا حكي واخد وعطى واكتر من السلام عليكم ما في بينا , لكن سبحان الله النسب خلّى فرص الاجتماع اكتر - من ضمن الحكي صارو يحكو عن صاحب ابن خالي اللي خطب من كم يوم, ابن خالي و صاحبه بشتغلو بمدرسة خاصه بعمان, المدرسة من اللي بدفعو الاهل مبلغ مهول لطالب الروضه , و اخوي كان يدرب الطلاب سلة بالصيف بالمدرسة, وبنت خالتي اللي زي اختي بتشتغل بهالمدرسة, فأنا بعرف الشب اللي بحكو عنه منيح وخصوصا من بنت خالتي , المهم بحكو انه الشب عمره 31 سنه خطب جديد بنت عمرها 18 سنه و احسن صفة برأيه "انها ما عندها موبايل ولا بتعرف شو هو النت " بسألني ابن خالي شو رأيك, انا اول جواب كان اني بكره هالشخصيات من البشر, هالكلمه سمعتها من شخص من قبل وما حبيتها بالمره وهي تكررت مرّه تانيه, حكيتلهم انه المعنى انه الشب شاف وعمل بلاوي و بدو وحده من اللي " يربيها على ايدو " و لانه بمنتهى البساطه ما عنده ثقه لا بنفسه ولا فيها هيك عمل, انا معي موبايل وبعرف بالنت...هل هاد بخليني بنت قليلة ادب لا سمح الله !!!! تعريف الزوجه الصالحه صار مختصر على هالشي!!!

ابن خالي ما عجبه رأيي واللي طلع نفس رأي زوجته و زوجة اخوي, بحكيلنا انه الشب صاحبه وهو بعرفه, وان الشب جدا مؤدب, و فسر هالشي بجمله " عمره ما صاحب" ,المشكله انه تعريف الادب والاخلاق صار كتير مشوه عند بعض الناس و بختلف مقياسة من شخص لاخر, انا بعرف ان الشب بتعامل مع بنت خالتي بكل ادب واخلاق, مش لانه هو مؤدب لأ لانها بتفرض عليه هالطريقه بالتعامل, وفي معلمات بصير يتوشوش هو وياها ويتضحوك وممكن يتمادى بالمجامله والمدح لدرجة المغازله, وممكن يحط ايده على كتفها وممكن يمزح معها بالايدين ...
هلأ انا بعرف الشب و بعرف قصص عنه من بنت خالتي لكن ما حبيت احكيها, لاني ما بصير ادخلها بالموضوع, كانت وجهه نظري انه اذا هو راضي فيها زي ما هي وما بدو يغير فيها اشي ممكن نحكي ماشي مع بقاء احتمالية المقارنه بينها وبين المعلمات بالمدرسة, واللي للاسف كتير منهم ما بنفع يكونو قدوة للطلاب والطالبات, او انه يقارنها بزوجات صحابه , ابن خالي اصرّ على انه بدو اياها زي ما هي, و انه هو بدو وحده يحكيلها " روحي روحي .........تعالي تعالي "

جد بستغرب كيف بعض الشباب بفكرو, المفروض الزواج يكون متكافئ من كل الجهات والا بكون في اشي غلط وما بتستمر الحياة, الزوجه المفروض تكون بتفهم, انسانه بتاخد وبتعطي معها , مش بنت تربيها على ايدك, انسانه بتاخد برأيها و بتستشيرها, بتعينك و بتعينها على هالحياة, توقعت ان طريقة هالتفكير خلصت من زمان بس للاسف لساتها موجوده..

ال ايش ال ما معها موبايل....يا سلااااااااااااااااام هيك صارت مؤدبه واخلاقها عاليه, على هيك قبل كم سنة قبل ما يدخل النت والموبايل عالبيوت البنات كانو قطط مغمضه و هلأ فتحو بعصر التكنولوجيا...

43 التعليقات :

زي ما حكيتي, بسوي الأخ السبعة وذمتها وما بخاف الله في أي بنت تعرف عليها سابقا, وبس يجي يتزوج بتنزل عليه الأخلاق والدين والإيمان وطبعا هاي الصفات لازم فقط تتوفر بالبنت اللي بدو يتزوجها ومش شرط تتوفر فيه, هلأ في ناس ما بلومها لما تحكي هيك لأنها فعلا ناس ما سوت و لا غلطت بأي شي فرغبتهم أنو البنت اللي بدهم يتزوجوها ما سوت شي بعتبرو هما عيب.

طيب شو بالنسبة للشب اللي معو موبايل؟

 

لا حلوه جد
اول شي
الحرامي بيخاف على بيتو من السرقه اكيد
تاني شي الاخ اللي خاطب وحده بنص عمره تقريبا بحب احكيلو انو اذا مفكرها حتضل قطه مغمضه احتمال كبير تطلع غلطان اخرتها تفتح

على قولة عمي اصحابي اطباء واتجوزوا بنات توجيهي عشان يخلصو من وجع الراس وبالاخر شو صار؟

معظمهن كملو جامعات والوحده كانت تروح عالجامعه وبطنها لحلقها ولا مؤاخذه
مشكله كتير شباب انهم مفكرين حالهم شاطرين وفتحين ما شالله بس وين؟ ما بيعرفو انو المره ما شالله عليها بس بدها تمثل!!

اللهم عافينا

 

طولي بالك يا ويسبر الحياة بدها طولة بال خاصة باول 100 سنة بعد هيك بتصير سهلة
يا ستي التلخيص لهيك قصة انو هادا الرجال هيك بدو وحدة يستمتع معها بلعبة عروس و عروسة مغمضة و لطيفة و ما بدها الا السترة و عين الله عليها ما عندها حتى موبايل بس ليش ما عنها موبايل مش ممكن يكون ما معها فلوس حق الموبايل و هي نفسها فيه و ما بتعرف على النت اي هاي من وين جايبها اسفة للتعليق عليها بس بدي اسال و انا بشوف البنات بهالسن خاصة بهالزمن بحبو هاي القصص و خبرة بالموبايلات و انواعها و النت و البرامج لكن ممكن يكون اخدها من منطقة مش واصلتها الكهربا دخيلك هي دخلت مدرسة قبل هيك لانو ممكن في المكان اللي تربت فيه ما يكون عندهم مدارس و لهلا بيعتمدوا على الكتّاب :))))))))))))
مش عم اتمسخر بس
بما انو هو حر و مبسوط و اكيد هي مبسوطه لانها اخدتوا
انا حزينة على ولادهم اللي رح ييجوا و يضيعوا بين بيت فيه ام متلها و اب متلوا و مجتمع منفتح و متغير بسرعة
لانو ما اظنها ( الا في حال انها شوي انفتحت على مجتمعها و تغيرت )
رح تكون قادرة على مواكبة تطورات الدنيا مع ولادها و تقييم الصح و الخطا و تدلهم عليه


انا حكيت كتير بس لما اركز اكتر بعد الصدمة اكيد رح ارجع لنفس الموضوع

تحية مسائية
( بس بالله عليكي اساليلنا عن موضوع هاي البنت عن جد كتير اثارت فضولي :)) )

 

السلام عليكم
وجهة نظرك صحيحة ؛ إنه البنت اللي عندها موبايل و بتشتغل على الإنترنت لا يعني ذلك أنها ليست محترمة . بالنسبة إلي كل قصة الجيزة بالأردن مش داخلة راسي . يعني بتسمع كثير عن الأم اللي متحملة الأب من أول حياتها معاه مشان الأولاد . و لا واحد بجوز وحدة و هو مش عارف كيف بتفكر و لا نظرتها للحياة .في غلط وين ؟ مش عارف ...

 

مسا الخير
هاد مش اكثر من انه واحد مريض نفسيا.
وبالواقع هو بده وحدة يتفرج عليها او يلعب فيها ويفرض عليها رايه ويكون هو الكل بالكل وهو المسيطر. يعني زي سي السيد. لسه بكرة بيشوف وين هي المعاناة لما يكون هو بواد وهي بواد ثاني، وعلى فكرة فيه كثير هيك لا تستغربي.
عجبني جدا اللي حكيتيه ((المفروض الزواج يكون متكافئ من كل الجهات والا بكون في اشي غلط وما بتستمر الحياة, الزوجه المفروض تكون بتفهم, انسانه بتاخد وبتعطي معها , مش بنت تربيها على ايدك, انسانه بتاخد برأيها و بتستشيرها, بتعينك و بتعينها على هالحياة))
لو كل الناس بتاخد بهالمبدأ صدقيني ما حدا بيغلب ولا حدا يمكن يوصل للطلاق، بس للأسف من وين نجيب الشباب الواعي لهالشي، الشب عنا بس يفكر يتزوج بيسأل قديش حلوة وكم معها وبنت مين وقليل اللي بيهتم اذا عندها مخ او لا.

تسلم ايدك عالادراج عجبني كثير
تصبحي على خير

 

هسا صار عدم امتلاك الموبايل دليل على الأدب؟ يعني اللي بده يتزوج يبطل يسأل عن التزام البنت او الشاب بالدين يسأل طوالي اذا عندها او عنده موبايل او لأ. الواحد فعلا بيعيش وبيسمع.ـ

 

هيك قصص و هيك شباب بمغصوني صراحة و بحس زي الي في شي كابس على نفسي

المشكلة انه نسبة الشباب "التافه" اللي بفكر بهاي الطريقة عم بزيد يوم عن يوم
تافه لأنه الحلال إله حرام على غيره .. هو مش مشكلة يمزح و يقرب من البنات و يحكي معاهم بالموبيلات و تشات على النت بس خطيبته و أخته لازم يكونوا قطط مغمضة

بدهم يتجوزوا بنت حوبة! بدي أشوف كيف رح يمشوا بحياتهم مع بعض و انا بدعي من كل قلبي تطلع من خرجه

يا الله يا وسبر شو قلبي حامل على هيك بشر

 

سلام ويسبر انا من المتابعين لمدونتك من أشهر وهلمرة حبيت أعلق لأنني شو يفاضية يمكن :) اول شي مدونتك ممتعة وطريقتك العفوية بتشد القاريء..لكن الي ملاحظة صغيرة عالموضوع هون..انه انتافترضت انها البنت اللي ما عندها موبايل لهلا ما عنمدها عقل او ما بتعرف تحكي ولا رح تعرف تتعامل مع زوجها او تعبي عينه...يعني متل ما قرايبك افترضو انه البنت رح تكون روحي روحي تعي تعي.. وانها رح تكون صفحة بيضا...انت بالمقابل افترضتي انها رح تكون هبلة وانها ما رح تكون بتفهم اللي بدي اوصلله انه بشكلعام الواحد ما لازم يطلق احكام على شخص بدون ما يكون شايفه وعارفة كشخص مو كظروف او كمحيط....

عدا عن هيك معك حق...مو كل البنات اللي معهم موبايل او عندهم نت قليلات أدب أو حتى بفهمو :)

جمعه مباركه :)

 

Ahmad Hamdan

انا اللي بعرفه من بنت خالتي اللي بطبيعة شغلها بتتعامل معه يوميا, انه الشب مش ملتزم و انه اذا البنت سمحتله يتمادى فبيتمادى يعني ما في مبدأ معين ان كان اخلاقي او ديني بيردعه

المشكله انه كتير في متلو و بفكرو بنفس طريقة تفكيرو, بتزكر الدكاترة الصايعين عنا بالجامعه اكتر من واحد تزوج بنت بسنه اولى جامعه و خلاها تترك الجامعه ...عأساس برضه ان بنات الجامعات كلهم من امثال اللي بتمصوع معهم :$

المشكله ان العالم بتعمم, و باشياء ما بتدل عالدين والاخلاق
الموبايل والنت مش مقياس, معرفتهم او عدم معرفتهم

لااااا الشب بطلعلو كل شي بنظر هالعالم

مياسي

انا كان هاد رأيي, انه لانه عامل بلاوي بفكر البنت بدها تعمل بلاوي :$

بحالة هالشب اعتقد انه بعد كم شهر بصير بدو يغيرها, بدو اياها تتناسب مع الجو اللي حواليه, من ضمن الحكي انه ما راح ياخدها ولا على اي فعاليه بتضم المدرسة او صحابه, يعني من هلأ مستعرّ منها الاخ, طيب وشو جابرك وشو جابرها تعاملها هيك؟؟؟

بالزبط هاد اشي تاني, انه يمكن الظروف اللي عملت هيك بالبنت و بس توفرت طالبت بحقوقها و اولهم التعليم :)

امين يا رب

 

Jafra

ههههههههههه هو ضل من العمر اشي..الحمد لله :)

بدها بس رضاه, طبخ ونفخ وغسيل هيك بدو...شغاله تقريبا بس بدون اجر :)

مرة اخوي هيك حكت...مش يمكن مش صاححلها!!! ولو صحلّها موبايل ما بتقول لأ!!

البنت من منطقه شعبيه و ما اعتقد في بالمدرسة عندهم نت
وخصوصا انها طالعه من العاشر, يعني الها كم من سنه بالبيت بس طبيخ وتنظيف وما بتروح ولا بتيجي, وهاد من الاشياء اللي عجبته للشب :$


هالشي ما بعيب البنت بالمره, بس اعتراضي انه برضه مش مقياس ان البنت مؤدبه واخلاقها عاليه

اذا بضلو مبسوط وراضي الله يهنيهم , بس للاسف والله اعلم حسب المعطيات اللي قدامنا وشخصيه الشب اللي كل ليلة بسهر بكوفي شوب شكل و مع ناس كتير بعاد بشخصيتهم و تفكيرهم عن زوجته ما اعتقد انه حيضل مبسوط
الا ما يصير مقارنات


انا بحب التعليقات الطويله فخدي راحتك عالاخر

عبد الله محمد

وعليكم السلام ورحمة الله وبركاته

بالزبط, هاد قصدي بالموضوع انه
الاعتماد باختيار الزوجه الصالحه مش من مقاييسه الموبايل والنت,

ياما سمعنا عن هالقصص عنّا و فعلا بتضطر تكمل حياة بس علشان ولادها, وللاسف حياتهم ما بتكون سعيده وهالاولاد معظمهم بكبرو بعقد نفسيه ومشاكل

مشكلتنا ان الزواج التقليدي مرفوض من قبل كتير ناس بس للاسف ما في عنا غيره, لانه موضوع تعرف البنت والشب المسبق اجمالا مرفوض من قبل البنت
والشب او من قبل الاهل
وللاسف ما في غير هالطريقه, فبدهم بخلال كم زيارة يحاولو يتعرفو على بعض مع انو مش كل شي ببين

اهلا وسهلا فيك :)

 

ويسبر انا سمعة القصة نفسها من حدا تاني بس بدون قصة الموبيل! اول شي انا كنت معصب انو استاز في مدرسة محترمة اتزوج بنت عمرها ١٨ سنة

بعدين طلعات قصة الموبيل و الي تفسيرها زي ما قولتي انو واحد مخبص كتيييير قبل ما يتجوز زكرتيني بقصة تكسي بقولي مرة انو كيف اهل مرتو مربينها احسن تربية طبعا كيف يعني احسن ترباي بقولي اذا طلعت برة عتبة البيت بتعرفش ترجع فانا وقتها كنت مصاب بحالة ذهول مرعبةيعني ناس الحرق حرام فيها سواء بالبنزين ولا بالتبن

 بتفاهتهم عم بهينو اي بنت معها موبيل و عفكرة انا خسرت صحاب من ورا نقاشات زي هيك اكتشفت امراض نفسية غريبة جدا  

 

الكيل بمكيالين

مسا الورد والياسمين :)

هاد هو... واسمه تزوج وصار زوج وعنده بيت

ما في اشي مشترك بينهم بالمره

هاد التعريف الصحيح للزواج, مش كل واحد بواد زي ما حكيتي

للاسف في كتير هيك, اكيد مش الكل لكن النسبة الكبيره هيك تفكيرها, بدو اياها مزهرية يحطها بالبيت

كتير مبسوطه انه عجبك الموضوع

ان شاء الله كل اوقاتك خير :)

Jaraad

اللي بدايق اني صرت سامعه هالجمله من اكتر من شخص, و من اشخاص كنت افكر
انه تفكيرهم اوعى من هيك

مهو عأساس انهم واعيين, ما عندها موبايل اذا ما بتحكي مع شباب و بتعمل علاقات :$
اذا اللي معهم مش مؤدبات
كيف قررتو؟؟؟

 

اها انت حليتي السؤال اللي كان ببالي يعني البنت مسكينة طالعة من العاشر و بمنطقة شعبية
و عندها خبرة بادارة المنزل
حلو
و قلتيلي هو بشتغل بمدرسة مختلطة و راقية
يعني لما يطلع من المدرسة و يروح على البيت كانو سافر من الارض للمريخ او انتقل بين زمنين
الله يوفقهم
و يعينها على الرجال اللي ماخدتوا مش هو اللي الله يعينوا

شفت هيك زيجة قبل هيك بس كان مرغم الرجال و صار اللي صار بالمناسبة اتزوج وحدة تانية للبرستيج و خلى الاولى ( اللي زي صاحبتنا ) للخلفة

عن جد العقل زينة

 

Palestinian Princess

اشي بمغص للاسف :(

والله في ناس بشرحو القلب زي ما بجكو....بس في ناس بمغصو زي هدول كتير :$

هو حلال الهم و حرام عالبنت هيك مفهومهم
بحكيلك انا شب وبعرف كيف بفكرو البنات.... بالله عليك, ومين انت لتقيم تفكيري و كيف بفكر!!!

معلش بدنا نستحمل
الله يهديهم
وان شاء الله يتهنو وما يصير مشاكل

WD

اولا اهلا وسهلا فيكي في اي وقت و بتعليق و بدون تعليق, مع اني بحب انك تعلقي دائما :)

شكرا كتير لكلامك و لذوقك :)

انا ما بقيم حد اكيد
انا من الحكي اللي انحكى بنيت ارائي

هو اللي رأيو ان البنت اللي ما عندها موبايل مؤدبه واخلاقها عاليه وخرج جيزه, وهو اللي حكا " روحي روحي ...تعالي تعالي" مش احنا
ابن خالي بقتبس على لسانه شو حكا, وابن خالي معه بزواجه مش ضده, وبحكي ان هو بدو اياها هيك

هلأ كلنا بنعرف ان كل مرحله بحياة البنت او الشب بتكون جزء من شخصيته

المدرسة و الجامعه والشغل
وبكل مرحله اكتسب اشياء وصفات جديده و كون خبرات

البنت اللي قاعده من 3 سنين بالبيت وما بتتعامل الامع اهلها وقرايبها, ما حتكون متل البنت اللي بتتعامل بشغلها مع الناس, ما بنكر انه ممكن تكون اللي بالشغل انطوائيه و اللي بالبيت اجتماعيه
بس المواضيع اللي ممكن تتناقش راح تكون مختلفه

هو طلبه انها تكون بنت بالبيت و بتعرف تطبخ
ما بدو يعرفها على مجتمعه ولا يعرف مجتمعه عليها وهالشي اكيد حيأثر عليها

مثلا عندهم بالمدرسه
Open day
سألته زوجة ابن خالي هل راح تجيبها عليه, بتحكي انه فورا رد "ييييييي طبعا لأ" طيب اذا من هلأ بتحسها انها فضيحه الك ليش تتزوجها

اذا الزوج ما حس الزوجه اهل لاحترامه و انها وحده بترفع الراس و بفتخر بنسبهم المفروض ما يتم الزواج

طولت عليكي بالتعليق بس حبيت اوضح وجهه نظري :)

و اكيد كل الناس خير وبركه

جمعه مباركه عالجميع ان شاء الله
ولا تنسي تقرأي سورة الكهف :)

 

Haitham

للاسف كتير ناس طلعو بفكرو هيك

يعني ان البنت ما بتعرف وين ربنا حاططها هيك مؤدبة واخلاقها عاليه
مش عارفة كيف العالم بتفكر

وهالاستاذ زي كتير من دكاترة الجامعات اللي بنفس تفكيره والله اعلم كيف تكون عيشتهم :$

جد نفسيات مريضه :(

Jafra

انا ما حبيت احكي عن موضوع الدراسة بلاش الناس تفكر اني بقصد بما انها مش دارسه فهي مش قد مستوى الشب المتعلم

مع الخبرة تبينلي ان التعليم ما بغير اشي بالانسان وتفكيرو وشخصيته وحتى ثقافته :$

هو بدو شغاله و زوجه و وحده تجيب ولاد وتربيهم
في كتير شباب المهم بس انهم قدام العالم تزوجو
و يمكن بدو وحده ما ترفع عينها وهو يضلو عايش حياة العزوبيه بكيفه


الله لا يعطيه عافيه هاد اللي حكيتي عنه....وليش يتزوجها من الاساس

معك حق...ما في عقل اساسا لنلوم عليهم

 

مواضيعك جميلة وفيها كتير من الواقع للاسف
انا صارلي من الصبح بقرأ بتدويناتك
ومستمتع بقراءتها

 

ياربي ايش هذي العقلية المتخلفة

مع الاسف المجتمع العربي ككل هذا تفكيره يعني بلاد برا ماعندهم هذا التفكير صحيح عندهم بلاوي كثير بس تفكيرهم يختلف عن تفكير الرجل العربي بشكل عام

وثاني شي انا مومعترضة على الارزاق بس جدا صغيرة 18 سنه وهو كم عمره ياربي

بكره يقولون مايبغون وحده تطالع تلفزيون ولاتتكلم وتكون لزوجها هو يربيها بيده

على فكرة اكره هذي الجمله بين الشباب يبغونها صغيرة علشان يربونها بيدهم >>> تقهرني وامقت كل واحد يقول هذي الجمله واعتبره من العقلية ( المتخلفة ) في القرن الواحد والعشرين الذي هو قرن التطور

تفكير متخلففففففففففففف

اسمحي لي ويسبر عن جد متضايقة من هذي الاشكال هم يسووون عمايلهم في وقت المراهقة واذا جا وقت الزواج يبغون وحده ماتعرف تلفون نقال !!!؟؟

 

مساء الخير ويسبر

في البداية أشكرك وجدا على مشاركتنا بهذا الادراج الذي يعكس تماما مشكلة لا تزال تتفاقم وبكل أسف على الرغم من أننا في عصر لم يعد صالحا أبدا لمثل هذه العقول التي تفكر بهذه الطريقة ولكن المشكلة ياويسبر أن القضية تتجاوز موضوع الموبايل والنت إلى قضية عميقة تقطن في عقول العديد من الذكور في هذا المجتمع أو إن جاز التعبير في المجتمعات العربية عموما وهي أن الرجل يبحث دائما عند الزواج على المرأه البسيطة التي لاتعرف شيئا في هذه الحياة والسبب أنه يخشى من مجاراة المرأة التي لديها القدرة على النقاش والحوار والتفكير وليس فقط كقضية اخلاقية وانما هو الخوف والخوف واريد أن اقولها وعذرا من المعلقين الذين لم يؤيدوا هذه الفكرة ولكن هو الخوف من المرأة المتعلمه او المثقفة في جوانب عديدة من الحياة وهنا أساس المشكلة من وجهة نظري

أشكرك ويسبر ونهارك سعيد

 

دنيا غريبة عجيبة
و منطق أعوج -برأيي- شو هاد! جد مش هيك بتتقيم الأمور

!!!!

 

منحكي كتير .. ومنمشي (بنمشي) كتير .. فكرنا لقدام .. وكله ع الفاضي

 

بصراحة في ايشي بضحك مش عارف شو هو

على كل حال ما في زواج متكافئ بتزبطش ، صعبة التحقق ، نفسي اشوفها

شكله الاريح الواحد ما يتزوج بالمرة

 

تماما هذا هو الكيل بمكيالين او
double standards
يعني الوحد بكون هامل و سكيير و خريج سجون و بعدين بيجي يحكي انا ما بدي الا وحده محجبة و بتصلي و عمرها ما حكت مع رجل الا مع ابوها و للضرورة ، يعني شوف حالك اول و بعدين فصل الزوجة اللي بدك اياها

هاد الموضوع بذكرني بموضوع كتبو اشرف موضوع اكثر من رائع بنصح الجميع يقراؤو

 

walla i guess
beddo wa7deh yerabbeeha o yeshakkelha b el osloob ellli bedoo ya .. o hay bukra iza bssss sallamha mobile 7aderto alla yestor :s :s
o alla yehanneehom ...

 

مساء الفل ويسبر
نموذج مثالي لعقلية الرجل الشرقي الي لا يزال يتعلم ليشتغل وبس ولما بدو يتزوج بيتزوج بعقلية جدو...عادي
بس الحلو في الشغله وهاي شايفيتها....انه اللي بيفكرها قطه مغمضه....بعد بشهرين من الزواج هي بتمشيه على العجين وحياتك
خليه...بيستاهل
تركت لك عتب عند نادر...:)ء
يسعد مساكي

 

فادي

اهلا وسهلا فيك :)

بسعدني كتير ان اللي قرأته عجبك و اهلا وسهلا فيك دائما
و بتمنى انها ما تكون اخر زياره

White Fredom

شفتي بالله عليكي هالعالم
مجتمعنا عنده ان المخطأ شب اذا الخطأ ممكن نتغاضى عنه و كل الشباب بمرو بهالمرحلة و هلأ اكيد عقل و ركز...من وين بجيبو هالحكي مش عارفه

مع اني مش مع زواج البنات بسن مبكرة لانه ظلم الها بانها ما تعيش مراحل الجامعه والشغل, بس اكيد مش ضده
في عائلات من وجهة نظرها ان الزواج افضل شي للبنت و في عائلات بعتبرو البنت هم و بدهم يخلصو منه باسرع وقت

هيهم من هلأ بدو يحكو هيك, و جملة " بتربيها على ايدك" للاسف لساتها بتتكرر كتير
هي عقليه غريبه بصراحه اللي بفكرو هيك....هو شي بضايق بس برضه ما بدنا اياكي تدايقي يا قمر, وبدنا الابتسامه تضلها
الحمد لله مش الكل هيك تفكيرو ...فاااا لسا في امل بالشباب :)

 

Rand

Ho shee bem3'as w beg-har bsara7a :$


أشرف محيي الدين

مسا النور أشرف :)
جميلة جدا جملتك " في عصر لم يعد صالحا ابدا لمثل هذه العقول "
للاسف هالعقول لساتها موجوده

موضوع جديد وجدا خطير اللي بتحكي عنه اشرف
في بعض الازواج بحاولو انهم يكسفو زوجاتهم بس يكون في نقاش في موضوع مهم و يكون في عند زوجاتهم وجهة نظر صحيحه و بتتعارض مع وجهة نظر ازواجهم فورا الزوج بلجأ لهالسلاح انو خليكي بالطبيخ انت واتركك من هالموضوع

شكرا الك اشرف و ايامك سعيده دائما ان شاء الله

 

Haitham هيثم Al-Sheeshany الشيشاني

الناس اللي افكارهم غريبه عجيبه وما بتتغير بالمره وما بتتقدم

اللي بصدم ان في ناس متل ابن خالي اللي المفروض انه واعي بأيد هالفكره و بشجع صاحبه عليها

Ahmad Al-Mahrouq

في ناس بمشو لقدام و في ناس واقفين مكانهم....و المصيبه الكبيره في ناس بتمشي للخلف و هدول اكتر ناس بفكرو حالهم انهم منجزين وانهم بفكرو صح

كيفك اليوم....ان شاء الله تكون بخير و طبت :)

 

Anonymous

ممكن اللي بضحك هو شر البلية :)

الزواج زي البطيخه متل ما بحكو, بس المفروض في اساسيات تدور عليها وتكون متوفرة لتحاول قد ما تقدر تكون هالبطيخه حمرا :)
و بنظري متل ما حكيت اهمها هو التكافئ بين الزوجين بكل شي


Dr.Mohammed

الكيل بمكيالين للاسف موجود عنا كتير
و نوعية هالشباب اللي بتحكي عنها موجوده, عنا كتير موظفين متزوجين و عاملين علاقات مع موظفات عنا و مع بنات من برّه الشغل بس تسألهم زوجتك بتشتغل بحكيلك " اعوذ بالله انا اخلي مرتي عرضه للشباب اللي برّه" عأساس انه الاخ عنده شرف و ان بنات العالم اللي بضحك عليهم لأ, وكأن كل الموظفين زيو او كل الموظفات زي اللي بتعامل معهم

أشرف مواضيعو كلها رائعه بصراحه اعتقد انك بتحكي عن هاد الموضوع

بس حلوه " و عمرها ما حكت مع رجل الا مع ابوها و للضرورة
عجبتني :)

 

Farah Batarneh

belzabt....momken ma m3ha mobile la2enno ma m3ha 7a22o :)
Ameeen ....inshallah yet-hanno had 2elly bedna 2yah :)

Nissan

مسا الورد والياسمين على نيسانة المدونين :)
شفتي فجأه صرت شاعره ...ويسبر عويس :)))))

معك حق....الشهادة بس لتجيب شغل و فلوس و ما الها دخل بالعقل و شو في جوا العقل :$

ان شاء الله تكون هيك, وما تروح عليها المسكينه
ان شاء الله تتأقلم وما تواجه اي مشاكل معه

قرأته و جاوبت عليه :)
هو في احسن من المحاسبين بالدنيا اساسا :))))

ويسعد ايامك كلها ان شاء الله

 

المشكلة انه بطل في بطيخ احمر لا هيك و لا هيك

 

Anonymous

لااا.... لااا.... في :)

بس شكلك بتدور بالمكان الغلط...

و البطيخ البطيخ.... برضو في
لسا امبارح ماكلين بطيخه حمرا و زاكيه :)

 

هاد بده غنمه ما بده زوجه يحكيلها شي تحكيله ماع !!بس بكره لما ييجي يحكيلها مثلا انا صار معي هيك في المدرسه ويفتح معها نقاش وتتصرف معاه متل غايبه الزفه وعينه تروح شمال ويمين ويصير يلومها على تفكيرها الرجعي وتصير المسكينه تحاول ترضيه بكل ما تقدر من وسائل خالتي نضوة وهو في بلد وهي في صحراء رح يعيش مبسوط اللي متل هدول انا باعتبرهم عندهم نقص في شخصيتهم وبيعانوا من عقده نفسيه لهيك انصحيه انه يروح على طبيب نفسي والله يشفيه

 

mar7aba whisper,

ya3ni il benet illi bterda tokh6ob 3al 18 wa7ad 3omro 31 saneh heyyeh fe3lan binet mish ma2soof 3aleha, btistahal wa7ad mareed nafsi, il mushkileh ino wladhom ra7 y3anoo bisabab ahel mitel heik.

ma bafham keef ahel il binet biwaf2oo yzawjouha zalameh akbar minha bi 10 sneen o heyyeh lissa 18 saneh 3omerha!

 

بلكن بعدها بتستخدم "الحمام الزاجل" شو بعرفو هو! :P
صراحة الموضوع ببكي يعني كل المفاهيم انقلبت عند الناس و مقاييسها للأمور اختلفت حتى سمت العاقل مجنون و المجنون عاقل. و يا حسرة على شبابنا!

 

الحمدلله .. طبت وكل شي تمام

وشكرا للسؤال

ع فكرة نشرت لينك للبوست هاد عندي بالفيس بوك
وصاحبي مخالفك الرأيي تماماً
اذا بدك تقرأي تعليقاته عندي
:)

 

مهو أخ..بس هه
الموضوع مهم ورائع ومن المواضيع
اللي كتير بحكي فيها
هاد على شو عم بدور..
نسي أنها رح تجيب ولاد ورح تربيهم
وانه لازم تكون عارفة الدنيا
حتى تعرف تربيهم منيح
اللي ما بتعرف بالنت ولا بالموبايل ما رح تعرف اللي رح يجي لبعدين
وما رح تعرف تحصن ولادها منه وتحميهم
وتربيهم
على كل حال ..في نماذج بالواقع لناس اخدو الجاهله لجمالها .. او لجهلها بحجة بده يربها على ايده
وهلا عم بشوفهم بيبكو دم .. على حال ولادهم
وعلى حالهم كمان
لانه مو سهله ابدا ترجع عبيتك تلاقي حدا ما بيفهم عليك
الله يهديهم

 

طبعا ويسبر انافاهمة من الاول عناصر الحوار :) بس مصيبة عالاوبن دي :) يا ستي الله يعينها ويعينه

 

Sozan

هاد اللي بحكي عنه, انك مهما حكيت بدك زوجه تحكي معها و بدك حد تاخد وتعطي معه, ما حد بحب السلبيين و اللي بتحكيلك "زي ما بدك" على كل شي
هاد الطبيعي يعني

عقدة ان كل البنات مش مناح....لانه تعامل مع هالنوعيه بس ولانه هو عامل عمايلة فمتوقع البنت اللي بتطلع من البيت بتعمل اشياء غلط
الله يشفيه فعلا

blabbrgirl

اهلا وسهلا فيكي..نورتيني :)

هلأ انا موضوع العمر الي تحفظ عليه بس ما بدي اخوض فيه لانه التركيز صار عموضوع العمر و اللي بحكي عنه هون هو موضوع التصنيف و طريقه القياس للادب

انا مش مع فرق العمر الكبير بين الزوجين, علشان ما يكون في فجوة فكرية بينهم

يعني حتى الاخ و الاخت في اعمار معينه ببعدو عن بعض لان كل واحد اله اتجاه بالتفكير والاهتمامات وبعديها بس يكبرو برجعو بتلاقو....الزوجين ما في مجال نستنى ليكبرو :$ بتروح عالاولاد

في اهل ما بصدقو يخلص من هم البنت, وفي اهل من ناحية دينيه انهم شافو الشب مناسب فليش نحكي لأ...

الله يهنيهم و ان شاء الله بنسمع الاخبار الطيبه :)

عفكرة انا متابعه لمدونتك..بس مش عارفه ليش ولا مرة علقت هناك :)

 

Fazlakat

ههههههههههه يمكن ما بتعرف :)

المشكله ان هالمقاييس صايره بالشقلوب بكل شي بحياتنا
و جد هالشي بقهر كتير

الحمد لله لسا في شباب كويسين....بس للاسف صايرين ندره :$

Ahmad Al-Mahrouq


الحمد لله على السلامه

شكرا مرّه تانيه لنشر الموضوع...و انا رديت هناك و هي شكلنا قربنا وجهات النظر

شكرا الك ولاصدقاءك على النقاش الفعال :)

 

ربى حجازي

هو بفكر حاليا براحة باله...انه وهو بره يكون متطمن على بيته و هالشي بان البنت قطه مغمضه..بكره هالتفكير انا :$

اي حياة زوجيه ما فيها تكافؤ بطريقة التفكير عالقليله ما اعتقد تنجح....اي انتي وحده بتتعاملي معها بس تحسيها بعيده عنك بطريقة التفكير بتبعدي عنها
شو الله جابرك تنفخي بئربة مقطوعه
فتخيلي الزوجين يبعدو عن بعض...الله يعينهم و يعين الاولاد اللي حيجو

امين يا رب
يهدينا و يهديهم

WD

انا كتير مبسوطه انه صار سؤ الفهم بينا علشان اكسب تعليق تاني منك :)

امين يا رب العالمين

 

نفكير قمة التخلف وحركات مالها داعي,, يعني إلي بدو يكون منحرف راح ينحرف حتى لو كان معزول عالقمر ..

 

مسا الورد عأحلى قرابه
و جمعه مباركه يا رب


شفتي بالله عليكي كيف مقياس الامور بتتغير مع الوقت....اشي غريب فعلا