Things I Like To Whisper About

Would You Hear Me Whispering

لئمنه...بس هاد الحل



كل يوم تقريبا بنسمع عن شخص حاول ينتحر الموضوع صار زي موضه, في ناس الهم اسبابهم اللي من وجهه نظرهم ان انهاء حياتهم هو الحل الوحيد, وناس فعلا ظروفهم صعبه لكن الانتحار اكيد مش الحل, وناس اسبابهم تافهه او بس بغرض الشهرة و لفت النظر.

كل مرّه بقرأ خبر من اللي طلعت عالعمارة وجابولها شيبس وعصير...للي طلع ينتحر علشان مش راضيين يزوجوه حبيبته...لاخر وحده طلعت تنتحر وترمي ولادها علشان علاج زوجها وبس انقذوها زوجها حاول ينتحر, كل مرة بخطر ببالي سؤال....شو ممكن يصير لو ما حد عبرهم لهالناس, شو ممكن يصير لو كل الامن وكل الناس انسحبت وتركت اللي واقف فوق ينتحر يعمل اللي بدو اياه؟؟؟


هلأ في شغلتين ممكن يصيرو, بس بدي اوضح قبل اني ما بستهين بمشاكل الناس اللي بخلو الدنيا تسكر قدام وجههم وان في ابتلاءات مرات ما بحس الشخص انه ممكن يستحمله, لكن مهما كان الانتحار مش حل اكيد

ردة الفعل الاولى

ممكن اذا الكل انسحب , اللي واقف وبدو ينتحر يزهق بعد فتره و ينزل لحاله, واكيد بدو يفكر بالعواقب اللي بدها تصير بعدها, ان كان من قبل الشرطه واللي لازم يكونو فارضين عقاب لازعاج الناس و السلطات غرامه او حبس مدّه مناسبة للموضوع, وبرضه شو رأي الناس والاقارب والجيران وشو ردود افعالهم واللي برضه برأيي لازم يكون عنيف, لازم تكون ردة افعال الجميع قوية حتى تكون رادع للي ممكن يفكر بالانتحار بعدها

ردة الفعل الثانيه
انه ممكن بعد ما الكل ينسحب, ان اللي واقف ينتحر فعلاو يرمي حاله, هلأ انا عندي قناعه 100% ان ما في شخص عاقل ممكن يقتل حاله, ما بعرف ممكن لانه بتخيل ان الانسان اجبن من انه يأذي نفسه, وخصوصا اللي بطلعو هيك قدام الناس, يعني لو فعلا بدو ينتحر ببيته ومش قدام الناس, وممكن يترك رساله تبين سبب انتحاره, لكن قدام الناس فهالشخص اكيد بكون في عنده مرض نفسي معين, هلأ لو انتحر الشخص, ممكن تقوم الدنيا وما تقعد على رجال الامن و انهم ما عملو اشي لانقاذ روح مواطن اعلن بانه حينتحر وما عملو شي, وانهم كانو سلبيين, و اللوم راح يوصل للاهل اللي ما حسو بابنهم و انهم ما راعو هالشي وما راقبوه.

انا بصراحه برجح ردّة الفعل الاولى, واللي هي انه ما حينتحر و اعتقد انها الحل لتنهي سلسلة هالمحاولات والاخبار اللي بنتصبّح فيها كل يوم, الحلول مش بأنهاء حياة, لانها مش حل هيك انت ما نهيته للموضوع لتستفيد ولغيرك يستفيد, المفروض تسعى وتحاول تحل المشكله وتجرب كل الابواب و الانتحار اكيد مش واحد من هالبواب, الانتحار اغلاق مش فتح و نهاية مش بدايه

برأيي....اتركوهم و روحو وهمه لحالهم حينزلو.



24 التعليقات :

مساء الخير ويسبر

أنا بتفق معك تماما على كل ماقلت بالادراج بس المشكلة أنو رجال الأمن في هيك حالات مابقدرو يراهنو على حالة اللي بدو ينتحر بمعنى تاني إنو إذا تركوه وفعلا نفذ عملية الانتحار ساعيتها رح تنقلب الدنيا والاعلام وجمعيات حقوق الانسان وقصة إلها أول ما إلها آخر فعشان هيك من الصعب جدا المخاطره بمحاولة تركهم أنا هادي وجهة نظري

كل الود

 

أنا أوافقك الرأي
فهم كالآطفال الصغار .. ان تجاهلتهم سيزداد صراخهم بالبداية لزيادة جلب الانتباه
وان استمريتِ بتجاهلهم .. سيهدئون
ويعلمون ان لا جدوى من فعلهم
فلم يقدمون على فعل لن يأبه به أحد

وأوافقك أيضاً بأننا اجبن من أن نؤذي أنفسنا

تحياتي

 

أنا لو اني مجل الحكومه بطلع قرار انو اللي بدو ينتحر ينتحر براحتو و ما حدا راح يسأل عنو ، و صدقي ساعيتها ما حدا راح يفكر بالانتحار لانو ما حدا راح يسأل عنو و ما راح يعمل هالجلبة و الدوشه هاي

 
أزال المؤلف هذا التعليق.
 

و الله لئمنه. بس يعني برضو لا تنسى انو الناس عنَا بس بدها سيرة تتحكي فيها. يعني انو مستحيل الواحد يشوف واحد بده ينتحر و يتركو و يمشي. فضول، تعاطف، شماتة، تسلية، تضييع وقت ... ايش ما كان السبب... مستحيل الناس تترك غيرها بحالها.

 

الله يهديكي يا ويسبر الله يعين كل بني على بلوته
ويسبر في ناس بتعاني من اكتئاب حاد وهاد الشي ممكن يؤدي الى الانتحار
كمان انه الناس احيانا تفقد الامل ولما ينفقد في رحمة الله بيدفعهم لهيك عمل
اما بالنسبه للمرة واولادها ممكن تكون وسيلة للفت الانظار الى مشكلتهم ما احنا المشكله اللي بتوقعها صايره انه احنا ما ننتبه انه في ناس عايشه تحت خط الفقر بمليون درجه ومش قادره تؤمن حياتها وللفت الانتباه لمشاكلهم ومعاناتهم بيضطروا انهم يلجأوا الى هيك تصرف في النهايه الله يعين كل بني آدم علي بلوته!!

 

كلامك صحيح ولو ما وصلنا لمرحلة التجاهل التام بس على الأقل بلا من التغطيات الإعلامية الواسعة لهيك أمور لانها عم بتحرض فئات أخرى على القيام بنفس العمل
مش بس بالانتحار حتى بالقتل نفس الشي
الانسان لما يشوف غيره عمل الغلط بصير أجرئ عليه

 

أشرف محيي الدين

صباح ومسا الورد

لو لاسمح الله صارت بتكون مشكله كبيرة بصراحه, مع اني ما اعتقد ان ممكن حد ينفذ الموضوع :$

هلأ الفكرة اكيد ما حتطبق, بس جد لازم يلاقو حل للموضوع

Ahmad Al-Mahrouq

ما بننكر ان في ناس منهم جد بكون عندهم مشكله وبدهم صوتهم يوصل...لكن برأيي هاي مش الطريقه الصح للموضوع

و المفروض يكون النا احنا ردة فعل لنوجههم و نعرّفهم ان هالطريقة غلط وما بتوصل

 

Dr.Mohammed

المفروض الحكومه يكون في الها دور لوضع حد للي بصير, يعني الموضوع زاد عن حدّه بصراحه, و فيه ازعاج للسلطات و للناس و ما بحس ان في حد استفاد من هالحركة

-----
اكتر من مرّة يوصلني التعليق التاني النقط :$ كل مرّة بلغيه ما بعرف ليش بطلع...ويلا انت بتكتبه؟؟؟

Fazlakat

حتى انا بالرغم من " اللئمنه" الواضحه بالموضوع ما اعتقد اني اشوف حد و خلص اكمل ولا كأنه في شي, بس الموضوع انه بدنا حل

 

walla ya whisper sarat moda metelha metel modet kul eshe !
yalla had nta7ar ? kolna mnenta7er!
saro yedawro 3al shuhra ymkn! :P
o kman sayreen enno mshan yewasloo sot-hom ye3malo hek 7arakeh ! m3 enhom 3'altaneeeeen !! fi 9874023498 taree2a twassel feeha elli bddk ya o fi 0983209183 7ada feyyo yewassel sotak iza kennak msh ader ! bs 5allena nefred enno yemken b 7ajeh la wa7ad yetla3 o ye3mal 7alo beddo yezet 7alo o ye2oom yetfarkash o yu2a3 msh b azdo! mn yomha ma 7ad bddoi aw ma beddo 7ayfakker yezet 7alo ! wa ella lazm kul elliu darajo hay el moda yenmsko o yenzatto kamsheh wa7deh mn el 7okoome ;P

 

Sozan

امين يا رب :)

كنت متأكده ان الموضوع حيدايقك ....:$ علشان هيك كتبت فقرة
"بس بدي اوضح قبل اني ما بستهين بمشاكل الناس اللي بخلو الدنيا تسكر قدام وجههم وان في ابتلاءات مرات ما بحس الشخص انه ممكن يستحمله, لكن مهما كان الانتحار مش حل اكيد"

هلأ اللي عندهم امراض نفسية معينه, الله يعينهم و يساعدهم و يساعد اهلهم, هاي حالات مش من اللي بنسمع عنها بالجرايد والاخبار, معظم اللي حاولو الانتحار بكونو بحاله ذهنيه سليمه بس في عندهم مشكله.

الله يعين الناس عاللي بلاها و انا متأكده ان في جزء من هدول الناس كان بدهم يوصلو صوتهم بأي طريقة, لكني ما زلت ضد هالطريقة
يعني لو مثلا راحو عالديوان الملكي او عن طريق الاذاعة طالبو الحكومه انها تساعدهم, صوتهم وصل و ممكن انهم مش بس يحلو مشكلتهم ممكن تنحل مشكله ناس تانيين بعانو من نفس المشكله.

الله يعين العالم...وبعتذر اذا ازعجك البوست :$

ربى حجازي

المهم يكون في حل ليخللي الناس يلاقو طريقة تانيه غير هالشي, يعني جد تكرار الموضوع ملفت للنظر وصارت الوسيله الوحيده

المشكله ان في مواضيع بدينا نتفاجأ فيها وطلعت موجوده ولكن كان في تعتيم عليها, وبالنسبة الي بحب اعرف شو بصير حولي, وبرضه في سلبية ان الناس بصيرو اجرئ عالغلط زي ما حكيتي و كأنه الموضوع مألوف وما في استنكار اله :$

الله يستر من اللي جاي...

اهلا و سهلا ربى نورتيني :)

 

Farah Batarneh

Hay moshkeletna...2enno elmawdoo3 7atta law kan fe nas 3amalooh la ywaslo sawt-hom - w ana ma zelt mesh m3 halshee- saroo elnas y2aldohom w la2sbab taf-ha w ma 2elha m3na 2aw lalshohra zay ma 7zketee :$

Allah y7ma eljamee3 bs lazem el7okomeh te3mel she w tla2ee 7al la tenhee halshee

 

أنا معك 100% انو اللي بطلع ينتحر بالعلن، هاد بكون بدو يوصل رسالة و بدو ناس معينين يعرفو انو بدو ينتحر... أو ممكن يكون بدو ينتحر عن جد بس داخلياً في خوف من الموضوع، عشان هيك بطلع عالعلن لإنو عقلو الباطن بكون بدو حدا ينقذو...
برأيي الخاص، اللي بدو ينتحر الله لا يقيمو، مدام انو بدو يمشي بطريق الكفار و يختار انو ينهي الحياة اللي ربنا أعطاه إياها و اللي ما إلو أي حق بإنهاءها... خلّيه يجرّب!!!
السبب الوحيد اللي ممكن يدفع أي حدا للانتحار هو بعده عن الدين، و عدم معرفته بعواقب الانتحار...

 

وأنا كمان برجح الاقتراح الأول، انه يمل وينزل لحاله، وعلى ذكر الست اللي حاولت تنتحر وبعدين لحقها زوجها، هاي الحادثة صارت عنا بإربد، وحاولوا يرموا حالهم من فوق مستشفى الأميرة بسمة التعليمي، النكتة أنه أخو الزوج عمل نفس العملة من شهور علشان يحصل معونة من وزرة الشؤون، وفعلا أخذها، عشان هيك فكرت الست وزوجها وأولادهم يعيدوا الكرة، بس على مين ؟
ظله الزلمة معلق عالسطح والناس ظلت متجمعة لنص الليل، طبعا مش علشان يقنعوه ينزل، بس علشان الفرجة ويضحكوا عليه. المهم الأمن بالآخر نزله وأكيد ما راح ياخد اشي، وبتخيل - مش متأكده- إنه أكل ضرب لحكى بس ما بعيدها.
بصراحة النكد والبؤس موجود من زمان واحنا بتتعايش معاه بس مش لدرجة الانتحار، والناس بتبالغ بمشاعر الحزن والهموم، وبشوية اهمال لهيك أشكال شو شوي بتنقمع هالظاهرة.

 

خلص و لا يهمك هيني انا حذفتها هاي المرة

بصراحة انا بكتبها لاني بعد ما احط الكومنت بنسى اني اختار خيار التبليغ عن طريق الايميل فعشان هيك بضطر اني احط مشاركة تانية و اختار التبليغ مرة تانية.... طريقة غريبة صح؟؟ وين ذانك يا حجا
:)
بحاول اتذكر المرات الجايه

 

همسة برأي انو ردة الفعل حتكون من الثنتين, لأنو في ناس فعلا سلامتها من الهسهس بتروح تسويها و بتنط وفي عالم بدها شهرة زي معظم الحالات اللي عنا في الأردن لأنو اللي بدو ينتحر فعلا بنتحر عالهدوء وبريح العالم من شرو وجهنم تسحبو, هلأ من الصعب على رجال الأمن انهم يخلو لانو هاي جزء من وظيفتهم انهم يحموا الناس حتى من أنفسهم في بعض الأحوال, بس صراحة من نفسي انو يخلوهم

 

Mrs H

انا هيك بحس ان لو فعليا بدو ينهي حياته ما بطلع قدام الناس و بهدد و بتوعد وبلم الكل, في من اللي حاولو ينتحرو اتصلو بالتلفزيون و الاذاعه...طيب لو وهمه عالارض اتصلو وحكو مشكلتهم مش كان احسن...

معك حق..فكرة ان حد ييأس من رحمة ربنا ويفقدم الامل كتير صعبه ...ومش اي واحد بوصللها الا اللي بصيبهم ضعف بايمانهم

ممكن مرات نلاقي حل مشاكلنا بالموت - لا سمح الله- لكن ما بنفكر ننتحر, وبندعي ربنا يفرجها ويكتبلنا الخير


الكيل بمكيالين

النوعية اللي عنا برجح انهم يعملو هيك ...

ومنكم نستفيد...هاي معلومات جديده عنهم :$

اذا جد صارت موضه و وسيله للكسب مش اكتر

بصراحه...انا مش مع الضرب بس مع انه لاااازم يكون في عقاب ليتعلم هو و غيره

 

Dr.Mohammed

شكرا عالفكرة :)

انا كتيييييييييييييير بنسى اكبس الخيار و ما بعرف شو اعمل و بضلي كل شوي اشيك الردود :$

ولا يهمك...انسى دايما واترك تعليقين وتلاته...هاد من حسن حظي انك تنورنا هون :)


Ahmad Hamdan

الله يعين العالم, بس زي ما حكيت عنا رده الفعل الاولى اكتر حتكون

وهي الانسة كيّاله كمان وضحتلنا اسباب جديده بتقهر :$ انه كيف بدنا نحزن عالعالم هلأ و همه هيك تفكيرهم

هاي هي...انه لو لا سمح الله حد انتحر مصيبه موقف الناس و مصيبه اكتر موقف رجال الامن

الله يحمي الجميع و يفرجها عليهم

 

انا معك في ناس بستخدموها كوسيله للوصول للي بدهم اياه وطبعن هدوله ضعفاء النفوس لكن ما بنقدر نخاطر ونجازف بهيك شغله ونعمم على كل واحد طلع يندد بالانتحار لانو ما بنعرف ظرروف الناس

ولا ننسى انو في ناس بتوصل لمرحله الاكتئاب الحادالي ممكن يخلي الانسان يتصرف تصرفات خارجه عن الاراده ومن هالتصرفات انو يفكر بالانتحار او ايزاء نفسو بعرف وحده من صديقاتي صابها هادا النوع من الاكتئاب البنت انسانه طبيعيه بكامل قواها العقليه بس كانت تيجيها حاله الخوف من الانتحار هادي الحاله كانت تيجي بفترات متقطعه باليوم البنت تصير تمشي حولين حالها او تقعد بزاويه بالبيت وتصير تبكي كانت اتخاف اتسوق السياره تحس بتنميل باطرافها وتشكي من خفقات القلب بتزيد عندها.. راحت الدكتور كزا مره تحكي الاعراض ما قدر حدن ايساعدها تحكي لاهلها ما حدا ايسدقها الكل بفكرها بتدلع لغايه ما وصلت معها انها مسكت سكينه وصارت اتهدد اهلها بالبيت وحاولت تنتحر اهلها ما خلو دكتور الا وراحو عليه وقرؤو عليها قران بس برضو مافي فايده حاله الخوف لازالت تيجيها ودوها عند دكتور مختص بالامراض النفسيه حكالها انو نتيجه الضغط النفسي الي اجالها وما كانت تنتبه على حالها فتره من الفترات انها بتشتغل فوق طاقتها عملت عندها تراكمات وصلتها لحاله الاكتئات هالاكتئاب النفسي اثر على نقصان ماده بالدماغ ما بعرف ايش الاسم العلمي لالها المهم نقصان هادي الماده هي الي بتسبب حاله الخوف والقلق الي بتيجيها وهالماده ما بترجع الا في حاله اخدت دواء مضاد لحاله الاكتئاب والقلق الي عندها بس برضو لازم الانسان نفسو يحاول ايطلع حالو من هادي المصيبه

الله يكون بعون هالناس على بلوتهم ويصبر اهليهم والله يا همسه في كتير بكونو ضحايا الاكتئاب ومنهم كانت صديقتي الي كانت تعاني من هادي المشكله سنتين ما حدا انتبه عليها الا مؤخرا لمن كانت البنت حتروح من ايديهم يعني للاسف الاهل والمجتمع بتعامل مع هادي الفئه بالتجاهل لانو بكونو ناس جدا طبيعين
وبكامل قواهم العقليه والجسديه

الله يعافينا من هيك مصائب ويشفي كل الناس

اخيرا بعد الناس عن الدين وانشغالهم بالحياه السبب الرئيسي لكل ضحاياو مدعي فكره الانتحار لازم الانسان يضلو متمسك بدينو ويحط الله بكل خطوه بيسويها وتكون عندو قناعه دايمن انو الله دايمن موجود والله الو حكمه بكل اشي بصير معنا ونحسن الظن بالله ونرضى بالي الله كتبلنا اياه .. وما نستسلم لانو فكرة الانتحار هي وسواس من الشيطان الرجيم

قال تعالى :(( وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ((
صدق الله العظيم

شكرا الك همسه لطرحك لمواضيع جدا مهمه وجزاكي الله كل خير :)

كتبه جريده اسفه :$

 

Jarat

الله يشافيها و يعافيها يا رب
والله الضغط بعمل كتير...وان اللي حواليكي ما ينتبهو برضه مشكله, في اهل عندهم انه الابن او البنت باكلو وبشربو و بلبسو هاي هي التربيه, ما في حكي و انهم يتعرفو اكتر على اولادهم
الله يعينها :(

زي ما حكتي الدين القوي هو الرادع بهيك مواقف...وان الانسان ما ييأس من رحمة ربنا

شكرا الك :)
عفكرة...انا بحب تعليقات الجرايد...فخدي راحتك :)

 

لا تعتذري الك الحق تكتبي اللي بتفكري فيه وهاد الشي اللي بيثري مدونتك وبخليها من احلى المدونات :)

 

Sozan

وجودكم هو اللي بحليها والله يا قمر :)

 

ههههههههههه والله معك حق يا قرابتي.. الواحد يعاملهم زي الزغار يسيبهم وهمه برضو لحالهم..
خليهم يتعلمو يسيبو هالحركات..
على قول المثل:
اما انت مش قد الهوا بتحب ليه.. هدول أما انت مش قد الانتحار بتسوي هاشي ليه..

 

Rula A.

اهلا اهلا بقرابتنا القمر :)

هههههه عجبني المثل بصراحه :)))

اعتقد والله اعلم المعظم حيغير رأيه