Things I Like To Whisper About

Would You Hear Me Whispering

زهرتي يا زهرتي



بحب كل فترة وفترة اغير ديكور المكتب ليصير في تجديد نفسيه شوي, من يوم ما سافرت صاحبتي اللي كانت معي بالمكتب و انا مش جاي ابالي اعمل اشي جديد, مع ان اللي اجت مكانها صاحبتي برضه بس في اشي ناقص, الاشي الوحيد اللي بعمله هو تنظيف المكتب و اجيب نوع جديد من المعطر و اغير الالعاب المحطوطين على طاولة الكمبيوتر, انا من محبين تجميع الالعاب من كندر سيربريز :$ بعرف ان عمري 150 سنه بس بحبهم شو اعمل, جديد حسيت اني لازم اعمل شي, فاشتريت زريعه واللي هي عبارة عن وردة اسمها حسب ما روى البياع "عرف الديك" سبحان الله شكلها بجنن وكأنها صناعيه و لونها كتير حلو, وفيها اشي زي المخمل, جبتها و حطيتها بالمكتب و كل يوم بسقيها مع انها باخر موجة شوب حسيت انها تضررت بس ان شاء الله ما يصيرلها اشي, كنت حابه اشتري سمك بس بصراحه خفت من المسؤوليه وخصوصا اني بعطل يومين, و بخاف تموت و ما راح اسامح حالي بصراحه :$

المهم من يوم ما جبت الزريعه وانا كل ما اسقيها الصبح لازم اصير اغنيلها :$ جد مش عارفة كيف خطرتلي الاغنيه مع انها اشي من زمااااااااااااااااااااااااااااااااااااااااان , بس فجأه رجعت :)





19 التعليقات :

الله يخليلك هالوردة و حلو يكون عند الواحد زريعة بالبيت

 

و الله اني فرطت من الضحك على الاغنية ، مش عارف ليش ، مبين عليها قديمة كتير بس كلماتها غريبة شوي !!

 

الإربدي

اهلا وسهلا فيك , بعرف انها مش اول زيارة ولكن اول تعليق :)

سبحان الله الخضرة بتعطي شعور جميل و مريح بالنفس
الزريعه بالبيت تخصص الوالد الله يخليلنا اياه يا رب و يخليلك اهلك

وشكرا مرة تانيه عالمتابعه :)

Dr.Mohammed

افهم من هيك انك ما بتعرف الاغنيه ؟؟؟

الله يسامحك حسستني اني قديمة كتير

هاي الاغنيه كتير كانت معروفة من زمان, كانت تيجي بفترة ما كان ينعرض افتح يا سمسم

حركاتهم زكرتني باناشيد المدرسة بالابتدائي :)

 

ههههههههههههههههههههههههه
ضحكتيني ع الأغنية، كإني بعرفها كانت تيجي واحنا صغار زماااااااان، أحلى اشي الأزياء، هاي فترة الثمانينات لازم يلغوها عن الوجود لإنه اللبس فيها كان أبشع اشي على طول القرن العشرين.

الله يخليلك هالوردة والله الزريعة بترد الروح والله بتستجيب إذا بتغنيلها ترى الزريعة بتحب الاهتمام

 

الكيل بمكيالين

اه كتير قديمة, يمكن هالبنات اللي بالاغنيه صارو امهات :)

مهو اشي مورّد لازم يكون لزوم الاغنيه :))


اللي ابشع من اللبس بالثمانينات هو الشعر :$ جد كان عجبه, خصوصا الغرّة اللي طبقات وراجعه لورا و مفروقة من النص....يا الله شو بكرها :$

تسلمي يا رب, ان شاء الله تستجيب لان صوتي بصراحه على قد الحال بخاف تدايق وتنتحر

 

الأغنية معروفة و حلوة
يرحم أيام نعمان و م"ل"سون
:)))

أما شغلة كندر سبرايز موتتني من الضحك؛ الله لا يحرمك الروح الحلوة و لا الطفلة اللي جواتك
"بنتي هيام عندها شي 398649856946 لعبة من هدول ... لأ ما قصدي إشي" :]]

 

صباح الخير والورد أختي الأردنية اللطيفة

الحق أنها تشبه لحد كبير تاج الديك، أو أيا كان اسم ذلك الشئ اللي ع راس الديك..^^
زوينة بزاف
أقصد الوردة.

والاغنية يا لطيف ،الصراحة الصراحة هي مرعبة
مووووت..
وفيها قطف للورد يعني ماينفعشي.


بالنسبة الالعاب والعمر، فهو من قرر من الاول ان الاستمتاع بكل شئ في الحياة مقتصر على صغار السن!!
نحن من يقرر

بالنسبة للعمل والمنظر الطبيعي: ماشاء الله عليك افكارك الجميلةأقول ،
هي فطرة أنثوية خاصة بنا نحن الفتيات، حتى في العمل لايسعنا غير ترك وخلق الانطباع بان هذا المكان فيه فتاة.
في عملي السابق بالروض ، والىن بعملي الجديد هنا ، لابد أن أحضر ضئ طبيعي مثل تلك الورود الموضوعة على الرف للاشارة بانني موجودة.
حس انثوي على الاغلب!!

يوم طيب لك اختي

 

حبيتها لهالورده:)
بس بتعرفي شغله
اكتشفت انو انا بحياتي ما اشتغلت في مكان وعملت هيك خصوصيه للمكتب
لانو السبب ببساطه انو بحياتي ما كنت حاسيتو الي او مطرحي!

 

مرحبا ياحلوه
كتير زوووئك حلووو
الورده فعلا رائعه
حبيتها
فيكي تبعتيلي وحده مو * _ ^

والاغنيه ظريفه والبنات لزوزات بس واضح قديمه شوي

بس الاكيد اثبتيلي انك تملكين احساس مرهف

تحياتي الك


دمتي بين باقات حب وخير وسعاده



toota

 

Haitham

ايام حلوة كانت :)
و انيس و بدر

تسلم يا رب...في اشياء بالحياة اذا بتروح منا بنخسر كتير وانا بصراحه بحاول ما اغير حالي واضل طبيعيه و مدامنا ما بنعمل اشي غلط فكل شي مسموح :)

انت ايمتا حكيت "هيومه" بدها تيجي عالاردن؟؟؟ بركي عملنا تبادل ثقافي بينا :)

لاتــــي Lati

صباح ومسا الفل لاجمل اخت مغربيه بالعالم :)

كتير بتشبهه و الوانها كتير جميله وانا اخترت هاد اللون :)

الاغنيه كتييييييييييير قديمة كانت تيجي عالتلفزيون وانا صغيره و فجأة خطرت في بالي بس جبت الورده :)

بالنسبة للالعاب معك حق 100% احنا اللي بنحدد و بنقرر والمفروض ما نخلي شي يسرق منا هالصفات القليلة الباقيه

الخضرة شيء جميل ونعش و يغير المزاج بشكل كبير , وبالشغل بدك اشي يغير مزاجك من فترة لفترة

ما شاء الله اذا انت معلمة اطفال :) جميل جدا :)

مساءك سعيد دائما

 

مياسي

بصراحه....بتنحب

بابا حبيبي معقدني من الزريعه, كل البيت بصير طينه و ورق شجر و حبيبي بختار يوم ما انظف البيت و ببدا شغل, لهيك مش كتير بحب الزريعه, بحب اشوفها من بعيد لبعيد بس بدون ما اهتم, لكن اول ما شفت هالورده ما قاومت :)

انا عندي احساس انه مش مكاني الشغل لكن بدي اعمل شي يجدد نفسيتي شوي, كيف بدنا نكمل !!!


Toota


اهلا و سهلا و 100 مرحبا ب
Toota :)

الله يحلي ايامك يا قمر ....ولو انتي بس تأمري :)

كتير قديمه, اعتقد انها سعوديه الاغنيه, كانت تيجي واحنا صغار عالتلفزيون

تسلمي هاد بس من ذوقك والله

 

نيالك .. يا ريت لو إنه كنت بقدر أحط زريعة و ورد في المكتب أيام ما كنت أشتغل

كإنه البني أدم بطبيعته بحب يكون عنده شي يعتني فيه و يكون مسؤول عنه

ان شاء الله دايما تكوني مبسوطة بشغلك و تلاقي أسباب تجددي فيها يومك في الشغل و بره الشغل
:)

 

Palestinian Princess

ان شاء الله بتشتغلي بمكان بجنن و تعملي ديكور مكتبك زي ما بدك و احسن :)

تسلمي يا رب..امييييييييييييين و الاقي شغل احسن ان شاء الله :)

 

كيفك ويسبر
من زمان قريت الموضوع بس ما قدرت علق
النت و الكمبيوتر قضيت عليهم الله وكيلك :)
عرف الديك بتجنن بس للاسف ما بتعيش كتير حسب تجربتي و يمكن تصمد معك لانو عندكم ابرد
من عنا
بس نصيحة غيري تربتها و حطي شوي فيتامينات كرمال ما تصمد

حلو التغيير ليش لأ ؟

 

Jafra

اهلا وسهلا فيكي ياقمر
انا بخير والحمد لله....مشتاقه :)

انامش عارفة ليش الي فترة كارهه النت :$ وما بحب اشبك بالمرة

بس شكلي طبت اليوم :)

والله شكله معك حق, اليوم صبحت صفرة المسكينه :"( حكولي حطيها عالشباك بدها شمس وهوا و شكلي حرقتها, هيك انا بزيدها بكل شي
ان شاء الله ما تكون ماتت :(

بدي اشوف بركي جبتلها فيتامينات زي ما حكيتي

التغيير بجنن بصراحه....الروتين ملل

 

حلو التغيير بين كل فترة والتانية

بس الاغنية تحشيش
صح هي بالتمانينات بس بعرفها
اخوي مسجلها ايام الكويت لما كان صغير مع افلام كارتون

تحياتي

 

Ahmad

اهلا احمد و يعتذر على التأخير
ابصر شو مالي ...الي فترة على عداء مع النت مش عارفه ليش :$


التغيير كتير حلو و بجدد النفسية :)
ممتاز كتير ...اذا بتعرفها للاغنيه :)

 

الورده ما شاء الله شكلها كتير حلو وزي ماقلتي كأنها إصطناعية.. بالنسبه للأغنيه كتير حلوه وبضحك.. أول مره اسمعها :)
العرق الأخضر بالدار حلو وأكيد حيكون حلو برضو بالشغل :)

 

Rula

لو تشوفي الورده المسكينه هلأ :(
بعد موجة هالشوب نشفت يا حرام...بس بحكولي لسا فيها امل...ان شاء الله خير

الاغنيه هاي و انا كتيير صغيره :)