Things I Like To Whisper About

Would You Hear Me Whispering

تسويق





كل سنه اول ما تصيف الدنيا ببدا امشي بشكل يومي, بحكم ان شغلي مكتبي وطول اليوم قاعده فالمشي بكون رياضه و تخفيف وزن و انتعاش, جد بتتغير النفسيه كتير, السنه بصراحه ولاول مرّة بخاف اطلع امشي وخصوصا بعد ما قرأت هالموضوع والي صار بمنطقتنا :$, بس قبل اسبوع تشجعت و اقنعت حالي اني بمشي بشوارع فيها حركه و قريب المغرب, وبديت امشي واجهتني مشكله تانيه واللي هي اني مضطرة امشي عالشارع, لانه الارصفه كلها ما شاء الله مشغوله يا بالشجر يا بعمدان الكهربا والتلفون يا بالسيارات اللي صافين عالرصيف, غير ان ما شاء الله الكل صار عندو كلاب و عشرين الف نئزه بنئزها وانا ماشيه, بس اوصل باب الكراج ببدا يعوي و انا بسوي حالي عادي مع اني بكون نقطه وبدب ابكي :(

المهم قررت ادور على نادي قريب اصير اروح عليه, انا كنت اسجل بنادي السنوات الماضيه بس بصراحه ما كنت مرتاحه كتير لانه بالوقت اللي بقدر اروح عليه بكون في ناس كتير و عالدور بنكون, رولا قرابتي وجارتي نصحتني بنادي منيح وقريب, بس جديد فتح نادي بنفس منطقتنا قرأت عنه بالجريده, قريب لدرجه انه ب 10 دقايق مشي بكون عنده, فقررت اروح اشوفو واسجل.


هلأ النادي وحسب الاعلان هو عالمي واله 10 الاف فرع بكون دول العالم, اتصلت فيهم واعطوني موعد بعد باسبوع, رحت انا وماما عالموعد, المبنى من بره ممتاز, المدخل ممتاز, والنادي من جوا جيد, و شوي صغير و ديق, اول شي لفت نظري ان عدد الالات اللي بنتدرب عليها قليل كأنه 7, و محطوطين على شكل دائرة و بغرفه صغيره, قلت ممكن في غرف جوا, اشي تاني لفت نظري ان المدربات او كل اللي بشتغلو هناك حتى اللي عالريسيبشن كلهم اوزانهم ثقيله, عرفت عن حالي واجت وحده من المدربات علشان تقعد معي وتاخد معلوماتي, البنت مليانه والها كرش و ظهرها منحني وكتافها قاشطين - على رأي نسيت شو اسمها اللبنانيه بسوبر ستار - شرحتلي عن النادي وعن كيفية التدريب, وطلعت هاي بس غرفة التدريب وجوا غرفة تغيير وخزانات,وهي بتكمل شرح انا كنت مقرره ومتأكده 100 % اني ما بدي اسجل عندهم, يعني هلأ بصراحه انا رايحه اسجل بنادي فالمفروض عالقليله اشوف مدربات مستخدمين هالالات و واضح اثر التدريب عليهم, يعني مش منطقي تيجي وحده تدربني و تحكيلي شو مفيد وشو مش مفيد و تعطيني نصائح وهي وزنها ضعف وزني :$..... بلغه اخرى علشان الشباب ما يحسو الموضوع تافه, مثلا لو راح شب يتدرب حديد بنادي و اجا المدرب عبارة عن عظمه و ما في عضلات و صار ينصحك شو تعمل مستحيل تقتنع منه, انو يا زلمه لو فعلا بدك تفيدني كان فدت حالك :)




هلأ انا ما بفهم بالتسويق كتير, بس اشياء بنتعلمها بحياتنا مش كتير علميه بس يعني تمشايه حال, و اول شي ممكن افكر فيه هو طريقة عرض البضاعه, يعني لتسوق شي صح بدك تعرضه بطريقه صح, والجماعه مخربين الدنيا, المكان ديق و الالات قليله و المدربات كأنه ولا الهم دخل بالرياضه, والامرّ والادهى انهم طلبو مبلغ خيالي كأشتراك, و طلبو اشي اول مره بسمع فيه بنادي, طلبو 100 دينار رسوم اشتراك غير مبلغ الاشتراك الاساسي :) انو بالله عليكم, بدكم تاخدو خلو المكان مني :$

المهم طلعت من عندهم عالنادي اللي حكتلي عنه رولا و سجلت هناك , نادي طابقين و طابق كامل للالات وطابق غرف للايروبكس و بركة سباحه و مدربات متخصصات :)



17 التعليقات :

هاد مش سوء تسويق , هاد نصب عيني عينك, يعني زي اللي بنصح الناس لا تدخنو لانو بأذي الصحة وهو بشفطلو بو شي 3 باكيتات باليوم من أنواع مختلفة. بس علي سيرة موضوع سواق التاكسي فأنا خاف عقلي منو, معقول هيك عم بصير عنا.

 

Ahmad Hamdan
نصب عيني عينك, كتير حلو المثال.. وللاسف كتير بصير
خصوصا الاباء المدخنين اللي بنصحو اولادهم :$

جد الموضوع خوفني وضليتني فتره مش قادره اطلع لحالي

 

ليش ما تجيبي جهاز للركض اريح واحسن بيكون في البيت وما بيكون عندك حجه !!بالنسبه للحادث والله هاد بخوف ولازم الحذر الله يعين :)

 

بصفتي من المتواطئين في تعليم (جزء) من فن (فن!) التسويق؛ فبحب أقلكم إنو كلو كذب و تدليس :)
"بس ما تحكوا لحدا" ... :)))

 

bravooooooooooo whisper .. i am a big suporter for the healthy life .. wo 3ala seeret 2l mdarebat 2l nas7at .. nafs 2lshi 3ena belgym .. modarebeen sanakee7.. so my best coaching source is utube :)

 

قلّودة ... قلّوده
انا ناوي أسجل نادي لآنه وضعي مش تمام
دايما قاعد
وما بمشي بالمرة
صح مش تخين بس عندي كرش

لهيك قررت اسجل نادي لياقة بشكل عام

بالنسبة للتسويق .. اكيد هاد مش تسويق هاد تنفير وتكشيش
يعني وانا بقرأ بحكي معقول ويسبر تقبل؟؟
بس الحمدلله انك طلعتي عند حسن ظني وما قبلتي

تحياتي

 

والله اذا عالتسويق فلازم رولا تاخد عموله على هيك:)

على فكره هاد كلو من الفشخره الفاضيه انتي مش عم تدفعي حق خدمات انتي عم تدفعي بدل اسم النادي هيك شكلو

موضه وماشيه بالبلد وفي ناس المهم برستيج!!

 

انا عمري ما زرت الاردن بس اتوقع الاردن زي باقي الدول العربيه الامان موجود والناس الطيبه موجوده

وطبعن الله هوا الحافظ بس دايمن الحزر واجب بغض النظر وين كنا

وكمان مثل بحكي الحشر مع الناس عيد :)

يعني بزياده دبوسه امشي بطريق زحمه احسن ما تمشي بطريق مزوي لحالك

وجزاك الله كل خير يا همسه لتزكير الناس بهادي الحادثه وتوعيتهم :)

 

Sozan

المشكله اني بتكاسل وبركن, قبل فترة جبنا البايك, بالبدايه مبسوطين عليه وهلأ بطلنا نصيبه, فبدي اجبر حالي والزم حالي بنادي غير هيك ما بتحرك :$

جد مرعب الحادث و صرت اخاف اطلع لحالي :$ و ابسط مشوار بالسيارة لازم

Haitham

هو فن بصراحه ليش الحكي :)

خلص ولا يهمك ولاااااا لحد حنحكي انه هيثم...اه...اه ...هيثم الشيشاني... بحكي انو التسويق كذب :)

ولو....في بييييييييير

 

Zuhair

Sha6ooorah ana :))))

el youtube mnee7 bs beddak nata2ej w 2amtheleh 7ayyeh bardo :)

Ahmad Al-Mahrouq

بس انا اللي سبقتك...كيف قلوده :) هلأ انت بتسجل بعدي و بتصير انت القلود


انا كمان الحمد لله ما في وزن زايد بس شغل المكتب بخللي الواحد يتكاسل وتقيل فلازلمنا شوية حركه

جد تنفير...مش منظر ولا منطقي مدربه رياضه يكون شكلها هيك :$

ولو...بعجبك انا :)
هو بصراحه بعد الشتاء و عبداية الصيف الكل لازم يصير قلود :)

 

مياسي

هههههه...معك حق, بصراحه الحق علي من كلام رولا لحالها المفروض اروح فورا واسجل وما اروح عمكان تاني :)

النادي ما كان فاضي, وفي ناس زي ما حكيتي علشان الاسم بس

Jarat

الحمد لله في امان...بس النا فترة بنسمع بقصص غريبه الله لا يبلينا يا رب :$

انا المنطقه اللي بمشي فيها بالنهار و شارع كله سيارات وما بمشي بين البيوت بالمره

امين يا رب...تسلمي يا رب والله يحمى الجميع

 

مساء الخير ويسبر
معك حق....هدول عاملين زي المثل...الاسكافي حافي...ههههههههه
كنت ناويه اقترح عليكي تمشي بمنطقة مدرسة المعارف ...بما انك قريبه منها
المنطقه حول المدرسه مستويه وجدا مريحه للمشي و آمنه وفي كتير ناس بييجوا من مناطق بعيده بيصفوا سياراتهم هناك وبيمشوا لفتين تلاته لانه الشارع المحيط بالمدرسه صاير زي التراك....على كل حال ان شاء الله بتنبسطي بالنادي.وطمنينا عن النتائج

 

a555555555555 neyalkom btemsho!! fesh 3enna majal ll mashi hon:((
jad i miss jordan toooo much:((

 

i will not comment on marketing thing,, i will comment on this girl zein or wut ever,, do u know its the 5th or 6th time i heard this story!! the same details!!
and if she want to help ppl and warning them to take care of them she must write in arabic coz not every one know english
and hav good time in gym

 

Ahmad Meri

AHMAD!!! shooo wean hal3'yebeh ??
inshallah tkoon b5ear :)

Allah ye3enkom 3al jaw 3endkom...malls w ya doooob :$

Anonymous

I read her story in Arabic but I can't remember where :$
u r right about that

Thanks...I am having a wonderful time there :)

 

قرابتي انا مبسوطه انو عجبك النادي.. همه كمان لطيفين الناس الي بيجو عليه.. وشكرا على الرابط لمدونتي..
انتي بعيوني قرابه :)

 

Rula A.

كتير كتير...شكرا يا قمر

جد الناس لطيفين و المدربات لطيفات الجو العام حلو

تسلم عيونك يا قمر....بس ضايل نشوف بعض :)