Things I Like To Whisper About

Would You Hear Me Whispering

ذكريات ومغامرات و تدمير :)


امبارح بالليل اجا اخوي وعيلته من السفر, يعني فروووحه حبيبة قلبي اجت :) ما شاء الله عليها حبيبتي شو كبرانه وشو صايره بتجنن, احلى شي بس يجي واحد من خواني من السفر -غير وجود فروحه وعبود طبعا- لازم نقعد قعدة ذكريات, ونتزكر كل القصص والمغامرات والدمار اللي كنّا نعمله.

اخوي هاد كان كل عطله صيفيه تكون وحده من ايديه مكسوره :$ لدرجة ان خالتي اللي كانت بكندا كل ما تيجي تنصدم, انه مش معقول , وبالاخر صارت تجيب من ضمن الهدايا حماله طبيه للايدين المكسورة :) , ومرة كنّا عند تيتا امها لماما و كانت ماما وتيتا وخالاتي بالغرفة التانيه, بتحكيلنا ماما فجأه بطل الكم صوت, بس صوت ضحك غريب, اجيت لقيتكم واصلين سلك راديو قديم بالكهربا و الطرف التاني للسلك مكشوف و ال دور دور بنحطه على ايدنا أل بزغزغ و بنضحك - هالمرة لقيتها للكلمة بزغزغ :) - ماما حبيبتي بتحكيلي كان راح يغمى علي بس شفت المنظر :(

كانت كل طلعه لبابا وماما و تركنا لحالنا بالبيت مغامرة, نتأكد ان السيارة تحركت, نعطي 5 دقايق احتياط ليكونو ناسيين شي, وبعديها بنبدا :) , العادي و المتكرر انّا نقلب الكنبايات, و في سجلون كبير - يا الله زمان على هالكلمة و عالسجلونات :) - نقيم مكان ما بنقعد و نفصله و نقلبه, هو عبارة عن 3 مقاعد مع بعض, بس نقلبه يكون في 3 فراغات بينهم خشب محطوط عليهم قماش, نقعد احنا ال3 فيهم - اخوي الصغير ما كان لسا مولود - و نلعب انّا بالبحر و بنصيد سمك, السمك كان عباره عن اي شي عالارض بالاضافه للحفايات, و نحط على وجهنا عجال صغيره و نربطهم عأساس ان هدول نظارات الغوص, مع انه في عنّا نظارات سباحه كان, لانا كنّا مشتركين بالمدينه الرياضيه, بس العجال احلى ومناسبين اكتر للجو البحري اللي عاملينه :) او لعبه تانيه واحد من خواني ينام جوا السجلون و يرفع المقعد برجليه, وانا واخوي التاني نقعد نتسلق و هو يهزّه يحاول يوقعنا :)

هلأ ليش كنّا نستنا 5 دقايق لنتأكد انهم طلعو.؟؟؟ لانهم في يوم كنّا نلعب و نرمي على بعض لبنه...ايون لبنه, ما بعرف كيف ومين بدا, و فجأه كل الحيطان والعفش لبنه, و فجأه رن الجرس , طلعت ماما راجعه ابصر شو ناسيه, انصدمت المسكينه, وهددتنا اذا برجعو و بلاقو الدنيا هيك لتحكي لبابا, واحنا عنّا اي شي ولا بابا يعرف, طبعا عأساس نظفنا, ولا اشي بس فرشناها و مشحّنا الدنيا :( لكن ماما ما حكت لبابا :)

اخوي هاد في بينا كتير مغامرات, مثلا مرّه و هو رايح عالمدرسة وانا كنت مريضه وبالبيت ومعطله, كان بالشارع وانا واقفه عالدرج قدام البيت, قرر الاخ يحكيلي باي, ناداني ما سمعته فكيف بدو يخليني انتبه؟؟؟ رمى علي حجر :) واجا بنص راسي و طبشني , وفي مرة كان حاملني على كتافه و بمشي فيي بالبيت, فجأه انتبه ان الرباط مفكوك, طمّل يربطه وانا اجيت طب على وجهي :), ومره كان بدو يعلمني كيف اصير اطلع عالخزانه زيهم و انط عالتخت :) رفعني و يا دوب مسكت طرف الخزانه تركني, سحلت, ايد باب الخزانه زي الخطاف من الاطراف, ولا شي بس علقّت فيه و ايد الباب دخلت في بطني, واجت ماما لقتني معلّقه عأيد الباب, منظر بهز البدن, بس الحمد لله سليمه, كلهم اسبوع زمن ولا كأنه صار اشي و نرجع لمغامرات جديده, واحلى شي انه ما في فساد بينا, مين عملك هيك؟؟؟ الجواب دايما واحد, وقعت عالتخت :)

20 التعليقات :

ذكريات الطفولة أمر كثير راااائع
شكراً على التدوينة لانها بالفعل احيت شغلات كثيرة في داخلي

 

حمدالله على سلامه فروحه وعبود :)

ههه يا الله كانك بتحكيى عن طفولتي هديك الايام كانت كتير حلوه :)

كنا نلعب قال ايش سباحه على الدرج بعدين نركب السفينه وكانت عباره عن مخدات والسمك ورق نرسم عليها سمكه وانلونها طبعن نقعد قبليها بيوم نرسم سمك والوان بكل البيت وعلى الارض والسجاد وخديلك على البهدله هههه ياااااه زمان لزيز :)

ههههه همسه اسفه بس مش عارفه ليش عن جد فطست من الضحك على اخوكي لمن قرر يحكيلك باي فراح خبطك بنص راسك ولا لمن كان شايلك على ضهرو وانتي رحتي طب على وجهك هههه ياما صارت مواقف معي من هالنوع والاسواء كان اني حلقت شعري صلعه :D
عن جد بضحك المواقف هادي لمن الواحد يتزكرها..الله يحفظكوا يا رب وضلو على طول متجمعين

جبتيلي الهام اني اكتب عن ايام زمان ;)

 

ههههههههههه يا باي ما أحلى مغامرات زمان..

غحنا هيك برضو بس ييجو خواتي من السفر لازم كل ليله نعمل "قصص ما قبل النوم" بنسترجع فيها زكرياتنا :)

أنا شاطره بحساب الوفت.. يعني لمل كانو أهلي يطلعو كنت أحسب الوقت وأحكي لخواتي تراهم حيكونو بضار على الساعه (..)
وفعلآ ييجو عالوقت إلي حسبتو..

إحنا كنا نلعب صياد سمك.. وكنا برضو إنط عالكنب ههههه شكلو الكل كان يعملها هاي :)

مره كنا عند خالتي زياره.. كنا أنا وأخوي وإبن خالتي بنط عالكنب رحت أنا مش عارفه ليش دفشت إبن خالتي أجا راسو بحفة الطاوله فتحتلو إياه.. وأخدو عالمستشفى قطبولو جبينو..
هادا غير عن المره إلي كسرت فيها أصبع أخوي

هههههههه جد أيام

آه يييي نسيت أقلك حمدلله على سلامة أخوكي ومرتو والكتاكيت الصغار.. إنبسطي معهم قدما تقدري :)

 

يا وردييييي شو كاينه شقيه!!!خوفتيني اطلع من البيت واترك الاولاد من انهم يكونوا بيعملوا هيك وانا مش موجوده....لازم اصير اعمل كبسيات مفاجئه....ومع هيك....احلى ذكريات ل وي وي الشقيه
يسعد صباحك

 

كنت رح انزل شي زي زكرات الطفوله تاعتي
:happy:

اهم شي,, إني كسرت منخار 2 من خواتي
و صار في خلع بالكتف لوحده منهم
هاد غير الغرز الفراطه,,

 

عن جد بحسدك يا ويسبر على هادي الذكريات الحلوه مع إخوانك لأنو انا للاسف ماعشت متل هادي المغامرات لأنو الفرق بالعمر بيني وبين اخواني كان كبير انا دفعت ضريبة اني اصغر واحد في اخواني واخواتي والفرق بيني وبين أقرب واحد منهم إلي 11 سنه

فعشان هيك كان طفولتي وحيده في البيت وماعشت متل هالذكريات الحلوه والمغامرات التدميرية :)

نهارك سعيد

 

ههههههههه احلى شي معلقة على الباب
ضحكتيني
حلوة الذكريات القديمة و مش عارفة ليش كنا بنعمل هيك
عن جد صغار

 

مساء الخير أم السوس
ولو حكيتي أكتر من هيك عن شقاوتك ما بستغرب، مبين ماشاء الله :)
على فكرة أنا كتير بحب لما مدون بحكي عن ذكرياته، احلى شي في العالم الذكريات
ذكرتين بأغنية حليب النيدو
ذكريات أيام سعيدة
:)

ان شاء الله راح اكتب عن ذكرياتي يوم
بس مش هلاء لما أنشهر ، هههههههههه
شكرا ويسبر على إدراجاتك الحلوة دائما

 

Mohammed Ali

اهلا و سهلا فيك محمد بالمدونه, هاد اول تعليق الك هون :)

العفو...اكيد ذكريات حلوة رجعت, فترة الطفوله هي احلى فترات حياتنا

Jarat

صباح ومسا الورد يا قمر :)

الله يسلمك يا رب...فرووحه اللي اجت عبود من غير شر ما اجا ...عبود هلأ ببلغاريا :)

المكل كان يلعب سباحه وبحر و سمك شكله :)
زمان بجنن كان الحمد لله ...مع البهادل بس برضو بجنن

شفتي بالله, بس الهدف كان نبيل جدا يا حرام, بتزكر تبهدل يومها المسكين
تسلمي يا رب و يخليلك اهلك واحباب يا رب

يلاا بنستنى البوست اذا :)

 

Rula

كانت ايام بتجنن بصراحه
لا هم ولا تفكير ولا اشي....لعب وتدمير بس :)
ههههههههه يعني كنتي تحسبيها صح بس يتسهلو اهلك مشوار :)
احنا كنّا نراقب و نحسب ومش دايما تزبط كمان


يا حرام هاد دمار دمار وتكسير و قطب, لا انا و اخوي اللي اكبر مني اللي كنّا نتأذى :$
الله يسلمك يا رب, فروحه اللي اجت و هينا مبسوطين عالاخر الحمد لله :)

Nissan

ههههههه لا حرام عليكي, انا كنت قصيرة كتير وانا صغيرة و نحيفه و شكلي شكل بنوته ناعمه و رقيقه, هيك كل العيله بتحكي ...بس انا لفترة كنت العب بس العاب اولاد بحكم ان ما عندي غير اخوان, لكن ماما انتبهتلي قبل فوات الاوان و رجعت بنوته نعومه, لكن عند الجد...الله لا يورجيكي ههههههههههههه

الكل بعمل هيك شو بدك تعملي,الله يعنك و تأكدي ان كتير اشياء ما بتعرفيها, هلأ بنقعد مع بابا وماما بنعترف باشياء ويا حرام بنصدمو :)

 

Um Omar

طيب يلاا هينا بنستنا ومتأكده انه حيكون بوست بجنن :)

هههههههههههههههههههه مدمره كاينه...كسور و خلع و غرز :)

بالعاده كنت انا اللي انصاب ...انا واخوي اللي اكبر مني و هو بزياده بصراحه, ما يتحركش فيه اخوي الكبير الا هو واقع كسر او غرز زي ما حكيتي
شوقتينا للبوست كتير...لا تطولي علينا :)

شرف

اسفة كتير اشرف, لان هديك الايام كانت بتجنن
انا اخوي الصغير اصغر مني ب 9 سنين و النا كتير زكريات احنا واياه و ومواقف , بحبش منيح بذاكرتك الا ما تلاقي ذكرى هون او هون :)

 

Jafra

هو اشي بضحك هلأ بس بوقتها كان فيلم رعب :)

المهم اني رسمت ولو ضحكه صغيره عوجوه الكل زي ما ضحكنا واحنا بنتزكر انا واخوي امبارح :)


نادر

مساء النور نادر
ملغومه هاي "مابستغرب " بس بصراحه كنت شقيه كتير ليش الحكي :)

يا ريت تحكيلنا عن ذكرياتك, اكيد حتكون فيها احداث مميزة زي ما عودتنا عالتميز بكل شي بتكتبه
وانت صرت مشهور كتير, عالقليله في بيتنا :) انا تقريبا قرأت معظم بوستات مدونتك الاسبوعيه عالعيله و الكل بحب طريقتك بالكتابه

شكرا لوجودكم جميعا و تشجيعي :)

 

لسة اليوم انا و اختي عم نتذكر بقصصنا الهبلة زمان

عن جد مافي احلى من الذكريات
بتقولي معقول كنا هيك نعمل زمان؟؟

المهم ... مافهمت شو قصدك بالسجالون؟؟!! قصدك قاطع او صوفاية؟؟؟

 

صيد السمك حتى انا واخواني واخواتي كنا نعملها
بس انتم عملتوا العجايب باللبنه هههههههه << اتخيل المكان والجدران وامك مسكينه مصدومه من اللي شافت هههههههههه
والحجر على راسك هههههههههه بجد موقف لا يحسد عليه
حلوه ذكرياتك جنان الله يسعدك

ملاحظة : ايش عجال ؟؟>>اسمحي لي مافهمت الكلمه ممكن احنا نسميها اسم ثاني

 

Ahmad Al-Mahrouq

سبحان الله ...يعني كلنا النا قصص غريبه ودمار بطفولتنا :)

اه الصوفايه :)

White Freedom

يعني حتى بالخليج بتنلعب...ما كنت اعرف انها عالميه فكرت بس احنا اللي بنلعبها :)

ههههههههه والله كان يوم, الله يعينها ماما علينا دمرنالها البيت

تسلمي يا رب, ذكريات الطفوله هي اللي بتخلينا نستمر مرات :)

عجال...الاطارات, اطارات السيارات الالعاب كنّا نشيلهم ونربطهم بخيطان و نعملهم زي نظارات :)

 

السلام عليكم و رحمة الله
اول شي الحمد لله على سلامة أخوك و عيلته و بالاخص آنسة المجتمع الاولى فرح

ثاني شي الف الف مبروك العفش الجديد
"عفش المدونة"
هيك لازم يكون بيت العيلة
على اعتبار انه مدونتك هي بيت عائلة المدونين
الف الف مبروك و يا رب كل ايامك مزهرة متل المدونة

أمل أدخلت عدة كلمات على قاموسها اللغوي

فبعد تشا تشا بش بش تر تر تر باباااا
تمكنت و لله الحمد من قول الكلمات الاتية
الله - لفظ الجلالة-
بيبي - بمعنى حبيبي-
"ييييييي" - كلمة تقال عن انفلات الامور -
هاتيييييا - بمعني ناولني-
نوش نوش -بمعنى نص شيكل و يستخدم عند الاطفال لشراء السكاكر-
و الكثير الكثر من الكلمات التي قضت مضاجع الصهاينة و أرقت ليلهم و جعلتهم في اجتماع طارئ و دائم حتى الساعة
الى هنا

دمت بألف خير ويسبر

 

وعليكم السلام ورحمه الله وبركاته
الله يسلمك يا رب
شكرا عالكلام الحلو وان شاء الله يكون عجبك النيو لوك :)

حبيبتي ما شاء الله عليها,الله يخليلك اياها ويخليك الها
شاطره حبيبتي متعلمه الكلمات المفيده :)
عقبال ما تكبر وتصير النص شيكل فراطه بالنسبه الها

 

ذكريااااااااااااااااااات

:))
من أجمل موروثاتنا الحياتيّة ، جد
الذكريات

 

Haitham

ذكريات الماضي اللي بتخللي الضحكه على وجوهنا و بتخلينا نستمر :)