Things I Like To Whisper About

Would You Hear Me Whispering

قصة راس الخروف



الموضوع اللي كتبه نادر في اسبوعياته لهاد الاسبوع في الاسبوع الثالث والعشرون, والموضوع اللي كتب عنه Harege زكروني بهالقصه اللي حكتلي اياها ماما

ما بعرف شو خطر عبال بابا واجا بنفسه ياكل راس خروف, سأل ماما لو جبتلك بتعرفي ويلا احكي لامي -تيتا الله يرحمها كانت ساكنه معنا بالبيت - حكتله لأ جيبه وبجرب وشو وراي, انا وقتها كان عمري اشهر, وبابا ما كزب خبر وجاب لماما راس, بتحكي ماما انها عملت زي ما كانت تشوف تيتا والدتها الله يرحمه بتعمل, وبتحكي كنت اشوفهم بفتحو تم الخروف مش عارفه ليش, مسكت ماما فكين الخروف وشد يللي بتشد وطبعا ما صار اشي غير ان سن الخروف غز باصبع ماما :( و اجت تيتا عليها وهي بهالمرحله, وحكتلها اساعدك طبعا ماما وافقت وطلعو بشقو الاطراف قبل ما يفتحو التم, وتيتا ما شاء الله خبره , بحركه وحده زبطت كل شي, وعالاكل بتحكي ماما شغل نهار كامل, يا دوب اكلنا كم لقمه وانصدمنا من الاكل لانها تقيله الاكله, اكلو الفته و تركو الراس زي ما هو.

بالليل محل ما غز السن طلع زي حبه غريبه, راحت ماما عالدكتور تاني يوم و حكالها هاي بدها تنشال بالليزر وكل شي بكون تمام, و عمللها اياها وروحت عالبيت, بالليل طلعو يسهرو عالسطوح - يا الله شو بحب سهرات السطوح, الله يسهل على هديك الايام - المهم بتحكي ماما انو بدو ايديها يحكوها كتير, وهي بالعتمه تحك و تفكر ان في قارص بالجو, نزلت عالبيت و انصدمت من شكل ايديها, كلهم حب زي جدري المي, كان يوم جمعه و الدنيا ليل, بابا اخدها عالمستشفى, الدكتور -مش متزكره اسمه مع ان ماما حكتلي اياه - اول ما شافها بحكيلها هاد من سن خروف صح؟؟؟ حكتله اه, جاب كتب و قعد يقرأ نص ساعه وبعدين لم دكاترة المستشفى وفرجاهم ايدين ماما وسألهم عن التشخيص, اشي يحكي جدري مي, اشي يحكي حصبه, حكالهم هاي جرثومه من سن الخروف , كل مليون خروف في واحد بحمل هالجرثومه, شوفو سبحان الله هالواحد جبناه عنا عالبيت :$

المهم اعطا ماما 14 علبه دهون و مضاد حيوي و حكالها هالشي بروح بعد 4 اسابيع بالزبط و ضلك ادهني من هالدهون وما توقفي ليخلصو ال 14 يوم, وما تحكي ايديكي بالمره لانه لو وحده من هالحب انقشر راح يعدي كل جسمك :$ ,بتحكيلنا ماما ان اول 3 ايام كانو اصعب شي, بالنهار ماشي بس بالليل المشكله, يدهنلها بابا ايديها بالدهون و يلفهم بقماشه, نص ساعه يروح تأثير الدهون وتبدا ماما تحك وهي نايمه, بس تتحرك يصحى بابا عليها, يصحيها و يفك القماش ويدهنهم كمان مره و يلفهم وهيك طول الليل, حبيبي بابا الله يسعده يا رب, و اجت عمتي نامت عنا علشان البيبي اللي هو انا :)

و بعد 4 اسابيع اختفى كل شي الحمد لله, ومن يومها ما دخلو هالاشياءات على بيتنا الا واخوي الصغير بصف تاني طلب الاخ رجلين خاروف, و بابا ما صدق جابهم و طبختهم ماما, يا باااااااااااااايه عمري ما بنسى الريحه :( المهم ما في غير بابا واخوي اللي بدهم ياكلو, اخوي بس شافهم صفن صفن و بعدين بسأل ماما " ماما هدول الاجرين من ورا ويلا من قدام؟؟" حكتله ماما ليش بتسأل, " اذا من قدام بكونو نظاف بس اذا من ورا بكونو اللي بيجي عليهم الاوساخ" ضحكنا و حكتله ماما لا هدول كلهم الرجلين من قدام هيك بابا جابهم, صفن صفن و بعدين حكالها " طيب خبيلي اياهم بعدين باكلهم" و اتوزعو تاني يوم على اصحاب النصيب :)


وتوتا توتا خلصت الحدوته :)



23 التعليقات :

I read ras alkharof o ba6alt ajame3
did not continue the post

i need ras kharof now

alla ysam7ik ya whisper

 

وااااااااااااااو
كل هادا من سن خروف يعني اللي بدو ياكل راس لازم يعمل للخروف فحص
نشكر الله ما حدا عنا بحب هالاشياء ابدا


و الله يخليلك اياهم يا رب

 

زكرتيني باللذي مضى يا ويسبر
انا عمري ما اكلت رجلين او راس لكن امي طباخه وفي يوم وانا حامل بلولو كنت لسه في الاردن امي راحت شرت رجلين لاني كنت مغلبها ما باكل بالمره وعملت شوربه منهم وطبعا المفروض اني اشربها طبعا شربتها بعد ميت حيله والله لا يوريكي الله سلط علي النوم من كثر ما الاكله ثقيله ونمت من الظهر لحد المغرب :)

 

مرحبا ويسبر

عن جد الاختراعات العربية في الأكل غريبة وعجيبة أنا عني شخصيا لم ولن أتذوق رأس الخاروف وماعنديش استعداد إني أخوض متل هيك تجربة وبصراحه مابعرف شو هي المتعة أو الفائدة اللي بلاقوها الناس من تناول راس الخاروف أو امعائه علما أنو من خلال القصة اللي ذكرتيها وتعرض والدتك الله يخليلك ياها لحادثة السن المجرثم أكبر دليل على عدم صحية هالنوع من المأكولات

أنا بنصحك تخبري والدتك إنها ماتعيد متل هيك تجربه وإذا أخوك ووالدك حابين ياكلو هيك أكله يروحو على مطعم اسمو أبو موسى في وسط البلد بلاقو فيه طلبهم وزياده :)

 

ألف سلامه على ماميتك.. سبحان الله كيف النصيب وطلعلكم الخروف هدام.. منيح إلي مرقت على خير..
الله يرحمها ستك.. أنا بحب أقضي وقت مع الناس الكبار.. حكيمين وقصصهم حلوه :)
أخوكي ما شاء الله عليه نهفه :)
أنا ما بحب اللحمه.. دائما بفضل الجاج..

 

أول شي ...الحمدلله ع سلامة امك

تاني شغلة ... انا ما حبيت هالبوست
لآنه في لحمة
بكره اللحوم بأنواعها

من وانا وصغير
ولهلق ما بقدر آكلها
انا الوحيد اللي هيك .. ومافي حدا بالعيلة متلي


ازكى اشي بالدنيا ساندويش الجبنة

 

مساء الخير ويسبر
أول شيء كعادتك روعة في كل ما تكتبي
ثاني شيء، من أجمل طباعك الترويج للمدويني على صفحات مدونتك، واليوم كنت أنا صاحب النصيب
سلامة الوالدة وما تشوفوا شر
سبحان الله الواحد من مليون كان في بيتكم، والله حظ بفلق الصخر :)، رأس الخروف أكلة تقيلة جدا جدا
يمكن أنا أكلت عشرين رأس بحياتي
بس هلاء صارلي أكتر من 8 سنين ما أكلتوا
بالنبسة لأخوكي وتسأوله البريء
طمني تاني مرة وقوليلو عادي، أغلب الخرفان صاروا يعملوا "بدي كير" يعني الرجلين نضاف
عارفة ويسبر لو أبوي هلاء قراء البوست
عالسريع بروح بجيب راس خروف وبطبخو بكرة، خلي ناسي أحسسسسسسسسسسن

 

مساء الخير ويسبر
شو هالورطه؟
يعني عشان اكله عويصه لازم البيت كلو يتكركب وتصير ريحة البيت زي المسلخ وتمرض الماما وليش؟
بلاها وما بدي يقولوا عني معدله
الله سلمها للوالده وربي يحفظها ويعطيها الصحه هي والوالد
بدي احكي مش قادره اسكت

كل العالم بتاكل عشان تعيش و نحنا العرب بنعيش عشان ناكل
يسعد مساكي...

 

Shaheen

LOOL

If you have completed reading the post, you would surely lose your appetite.....I think :S

Jafra

شفتي بالله, ومش فاهمه شو الزاكي بالموضوع :(

هههههه فكرة برضه, يجيبو خلو امراض للخروف و بالمره حسن سير وسلوك, بركي كان صايع و ماشي ورا نعجات الجيران :)

احنا الحمد لله بطلنا نجيبه, بس الكل بحبه فللتهديد قائم لسا :$

امين يا رب..ويخليلك اهلك واحبابك

 

انا غرامي الفته هاي اكلتي المفضله ما باكل الراس باكل رجلين الخروف بس من
قدام هههخ
:D
بتعرفي بحس انو جيل اليوم ما بيعرف يعمل هادي الاكلات يعني شبه انقرضه
انا طباخه شاطره وبموت باكلت الفته بس لو يعطوني دهب الدنيا كلها ما بعمل فته بحس انو ما حتظبط وما حتطلع زاكيه زي تبعت ماما

الحمدالله الي الله حفظها لخالتو :)

 

Sozan

صحه وهنا يا رب
خالتي اللي كانت مقيمه بكندا اجت زارتنا و تيتا عملتلها لانه بتحبهم, بعد ما اكلت بساعتين ودوها المستشفى يا حرام, كتير تقيل على معدتها وخصوصا انها مش متعوده

الحمد لله اللي بس التأثير كان نوم :)


أشرف محيي الدين

المشكله ان في ناس بحبوها لهالاكلات و جديد في محلات خصوصي لبيعهم :)

انا برضه كل هالاشياء ما بحبهاو ما باكلها...و ان شاء الله اهلي ما يفكرو يجيبوها بالمره :$

 

Rula A.

الله يسلمك يا رب....الحمد لله
احلى الاوقات كنا نقضيها مع تيتا الله يرحمها, و هلأ كتير بنتزكرها و بنتمنى لو انها معنا...الله يرحمهم كلهم

انا بفضل الجاج, بس باكل اللحمه

Ahmad Al-Mahrouq

الله يسلمك يا رب :)

في كتير ناس ما بحبو اللحمه وما باكلوها, بس يلا عالقليله في تعويض جاج و السمك للي بحبوه :)

هههههههه معك حق, انا بحب الجبنه و بفضلها عن اللحمه والجاج :)

 

نادر احمد

مساء النور نادر :)

تسلم يا رب ...هاد بس من ذوقك :)

انا المدونات اللي بحب اتابعها و بحس ان الكل لازم يعرفو عنها و يستمتعو بقرأتها زي ما انا جد بستمتع بقراتها هي اللي بذكرها :)

لازم اكتب بوست خاص عن هالمدونات لاني ما ذكرتهم كلهم :)

الله يسلمك يا رب :)
شفت بالله, حبيبتي ماما و اجا من نصيبها :(

صحتين صحتين...وهاد خلال اشي وعشرين سنه...ما شاء الله

لا بصراحه ما بدنا عمو ياكل منه...كتير تقيل عليهم, الله يسلمهم ويخليلنا اياهم

Nissan

يا مسا الفل

بالزبط..هي ورطه :$
الله يسلمك يا رب و يخليلك اهلك واحبابك يا رب :)

هههههه هاي كلمة ماما :)
كل العالم بتاكل علشان تعيش الا احنا بنعيش علشان ناكل :)

الله يسعد كل اوقاتك :)

 

Rand

Sorry :$

W Ameeeeeeeeeeeen :)

Jarat


بتحبيهاااا!!!!!!!!!!
يمكن انتي الوحيده من الجيل الجديد اللي بحب هيك اشي :)

صحه وهنا يا رب
لا ليش تعمليها..هلأ صار في محلات خصوصي لهالشغلات و في ديليفري كمان :)

الله يسلمك يا قمر :)

 

جديده قصة سن الخروف. اول مره بسمع انو ممكن يعمل هيك؟ أنا شفت انو سؤال اخوك منطقي مع انو يمكن كانت حجه منه عشان ما ياكل :)ـ البوست كثير مسلي كان.ـ

 

Jaraad

الموضوع جديد عالكل كان وحتى عدكاترة المستشفى :)

هاي هي..ما بدو ياكل بس استحى بعد كل هالعذاب و التحضير يحكي ما بدي, و هلأ عمره 24 و بس ينحط بنفس الموقف بحكي ...خبولي اياها لبعدين :)

 

Wow alhamdulilah it wasn't nothing worse. I have never heard of that bacteria like that my grandma used to cook that often.

 

حلوة صورة الخروف اللي حاطتيها... فاااااااااايع من الآخر :p
أنا ما بحب أكل راس الخروف ولا ايديه ولا اجريه ولا مصارينو، و ما بستحمل أشوف حد بوكلهم كمان :S نفسي بتزوف بسرعة
و بصراحة قعدت اتخيل امك و هي تفتح تم الخروف... فيلم رعب بالنسبة الي :p
عالعموم الحمد لله عسلامتها :)

 

مساء الخير وي وي

انا الصراحة قشعر بدني بس قرأتو!! كللل هااااااااااد من سن خروف!! ول! شو كاين ماكل هاد؟ ههههههههههه

 

مش قصه الصراحه!!

بس ما عرفت موقفك هلأ انتي من ربع الروس والكروش وخلافو ولا مالك في هالطبخه كلها؟ :)

يلا اعترفي:)

 

My Getway

Al7amdolellah 4 weeks and every thing vanished

I don't remember if its a kind of germs or bacterias, but it was new for every one even the doctors :)

Mrs H

هههههههه صح!!...انا طنت بدور على سنان خروف بس هاي حبيتها اكتر :)

يا الله انا بس اتزكر الريحه بصير بدي ادوخ :$
هههههههههه هو في منو وخصوصا انها شدت لدرجه ان السن جرحها :(

الله يسلم قلبك يا رب

 

Nartat

يا صباح ومسا الورد عالورد :)
كيفك يا قمر؟؟

هههههه اشي بقشعر البدن بيني وبينك....هههههههه صحيح والله من وين اجاه...لازم اعرف كيف الخروف بنصاب :$

مياسي

حدث في منزلنا :)

انا موقفي شمالي غربي....ما بحب هالاشياء كلها, ولا المعاليق اللي ماما بتقعد من الصبح تجهز و تطبخ اشي اشي منه :$

بحب اللحمه, بس لما تكون من خاروف كامل قدامي,وخصوصا بس يكون قبل شوي اندبح... ما بحبها بحس طعمها خروف :$