Things I Like To Whisper About

Would You Hear Me Whispering

ليش بتصرّخ



يا الله شو بكره الصوت العالي واللي بصرخو.
وهالفتره كل اللي حوالي صايرين يصرخو, ان بحكو تلفون بصرخو وكل العالم بتسمع المكالمه, هالشي كنا نسمعه بالمكالمات الخارجيه وخصوصا من كبار السن, مساكين من الاشتياق والفرحه بفكرو انهم لازم يصرخو لان اللي بحكي معهم بحكي من برّه, بابا حبيبي لهلأ بنعرف ان واحد من خواني اللي بحكي من صوت ال "اهلاااااا" اللي بتهز البيت, مع انهم بحكو معنا اكتر من مره بالاسبوع :) , هلأ بتكون ماشي بالشارع او حتى واقفين عالاشارة, بتسمع المكالمة كامله من السيارة اللي جنبك.


غير اللي طبيعتهم بصرخو وهمه بحكو, المراسل اللي عنّا لازم كل فتره وفتره يسمع موشّح من حد بالقسم عن صوتو العالي, بكون بالممر و بصرخ باعلى صوتو بنادي حد فينا علشان يسألنا اذا بدنا شي, وبكون عنّا مراجعين او بنحكي تلفون, فضيحه بصراحه , بحكيلو دايما انا مش مضطره اسمع صدى اسمي بالممرات علشان ما بدك تغلب حالك تمشي خطوتين, بهدى يوم يومين, وبعدين برجع

غير المراجعين اللي بفكرو ان بالصوت انا حخاف و امشّي اللي بدهم اياها, ما بعرفو انهم لو حكو شوي شوي حتوصل فكرتهم اسرع و واوضح, وان مش كل العالم بتمشي بالصوت

غير السيارات اللي بس ماشيه بتزمر بداعي و بدون داعي, وسيارات الخضره اللي بنتحل قلبه للشريط وهو بنعاد خمسين الف مرّه, و مأساه اذا حد قرر يشتري, بستمر الموشح نص ساعه " يلا يا بطيخ ...يلا يا بقدونس...يلا دب دب داااه....يلا ياااا......كلّه عالسيارااااااه" طبعا مش كلّه واضح و مرات بنقعد انا وصاحباتي نتحزر شو الكلمه اللي انحكت علشان نتسلى :)
و سيارات الغاز, والسيارات اللي حاطه زوامير زي زامور الشرطه اللي مش فاهمه ايش الحلو فيها, انه العالم بخافو من الصوت و ببعدو عن المسرب لانهم بفكروه لشرطه...مثلا!!!

بالشارع الدنيا صيفّت وبدو الاطافيل يطلعو عالشوارع " شوووط ولك شوووط " " مررها ..هيني فاضي" مش ضروري انّام احنا لأ

والعالم المنطربه بالشارع و بالبيوت, اصوات موسيقى و اغاني الكل محتفل ما شاء الله, المشكله يا ريت همه شخصيا مبسوطين, معللي المسجل عالاخر و مش عارفه مين بغني او بتغني, والسائق مكشر!!! طيب ازعجتنا و ازعجتنا عالقليله انت تكون مبسوط

حتى بالراديو الكل بصرخ... المذيعين بصرخو - المذيعات لأ بكونو اخر نغاشه على هالصبح :$ - الدعايات بصرخو...طيب ليش يا جماعه ؟؟؟ في دعايه لفرشه مش عارفه شو بتيجي عالراديو, انو انهيارات وانقاض .... الزلمه بصرّخ, طيب ليش؟؟؟ ليش بتصرّخ؟؟؟

ّ

20 التعليقات :

Hehehehe, betesh5ot fiyya leeeeeh?

 

نسيتي هاد اللي بلف بالسيارة و بحكي "اللي عندو أبصر شو أبصر شو للبيييييييييييييييييييييييييع"
هاد اللي نفسي أفهم مرة شو بدو :S
أنا متلك، ما بحب الصوت العالي، و اذا قعدت مع حدا بحكي بصوت عالي، ما بيجي اخر الزيارة ولا راسي أد الغرفة من الصداع...

 

مهو الصياح أسهل :)
و بفش الغل
:]

 

فعلا يا ويسبر
الناس كلها بتفيع في بعض عالفاضي والمليان
لو تكون تحكي معو زي الناس فجأة بسلخك "موشح " على قولتك
حتى اخوي الصغير, لو احكي معو كلمتين هيك بقوم بدو ياكلني
مش عارف يعني
حتى الصغار صار عندهم هموم يفكروا فيها ؟ و من بدهم ياكلوا و يشربوا ولا شو ؟
على فكرة خطر في بالي, فكرك في رابط بين الفياعة تاعت هالأيام و انه واحد "يفيع" فيك ؟
ولا بس تشابه أسماء ؟ :P

 

Rand

LOOOL belzabt...2esh fee O_o el kul mesh 6aye2 eltanee

Mr H

اه صح...هاد التاني, ما بفهم غير" قديمه للبيييييييييييييييع" :)

جد بوجعو الراس, وانا من الناس اذا بعلى صوتي بصير رفيع و حاد اشي من الاخر, علشان هيك ما بعلي صوتي بالمره :)

 

Haitham هيثم Al-Sheeshany الشيشاني

انتو اللي بتشتغلو بحقل التعليم بطلعلكم كل شي
الله يعينكم

اي نعم بفش الغل مرات, بس ما بزبط مع الكل :$

مرات كتير نظره بتحكي كل شي و بتفش الغل كمان :)

Sh3rawi

العالم مش طايقه بعضها, الصغار والكبار

جد الصغار الله يعينهم بتحسهم مرات صافنين وبفكرو, عايامنا كان اكبر هم انّا حلقه ساندي بل راحت علينا اليوم :$

اعتقد انه في قرابه بينهم...اولاد عم يمكن :)

التنين بتلاقي اصحابهم- الفيعه و الفياعه- شعرهم منكوش وبدهم يطلعو من هدومهم زي ما بحكو :)

 

أن أكتر اشي بكرهو لما يكون حد بالسياره نازل يزمر عشان حد من أهل البيت يفتحلو باب الكراج!! طب ماتهز خصرك وتنزل تفتحو إنت؟
أو بكون واقف ونازل تزمير عشان يحكي للي جوا البيت اني هاي أنا اجيت يلى اطلع .. إذا بدو يروح معاه مشوار.. وهداك أصلاً مابكون سامع.. الجيران بكونو كمان شوي همه إلي حيروحو المشوار..

أنا من الناس إلي بحب أسمع وأنا سايقه بصوت عالي.. مش عشاني طرشه.. بس عشان مره صار معي موقف من يومها مابسوق إلا والصوت عالي.. مره كنت رياحه على الشغل الصبح بكير.. نازله النزله إلي عند بيتنا.. وأنا بنص النزله الا واحد طلع من كراج بيته من دون مايطلع وصار بنص النزله.. كنت راح أخبطو.. فضربت بريك قوي وسحبت الهاند.. طلعت ريحه كتير بشعه من ضربة البريك.. قلت منيح إلي كنت منطربه ومعليه المسجل ولا كان الصوت خوفني كتير.. فمن يومها وأنا ديماً بسوق وصوت المسج عالعالي..

أما ولاد الجيران فأنا عاملالهم فيلم رعب.. بس يشوفوني طلعت بوقفو اللعب وبوقفو على جنب الرصيف..

التلفزيون الحمدلله ما بتفرج عليه.. والراديو أنا من جماعة انيرجي :)

 

Rula A.

يا الله شو بكرهم اللي بزمرو

زكرتيني مرة بابا العصر اجا واحد وصار يزمر لحد من الجيران, طل بابا من الشباك وحكاله, خير بدك مني اشي, طبعا الشب مش فاهم بحكي لبابا لأ انا بدي فلان من العمارة اللي قبالنا, حكاله بابا بس اللي صار انك صحيتني انا من النوم و انا اللي طليت عليك وانا اللي انزعجت وانا اللي سمعتك , فأكيد بدك اياني
الشب انحرج و اعتذر ونزل دق عبيت الجيران :)

سلامه قلبك من الحوادث وضربات البريك على غفله, الله ستر وان شاء الله دايما بستر

الصوت العالي انا عكسك, انا بحب اسمع كل شي حوالي, حتى بالشتا بحب افتح الشباك :)

 

ذكرتيني بالأصوات المزعجه. ما بعرف شلون الوضع بعمان بس بتذكر باربد التعاليل اللي كانت تظل ثلاث ايام. المشكله انه تكون بمساحه وحاره ضيقه جدا ويجيبوا سماعات بتكفي تسمع جمهور ملعب كره قدم. طبعا كلو كوم والصوت النشاذ تبع سيارات الغاز والخضار والمش عارف ايش. الناس في المدينه هون ما بزمروا نهائيا ابدا مطلقا.ـ الصوت العالي واحده من الاشياء التي لا اشتاق اليها ابدا

 

مرحبا ويسبرررررررررر
سامعتنننننننيييييييي
أنا عم بصرخخخخخخخخخخخخخخ
أنا حررررررررررررررررر
ما لا قيت حدى يردعنييييييييييي
ما هي حارة كل مين ايدو الوووووووووو
وكل واحد مفكر الشارع شاااااارع ابووووووووووو
سلا ااااااام
عم بقلك سلاااااااام
مش سامعة
سلااااااااااااام

 

Jaraad

بعمان الغربيه ما في هيك, بس بعمان الشرقيه نفس الشي بعملو, بتزكر بعرس ابن عمتي سكرو الشارع 3 ايام, وبابا يقنع فيهم انو غلط اللي بتعملوه و همه ولا الهم دخل :$ بس هاد لا يمنع انّا رحنا عالتعليله :)

اذا هالمره البوست تحت عنوان
What not to miss in Jordan :)

نادر

الخط مش واضح... مش سامعه منيح :)


بعدين اي نعم انا حكيت اللي بشتغلو بالتعليم بطلعلهم يصرخو, لكن انك تعطي خمس علامات و تخصم علامات هاد ما بعني انك صرت بمجال التعليم :)

لكن...هالمره مسموح تصرخ, الله يسهل عليك يا "س" صرخ ..صرخ :)

الله يسلمااااااااااااك :)

 

هههههههههه والله على راسي عمو.. حبيتو.. منيح إلي إستحى هداك.. ولا بالعاده مالهمش عالحيا..
يسلم عمرك يا رب.. أنا مره جربت أفتح الشباك بالشتاء والنتيجه كانت إنو إنرشيت رشه معتبره من سيارات السايد التاني..
أنا حاسه إنو الحكي إلي بموضوع نادر والخمس علامات هههه..

 

Rula A.

تسلمي يا قمر...بده بصراحه و خاوا بدو يستحي, ما بتعرفي بابا بس ينوي بجيب اخرته للشب :)

اه بتصير علشان هيك بفتح الشباك عالجهه التانيه :)

لا الحكي لنادر...ياما علقت اول شي و عمره ما اعطاني علامات زياده, وهلأ صار يوزع علامات

بتحسينا بصف تاني ب صح
ههههههههه

 

لا أنا شعبه ج. تعت المشاغبين ههههههه

 

هههههههههه
لا انا ب اللي بحاولو يشاغبو من وقت لوقت :)

 

انا ما الي احكي
اسمي بصرخ كتير ما شالله علي

بس بتقدري تفسريلي اسمعي راجعه من لبنان قريب جدا

ليش ما صرخا هناك ولا مره؟!

 

ضحكتيني ضروري تنامي يعني:)
طيب تعالي هون والله يا ويسبر انه لما تمر سيارة حاطه اغنيه وهاي مش مبالغه انه بترج الارض وبتحسي بطبلة ذانك بترج
بس الحمدلله عدى عن هيك فشي صوت عالي غير في المدارس لما الاولاد ييجو يحكولك Good morning

 

مياسي

انتي اشتغلتي بمجال التدريس قبرضه مسموحلك :)

لبنان اهل الروقان, ليش بدك تصرخي
انا لو اروح هناك لو احكي عادي ببين بصرخ بينهم :)

بعدين هاي خيانه اسمها....بدنا صور وقصص وتفاصيل :)

Sozan

ان شاء الله دايما الابتسامه ما تفارقك :)

اه الله يعينكم عالسستم هاد, عالم منطربه

ههههههههههه هاد زي عنّا, جنب الشغل في مدرسه بنات, كل بدايه حصّه لازم نسمع موشح رد السلام عالمعلمه :)

 

مدامنا حنكون بنفس الشعبه انا ورولا فانا موافقه :)

 

يااااااي انا و انتي سوا ينفس الصف طول السنه.. حنهيص :)