Things I Like To Whisper About

Would You Hear Me Whispering

25 Things About me



ما حد عملي تاغ بس بعد ما قرأت في اكتر من مدونه عن هالموضوع واخرها مدونه رند ,حبيت انا كمان اكتب :)
الموضوع انك تكتبي او تكتب 25 معلومات, هوايات, حقائق او اهداف شخصيه, وبعديها المفروض تختاري 25 شخص بتحبي يكتبو نفس الشي عن نفسهم, و انا بحس ان مش الكل بحب التاغ علشان هيك ما حسمي اي اسم, واللي بحب يعرفنا على نفسه اكتر او في شي بحب يحكيلنا اياه عن نفسه فيا ريت يكتب :)

ما حرتب افكاري حكتب اللي بخطرلي .....





  • انا بخاف اني اقطع الشارع, اذا في حد معي لازم يمسك ايدي و يقطعني , واذا كنت لحالي بضلي واقفه ليجي حد و اقطع جنبه بالعقل.
  • بس اضحك عيوني بسكرو, وكتير بسمع تعليقات اشي منيح واشي لأ, زي صاحبتي بتحكيلي انتي ما بصير حد يضحك بس تنزلي الدرج, بعدين بتوقعي...ما حبيتها هالمزحه :(
  • بحب الاكسسوارات كتير وخصوصا الخواتم الكبيره وكل ما طلعت عالمول لاااااااازم اشتري خاتم جديد, فكل لبسه الها اكسسوارها عندي.
  • بالألوان بحب اللون الازرق و الفواتح اجمالا, وبالارقام بحب رقم 8
  • لهلأ بس امشي بمكان في بلاطات كبيره بحاول ما ادعس على الخطوط بينهم, لعب مش تفاؤل و تشائم.
  • من انا صغيره وانا بتمنى يكون في الي صديق خفي زي عقلة الاصبع اخده معي وين ما رحت وما حد يشوفو.
  • وانا بسوق بحكي وبعلق كتير, ما بسب ولا بغلط بس بعلق, " بالله عليك".." منشاااان الله شد شوي"..."اه طبعا بدك تكوني بنت :)".... " يلا يا عمو يلااااااااااا"
  • بكره الحوامض وما بطيق اكلها, اذا حد اجبرني اكل كرزه خضره بقعد اكل فيها ساعه, نتفه نتفه :$ بس بحب عصير الكيوي والليمون من الربيع, جد منعش و زاكي.
  • بمشي اشياء كتيره بالحياة ما عدا الكزب, اكزب علي بتخسرني للابد, لانه تلقائي بتخسر ثقتي ومستحيل اتعامل مع حد ما بثق فيه.
  • بكره حد يحكيلي وطي صوتك, لاني بكره الصوت العالي ومستحيل اعلّي صوتي, فبحس كلمه وطي صوتك اكبر من اكبر مسبّه.




  • بعشق الاطفال وبشكل جنوني , بحبهم بكل حالاتهم وبكل اعمارهم, و فعلا زي ما بحكو ان الطفل بحس باللي بحبه, لانهم بالمقابل بحبوني.
  • بكره الحيوانات بكل انواعها, زاحف وطائر ويمشي على 2 او 4 او اكتر, ومعظمهم بخاف منهم.
  • مخصصه درج بالمكتب كله شوكلت وبسكوت وشيبس للاطفال اللي بيجو يزورونا ان كانو مع المراجعين او اولاد صاحباتي.
  • مكتبي كله العاب من كندر سيربرايز :) بحب الشوكلت و بحب الالعاب.
  • بكره ريحه الياسمين كمعطّر و بصير راسي يوجعني وممكن استفرغ منها, فممنوع تدخل البيت.
  • ما باكل الورقيات بكل انواعها واشكالها لا مطبوخ ولا ني,ما عدا الملوخيه :)
  • عاده سيئه عندي, ما بتزكر الاشي الا بس يخلص من عنّا, مثلا بكون الموز قدامي ولا بفكر اكل منه وبس يجي في بالي بكون خلص, وهالشي دايما بدايق ماما حبيبتي, معه انه بكون عادي بالنسبه الي لكن بتكرر معي كتيييييير.
  • حكيتها هاي في بوست من قبل بس نفسي يكون في عندي طاقيه الاخفاء و نفسي اروح على القهوه اللي بجبل الحسين و اقعد بين اللي بلعبو شده او طاوله, شكلهم منسجمين عالاخر :)
  • برضه هاي حكيتها, نفسي يكون في اختراع للسيارات فوق السيارة زي مكان الاعلان بالتكسي الممتاز, يكون في مجموعه جمل او كلمات بس حد يدايقني بالسواقه اكبس زر تنكتب الجمله او الكلمه فوق, مثلا " بالله عليك" او " شووووو ياااااا" او " هدّي اعصابك" وممكن مرات "شكرا "
  • كتير بنرفز من الصوت المتكرر لفتره طويله, انو حد يلعب بالمفاتيح او يلعب بكيس نايلون, بكره تكرار نفس الصوت لمده طويله حتى بالاغاني, بس يكررو المقطع اكتر من مره بغير القناة.
  • ما بعرف افاصل بس اشتري اشي, والمبلغ اللي بطلبو البياع بعطيه اياه فورا, مع اني متأكده انو غالبني بالسعر, هاي مشكله, مش اني بستحي او بخجل, لأ بس ما بعرف افاصل :$
  • ربنا رازقني بنعمه التفكير السريع بالردود, الحمد لله بالوقت المناسب بطلع مني الرد المناسب اللي بفش قلبي, ومرات قلب اللي حوالي.
  • ما بحب الغش وما بعرف اغش, بالجامعه بس حد كان يطلب مني اشي, كنت ارفع راسي واصير اتطلع عالمراقب, بصيرو اللي حوالي يترجوني انزل عيني وما اعطيهم اشي, ما بقدر اغش ولا اغشش الحمد لله.
  • انا فضوليه كتير, بس مش حشريه ولا ببحبش ورا الناس, بس انو حد يبدا قصه وما يكملها ما بقدر, او حد يحكيلي بعدين بحكيلك, برضه ما بصبر, لكن اشي ما الي دخل فيه ما بدور عليه ولا بهمني اعرفه, بشغلي احنا مربوطين بدوائر كتيره بالبلد, ومنها بقدر اعرف المعلومات الشخصيه وحتى الرواتب, لكن عمري ما دورت عأسم حد اعرف معلوماته, واللي دورت بكون لسبب وبحكيلهم اني بحببشت بمعلوماتهم :)
  • اخر شي اشي انا بحاول ما احكي عنه علشان ما يكون فيه نوع من الرياء لا سمح الله, بس للافاده راح احكيه, انا متطوعه في مشروعين بهالفتره المشروع الاول هو مشروع بتعامل مع الايتام وهاد انا مشاركه فيه من سنتين تقريبا, سنه ونص كان عباره عن يوم بالاسبوع بروح وبدرس الاطفال هناك, مع اني بكره التدريس بس تدريس هالاطفال جد غير, التعامل اجمالا مع الايتام في اله مشاعر خاصه, اكتشفت من خلال هالتجربه ان اليتيم وخصوصا المتواجد بجمعيات خيريه بكون ما بده لافلوس ولا لبس ولا اي شي مادي, بدو حد يتعامل معه, يحكي معه يضمه و يبوسه ويحسسه انه محبوب ويحسسه بقيمته و يعطيه ثقه بانه ممكن يصير شي بالحياه, جد يوم ما اروح بنسى كل التعب وكل الهموم وبتصير عندي مشاعر ما بعرف اوصفها بس كتييييييييير حلوه, فبنصح كل واحد و وحده انهم يخوضو هالتجربه لياخدو الاجر اولا و ليحسو بهالشعور تانيا, و حاليا نشاطي معهم بناءا على اداره الجمعيه شهري, كل شهر بنجتمع و بنعمل نشاط معين تعليمي عملي او رحله و ان شاء الله برمضان في افطار و بالعيد في طلعه , المشروع التاني هو مشروع المؤاخاه بين بنات عنا بالاردن وبنات بتركيا, بنحكي مع بعض عالمسنجر والهدف منه تعليم اللغه العربيه للطالبات التركيات حتى يتمكنو منها اكتر, فبنحكي مع بعض بامور الحياة باللغه العربيه الفصحى, اختي الجديده اسمها خديجه و بتدرس علوم اسلاميه بتركيا وطلع سبحان الله في اشياء كتيره متشابهه بينا, جد بحبها كتير وقريبا راح تيجي عالاردن وان شاء الله حنتلاقى ونتعرف على بعض شخصيا :)

وبس :) دوركم هلأ...


18 التعليقات :

6ayb wa6i otik o enti btkteb 3al keyboard , waj3to rosna lol :p

nice reading

 

يعني تحليلي لشخصيتك
شخصية محبوبة ... طفولية نوعاً ما ... وتحب الخيال واللامعقول
عندها نهفات ... بس حلوة ... مش دبشات متلي

ملاحظة ... انا هجبتني طريقتك بالتعامل مع الغشاشين بالجامعة
بدي اجربها
لآنه بالامتحان اللي بغشش فيه الطلاب دايما بخبص
انا مابكون بدي اعششهم
بس بخجلوني

شكرا ويسبر

 

١. ههههههههه عجبتني هاي؛ ليجي حد و اقطع جنبه بالعقل..
٢. :)
3. أنا من الإكسسوارات بس بحب الاساور..
٤. حلو الأزرق خاصة درجة التركواز.. أنا بحب رقم ٩..
٥. كنت مفكرة إنو بس أنا إلي بعمل هيك :)..
٧. أنا بحكي هدول بالإضافة لكلمة يا غبي..
٨. بحب الحوامض كتير..
٩. بكره الاستهبال كمان بالإضافه للكذب..
١٥. أنا مابحب ريحة النرجس بسير اعطس منها..
١٦. أنا بحبهم كلهم ماعدا السبانخ.. مابحبو لما يكون طبخه.. بس بالمعجنات كتير بحبو..
٢٢. ما شاء الله.. أنا والله مش دايماً بتزبط معي.. بس بحاول أفكر دايماً بأسرع وأحسن رد..
٢٤. أنا عشان بنسا كتير فكتير أحيان ببدا أحكي قصه وبتشعب على مواضيع تانيه وما بخلص القصة الأولى.. بس تاني يوم بتذكر اني ما خلصتها فبرجع بكملها للي كنت أحكيلو :)
٢٥. ما شاء الله.. الله يقويكي على فعل كل خير.. والله صراحة هادا اشي حلو..

 

Feeki kteer men sa7ebti, taqreeban mo3zam el ashya2. I wonder if you're her :S

 

صباح الفل
احلى شي طاقية الاخفاء....وانا نفسي وحده كمان...والله يجزيكي الخير على عملك التطوعي....والله في كتير منا عندو وقت فراغ كتير والتطوع اخر شي بنفكر فيه...شجعتيني اعمل زيك...

 

Shaheen

behay m3ak 7a2...marrat bansajem bel programming w elsawt beseer damar...bt7es 2enno fe tar beny w bain el keyboard lool :)

Nawrtna :)

Ahmad Al-Mahrouq

شكرا عالتحليل...و شكرا لانك طلعتني منيحه :)

انت ما عندك دبشات..ليش هيك بتحكي!!!

ههههه هي هيك من دون تخطيط, وبصير المراقب يتفرج علي انو شو مالها هاي :)

اهلا وسهلا فيك دائما احمد :)

 

Rula A.

1
ههههه اه وبلف عالجهه التانيه وبخليه هو اللي جنب السيارات...الله يسامحني :)

5
طلع في كتير ناس بعملو هيك :)

9
اه برضه بكره اللي بستهبلني و بستغبيني و بضطر ابينله اني فاهمه...بمشي بس بمزاجي يعني :)

15
لااا النرجس...انا اكتر ريحه ورد بحبها النرجس :$

24
انا عندي هاي العاده برضه|, من موضوع لموضوع و مرات ببدا احكي الموضوع و بكتشف ان في احداث قبل و بصير ارجع بالاحداث و بصير الموضوع ميمعه, و بزعل بس اللي قدامي ما يفهمني :$

25
جد شعور بجنن يا ريت الكل يحسه :)
امين يا رب :)

 

Rand

bs ma tkoon men 2elly katabte 3anhom be 2a5er post :(

2eza bet7ebehaa fa 2ah ana...bs 2eza la2 fa wala 2elly da5al feha :)

Nissan

يا مسا الورد

جد يا ريت عنّا منها :)

غير انو بملي وقت الفراغ بعطي شعور كتير حلو, و بتحسي حالك بتعملي تغيير ولو بسيط بهالحياه

يااا ريت ..جربي هو تطوع واذا ما ناسب وقتك و ظروفك بتوقفي :)

 

بس اضحك عيوني بسكرو
ذكرتيني بأفلام الكرتون اليابانيه دائما البنت لما تكون سعيده او تضحك بتغمض عيونها. بس غريبه هالشغله انو بتصير مع ناس حقيقيين بدي اضحك بس ما تزعلي :)ـ
نيالك على المشاريع الخيريه اللي بتعمليها. اكيد الانسان بيشعر بسعاده لما يحس انه بساعد ناس وخصوصا لما يكونوا اطفال ايتام. ـ صحيح انه الانسان لازم يعمل الخير بدون ما حدا يعرف بس في امور زي المشروعين اللي ذكرتيهم لازم تحكي عنهم عشان تشجعي ناس ثانيين يعملوا نفس اللي بتعمليه.ـ

 

مرحبا همسه كتير حلو البوست هادا بدي اسوي واحد :)

انا زيك بالظبط بالشارع بالزات انو انا عندي سوابق مره اتفلسفت وقطعت الشارع لحالي راحت دعمتني سياره بس الحمدالله ما صار فيا اشي ومن بعديها توبه

اما بالتغشيش اتيس مني مافي بنتفق قبل الامتحان عن اساليب الغش بيجي وقت الامتحان بصيرو بدهم يغششوني مش اغششهم اه بقلب وجهي اللوان وبصير اضحك يعني بالعربي بفضح الدنيا :$

واخيرا الله يجزيكي كل خير مافي احلى من عمل الخير والله :)

 

La la mw mawjoudeh b akher post w ba7ebha :) kaman hadlak mw sa7baat :) sa7ee7 shokran 3al link b awwal el post :D

 

حلو في اشياء قريبة كتير و اشياء بعيدة خير الله بيني و بينك
خاصة قطع الشارع انا بطحش و اللي بدو يصير يصير
و الاكسسوارات بحب اشتريها بس ما بلبسها بالمرة

 

Jaraad

هههههههههههه التشبيه بضحك بصراحه فكيف بدي ازعل ...اذا انا ضحكت :)

الحمد لله هاي نعمه من رب العالمين انه يسرلي اياهم, وانا من زمان حابه اكتب بس كنت متردده, لكن جد للافاده و لنشر الموضوع كتبت

Jarat

الله يحلي ايامك يا قمر...كيفك انتي؟؟ رجعتي ويلا لسا ؟؟

يلاااا ما تطولي علينا كتير ...

يييييييي حبيبتي ..الحمد لله على السلامه :(

ربنا ما بدو اياكي تعملي شي غلط وتغشي :) فأنسي الموضوع
امين يا رب, والله بعطي شعور كتير حلو
ان شاء الله الكل بعيشه

 

Rand

Fe3lan hadolak mesh sa7bat 2asasan :$
El3afoo ya amar....thanks to u and to Ola for the idea :)


Jafra

جد..ياااي
بس الله يحماكي بقطع الشارع, ديري بالك عحالك يا قمر

انا كنت هيك اجمعهم و ما احب البسهم, كنت احس حالي بنت كتير بس البسهم :$ بس هلأ لازم خصوصا الخواتم :)

 

مساء الخير ويسبر
بعد أن قرأت الصفات ال25 عرفت لمن غنى "كاظم" كلك على بعضك حلو
الله يعطيكي طولة العمر يا ويسبر وتعمري بالأعمال الصالحة
تبسمت عندما قرأت بعض الصفات
قررت أهديكي (قطة) على عيد ميلادك
عشان بتحبي الحيوانات كتير
مستحيل يكون عندي جرار شوكولاته ويصمد ساعة، اي والله بسفهم في خمس دقايق
على فكرة أنا قرأت البوست كامل مبارح بس ما علقت عشان طلعت من النت فجاءة وما رجعت إلا اليوم
مساؤك سعيد

 

مساء الخير نادر

شكرا عالمجامله الرقيقه, وامين يا رب
ان شاء الله دائما ربنا يسرلنا هالاعمال الصالحه

لا شكرا ..اعتبر هديتك وصلت :)


اذا من حسن حظي انه اجا شي يخليك تترك النت لتشرفني بالزياره اكتر من مره :)

 

ما بتعرفي تقطعي الشارع لحالك؟ :\

شوفي

http://www.mohor.net/2010/06/twenty-nine/

 

هههههههه اه تخيل :$

طول بعرض و خمسين سنه و بدي امشي مع حد يقطعني الشارع :)