Things I Like To Whisper About

Would You Hear Me Whispering

يا مركب رايح عالعقبة


روّحت الخميس من الشغل لقيت بابا عاملي مفاجأه وحاجز عالعقبة,كان الي اكتر من اسبوعين متفقة انا وبنات خالتي انق على راس بابا وزوج خالتي لنروح و همه مش كتير متحمسين للفكرة,اي نعم رحلة اليوم الواحد, بس مش مشكلة مدامهم وافقو :)
و رحنا و الحمد لله كان يوم بجنن,الاشي الوحيد المش حلو انه كان يوم الجمعة يوم التدوين للاردن وما قدرت اسهر ولا اشارك تاني يوم:( يلا خيرها بغيرها ان شاء الله السنة الجاي

كل شي كان ممتاز بالرحلة, ما عدا لمّا ركبنا اليخت و بدو البنات اللي باليخت يرقصو!!! اه صارو يرقصو و هات هزّ همه و ال Guides اشي مخزي بالفعل , مشكلة بس يوصلو البنات لدرجة من الوقاحه, بصير الوضع مخيف , بنات و شباب طالعين مع بعض الرحلة و مش حاكيين لاهلهم, المفروض انها رحلة بنات, هاد اللي فهمتة لمّا وحده من البنات اتصلت فيها امها و خلتها تحكي مع صاحباتها لتأكدلها انها معهم, مدام ما في ثقة ليش تبعتها من الاساس؟؟

يا الله شو كان نفسي اسبح, لكن بما ان كل الاردن تقريبا كانت هناك فضلينا قاعدين انا وبنات خالتي نتصور و نتخوت جنب المي بدون ما نلمسها.

الاشي الغريب اللي لاحظته ان نسبة العالم اللي ببحلقو كتير اكبر بالعقبة, طول ما احنا ماشيين كأنه الكل عارف انّا غريبين و ببحلقو ستات و رجال, واشي تاني انا اول ما تحجبت حسيت حالي كأني اختفيت, التعليقات اختفت تماما, هالفترة رجعت عخفيف , يعني محاولات لجس النبض الله يخليلنا قليلات الادب اللي صارو يتخذو الحجاب غطاء الهم, هلأ بالعقبة كم التعليقات اللي سمعتها بحجم كل التعليقات اللي اخدتها بحياتي, بدون مبالغه قدام كل محل لازم اسمعلي كلمه, مش لسبب هيك بس كأنه مزاج العالم اللي هناك هيك, اشي زيادة عن اللزوم .

هاد بالنسبة للشباب, هلأ نيجي للستات, يا ماما جد اشي بخوف, بتبحلق فيكي و بتجحرك كأنك عاملة عملة, وبالاخر وصلت فيي اني احكيلها شو مالك بالزبط؟؟انت بتعرفيني شي؟؟ لفت وجهها ببطئ كأني بشوف المنظر عالعرض البطيء و مشيت, شو مال العالم ؟؟؟ لكن كل هاد ما بمنع اني انبسطت كتير كتير و انها كانت رحلة موفقة بكل معنى الكلمة, وطبعا اشترينا مكسرات من الشعب, و اشتريت اغراض لمكتبي بتجنن و كتير رخيصه :)


اتركم مع الصور اللي اخدتها, للاسف هدول بس اللي لقيتهم بدون ما اكون انا وبنات خالتي فيهم :)
هاد اقرب منظر و اقرب مكان بقدر اوصلو لاشوف فلسطين..اشي محزن















23 التعليقات :

yup!! you are right! i hate when everybody just keep looking at you as if you are some kind of creature or something!! god!! how could they tell that we are not from here!!!?!

i like Aqaba for sure, and i think the weather was prefect when you went there , right?!

nice photos indeed! especially that one with Palestine in it.

 

يلا الحمدلله عالسلامه
والله ياويسبر أي كسر للروتين فهو رائع شو ماكان:)

 

يا نيالكم
هاي رحله العقبه صارت حلم حياتي:(

بالنسبه للتعليقات يمكن تستغربي اني انا بتعجب من كم التعليقات اللي بسمعها في عمان نفسها!!

شيء محير جد

صباح الخير انا مش "طاسه" قدامي على فكره

 

http://www.7iber.com/2010/03/%D8%A3%D8%B5%D9%88%D8%A7%D8%AA-%D8%A3%D8%B1%D8%AF%D9%86%D9%8A%D8%A9-%D8%AD%D8%B1%D8%A9-%D8%A5%D9%86%D8%B2%D8%B9%D8%A7%D8%AC-%D9%85%D9%86-%D8%B5%D9%81%D8%AD%D8%A7%D8%AA-%D8%A7%D9%84%D9%81%D9%8A%D8%B3/

والله وبقيت مشهور يا حسبو :)

 

عنجد ملاحظة صحيحة و مزبوطة
والبحلقة لابد منها
بس اللي بروح العقية وما بركب قارب زي كأنه ما راح عالعقبة ونفس الشي مكسرات الشعب صارت رمز وطني
:)))
عقبال كل الاجازات الحلوة

 

ما شاء الله.. والله اشي حلو.. أنا كتير بحب العقبة وكتير بنبسط فيها..

ذكرتيني السنه إلي مضت رحنا أنا وصاحبتي وأهلها على العقبة بس رحلة اليومين وليلة وحده..

زيما قلتي البنات بالباص قعدو يرقصو ويهزو.. بس احنا مهتمين وإنبسطنا بالطريق..

رحتوا مع مكتب لميس إلي بالجاردنز؟ ولا مكتب تاني؟ :)

احكيلك ليش أهل العقبة ببحلقو.. هلأ بالظبط العقبة بلد مش إنو صغيرة بس من النوع إلي أهلها بعرفوا بعض .. يعني الغريب ببين على السريع.. زي كيف لماً تكوني سنفوره بالجامعة بتبيني على السريع.. نفس الشيء :)

حلوين الصور وأهم اشي تكون إنبسطتوا..

آه صحيح البنات إلي كانو طالعين معنا بالرحلة برضو كانو طالعين من ورا الأهل..

 

آه نسيت أحكي اني كتير بحب أغنية عمر العبدالات "العقبة" :)

 

مرحبا ويسبر

الصور كتير حلوه على فكرة أنت موهوبة في طريقة التقاطك للصور وهادا الاشي لاحظتو كمان في الصور اللي عرضتيها لما كنت في الامارات

في البداية الحمدلله على السلامة وحسب ماقلتي في البوست كانت رحلة ممتعه على الرغم من بعض المنغصات اللي من الصعب في أي مكان بتتواجدي فيه بالاردن أنك تخلصي منها وهي ثقافة البحلقة والتحديق بالاخرين يعني بصراحه أنا زرت دول عربية أخرى ومابدي أحكي عن الدول الاجنبية لانو معروف اصلا انو ماعندهم هادي الشغله ابدا بس بالنسبة للدول العربية الاخرى فثقافة البحلقة الموجودة عندنا تتفوق على الجميع وما هو السر في ذلك بصراحه أعتقد أن سببه فيمن يمارس هذه الثقافه في العقول الفاضيه اللي مافي جواتها اشي يشغلها فبتبدى تشتغل بالناس ومراقبتها والبحلقه فيها وبكل أسف

نهارك سعيد

 

بتمنى تكوني انبسطتي لاني بعرف قديش بتحبي البحر ياعمي رومانسية ليش الحكي
:)
بالنسبه للبحلقة تعي على الرياض وشوفي البحلقة على اصولها يعني مش من قليل كل العالم هون بتغطي على وجهها من كتر البحلقة
وبعدين بدي من المكسرات ابعتيلي شوي زكرتني لما كنا نوصي فليح يشتريلنا من العقبة مكسرات ياااللله شو بتجتنننن كانت هديك الايام بتمنى تضلي دائما مبسوطة يا عسل وكتير حلوة الصور

 

من سنتين طلعنا على العقبة مع أهلي يعني شباب وصبايا كنا ما شاء الله 30 فرد بس باص مختلط انه ناس تانيين والله لا يورجيكي طبعا زي ما حكيتي فياعة ومش عارفين شو يعملوا وبالاضافة على اللي حكيتيه كان في افعال مشينة !! ههههه بالباص !!!!! واحنا كان معنا مراهقين انه14و 16 و17 جد لدرجة انه حكينا للمرشد انه خليهم يضبوا حالهم شوي اشي بخزي والمهم عكرنا مزاجهم عالآخر هههههه بس الأهم انها كانت رحلة رائعة لو تناسينا هاي المواقف

 

مسا الخير ويسبر

الحمد الله على السلامة
نورتي عمان، يوم الجمعة حسيت انو في ارتباك في الحركة التدوينية، هلاء عرفت السبب

 

كيفك ويسبر
حمد الله على السلامة
اكيد ارتحت بس لانك شفتي البحر انا متاكدة و شو بدك بالعالم
الصور حلوة خرج دعاية للعقبة

 

Dr.Mohammed

Welcome back :D
long long time I didn't see you here :)

And even if you show them that you can see them, they don't do any thing and keep gazing you:$

Yeah al7amdolellah it was perfect, with a refreshing winds :)

Thanks , happy u liked them, it's my favorite too :)

ميسم

الله يسلمك يا رب
جد غيرت نفسيتي كتير و رجعت بطاقه اكبر من قبل :)
:)بس ان شاء الله تدوم

 

مياسي

خلص بس يجو الاهل على خير ان شاء الله لازم تروحو, او روحي انت وخالاتك رحلة صبايا يعني جد بتنبسطو :)

قبل فترة خفّت التعليقات, لكن جديد كتير زادت و المشكلة بكونو شباب صغار قد ولادي , بكون نفسي احكيلة " بس خالتو اهدى شوي " :)

سلامتك من قلّه الطسسان...خير ان شاء الله
ميكونش تحسس!!! لانه هالكني :(

مياسي 2

يااااااااااااااااااااااي
سبحان الله لسا امبارح بحكي لحالي همه بشتركو اشتراك بحبر ويلا همه اللي بختارو ونص ساعه بصفحتهم بفكر اشارك او لأ و بالاخر نمت وانا مش مقرره :)

اسمي مكتووووووووب :)))))

 

حياة تستحق الانقاذ

اهلا و سهلا بام المييس
اشتقنالك يا قمر و كتير طولتي علينا الغيبة هالمرة
ان شاء الله تكوني مبسوطه باجازتك :)

اليخت تجربة بتجنن, و خصوصا انهم صايرين يحطو كراسي و بتقعدي و المنظر قدامك اشي بجنن, انا ما قدرت اضل قاعده, بدي احس الهوا والمي :)

الشعب هاد حبيب الشعب
امييين يا رب
والك كمان :)

Rula A.

انا كمان بحب العقبة كتير, يوم يومين مع مبيت مش مع مبيت بنبسط بكل ثانيه :)

اه مع لميس رحنا :) و لعبنا مسابقة الاسئلة و احنا اللي فزنا :) و اخدت جائزه mug :D

شكلة هيك, لانه الكل ستات و رجال ببحلقو فيكي هناك :$

انا بحب هاي الاغنيه كتير كتير :)

أشرف محيي الدين

اهلا وسهلا أشرف
شكرا كتير لرفع المعنويات
انا كتير بحب التصوير و كلامك كتير بسعدني :)

الله يسلمك اه الحمد لله كانت كتير حلوة و انبسطنا و غيرنا نفسية

للاسف هالثقافة منتشرة كتير هالفترة و بطريقة مزعجة, المراقبة 24 ساعه كتير بتقهر و بتحد من الحرّية

معك حق الفراغ بعمل اكتر من هيك

مساؤك اسعد

 

Fostog

الحمد لله كتير كتير انبسطت :)
هههههههه بتعرفيني بموضوع العقبة بالذات و البحر ما بقاوم

الله يعينكم, هناك كتر الكبت قتل العالم, بتزكر لمّا حكيتلي على حجاب ملون بزفو البنات هناك :$

على حسابك كل المكسرات, يا ريتك موجوده كان جبتلك ازكى مكسرات :(

فتحي راح عالعقبة وما رضي يشتريلنا اشي :) بتعرفيه من يوم يومه هيك
ههههههههههه

وانت كمان
بدي ابعتلك ايميل احكيلك اخر التطورات....والمشاكل :(

 

SimSim

افعال مشينة!!!و بالباص.. العالم بطلت تستحي يختي :$

انا بلوم البنات اللي بخلو الشباب يضحكو عليهم بدون اي تعب ولا عوائق

شطورين الله لا يردهم.... مزاج زنخ بعيد عنك

الحمد لله المهم انكم انبسطتو و ان شاء الله بتروحو مرة تانيه قريب

نادر احمد


مساء النور نادر

الله يسلمك, عمان منورة في اهلها و فيكم

هههههههه هو انا يومها راح علي كتير لاني كنت مقررة اضلي اون لاين مع موضوع التدوين للاردن لكن للاسف ما قدرت
شكرا كتير نادر:)

Jafra

اهلا يا قمر
الله يسلم عمرك يا رب

انا بعشق البحر جد
كتير بريحني و كتير بنعشني وبزكرني بناس بحب ذكراهم :)

الله يسعدك, كتير بسعدني انها تعجبكم

تعالي عالاردن علشان نروح كلنا البنات المدونات مع بعض ونفيع هناك :)

 

السـَلام عَليكُم

حَقاً أشعُر بالدَهشَة مِن فتياتِ وشَباب هذا الجِيل

فِي حَالَة فَسَاد وأكثَر مِن ذلك

اللهم اهدِي شبابَ المًسلمين

فَلتحمَدي الله أنكِ استمتعتِي بوقتِك مِن دون أن تعصِي الله عز وجل =)

شيءٌ رائِع .. ولتداومِي عَلى تَرفيه النفس ضِمن حدود الشَرع

حَتى ولَو كان المُجتَمَع ضد ذلك ! أو عَكس ذلك ,..


" احتِرامي ..

 

Muslim By Choice

وعليكم السلام ورحمة الله وبركاته
اهلا وسهلا بك اخي في عالمي المتواضع


اللهم امين, الله يهدينا و يهديهم

دائما وابدا الحمد لله على كل شيء

اعجبني الاسم الذي تستخدمه, ربما كنّا مسلمين و لكن هناك من يشير انه مسلم على الهوية فقط, و جميل ان نكون مسلمين باختيارنا نحن و بذلك تكون جميع افعالنا نابعه من قناعتنا بان الله يرانا في كل عمل

اهلا بك

 

عارف اني جاي بعد الهنا بسنة بس حبيت اسلم :)
الحمدلله على السلامة ورحلة موفقة
مافي أحلى من تغيير الجو لأن القلوب تمل كما قال الرسول صلى الله عليه وسلم

بالنسبة لملاحظاتك للأسف الشديد الدنيا أخر وقت
أنا سمعت أنه يتصير بلاوي اكثر في رحلات وادي رم ، الله يعافينا الجميع

والله التعليق والبحلقة صفة عربية دارجة في كل المدن العربية بدون إستثناء للأسف الشديد

المهم الحمدلله على سلامتك كمان مرة وعقبال الرحلات القادمة

 

سراج الماضي

الله يسلمك, بتنّور المدونة باي وقت :)

صلى الله عليه وسلم
الحمد لله كانت كتير حلوة وانبسطنا كتير, وفعلا غيرت من نفسيتنا كلنا

الموضوع حرام و مرفوض اجتماعيا , لكن
بغض النظر عن هالشي كتير بستغرب كيف بنت او شب برضو على نفسهم ينحطو بهيك موقف مشبوه و بأثر على سمعتهم

الواحد فيهم حاسس حالة كتير رخيص لينعرض قدام العالم, هيك انا بفهمه والمفروض بالمقابل ما يطلبو من العالم تحترمهم اذا همه اساسا مش محترمين حالهم.

الله يهدينا ويهديهم شو بدنا نحكي!!!

الله يسلمك... في مخططات نق لرحلة لسوريا قريبا جدا :)

 

يللا غيرتوا جو

انا الي عشرطعشر سنة بنق ع اهلي بدي اسافر ع الشام او لبنان بس مش قابلين

المهم بالنسبة للصور ... اول صورة خلتني افرط ضحك
السفينة هاي مش راضية تتزحزح من مكانها ,,, صامدة ع طول

 

Ahmad Al-Mahrouq

اه الحمد لله كتير غيرنا جو وانبسطنا

ليش مش موافقين؟؟؟ مع انهم كتير قراب :$

صح هههههه كل سنة و هي لساتها بالصور :)

شغل يا احمد شغل :)