Things I Like To Whisper About

Would You Hear Me Whispering

يا قدسنا


دائما بحس بسلبية كبيرة بس اجي اكتب عن فلسطين, وعن اللي حدث و بحدث في القدس و غزة و الخليل و بكل بقعة من ارض فلسطين, ما بدي اكون من اللي بس بلومو و بعاتبو وبحملو مسؤوليات على اصحاب القرار بالبلد, سألت اكتر من انسان عن دورنا بهيك احداث, و هل معقول انا نضل بس نشجب و نستنكر زينا زي باقي العالم؟؟ هالموقف كثير سلبي, و بحس انّا زي ما بنأشر على العالم و بنلومهم احنا علينا ملامة.


انا متأكدة تماما ان "للبيت رب يحميه" وان ربنا لا يمكن يقبل الظلم لانسان, وانه ابتلاء النا والهم والله يصبرهم ويساعدهم, ولكن اكيد راح نسأل يوم القيامة عن مساجد الله اللي بتتهدم و بتنحرق و بتتحول الى مواقع اثرية, واي اعتداء على مسجد هو اعتداء على كل مسلم و حتى على كل عربي لانه الاعتداء ما صاب المساجد لوحدها, الاعتداء صاب الكنائس هناك واي رمز ديني, الصهاينة بدهم يبينو انهم المسيطرين على الحياة كاملة هناك, الدينية و الاجتماعية وحتى الانسانية, و الكل لازم يثور على هيك تصرفات, ما حد برضى لاخوه الانسان انه يجي حد يهينه و يحرمة من ابسط الامور,يحرمه من حريته و من حياته.

معظم اللي سألتهم حكولي ان بما انّا مش مسموحلنا تعمل اشي و لا مسموحلنا نعبر باي طريقة , واجبنا انّا ندعي لاهلنا جميعا هناك بالصبر و الفرج القريب, انّا نساعدهم بالمال اذا بنقدر و بنضمن ان الجهة اللي بتجمع هالفلوس فعلا راح توصللهم هالدعم, انا نجتهد بمعرفتنا عن اللي بصير هناك و نزرع هالحب و هالمعرفة في قلوب اطفالنا, حتى يكون الجيل الجديد زينا, مع انّا ما شفنا فلسطين لكن بنحبها كتير وهي دائما بقلبنا.

اللي بستغربة ان اي قرار صهيوني, يقابل باستسلام تام كأنه هي الامر الناهي بهالدنيا, اذا قررو ان الاردن يكون وطن بديل الكل ثار و بدا يكتب, ليش صار بالنسبة النا اي قرار صهيوني خلص راح يطبق فورا و كأنه ما في بايدنا شي نغيره, بعرف ان الصهاينه همه اللي بتحكمو بامريكا وامريكا بتتحكم فينا, لكن ليش الاستسلام التام لهالشي, النا 60 سنة بنستسلم و بنسكت , النا 60 سنة بنستنى قرارات الصهاينه علشان نثور ونفور زي المي بس تغلى بتفور, وبتطفي النار اللي تحتها بس و بتهدى و بتنسى باقي النيران المشعولة بالمناطق التانية, ومشكلتنا انّا بننسى بشكل تام, ما بحكي ان الحياة المفروض توقف, لكن فورا ننتقل من حالة قمة الحزن و الغضب, لقمة الاستهتار والنسيان و الضياع.

الله يفرجها و يسامحنا و يلهمنا الصواب





12 التعليقات :

مرحبا ويسبر

لست أدري من أين أبدأ في الحديث عن وجع الأمة فلسطين ولكن مما لاشك فيه أن الصهاينة قد نجحت مخططاتهم في عزل قضية فلسطين عن قلوب العرب والمسلمين وحصرها في نطاق ضيق مفاده أنها مناطق متنازع عليها بين الفلسطينيين واليهود فقط وهنا تكمن المشكلة الرئيسة حيث أصبحت نفوس أبناء الأمة في مختلف المناطق تردد وترفع شعارا واحدا فقط اللهم نفسي وحجتهم بذلك أنهم لايجدون لقمة الخبز لأولادهم وأن هذا مدعاة لنسيان قضيتنا ولايدركوا أن كل مآسينا والتي من ضمنها المآسي الاقتصادية هي حصاد أيدينا في إهمالنا لقضية امتنا الواحده واللهث وراء اقليميات ودويلات وحدود مصطنعه وعداء وخيانة لروابط الدم التي تجمعنا وبكل أسف

لقد كان موقف العديد من الدول غير العربية والاسلامية في حرب غزة تجاه الصهاينة أشد وأعتى بكثير من دولنا فماذا سنقول بعد هذا ؟

تحية

 

ya Allah ya whisper, hal jor7 kolmalo 3m bkbar w fe3lan mtl ma 2al ashraf ( الصهاينة قد نجحت مخططاتهم في عزل قضية فلسطين عن قلوب العرب والمسلمين وحصرها في نطاق ضيق).. ya rab allah y2awehom w ysaberhm w ysaberna w ya3tena el shi ele ne2dar ndafe3 feeh 3n falasteen..

 

ya Allah ya whisper, hal jor7 kolmalo 3m bkbar w fe3lan mtl ma 2al ashraf ( الصهاينة قد نجحت مخططاتهم في عزل قضية فلسطين عن قلوب العرب والمسلمين وحصرها في نطاق ضيق).. ya rab allah y2awehom w ysaberhm w ysaberna w ya3tena el shi ele ne2dar ndafe3 feeh 3n falasteen..

 

والله يا ويسبر
بدك المزبوط الصهاينة نجحوا في كل مخططاتهم إلا في واحد,انهم يهججوا الفلسطينيين اللي بفلسطين من هناك
و الباقي كلو زبط معهم
صدقيني ما طالع بإيدنا اشي غير نلم شوي مصاري بحفل هون و حفل هناك
لانه الناس المتخلفين اللي عنا بنحكاش معهم بالمرة
حتى توعية بزبطش معهم !

 

ربما يكون الدعاء لأهلنا في فلسطين هو السلاح الوحيد الذي بإمكاننا أن نحارب به و نحن خارج أرض فلسطين...
و علينا أن لا نستهين بهذا السلاح الأقوى، لأن الاستغاثة و الطلب و اللجوء لا يكون إلا إلى الله تعالى، الذي هو الأعلم بالحال، و لا يرضى بالظلم لعباده...
حسبنا الله و نعم الوكيل...

 

بالنسبة الي يا عزيزتي هاي قضية استثنائية لانها بتمس الوجود الشخصي النا كشعب
و رموزنا الاسلامية او المسيحية لم نستطع ابدا نحن الحفاظ عليها لا باسلوب قانوني و لا حتى بطريقة المقاومة
هامش : بتعرفي اني صرت اكره كل الاغاني اللي بتغني للقضية
بحسها تافهة و استغلالية لمجرد الحدث
مع اني ما ق\\رت افتح الاغنية اللي فوق
بس صرت اكره اسمع هاي الاغاني لانها غالبا ما بتكون استهلاكية

 

اشرف محيي الدين

معك حق, نجحت مخططاتهم بمساعدة اعوانهم من العرب والمسلمين اللي باعو ضميرهم و انفسهم مقابل ولا شي

محزن جدا و واقعي جدا تساؤلك ...

Shaima

Ameen ya rab...Allah yesma3 menek

Sh3rawi

الله يعينهم و يقويهم..يا ريتنا معهم
الجيل القديم اللي طلع من فلسطين هلأ كتير ندمان على هالشي

المشكلة بانك تلاقي ناس لسّا عندها ضمير و احساس

Mrs H

الدعاء اكيد سلاح قوي, لكن في ناس بعتمدو على الدعاء بدون اي يقين و بدون اي اخلاص

حسبنا الله ونعم الوكيل

Jafra

اولا شكرا عالتعليق, بعرف انك بطلتي تحبي تعلقي على هالمواضيع :)

احنا كشعب بعاد ومش مسموحلنا نحكي او نقترب من الموضوع اكيد ما راح يطلع بايدنا شيء وهذه السلبية اللي قاهرتني


انا معك ان في منها بكون استهلاكي ولكن انا بحب بعضها وهاي منهم و هلأ اكتشفت انها مش كاملة

ان شاء الله بننتقل من مرحلة الكلمات الرنّانة لمرحلة الفعل

 

wallahe 7aleyyan ma fe be 2eedna ella ad3af el 2eman....l2nno ma dal ella tmoot el qadeyyeh mn jowwatna...wo enshallah ma betmoot, wo enshallah eza ejani awlad r7 akoon 7arees ennhom ye3rafo 7a22na b falasteen wo ydallo yetmassako feeh la akher el 3omor....shokran 3la etharet el mawdoo3

 

giving you my voice :-)

 

مواطنون بلا حدود

inshallah betdalha fe 2albna w balna 3ala 6ool...hommeh bedhom heak

mawdoo3 t3leem w na2el 7ob falsteen lawladna kteer mohem w heak ma betmoot w inshallah ye6la3 be 2edhom 2elly mesh msmo7elna ye6la3 be2edna

shokran 2elak

Melicieuse


Thanks a lot :)

 

كل الطيور تعود في ذيل النهار
كل الوحوش تعود للأوكار
إلا أنا يا قدس أخطأني القطار

فلسطين قضية المسلمين و العرب الأولى
أي بوصلة لا تتجه للقدس فهي مشبوهة

الحل الوحيد هو أن نتمسك بديننا ونعلم أولادنا حب فلسطين كمانعلمهم
القراءة و الكتابة

مخطط الصهاينة هو أحباطنا لنصل لمرحلة نيأس فيها تماما
و نفقد الأمل في فعل او قول او حتى تفكير من أجل قضية فلسطين
ولكن هيهات فلن ننسى فلسطين إلا إذا خرجت الروح ففلسطين هي روححنا ولا عيش لنا بدونها

جزاك الله خير يا ويسبر وان شاء الله رح تحرر فلسطين لا محالة

 

سراج الماضي

اكيد ما راح ننساها ان شاء الله

و الاولاد راح يكون الهم دور اقوى من دورنا
يا رب نشهد هاليوم