Things I Like To Whisper About

Would You Hear Me Whispering

المطار....يعني و بعدين!!!

كان المفروض اسافر ب 7\1 برحله المسا قبل باسبوعين وصلتني مسج من شركه الطيران بانه التغت رحله المسا وصار موعد سفري ب 8 الشهر و بعد بساعه اتصلت فيي موظفه من عندهم لتتأكد ان الموعد الجديد بناسبني, و حكيتلها اوك حكتلي يا ريت تشرفينا لتاخدي التذكره بالموعد الجديد.

قبل السفر ب 3 ايام وصلتني مسج ان في ضريبه نزادت على التذكره و راح تتاخذ في المطار, و هالمسج زكرتني اني ما غيرت التذكره, رحت لمكتب شركه الطيران علشان اسأل عن الضريبه الجديده و اغير التذكره, طلعت الضريبه مفروضه على كل شركات الطيران من الحكومه و الشب اللي بشتغل هناك فرجاني الكتاب الرسمي من الجريده الرسميه التابعه لرئاسة الوزراء, طلعت الضريبه الجديده 4:30 مكتوبه هيك.

حكيت للشب فيها اشي لو دفعتها هلأ بدل ما اتأخر بالمطار, بنعرف كلنا عجئه المطار, حكالي اه و بالمطار بس بتبيني الوصل و بتمشي, غاب رجع بحكيلي لأ خلص الافضل بالمطار, حكيتله راح يكون ازمه و عالم كتير, بحكيلي لأ انا اللي راح اكون هناك و بسرعه بتمشي الامور, رحت عالمطار صف طويل مش مبين اوله و موظف واحد, هو نفسه اللي كان بالمكتب بتأكد من التذكره, بقطع و صل بتدفعله بعطيك الوصل و بكتب على تذركرتك علامه, ساعه كامله لوصلت للشب اللي كان نفسي امسح بكرامته الارض , ماشي دفعت و وزنت الشنطه و خلصت الاجراءات كلها و ركبنا الطياره.

في بالطياره ست مع اولادها ال 3 و الشغاله, كل شوي ينادو عالست و يشوفو البوردنج اللي معها, طلعو الاخوان اللي عالباب قطعو التذكره و ما شيكو على الاسم عالكمبيوتر فبفكروها مش راكبه او في اشي غلط بالتذكره و نص ساعه على هالحال , رايحين جايين و مين فلانه, وهاتي التذكره, وانت مريتي عالبنت اللي بره, بالله عليكم؟؟؟ يعني كيف ركبت الطياره هي والعائله الكريمه؟؟؟ لابسين طاقيه الاخفا مثلا ...

هلأ نيجي للامارات, وصلت المطار و مشينا للمكان الفيز, طول عمري بلاحظ بالمطارات اللي بكونو حاملين اسم و بستنو شخص, وبكون نفسي اعرف مين هالشخص هاد اللي بستنوه وعاده بكون واحد اجنبي, و بأهلو فيه و باخدو الشنط, و احترامات وحاله, وعاده بحب اقرأ الاسماء المكتوبه, وانا ماشيه بقرأ بالاسماء و اذ بشخص حامل اسمي :))))))

لاااااااا معقول, بحكيله يس, هندي طبعا الشب, بحكيلي اسمي بحروف مكسره مع انو ما في حرف غريب, حكيتلو اه, مشيت معه قعدني بغرفه فيها كنبايات و غاب شوي, اتصل اخوي بحكيلي شو يا VIP كيف الاوضاع :), طلع اخوي دافع لشركه بالمطار 50 درهم مش اشي كتير, وهدول بمشوك و بجيبولك التذكره وبوصلوك لمنطقه الشنط, و كل شي مشي تمام, مع ان اختكم بالله بطلت تعرف تفتح بدون ما ترمش كل ثانيتين علشان بصمه العين, وعيوني دمعو و فضيحه, الشب عالبصمه حشش ,انو مالك يا اختي :") بس الحمد لله بعد المحاوله الخامسه مشيت, وطلعت عالشنط وبكل بساطه وصلت للشنط, خصوصا بالشبره النيليه اللي رابطتها ماما عالشنطه علشان اميزها :") زكرتني بمدونه لناصر عن مغامراته عالجسر

رجعنا عالاردن , صف طويل عريض على منطقه جوازات الاردنيين و 3 صفوف فاضيين ما فيهم موظفين, اجا موظف قسمونا و طبعا بكل فوضويه الدنيا رجعنا عملنا صف وسبحان الله وقفت بالصف الجديد باخره مع انهم لمّا قسمونا كان بس 3 قدامي, مش راح اطاحش بالعالم, راجعه ونفسيتي حلوه و مسالمه, كملنا الاجراءات نزلنا للشنط, دور فتش على عربايه للشنط, مافي و كل اللي معي بدورو, رحت لهندي واقف - في شب بس شافه بحكيلو الله اكبر انتو ورانا ورانا..حلو عنااا ياااا - المهم رحتله و عملت حالي شاطره حكيتله جبلي عربايه والك الحلاوه, بكل برود الدنيا رد علي و هو متركي نفس التركايه عالحيط هلأ بجيبوهم, لفلفت مره تانيه ادور و انا واقفه استنى الشنط بديش تمر و انا مش شايفه واستناها لتلف عالقشاط, رجعتلو للهندي لاني مش شايفه حد غيره, انو يا مان روووح و ما راح تكون غير راضي, رد علي بنفس الطريقه و هو ما زال على تركايته, وظيفته عمود الشب و انا مش عارفه, شوي سمعتهم بحكو هي اجت العربايات , صاروخ كنت واقفه جنبهم , الاخوان جايبين 5 عربايات كل اللي بالطياره يتقاتلو عليهم, لفيت وجهي وحكيت امشي بكرامتي, وحده بنت حلال بتحكيلي طلعو معي عربايتين بدك وحده, لولا العيب والحيا بدي انط عليها ابوسها بين عيونها, بس هديت اعصابي, وقفت عالقشاط بعد ما قرأت عالمونيتور انه القشاط لشنط رحلتنا, ووقفت بين كل اللي كانو معي بالطياره, نص ساعه القشاط بلف وبدور بشنطتين يتيمتين و مش لحد منا.

واحد من الواقفين بسأل واحد من السيكيورتي عن الشنط و بحكيلو انه النا نص ساعه, مسك الورقه المكتوب عليها المعلومات و تفرج عالمونيتور, وبحكيله مكانك صح بش شنطتك مش موجوده شكله, بحكيلو مش بس شنطتي, شنط كل العالم هاي, غاب الموظف و رجع بحكيلنا شنطكم عالقشاط التاني مش هاد, كلنا زي التتار لفينا عالقشاط اللي حكالنا عليه,بعد ربع ساعه واحد من الموظفين الواقفين بحكيلنا, انت جايين من الامارات حكيناله اه, بحكيلنا شنطكم عالقشاط التالت, برضه بروح معنويه عاليه ما حكينا ولا كلمه و رحنا عالقشاط التالت, طلعو الاخوان حاطين كل شنط الطيارات اللي اجت على هالقشاط, والموظفين بنزلو الشنط و بكوموهم فوق بعض عالارض, يعني مسكين اللي شنطته انحطت تحت بدو يستنى لبكره.

عاده بس يجي حد من السفر, خواني يعني ماما بتحب تشوفهم من عند الصراف, في زجاج بفرجيك اللي واقفين عند الشنط, وانا ماشيه بتطلع لقيت ماما , بطلت مركزه باي وقبلات طائره كأني غايبه الي 5 سنين مش 3 اسابيع, بأشرلها انو لحظه بس بدي اجيب الشنطه ومع تأشيره الشنطه اطلعت عالقشاط ويلا هي الشبره النيليه بتلولح قدامي, هلأ تخيلو الموقف بالعرض البطيء,ما في مجال تمررها بين جحافل المسافرين, ولتمررها بتكون الشنطه صارت بين اكوام الشنط, بدون تفكير تركت العربايه اللي ماصدقت الاقيها وعليها شنطة الايد و اللاب توب :$ و دفعت كل مين اجا بوجهي , وهجمت عالقشاط و سحبت الشنطه متل شيخ الشباب و عيني رايحه جاي عالعربايه و عالشنطه وعاللاب توب , اخدت شنطي و اخيرا طلعت من المطار.

هلأ ما في عنّا غير هالمطار الرسمي لكل الاردن, على اعتبار ان مطار ماركا الحركه عليه كتييييير خفيفه و معظمها طيران داخلي, الموضوع ما اله دخل بتزبيطات المطار اللي مش راضيه تخلص و لا بالشارع و المطبات, الموضوع عباره عن تنسيق و ترتيب و شغل صح وهو ابسط اشي ممكن يتواجد بمؤسسه خدميه للشعب و للزوار في المطار, وهاد كله مش موجود بمطارنا...وبعدين يعني؟؟؟؟

عفكره سمعت اللي بكوّم الشنط فوق بعض بحكي, يالله عملو نفس امبارح و حطو الشنط كلها على نفس القشاط, و المشكله انه اصغر قشاط....يعني الموضوع مش اول مره و واضح انه مش اخر مره راح يصير....

33 التعليقات :

Wow! the baggage claim story was so funny.

 

maho 3ashan hek .. ana et3awadet asafer"ayam makan 3endi jawaz safar".. eni a7mel hand bag only .. feeha kur2an s'3eer .. o mal2at adafer .. o shwaet wora2 men eli ebtelzam .. o nintando game )).. tab3an ana baji mofaja2a dayman .. 3ashan ma 7ada ywaseeni 3ala shi )))..
about the airport .. one time i almost miss my flight .. cos i had to pay the 20jd tax .. and i had only dollers with me. and nobody to exchange the money for me .. bas allah satar bel2a5er aja elsaraf.. o ya3ni tab3an eldoller sarat eemto men eemet elera elsori .. de7ek 3alay .. bas sho bedna ne3mal...(
o men hon la a7el mushkelet eljawaz .. shaklo mara7 anzal ela 3ala el 3ala almatar lejdeed :)

 

wallahe yemkin awwal she betla8zeeh b dubai howeh el matar...f3lan matar momtaz jeddan...tantheem 3la a3la mostawa ma betla2eeh 7atta b ba2i dowal el khaleej...e7na bensallem matarna la sherkat ajnabeyyeh wo bnetrek-hom yesra7o wo yemra7o wo yestafeedo bedoon ma yeltezmo belle 3alaihom...matarna kollo betl3 2ad mojamma3 Ra`3adan el jdeed wo allah bs be3lam keef mashi...matar dubai besta2bel 3 million za2er sanaweyyan wo halla2 azon saro 7 million wo mashi zy el sa3a,...balad el waqt feha elo qeemeh msh zy 3nna...wo eza entabahti 2bl el take off wo ettalla3ti 3al runway, r7 tla2i enno el tayyarat wa2feen zy khat el service bestana elle 2ablo yetl3 mshan yetl3 howeh....bs fe mola7aza kman 7lweh kteer, enno bs terj3i bet7essi enno shware3 3amman sarat dayy2a...la7azti hal ishe? :D

 

Saba7oo...
O 7elwa ya baladi :-D

 

ههههههههه تحفه

ما اتغير شي من وقت ما سافرت من 6 سنين
بس اكتر شي عجبني الهندي اللي اتطبع منا
لو انو بالامارات بس كان شفتيه فريره:)

 

يعني هاي الاشياء اللي بتخزي الها فترة و الكل حكى عنها و ما في فايدة
كنت اسمعت اذا ناديت حيا لكن .....
طيب ما قابلك واحد سئيل و قلك ليش مسافرة مالها الاردن بدكم تحرمونا منكم ليش
او متلا يحجز الجواز عندو و لما احكيلوا معلش ليش ماخد الجواز قالي و بكل صفاقة
بلكن بتغيري رايك معقول اهون عليكي و تتركي البلد
و اللي بقولوا وين العربايات برد علي هناك يا حبيبتي مفكر حلوا الاخ من جونية مش من عنا

اتفضلي على هالقصص
و على هالاسلوب
الحضاري
قالولهم كونوا بشوشين و محترمين مع العالم شكلوا وصلت الرسالة غلط

 

يعني هاي الاشياء اللي بتخزي الها فترة و الكل حكى عنها و ما في فايدة
كنت اسمعت اذا ناديت حيا لكن .....
طيب ما قابلك واحد سئيل و قلك ليش مسافرة مالها الاردن بدكم تحرمونا منكم ليش
او متلا يحجز الجواز عندو و لما احكيلوا معلش ليش ماخد الجواز قالي و بكل صفاقة
بلكن بتغيري رايك معقول اهون عليكي و تتركي البلد
و اللي بقولوا وين العربايات برد علي هناك يا حبيبتي مفكر حلوا الاخ من جونية مش من عنا

اتفضلي على هالقصص
و على هالاسلوب
الحضاري
قالولهم كونوا بشوشين و محترمين مع العالم شكلوا وصلت الرسالة غلط

 

looooooooooooooooooool
ta7sheesh wad3ek :D yam el shabara el neeleyyeh :D 7amdella 3al salameh :)
did u like UAE?

 

أسعد الله صباحك الجميل أختي ويسبر :)

فعلا ما أروع تفكير أمهاتنا الحكيم فبالتأكيد لاحظتي كيف كانت الشبرة النيلية طوق النجاة والتحرير من الاقامة الجبرية في أراضي المطار :)

في الواقع المشكلة لها أبعاد كثيرة وأهمها أن المطار والنقاط الحدودية الأخرى سواء البرية أم البحرية هي واجهة البلد والانطباع الاول الذي يؤخذ من الزوار و السائحين

ولكن وبكل أسف فإن هذه الفلسفة وأهميتها في إعطاء صورة مشرقة عن بلدنا مفقودة تماما

فمثلا كم نسمع من شكاوي الزائرين إلى الاردن إذا لم يكونوا طبعا من أمريكا واوروبا وأنا لاحظت معهم نفس الملاحظة في كل مرة أسافر فيها حول سوء معاملة القائمين على اجراءات التفتيش والرقابة فبكل أسف يتعاملون مع المسافرين بطريقة غير حضارية أبدا ناهيكي عن الاستقبال بالكشرة المرعبة بدلا من الابتسامة أو قول كلمة الحمدلله على السلامه أو في أمان الله ولذلك أعتقد بداية أن هؤلاء الاشخاص الذين من المفروض أنهم موجودون لخدمة المسافر لا بد من الحاقهم بدورات مكثفة في طريقة التعامل مع البشر

أما بخصوص الجوانب الأخرى المتعلقة بالخدمات العامة في المطار والاجراءات المتبعة في نقل الحقائب وتسهيل عملية وصول أو خروج المسافرين من و إلى الطائرة فأعتقد أن المشكلة تكمن في عدم وجود رقابة فاعلة على العاملين في المطار مما يدعو إلى الكثير من التساؤلات عن سبب هذا التقصير الغير مبرر أبدا بمشاريع توسعة المطار الحالية

أشكرك جدا ويسبر على طرحك لهذا الموضوع الذي يجعل من فكرة السفر لدينا في بعض الاحيان ككابوس مرعب نحاول تجنبه :(

 

وانتي زعلانة ، ضريبة جديدة على اساس انه السفر في الطائرة رفاهية يعني (طب الامارات في بالبر و خلال الصحاري بدها اشي و 30 ساعة ، بس نفسي افهم اللي بده يروح على امريكا شو يسوي)

ذكرتني مرة كنت بستنى واصل قبل ساعتين وكان في رحلة للسعودية و كل شوي خلال بغيروهم من بوابة لبوابة و الناس رايحة جاية ركض بين البوابتين كأنه في مارثون

بعدين الجهازين تبعات التفتيش للشنط اللي حاطينهم شكلهم كثير بضحك (ما تزعلو مني بس فضيحة يعني)

و الموظفين على الجوازت بحبوش يشتغلو كثير بتالقيهم قاعدين جو بدخنوا سيجارة وبشربوا شاي لاتزعلي

العربايات مرة بفلوس و مرة بدون (وبدون احسن بكفيش الضرايب اللي ماخذينها منا يعيني) و مع انها بلاش في عمال قاعدين نص دينار من هون و نص دينار من هناك!!!

و بعدين الموظف اللي حاطينه ياخذ الجوازت على الباب معلش يعني ياريت تشيلوه و التفتيش يكون بعد ختم الجواز و مرة ثانية قبل دخول الطيارة ، يعني شنته وزنها ثلاثين كيلو و حجة كبيرة كيف تحملها لحالها ، خلي الناس تدخل لجوة بعد الجوازات مافي داعي (على اساس انه صوتك مسموع وواصلة يعني :)

تحياتي
anonymous

 

زكرتيني مره طلعنا على المطار مشان نستقبل أختي..واحنا واقفين إلا طلعت وحده مع جوزها وإبنها إلي كان بجر العربايه.. والعربايه عم تمشي في إشي كان بنقط منها وشو ريحه بشعه طلعت..طلعوا الأخوه معاهم سمك وإبصر كيف عم بتسيل المرقه ولا الزيت -الله أعلم- تاعو وعبت الأرض بالمنطقه الي هيه أول ما تطلعي من جوه وتشوفي أهلك ..يعني ميت حد راح يمر من فوق الإشي إلي نقط وحيتوسخ المكان بزياده.. بس بعد 10 دقائق أجا موظف ونظف الأرض بس بعدما إتضرروا كتير ناس..

 

Whisper,
Awwal she el7amdella 3la salamtek :)
sara7a I used Amman's airport several times.. w kman lazem pass by el jiser ... yimken el ma6ar moqaraneh bil jiser bihoon :)

yalla inshalla kol afra w ti7kilna new stories ..

btw, sho a5bar 3orsan m3ek? zzaman ma smi3na 3n falee7 :D

 

هي بالجريدة كاتبين ب شباط 2010 رح يخلصوا شغل بالمطار

ان شالله تزبط اموره

والحمدلله ع السلامة مرة تانية, صح تعب بس ذكريات حلوة بتضلها

 

الا شفتي اسطوانة الغاز الجديدة في السعودية
http://www2.0zz0.com/2009/12/17/19/779081731.jpg

 

http://www.yabdoo.com/users/476/gallery/3645_p179747.gif

 

زي ما صار معي كنت جاي منشكح ومبسوط من دبي بس دخلت الاردن
بحكيلي الشرطي مع كشرة بتجنن
اطلع بالكمرة ...
عنا مستفزيين بالمطار ... ابوكي يالواسطه

 

Mar7ba whisper
Am so sad to hear what u had to go through WA awal wal a5er 7amdallah 3ala salama inshallah u enjoyed ur time. It so sad that all that happened be Jordan airport we go through the same thing when come to visit and we come to visit every 3 to 4 years and still nothing changed no improvement in any way .and every body works there Allah wakailk meen alzabal la 7ad akbar wa7ed shif 7alo be tri2 3'areba mish 3arfalish zai ma to2lee show off. Allah ya3nee 3ala tafish alee ba7soso alwa7ed abser sho 3amel wala sho jaib wala 3ala sirt al3rbait kaman s3a tatl2e wa7eda walzem trshee ale basht3'el honak bass 3alshn yas3d la wamabrda ya5ood akel men 10 dinar m3 inho hadee betkoon sh3'alto wa meen wajbo ya3mel heek .kool hada koom wa la7amamt koom tanee 3alaalwas5a wa a2let aldnfa la wasm3t inho fe wa7da bedal jwa al7ama bat5ood masre meen alnas allah a3alm bass they should check her out that just wrong .a55 5sra fee kol hadol almshkal fe matat dowalee zai hada walsa fe kaman .
Am sorry for my long comment bass the problem of having too many problems to talk about
Thank u again and have a good day
Noor

 

يعني هي ياويسبر بدها توئف عالمطار مهي الأمور خربانه خربانه ومنيح انه الشنط بينو في عالم تفقد الشنته ولا تعود
بتعرفي شز ذكرتيني بالقبول والتسجيل من كون متشنططين بالمعاملات وفش غير شباك واحد والموظفين التانين بطكو حنك وبشربوا قهوه واحنا بنتمرمر
عادور
وياستي الحمدلله على سلامتك

 

صباح الخير ويسبر
اول شي المهم الحمد الله على سلامتك
تاني شي المرة الجاي لما تسافري احكيلنا عشان نروح احنا كل المدونين ونحمل لا فتة عليها اسمك، ما دامت هاي امنيتك ...هههههه.... تالت شي قررت اني لما اعلق عندك دايما اكون مؤيد لكل كلمة عشان شكلك عصبية بالذات بعد ما قرأت " الشاب اللي كان نفسي امسح بكرامته الارض" فلذلك بعد قرأتي للبوست ما بقدر احكي الا
الله... الله طبعا مش خوف
دمتي بكل الخير

 

يلا الف الحمد لله ع السلامة، انا بفكر المطاحشة على السرافيس بس، طلع بالمطار كمان..؟ بطلت أسافر :)

 

يلا الف الحمد لله ع السلامة، انا بفكر المطاحشة على السرافيس بس، طلع بالمطار كمان..؟ بطلت أسافر :)

 

يلا الف الحمد لله ع السلامة، انا بفكر المطاحشة على السرافيس بس، طلع بالمطار كمان..؟ بطلت أسافر :)

 

Whisper this article was published in Al-Ghad today..

 

Jaraad

LOOL it is funny now, but at that time it was 3ag2a :$
Thanks for passing here :)

Zuhair

Zuhair!!! kont shebeh met2akdeh 2enno 2esmak Ziad O_o mesh fahmeh leash


Wallah w ho 2arya7 2eshe el hand bag, bs bt3rafna 2e7na elbanat ka7aweshna kteereh, lazem kul youm lebseh w kul lebseh 2elha shan6et-ha w kondaret-ha w 7gabha, y3nee bnege kteer 3a7alna bs na5od one bag and one hand bag :$

ktar elnas 2elly besta3'elo halzoroof w allah ysame7hom ma fe 3endhom dameer :(
inshallah yerga3 jawaz elsafar 3an 2areeb :) w bekoon elma6ar el jdeed 2a7san men heak...

مواطنون بلا حدود

bsara7a elma6ar fe dubai kteeeer 7elo w wase3 kteer w m3 heak fe tanzeem be kul makan w kul mar7aleh

halla2 fe 2alat btesm7lak te3mel boarding w te5tar elmq3ad fel6yarah 2enta w brte5taser wa2et w door w 6wabeer

w 3amalo mabna lal Emirates airlines la7alhom lessa 2af5am men hadak

2ah shofet 2abel takeoff elmanzar bejannen, kul el6ayarat saf 6aweel w nezam bel takeoff raheeb

fe 3enna 3oqool momtazeh bte2dar t7asen elwade3 bs bedal 3enna 3o2det el 3'arb w 2eesh ma 3emel bekon sa7 :$ allah yefregha

 

Naryat

Saba7o w masah sokkar ya rab :)
LOOOL 2akeed 7elweh :$

مياسي

لااا عحطه ايدك وما راح عليكي اشي من وقتها لهلأ

الهندي جد صدمني, انه مالك اتحرك يا ابني, وهو ولا عباله, واقف بتفرج علينا
بس ربنا الله ماسك اللي بمسح فيها الارض بايده, يعني عرأس عمله الشب :)

Jafra

ايه ايه ايه...هاد كاين يصير معك قصص وانت مسافره..اهون عليكي!!!...حبيبتي
لا هاي بدها بوست كبير :)

لا والله ولا حد حكى معي كلمه, غير واحد شوي وبدو يضربني كفين, بحكيلي اتطلعي بالكاميرا يا اختي :$

لااا ولا تكوني بشوشه مع حد...الله وكيلك نص العالم طلعت بتفهم غلط :$

 

NasEr

men el2a5er kan wad3ee :D

LOOOOL 2awal ma shifet elshabarah belma6ar 7akeet allah ysahel 3aleek ya Naser :D

Allah ysalmak...it's very very nice, really I liked it a lot, u should visit it I'm sure u will like it there too

Thanks for the follow :D

أشرف محيي الدين

الله يسعد صباحك و مساك :)
الله يخليلنا اياهم دايما بفكرو باللي ما بنفكر فيه, فعلا لولا الشبره كان قعدت وقت وانا بدور عالشنطه

انا بهاي المدونه و بالمدونه اللي كتبتها قبل بعنوان مطارنا العزيز مش قصدي الانتقاد قد ما كان قصدي ان لازم حد ينتبه لهالموضوع و يزبطه لاني مقهوره على منظرنا قدام العالم, لانه هالمعامله و هالمناظر ما بتمثل البلد ولا الشعب الاردني اطلاقا

انا ما بحس الموظف موجود لخدمتي اطلاقا و كلمه مع السلامه او الحمد لله على السلامه ما سمعتها الابمطارات البلدان التانيه
و بحس حالس لازم انتبه لكل كلمه وكل حركه علشان ما يزعل الاخ و يأخر معاملتي بس لانه ما عجبه تصرفي وهاد اشي ممكن انه يحصل بناءا على طريقه تعاملهم

عفوا اخي اشرف, ان شاء الله انه حد ينتبه قريب و يزبط من اوضاع المطار و نوعيه الخدمه المقدمه و يصير المرور بالمطار من ضمن متع السفر مش المنغص الاول في السفر

Anonymous

مهو في حكمه من انك تكون بالمطار قبل 3 ساعات, يا دوب تطارد, علشان ما تركب الطياره الا انت نايم وما تغلب المضيفات :)

القشاط هاد بكل المطارات, بس مساراتهم بتكون اكبر و بكونو اعرض و بوسعو الشنط بالراحه

و الموظفين بكونو فاهمين الموضوع غلط, بفكرو الشيفتات يعني بس شباك واحد يكون بمشي العالم و الباقي مش موجودين :)

هالمرّه عرضت فلوس للعربايه وبرضه ما اجت الا بالمقاتله :$

هاد معك حق 100% فيه, هو كل اللي حكيته معك حق فيه بس هاي جد قاهرتني
ليش بخلونا نحمل الشنطه 5 الاف مرّه جوه المطار ؟؟ يعني شو بده يفرق بالشنطه بس نفحصت قبل 5 دقايق ؟؟
و بالعاده ما في حد يحملهال و بصيرو الناس و خصوصا الستات الكبار و الصغار مشعتلين بهالشنطه و الكل بتفرج ولا حد بعرض انه يساعد

شكرا على توضيح الاسم بالنهايه :)
ههههههههه جد ضحكتني
اهلا و سهلا :)

 

Rula A.

ييييييييييي علينا سمك!!! ول عليهم اليهود
والتفتيش هون و بالبلد اللي كانو فيها ما لاحظو هالشي
مهو ناقصه المطار :$

هاد زي الشرطه بالفلام المصريه بيجو بعد خراب مالطه :$

------------------
قرأت الخبر بجريده الغد عن الصفوف الطويله اللي بتستنى حد يختملها هالجواز

ان شاء الله هلأ يحاولو يزبطو شوي بعد ما فضايحهم صارت بالجرايد
شكرا يا قمر :)

بيني وبينك وما تحكي لحد
اناكنت مصدقه حالي و فكرت ناشرين البوست بالجريده :")
هههههههههه

Jafar


Allah ysalmak ya rab :)

2akeed ma fe moqaraneh 2e6lakan been eljiser welma6ar, bs fe post la Naser 3an mo3anatoh m3 eljiser w kateb 2enno kan 7a6e6 shabarah 3ala elshan6a 3alashan yemayezha w had 2elly 2asadtoo

Allah ye3enkom w yefrejha 3alekom ya rab :)

LOOOL sa7 men zaman ma katabet belselseleh , 5alas 2areeb baktob 2essah jdeedeh 3an falee7 jdeed :D
Thanks for passing by Jafar :)

waiting for ur blog ;)

Ahmad Al-Mahrouq

ان شاء الله يزبط, و بركي اعطو لهالموظفين كم دوره تفهمهم شو مستلزمات شغلهم بالزبط

الله يسلمك, صح الحمد لله ذكريات بتجنن :)

 

Anonymous

يا مبروك يا مبروك...بصراحه شكلها كتير حلوه و حسب ما كاتبين كتير امنه للاستخدام
عقبال ما توصلنا :)

قط البكتريا

هههههههه بالزبط هاي الكلمه الوحيده اللي حكالي اياها و حسيته نفسه يسلخني كفين عالماشي :(

لا مش مستفزين, هاد العادي تبعهم :)

nrjordan

Ahlan wasahlan be Noor :)
Allah ysalmek ya rab el7amdolellah I enjoyed it up to the limit zay ma be7ko w men sneeeen:)

m3akee 7a2 elkull shayef 7aloo b6are2a 3'areebeh,w ma fe 7ad besa3ed w be7ammlek jmeeleh w bya5od floos O_o

Yeeee 3al7ammamat 2ana 7akeet 3anhom fe post 2abel, 2eshe mo5zee w mosh mhaya2een 7atta la 2ennek t3'ayree lal baby fehom :$

I LOVE long comments , wala yehemmek el blog t7t 2amrek :)

Same to u ya amar :)

w don't be sad elkul be3anee shakloo :$

 

ميسم

معك حق, خربانه و بجداره, وعلى رأيك :)الحمد لله اللي طلعت بالشنط

اياه التسجيل كانت ايام, حرب الله وكيلك, و دايما اللي بالقبول والتسجيل بكرهو الطلاب ومش فاهمه ليش, بنبسطو بس يحكولك سكرت الشعبه, ليش بنفش قلبهم مش فاهمه :$
الله يسلمك يا قمر :)

نادر احمد

صباح ومسا الورد :)
الله يسلمك, مشيت على خير والحمد لله :)
هههههههههه فكره, خلص السنه الجاي بعمل اعلان, بس جد انبسطت بس شفت اسمي :)

لاااا ولا عصبيه ولا اشي , في فرق بين كان نفسي امسح بكرامته الارض و بين مسحت بكرامته الارض
يعني الموضوع ضلو بيني و بين نفسي و لمّا وقفت قدام الشب زي الشاطرين حكيتله الله يعطيك العافيه و الابتسامه على وجهي ولا كأنه في اشي :")
جبانه بعيد عنك :)

شكرا نادر :)

حسام كراسنه

الله يسلمك يا رب, لا المطاحشه بكل مكان صارت, منيح اللي بيعطونا ارقام المقاعد بالطياره كان اكلنا هوا :$

لا لا سافر...مغامرات جديده من نوعها بتعيش :)

 

هممم
لدي خبرة كبيرة في التعامل مع موظفين المطار و موظفي الحدود من كثرة ما سافرت خلال السبع السنوات الماضية لدول مختلفة ، وكل مرة من معبر أو مخرج مختلف

الخلاصة أن الجلافة تميز المعابر البرية بشكل خرافي وبالنسبة للمطار فيا أخوان الحق يقال في تقدم كبير في أخر سنتين

ولقد زرت الأردن من شهر تقريبا و صراحة معاملة تدقيق جواز السفر أصبحت أفضل بكثير خصوصا أنهم توقفوا عن السؤال الأسطوري الذي أكرهه بشدة وهو
أنت من وين؟؟؟

ولا تعليق عليه

وطبعا إذا عندك واسطة فحدث ولا حرج ، اتذكر في المرة السابقة قبل سنة ونصف كنت مسافر وكان لدي زيادة في الوزن وكنت خائف جدا لأن تكلفة كل كيلو مكلفة جدا بسبب بعد البلد

ولحسن الحظ عندما وصلت للموظف الذي يقوم بالوزن وعمل بطاقة الصعود للطائرة ، طلع زميلي من ايام الجامعة :)
وطبعا تم تمرير الوزن الزائد بدون أن أدفع اي فلس زيادة :)

لتطوير خدماتنا يجب تغير عقلية جيل كامل للاسف

المهم الحمدلله على سلامتك و سفرة سعيدة و ان شاء الله المرة الجاية بيكون تم تحديث المطار وأهلا و سهلا بك في الأردن المضياف

 

له له له كنت بالاردن وما حكيتلنا :$
الحمد لله عالسلامه, وتروح وترجع بالسلامه ان شاء الله :)

ممكن ما سألوك لانه حفظو اسماء العائلات و العائلات المشتركه صارت قليله

الواسطة للاسف لساتها الورقه الرابحه في كل تعاملاتنا بس يلاا فرصه تستفيد من اشي :)

الله يسلمك ...ان شاء الله و انت بس تيجي يكون الوضع افضل و افضل :)

 

ماهو أنا نزلت الأردن و أنتي كنتي في الإمارات

خلص خيرها بغيرها :)

شكله الاردن ما بتتحملنا أحنا الأثنين مع بعض ، رح تكون منورة كثير :)

 

ان شاء الله خيرها بغيرها, و بتنور الاردن و انا بكون صرت قديمة هون و انطفى النور شوي :)