Things I Like To Whisper About

Would You Hear Me Whispering

البيوت مغلّقه... والهموم مفرّقه

اليوم بدي احكيلكم عن 3 بنات تشابهت قصصهم لحد كبير مع اختلاف الاحداث, ال3 بنات خطبو و تزوجو بنفس الوقت تقريبا قبل سنتين

اول بنت تزوجت من شخص على مستوى كبير من الثقافه والعلم و كان وضعه المادي فوق المتوسط, كانت فتره الخطوبه سريعه جدا وضاعت كلها بتجهيزات العرس و البيت, و تزوجو و بعد شهرين رجعت البنت لبيت والدها لانهم اكتشفو وبعد اجراء الفحوصات اللازمه ان الزوج لا يصلح للزواج , وما حصل الطلاق فورا لان قانوننا الجميل بفرض على البنت انها تضل مقيمه مع زوجها لفتره 6 شهور و اذا بقيت العلّه موجوده بعدها ببدو باجراءات الطلاق, وبما ان الزوج طلع لا يطاق على جميع الاصعده فالبنت و اهلها فضّلو انهم يدفعو للعريس كل اللي صرفه حتى يتم الطلاق لانهم ما بدهم اي حلول تانيه تطول فتره ارتباط بنتهم في هذا الشخص, ورؤجعت البنت لبيت اهلها زي ما طلعت منه قبل شهرين.

البنت التانيه نصرانيه, وافقت تتزوج العريس اللي تقدملها لانها كانت على علاقه حب و خطوبه مع واحد من عيلتها وصار مشاكل بينه وبين والدها على تحديد موعد العرس , لان العريس مقيم بالخارج و لمّا رتب اموره مع شغله على موعد معين ابو العروس و بس علشان يفرض رأيه ما وافق عالموعد و احتدت النقاشات ووصلو اخر شي الى ان ابو البنت حكا للشب ما عنّا بنات للزواج سافر الشب و خطب وتزوج من بنت عربيه مقيمه بنفس البلد اللي بشتغل فيها, فالبنت وافقت على اول عريس تقدملها, بتفكر انها هيك بتنتقم منه وما كانت تعرف انها بتنتقم من حالها.
مشيت الخطبه على خير و وقت العرس حكالهم الشب ان امكانياته ما بتسمحله يعمل حفله ريسبشن - الحفله بعد ما يخلصو اجراءات الزواج بالكنيسه - فالاب حكا انه هاي الحفله عحسابه وانها راح تكون هديته للعرسان, تزوجو و سافرو عتركيا شهر العسل رجعو وتاني يوم من رجعتهم الشب حكا للبنت انه في رجال من عيلته زعلانين من والد العروس لانه بدرت منه كم من كلمه على جاهه الرجال اللي اجو ياخدو البنات, انه استقّل عددهم وعلق بما معناه انه وين الرجال هو ما في رجال بعيلتكم....
وفعلا راحت البنت لبيت اهلها زياره عاديه المفروض توصّل وجهه نظر زوجها و يجي بالليل ياخدها, ومن يومها -قبل سنتين - لهلأ والبنت عند اهلها و العريس و ابو العروس معندين من فيهم اللي غلط, وبما انهم نصرانيين فالطلاق عندهم بده موافقه كنائسيه و ما بتحصل الا في حالات نادره لاتنطبق عليهم.


البنت الثالثه, خطبت و تزوجت بفتره قصيره, الزوج بشتغل بالخليج و مش موافقين يعطوه اجازه طويله من الشغل و اذا اخد اجازه هلأ ما في اجازه تانيه الا السنه اللي بعدها, فتم الموضوع تقريبا بشهر, تزوجت البنت وسافرت و بعد سنه اجت زياره لاهلها لانها حامل و تعبانه وبحاجه لامها, كان الزوج مثال للزوج المثالي , البنت كتير مبسوطه و بتشكر فيه, سافرت البنت لعند زوجها عالخليج وراحت امها عندها وقت الولاده و كان حاطط البنت وامها على راسه حسب ما ذكرتلنا الام بس رجعت, قبل 3 شهور البنت اجت تحضر عرس اخوها, واضح ان البنت متغيره لكن المسؤوليات الجديده , البيت و البيبي الاّ ما يغيرو فيها اشياء كتيره.

بيوم من الايام وهي بتحكي عالتلفون مع زوجها اللي بالخليج وهي قاعده بين اهلها, فتحت السبيكر فجأه, طلع صوت الزوج وهو بصرخ و بسب وبلعن بابذء المسبات , انصدم الاب ومسك التلفون و حاول انه يفهم من الزوج ولمّا ما لقى ان في فايده سكر الخط, ولمّا سألو البنت, طلعت البنت من بعد ما سافرت امها بفتره قصيره مكتشفه ان زوجها بخونها, بحكي مع بنات عالنت و عالموبايل و بتواعد معهم و بتلاقى معهم برّه, وانه كان يغيب يومين وتلاته عن البيت عاساس انه عنده شغل بمدينه تانيه و تكتشف انه يكون مع وحده من هالبنات اللي متعرف عليهم, ولمّا واجهته قلب 180 درجه وصار يضربها, وحبسها لمده اسبوع بغرفه النوم و كسر موبايلها و بعد ما قدرت تضحك عليه و تعمل حالها انها بدها تتفاهم معه واعتذرت عن تدخلها بشؤون حياته, وصار يحكي مع البنات ويتواعد معهم قدامها, قدرت تقنعه انها تنزل عالاردن تحضر عرس اخوها, ولمّا وصلت ما حبت تحكي لاهلها لحتى يخلص العرس علشان ما تخرب عليهم فرحتهم, والبنت حاليا رافعه قضيه طلاق بالمحكمه


هدول 3 قصص لناس حقيقيين عايشين معنا وحوالينا, كلنا بنعرف ان البيوت اسرار و ان كل انسان عنده الهموم اللي تكفيه واللي على قدّه, ممكن هم انسان يكون سخيف بنظرنا بالنسبه للي بنعانيه احنا, وبرضه ممكن همنا يكون سخيف عند ناس تانيين, الحمد لله على كل حال.

السؤال اللي بدي اسأله, كيف ممكن ترتبو هالقصص التلاته من الاكثر صعوبه للاقل صعوبه, مع مراعاه البيئه اللي بنعيش فيها و الافكار الاجتماعيه اللي عند اللي حوالينا, من قصتها اصعب من التانيين؟؟؟

انا برأيي ان البنت التانيه هي اصعب شي لانه تقريبا و لهلأ ما في انفكاك .
احترت باللقصه الاولى واللي برجح انها تكون ابسط و بين القصه الاخيره
هلأ انها ترجع لبيت اهلها بدون اولاد عند ناس كتيره افضل من انها ترجع باولاد, لكن بنفس الوقت انها تكون طلعت من هالتجربه الفاشله بولد يكون هدفها واساس حياتها برضه اشي ايجابي...
انتو شو رأيكم؟؟؟

18 التعليقات :

Wallah ya 3azeezti ma fihom wala wa7deh betsorr el 5ater :-S
Bejoz bedi a7ot-hom el talateh bnafs el mustawa...
El2ula m3 ennha fe3leyyan el 2a5aff dararan, bs hadi el benet kef bedha terja3 tfut belmojtama3? o kef momken trod tfoot bmashru3 zawaj bedun ma te6ar teshra7 kol 2eshi? tab had mu r7 y7ases-ha ennha makshufeh o my5taraQa? Y3ni hai momken telta2i belli bestahalha o y7ebbha o y2aderha o ma terda ysir benhom ayya 2erteba6 mshanha mu 2adreh te7ki elli 3endha!!

Weltanyeh Allah ykun be3onha... y3ni shu had? la heyye ma3o wala heye 5alsaneh menno! o 2abuha kol shwai bet-hawash m3 7ada o heyye elli betu7 fiha! :-S

Weltalteh kaman wade3ha sa3eb kteer... y3ni hu 2osset enha tetla3 men el zawaj bwalad momken tkun ejabeyeh o momken l2... momken el walad ykun moshkelet el mashakel iza kan el 2ab 3a2lo se3eb o kan mashkalji o momken yesta3'el el walad mshan yel3ab 2l3ab nathleh 3al2omm...

ana daaaaariiii....

Allah ykun b3on el jamee3!

 

Wallah ya 3azeezti ma fihom wala wa7deh betsorr el 5ater :-S
Bejoz bedi a7ot-hom el talateh bnafs el mustawa...
El2ula m3 ennha fe3leyyan el 2a5aff dararan, bs hadi el benet kef bedha terja3 tfut belmojtama3? o kef momken trod tfoot bmashru3 zawaj bedun ma te6ar teshra7 kol 2eshi? tab had mu r7 y7ases-ha ennha makshufeh o my5taraQa? Y3ni hai momken telta2i belli bestahalha o y7ebbha o y2aderha o ma terda ysir benhom ayya 2erteba6 mshanha mu 2adreh te7ki elli 3endha!!

Weltanyeh Allah ykun be3onha... y3ni shu had? la heyye ma3o wala heye 5alsaneh menno! o 2abuha kol shwai bet-hawash m3 7ada o heyye elli betu7 fiha! :-S

Weltalteh kaman wade3ha sa3eb kteer... y3ni hu 2osset enha tetla3 men el zawaj bwalad momken tkun ejabeyeh o momken l2... momken el walad ykun moshkelet el mashakel iza kan el 2ab 3a2lo se3eb o kan mashkalji o momken yesta3'el el walad mshan yel3ab 2l3ab nathleh 3al2omm...

ana daaaaariiii....

Allah ykun b3on el jamee3!

 

كلهم شعبين طبعا بس من الاصعب للاسهل
3
2
1
يعني بدون اولاد احسن لانه ان شالله فرصتها انه يجيها فرصة تانية بتكون اسهل

 

iza biddek yahom bil tarteeb:

1- osset il tjawwazt 3a ghorbeh o jozha darabha

2- il 7ardaneh 3ind ahilha

3- ili ma dakhal 3alaiha

aswa2 ishi tkoon il binet mitgharbeh o mazloomeh!!!!

Allah ykoon fe 3on il nas :(

 

كلهم صعبين وبعكسو واقع مؤلم بعيشو ناس كتير بهالدنيا, لو بدي ارتبهم حرتبهم عالتالي:

1- قصة البنت النصرانية لانو عناد الأهل والزوج هو اكبر خراب للبيوت

2- زوجة المريض(الخائن), لانها كبداية كانت سعيدة وبعديها بين عوجهو.

3- الزجة الأولى لانها صاحبة أقل الخسائر بين الزيجات التلاتة

 

"كان يجب ان لاتتركها هناك...بين الارض والسماء"

تحياتي لك ويسبر وصلني النعليق و شكرا لك على النصيحة لكن تعقيدات الوضع أكبر من قراري في وقته

أسعدني مرورك و آسف لأني أعدمت البوست خوفا من انتشار عدوى جنون البشر

راح أعلق على البيوت و الهموم لاحقا

 

مرحبا همسه والله انتي بتستاهلي كل خير وكتاباتك دائمن شيقه انا قراه كل الموضيع الي نزلتيهم اخر فتره بس ما علقه اعزريني :)
ال3 بنظري مأساه وكل الاشخاص المعنيين بالحدث سواء الزوح الزوجه اهل الزوجه اهل الزوج هما الغلطانين وبعتبرها قله فهم وما عندهم نظر ولا حكمه. في بالزمنات كانوا الكبار يدخلو ويردو الحردانه معززه ومكرمه لبيت زوجها . بس هسه بنلاقي الصغير والكبير عامل طوشه عشان يرد المراه لبيت ابوها وبضلها طول عمرها بنظر المجتمع انها مراه مش كامله او عاله على المجتمع هادي مطلقه دايمن هيك بسمع من اكتير ناس وحتى لو زوجها كلب واسفل من الي في الرجل الله ايعزك ويعز السامعين بضلها هي الناقصه والمجتمع بحكم عليها بالاعدام .
وبعدين انا ضد انو تتصل وحده على البيت تحكي ايش عندكو بنات وتقعد تاخد المواصفات وبعدين تطلب موعد عشان اتشيك هي وابنها على البضاعه كل الناس خير وبركه ما بدي اانو انفهم غلط بهالموضوع بس انا ضد هادا المبدئ هادا زمن اول لمن كان الرجال قبل ما يجي يتخشش ابيوت ايكون معروف اصلو وفصلوا لمن كانت الناس تعرف بعضها هسه والله جيرانا اذا بالاعياد شفناهم مره بكون خير وبكره يعني في عادات وتقاليد لازم تتغير ايش زنبها البنت الي يجيها واحد من الخليج لا بتعرف كيف بتصرف وكيف حياتو ولا اشي وكمان بتحكي شهر ايش هادا حاسه انو صاره فيها عمليه بيع وشرا كيف اهلها رضيوا يعطوها لانسان غريب
والله المسكين الضحيه بكل هالقصص الاطفال
:(والله يا همسه الحيطان فيها هموم كتيره
الله يستر على الناس ويعينهم

 

I second Tamara, Living away with a bad husband makes your life like hell.
ba3rif wa7deh who just went back to her family in Jordan, and her husband is still here, but looking for a new bride, 3ala tool!!
And everyone was saying: il hamdillah mafi bainhom awlad!
It's all hard to be honest, Allah yistor 3ala byoot il nas! :(

 

Puppies for nothing, chicks for free : ) That’s what I think ya “Whisper”

 

صباح الخير .... بصراحة انا اللي زمان بقرأكتابتك كتيييييييير حلويين
عنجد مرات الواحد بكون لازم يحكي مشان يرتاح
ولهيك انا تشجعت اعمل مدونة وحابة تزوريها وتكوني صديقة الي واخد ارائك
المهم كتيييييييييير حلو اللي كتبتي والخافي اعظم عنجد

 

Naryat

you are right ..y3nee halmawqef kteer sa3eb ra7 yekoon, w 5ososan 2enno ra7 yetkarrar m3 kul 3arees jdeed :S

3'ear 2enno momken 2ahelha ye63'ato 3aleha tetzawag 2ay wa7ad elmohem ma tdalha sabab 3aar 7asab weghet nazarhom.

eltaneh 2aboha allah ysam7oo mesh fahem 2enno be3aned 3ala 7sab bento w 7ayat-ha :$

sa7, kteer bnesma3 3an nas bemarmeroo el6araf eltanee 3alwlaad w 3ala shofet-hom

ameeen ya rab
thanks ya amar :D

Anonymous

انا كمان رأيي من رايك
الاولى حاسستها اهون شي
الله يعينّا ويعين العالم

Tamara

bardo feha wejhet nazar.. b3eeedeh 3an 2ahelha w yestafred feha kteer sa3beh :S

Ahmad Hamdan

للاسف اه, و هاي مش قصص فرديه وحالات نادره, بس البيوت اسرار زي ما حكينا

شكرا احمد :)

 

ثائر جبر

اهلا وسهلا فيك دائما
وبعتذر اذا كان تعليقي مش بمكانه :$

يا ريت الناس تنعدي بجنون البشر اللي بتحكي عنه, كان تغير العالم

بستنا تعليقك :)

Jarat

الله يعطيكي العافيه المهم انك دائما تنوريني :)

كتيييييييير اسعدني تعليقك
عبرتي عن اشياء نفسي احكيها بس اني بعرف اصحاب القصص خلّاني اتردد بكتابه هالاشياء

زواج الصالونات زي ما بسموه هي طريقه الزواج الدارجه و حتى اللي برفضو هالطريقه بضطرو يوافقو عليه :$

فعلا الناس كانو بعرفو بعض اكتر,انت هلأ اقرب الناس الك مرات بتنصدمي بطريقه تفكيرهم مع انك بتكوني عايشه معهم بنفس البيئه ومتربيين نفس التربيه

 

Nido

Welcome ya amar to my space :D

you are right, being away and feeling like you have no one to stand by u is very bad

kteer bnesm3 behal2essas
jad allah ye3een elnas , w yestor 3ala byoot elnas :$

Khaled

Sorry...I didn't understand :$

Farawlaa

صباح ومسا الورد :)
اهلا وسهلا فيكي دائما و بتشرّف بزيارتك لمدونتي و بزياره مدونتك

والله القصص كتيره و الظلم كبير من حوالينا
الحمد لله على كل حال

 

وبعتذر اذا كان تعليقي مش بمكانه :$"
"
الله يسامحك على هالحكي
بالعكس كان الحلقة المفقودة لكن بقية الحلقات ضايعة
يا ريت ما نسمع هالأعتذار مرة تانية

:)

 

اللهم اصلح ذات البين
الدنيا أسهل من هيك لكن عقولنا بتزيد من صعوبتها و من شقائنا , نحنا بحاجة لفلسفة جديدة تخلينا نعيش الحياة بسهولة واقعها..

جوابا على السؤال برأيي كل القصص أصعب من بعض و النهايات الثلاث هي الفشل و الأحباط

القصة الثالثة أنا اتنفست الصعداء لمن حكيتي أن كان الزوج مثال للزوج المثالي , البنت كتير مبسوطه و بتشكر فيه,,,,,,,,لكن يا فرحة ما تمت طلع ندل

أنا مضطر أعمل اجرائات تصعيدية ...مظاهرة مثلا إذا لم تشتمل أعمالك على هموم الرجل و ذكر الضحايا من الرجال

 

ثائر جبر

شكرا ثائر وان شاء الله بتلاقي كل الحلقات الضايعه و تلاقي الحلول والاجوبه

خلص اخر مره :)
-----------------------

امين يا رب

مشكلتنا بالفلسفه الشخصيه لكل واحد , وهاد اللي عمل التعقيدات
فياااا ريت نبعد عن الفلسفه :$

صح..صح انا وعدت بكتابه شي مناصر للرجل
بس المشكله مش لاقيه قصه رجل واحد مظلوم او مهموم او رجل واحد كان ضحيه :)
شو اعمل انا؟؟؟

 

الله يحفظنا ويستر علينا،، أنا ديماً رأيي إنو لازم تكون في فترة خطبه بما لا يقل عن ٦ أشهر ولازم العريس والعروس يحكو كتير ويفوتوا بمواضيع كتير عشان يعرفوا بعض أكثر.. وكلما تخانقو بفترة الخطبه كلما كان أحسن عشان راح تقل المشاكل شوي بعد الزواج.. ولازم الواحد ما يتسرع أبداً بهيك مواضيع ويسأل منيح عن العيله والأصل والفصل.. وبل أخر كل شئ قسمة ونصيب..

 

Rula A.

والله مرات حتى مع فتره خطوبه و كل شي بكون تمام فجأه بتظهر اشياء جديده ما كانت مبينه بالمره

الله يعين العالم...نصيبهم اولا واخرا
الحمد لله على كل حال :)