Things I Like To Whisper About

Would You Hear Me Whispering

جد عالم ما بتستحي....

قبل شهر تقريبا انعزمت على عرس اخت صاحبتي, العرس كان كتير حلو و كل شي مرتب, العرس كعاده اكتر الاعراس هالايام مش مختلط, انا بالعاده ما بشيل الحجاب ولا بتحرك من مكاني طول ما في تصوير, حتى لو اكدولي ان اهل العريس و اهل العروس متدينين ولا يمكن حد من الشباب من العيلتين ممكن يشوفو الشريط, خلص قناعه وماشيه عليها, اكتر شي ممكن اعمله اني اقوم ازقف و ادور مع الصبايا حول العروس.

العروس ما قدرت تشوف شريط العرس لحتى وصلت البحرين, وهي البلد اللي راح تستقر فيها هي و زوجها, قعدت هي والعريس حطو ال دي في دي لقوه فاضي وما عليه شي, حطو الشريط اشتغل وكل شي تمام, وبس خلصت الزفه و بدى التصوير بالقاعه, بدى عرس ناس تانيين, عروس و عريس و صبايا كلهم من عيله غريبه, انصدمو المساكين ولاخر الشريط كمل عرس الناس التانيين, البنت اتصلت باهلها تبكي مصدومه و بتحكيلهم اذا اكيد هلأ شريط عرسي عند ناس تانيين, البنت ملتزمه بالحجاب هي و خواتها و خوات العريس, و اللي كاي خوات عروس وعريس كانو لابسين و متجهزين للعرس عاساس ما في حد غريب ممكن يشوف الشريط.

المشكله ان صاحبتي حكت مع الستديو التابع للصاله اللي عملو فيها العرس, الموظفه ولا على بالها وكأنه اشي عادي وبصير معهم كل يوم, وبالعكس بتبرر و بتعطي اجوبه زي عمايلهم ...زفت, و بتجاوب بكل برود ان ما ضل عنا نسخ من العرس, بتحكيلها صاحبتي يعني شريط عرسنا صار عند ناس تانيين, بتحكيلها الموظفه مش بس اختك المسكينه, ما العروس التانيه ضاع شريط عرسها كمان, انا كان نفسي امد ايدي واطولها من التلفون, ولك يا بطيخه افهمي, الموضوع ان انتو وديتو شريط عرس لناس مش صحابه واحنا اصلا اجينا عندكم لان البنت محجبه وطلبنا ان يكون التصوير و التحميض عند بنات لان بنات العيليتين محجبين, بتقومو انتو بتودو شريط العرس لناس تانيين هيك....

المهم اخر اشي قررو خوان العروس يروحو عندهم و بدهم ي %$$#$%#$ عيلتهم لهالستوديو, نفسي اعرف شو صار, للاحد لاعرف اخر الاخبار, ان شاء الله ما يكونو مشو الموضوع بدون عقاب ...

هلأ انا صرت اشك بكل ستوديو, بركي حكولنا ان بنات اللي بشتغلو وبعدين ما يفرق عندهم ويخلو شباب يحمضو الصور و الافلام؟؟؟؟

بحكي لبنات خالتي القصه, بتحكيلي بنت خالتي انه صايره مع صاحبتها قصه مشابهه, كيف بس كنا نجيب افلام فيديو و نقدم الشريط باخر الفيلم نلاقي نهايه فيلم مسجل قبل على الشريط, هيك صاير معها خلص شريط عرسها و بدا اخر غرس تاني مسجل عالشريط....

يعني لا امانه ولا اخلاق ولا اشي, هدول المفروض يحلفوهم يمين لما يبدو يمارسو هالمهنه لانه فيها كشف للبيوت و للعالم و اشي مش سهل بصراحه

حسبي الله ونعم الوكيل بكل مين ما بكون امين بمهنته....

18 التعليقات :

عن جد اللي استحوا ماتوا من زمان
يعني شو ما عملوا اخوانها قليلة فيهم يعني على الاقل يبذلوا شوية مجهود في الاستوديو في احترام غضب الناس
عن جد مقلب

 

والله يا همسة انا بهاي الأمور بلوم بس أصحاب العلاقة .. عارفة ليش؟ لأنه كل بيت صار فيه كمرا رقمية .. على الأقل .. و اذا مفكرين بتصوير فيديو .. ممكن يستأجروا كمرة بسهولة أو حتى يشروا وحدة لو كانوا قادرين

صحيح الاستوديوا بعملوا مونتاج و حركات .. بس ما بتستاهل انه الواحد يغامر بهيك موضوع

انا بس اتجوز ما بدي اجيب فريق تصوير من الاستوديو .. بدي أجيب فريق أمني من المطار مع ميتال ديتيكتور لأنه ممنوع دخول الأجهزة بأنواعها
:)

 

لا حول ولا قوة الا بالله بس و الله في غلط كبير بتحمله الاستيديو يلي سوا الشريط ووزعو يعني اعراض الناس مش لعبه بايديهم هدوله لازم يرتفع عليهم قضيه يتجرسوا على عملتهم عن جد هادا موضوع ما بنسكت عنو والله انا نفسي امسك هالموظفه واكسرلها راسها عن جد يا همسه انا طلع عقلي الغزاوي وانا بقرؤو للموضوع
بس دائما الله الو حكمتوا ودائما الانسان يخلي ايمانو بالله كبير ويصبر على ما ابتلاه وانشاالله مؤجورين على هالمصيبه,

الله فوق شايف وعارف:(
يعطيكي العافيه

 

بتصير لهيك والافضل انه الناس تجيب كاميراتهم معهم بلا مصورين بلا بطيخ خاصه انه ما في احترام للخصوصيه في بلادنا وبيكونوا يتعاملوا مع المواضيع هاي ولا كانه مصيبه صايره بس صراحه هاي المصورة بدها ضربه على راسها

 

اممم بصراحة اشي بقهر ...
بس عارفة يا همسة , بكل حفلة بروحها وبشوف البنات كيف بعجبو بلبسهم .. حتى العروس..كانه اليوم بطلت محسوبة انو طول عمرها بتتحجب . انو خلص بهاليوم كانه بصير كل شي مسموح ... هاي من جهة ومن الجهة التانية ,بوافق أمجد وسوزان ... انو شغلة متل هيك حساسة جدا .. يعني حاملة فيها خطية اكتر من 30 بنت
وعلى راسهم العروس المبجلة

منشان هيك امي بتحكي , لا خليه عرس يفوتو فيه اخوان العروس والعريس,والبنات يضلو مسترين ,والعروس لابسة كم, ولا تصير كل هالعجايب الللي بعملوها .. انا متاكدة انهم لحالهم هيك بالبيت ما بيلبسو ... ومتل ما حكيتي بس يصير عند اصحاب المهنة ذمة وضمير,ساعتها بتصير البنت متطمنة ... وبأكدلك بعمرها ما رح تصير
والله يعوض عليهم

 

Jafra

ويا ريت حاسين بغلطتهم
مقلب من الاخر ....ورطه

Amjad

فكره بصراحه ما فكرت فيها من قبل :$
ومش غلط بالمره الا ما يكون في حد بعرف يصور ومش ضروري كل الحفله لقطات للذكرى

شو بالنسبه لعرسك!!!! شوووو حاسه حالي رايحه مؤتمر صحفي
خلص بطلت اجي :(

Jarat

اولا مبروك افتتاح المدونه يا قمر
لا تطولي علينا بالكتابات الحلوه :)


حاليا وبما انه الاعتماد الاساسي عالستديو بتحمل كل المسؤوليه
لكن للاسف مش مقدرين حجم الغلطه اللي ارتكبوها, بتمنى الموضوع يكبر لانه مش بسيط وخليهم عبره لغيرهم

الله يعافيكي يا رب

 

Sozan

اهااا زي رأي امجد
جد عجبتني الفكره و اقتنعت فيها بصراحه :)

نفسي تكون قدامي كان عملت فيها العمايل :(

eNAS

انا مش مع المبالغه, لكن اكيد البنت بعرسها بدها تكون لابسه غير عن اللب العادي اللي بتلبسه, ومش ضروري تكون معجبّه على حالها

مجرد ان البنت تكون حاطه ميك اب و من غير حجاب مشكله ان حد يشوفها...

المشكله بالمختلط انه ممكن تكون فيها حرمه, و ما بدك حد يبدا اول خطوه بحياته الجديده بحرام :$

انا حضرت عرس مختلط ما في اغاني كله دبكات و الشباب همه الوحيدين اللي كانو يدبكو و بصراحه عجبني لكن ما بعرف اذا حلال ولا حرام هالعرس !!!
انه اختلاط يعني

 

مرحبا ...من زمان ما اجيت وحقك علي بس كنت زي اللي بغيبوبة..المهم.. الحمدلله على سلامتك وإن شاء الله ما تشوفي شر..وكل عام ومدونتك بخير مع انها
متأخرة.

بالنسبة لموضوع التصوير..والله حرام عليهم الاستهتار هيك..وعلى فكرة اكتشفت مرة انه ما بهمهم اذا كانت حفلة بنات وبدهم بنت تصور..بالآخر أي حدا بحمض الفيلم عندهم عادي..والله كنت بدي أكتب عن اشي زي هيك لأني الي أكم يوم بدور على استوديو عندهم بنت تطبع الصور وما لقيت :/

 

اللي اختشوا ماتوا

 

Dreamy Villager

الله يسلمك و انت بالف خير يا رب :)
ان شاء الله تكوني هلأ احسن وتأقلمتي مع رمضان

هاي المصيبه, وحسيت هالشي من رده فعل الموظفه كأنه شي بصير دائما
والله بدك تنعبي لتلاقي حد تثقي فيه :$

Sharm

الله يرحمهم :)
اهلا وسهلا فيك دائما بمدونتي :)

 

يعني انت فكرك حتى لو طاقم التصوير بنات، الفلم لن تمسه ايدي الشباب؟ ياما في استوديوهات بتعمل نسخ اضافية و بتبيعه على اساس انه فيديو حفلات و اغاني
يا ريت تسمعينا الاخبار الطيبة بانه اخوانها كسروا الاستوديو

 

Allouh

كنت افكر هيك بصراحه....لكن هلأ بطلت اثق بحد :$

حسب ما حكتلي صاحبتي انهم حكولهم ان الشريط قديم ومسجلين فوقه, وانهم اعطوهم اشرطتهم الصح !!!

لكن خلص ما في ثقه بصراحه..

 

مرحبا..
شدني هالموضوع بصراحة..
احنا بغزة عنا بتكون بنت اللي بتصور ولما يروح للتحميض أصلا العريس هو اللي بياخدوا وبيتم تحميضوا من قبل بنت وقدام عيونه.. وبحطوا بجيبتوا وبيروح ع البيت:D
تحياتي للجميع
هاي أول زيارة إلي لمدونتك

 

eeeee
3njd samet badan!!
7sbi allah 3lehoummmmmm!! Shu had m32ool!
ana bkhaf mn hl osas.. bs kman keef el wa7ad bdo ysawer 3rsooo..

ma khtlfna ino kel bait feo kamerat w heek,, bs bnhayeh keef bytl3 el tsweer... mrajraj w noso 3l rejleen aw 3asa2eef..hehehe :D

MO MN EL MAFROOD ETZALATO KTEEER :p
w edawro 3ala m7lat 3l 2aleleh m3rof meen feha,, akhh walahi hakaltoni ham tasweer 3orsi mn hala2.. brki 3ala youmi bekoun i'7tra3o she jdeed LooooooL :p

 

سيران نوفل

اهلا وسهلا فيكي دائما سيران :)

حلو عالقليله بتكونو متطمنين ان اكيد ما حد شافه, عنا بتكون سرّيه العمليه على صحاب العلاقه والباقي مش مشكله يشوفوها :)

جد نورتيني بزيارتك...و بتمنى تضلك تعيدها

JuJu

wallah 2eshee be5awef :S
m3ek 7a2 bs yrajrej wala 2enoo swarna tseer bekul bait :$ m2saaaaah bsara7a :(

LOOOOOL ma3ek 7a2 :D

laaaa youm 3orsek ana beddy 2asawer 5alas wala yehemmek :)

 

لا حول ولا قوة إلا بالله بستهينوا بأعراض الناس!!

 

وتعليق أمجد بضحك.. هاها، فكرة روعة.

 

Rana

,يا ريتهم حاسين بخطوره اللي عملوه :$
عجبتني فكره امجد و اقتنعت فيها بصراحه :)