Things I Like To Whisper About

Would You Hear Me Whispering

العادي اللي صار مش عادي

مساء الخير و ربنا يتقبل طاعاتنا وطاعاتكم يارب

اليوم واحنا طالعين من صلاه الجمعه , طبعا ازمه سيارات واقفه و العالم معبيه الدنيا, سائق السياره اللي قدامنا شكله بعرف حد من اللي ماشيين, وقف شوي بعدين صف على جنب ونزل يسلم على صاحبه, ماما بتحكي يا الله شو انه محترم وبعرف بالاصول, اخوي حكالها سبحان الله كيف صار الاشي الغلط هو الاساس , يعني هو عمل اللي مفروض يعمله وهو انه يصف على جنب, بس صار عنا انه يضل واقف بنص الشارع و يأخرنا هو الطبيعي, وانه يعمل اللي مفروض ينعمل هو الاشي المش عادي.


من اول رمضان وانا كل يوم الي طلعه من الشغل, المفروض انه هالشي كتير منيح لان مش مطلوب ارجع عشغلي بعدها, يعني ترويحه بكير بشكل يومي, لكن للاسف كل يوم لازم يطلعلي اشي يخليني اتأخر مرات لبعد الدوام, الحمد لله محظوظه من يومي.


الاربعاء وانا بتحرك من قدام الشغل , اجت سياره مستعجله فاضطريت اكسر عالسياره اللي صافه اللي جنبي, حسيت اني ضربت فيه ضربه خفيفه, فما اخدت كتير بالموضوع وكملت مشواري وطول الطريق وانا بلوم حالي ليش ما نزلت و شفت شو صار و ريحت راسي, ولما وصلت هناك, بتطلع عالسياره لقيتها مشحوطه بالاسود من نص الباب الخلفي لمكان ما بنعبي بنزين, و الشحطه بس افركها بتروح, من هيك فهمت انها فعلا ضربه خفيفه بالاشي الخلفي للسياره , وبدت الافكار ,السياره اللي ضربت فيها ما بعرف نوعها بس من الصغار الخفاف, اللي بتحس لو تركيت عليهم ممكن ينهارو, و رجعت الوم حالي ولارتاح قررت ارجع للشغل وتاشوف السياره, انا بعرف انها سياره من الموظفين اللي عنا بس لمين ما بعرف, المهم خلصت الشغل اللي بدي اشتغله و رجعت لموقع الحدث , لقيت السياره ما فيها اشي , لكن الباب مطعوج :( , استغربت ان الباب مطعوج وسيارتي لونها ابيض والسياره التانيه لونها احمر وما اجا اشي احمر عسيارتي, صفيت و نزلت اسأل الامن اللي عالباب عن صاحب السياره, وانا بطريقي اله بديت افكر, شو اعمل اتصل ببابا ويلا افتح كروكه ويلا احكيله زبطها و بدفعلك, توكلت على الله وحكيت لحالها الامور بتبين.

سألت موظف الامن عن صاحب السياره, صار بدو يعرف ليش, حكيتله انت شو بدك بس احكيلي مين, قال اذا ضربتيها فعادي لسا قبل كم يوم دحلت سياره عليها و طعجتله الباب, انا بصراحه ارتحت وحكيتله خلص انت بس احكيلي لمين.

طلعت السياره لموظف من اللي بحب اتجنبهم و ما بحكيلهم صباح الخير, احنا عنا 95% من الموظفين للاسف شخصياتهم غريبه هاد اذا بنقدر نحكي عنها شخصيه, و اذا حكيت للواحد صباح الخير بكون بحبه وميته بدبديبه و بستلمني اسبوع بعدها ليفهم انها صباح الخير بريئه وانها ما راح تتكرر.

رحت لصاحبتي اللي بتشتغل مع هالموظف بنفس القسم وحكيتلها شو صار, نادته بدون ما تحكيله شو صار, ولما وصلنا لباب العماره حكتله اني ضربت بسيارته ضربه خفيفه, صار يحكي لا خلص بسيطه ومسامحه , حكتله لأ بدك تيجي عند السياره وتشوف شو صاير فيها, وبعد اصرار مني ومنها رضي يجي, سألته عن الباب حكالي لأ هاي ضربه قديمه, سيارته ما فيها اشي بالمره والحمد لله, بحكيلنا بالعكس شايفها حليانه بزياده بعد الضربه -اففففففففففففففففففففت هاي نغاشه موظفينا- حكيتله انا شفت ان ما فيها اشي و علشان الحلال والحرام حبيت انك تعرف , واضاف كم من جمله بنغاشه الجمله اللي قبل و ما صدقت وانا نخلص من الموضوع.

انا استكترت خير حالي بلحظتها واني عملت اشي كبير اني رجعت, اليوم لما صار الحوار مع اخوي فكرت فيها لقيت اني غلطانه وكان المفروض اني ما اتحرك و اكمل مشواري قبل ما اشوف شو صار بالسياره و اخبّر صاحبها, انقهرت من حالي كتير , معقول صرت من هدول الناس اللي بعملو الاشي اللي لازم ينعمل و بحملو الدنيا جميله انهم عملوها!!! من اللي صار عندهم الاشي العادي اشي خارق للطبيعه ونادر!!

ان شاء الله ما اكون منهم
:$



15 التعليقات :

بالعكس يا يوسبر, هاد شي كتير حلو يلي عملتي و أصلا لأي حد فينا تعرّض لهيك موقف لازم يعمل كتل ما عملتي .. لأ،و هاد الصح

خليكي متل ما إنتي و ما تخلي المجتمع يغّيرك "للأسوء" تحياتي

 

يا حرام على الاخطاء .. جد تسطيل مش معقول :
ويسبر
متل
لأنو

و شكرا

 

انا معك انه صح, لكن اني احس حالي عامله اشي كتير هاد اللي بحكي عنه, يعني اللي عملته المفروض اني اعمله ومااعمل غيره , واني اضل ماشيه بالول كتير غلط, بركي السياره لمراجع مثلا و مشي كيف بدي اوصلّه؟؟
كان اخدنالنا دعوه على اول رمضان :$

ان شاء الله اضل زي ما انا و احسّن من حالي :)

 

ههههههههههه هلأ شفت تعليق الاخطاء

بسيطه مش بيناتنا ...مدام المعنى وصل مش مشكله
صايمين شو بدنا نعمل :)

 

ويسبر : تقبل الله صيامك
يا ريت نص الناس تفكر انو تحمل حالها جميلة و تعمل منيح و رح نعتبرها سوبر و رح نتحمل جميلتهم بس هم يسووا منيح
انا من الناس اللي بنحكالها كل يوم و كل دقيقة يا الله شو انك هبلة ما تحمليها زيادة يعني شو انك كسرتي مراية سيارة و ما ترجعي الله لا يكسر حدا هو صاحب السيارة رح يفقر ؟
متلا يعني
بصراحة حاولت اتغير و حاولت اني اكون لئيمة شوي ما زبط معي الا اني اكون - بمسمى ايامنا هاي - هبلة
يعني اللي بعمل الصح من حالو و بدون خوف بكون اهبل و اللي بطنش و بكير راسوا بقولوا عنو شاطر
لا ضلي زي ما انتي هيك احسن

 

كل ما اجي اعلق بنسي عن شو الموضوع وبرجع بقرائو :(


حاسسو زي دعايات الMbc

بطلت اكتب انسيت :(
شكلي انشطبت :(

 

لأ عادي ..مو منهم اكيد ولا كان ما كتبتي هالبوست
مراجعة النفس دليل انو التصرف ما كان مقنغ الك وكمان انتي رجعتي تصرفتي صح

وقال مشان الاحتياط .. فكري قديش هالنوعية من الناس مزعجة و بتنرفز .. اكيد ما رح تصيري مهم :D

 

Jafra

منا ومنكم ان شاء الله :)

معك حق, كتير بتتغير الحياه لو هيك صار :$

ما بتقدري انك تتغيري, لاني انا كمان حاولت و ما قدرت, بالعكسحسيت بالذنب لمجرد اني فكرت اتغير :(

للاسف تغيرت معايير الاخلاق بهالزمن
وانت كمان لا تتغيري :)

قط البكتريا

له له له يا قط البكتريا
شو قصدك؟؟؟
يعني انا مواضيعي ممله وطويله ولا تلصق ابدا ابدا :(

همسة

ان شاء الله :)

مراجعه النفس كتيير ضروريه بكل التصرفات, وانا مع انك تتراجع عن عمل اذا لقيته غلط

انا شخصيا بكرهم :") علشان انصدمت لمّا حسيت حالي منهم

 

قط البكتريا

اه و الاصلي كمان :)

Anonymous

منا ومنكم يا رب :)

انا ما كان عندي مانع انشر التعليق ولكن بناءا على طلبك ما نشرته

وجهه نظرك بحترمها اكيد
ومن التعليق واضح انك دائما بتشرفني بالمدونه
فاهلا وسهلا فيك دائما :)

 

مرحبا
أنا خايف عملتي هيك بس لأنه رمضان
:)

انتي اعملتي بأخلاقك .. و الصح صح

فيه ناسوا بدعسوا بشر و بظلوا ماشيين و بهربوا كمان

 

اهلا امجد

لا ان شاء الله اني اكون هيك على طول :)

الحمد لله

 

elmabda2 mabda2.. b3'ad el nazar 3n el taree2a .. aham she ennek rj3te o ma tanashte el mawdoo3..

 

elmabda2 mabda2.. b3'ad el nazar 3n el taree2a .. aham she ennek rj3te o ma tanashte el mawdoo3..

 

yeah al7amdolellah rje3et :)
bs jad kteer nas saroo y7amlo el3alam jmeeleh bel2eshee 2elly elmafrood 2enhom y3meleoh