Things I Like To Whisper About

Would You Hear Me Whispering

رحلتنا :)




يوم الجمعه الماضيه رحنا انا وصاحباتي بالشغل رحله على جرش وعجلون
الصيف الماضي رحنا على الاثار بجرش وعجلون هالصيف قررنا نروح على الخضار اللي بجرش وعجلون

الحمد لله الرحله كانت بتجنن وكتير انبسطنا

بدينا يومنا بالقهوه الساده اللي جايبتها وحده من البنات و عالطريق اشترينا كعك وحمص وفلافل و شويه خضره و توجهنا لدبين, هناك عملتلنا وحده من البنات اللي مسكينه دايما بتعمللنا الساندويشات بالرحلات, انا ساعدتها باني فتحت الكعكات و هي كملت الشغل :)

افطرنا و صلينا الظهر جماعه و قعدنا نتحدث, وكل ما نجيب سيره الشغل نذكر بعض انا متفقين ما نجيب سيره الشغل واحنا طالعين لننساه.


بعديها انتقلنا لارض لاهل صاحبه النا بعنجره , قعدنا هناك شوي و طلنا الشيبس والمكسرات وهالاشياءات الزاكيه و ضلينا ناكل ونتحدث لصار موعد الغدا, الغدا المفروض يكون بموقع تخييم شبابي بعجلون , المخيم كتير كتير حلو, فيه شاليهات , ومرافق صحيه نظيفه - هاد اهم اشي - و خيم وبرك سباحه و ملعب كره سله , وفي مكان مخصص للاكل تغدينا فيه وجيبات موصيه عليهم صاحبتي من قبل بيوم من المطعم اللي جنب المخيم, واحنا بالطريق اتصلت فيهم بعد نص ساعه من وصولنا اجا الاكل, و الحمد لله الاكل كان بشهي :)

اكلنا و تمشينا و لعبنا و اكتشفنا الموقع و رحنا عالشاليه غسلنا واتوضينا و صلينا العصر وبعديها اتفقنا نرّوح و احنا بالطريق نقعدلنا بمكان ساعتين زمن , وبعدين نكمل لعمان

اللي صار انه واحنا بالطريق مرينا من جنب واحد ببيع بطيخ, قامت وحده من البنات حكت انها بدها تعزمنا على بطيخ....طيب كيف بدنا ناكل واحنا استخدمنا الشوك والمعالق بالمخيم؟؟؟
حكو بلا اتيكيت بلا هم....هو في ازكى من اكل البطيخ من القشره مباشره!!!

وفعلا هاد اللي صار....وقفنا عند البسطه و طلع الزلمه ببيع اراجيل , اعطانا طاوله وكراسي و وصوه اللي بأرجلو على اراجيل - بدينار الارجيله و حسب ما حكو انها كتير مزبّطه - المهم نزلنا و جابو البطيخه غسلوها و تبرعت وحده من الصبايا تقطع البطيخه و وزعت علينا البطيخ بصحون - الحمد لله انا ما كبيناهم بالمخيم - و اكلنا و شروطنا - يعني بس تصير وجوهنا مليانه بطيخ واحيانا مناخيرنا تصير مليانه بطيخ والارض وكلها بطيخ - قمنا غسلنا و مسحنا بالويت وايبس , وفجأه وحده من البنات جاي و معها ضمه حامله خضرا, و بدو ياكلو البنات, انا ما اكلت لاني ما بحبها هيك , بحبها مشويه, وضلينا قاعدين لقربت تغرب الشمس و رجعنا للزلمه الكراسي والطاوله واللي ما رضي ياخد فلوس عليهم, وحاسبوه عالاراجيل و روحنا عالبيت على صوت عبد الحليم باغنيه "زي الهوى" :)

كتير طلعنا رحلات من قبل انا وصاحباتي, بس هاي كانت من احلى الرحلات :) الحمد لله

اتركم مع الصور






















12 التعليقات :

شكلكم كتتير انبسطتو ... وطرطشتو الدنيا بطيخ :d

 

اهلا اهلا بقط البكتيريا :)

اه الحمد لله كتييييييييير انبسطنا
و عبينا الدنيا بطيخ :)

 

احلا ما في الموضوع صورة البطيخة شكلها بشهى

 

صبااح الخيير :)
الحمد لله إنكم إنبسطوا :) ....
و أهم شي غيرتوا جو :)....

بتمنالك نهار سعيد :)

 

Anonymous

الحمد لله طلعت كتير زاكيه وكان طعمها بشهي زي شكلها :)

رزان

يا صباح الورد
الحمد لله كتيييييييييييير انبسطنا
وان شاء الله يكون نهارك اسعد :)

 

ما شاءا لله
مبين من حيكك انها بتجنن
ولا في احلى من هيك رحل
مع اني لحد هلا ما عمري طلعت ير مع اهلي
ولما بيجو خوالي او اعمامي معنا
:S
بتصير شوشرة من الاطافيل

لازم شي يوم نعمل رحلة للمدونات
:)

 

غرت من رحلتكو..من الصور شكلها كاينه رحلة حلوة عن جد..خصوصي لما الواحد "يطلق العنان لنفسه".. بس بدي أسألك وين موقع التخييم بالزبط..أول مرة بعرف انه فيه هيك أماكن بعجلون..

 

eNAS

الحمد لله كانت بتجنن كتير...انا من بعد رحلات المدرسه لاشتغلت لرحت رحله بدون اهلي :)

بحب الرحلات العائليه كتير انا :)
فكره حلوه كتير...خلص لازم نرتبها

Dreamy Villager

اه والله كتير كتير حلوه وكتير انبسطنا
ما بعرف وين بالزبط بس قبل ما نوصل المخيم مرينا على محميه عجلون :)
كتير قريبه من المخيم المحميه

 

يا سلام ، يا هيك الرحل يا بلا اللهم لا حسد هههههههههههههه
اكتر شي حبيته الحمص الحاملة، هاي اكلتي المفضلة اللي مستعد اعيش عليها سنة بدون ما ازهق منها.
بس للاسف او مرة بسمع باسم "دبيان" بس ان شاءالله لازم رحها شي يوم.
بس عنجد الصور حلوة كتير وبتجنن، بس الحمد لله انكم انبسطوا

 

Mohammad

انا بحب الحامله مشويه, خضرا هيك مش كتير زاكيه, مع ان صاحباتي بحبوها هيك

منتزه دبين ما بتعرفه!!!
كتير معروف بحسه....خلص لازمتزوره قريب
الله يحلي ايامك و شكرا كتير :)

 

لوول

صارلي عمر معزومه على روحه لعجلون ومش عم بروح
وبدي اروح على عمان وبرضه مش ملاقيه وقت!!

نيالكم عن جد :)

 

مياسي

نصيحه مني روحي....كتير بتغيري جو و بتتحسن نفسيتك مع الهوا و الخضار

لازم نرتب قعده صبايا احنا المدونات عن قريب :)