Things I Like To Whisper About

Would You Hear Me Whispering

اول مره...واخر مره

كنت وانا مروحه من الجامعه امر على مجمع الزرقا القديم ومنه الى مجمع الزرقا الجديد مسافه 5 دقايق بالباص ب قرشين ونص - ايام ما كان لسا في استخدام للمبالغ الاقل من نصف دينار - المجمع القديم كله محلات اشرطه و كل واحد اله ذوقه الخاص بالاغاني فكل ما تمر من قدام محل بتسمع نوع اغاني شكل, محل محمد عبده, ومحل عبد الكريم عبد القادر - اللي ما كنت اعرفه قبل ما امر بمجمعات الزرقا - ومحل عراقي دبكات, ومحل عراقي حزايني, وبنصهم محل اشرطه اسلاميه و محاضرات.... و من بعيد بتسمع اصوات مختلطه ما بتعرف منها اشي بس متأكد 100% انها راح تسببلك خرق للطبله.



المجمع الجديد برضه كله محلات اشرطه بس ارقى شوي بتكون برضه لخبطه الاذواق بس كلها اغاني جديده, في محل كنت امر عنده كل شهر تقريبا اجمع عنده اغاني, و كنت عامله زي اشتراك كل اربع اشرطه بطلعلي شريط مجانا.
المحل فيه شب كتير محترم عمره ما تمادى او حاول يعلق او يرمي حكي, وخلص مع مرور الاشهر حفظني و حفظ اوقات مروري عليه.

عاده بجهز 12 اغنيه لان مدتهم بتتناسب مع مده الكاسيت, مره كنت مجهزه بس 11 اغنيه وما في شي ببالي فكررت اغنيه بحبها ولهلأ متزكريتها, كانت اغنيه ما بعرف لمين ولهلأ ما بعرف لمين اسمها " انا الغلطان ماش انت" لمطرب من المغرب العربي, المهم تاني يوم بس مريت اخد الشريط حكالي الشب انه ما كررلي الاغنيه وانه حطلي اغنيه على ذوقه و هو صار عارف ذوقي, انا ما حسيتها مشكله وحتى لما عرفت انها اغنيه على مملكتي السعيده لوائل كفوري برضه ما حسيت اشي غلط بالعكس انبسطت لاني حبيت الغنيه كتير, واستمريت اجمع اشرطه عند نفس الشب.

انا عاده بعطي الشب ورقه بخط ايدي عليها اسماء الاغاني و هو بس يعطيني الشريط بتكون الورقه موجوده مع الشريط و باخدهم , وكل مره على هالحال الا اخر مره عملت شريط عند الشب, روحت عالبيت و كان عنا دار خالتي , ودخلت بنت خالتي اللي اكبر مني ب 5 سنوات معي على غرفتي , وبفرجيها الشريط و مسكت الورقه افرجيها الاغاني اللي جمعتهم, واذ بالشب كاتبلي شعر حب وما حب وانتي و عيناكي ومن هالحكي, و حاططلي اوراق ورد بالورقه, انا زي اللي حد كب علي مي بارده و صرت ارج و قلبي يدق بسرعه, حسيت حالي زي اللي عامله اشي غلط, احساس بالذنب فضيع مش عارفه من وين اجا, بنت خالتي صارت تضحك وبتحكيلي شكله اول مره بصير معك هيك, سألتها ليش يعني عادي يصير هالشي؟؟ ما عرفت شو اعمل ناديت ماما و فرجيتها الورقه, ماما انصدمت لاني بحكيلها دايما عن الشب و انه ما عمره تمادى ولا حكالي كلمه زياده عن الحوار الطبيعي مع اي بائع, المهم هاي كانت اخر مره بجمع شريط عنده او عند اي واحد تاني, كنت اشوفه وانا ماره بين المجمعات بس عمره ما حكا معي ولا دايقني وانا كنت احاول ما تيجي عيني بعينه.





8 التعليقات :

ya walaaaaad ;)
wlk msh 2lelh ente :) hehehhehe .. bmza7 :) 3adee kter fee nas 3endha na2s 3ateefe :)
bs sara7a msh mwkef lw ana mkanek knt 36ool srt abkee !!! dayman hek e7na el banat bn7es bl zanb m3 eno walla ma bnkoon 3mleen wala 2eshe !! y3ne masaln kter b7es bl zanb lma yseer mo3akasat 3ala tlfoone w23teeh la baba ybahdel el motasel !! b7es ene 3amleh 3amleh !!!

 

Thanks Maroo for the sweet comment :D

After I published the post,ndemet...I didn't like it
I don't know why :"(

 

هاهاها
الشب حب يشعبر عن مشاعره! :)

يرحم ايام تجميع الاشرطة

 

Allouh

شفت المسكين, شعبر للناس الغلط :)

يا الله كانت ايام بتجنن....هلأ صار ممنوع و حقوق الطبع و محفوظه وهالحكي :)

 

حقوق طبع على مين ؟؟
ما هم المحلات نازلة تنسخ لابو موزة غير الانترنت

ليش الناس الغلط؟ :)

 

Allouh

اي محلات!!! احنا عالنت زي ما حكيت اللي بدنا اياه بنلاقيه على طول :)

الناس الغلط ...قصدي اللي ما اعطوه عين ولا عبرو شعبرته,و احبطو مشاعيره :$

 

الي بيعجبني في مدونتك إنها بسيطة وبتحكي قصة حقيقية..

والحقيقة إنه جو الأغاني بشكل عام فيه تحريك للمشاعر والناس الي بيشتغلوا في هذا المجال توقعي منهم أي شيء، نصيحتي لك دايما بالمصري " حرص ولا تخونش" ، يعني لا تمنعي نفسك بعمل الأشياء الي بتحبيها بس ديري بالك دايما لأنه تأتي دائما المشاكل من حيث لا نتوقع :)


عموما حصل خير ، والحل فعلا هو عدم الذهاب إلى هناك مرة أخرى! أنا عن نفسي بطلت أشتري شرايط.. خلاص.. الإنترنت جابلي العالم كله في المكتب والبيت، وأنا حاط رجل على رجل :) ولا حد يدوس لي على طرف ويعطيني دش بارد يدمر أعصابي

أشكرك على مرورك اليوم على مدونتي ، تحياتي.

 

هشام

شكرا كتير عالكلام اللطيف :$

الله يخليلنا النت....بكبسه زر اجد شريط بكون عندك :)

مدونتك رائعه وتستحق الزياره ....وانا دائما اتشرف بزيارتك لمدونتي :)