Things I Like To Whisper About

Would You Hear Me Whispering

وقف يا زمان



نفسي يكون عندي القدره اني اوقف الزمن لحظه, متزكرين كان يجي مسلسل على عمان التانيه, ايام العز ما قبل الساتيلايت و الخزعبلات الجديده, والله كانت ايام بتجنن عالقليله تحط عالقناه وتسهر عالفيلم مش زي هلأ بتضلك تقلب من ساعتين ونص ل 3 ساعات- نفس مدّه الفيلم- وبالاخر ما بتحضر اشي, شو كنت بحكي انا؟؟؟ اه اه مسلسل البنت اللي ابوها عباره عن منشور بلاستيكي جنب التخت بضوي و بصير يحكي معها, كانت بس تحط اصابعها على بعض توقف الزمن.

بدي تكون عندي هاي القوه الخارقه و خصوصا بس يكون في عنا اجتماع مع المدير, يعني بنص الحكي و هو بتلفلسف و بكزب اوقف الزمن امسك ورقه قد راسه الزقها بنص صباحه مكتوب عليها انا كزااااااااااااااااب.
او و هو بمدح بحاله اوقف الزمن الخمه 10 كفوف على خد واحد و ارجع اقعد مكاني و اطرقع باصابعي -هيك كانت ترجّع الزمن البنت- و اشوف رده فعلّه.

او لما يمشي تكسي من جنبي و يضل ماشي على نفس مستواي علشان ما يخليني اخد المسرب, بس لاني بنت -بتعرفو لساتها البنت صفه ناقصه مرفوعه بالسكون عند بعض جماعه- اوقف الزمن و فجأه يلاقيني قدّامه و على وجهه ابتسامه بنفكحيه دليل على الانتصار :)

او لما اكون بمكه مول و يجي شب قدامي من المسحولين اللي شعرهم منكوش, اوقف الزمن اكب عراسه سطل مي و افرقله شعره على جنب او من النص و الزق شعره تلزيق براسه , زي ولاد الابتدائي المرتبين ,و ارفعله بنطلونه واشد الحزام على اخر منطقه فيه.

بس اكون بموقف محرج و نفسي الارض تنشق وتبلعني, اوقف الزمن و اختفي من الجلسه نهائيا.

بديش احكي لما يصير في خطر على الارض اوقف الزمن واهزم العدو و انقذ الارض بتقلب قصه فيلم امريكي , عيب يعني الموضوع جدّي وما بدنا نقلبه تخويت :$



شكرا لمحمد اللي حكالي اسم المسلسل
Out Of This World


14 التعليقات :

يا عيني على ايام جوليا بطرس و كلوديا الشمالي.
على سيرة كلوديا، في اغنية "مش وئت إل-بدك بتفل..." فامرّات الواحد لازم يتحمّل قرف الناس. بس الشغلة إلها حدود. إللي بدي اقترحه كالتالي:
للمدير: إدفعي 10 ليرات لواحد سرسري ينفضه بدن.
لسوّاقين التكاسي: خلّي في سيارتك اكمن بيضة نية. و كل ما واحد يقعد يتهبّل زي هيك، اُلطشيه بيضة بنص خلقته.
للطنطات: إحكيله: إيش يا خول. إو، إذا بتعرفي أني سيارته، حطّي عليها ملصق علم الراينبو!
لمّا تكوني في موقف محرج: صيّحي: يعيش جلالة الملك...

 

Maf3oos

شكلك من زماااان مش جاي عالاردن...ب 10 ليرات يا دوب يتفّو بوجهه هالايام...الدنيا صارت غاليه.

لسواقين التكاسي...عجبتني الفكره, بس حسب ما سمعت ان سواقين التكاسي معهم جنوات " وفي لغه اخرى عصايه بيسبول" فازعل منه كتيييييير اهون من انهم يزعلو مني :$

علم الرينبو!!! ايش هاد ؟؟؟

الحل الاخير كتيييييير عجبني...هاد اللي راح ابدا فيه و ممكن استخدمه بجميع الحالات المذكوره سابقا :)

ويلكم Maf3oos

 

حلو الموضوع
خلي الواحد يفضفض

كان نفسي اوقف الزمن قبل القرارات اللى اتخدتها بحياتي و ما فكرت فيها كويس من اهمها قرار الغربة بغض النضر هل هوه كان خير او شر- لو وقفت الزمن وقتها وفكرت كويس بالوضيفة اللى كانت صاحتلي بالاردن و للاسف ارجعت و ما فكرت كويس لمن ارجعت اجازة من الاجازات و صحلي وضيفة ممتازة جدا كانت راس ترفعني تلات درجات مرة وحدة و رجعت فضلت الغربة لانها صارت شي بحياتك صعب ترجع تتاقلم طبعا تختلف من مغترب لاخر بس بتوقع الاغلب ما راح يرجع متل الاول و خصوصا مع انقطاع علاقات كتيرة ---- اوف اوف هاد اطلعت انا مدمر و انا مو عارف لو وقفت الزمان وقتها و فكرت مليون مرة قبل ما قررتها طبعا الاقتراحان حتكون ارجع و الجواب صعب

 

rainbow flag: the gays trademark

 

(---)

اهااااااا هاد توقيف زمن تاني اللي بتحكي عنه
انا خواني بحكو نفس الشي انه لو ما تغربو كان الوضع بكون احسن الهم, بس بعد ما تغربو ما بقدرو يفكرو يرجعو يستقرو هون :(

بالنسبه الي....لو وقفت الزمن كان اشياء كتييييييييره بحياتي تغيرت , واشخاص كتيييييير ما سمحتلهم يدخلو حياتي....يلا الحمد لله على كل شيء و المقدّر راح نشوفو راح نشوفو :)

Maf3oos
اهاااااا...ومنكم نستفيد....بدي اصير اراقب :)

 

سلام
انا مع مبعوص في اقتراحاته، بعدين بخمس ليرات ممكن تلاقي واحد ينفضه بدن و كمان خمسة لقتلة مساحين الجوخ الشغلة مش كثير غالية.
بس ما في داعي للرينبو لأنهم بكونوا لابسين زهري على فوشي و واضح شو هم
الاقتراح الاخير ممتاز و في ناس جربوه.
PS:
مبعوص: الاغنية لباسكال مشعلاني مش كلوديا الشمالي(صحيح وين ايامها؟)
ويسبر: اسم المسلسل: Out of this World

 

Alloh
اهلا محمد
واول شي شكرا عاسم المسلسل, انا بس ما اعرف اشي ما بهدى الا بس الاقيه
من امبارح وانا بدور عليه, فشكرا الك ريحتني :)

شكلك خبره بهالامور....شو بتشتغل حكيتلي ؟؟؟
الاقتراح الاخير جد عجبني ...وباول موقف راح اجربه :)

 

hehehehehe 3an jad mawdo3ek 7elooo w oslobek raheeeb loool batzakaroo hadaak elmosalsal kan 7elooo

loool

really enjoyed reading ur post

 

you are welcome :)
i am a search engine, just kidding :)

my info is in my blog

 

Ahlan SimSim
Thanks ya amar for your sweet words ::blushing::
I used to love this show

Allouh
loool @ search engine

I know your info ,I'm just kidding I say that because you know all the prices for the "massa7een el goo5" killer LOOOL

 

loool
in that manner i am a sub-contractor between the clients and the killers :D

 

Allouh
As a part time job :D
LOOOOL

 

:) حلوه نص صباحو